1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠚꠦꠞꠣꠃꠘꠞ ꠉꠦꠍꠦ ꠎꠣꠅ; ꠀꠝꠤ ꠔ ꠔꠣꠞ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞꠞ ꠖꠤꠟꠞꠦ ꠙꠣꠡꠣꠘ ꠇꠞꠤꠟꠤꠍꠤ, ꠎꠣꠔꠦ ꠔꠣꠞꠣꠞ ꠍꠣꠝꠘꠦ ꠀꠝꠤ ꠀꠝꠣꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠣꠁꠔꠣꠝ ꠙꠣꠞꠤ। 2 ꠀꠝꠤ ꠝꠤꠡꠞꠤ ꠅꠇꠟꠞ ꠃꠙꠞꠦ ꠎꠦꠔꠣ ꠎꠦꠔꠣ ꠇꠑꠤꠘ ꠉꠎꠛ ꠖꠤꠍꠤ, ꠔꠣꠞꠣꠞ ꠝꠣꠎꠦ ꠇꠥꠖꠞꠔꠤ ꠎꠦꠔꠣ ꠟꠤꠟꠣ-ꠈꠦꠟꠣ ꠎꠣꠁꠞ ꠇꠞꠍꠤ, ꠔꠥꠝꠤ ꠁꠔꠣ ꠔꠥꠝꠣꠞ ꠀꠅꠟꠣꠖ ꠀꠞ ꠘꠣꠔꠤ-ꠙꠥꠔꠤꠞ ꠉꠦꠍꠦ ꠉꠚ ꠇꠞꠔꠣꠄ ꠙꠣꠞ, ꠀꠞ ꠀꠝꠤꠃ ꠎꠦꠘ ꠝꠣꠛꠥꠖ ꠁꠐꠣ ꠛꠥꠎꠔꠣꠄ ꠙꠣꠞ।”

3 ꠔꠦꠃ ꠝꠥꠍꠣ ꠀꠞ ꠢꠣꠞꠥꠘꠦ ꠚꠦꠞꠣꠃꠘꠞ ꠉꠦꠍꠦ ꠉꠤꠀ ꠇꠁꠟꠣ, “ꠀꠟ꠆ꠟꠣ, ꠎꠦꠁꠘ ꠁꠛꠞꠣꠘꠤ ꠅꠇꠟꠞ ꠝꠣꠛꠥꠖ, ꠔꠣꠁꠘ ꠘꠤꠎꠦ ꠇꠁꠞꠣ, ꠔꠥꠝꠤ ꠀꠝꠣꠞ ꠍꠣꠝꠘꠦ ꠝꠣꠕꠣ ꠘꠥꠀꠁꠔꠦ ꠀꠞ ꠇꠔꠖꠤꠘ ꠢꠞꠣꠁꠟ ꠞꠁꠔꠣꠄ? ꠢꠥꠘꠅ, ꠔꠥꠝꠤ ꠀꠝꠣꠞ ꠛꠘ꠆ꠖꠣ ꠅꠇꠟꠞꠦ ꠀꠝꠣꠞ ꠄꠛꠣꠖꠔ ꠇꠞꠣꠞ ꠟꠣꠉꠤ ꠍꠣꠠꠤ ꠖꠦꠅ। 4 ꠔꠣꠞꠣꠞꠦ ꠍꠣꠠꠔꠦ ꠞꠣꠎꠤ ꠘꠣ ꠅꠁꠟꠦ ꠖꠦꠈꠤꠅ, ꠀꠝꠤ ꠇꠣꠁꠟ ꠔꠥꠝꠣꠞ ꠡꠤꠝꠣꠘꠣꠔ ꠙꠋꠉꠙꠣꠟ ꠅꠇꠟ ꠍꠣꠠꠤꠝꠥ। 5 ꠁꠔꠣꠄ ꠀꠁꠀ ꠔꠥꠝꠣꠞ ꠀꠡ꠆ꠔꠣ ꠎꠝꠤꠘꠞꠦ ꠅꠃꠟꠣ ꠛꠦꠞꠤꠟꠤꠛꠣ, ꠇꠥꠘꠥ ꠝꠣꠘꠡꠦ ꠝꠣꠐꠤ ꠖꠦꠈꠔ ꠙꠣꠞꠔ ꠘꠣꠄ। ꠢꠤꠟ-ꠔꠥꠚꠣꠘ ꠕꠣꠇꠤ ꠎꠔꠔꠣ ꠛꠣꠌꠤꠉꠦꠍꠦ, ꠈꠦꠔꠞ ꠝꠣꠎꠦ ꠎꠔ ꠉꠣꠍ-ꠉꠣꠍꠣꠟꠤ ꠞꠁꠍꠦ, ꠁꠔꠣ ꠢꠇ꠆ꠇꠟꠔꠣ ꠔꠣꠞꠣ ꠈꠣꠁꠟꠤꠛꠣ। 6 ꠔꠥꠝꠣꠞ ꠘꠤꠎꠞ ꠊꠞ-ꠛꠣꠠꠤ, ꠔꠥꠝꠣꠞ ꠃꠎꠤꠞ-ꠘꠣꠎꠤꠞꠞ ꠊꠞꠣꠁꠘ, ꠀꠞ ꠢꠇ꠆ꠇꠟ ꠝꠤꠡꠞꠤ ꠅꠇꠟꠞ ꠊꠞꠣꠁꠘ ꠜꠞꠤꠀ ꠎꠣꠝ ꠅꠁꠎꠤꠛꠣ। ꠔꠥꠝꠣꠞ ꠝꠄ-ꠝꠥꠞꠛ꠆ꠛꠤ ꠀꠞ ꠔꠣꠞꠣꠞ ꠛꠣꠚ-ꠖꠣꠖꠣ ꠅꠇꠟꠦꠅ ꠖꠥꠘꠤꠀꠁꠔ ꠔꠣꠞꠣꠞ ꠎꠘꠝ ꠕꠣꠇꠤ ꠀꠁꠎ ꠙꠞ꠆ꠎꠘ꠆ꠔ ꠇꠥꠘꠥꠖꠤꠘ ꠅꠃꠟꠣ ꠖꠦꠈꠍꠂꠘ ꠘꠣ।” ꠅꠈꠣꠘ ꠇꠁꠀꠃ ꠔꠣꠁꠘ ꠝꠥꠈ ꠚꠤꠞꠣꠁꠀ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠛꠣꠞꠦ ꠉꠦꠟꠣꠉꠤ।

7 ꠚꠦꠞꠣꠃꠘꠞ ꠃꠎꠤꠞ-ꠘꠣꠎꠤꠞꠦ ꠔꠣꠞꠦ ꠇꠁꠟꠣ, “ꠁ ꠛꠦꠐꠣꠄ ꠀꠞ ꠇꠔꠖꠤꠘ ꠀꠝꠞꠣꠞꠦ ꠍꠣꠔꠣꠁꠔ? ꠅꠔꠣꠞ ꠝꠣꠛꠥꠖ ꠀꠟ꠆ꠟꠣꠞ ꠄꠛꠣꠖꠔꠞ ꠟꠣꠉꠤ ꠅꠔꠣꠞꠦ ꠍꠣꠠꠤ ꠖꠦꠃꠇ꠆ꠇꠣ। ꠀꠙꠘꠦ ꠅꠈꠘꠅ ꠇꠥꠘ꠆ꠔꠣ ꠛꠥꠎꠞꠣ ꠘꠣ ꠘꠤ, ꠀꠡ꠆ꠔꠣ ꠝꠤꠡꠞ ꠖꠦꠡꠘꠥ ꠍꠣꠞꠈꠣꠞ ꠅꠁꠎꠣꠞ?” 8 ꠅꠃ ꠚꠦꠞꠣꠃꠘꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠢꠤꠞꠛꠣꠞ ꠀꠘꠣꠁꠟ, ꠀꠘꠣꠁꠀ ꠇꠁꠟ, “ꠔꠥꠝꠞꠣ ꠎꠣꠅꠉꠤ, ꠉꠤꠀ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠄꠛꠣꠖꠔ ꠇꠞꠅ। ꠅꠁꠟꠦ ꠇꠦ ꠇꠦ ꠎꠣꠁꠔꠣꠄ ꠌꠣꠁꠞꠣꠄ?” 9 ꠝꠥꠍꠣꠄ ꠇꠁꠟꠣ, “ꠀꠝꠞꠣ ꠔ ꠝꠣꠛꠥꠖꠞ ꠘꠣꠝꠦ ꠢꠎꠅ ꠎꠣꠁꠞꠣꠝ। ꠔꠦ ꠀꠝꠞꠣꠞ ꠢꠥꠞꠥꠔ꠆ꠔꠣꠁꠘ, ꠝꠥꠞꠛ꠆ꠛꠤ, ꠙꠥꠀ-ꠙꠥꠠꠤꠘ ꠀꠞ ꠉꠞꠥ-ꠍꠣꠉꠟ ꠟꠁꠀ ꠎꠣꠁꠝꠥ।” 10 ꠚꠦꠞꠣꠃꠘꠦ ꠇꠁꠟ, “ꠀꠁꠌ꠆ꠍꠣ, ꠀꠝꠤ ꠎꠥꠖꠤ ꠢꠣꠍꠣꠃ ꠔꠥꠝꠞꠣꠞꠦ ꠢꠥꠞꠥꠔ꠆ꠔꠣ-ꠝꠥꠞꠥꠔ꠆ꠔꠣ ꠖꠤꠀ ꠍꠣꠠꠤ ꠖꠦꠁ, ꠔꠦ ꠔꠥꠝꠞꠣꠞ ꠅꠃ ꠝꠣꠛꠥꠖꠅ ꠎꠣꠘꠥ ꠔꠥꠝꠞꠣꠞ ꠟꠉꠦ ꠅꠁꠀ ꠎꠣꠄꠉꠤ। ꠈꠛꠞꠖꠣꠞ! ꠔꠥꠝꠞꠣꠞ ꠝꠔꠟꠛ ꠔ ꠜꠣꠟꠣ ꠘꠣꠄ। 11 ꠘꠣ, ꠁꠟꠣ ꠔ ꠅꠁꠔ ꠘꠣꠄ, ꠔꠥꠝꠞꠣꠞ ꠢꠇ꠆ꠇꠟꠔꠣ ꠘꠤꠔꠦ ꠖꠤꠔꠣꠝ ꠘꠣꠄ। ꠔꠥꠝꠞꠣ ꠎꠦꠛꠟꠣ ꠎꠣꠁꠔꠣꠄꠃ ꠌꠣꠁꠞꠣꠄ, ꠔꠦ ꠈꠣꠟꠤ ꠛꠦꠐꠣꠁꠘ ꠎꠣꠅꠉꠤ।” ꠅꠈꠣꠘ ꠇꠁꠀ ꠢꠣꠞꠤ ꠚꠦꠞꠣꠃꠘꠦ ꠔꠣꠞ ꠍꠣꠝꠘꠦ ꠕꠣꠇꠤ ꠝꠥꠍꠣ ꠀꠞ ꠢꠣꠞꠥꠘꠞꠦ ꠈꠦꠖꠣꠁ ꠖꠤꠟ।

12 ꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠝꠤꠡꠞ ꠖꠦꠡꠞ ꠃꠙꠞꠦ ꠙꠋꠉꠙꠣꠟꠞ ꠟꠣꠉꠤ ꠀꠔ ꠔꠥꠟꠅ, ꠙꠋꠉꠙꠣꠟꠦ ꠀꠁꠀ ꠝꠤꠡꠞꠞ ꠎꠝꠤꠘꠞ ꠢꠇꠟ ꠉꠣꠍ-ꠉꠣꠍꠣꠟꠤ ꠈꠣꠁꠟꠤꠛ। ꠢꠤꠟ-ꠔꠥꠚꠣꠘ ꠕꠣꠇꠤ ꠎꠔꠔꠣ ꠛꠣꠌꠤꠍꠦ, ꠁꠔꠣ ꠢꠇ꠆ꠇꠟꠔꠣ ꠈꠣꠁꠟꠤꠛ।”

13 ꠝꠥꠍꠣꠄ ꠝꠤꠡꠞꠞ ꠃꠙꠞꠦ ꠔꠣꠘ ꠟꠣꠑꠤ ꠝꠦꠟꠤꠀ ꠗꠞꠟꠣ, ꠀꠞ ꠝꠣꠛꠥꠖꠦ ꠢꠣꠞꠣ ꠖꠤꠘ ꠢꠣꠞꠣ ꠞꠣꠁꠔ ꠖꠦꠡꠞ ꠝꠣꠎꠦ ꠙꠥꠛꠣꠟꠤ ꠢꠣꠅꠀ ꠍꠣꠠꠟꠣ, ꠅꠃ ꠙꠥꠛꠣꠟꠤ ꠢꠣꠅꠀꠄ ꠛꠤꠀꠘꠦ ꠙꠋꠉꠙꠣꠟ ꠟꠁꠀ ꠀꠎꠤꠟ। 14 ꠢꠣꠞꠣ ꠝꠤꠡꠞ ꠖꠦꠡꠞ ꠃꠙꠞꠦ ꠙꠋꠉꠙꠣꠟꠦ ꠎꠣꠝ ꠅꠁꠉꠦꠟꠣ। ꠝꠤꠡꠞꠞ ꠢꠇꠟ ꠎꠣꠉꠣꠔ ꠙꠋꠉꠙꠣꠟꠦ ꠉꠤꠍꠉꠤꠍ ꠇꠞꠟꠣ, ꠈꠥꠛ ꠛꠦꠡꠤ ꠙꠋꠉꠙꠣꠟ ꠀꠁꠟꠣ, ꠅꠔ ꠙꠋꠉꠙꠣꠟ ꠄꠞ ꠀꠉꠦꠅ ꠇꠥꠘꠥꠖꠤꠘ ꠅꠁꠍꠂꠘ ꠘꠣ ꠀꠞ ꠛꠣꠖꠦꠅ ꠇꠥꠘꠥꠖꠤꠘ ꠅꠁꠔꠣ ꠘꠣꠄ। 15 ꠔꠣꠞꠣ ꠀꠡ꠆ꠔꠣ ꠎꠝꠤꠘꠞ ꠃꠙꠞ ꠉꠥꠞꠤꠟꠤꠟꠣ, ꠖꠦꠡ ꠀꠘ꠆ꠖꠣꠁꠞ ꠅꠁꠉꠦꠟ, ꠀꠞ ꠎꠝꠤꠘꠞ ꠎꠔ ꠈꠦꠔ, ꠉꠣꠍ-ꠉꠣꠍꠣꠟꠤ ꠢꠤꠟ-ꠔꠥꠚꠣꠘ ꠕꠣꠇꠤ ꠛꠣꠌꠤꠉꠦꠍꠤꠟ, ꠁꠔꠣ ꠢꠇ꠆ꠇꠟꠔꠣ ꠈꠣꠁꠟꠤꠟꠣ। ꠀꠡ꠆ꠔꠣ ꠝꠤꠡꠞꠞ ꠇꠥꠘꠥ ꠉꠣꠍ-ꠉꠣꠍꠣꠟꠤ ꠛꠣ ꠈꠦꠔꠞ ꠚꠡꠟ ꠇꠥꠘ꠆ꠔꠣꠃ ꠞꠁꠟ ꠘꠣ। 16 ꠚꠦꠞꠣꠃꠘꠦ ꠎꠟꠖꠤ ꠇꠞꠤ ꠝꠥꠍꠣ ꠀꠞ ꠢꠣꠞꠥꠘꠞꠦ ꠀꠘꠣꠁꠀ ꠇꠁꠟ, “ꠀꠝꠤ ꠔ ꠔꠥꠝꠞꠣ ꠀꠞ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠉꠦꠍꠦ ꠉꠥꠘꠣꠉꠣꠞ ꠅꠁꠉꠦꠍꠤ। 17 ꠔꠦ ꠝꠤꠘꠔ ꠇꠞꠤꠀꠞ, ꠈꠣꠟꠤ ꠄꠇꠈꠣꠘ ꠛꠣꠞ ꠀꠝꠣꠞ ꠉꠥꠘꠣ ꠝꠣꠚ ꠇꠞꠤ ꠖꠦꠅ। ꠀꠝꠣꠞ ꠉꠦꠍ ꠕꠣꠇꠤ ꠁ ꠝꠞꠘ ꠀꠙꠖꠞꠦ ꠢꠞꠣꠁ ꠘꠦꠅꠀꠞ ꠟꠣꠉꠤ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞꠦ ꠝꠤꠘꠔ ꠇꠞꠅ।”

18 ꠅꠃ ꠝꠥꠍꠣꠄ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠢꠞꠤꠀ ꠉꠤꠀ ꠝꠣꠛꠥꠖꠞ ꠉꠦꠍꠦ ꠝꠤꠘꠔ ꠇꠞꠟꠣ; 19 ꠀꠞ ꠝꠣꠛꠥꠖꠦ ꠈꠥꠛ ꠎꠥꠞꠦ ꠙꠌ꠆ꠌꠤꠝꠣ ꠢꠣꠅꠀ ꠍꠣꠠꠟꠣ, ꠁꠔꠣꠄ ꠙꠋꠉꠙꠣꠟ ꠅꠇꠟꠞꠦ ꠈꠦꠖꠣꠁꠀ ꠍꠣꠚ ꠇꠞꠤꠀ ꠘꠤꠟ ꠖꠞꠤꠀꠔ ꠚꠣꠟꠣꠁꠟ, ꠝꠤꠡꠞꠞ ꠇꠥꠘꠥ ꠎꠣꠉꠣꠔ ꠄꠉꠥ ꠙꠥꠇꠅ ꠞꠁꠟ ꠘꠣ। 20 ꠅꠁꠟꠦ ꠝꠣꠛꠥꠖꠦ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟꠣ, ꠢꠦ ꠛꠘꠤ ꠁꠍꠞꠣꠁꠟꠞꠦ ꠍꠣꠠꠟ ꠘꠣ।

21 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠀꠍꠝꠣꠘ ꠝꠥꠈꠣ ꠔꠥꠝꠣꠞ ꠀꠔ ꠛꠣꠠꠣꠅ; ꠔꠦꠃ ꠢꠣꠞꠣ ꠖꠦꠡꠅ ꠅꠔ ꠊꠘ ꠀꠘ꠆ꠖꠣꠁꠞ ꠅꠁꠛ, ꠁ ꠀꠘ꠆ꠖꠣꠁꠞ ꠀꠔ ꠖꠤꠀ ꠍꠥꠀ ꠎꠣꠁꠛ।” 22 ꠝꠥꠍꠣꠄ ꠀꠍꠝꠣꠘ ꠝꠥꠈꠣ ꠀꠔ ꠛꠣꠠꠣꠁꠟꠦ ꠔꠤꠘ ꠖꠤꠘ ꠙꠞ꠆ꠎꠘ꠆ꠔ ꠢꠣꠞꠣ ꠝꠤꠡꠞ ꠖꠦꠡ ꠈꠥꠛ ꠊꠘ ꠀꠘ꠆ꠖꠣꠁꠞ ꠅꠁꠟ। 23 ꠔꠤꠘ ꠖꠤꠘ ꠇꠦꠃ ꠇꠦꠃꠞꠞ ꠝꠥꠈꠅ ꠖꠦꠈꠔ ꠙꠣꠞꠟ ꠘꠣ, ꠇꠦꠃ ꠎꠣꠉꠣ ꠕꠣꠇꠤ ꠟꠠꠔ ꠙꠣꠞꠟ ꠘꠣ। ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠢꠇꠟ ꠊꠞꠅ ꠇꠥꠘꠥ ꠞꠥꠡꠘꠤꠞ ꠅꠜꠣꠛ ꠀꠍꠤꠟ ꠘꠣ। 24 ꠚꠦꠞꠣꠃꠘꠦ ꠝꠥꠍꠣꠞꠦ ꠀꠘꠣꠁꠀ ꠇꠁꠟ, “ꠎꠣꠅ, ꠔꠥꠝꠞꠣ ꠉꠤꠀ ꠔꠥꠝꠞꠣꠞ ꠝꠣꠛꠥꠖꠞ ꠄꠛꠣꠖꠔ ꠇꠞꠅ, ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘꠞꠦꠅ ꠘꠦꠅꠉꠤ, ꠈꠣꠟꠤ ꠔꠥꠝꠞꠣꠞ ꠉꠞꠥ-ꠍꠣꠉꠟꠞ ꠙꠣꠟ ꠕꠣꠇꠃꠇ।”

25 ꠝꠥꠍꠣꠄ ꠇꠁꠟꠣ, “ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠖꠤꠛꠣꠞ ꠟꠣꠉꠤ, ꠙꠡꠥ ꠇꠥꠞꠛꠣꠘꠤ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠁꠘ ꠀꠝꠞꠣꠞ ꠟꠉꠦ ꠘꠤꠔꠦ ꠅꠁꠛ। 26 ꠀꠝꠞꠣꠞ ꠟꠉꠦ ꠅꠁꠀ ꠀꠝꠞꠣꠞ ꠙꠡꠥꠁꠘꠅ ꠎꠣꠁꠛꠣ, ꠙꠡꠥꠞ ꠄꠇꠈꠣꠘ ꠈꠥꠞꠣꠅ ꠕꠁꠀ ꠎꠣꠁꠔꠣꠝ ꠘꠣꠄ। ꠀꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠄꠛꠣꠖꠔꠞ ꠟꠣꠉꠤ ꠅꠘ ꠕꠣꠇꠤ ꠇꠥꠞꠛꠣꠘꠤ ꠇꠞꠣ ꠟꠣꠉꠛ, ꠀꠞ ꠇꠤꠔꠣ ꠇꠤꠔꠣ ꠇꠥꠞꠛꠣꠘꠤ ꠇꠞꠔꠣꠝ, ꠁꠔꠣ ꠀꠝꠞꠣ ꠢꠘꠅ ꠘꠣ ꠉꠦꠟꠦ ꠇꠁꠔꠣꠝ ꠙꠣꠞꠔꠣꠝ ꠘꠣꠄ।”

27 ꠅꠁꠟꠦ ꠝꠣꠛꠥꠖꠦ ꠚꠦꠞꠣꠃꠘꠞ ꠖꠤꠟ ꠙꠣꠡꠣꠘ ꠇꠞꠤꠟ꠆ꠟꠣ, ꠢꠦ ꠄꠞꠣꠞꠦ ꠍꠣꠠꠔꠦ ꠞꠣꠎꠤ ꠅꠁꠟ ꠘꠣ। 28 ꠚꠦꠞꠣꠃꠘꠦ ꠇꠁꠟ, “ꠀꠝꠣꠞ ꠍꠣꠝꠘꠦ ꠕꠣꠇꠤ ꠜꠣꠉꠅ। ꠈꠛꠞꠖꠣꠞ! ꠀꠝꠣꠞ ꠝꠥꠈꠞ ꠍꠣꠝꠘꠦ ꠀꠞ ꠇꠥꠘꠥꠖꠤꠘ ꠀꠁꠅ ꠘꠣ। ꠀꠝꠣꠞ ꠍꠣꠝꠘꠦ ꠎꠦꠖꠤꠘ ꠀꠁꠛꠣꠄ, ꠢꠤꠖꠤꠘ ꠎꠣꠘ ꠈꠥꠀꠁꠛꠣꠄ।” 29 ꠝꠥꠍꠣꠄ ꠇꠁꠟꠣ, “ꠜꠣꠟꠣꠞꠦ ꠜꠣꠟꠣ! ꠀꠝꠤ ꠡꠈ ꠇꠞꠤꠀ ꠇꠥꠘꠥꠖꠤꠘꠃ ꠀꠙꠘꠣꠞ ꠝꠥꠈ ꠖꠦꠈꠣꠔ ꠀꠁꠔꠣꠝ ꠘꠣꠄ।”