12
ꠀꠎꠣꠖꠤ ꠁꠖ ꠀꠖꠣꠄ ꠇꠞꠣꠞ ꠢꠥꠇꠥꠝ
1 ꠛꠣꠖꠦ ꠅꠃ ꠝꠤꠡꠞ ꠖꠦꠡꠞ ꠜꠤꠔꠞꠦ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, 2 “ꠁ ꠌꠣꠘ꠆ꠖꠈꠣꠘ ꠛꠍꠞꠞ ꠙꠄꠟꠣ ꠌꠣꠘ꠆ꠖ ꠅꠁꠛ, ꠔꠥꠝꠞꠣ ꠁ ꠌꠣꠘ꠆ꠖꠞꠦ ꠛꠍꠞꠞ ꠙꠄꠟꠣ ꠌꠣꠘ꠆ꠖ ꠉꠘꠤꠅ। 3 ꠔꠥꠝꠤꠔꠣꠁꠘ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞꠦ ꠖꠟꠣ ꠇꠞꠤ ꠎꠣꠘꠣꠁ ꠖꠦꠅ, ꠅꠃ ꠌꠣꠘ꠆ꠖꠞ ꠖꠡ ꠔꠣꠞꠤꠈꠅ ꠔꠥꠝꠞꠣꠞ ꠢꠇꠟ ꠙꠞꠤꠛꠣꠞꠞ ꠝꠥꠞꠛ꠆ꠛꠤꠄ, ꠎꠣꠞꠎꠤꠞ ꠙꠞꠤꠛꠣꠞꠞ ꠟꠣꠉꠤ ꠄꠉꠥ ꠇꠞꠤ ꠝꠦꠠꠣ ꠛꠣ ꠍꠣꠉꠟꠞ ꠛꠣꠁꠌ꠆ꠌꠣ ꠘꠤꠛꠣꠄ। 4 ꠅꠁꠟꠦ ꠇꠥꠘꠥ ꠙꠞꠤꠛꠣꠞꠅ ꠄꠞ ꠉꠥꠡ꠆ꠔ ꠈꠣꠅꠀꠞ ꠝꠣꠘꠥꠡ ꠇꠝ ꠅꠁꠟꠦ, ꠟꠣꠉꠣ ꠊꠞꠞ ꠝꠣꠘꠡꠞ ꠟꠉꠦ ꠝꠤꠟꠤꠀ, ꠖꠥꠁꠅ ꠙꠞꠤꠛꠣꠞꠦ ꠎꠔꠈꠣꠘ ꠈꠣꠁꠔꠣ ꠙꠣꠞꠂꠘ, ꠢꠃ ꠅꠘꠥꠝꠣꠘꠦ ꠝꠦꠠꠣ ꠛꠣ ꠍꠣꠉꠟꠞ ꠛꠣꠁꠌ꠆ꠌꠣ ꠘꠤꠛꠣꠄ। 5 ꠁ ꠛꠣꠁꠌ꠆ꠌꠣ ꠅꠁꠛ ꠘꠤꠈꠥꠔ, ꠄꠇ ꠛꠞꠍ ꠛꠄꠅꠡꠞ ꠙꠣꠑꠣ ꠛꠣꠁꠌ꠆ꠌꠣ ꠅꠁꠔꠦ ꠅꠁꠛ; ꠔꠥꠝꠞꠣ ꠝꠦꠠꠣ ꠛꠣ ꠍꠣꠉꠟꠞ ꠛꠣꠁꠌ꠆ꠌꠣ ꠘꠤꠔꠣꠄ ꠙꠣꠞꠛꠣꠄ। 6 ꠀꠞ ꠅꠃ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈ ꠙꠞ꠆ꠎꠘ꠆ꠔ ꠁꠐꠣꠞ ꠎꠔꠘ ꠇꠞꠛꠣꠄ, ꠛꠣꠖꠦ ꠔꠣꠝꠣꠝ ꠛꠘꠤ ꠁꠍꠞꠣꠁꠟ ꠄꠇꠟꠉꠦ ꠝꠤꠟꠤꠀ, ꠔꠣꠞꠣ ꠢꠣꠁꠘ꠆ꠎꠣ ꠛꠣꠟꠣ ꠎꠣꠞꠎꠤꠞ ꠙꠞꠤꠛꠣꠞꠦ ꠅꠃ ꠛꠣꠁꠌ꠆ꠌꠣꠁꠘ ꠎꠛ ꠇꠞꠛꠣ। 7 ꠎꠛ ꠇꠞꠣꠞ ꠛꠣꠖꠦ ꠔꠣꠞꠣ ꠄꠞ ꠇꠤꠍꠥ ꠟꠃ ꠘꠤꠀ ꠎꠔ ꠊꠞꠅ ꠄꠞ ꠉꠥꠡ꠆ꠔ ꠈꠣꠁꠛꠣ, ꠅꠔ ꠊꠞꠞ ꠖꠥꠀꠞꠞ ꠌꠃꠇꠣꠑꠞ ꠖꠥꠁꠅ ꠉꠣꠟꠣꠔ ꠀꠞ ꠃꠙꠞꠞ ꠌꠃꠇꠣꠑꠅ ꠅꠃ ꠟꠃ ꠟꠣꠉꠣꠁꠛꠣ। 8 ꠢꠃ ꠞꠣꠁꠔꠃ ꠔꠣꠞꠣ ꠁ ꠉꠥꠡ꠆ꠔ ꠀꠉꠥꠁꠘꠖꠤ ꠍꠦꠇꠤꠀ ꠈꠣꠝꠤꠞ ꠍꠣꠠꠣ ꠞꠥꠐꠤ ꠀꠞ ꠔꠤꠔ꠆ꠔꠣ ꠢꠣꠉꠞ ꠟꠉꠦ ꠝꠤꠟꠣꠁꠀ ꠈꠣꠁꠛꠣ। 9 ꠁ ꠉꠥꠡ꠆ꠔ ꠔꠥꠝꠞꠣ ꠇꠣꠌꠣ, ꠛꠣ ꠙꠣꠘꠤꠖꠤ ꠞꠣꠘ꠆ꠖꠤꠀ ꠈꠣꠁꠅ ꠘꠣ। ꠈꠣꠟꠤ ꠀꠉꠥꠁꠘꠖꠤ ꠍꠦꠇꠤꠀ ꠈꠣꠁꠅ, ꠄꠞ ꠑꠦꠋ, ꠇꠟ꠆ꠟꠣ ꠡꠥꠖ꠆ꠖꠣ ꠜꠤꠔꠞꠞ ꠢꠇ꠆ꠇꠟꠔꠣ ꠄꠇꠈꠣꠘꠅ ꠍꠦꠇꠤꠅ, ꠛꠣꠖꠦ ꠈꠣꠁꠅ। 10 ꠞꠣꠁꠔ ꠙꠥꠀꠘꠤꠞ ꠀꠉꠦ ꠈꠣꠘꠤ ꠡꠦꠡ ꠇꠞꠤꠅ, ꠛꠤꠀꠘ ꠙꠞ꠆ꠎꠘ꠆ꠔ ꠇꠥꠘ꠆ꠔꠣꠃ ꠛꠣꠇꠤ ꠕꠁꠅ ꠘꠣ। ꠎꠥꠖꠤ ꠇꠥꠘ꠆ꠔꠣ ꠛꠣꠇꠤ ꠞꠁꠎꠣꠄ, ꠔꠦ ꠀꠉꠥꠁꠘꠖꠤ ꠎꠣꠟꠣꠁꠟꠤꠅ। 11 ꠁ ꠈꠣꠘꠤ ꠈꠣꠅꠀꠞ ꠛꠣꠟꠣ ꠔꠥꠝꠞꠣꠞ ꠇꠝꠞꠞ ꠇꠣꠙꠠ ꠝꠎꠛꠥꠔ ꠇꠞꠤ ꠚꠤꠘ꠆ꠖꠤꠅ, ꠙꠣꠅꠔ ꠎꠥꠔꠣ ꠟꠣꠉꠣꠁꠅ, ꠀꠔꠞ ꠟꠣꠑꠤ ꠟꠁꠅ। ꠎꠟꠖꠤ ꠇꠞꠤ ꠈꠣꠘꠤ ꠈꠣꠁꠅ। ꠁꠐꠣ ꠅꠁꠟ ꠝꠣꠛꠥꠖꠞ ꠘꠣꠝꠞ ꠀꠎꠣꠖꠤ ꠁꠖ। 12 ꠢꠃ ꠞꠣꠁꠔꠃ ꠀꠝꠤ ꠝꠤꠡꠞ ꠖꠦꠡꠞ ꠝꠣꠎꠖꠤ ꠎꠣꠁꠝꠥ, ꠖꠦꠡꠞ ꠢꠇ꠆ꠇꠟ ꠝꠣꠘꠡꠞ ꠛꠠ ꠙꠥꠀꠞꠦ ꠀꠞ ꠙꠡꠥꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞꠦꠅ ꠝꠣꠞꠤꠟꠤꠝꠥ। ꠝꠤꠡꠞꠞ ꠢꠇꠟ ꠖꠦꠛ-ꠖꠦꠛꠤꠞ ꠛꠤꠌꠣꠞ ꠇꠞꠤꠀ ꠡꠣꠎꠣ ꠖꠤꠝꠥ; ꠀꠝꠤꠃ ꠝꠣꠛꠥꠖ। 13 ꠅꠁꠟꠦ ꠔꠥꠝꠞꠣꠞ ꠖꠥꠀꠞꠞ ꠌꠃꠇꠣꠑꠅ ꠟꠦꠙꠣ ꠟꠃ ꠖꠦꠈꠟꠦ ꠀꠝꠤ ꠛꠥꠎꠝꠥ ꠁ ꠊꠞꠅ ꠔꠥꠝꠞꠣ ꠞꠅ। ꠄꠞꠟꠣꠉꠤ ꠀꠝꠤ ꠝꠤꠡꠞ ꠖꠦꠡꠅ ꠉꠎꠛ ꠓꠣꠟꠤꠛꠣꠞ ꠡꠝꠄ, ꠟꠃ ꠟꠦꠙꠣ ꠅꠃ ꠊꠞ ꠛꠣꠖ ꠖꠤꠀ ꠍꠣꠝꠘꠦꠖꠤ ꠎꠣꠁꠝꠥ। ꠝꠃꠔꠞ ꠉꠎꠛ ꠕꠘꠦ ꠔꠥꠝꠞꠣ ꠞꠦꠢꠣꠁ ꠙꠣꠁꠛꠣꠄ। 14 ꠅꠃ ꠖꠤꠘꠞꠦ ꠔꠥꠝꠞꠣ ꠁꠀꠖ ꠞꠣꠈꠤꠅ ꠀꠞ ꠀꠝꠤ ꠝꠣꠛꠥꠖꠞ ꠘꠣꠝꠦ ꠁꠖꠞ ꠖꠤꠘ ꠝꠣꠘꠤꠅ। ꠁ ꠁꠖꠞꠦ ꠔꠥꠝꠞꠣ ꠀꠝꠣꠞ ꠢꠥꠇꠥꠝ ꠝꠘꠅ ꠇꠞꠤꠀ ꠢꠞ-ꠢꠣꠝꠦꠡꠣ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠝꠣꠘꠤꠀ ꠎꠣꠁꠅ।”
ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠅꠀꠞ ꠢꠥꠇꠥꠝ
15 ꠝꠣꠛꠥꠖꠦ ꠇꠁꠟꠣ, “ꠔꠥꠝꠞꠣ ꠡꠣꠔ ꠖꠤꠘ ꠙꠞ꠆ꠎꠘ꠆ꠔ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠛꠣꠄ। ꠙꠄꠟꠣ ꠖꠤꠘꠃ ꠎꠣꠞꠎꠤꠞ ꠊꠞ ꠕꠣꠇꠤ ꠢꠇꠟ ꠈꠣꠝꠤꠞ ꠚꠣꠟꠣꠁ ꠖꠤꠛꠣꠄ। ꠁ ꠡꠣꠔꠅ ꠖꠤꠘꠞ ꠝꠣꠎꠦ ꠎꠦꠉꠥꠄ ꠈꠣꠝꠤꠞ ꠀꠟꠣ ꠘꠣꠘ ꠞꠥꠐꠤ ꠈꠣꠁꠛ, ꠔꠣꠞꠦ ꠛꠘꠤ ꠁꠍꠞꠣꠁꠟ ꠕꠘꠦ ꠚꠥꠍꠤꠀ ꠚꠣꠟꠣꠁꠟ ꠅꠁꠛ। 16 ꠙꠄꠟꠣ ꠖꠤꠘ ꠀꠞ ꠡꠣꠔ ꠘꠝ꠆ꠛꠞ ꠖꠤꠘ ꠔꠥꠝꠞꠣ ꠙꠛꠤꠔ꠆ꠞ ꠝꠤꠟꠘ-ꠝꠣꠢꠚꠤꠟ ꠀꠖꠣꠄ ꠇꠞꠛꠣꠄ, ꠁ ꠖꠥꠁ ꠖꠤꠘ ꠈꠣꠟꠤ ꠎꠞꠥꠞꠤ ꠈꠣꠅꠀ-ꠖꠣꠅꠀ ꠍꠣꠠꠣ ꠖꠥꠍꠞꠣ ꠇꠥꠘꠥ ꠇꠣꠝ-ꠇꠣꠎ ꠇꠞꠛꠣꠄ ꠘꠣ। 17 ꠅꠃ ꠟꠣꠈꠣꠘ ꠔꠥꠝꠞꠣ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁ ꠁꠖ ꠀꠖꠣꠄ ꠇꠞꠤꠅ, ꠀꠝꠣꠞ ꠢꠥꠇꠥꠝ ꠝꠘꠅ ꠇꠞꠤꠀ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠢꠞ-ꠢꠣꠝꠦꠡꠣ ꠁ ꠁꠖ ꠀꠖꠣꠄ ꠇꠞꠤꠅ। ꠅꠃ ꠖꠤꠘꠃ ꠀꠝꠤ ꠔꠥꠝꠞꠣꠞꠦ ꠍꠤꠙꠣꠁ ꠖꠟꠞ ꠟꠣꠈꠣꠘ ꠇꠞꠤ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠝꠥ। 18 ꠔꠥꠝꠞꠣ ꠙꠄꠟꠣ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈꠞ ꠢꠣꠁꠘ꠆ꠎꠣ ꠕꠣꠇꠤ ꠡꠥꠞꠥ ꠇꠞꠤꠀ, ꠄꠇꠥꠁꠡ ꠔꠣꠞꠤꠈꠞ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠅ। 19 ꠅꠃ ꠡꠣꠔ ꠖꠤꠘ ꠎꠣꠔꠦ ꠔꠥꠝꠞꠣꠞ ꠊꠞꠅ ꠈꠣꠝꠤꠞꠞ ꠇꠥꠘꠥ ꠘꠣꠝ-ꠘꠤꠡꠣꠘꠣ ꠘꠣ ꠕꠣꠇꠦ, ꠅꠃ ꠡꠝꠄ ꠇꠦꠃ ꠎꠥꠖꠤ ꠈꠣꠝꠤꠞ ꠀꠟꠣ ꠈꠣꠘꠤ ꠈꠣꠄ, ꠔꠦ ꠢꠦ ꠔꠥꠝꠞꠣꠞ ꠘꠤꠎꠞ ꠎꠣꠔꠤꠞ ꠅꠃꠇ ꠛꠣ ꠜꠤꠘ ꠎꠣꠔꠤꠞ ꠅꠃꠇ, ꠔꠣꠞꠦ ꠛꠘꠤ ꠁꠍꠞꠣꠁꠟꠞ ꠡꠝꠣꠎ ꠕꠣꠇꠤ ꠚꠥꠍꠤꠀ ꠚꠣꠟꠣꠁꠟ ꠅꠁꠛ। 20 ꠁ ꠡꠣꠔ ꠖꠤꠘ ꠔꠥꠝꠞꠣ ꠎꠦꠘꠅꠃ ꠞꠅ ꠘꠣ ꠇꠦꠘꠦ ꠈꠣꠝꠤꠞ ꠀꠟꠣ ꠇꠥꠘ꠆ꠔꠣꠃ ꠈꠣꠁꠅ ꠘꠣ; ꠈꠣꠟꠤ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠅ।”
21 ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞ ꠢꠇꠟ ꠝꠄ-ꠝꠥꠞꠛ꠆ꠛꠤꠞꠦ ꠖꠟꠣ ꠇꠞꠤꠀ ꠇꠁꠟꠣ, “ꠀꠙꠘꠣꠞꠣ ꠎꠣꠃꠇ꠆ꠇꠣ, ꠉꠤꠀ ꠎꠣꠞꠎꠤꠞ ꠙꠞꠤꠛꠣꠞꠞ ꠟꠣꠉꠤ ꠀꠎꠣꠖꠤ ꠁꠖꠞ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠤꠀ ꠎꠛ ꠇꠞꠃꠇ꠆ꠇꠣ। 22 ꠀꠞ ‘ꠄꠍꠥꠛ’ ꠉꠣꠍꠞ ꠄꠇ ꠀꠐꠤ ꠒꠦꠐꠣ ꠟꠁꠀ, ꠙꠣꠔꠤꠟꠅ ꠕꠅꠀ ꠟꠃꠔ ꠛꠥꠠꠣꠁꠀ ꠖꠥꠀꠞꠞ ꠌꠃꠇꠣꠑꠞ ꠖꠥꠁꠅ ꠉꠣꠟꠣꠔ ꠀꠞ ꠃꠙꠞꠦ ꠟꠣꠉꠣꠁꠅ। ꠡꠣꠛꠗꠣꠘ! ꠡꠥꠞꠥꠎ ꠃꠑꠣꠞ ꠀꠉꠦ ꠇꠦꠃ ꠊꠞꠞ ꠛꠣꠞꠦ ꠛꠣꠞ ꠅꠁꠅ ꠘꠣ। 23 ꠝꠤꠡꠞꠤ ꠅꠇꠟꠞꠦ ꠝꠣꠞꠣꠞ ꠟꠣꠉꠤ ꠝꠣꠛꠥꠖꠦ ꠎꠦꠛꠟꠣ ꠝꠤꠡꠞ ꠖꠦꠡꠞ ꠝꠣꠎꠖꠤ ꠔꠡꠞꠤꠚ ꠘꠤꠛꠣ, ꠅꠃ ꠡꠝꠄ ꠔꠥꠝꠞꠣꠞ ꠌꠃꠇꠣꠑꠞ ꠃꠙꠞꠦ ꠀꠞ ꠖꠥꠁꠅ ꠉꠣꠟꠣꠔ ꠟꠃ ꠖꠦꠈꠟꠦ, ꠔꠣꠁꠘ ꠁ ꠊꠞ ꠛꠣꠖ ꠖꠤꠀ ꠍꠣꠝꠘꠦꠖꠤ ꠀꠉꠥꠀꠁꠛꠣ। ꠀꠎꠞꠣꠁꠟ ꠚꠤꠞꠤꠡ꠆ꠔꠣꠞꠦ ꠔꠥꠝꠞꠣꠞ ꠊꠞꠅ ꠢꠣꠝꠣꠁꠀ ꠝꠣꠞꠔꠦ ꠖꠤꠔꠣ ꠘꠣꠄ।
24 “ꠀꠝꠣꠞ ꠛꠣꠔꠣꠁꠟ ꠢꠥꠇꠥꠝ ꠝꠘꠅ ꠇꠞꠤꠀ ꠔꠥꠝꠞꠣ ꠀꠞ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠦ ꠁ ꠁꠖꠞꠦ ꠀꠖꠣꠄ ꠇꠞꠤꠅ। 25 ꠀꠝꠤ ꠀꠝꠣꠞ ꠘꠤꠎꠞ ꠅꠀꠖꠣ ꠝꠣꠚꠤꠇ ꠔꠥꠝꠞꠣꠞꠦ ꠎꠦ ꠖꠦꠡ ꠖꠤꠝꠥ, ꠢꠃ ꠖꠦꠡꠅ ꠉꠤꠀ ꠢꠣꠞꠟꠦꠅ ꠔꠥꠝꠞꠣ ꠁ ꠁꠖ ꠀꠖꠣꠄ ꠇꠞꠤꠅ। 26 ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠦ ꠎꠦꠛꠟꠣ ꠔꠥꠝꠞꠣꠞꠦ ꠎꠤꠇꠣꠁꠛꠣ, ꠁ ꠁꠖꠞ ꠇꠣꠞꠘ ꠇꠤꠔꠣ? ꠁꠐꠣ ꠇꠤꠟꠣ ꠀꠁꠍꠦ? 27 ꠔꠦ ꠔꠥꠝꠞꠣ ꠎꠥꠀꠙ ꠖꠤꠅ, ꠁꠐꠣ ꠝꠣꠛꠥꠖꠞ ꠘꠣꠝꠦ ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤ। ꠝꠤꠡꠞꠤ ꠅꠇꠟꠞꠦ ꠝꠣꠞꠛꠣꠞ ꠛꠣꠟꠣ ꠔꠣꠁꠘ ꠝꠤꠡꠞ ꠖꠦꠡꠅ ꠛꠘꠤ ꠁꠍꠞꠣꠁꠟꠞ ꠊꠞ ꠛꠣꠖ ꠖꠤꠀ ꠍꠣꠝꠘꠦꠖꠤ ꠀꠉꠥꠀꠁ ꠉꠤꠀ, ꠀꠝꠞꠣꠞꠦ ꠀꠎꠣꠖ ꠇꠞꠍꠟꠣ।” ꠁꠈꠣꠘ ꠢꠥꠘꠤꠀ ꠢꠇꠟ ꠝꠣꠘꠡꠦ ꠝꠣꠛꠥꠖꠞꠦ ꠍꠁꠎꠖꠣ ꠇꠞꠟꠣ। 28 ꠝꠥꠍꠣ ꠀꠞ ꠢꠣꠞꠥꠘꠞꠦ ꠝꠣꠛꠥꠖꠦ ꠎꠦꠟꠣ ꠛꠣꠔꠣꠁ ꠖꠤꠍꠟꠣ, ꠢꠇꠟ ꠛꠘꠤ ꠁꠍꠞꠣꠁꠟ ꠔꠣꠞꠣꠞ ꠊꠞꠅ ꠉꠤꠀ ꠅꠃ ꠟꠣꠈꠣꠘ ꠇꠣꠝ ꠇꠞꠟꠣ।
ꠖꠡ ꠘꠝ꠆ꠛꠞ ꠛꠣ ꠀꠈꠦꠞꠤ ꠉꠎꠛ, ꠛꠠ ꠙꠥꠀꠞ ꠝꠃꠔ
29 ꠢꠦꠡꠦ ꠝꠣꠎ ꠞꠣꠁꠔꠦ ꠅꠃ ꠟꠣꠈꠣꠘ ꠊꠐꠟ, ꠝꠣꠛꠥꠖꠦ ꠉꠖꠤꠔ ꠛꠅꠀ ꠚꠦꠞꠣꠃꠘꠞ ꠙꠥꠀ ꠕꠘꠦ ꠎꠦꠟ ꠈꠣꠘꠣꠞ ꠛꠘ꠆ꠖꠤꠞ ꠙꠥꠀ ꠙꠞ꠆ꠎꠘ꠆ꠔ ꠢꠇ꠆ꠇꠟꠞꠦ ꠝꠣꠞꠤꠟꠤꠟꠣ। ꠝꠤꠡꠞ ꠖꠦꠡꠞ ꠢꠇ꠆ꠇꠟ ꠙꠞꠤꠛꠣꠞꠞ ꠛꠠ ꠙꠥꠀꠂꠘ ꠀꠞ ꠙꠡꠥꠁꠘ꠆ꠔꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞꠦꠅ ꠔꠣꠁꠘ ꠝꠣꠞꠤꠟꠤꠟꠣ। 30 ꠔꠦꠃ ꠚꠦꠞꠣꠃꠘ ꠀꠞ ꠔꠣꠞ ꠃꠎꠤꠞ-ꠘꠣꠎꠤꠞ ꠅꠇꠟ, ꠝꠤꠡꠞꠞ ꠢꠇꠟ ꠝꠣꠘꠥꠡ ꠢꠎꠣꠉ ꠅꠁꠀ ꠃꠑꠟꠣ, ꠀꠡ꠆ꠔꠣ ꠝꠤꠡꠞ ꠖꠦꠡꠅ ꠛꠦꠕꠣꠄꠀ ꠇꠣꠘ꠆ꠖꠘꠞ ꠞꠥꠁꠟ ꠙꠠꠟ; ꠇꠣꠞꠘ ꠅꠟꠣ ꠇꠥꠘꠥ ꠊꠞ ꠞꠁꠍꠤꠟ ꠘꠣ, ꠎꠦ ꠊꠞꠅ ꠇꠦꠃ ꠘꠣ ꠇꠦꠃ ꠝꠞꠍꠦ ꠘꠣ।
ꠝꠤꠡꠞ ꠖꠦꠡ ꠕꠣꠇꠤ ꠛꠘꠤ ꠁꠍꠞꠣꠁꠟꠞ ꠢꠤꠎꠞꠔ
31 ꠢꠃ ꠞꠣꠁꠔꠃ ꠚꠦꠞꠣꠃꠘꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠀꠘꠣꠁꠀ ꠇꠁꠟ, “ꠔꠥꠝꠞꠣ ꠎꠟꠖꠤ ꠎꠣꠅ, ꠛꠘꠤ ꠁꠍꠞꠣꠁꠟꠞꠦ ꠟꠁꠀ ꠀꠝꠣꠞ ꠙ꠆ꠞꠎꠣꠞ ꠉꠦꠍ ꠕꠘꠦ ꠢꠞꠅ। ꠔꠥꠝꠞꠣ ꠎꠦꠟꠣ ꠇꠁꠍ, ꠅꠃꠟꠣ ꠉꠤꠀ ꠝꠣꠛꠥꠖꠞ ꠄꠛꠣꠖꠔ ꠇꠞꠅ। 32 ꠔꠥꠝꠞꠣꠞ ꠎꠛꠣꠘ ꠝꠔꠃ ꠔꠥꠝꠞꠣꠞ ꠉꠞꠥ-ꠝꠦꠠꠣꠞ ꠙꠣꠟ ꠅꠇꠟꠞꠦꠅ ꠘꠦꠅꠉꠤ। ꠔꠥꠝꠞꠣ ꠀꠝꠣꠞꠦꠅ ꠘꠦꠇ ꠖꠥꠀ ꠖꠦꠅ।”
33 ꠝꠤꠡꠞꠤ ꠅꠇꠟꠦ ꠈꠥꠛ ꠒꠞꠣꠁꠟꠣ, ꠔꠣꠞꠣ ꠝꠘꠅ ꠇꠞꠟꠣ ꠔꠣꠞꠣꠅ ꠝꠞꠤꠎꠤꠛꠣ। ꠄꠞꠟꠣꠉꠤ ꠔꠣꠞꠣ ꠔꠣꠉꠖꠣ ꠖꠤꠔꠣ ꠟꠣꠉꠟꠣ, ꠛꠘꠤ ꠁꠍꠞꠣꠁꠟ ꠎꠟꠖꠤ ꠇꠞꠤ ꠛꠤꠖꠣꠄ ꠅꠁꠔꠣ। 34 ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞ ꠝꠄꠖꠣꠞ ꠈꠣꠁꠞ ꠝꠣꠎꠦ ꠈꠣꠝꠤꠞ ꠙꠥꠞꠣꠁꠛꠣꠞ ꠀꠉꠦꠃ, ꠈꠣꠁ ꠡꠢ ꠉꠣꠝꠟꠣꠁꠘ ꠇꠣꠙꠠꠖꠤ ꠉꠣꠁꠐ ꠛꠣꠘ꠆ꠖꠤꠀ ꠇꠣꠘ꠆ꠖꠅ ꠟꠁꠟꠣ। 35 ꠢꠇꠟ ꠛꠘꠤ ꠁꠍꠞꠣꠁꠟꠦ ꠝꠥꠍꠣꠞ ꠙꠞꠣꠝꠤꠡ ꠝꠔ, ꠝꠤꠡꠞꠤ ꠅꠇꠟꠞ ꠡꠥꠘꠣ-ꠞꠥꠙꠣꠞ ꠉꠄꠘꠣ-ꠉꠣꠐꠤ ꠀꠞ ꠇꠣꠙꠠ-ꠌꠥꠙꠠ ꠈꠥꠎꠤꠀ ꠘꠤꠟꠣ। 36 ꠝꠣꠛꠥꠖꠦ ꠀꠉ ꠕꠘꠦꠃ ꠝꠤꠡꠞꠤ ꠅꠇꠟꠞ ꠖꠤꠟꠞ ꠝꠣꠎꠦ ꠄꠇ ꠖꠄꠀ-ꠝꠣꠄꠀ ꠙꠄꠖꠣ ꠇꠞꠍꠟꠣ, ꠎꠣꠔꠦ ꠛꠘꠤ ꠁꠍꠞꠣꠁꠟꠦ ꠎꠦꠔꠣ ꠈꠥꠎꠤꠛꠣ, ꠅꠔꠣꠃ ꠎꠣꠘꠥ ꠔꠣꠞꠣꠞꠦ ꠖꠦꠁꠘ। ꠅꠃ ꠟꠣꠈꠣꠘ ꠇꠞꠤ ꠔꠣꠞꠣ ꠝꠤꠡꠞꠤ ꠅꠇꠟꠞ ꠛꠃꠔ ꠗꠘ-ꠖꠃꠟꠔꠅ ꠇꠛꠎꠣ ꠇꠞꠟꠣ।
37 ꠅꠔꠣ ꠘꠤꠀ ꠛꠘꠤ ꠁꠍꠞꠣꠁꠟ ꠞꠣꠝꠣꠡꠦꠡ ꠄꠟꠣꠇꠣ ꠕꠣꠇꠤ ꠡꠥꠇ꠆ꠇꠔꠞ ꠝꠥꠈꠣ ꠞꠅꠀꠘꠣ ꠅꠁꠟꠣ। ꠔꠣꠞꠣꠞ ꠝꠣꠎꠦ ꠅꠘꠥꠝꠣꠘ ꠍꠄ ꠟꠣꠈ ꠡꠛꠟ ꠛꠦꠐꠣꠁꠘ ꠀꠐꠤꠀ ꠉꠦꠟꠣ। ꠄꠞꠣꠞ ꠟꠉꠦ ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠁꠘꠅ ꠀꠍꠟꠣ। 38 ꠛꠘꠤ ꠁꠍꠞꠣꠁꠟ ꠛꠣꠖꠦꠅ ꠔꠣꠞꠣꠞ ꠟꠉꠦ ꠞꠅꠞꠣ ꠀꠞꠅ ꠛꠃꠔ ꠝꠣꠘꠥꠡ, ꠉꠞꠥ-ꠝꠦꠠꠣꠞ ꠙꠣꠟ ꠢꠇꠟꠔꠣ ꠝꠤꠟꠤꠀ ꠛꠃꠔ ꠛꠠ ꠖꠟ ꠛꠣꠘ꠆ꠖꠤꠀ ꠞꠅꠀꠘꠣ ꠖꠤꠟꠣ। 39 ꠛꠣꠖꠦ ꠔꠣꠞꠣ ꠝꠤꠡꠞ ꠕꠣꠇꠤ ꠀꠘꠣ ꠢꠃ ꠝꠄꠖꠣꠞ ꠈꠣꠁ ꠖꠤꠀ ꠈꠣꠝꠤꠞ ꠍꠣꠠꠣ ꠞꠥꠐꠤ ꠛꠣꠘꠣꠁꠟꠣ। ꠝꠤꠡꠞ ꠕꠣꠇꠤ ꠔꠣꠞꠣꠞꠦ ꠎꠟꠖꠤ ꠇꠞꠤ ꠛꠤꠖꠣꠄ ꠖꠦꠅꠀꠄ ꠁ ꠈꠣꠁꠔ ꠈꠣꠝꠤꠞ ꠝꠣꠈꠣꠁꠛꠣꠞ ꠡꠝꠄꠃ ꠙꠣꠁꠍꠟꠣ ꠘꠣ, ꠀꠞ ꠙꠕꠞ ꠟꠣꠉꠤ ꠇꠥꠘꠥ ꠝꠍꠣꠅ ꠘꠤꠔꠣ ꠙꠣꠞꠍꠟꠣ ꠘꠣ।
40 ꠛꠘꠤ ꠁꠍꠞꠣꠁꠟ ꠝꠤꠡꠞꠅ ꠢꠇ꠆ꠇꠟꠔꠣꠄ ꠌꠣꠁꠞ-ꠡ ꠔꠤꠡ ꠛꠞꠍ ꠛꠡꠔ ꠇꠞꠍꠟꠣ। 41 ꠑꠤꠇ ꠅꠃ ꠌꠣꠁꠞ-ꠡ ꠔꠤꠡ ꠛꠞꠍ ꠙꠥꠞꠣ ꠅꠁꠛꠣꠞ ꠖꠤꠘꠅ ꠝꠣꠛꠥꠖꠞ ꠢꠇ꠆ꠇꠟ ꠛꠘ꠆ꠖꠣ, ꠍꠤꠙꠣꠁ ꠖꠟꠞ ꠟꠣꠈꠣꠘ ꠢꠣꠎꠤꠀ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠟꠣ। 42 ꠅꠃ ꠞꠣꠁꠔ ꠝꠣꠛꠥꠖꠦ ꠀꠙꠘ ꠇꠥꠖꠞꠔꠤ ꠍꠣꠄꠀꠄ ꠙꠣꠢꠣꠞꠣ ꠖꠤꠀ ꠔꠣꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤꠀ ꠀꠘꠣꠄ, ꠁ ꠞꠣꠁꠔꠈꠣꠘ ꠄꠛꠣꠖꠔꠤꠞ ꠞꠣꠁꠔ। ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ, ꠝꠣꠛꠥꠖꠞ ꠘꠣꠝꠦ ꠃꠎꠣꠉꠞꠤ ꠇꠞꠣꠞ ꠄꠇ ꠈꠣꠍ ꠞꠣꠁꠔ।
ꠀꠎꠣꠖꠤ ꠁꠖ ꠀꠖꠣꠄ ꠇꠞꠣꠞ ꠘꠤꠅꠝ-ꠇꠣꠘꠥꠘ
43 ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, “ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤꠞ ꠘꠤꠅꠝ-ꠇꠣꠘꠥꠘ ꠀꠝꠤ ꠔꠥꠝꠞꠣꠞꠦ ꠢꠤꠇꠣꠁ ꠖꠤꠀꠞ। ꠢꠥꠘꠅ, ꠅꠁꠘ꠆ꠘ ꠇꠥꠘꠥ ꠎꠣꠔꠤꠞ ꠝꠣꠘꠡꠞꠦ ꠄꠞ ꠉꠥꠡ꠆ꠔ ꠈꠣꠁꠔꠦ ꠖꠤꠛꠣꠄ ꠘꠣ। 44 ꠅꠁꠟꠦ ꠈꠞꠤꠖꠣ ꠉꠥꠟꠣꠝꠦ ꠝꠍꠟꠝꠣꠘꠤ ꠇꠞꠣꠘꠤꠞ ꠛꠣꠖꠦ ꠁꠔꠣ ꠈꠣꠁꠔ ꠙꠣꠞꠛ। 45 ꠅꠁꠘ꠆ꠘ ꠎꠦꠇꠥꠘꠥ ꠎꠣꠔꠤꠞ ꠝꠥꠍꠣꠚꠤꠞ ꠛꠣ ꠛꠦꠔꠘꠖꠣꠞꠤ ꠇꠣꠝꠟꠣꠞꠦꠅ ꠁꠔꠣ ꠈꠣꠅꠀꠁꠅ ꠘꠣ। 46 ꠔꠥꠝꠞꠣ ꠎꠣꠞ ꠛꠣꠠꠤꠔ ꠙꠡꠥ ꠎꠛ ꠇꠞꠛꠣꠄ ꠢꠃ ꠛꠣꠠꠤꠔꠃ ꠄꠞ ꠉꠥꠡ꠆ꠔ ꠈꠣꠁꠔꠦ ꠅꠁꠛ; ꠛꠣꠠꠤꠞ ꠛꠣꠞꠦ ꠇꠥꠘ꠆ꠔꠣꠃ ꠘꠤꠛꠣꠄ ꠘꠣ, ꠙꠡꠥꠞ ꠇꠥꠘꠥ ꠀꠒ꠆ꠒꠤ ꠜꠣꠋꠉꠤꠛꠣꠄ ꠘꠣ। 47 ꠔꠣꠝꠣꠝ ꠛꠘꠤ ꠁꠍꠞꠣꠁꠟꠦ ꠅꠃ ꠁꠖ ꠀꠖꠣꠄ ꠇꠞꠛꠣꠄ। 48 ꠔꠥꠝꠞꠣꠞ ꠟꠉꠦ ꠞꠅꠞꠣ ꠇꠥꠘꠥ ꠀꠛꠣꠖꠤꠄ ꠎꠥꠖꠤ ꠝꠣꠛꠥꠖꠞ ꠘꠣꠝꠞ ꠁ ꠁꠖ ꠝꠣꠘꠔ ꠌꠣꠄ, ꠔꠦ ꠙꠄꠟꠣ ꠔꠣꠞ ꠙꠞꠤꠛꠣꠞꠞ ꠢꠇꠟ ꠛꠦꠐꠣꠁꠘ꠆ꠔꠞ ꠝꠍꠟꠝꠣꠘꠤ ꠇꠞꠣꠘꠤ ꠟꠣꠉꠛ। ꠛꠣꠖꠦ ꠢꠦ ꠛꠘꠤ ꠁꠍꠞꠣꠁꠟꠞ ꠟꠣꠈꠣꠘ ꠁꠖ ꠀꠖꠣꠄ ꠇꠞꠔ ꠙꠣꠞꠛ। ꠅꠁꠟꠦ ꠝꠍꠟꠝꠣꠘꠤ ꠇꠞꠣꠘꠤ ꠍꠣꠠꠣ ꠇꠦꠃ ꠁ ꠉꠥꠡ꠆ꠔ ꠈꠣꠁꠔ ꠙꠣꠞꠔ ꠘꠣꠄ। 49 ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠀꠞ ꠀꠛꠣꠖꠤꠞ ꠟꠣꠉꠤꠅ ꠄꠇ ꠢꠝꠣꠘ ꠀꠁꠘ ꠎꠣꠞꠤ ꠅꠁꠟ।”
50 ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠛꠘꠤ ꠁꠍꠞꠣꠁꠟꠦ ꠢꠣꠍꠣꠞꠞ ꠅꠃꠟꠣꠃ ꠀꠝꠟ ꠇꠞꠟꠣ। 51 ꠝꠣꠛꠥꠖꠦ ꠢꠃ ꠖꠤꠘꠃ ꠍꠤꠙꠣꠁ ꠖꠟꠞ ꠟꠣꠈꠣꠘ ꠇꠞꠤ, ꠛꠘꠤ ꠁꠍꠞꠣꠁꠟ ꠅꠇꠟꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠟꠣ।