1 ꠝꠣꠛꠥꠖꠦ ꠝꠥꠍꠣꠞꠦ ꠀꠞꠅ ꠇꠁꠟꠣ, “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠀꠝꠣꠞ ꠅꠃ ꠘꠤꠅꠝ-ꠇꠣꠘꠥꠘ ꠅꠇꠟ ꠎꠣꠘꠣꠅ।

2 “ꠔꠥꠝꠞꠣ ꠎꠥꠖꠤ ꠇꠥꠘꠥ ꠁꠛꠞꠣꠘꠤ ꠛꠦꠐꠣꠞꠦ ꠈꠞꠤꠖ ꠇꠞꠤꠀ ꠉꠥꠟꠣꠝ ꠛꠣꠘꠣꠅ, ꠔꠦ ꠅꠃ ꠉꠥꠟꠣꠝꠦ ꠍꠄ ꠛꠍꠞ ꠔꠥꠝꠞꠣꠞ ꠉꠥꠟꠣꠝꠤ ꠇꠞꠛ, ꠛꠣꠖꠦ ꠡꠣꠔ ꠛꠍꠞꠞ ꠛꠣꠟꠣ ꠔꠣꠞ ꠉꠦꠍ ꠕꠣꠇꠤ ꠇꠥꠘ꠆ꠔꠣ ꠘꠣ ꠘꠤꠀ, ꠔꠣꠞꠦ ꠄꠝꠘꠦꠃ ꠀꠎꠣꠖ ꠇꠞꠤ ꠖꠤꠛꠣꠄ। 3 ꠢꠦ ꠎꠥꠖꠤ ꠄꠇꠟꠣ ꠔꠥꠝꠞꠣꠞ ꠉꠦꠍꠦ ꠀꠄ ꠔꠦ ꠄꠇꠟꠣꠃ ꠎꠣꠁꠛ; ꠀꠞ ꠎꠥꠖꠤ ꠛꠃꠞꠦ ꠟꠉꠦ ꠟꠁꠀ ꠀꠄ, ꠔꠦ ꠛꠃ ꠟꠁꠀ ꠎꠣꠁꠛ। 4 ꠅꠁꠟꠦ ꠔꠣꠞ ꠝꠥꠘꠤꠛꠦ ꠎꠥꠖꠤ ꠔꠣꠞꠦ ꠛꠤꠀ ꠇꠞꠣꠁ ꠕꠣꠇꠦ, ꠀꠞ ꠔꠣꠞ ꠇꠥꠘꠥ ꠢꠥꠞꠥꠔ꠆ꠔꠣ-ꠝꠥꠞꠥꠔ꠆ꠔꠣ ꠅꠁꠘ, ꠔꠣꠁꠟꠦ ꠁ ꠛꠦꠐꠤ ꠀꠞ ꠢꠥꠞꠥꠔ꠆ꠔꠣꠁꠘ ꠝꠥꠘꠤꠛꠞ ꠉꠦꠍꠦꠃ ꠞꠁꠛꠣ; ꠢꠦ ꠈꠣꠟꠤ ꠄꠇꠟꠣ ꠀꠎꠣꠖ ꠅꠁꠛ। 5 ꠀꠞ ꠢꠤ ꠉꠥꠟꠣꠝꠦ ꠎꠥꠖꠤ ꠍꠣꠚ ꠇꠞꠤ ꠇꠄ ꠎꠦꠘ, ꠢꠦ ꠔꠣꠞ ꠝꠥꠘꠤꠛ ꠀꠞ ꠔꠣꠞ ꠛꠃ-ꠛꠣꠁꠌ꠆ꠌꠣꠞ ꠝꠣꠄꠀꠄ, ꠄꠞꠣꠞꠦ ꠍꠣꠠꠤꠀ ꠎꠣꠁꠔ ꠘꠣꠄ, 6 ꠔꠦ ꠁ ꠝꠣꠟꠤꠇꠦ ꠔꠣꠞꠦ ꠟꠁꠀ ꠀꠟ꠆ꠟꠣꠞ ꠖꠞꠛꠣꠞꠅ ꠀꠎꠤꠞ ꠅꠁꠛ। ꠔꠣꠞꠦ ꠖꠥꠀꠞꠞ ꠇꠙꠣꠐ ꠛꠣ ꠌꠃꠇꠣꠑꠞ ꠟꠉꠦ ꠃꠛꠣ ꠇꠞꠤꠀ ꠝꠥꠘꠤꠛꠦ ꠡꠤꠇ ꠖꠤꠀ ꠔꠣꠞ ꠇꠣꠘꠅ ꠚꠥꠠ ꠇꠞꠛ। ꠔꠦꠃ ꠢꠦ ꠢꠣꠞꠣ ꠎꠤꠘ꠆ꠖꠦꠉꠤꠜꠞ ꠝꠥꠘꠤꠛꠞ ꠉꠥꠟꠣꠝꠤꠔ ꠞꠁꠛ।

7 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠛꠣꠘ꠆ꠖꠤꠉꠤꠞꠤꠔ ꠖꠤꠛꠣꠞ ꠟꠣꠉꠤ ꠔꠣꠞ ꠘꠤꠎꠞ ꠙꠥꠠꠤꠞꠦ ꠛꠦꠌꠤꠟꠣꠄ, ꠔꠦ ꠉꠥꠟꠣꠝ ꠅꠇꠟ ꠎꠦꠟꠣ ꠍꠄ ꠛꠍꠞ ꠛꠣꠖꠦ ꠝꠥꠘꠤꠛꠞ ꠛꠣꠠꠤ ꠕꠣꠇꠤ ꠄꠝꠘꠦꠃ ꠀꠎꠣꠖ ꠅꠁꠎꠣꠁꠘ, ꠅꠃ ꠙꠥꠠꠤ ꠔ ꠁꠟꠣ ꠀꠎꠣꠖ ꠅꠁꠔ ꠘꠣꠄ। 8 ꠔꠣꠁꠞ ꠝꠥꠘꠤꠛ ꠎꠥꠖꠤ ꠔꠣꠁꠞ ꠃꠙꠞꠦ ꠈꠥꠡꠤ ꠘꠣ ꠅꠁꠘ, ꠔꠦ ꠐꠦꠇꠣ-ꠙꠄꠡꠣꠞ ꠛꠖꠟꠣ ꠔꠣꠁꠞꠦ ꠀꠎꠣꠖ ꠇꠞꠤ ꠖꠤꠔꠦ ꠅꠁꠛ। ꠔꠣꠁꠞꠦ ꠖꠥꠍꠞꠣ ꠇꠥꠘꠥ ꠎꠣꠔꠤꠞ ꠝꠣꠘꠡꠞ ꠉꠦꠍꠦ ꠛꠦꠌꠤꠛꠣꠞ ꠄꠈꠔꠤꠀꠞ ꠘꠣꠁ, ꠇꠣꠞꠘ ꠝꠥꠘꠤꠛꠦ ꠔ ꠔꠣꠘ ꠘꠤꠎꠞ ꠖꠣꠄꠁꠔ꠆ꠔ ꠀꠖꠣꠄ ꠇꠞꠍꠂꠘ ꠘꠣ। 9 ꠅꠁꠟꠦ ꠝꠥꠘꠤꠛꠦ ꠎꠥꠖꠤ ꠔꠣꠘ ꠘꠤꠎꠞ ꠙꠥꠀꠞ ꠟꠣꠉꠤ ꠔꠣꠁꠞꠦ ꠙꠍꠘ꠆ꠖ ꠇꠞꠤꠀ ꠘꠦꠁꠘ, ꠔꠦ ꠔꠣꠁꠞꠦ ꠀꠙꠘ ꠙꠥꠠꠤꠞ ꠟꠣꠈꠣꠘ ꠢꠇꠟ ꠈꠦꠝꠔꠣ ꠖꠤꠔꠦ ꠅꠁꠛ। 10 ꠝꠥꠘꠤꠛꠦ ꠎꠥꠖꠤ ꠅꠃ ꠛꠣꠘ꠆ꠖꠤꠞꠦ ꠛꠤꠀ ꠇꠞꠣꠞ ꠛꠣꠖꠦ, ꠖꠥꠍꠞꠣ ꠇꠥꠘꠥ ꠇꠁꠘꠣꠞꠦ ꠛꠤꠀ ꠇꠞꠦ, ꠔꠣ-ꠅ ꠁ ꠛꠣꠘ꠆ꠖꠤꠞ ꠈꠥꠞꠣꠇꠤ, ꠇꠣꠙꠠ-ꠌꠥꠙꠠ ꠀꠞ ꠡꠞꠤꠟꠞ ꠙꠣꠅꠘꠣ ꠢꠇ ꠔꠣꠁꠞꠦ ꠖꠦꠅꠀ ꠟꠣꠉꠛ। 11 ꠢꠦ ꠎꠥꠖꠤ ꠅꠃ ꠔꠤꠘꠅ ꠢꠇ ꠙꠥꠞꠣꠙꠥꠞ ꠀꠖꠣꠄ ꠘꠣ ꠇꠞꠦ, ꠔꠦ ꠁ ꠙꠥꠠꠤꠞꠦ ꠄꠇꠖꠝ ꠛꠤꠘꠣ ꠙꠄꠡꠣꠄ ꠀꠎꠣꠖ ꠇꠞꠤ ꠖꠤꠔꠦ ꠅꠁꠛ।

12 “ꠝꠣꠁꠞ ꠈꠣꠁꠀ ꠎꠥꠖꠤ ꠇꠥꠘꠥ ꠝꠣꠘꠥꠡ ꠝꠞꠤꠎꠣꠄ, ꠔꠦ ꠎꠦꠉꠤꠄ ꠔꠣꠞꠦ ꠝꠣꠞꠍꠦ, ꠔꠣꠞꠦꠅ ꠎꠣꠘꠦ ꠝꠣꠞꠣ ꠅꠁꠛ। 13 ꠅꠁꠟꠦ ꠢꠦ ꠘꠤꠎꠦ ꠎꠥꠖꠤ ꠈꠥꠘ ꠘꠣ ꠇꠞꠣꠞ ꠘꠤꠅꠔꠦ ꠝꠣꠞꠦ, ꠀꠈꠔꠣ ꠇꠥꠘꠥ ꠇꠣꠞꠘꠦ ꠊꠐꠤꠎꠣꠄ ꠛꠣ ꠀꠝꠤ ꠀꠟ꠆ꠟꠣꠞ ꠝꠞ꠆ꠎꠤꠄ ꠁꠔꠣ ꠅꠄ, ꠔꠦ ꠅꠃ ꠈꠥꠘꠤ ꠎꠘ ꠉꠤꠀ ꠅꠟꠣ ꠇꠥꠘꠥ ꠎꠣꠉꠣꠔ ꠜꠣꠉꠤꠔ ꠙꠣꠞꠛ, ꠎꠦ ꠎꠣꠉꠣꠞ ꠇꠕꠣ ꠀꠝꠤ ꠔꠥꠝꠞꠣꠞꠦ ꠇꠁꠝꠥ। 14 ꠀꠞ ꠇꠦꠃ ꠎꠥꠖꠤ ꠎꠣꠘꠤꠀ-ꠢꠥꠘꠤꠀ ꠁꠌ꠆ꠍꠣ ꠇꠞꠤ ꠇꠦꠃꠞꠞꠦ ꠈꠥꠘ ꠇꠞꠤꠀ, ꠛꠣꠖꠦ ꠀꠁꠀ ꠀꠝꠣꠞ ꠇꠥꠞꠛꠣꠘꠤ ꠈꠣꠘꠣꠞ ꠉꠦꠍꠦꠅ ꠀꠡꠞꠄ ꠟꠄ, ꠔꠣ-ꠅ ꠢꠘ ꠕꠣꠇꠤ ꠗꠞꠤꠀ ꠘꠤꠀ ꠔꠣꠞꠦ ꠎꠣꠘꠦ ꠝꠣꠞꠣ ꠅꠁꠛ।

15 “ꠎꠦ ꠝꠣꠘꠡꠦ ꠔꠣꠞ ꠀꠙꠘ ꠝꠣ ꠛꠣ ꠛꠣꠚꠞ ꠃꠙꠞꠦ ꠀꠔ ꠔꠥꠟꠦ, ꠔꠣꠞꠦ ꠘꠤꠌꠄ ꠎꠣꠘꠦ ꠝꠣꠞꠣ ꠅꠁꠛ।

16 “ꠇꠦꠃ ꠎꠥꠖꠤ ꠇꠥꠘꠥ ꠝꠣꠘꠡꠞꠦ ꠌꠥꠞꠤ ꠇꠞꠤꠀ ꠀꠘꠤꠀ ꠛꠦꠌꠤꠟꠣꠄ, ꠛꠣ ꠅꠃ ꠝꠣꠘꠡꠞꠦ ꠔꠣꠞ ꠉꠦꠍꠦ ꠙꠣꠅꠀ ꠎꠣꠄ, ꠔꠦ ꠔꠣꠞꠦ ꠘꠤꠌ꠆ꠌꠄ ꠎꠣꠘꠦ ꠝꠣꠞꠣ ꠅꠁꠛ।

17 “ꠎꠦ ꠝꠣꠘꠡꠦ ꠀꠙꠘ ꠝꠣ ꠛꠣ ꠛꠣꠚꠞꠦ ꠉꠣꠟꠤ-ꠉꠣꠟꠣꠎ ꠇꠞꠦ, ꠔꠣꠞꠦꠅ ꠘꠤꠌ꠆ꠌꠄ ꠎꠣꠘꠦ ꠝꠣꠞꠣ ꠅꠁꠛ।

18 “ꠇꠥꠘꠥ ꠝꠣꠘꠡꠦ ꠇꠣꠁꠎ꠆ꠎꠣꠔ ꠟꠣꠉꠤꠀ ꠎꠥꠖꠤ ꠟꠉꠞ ꠎꠘꠞꠦ ꠑꠥꠡꠤ ꠛꠣ ꠙꠣꠔ꠆ꠔꠞꠖꠤ ꠝꠣꠞꠦ, ꠁ ꠝꠣꠁꠞ ꠈꠣꠁꠀ ꠅꠃ ꠎꠘ ꠘꠣ ꠝꠞꠟꠦꠅ ꠛꠤꠍꠘꠣꠔ ꠢꠥꠔꠤꠀ ꠙꠠꠘꠅ ꠕꠣꠇꠦ, 19 ꠢꠦꠡꠦ ꠃꠑꠤꠀ ꠟꠣꠑꠤ ꠜꠞ ꠖꠤꠀ ꠌꠟꠣ-ꠚꠤꠞꠣ ꠇꠞꠣꠞ ꠎꠞꠥꠞ ꠅꠄ, ꠔꠦ ꠎꠦꠉꠤꠄ ꠔꠣꠞꠦ ꠝꠣꠞꠍꠦ ꠔꠣꠞꠦ ꠎꠣꠘꠦ ꠝꠣꠞꠤꠅ ꠘꠣ। ꠈꠣꠟꠤ ꠢꠃ ꠎꠘꠞ ꠇꠣꠝ-ꠇꠣꠎꠞ ꠈꠦꠔꠤ ꠀꠞ ꠔꠣꠞ ꠡꠥꠟ꠆ꠟꠀꠘꠣ ꠖꠣꠅꠀꠁ ꠈꠞꠌ ꠖꠤꠔꠦ ꠅꠁꠛ।

20 “ꠇꠦꠃ ꠎꠥꠖꠤ ꠔꠣꠞ ꠈꠞꠤꠖꠣ ꠉꠥꠟꠣꠝ-ꠛꠣꠘ꠆ꠖꠤꠞꠦ ꠟꠣꠑꠤ ꠖꠤꠀ ꠝꠣꠞꠦ ꠀꠞ ꠝꠣꠁꠞ ꠈꠣꠁꠀ ꠅꠉꠥ ꠝꠞꠤꠎꠣꠄ, ꠔꠦ ꠄꠞꠦ ꠡꠣꠎꠣ ꠖꠤꠔꠦ ꠅꠁꠛ। 21 ꠅꠁꠟꠦ ꠝꠣꠁꠞ ꠈꠣꠅꠀꠞ ꠖꠥꠁ-ꠄꠇꠖꠤꠘ ꠛꠣꠖꠦ ꠎꠥꠖꠤ ꠛꠣꠌꠤꠀ ꠞꠄ, ꠔꠦ ꠇꠥꠘꠥ ꠡꠣꠎꠣ ꠖꠦꠅꠀ ꠟꠣꠉꠔ ꠘꠣꠄ, ꠇꠣꠞꠘ ꠅꠃ ꠉꠥꠟꠣꠝ ꠔ ꠔꠣꠞ ꠘꠤꠎꠞ ꠍꠣꠝꠣꠘꠣ ꠀꠍꠤꠟ।

22 “ꠝꠣꠞꠣ-ꠝꠣꠞꠤ ꠇꠞꠣꠔ ꠟꠣꠉꠤꠀ ꠎꠥꠖꠤ ꠀꠈꠔꠣ ꠇꠦꠃ ꠇꠥꠘꠥ ꠛꠦꠐꠤꠞꠦ ꠝꠣꠞꠦ ꠀꠞ ꠔꠣꠁꠞ ꠙꠦꠐꠞ ꠛꠣꠁꠌ꠆ꠌꠣ ꠘꠡ꠆ꠐ ꠅꠁꠎꠣꠄ, ꠅꠁꠟꠦ ꠀꠞ ꠇꠥꠘꠥ ꠈꠦꠔꠤ ꠘꠣ ꠅꠄ, ꠔꠦ ꠅꠃ ꠛꠦꠐꠤꠞ ꠎꠣꠝꠣꠁꠞ ꠖꠣꠛꠤ ꠀꠞ ꠛꠤꠌꠣꠞꠤ-ꠡꠣꠟꠤꠡꠞ ꠛꠤꠛꠦꠌꠘꠣ ꠝꠣꠚꠤꠇ ꠄꠞꠦ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ। 23 ꠅꠁꠟꠦ ꠎꠥꠖꠤ ꠔꠣꠁꠞ ꠀꠞꠅ ꠇꠥꠘꠥ ꠈꠦꠔꠤ ꠅꠄ, ꠔꠣꠁꠟꠦ ꠄꠞꠦ ꠅꠃ ꠟꠣꠈꠣꠘ ꠡꠣꠎꠣ ꠖꠤꠛꠣꠄ: 24 ꠎꠣꠘꠞ ꠛꠖꠟꠣ ꠎꠣꠘ, ꠌꠃꠈꠞ ꠛꠖꠟꠣ ꠌꠃꠈ, ꠖꠣꠔꠞ ꠛꠖꠟꠣ ꠖꠣꠔ, ꠀꠔꠞ ꠛꠖꠟꠣ ꠀꠔ, ꠙꠣꠅꠞ ꠛꠖꠟꠣ ꠙꠣꠅ, 25 ꠎꠣꠟꠣꠘꠤꠞ ꠛꠖꠟꠣ ꠎꠣꠟꠣꠘꠤ, ꠎꠈꠝꠞ ꠛꠖꠟꠣ ꠎꠈꠝ, ꠖꠣꠉꠞ ꠛꠖꠟꠣ ꠖꠣꠉ ꠖꠤꠔꠦ ꠅꠁꠛ।

26 “ꠇꠦꠃ ꠎꠥꠖꠤ ꠔꠣꠞ ꠈꠞꠤꠖꠣ ꠉꠥꠟꠣꠝ ꠛꠣ ꠛꠣꠘ꠆ꠖꠤꠞ ꠇꠥꠘꠥ ꠌꠈꠥꠔ ꠝꠣꠞꠣꠄ ꠌꠃꠈ ꠘꠡ꠆ꠐ ꠅꠁꠎꠣꠄ, ꠔꠦ ꠅꠃ ꠌꠃꠈꠞ ꠛꠖꠟꠣ ꠢꠦ ꠁ ꠉꠥꠟꠣꠝꠞꠦ ꠀꠎꠣꠖ ꠇꠞꠤ ꠖꠤꠔꠦ ꠅꠁꠛ। 27 ꠎꠥꠖꠤ ꠝꠣꠞꠤꠀ ꠄꠞ ꠖꠣꠔ ꠚꠣꠟꠣꠁ ꠖꠦꠄ, ꠔꠣ-ꠅ ꠄꠞꠦ ꠀꠎꠣꠖ ꠇꠞꠤ ꠖꠦꠅꠀ ꠟꠣꠉꠛ।

28 “ꠇꠥꠘꠥ ꠉꠞꠥꠄ ꠉꠥꠔꠣꠁꠀ ꠎꠥꠖꠤ ꠇꠥꠘꠥ ꠛꠦꠐꠣ ꠛꠣ ꠛꠦꠐꠤꠞꠦ ꠝꠣꠞꠤꠟꠣꠄ, ꠔꠦ ꠉꠞꠥꠞ ꠝꠣꠟꠤꠇꠞꠦ ꠇꠥꠘꠥ ꠡꠣꠎꠣ ꠖꠦꠅꠀ ꠟꠣꠉꠔ ꠘꠣꠄ। ꠈꠣꠟꠤ ꠢꠤ ꠉꠞꠥꠞꠦ ꠙꠣꠔ꠆ꠔꠞꠖꠤ ꠁꠐꠣꠁꠀ ꠝꠣꠞꠤꠟꠤꠔꠦ ꠅꠁꠛ, ꠁ ꠉꠞꠥꠞ ꠉꠥꠡ꠆ꠔ ꠇꠦꠃ ꠈꠣꠁꠔ ꠙꠣꠞꠔ ꠘꠣꠄ। 29 ꠅꠁꠟꠦ ꠁ ꠉꠞꠥꠞ ꠎꠥꠖꠤ ꠢꠣꠝꠦꠡꠣ ꠅꠃꠟꠣ ꠉꠥꠔꠣꠘꠤꠞ ꠈꠣꠁꠌ꠆ꠍꠔ ꠕꠣꠇꠦ, ꠀꠞ ꠢꠤ ꠝꠣꠟꠤꠇꠞꠦ ꠢꠥꠡꠤꠀꠞ ꠇꠞꠣꠞ ꠛꠣꠖꠦꠅ ꠢꠦ ꠁꠐꠣꠞꠦ ꠀꠐꠇꠣꠄ ꠘꠣ, ꠄꠞꠝꠣꠎꠦ ꠁ ꠉꠞꠥꠄ ꠇꠥꠘꠥ ꠛꠦꠐꠣ ꠛꠣ ꠛꠦꠐꠤꠞꠦ ꠝꠣꠞꠤꠟꠣꠄ, ꠔꠦ ꠁ ꠉꠞꠥꠞꠦ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟꠤꠔꠦ ꠅꠁꠛ, ꠀꠞ ꠔꠣꠞ ꠝꠣꠟꠤꠇꠞꠦꠅ ꠝꠣꠞꠤꠟꠤꠔꠦ ꠅꠁꠛ। 30 ꠎꠥꠖꠤ ꠁ ꠝꠣꠟꠤꠇꠞ ꠉꠦꠍꠦ ꠇꠥꠘꠥ ꠈꠦꠔꠤ-ꠙꠥꠞꠘ ꠌꠣꠅꠀ ꠅꠄ, ꠔꠣꠁꠟꠦ ꠢꠦ ꠅꠃ ꠎꠞꠤꠝꠣꠘꠣ ꠖꠤꠀ ꠘꠤꠎꠞ ꠎꠣꠘ ꠛꠣꠌꠣꠁꠔ ꠙꠣꠞꠛ। 31 ꠁ ꠉꠞꠥꠄ ꠎꠥꠖꠤ ꠇꠥꠘꠥ ꠢꠥꠞꠥꠔ꠆ꠔꠣꠞꠦ ꠉꠥꠔꠣꠁꠀ ꠝꠣꠞꠤꠟꠣꠄ, ꠔꠣꠁꠟꠦ ꠄꠞꠟꠣꠉꠤꠅ ꠅꠃ ꠢꠝꠣꠘ ꠘꠤꠅꠝ ꠅꠁꠛ। 32 ꠇꠥꠘꠥ ꠉꠞꠥꠄ ꠎꠥꠖꠤ ꠇꠦꠃꠞꠞ ꠉꠥꠟꠣꠝ ꠛꠣ ꠛꠣꠘ꠆ꠖꠤꠞꠦ ꠉꠥꠔꠣꠁꠀ ꠝꠣꠞꠤꠟꠣꠄ, ꠔꠣꠁꠟꠦ ꠉꠞꠥꠞ ꠝꠣꠟꠤꠇꠦ ꠢꠤ ꠉꠥꠟꠣꠝꠞ ꠝꠣꠟꠤꠇꠞꠦ ꠔꠤꠡ ꠔꠟꠣ ꠙꠞꠤꠝꠣꠘ ꠞꠥꠙꠣ ꠖꠤꠔꠦ ꠅꠁꠛ ꠀꠞ ꠢꠤ ꠉꠞꠥꠞꠦꠅ ꠙꠣꠔ꠆ꠔꠞ ꠝꠣꠞꠤ ꠝꠣꠞꠤꠟꠤꠔꠦ ꠅꠁꠛ।

33 “ꠇꠦꠃ ꠎꠥꠖꠤ ꠇꠥꠘꠥ ꠉꠣꠔꠞ ꠝꠥꠈ ꠈꠥꠟꠤꠀ ꠕꠄ ꠛꠣ ꠉꠣꠔ ꠈꠥꠖꠤꠀ ꠁꠉꠥꠞ ꠝꠥꠈ ꠉꠥꠞꠤꠀ ꠘꠣ ꠕꠄ, ꠀꠞ ꠁ ꠉꠣꠔꠞ ꠜꠤꠔꠞꠦ ꠇꠥꠘꠥ ꠉꠞꠥ ꠛꠣ ꠉꠣꠗꠣ ꠙꠠꠤꠎꠣꠄ, 34 ꠔꠣꠁꠟꠦ ꠉꠣꠔꠞ ꠝꠣꠟꠤꠇꠦ ꠙꠡꠥꠞ ꠝꠣꠟꠤꠇꠞꠦ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ। ꠅꠁꠟꠦ ꠁ ꠝꠞꠣ ꠙꠡꠥ ꠙꠣꠁꠛ ꠉꠣꠔꠞ ꠝꠣꠟꠤꠇꠦ।

35 “ꠇꠦꠃꠞꠞ ꠉꠞꠥꠄ ꠎꠥꠖꠤ ꠀꠞꠇ ꠎꠘꠞ ꠉꠞꠥꠞꠦ ꠉꠥꠔꠣꠁꠀ ꠝꠣꠞꠤꠟꠣꠄ, ꠔꠦ ꠢꠃ ꠎꠤꠔꠣ ꠉꠞꠥꠞꠦ ꠛꠦꠌꠤꠀ, ꠄꠞ ꠖꠣꠝ ꠀꠞ ꠝꠞꠣ ꠉꠞꠥꠞ ꠖꠣꠝꠅ ꠄꠞꠣ ꠖꠥꠁꠅꠎꠘꠦ ꠢꠝꠣꠘ ꠢꠝꠣꠘ ꠇꠞꠤ ꠛꠣꠐꠤꠀ ꠘꠤꠛꠣ। 36 ꠅꠁꠟꠦ ꠀꠉ ꠕꠣꠇꠤ ꠎꠥꠖꠤ ꠎꠣꠘꠣ-ꠢꠥꠘꠣ ꠕꠣꠇꠦ ꠎꠦꠘ, ꠁ ꠉꠞꠥꠄ ꠅꠟꠣ ꠉꠥꠔꠣꠄ, ꠀꠞ ꠔꠣꠞ ꠝꠣꠟꠤꠇꠦ ꠔꠣꠞꠦ ꠘꠣ ꠀꠐꠇꠣꠄ, ꠔꠦ ꠉꠞꠥꠞ ꠛꠖꠟꠣ ꠉꠞꠥ ꠖꠤꠔꠦ ꠅꠁꠛ, ꠛꠖꠟꠣ ꠖꠦꠅꠞꠣ ꠎꠘꠦ ꠅꠃ ꠝꠞꠣ ꠉꠞꠥꠐꠣ ꠙꠣꠁꠛ।