1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠝꠤ ꠚꠦꠞꠣꠃꠘ ꠀꠞ ꠝꠤꠡꠞ ꠖꠦꠡꠞ ꠃꠙꠞꠦ ꠀꠞ ꠝꠣꠔ꠆ꠞ ꠄꠇꠐꠣ ꠉꠎꠛ ꠍꠣꠠꠝꠥ, ꠄꠞꠛꠣꠖꠦ ꠢꠦ ꠔꠥꠝꠞꠣꠞꠦ ꠅꠘꠕꠘꠦ ꠍꠣꠠꠤꠖꠤꠛ, ꠍꠣꠠꠣꠞ ꠛꠣꠟꠣ ꠢꠦ ꠔꠥꠝꠞꠣꠞꠦ ꠄꠇ꠆ꠇꠦꠛꠣꠞꠦ ꠈꠦꠖꠣꠁ ꠖꠤꠛ। 2 ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠢꠤꠇꠣꠁ ꠖꠦꠅ, ꠢꠇ꠆ꠇꠟ ꠛꠦꠐꠣꠁꠘ-ꠛꠦꠐꠤꠘ꠆ꠔꠦ ꠔꠣꠞꠣꠞ ꠝꠤꠡꠞꠤ ꠀꠞꠤ-ꠚꠞꠤꠞ ꠉꠦꠍ ꠕꠣꠇꠤ ꠡꠥꠘꠣ-ꠞꠥꠙꠣꠞ ꠉꠄꠘꠣ-ꠉꠣꠐꠤ ꠈꠥꠎꠤꠀ ꠘꠦꠃꠇ।” 3 ꠅꠃ ꠢꠣꠟꠔꠅ ꠝꠤꠡꠞꠤ ꠅꠇꠟꠞ ꠘꠎꠞꠅ ꠝꠣꠄꠀ ꠙꠣꠁꠔꠦ ꠝꠣꠛꠥꠖꠦ ꠡꠣꠁꠎ꠆ꠎ ꠇꠞꠟꠣ। ꠄꠞꠝꠣꠎꠦ ꠝꠤꠡꠞ ꠖꠦꠡꠅ ꠚꠦꠞꠣꠃꠘꠞ ꠃꠎꠤꠞ-ꠘꠣꠎꠤꠞ ꠀꠞ ꠙ꠆ꠞꠎꠣ ꠅꠇꠟꠞ ꠉꠦꠍꠦ ꠢꠎꠞꠔ ꠝꠥꠍꠣ ꠈꠥꠛ ꠁꠎ꠆ꠎꠔꠤ ꠛꠘꠤꠉꠦꠟꠣ।

4 ꠝꠥꠍꠣꠄ ꠚꠦꠞꠣꠃꠘꠞꠦ ꠇꠁꠟꠣ, “ꠝꠣꠛꠥꠖꠦ ꠘꠤꠎꠦ ꠇꠁꠞꠣ, ꠀꠝꠤ ꠀꠗꠣ ꠞꠣꠁꠔꠇꠥꠞ ꠛꠣꠟꠣ ꠝꠤꠡꠞ ꠖꠦꠡꠞ ꠝꠣꠎꠖꠤ ꠎꠣꠁꠝꠥ। 5 ꠄꠔꠦ ꠉꠖꠤꠔ ꠛꠅꠀ ꠚꠦꠞꠣꠃꠘꠞ ꠛꠠ ꠙꠥꠀ ꠕꠣꠇꠤ ꠛꠣꠞꠣ-ꠜꠣꠘꠞꠣ ꠛꠣꠘ꠆ꠖꠤꠞ ꠙꠥꠀ ꠙꠞ꠆ꠎꠘ꠆ꠔ, ꠝꠤꠡꠞ ꠖꠦꠡꠞ ꠝꠣꠎꠦ ꠞꠅꠞꠣ ꠢꠇ꠆ꠇꠟ ꠙꠞꠤꠛꠣꠞꠞ ꠛꠠ ꠙꠥꠀꠂꠘ ꠝꠞꠤꠎꠤꠛꠣ। ꠄꠞꠟꠉꠦ ꠢꠇꠟ ꠙꠡꠥꠁꠘ꠆ꠔꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠅ ꠝꠞꠤꠎꠤꠛꠣ। 6 ꠁ ꠟꠣꠈꠣꠘ ꠖꠡꠣ ꠝꠤꠡꠞ ꠖꠦꠡꠅ ꠇꠥꠘꠥꠖꠤꠘ ꠅꠁꠍꠦꠅ ꠘꠣ ꠀꠞ ꠅꠁꠔ-ꠅ ꠘꠣꠄ, ꠀꠡ꠆ꠔꠣ ꠝꠤꠡꠞ ꠖꠦꠡꠅ ꠅꠃ ꠟꠣꠈꠣꠘ ꠇꠣꠘ꠆ꠖꠘ ꠇꠣꠘ꠆ꠖꠤꠛꠣ। 7 ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠇꠥꠘꠥ ꠝꠣꠘꠥꠡ ꠛꠣ ꠙꠡꠥꠞ ꠛꠣꠄ ꠄꠉꠥ ꠇꠥꠔ꠆ꠔꠣꠄꠅ ꠃꠢ ꠇꠞꠔ ꠘꠣꠄ, ꠎꠣꠔꠦ ꠀꠙꠘꠣꠞꠣ ꠛꠥꠎꠔꠣ ꠙꠣꠞꠂꠘ ꠀꠝꠤ ꠝꠣꠛꠥꠖꠦ ꠝꠤꠡꠞꠤ ꠀꠞ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠔꠚꠣꠔ ꠇꠞꠤ।” 8 ꠢꠦꠡꠦ ꠝꠥꠍꠣꠄ ꠚꠦꠞꠣꠃꠘꠞꠦ ꠇꠁꠟꠣ, “ꠅꠃ ꠡꠝꠄ ꠀꠙꠘꠣꠞ ꠢꠇ꠆ꠇꠟ ꠃꠎꠤꠞ-ꠘꠣꠎꠤꠞꠦ ꠀꠁꠀ ꠀꠝꠣꠞ ꠙꠣꠅꠔ ꠙꠠꠤꠀ ꠇꠁꠛꠣ, ꠀꠙꠘꠦ ꠀꠙꠘꠣꠞ ꠢꠇꠟ ꠝꠣꠘꠡꠞꠦ ꠟꠁꠀ ꠛꠤꠖꠣꠄ ꠘꠦꠁꠘꠉꠤ, ꠄꠞꠛꠣꠖꠦ ꠀꠝꠤ ꠛꠣꠞ ꠅꠁꠝꠥ।” ꠅꠈꠣꠘ ꠇꠁꠀ ꠔꠣꠁꠘ ꠉꠥꠍꠣꠄ ꠀꠉꠥꠁꠘ ꠅꠁꠀ ꠚꠦꠞꠣꠃꠘꠞ ꠉꠦꠍ ꠕꠣꠇꠤ ꠢꠞꠤꠀ ꠉꠦꠟꠣ।

9 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠍꠟꠣ, “ꠚꠦꠞꠣꠃꠘꠦ ꠔꠥꠝꠣꠞ ꠇꠕꠣ ꠝꠣꠘꠔ ꠘꠣꠄ, ꠎꠣꠔꠦ ꠝꠤꠡꠞ ꠖꠦꠡꠅ ꠀꠝꠣꠞ ꠇꠦꠞꠣꠝꠔꠤꠞ ꠙꠞꠤꠝꠣꠘ ꠀꠞꠅ ꠛꠣꠠꠦ।” 10 ꠄꠞꠟꠣꠉꠤ ꠝꠥꠍꠣ ꠀꠞ ꠢꠣꠞꠥꠘꠦ ꠚꠦꠞꠣꠃꠘꠞ ꠍꠣꠝꠘꠦ ꠅꠃ ꠇꠦꠞꠣꠝꠔꠤ ꠅꠇꠟ ꠖꠦꠈꠣꠁꠟꠣ। ꠅꠁꠟꠦ ꠝꠣꠛꠥꠖꠦ ꠚꠦꠞꠣꠃꠘꠞ ꠖꠤꠟꠞꠦ ꠙꠣꠡꠣꠘ ꠇꠞꠤꠟ꠆ꠟꠣ, ꠢꠦ ꠘꠤꠎꠞ ꠖꠦꠡ ꠕꠣꠇꠤ ꠛꠘꠤ ꠁꠍꠞꠣꠁꠟꠞꠦ ꠍꠣꠠꠟ ꠘꠣ।