1 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠚꠦꠞꠣꠃꠘꠞ ꠇꠣꠍꠣꠔ ꠉꠤꠀ ꠔꠣꠞꠦ ꠇꠅ, ꠝꠣꠛꠥꠖ, ꠎꠦꠁꠘ ꠁꠛꠞꠣꠘꠤ ꠅꠇꠟꠞ ꠀꠟ꠆ꠟꠣ, ꠔꠣꠁꠘ ꠘꠤꠎꠦ ꠇꠁꠞꠣ, ꠀꠝꠣꠞ ꠄꠛꠣꠖꠔ ꠇꠞꠣꠞ ꠟꠣꠉꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠤ ꠖꠦꠅ। 2 ꠔꠣꠞꠣꠞꠦ ꠍꠣꠠꠔꠦ ꠞꠣꠎꠤ ꠘꠣ ꠅꠁꠀ ꠅꠈꠘꠅ ꠛꠣꠗꠣ ꠖꠤꠟꠦ, 3 ꠢꠥꠘꠤꠀ ꠞꠣꠈꠅ, ꠛꠘ꠆ꠖꠞ ꠝꠣꠎꠦ ꠔꠥꠝꠣꠞ ꠙꠡꠥꠁꠘ꠆ꠔꠞ ꠃꠙꠞꠦ, ꠊꠥꠠꠣꠁꠘ꠆ꠔꠞ, ꠉꠣꠗꠣꠁꠘ꠆ꠔꠞ, ꠃꠐ, ꠀꠞ ꠉꠞꠥ-ꠍꠣꠉꠟ, ꠝꠦꠠꠣꠁꠘ꠆ꠔꠞ ꠃꠙꠞꠦꠅ ꠀꠝꠤ ꠝꠣꠛꠥꠖꠦ ꠀꠔ ꠖꠤꠝꠥ, ꠛꠦꠕꠣꠄꠀ ꠛꠦꠝꠣꠞꠞ ꠝꠞꠇꠤ ꠍꠣꠠꠤꠝꠥ। 4 ꠅꠁꠟꠦ ꠀꠝꠤ ꠝꠣꠛꠥꠖꠦ ꠝꠤꠡꠞꠞ ꠀꠞ ꠛꠘꠤ ꠁꠍꠞꠣꠁꠟꠞ ꠙꠡꠥꠞ ꠝꠣꠎꠦ ꠔꠚꠣꠔ ꠇꠞꠝꠥ; ꠛꠘꠤ ꠁꠍꠞꠣꠁꠟꠞ ꠇꠥꠘꠥ ꠙꠡꠥ ꠝꠞꠔꠣ ꠘꠣꠄ।”

5 ꠀꠞ ꠝꠣꠛꠥꠖꠦ ꠡꠝꠄꠅ ꠑꠤꠇ ꠇꠞꠤꠀ ꠖꠤꠟꠣꠁꠟꠣ, ꠍꠣꠝꠘꠞ ꠇꠣꠁꠟ ꠔꠣꠁꠘ ꠖꠦꠡꠅ ꠁ ꠇꠣꠝ ꠇꠞꠛꠣ। 6 ꠢꠣꠍꠣꠃ ꠛꠣꠖꠞ ꠖꠤꠘ ꠝꠣꠛꠥꠖꠦ ꠅꠃꠟꠣꠃ ꠇꠞꠟꠣ, ꠔꠦꠃ ꠝꠤꠡꠞꠞ ꠢꠇ꠆ꠇꠟ ꠙꠡꠥ ꠝꠞꠤꠉꠦꠟꠣ, ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠄꠉꠥ ꠙꠡꠥꠅ ꠝꠞꠟꠣ ꠘꠣ। 7 ꠚꠦꠞꠣꠃꠘꠦ ꠝꠣꠘꠥꠡꠖꠤ ꠈꠛꠞ ꠟꠁꠀ ꠖꠦꠈꠟ, ꠛꠘꠤ ꠁꠍꠞꠣꠁꠟꠞ ꠄꠉꠥ ꠙꠡꠥꠅ ꠝꠞꠍꠂꠘ ꠘꠣ; ꠔꠣ-ꠅ ꠔꠣꠞ ꠖꠤꠟ ꠙꠣꠡꠣꠘ ꠞꠁꠟ, ꠢꠦ ꠝꠣꠘꠡꠞꠦ ꠍꠣꠠꠟ ꠘꠣ।

8 ꠅꠃ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, “ꠔꠥꠝꠞꠣ ꠖꠥꠁꠅꠎꠘꠦ ꠝꠥꠁꠐ ꠜꠞꠤꠀ ꠃꠘ꠆ꠖꠣꠟꠞ ꠍꠣꠟꠤ ꠀꠘꠅ, ꠀꠘꠤꠀ ꠝꠥꠍꠣꠄ ꠅꠃ ꠍꠣꠟꠤꠞꠦ ꠚꠦꠞꠣꠃꠘꠞ ꠍꠣꠝꠘꠦ ꠃꠙꠞꠦꠖꠤ ꠍꠤꠐꠣꠁ ꠖꠦꠅ। 9 ꠖꠦꠈꠛꠣꠄꠘꠦ, ꠁꠔꠣ ꠢꠣꠞꠣ ꠝꠤꠡꠞ ꠖꠦꠡꠞ ꠝꠣꠎꠦ ꠙꠣꠔꠟꠣ ꠗꠥꠁꠟ ꠅꠁꠀ ꠢꠇꠟ ꠎꠣꠉꠣꠞ ꠝꠣꠘꠥꠡ ꠀꠞ ꠙꠡꠥꠁꠘ꠆ꠔꠞ ꠉꠔꠞꠅ ꠉꠎꠛꠤ ꠛꠤꠡ-ꠚꠥꠞꠤ ꠅꠁꠛ।” 10 ꠔꠦꠃ ꠔꠣꠞꠣ ꠃꠘ꠆ꠖꠣꠟꠞ ꠍꠣꠟꠤ ꠀꠘꠤꠀ ꠚꠦꠞꠣꠃꠘꠞ ꠍꠣꠝꠘꠦ ꠃꠛꠣꠁꠀ, ꠝꠥꠍꠣꠄ ꠃꠙꠞꠦꠖꠤ ꠍꠤꠐꠣꠁ ꠖꠤꠟꠣ, ꠄꠔꠦ ꠝꠣꠘꠡꠞ ꠀꠞ ꠙꠡꠥꠁꠘ꠆ꠔꠞ ꠉꠔꠞꠅ ꠛꠤꠡ-ꠚꠥꠞꠤ ꠚꠥꠐꠤꠟ। 11 ꠀꠞ ꠅꠃ ꠚꠥꠞꠤꠞ ꠟꠣꠉꠤ ꠎꠣꠖꠥꠉꠤꠞ ꠅꠇꠟꠦ ꠝꠥꠍꠣꠞ ꠍꠣꠝꠘꠦ ꠃꠛꠣꠁꠔꠣ ꠙꠣꠞꠟꠣ ꠘꠣ, ꠢꠇꠟ ꠝꠤꠡꠞꠤ ꠀꠞ ꠎꠣꠖꠥꠉꠤꠞ ꠅꠇꠟꠞ ꠉꠔꠞꠅ-ꠅ ꠛꠤꠡ-ꠚꠥꠞꠤ ꠅꠁꠟ। 12 ꠅꠁꠟꠦ ꠝꠣꠛꠥꠖꠦ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟꠣ। ꠢꠦ ꠄꠞꠣꠞ ꠝꠣꠔꠦ ꠇꠣꠘ ꠖꠤꠟ ꠘꠣ, ꠎꠦꠟꠣ ꠝꠣꠛꠥꠖꠦ ꠀꠉꠦ ꠇꠁꠍꠟꠣ।

13 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠛꠤꠀꠘꠦ ꠃꠑꠤꠀ ꠚꠦꠞꠣꠃꠘꠞ ꠍꠣꠝꠘꠦ ꠃꠛꠣꠁꠀ ꠅꠃꠟꠣ ꠇꠁꠅ, ꠝꠣꠛꠥꠖ, ꠎꠦꠁꠘ ꠁꠛꠞꠣꠘꠤ ꠅꠇꠟꠞ ꠀꠟ꠆ꠟꠣ, ꠔꠣꠁꠘ ꠘꠤꠎꠦ ꠇꠁꠞꠣ, ꠀꠝꠣꠞ ꠄꠛꠣꠖꠔ ꠇꠞꠣꠞ ꠟꠣꠉꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠤ ꠖꠦꠅ। 14 ꠘꠣꠁꠟꠦ ꠁꠚꠤꠞꠣ ꠀꠝꠤ ꠔꠥꠝꠣꠞ, ꠔꠥꠝꠣꠞ ꠃꠎꠤꠞ-ꠘꠣꠎꠤꠞ ꠀꠞ ꠔꠥꠝꠣꠞ ꠙ꠆ꠞꠎꠣ ꠅꠇꠟꠞ ꠝꠣꠎꠦ ꠀꠝꠣꠞ ꠢꠇ꠆ꠇꠟ ꠎꠣꠔꠞ ꠉꠎꠛ ꠍꠣꠠꠤꠝꠥ। ꠔꠦꠃ ꠔꠥꠝꠤ ꠛꠥꠎꠛꠣꠄ, ꠢꠣꠞꠣ ꠖꠥꠘꠤꠀꠁꠔ ꠀꠝꠣꠞ ꠢꠝꠣꠘꠤ ꠇꠦꠃ ꠘꠣꠁ। 15 ꠄꠞ ꠀꠉꠦꠃ ꠀꠝꠤ ꠀꠝꠣꠞ ꠀꠔ ꠛꠣꠠꠣꠁꠀ ꠛꠦꠕꠣꠄꠀ ꠝꠞꠇꠤ ꠖꠤꠀ ꠔꠥꠝꠣꠞꠦ ꠀꠞ ꠔꠥꠝꠣꠞ ꠙ꠆ꠞꠎꠣ ꠅꠇꠟꠞꠦ ꠝꠣꠞꠔꠣꠝ ꠙꠣꠞꠟꠣꠝ ꠅꠘꠦ, ꠔꠥꠝꠤ ꠖꠥꠘꠤꠀꠁ ꠕꠣꠇꠤ ꠛꠤꠘꠣꠡ ꠅꠁꠉꠦꠟꠣꠄ ꠅꠘꠦ। 16 ꠀꠍꠟꠦ ꠄꠞꠟꠣꠉꠤꠃ ꠀꠝꠤ ꠔꠥꠝꠣꠞꠦ ꠖꠥꠘꠤꠀꠁꠔ ꠅꠔꠖꠤꠘ ꠛꠣꠌꠣꠁꠍꠤ, ꠎꠣꠔꠦ ꠔꠥꠝꠣꠞꠦ ꠀꠝꠣꠞ ꠟꠤꠟꠣ-ꠈꠦꠟꠣ ꠖꠦꠈꠣꠁ, ꠀꠞ ꠢꠣꠞꠣ ꠖꠥꠘꠤꠀꠁꠔ ꠀꠝꠣꠞ ꠘꠣꠝ ꠎꠣꠁꠞ ꠅꠄ। 17 ꠔꠥꠝꠤ ꠅꠈꠘꠅ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠍꠣꠠꠞꠣꠄ ꠘꠣ, ꠔꠥꠝꠣꠞ ꠛꠦꠐꠣꠉꠤꠞꠤ ꠖꠦꠈꠣꠁꠞꠣꠄ, 18 ꠔꠦ ꠖꠦꠈꠤꠅ, ꠇꠣꠁꠟ ꠁ ꠡꠝꠄꠄ ꠀꠝꠤ ꠅꠃ ꠟꠣꠈꠣꠘ ꠢꠤꠟ-ꠔꠥꠚꠣꠘ ꠀꠞ ꠝꠦꠊ ꠖꠤꠝꠥ, ꠎꠦꠔꠣ ꠝꠤꠡꠞꠞ ꠎꠘꠝ ꠕꠣꠇꠤ ꠀꠁꠎ ꠙꠞ꠆ꠎꠘ꠆ꠔ ꠇꠥꠘꠥꠖꠤꠘ ꠅꠁꠍꠦ ꠘꠣ। 19 ꠄꠞꠟꠣꠉꠤ ꠛꠘ꠆ꠖꠞ ꠝꠣꠎꠦ ꠔꠥꠝꠣꠞ ꠙꠡꠥꠁꠘ ꠀꠞ ꠎꠔꠔꠣ ꠀꠍꠦ, ꠁꠔꠣꠞꠦ ꠀꠘꠤꠀ ꠊꠞꠅ ꠢꠣꠞꠣꠅ; ꠝꠣꠘꠥꠡ ꠛꠣ ꠙꠡꠥꠁꠘ ꠎꠦꠔꠣ ꠊꠞꠅ ꠢꠣꠝꠣꠁꠔꠣ ꠘꠣꠄ, ꠁꠔꠣꠞ ꠃꠙꠞꠦ ꠢꠤꠟ ꠙꠠꠤꠀ ꠢꠇ꠆ꠇꠟꠐꠤ ꠝꠞꠛꠣ।” 20 ꠔꠦꠃ ꠚꠦꠞꠣꠃꠘꠞ ꠃꠎꠤꠞ-ꠘꠣꠎꠤꠞꠞ ꠝꠣꠎꠦ ꠎꠦꠞꠣ ꠝꠣꠛꠥꠖꠞ ꠎꠛꠣꠘꠦ ꠒꠞꠣꠁꠟꠣ, ꠔꠣꠞꠣ ꠎꠟꠖꠤ ꠇꠞꠤ ꠘꠤꠎꠞ ꠉꠥꠟꠣꠝ ꠀꠞ ꠙꠡꠥꠁꠘ꠆ꠔꠞꠦ ꠊꠞꠞ ꠜꠤꠔꠞꠦ ꠀꠘꠣꠁꠟꠣ। 21 ꠅꠁꠟꠦ ꠝꠣꠛꠥꠖꠞ ꠎꠛꠣꠘꠞꠦ ꠎꠦꠔꠣꠄ ꠖꠣꠝ ꠖꠤꠟ ꠘꠣ, ꠔꠣꠞꠣꠞ ꠉꠥꠟꠣꠝ ꠀꠞ ꠙꠡꠥꠁꠘ꠆ꠔꠞꠦ ꠛꠘ꠆ꠖꠞ ꠝꠣꠎꠦ ꠕꠁꠟ।

22 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠀꠍꠝꠣꠘꠞ ꠛꠣꠄ ꠘꠤꠎꠞ ꠀꠔ ꠛꠣꠠꠣꠅ, ꠔꠦꠃ ꠝꠤꠡꠞꠞ ꠢꠇ꠆ꠇꠟ ꠎꠣꠉꠣꠔ ꠢꠤꠟ-ꠔꠥꠚꠣꠘ ꠅꠁꠛ, ꠝꠤꠡꠞꠞ ꠝꠣꠘꠥꠡ, ꠙꠡꠥ ꠀꠞ ꠈꠦꠔꠞ ꠢꠇꠟ ꠉꠣꠍ-ꠉꠣꠍꠣꠟꠤꠞ ꠃꠙꠞꠦ ꠁꠔꠣ ꠙꠠꠛ।” 23 ꠅꠃ ꠝꠥꠍꠣꠄ ꠔꠣꠘ ꠀꠔꠞ ꠟꠣꠑꠤ ꠃꠙꠞꠦꠖꠤ ꠔꠥꠟꠟꠣ, ꠝꠣꠛꠥꠖꠦ ꠝꠤꠡꠞ ꠖꠦꠡꠞ ꠃꠙꠞꠦ ꠝꠦꠊꠞ ꠒꠣꠇ-ꠎꠤꠟꠇꠣꠘꠤꠞ ꠟꠉꠦ ꠢꠤꠟ-ꠔꠥꠚꠣꠘ ꠖꠦꠅꠀꠁꠟꠣ; ꠀꠞ ꠀꠍꠝꠣꠘꠤ ꠑꠣꠐꠣ ꠎꠝꠤꠘꠅ ꠙꠠꠟ। 24 ꠅꠃ ꠢꠤꠟꠞ ꠟꠉꠦ ꠝꠦꠊꠞ ꠎꠤꠟꠇꠣꠘꠤ ꠀꠞ ꠑꠣꠐꠣꠅ ꠀꠍꠤꠟ। ꠁ ꠟꠣꠈꠣꠘ ꠉꠎꠛꠤ ꠢꠤꠟ-ꠔꠥꠚꠣꠘ ꠝꠤꠡꠞ ꠖꠦꠡꠞ ꠎꠘꠝ ꠕꠣꠇꠤ ꠇꠥꠘꠥꠖꠤꠘꠅ ꠅꠁꠍꠦ ꠘꠣ। 25 ꠢꠣꠞꠣ ꠝꠤꠡꠞ ꠖꠦꠡꠞ ꠛꠘ꠆ꠖꠞ ꠝꠣꠎꠞ ꠢꠇ꠆ꠇꠟ ꠝꠣꠘꠥꠡ ꠀꠞ ꠙꠡꠥꠁꠘ꠆ꠔꠞ ꠃꠙꠞꠦꠅ ꠈꠥꠛ ꠎꠥꠞꠦ ꠎꠥꠞꠦ ꠢꠤꠟ ꠙꠠꠟ, ꠀꠞ ꠈꠦꠔꠞ ꠢꠇꠟ ꠚꠡꠟ ꠘꠡ꠆ꠐ ꠅꠁꠉꠦꠟ ꠀꠞ ꠢꠇꠟ ꠉꠣꠍ-ꠉꠣꠍꠣꠟꠤꠅ ꠜꠣꠋꠉꠤ ꠉꠦꠟ। 26 ꠈꠣꠟꠤ ꠛꠘꠤ ꠁꠍꠞꠣꠁꠟꠞ ꠛꠡꠔ ꠈꠣꠘꠣ ꠉꠥꠡꠘ ꠄꠟꠣꠇꠣꠔ ꠢꠤꠟ-ꠔꠥꠚꠣꠘ ꠅꠁꠟ ꠘꠣ।

27 ꠛꠣꠖꠦ ꠚꠦꠞꠣꠃꠘꠦ ꠝꠣꠘꠥꠡ ꠙꠣꠑꠣꠁꠀ ꠝꠥꠍꠣ ꠀꠞ ꠢꠣꠞꠥꠘꠞꠦ ꠀꠘꠣꠁꠀ ꠇꠁꠟ, “ꠁꠚꠤꠞꠣ ꠀꠝꠤ ꠅꠙꠞꠣꠗ ꠇꠞꠍꠤ। ꠝꠣꠛꠥꠖ ꠔ ꠙꠣꠇ-ꠙꠛꠤꠔ꠆ꠞ, ꠅꠁꠟꠦ ꠀꠝꠤ ꠀꠞ ꠀꠝꠣꠞ ꠙ꠆ꠞꠎꠣ ꠅꠇꠟ ꠅꠙꠞꠣꠗꠤ। 28 ꠔꠦ ꠉꠎꠛꠤ ꠝꠦꠊꠞ ꠒꠣꠇ ꠀꠞ ꠢꠤꠟ-ꠔꠥꠚꠣꠘ ꠔ ꠛꠃꠔ ꠅꠁꠍꠦ, ꠀꠞ ꠎꠣꠞꠔꠣꠝ ꠙꠣꠞꠤꠀꠞ ꠘꠣ। ꠄꠞꠟꠣꠉꠤ ꠀꠝꠤ ꠅꠈꠘ ꠔꠥꠝꠞꠣꠞꠦ ꠍꠣꠠꠤ ꠖꠤꠝꠥ, ꠀꠞ ꠀꠐꠇꠣꠁꠔꠣꠝ ꠘꠣꠄ। ꠔꠥꠝꠞꠣ ꠀꠝꠣꠞ ꠟꠣꠉꠤ ꠝꠣꠛꠥꠖꠞ ꠉꠦꠍꠦ ꠝꠤꠘꠔ ꠇꠞꠅ।”

29 ꠝꠥꠍꠣꠄ ꠔꠣꠞꠦ ꠇꠁꠟꠣ, “ꠀꠝꠤ ꠐꠣꠃꠘꠞ ꠛꠣꠁꠞꠦ ꠉꠤꠀꠃ ꠝꠣꠛꠥꠖꠞ ꠉꠦꠍꠦ ꠀꠔ ꠔꠥꠟꠝꠥ, ꠔꠦꠃ ꠝꠦꠊꠞ ꠒꠣꠇ, ꠢꠤꠟ-ꠔꠥꠚꠣꠘ ꠛꠘ꠆ꠖ ꠅꠁꠎꠤꠛ, ꠎꠣꠔꠦ ꠀꠙꠘꠦ ꠛꠥꠎꠔꠣ ꠙꠣꠞꠂꠘ ꠁ ꠖꠥꠘꠤꠀꠁ ꠔ ꠝꠣꠛꠥꠖꠞ। 30 ꠅꠁꠟꠦ ꠀꠝꠤ ꠔ ꠎꠣꠘꠤ, ꠀꠙꠘꠦ ꠛꠣ ꠀꠙꠘꠣꠞ ꠃꠎꠤꠞ-ꠘꠣꠎꠤꠞ ꠅꠇꠟꠦ ꠅꠈꠘꠅ ꠀꠟ꠆ꠟꠣ ꠝꠣꠛꠥꠖꠞꠦ ꠒꠞꠣꠁꠞꠣ ꠘꠣ।”

31 ꠁ ꠡꠝꠄ ꠈꠦꠔꠞ ꠢꠇꠟ ꠘꠣꠟꠤꠀ ꠉꠣꠍ ꠀꠞ ꠛꠣꠞ꠆ꠟꠤ ꠚꠡꠟ ꠘꠡ꠆ꠐ ꠅꠁꠉꠦꠟ, ꠇꠣꠞꠘ ꠘꠣꠟꠤꠀ ꠉꠣꠍꠞ ꠚꠥꠟ ꠀꠞ ꠛꠣꠞ꠆ꠟꠤꠞ ꠍꠠꠣ ꠛꠣꠞ ꠅꠁꠉꠦꠍꠤꠟ। 32 ꠅꠁꠟꠦ ꠇꠥꠘꠥꠎꠣꠔꠞ ꠉꠝꠞ ꠉꠣꠍ ꠛꠠ ꠘꠣ ꠅꠀꠄ ꠁꠔꠣꠞ ꠈꠦꠔꠤ ꠅꠁꠟ ꠘꠣ।

33 ꠔꠦꠃ ꠝꠥꠍꠣꠄ ꠚꠦꠞꠣꠃꠘꠞ ꠍꠣꠝꠘꠦ ꠕꠣꠇꠤ ꠐꠣꠃꠘꠞ ꠛꠣꠞꠦ ꠉꠤꠀ ꠝꠣꠛꠥꠖꠞ ꠉꠦꠍꠦ ꠀꠔ ꠔꠥꠟꠟꠣ, ꠟꠉꠦ ꠟꠉꠦ ꠝꠦꠊꠞ ꠒꠣꠇ, ꠢꠤꠟ-ꠔꠥꠚꠣꠘ ꠛꠘ꠆ꠖ ꠅꠁꠟ, ꠝꠦꠊꠞ ꠎꠠꠤꠅ ꠛꠘ꠆ꠖ ꠅꠁꠉꠦꠟ। 34 ꠅꠁꠟꠦ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞ ꠅꠇꠟꠦ ꠝꠦꠊ, ꠝꠦꠊꠞ ꠒꠣꠇ ꠀꠞ ꠢꠤꠟ ꠙꠠꠣ ꠛꠘ꠆ꠖ ꠅꠁꠉꠦꠍꠦ ꠖꠦꠈꠤꠀ ꠔꠣꠞꠣꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟꠣ। ꠚꠦꠞꠣꠃꠘꠦ ꠢꠤꠞꠛꠣꠞ ꠉꠥꠘꠣ ꠇꠞꠟ। 35 ꠔꠣꠞ ꠖꠤꠟ ꠙꠣꠡꠣꠘ ꠅꠁꠎꠣꠅꠀꠄ, ꠢꠦ ꠛꠘꠤ ꠁꠍꠞꠣꠁꠟꠞꠦ ꠍꠣꠠꠟ ꠘꠣ, ꠝꠣꠛꠥꠖꠦ ꠀꠉꠦ ꠎꠦꠟꠣ ꠝꠥꠍꠣꠞꠦ ꠇꠁꠍꠟꠣ।