1 “ꠇꠦꠃ ꠇꠥꠘꠥ ꠝꠣꠘꠡꠞ ꠉꠞꠥ ꠛꠣ ꠝꠦꠠꠣ-ꠍꠣꠉꠟ ꠌꠥꠞꠤ ꠇꠞꠤꠀ ꠀꠘꠤꠀ ꠎꠥꠖꠤ ꠛꠦꠌꠤꠟꠣꠄ ꠛꠣ ꠎꠛ ꠇꠞꠤꠟꠣꠄ, ꠔꠦ ꠄꠇ ꠉꠞꠥꠞ ꠛꠖꠟꠣ ꠙꠣꠌꠉꠥ, ꠄꠇ ꠝꠦꠠꠣ ꠛꠣ ꠍꠣꠉꠟꠞ ꠛꠖꠟꠣ ꠌꠣꠁꠞꠉꠥ ꠚꠤꠞꠔ ꠖꠤꠔꠦ ꠅꠁꠛ। 2-4 ꠌꠥꠞꠦ ꠔꠣꠞ ꠌꠥꠞꠤꠞ ꠝꠣꠟꠞ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ, ꠅꠁꠟꠦ ꠔꠣꠞ ꠎꠥꠖꠤ ꠈꠦꠔꠤ-ꠙꠥꠞꠘ ꠖꠤꠛꠣꠞ ꠇꠥꠘꠥ ꠔꠣꠇ꠆ꠇꠔ ꠘꠣ ꠕꠣꠇꠦ, ꠔꠦ ꠔꠣꠞꠦ ꠛꠦꠌꠤꠀ ꠄꠞ ꠈꠦꠔꠤ-ꠙꠥꠞꠘ ꠀꠖꠣꠄ ꠇꠞꠔꠦ ꠅꠁꠛ। ꠌꠥꠞꠤ ꠇꠞꠣ ꠉꠞꠥ-ꠉꠣꠗꠣ ꠛꠣ ꠝꠦꠠꠣ-ꠍꠣꠉꠟ ꠎꠥꠖꠤ ꠌꠥꠞꠞ ꠉꠦꠍꠦ ꠎꠤꠔꠣ ꠙꠣꠅꠀ ꠎꠣꠄ, ꠔꠣꠁꠟꠦ ꠢꠦ ꠁꠔꠣ ꠄꠉꠥꠞ ꠛꠖꠟꠣ ꠖꠥꠉꠥ ꠚꠤꠞꠔ ꠖꠤꠔꠦ ꠅꠁꠛ।

“ꠇꠥꠘꠥ ꠌꠥꠞꠦ ꠎꠥꠖꠤ ꠌꠥꠞꠤꠔ ꠉꠤꠀ ꠊꠞꠅ ꠢꠣꠝꠣꠁꠛꠣꠞ ꠛꠣꠟꠣ ꠗꠞꠣ ꠈꠣꠁꠟꠣꠄ ꠀꠞ ꠎꠈꠝ ꠅꠁꠀ ꠝꠞꠤꠎꠣꠄ, ꠔꠣꠁꠟꠦ ꠔꠣꠞꠦ ꠝꠣꠞꠣꠞ ꠟꠣꠉꠤ ꠝꠣꠞꠞꠣ ꠎꠘ ꠖꠣꠄꠁ ꠅꠁꠔ ꠘꠣꠄ। ꠅꠁꠟꠦ ꠡꠥꠞꠥꠎ ꠃꠑꠣꠞ ꠛꠣꠖꠦ ꠎꠥꠖꠤ ꠖꠤꠘꠞ ꠛꠣꠟꠣ ꠁꠟꠣ ꠅꠄ, ꠔꠦ ꠁ ꠈꠥꠘꠞ ꠟꠣꠉꠤ ꠢꠦ ꠖꠣꠄꠁ ꠅꠁꠛ।

5 “ꠇꠦꠃ ꠎꠥꠖꠤ ꠔꠣꠞ ꠉꠞꠥ-ꠍꠣꠉꠟ ꠘꠤꠎꠞ ꠛꠣꠉꠣꠘꠅ ꠛꠣ ꠈꠦꠔꠞ ꠝꠣꠎꠦ ꠞꠣꠈꠣꠔ ꠉꠤꠀ ꠍꠣꠠꠤ ꠖꠦꠄ, ꠀꠞ ꠁꠔꠣꠄ ꠉꠤꠀ ꠝꠣꠘꠡꠞ ꠈꠦꠔꠞ ꠚꠡꠟ ꠈꠣꠁꠟꠣꠄ, ꠔꠦ ꠔꠣꠞ ꠘꠤꠎꠞ ꠈꠦꠔꠞ ꠢꠇꠟ ꠕꠣꠇꠤ ꠜꠣꠟꠣ ꠅꠋꠡ ꠛꠖꠟꠣ ꠖꠤꠀ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ।

6 “ꠇꠥꠘꠥ ꠎꠣꠉꠣ ꠕꠣꠇꠤ ꠀꠉꠥꠁꠘ ꠟꠣꠉꠤꠀ ꠎꠥꠖꠤ ꠎꠥꠙ-ꠎꠋꠉꠟ ꠎꠟꠦ, ꠀꠞ ꠛꠣꠖꠦ ꠅꠃ ꠀꠉꠥꠁꠘ ꠉꠤꠀ ꠇꠦꠃꠞꠞ ꠈꠦꠔꠞ ꠝꠣꠎꠦ ꠛꠣꠘ꠆ꠖꠣ ꠝꠥꠁꠐ, ꠐꠦꠇꠤ ꠛꠣ ꠀꠡ꠆ꠔꠣ ꠈꠦꠔ ꠎꠟꠤ ꠎꠣꠄ, ꠔꠦ ꠀꠉꠥꠁꠘ ꠎꠦꠉꠤꠄ ꠎꠣꠟꠣꠁꠍꠤꠟ, ꠢꠦ ꠁꠔꠣꠞ ꠈꠦꠔꠤ-ꠙꠥꠞꠘ ꠖꠤꠛ।

7 “ꠇꠦꠃ ꠎꠥꠖꠤ ꠀꠞꠇ ꠎꠘꠞ ꠉꠦꠍꠦ ꠝꠣꠟ-ꠍꠣꠝꠣꠘꠣ ꠛꠣ ꠐꠦꠇꠣ-ꠙꠄꠡꠣ ꠀꠝꠣꠘꠔ ꠕꠄ, ꠀꠞ ꠀꠝꠣꠘꠔ-ꠖꠣꠞꠞ ꠊꠞ ꠕꠣꠇꠤ ꠁꠔꠣ ꠌꠥꠞꠤ ꠅꠁꠎꠣꠄ, ꠔꠦ ꠅꠃ ꠌꠥꠞ ꠗꠞꠣ ꠙꠠꠟꠦ, ꠌꠥꠞꠦ ꠄꠞ ꠒꠣꠛꠥꠟ ꠚꠤꠞꠔ ꠖꠤꠛ। 8 ꠅꠁꠟꠦ ꠌꠥꠞ ꠗꠞꠣ ꠘꠣ ꠙꠠꠟꠦ, ꠢꠤ ꠊꠞꠞ ꠝꠣꠟꠤꠇꠦ ꠘꠤꠎꠦꠃ ꠁꠔꠣ ꠟꠥꠇꠣꠁꠍꠦ ꠘꠤ, ꠅꠈꠣꠘ ꠎꠣꠘꠣꠞ ꠟꠣꠉꠤ ꠔꠣꠞꠦ ꠀꠟ꠆ꠟꠣꠞ ꠖꠞꠛꠣꠞꠅ ꠀꠎꠤꠞ ꠇꠞꠛꠣꠄ।

9 “ꠀꠞꠇ ꠎꠘꠞ ꠖꠈꠟꠅ ꠀꠍꠦ, ꠅꠃꠟꠣ ꠇꠥꠘꠥ ꠉꠞꠥ-ꠉꠣꠗꠣ, ꠝꠦꠠꠣ-ꠍꠣꠉꠟ, ꠚꠤꠘ꠆ꠘꠞ ꠇꠣꠙꠠ ꠛꠣ ꠎꠦꠇꠥꠘꠥ ꠀꠞꠣꠁꠟ ꠍꠣꠝꠣꠘꠣ ꠖꠦꠈꠤꠀ ꠇꠦꠃ ꠎꠥꠖꠤ ꠝꠘꠅ ꠇꠞꠦ ꠁꠐꠣ ꠔꠣꠞ ꠝꠣꠟ, ꠔꠣꠁꠟꠦ ꠁꠐꠣꠞ ꠡꠣꠟꠤꠡꠤꠞ ꠟꠣꠉꠤ ꠔꠣꠞꠣ ꠖꠥꠁꠅꠎꠘ ꠉꠤꠀ ꠀꠟ꠆ꠟꠣꠞ ꠖꠞꠛꠣꠞꠅ ꠀꠎꠤꠞ ꠅꠁꠛ। ꠀꠟ꠆ꠟꠣꠄ ꠎꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠛꠣ, ꠢꠦ ꠔꠣꠞ ꠛꠤꠞꠥꠗꠤ ꠎꠘꠞꠦ ꠄꠞ ꠒꠣꠛꠥꠟ ꠚꠤꠞꠔ ꠖꠤꠛ।

10 “ꠇꠦꠃ ꠎꠥꠖꠤ ꠔꠣꠞ ꠉꠞꠥ-ꠉꠣꠗꠣ, ꠍꠣꠉꠟ-ꠝꠦꠠꠣ ꠛꠣ ꠅꠁꠘ꠆ꠘ ꠇꠥꠘꠥ ꠙꠡꠥꠞꠦ ꠇꠥꠘꠥ ꠉꠤꠞꠡ꠆ꠔꠞ ꠉꠦꠍꠦ ꠞꠣꠈꠣꠔ ꠖꠦꠄ, ꠀꠞ ꠅꠉꠥ ꠝꠞꠤꠎꠣꠄ, ꠎꠈꠝ ꠅꠁꠎꠣꠄ ꠛꠣ ꠀꠞꠣꠁꠎꠣꠄ, ꠅꠁꠟꠦ ꠄꠞ ꠇꠥꠘꠥ ꠡꠣꠇ꠆ꠇꠤ ꠘꠣ ꠝꠤꠟꠦ, 11 ꠔꠦ ꠅꠃ ꠉꠤꠞꠡ꠆ꠔꠦ ꠘꠤꠎꠦꠃ ꠎꠦꠘ ꠁꠔꠣ ꠇꠞꠍꠦ ꠘꠣ, ꠁꠐꠣ ꠢꠦ ꠝꠣꠛꠥꠖꠞ ꠍꠣꠝꠘꠦ ꠉꠤꠀ ꠇꠍꠝ ꠇꠞꠤꠀ ꠝꠤꠐ-ꠝꠣꠐ ꠇꠞꠛ। ꠁ ꠙꠡꠥꠞ ꠝꠣꠟꠤꠇꠦꠅ ꠁꠈꠣꠘ ꠝꠣꠘꠔꠦ ꠅꠁꠛ, ꠔꠣꠁꠘ ꠇꠥꠘꠥ ꠈꠦꠔꠤ-ꠙꠥꠞꠘ ꠙꠣꠁꠔꠣ ꠘꠣꠄ। 12 ꠅꠁꠟꠦ ꠁ ꠉꠤꠞꠡ꠆ꠔꠞ ꠉꠦꠍ ꠕꠣꠇꠤ ꠎꠥꠖꠤ ꠁꠐꠣ ꠌꠥꠞꠤ ꠅꠁꠎꠣꠄ, ꠔꠦ ꠝꠣꠟꠤꠇꠦ ꠈꠦꠔꠤ-ꠙꠥꠞꠘ ꠙꠣꠁꠛ। 13 ꠎꠥꠖꠤ ꠇꠥꠘꠥ ꠎꠋꠟꠤ ꠎꠣꠘꠥꠀꠞꠦ ꠗꠞꠤꠀ ꠁꠉꠥꠞꠦ ꠝꠣꠞꠤꠟꠣꠄ, ꠔꠣꠁꠟꠦ ꠄꠞ ꠙꠞꠝꠣꠘꠞ ꠟꠣꠉꠤ ꠅꠉꠥꠞ ꠚꠣꠞꠣ-ꠍꠤꠠꠣ ꠐꠥꠇꠞꠣꠁꠘ ꠀꠘꠤꠀ ꠖꠦꠈꠣꠘꠤ ꠟꠣꠉꠛ। ꠔꠦꠃ ꠄꠞ ꠇꠥꠘꠥ ꠈꠦꠔꠤ-ꠙꠥꠞꠘ ꠟꠣꠉꠔ ꠘꠣꠄ।

14 “ꠇꠦꠃꠞꠞ ꠉꠦꠍ ꠕꠣꠇꠤ ꠈꠥꠎꠤꠀ ꠀꠘꠣ ꠇꠥꠘꠥ ꠙꠡꠥ ꠎꠥꠖꠤ ꠝꠣꠟꠤꠇꠞ ꠀꠚꠞꠈꠦ ꠎꠈꠝ ꠅꠄ ꠛꠣ ꠝꠞꠤꠎꠣꠄ, ꠔꠦ ꠎꠦꠁꠘ ꠈꠥꠎꠤꠀ ꠀꠘꠍꠂꠘ, ꠄꠁꠘ ꠄꠞ ꠈꠦꠔꠤ-ꠙꠥꠞꠘ ꠖꠤꠛꠣ। 15 ꠅꠁꠟꠦ ꠝꠣꠟꠤꠇꠞ ꠍꠣꠝꠘꠦꠃ ꠎꠥꠖꠤ ꠅꠃꠟꠣ ꠅꠄ, ꠔꠦ ꠈꠦꠔꠤ-ꠙꠥꠞꠘ ꠟꠣꠉꠔ ꠘꠣꠄ। ꠁ ꠙꠡꠥ ꠎꠥꠖꠤ ꠐꠦꠇꠣ ꠖꠤꠀ ꠜꠣꠠꠣ ꠇꠞꠤ ꠀꠘꠣ ꠅꠄ, ꠔꠦ ꠅꠃ ꠜꠣꠠꠣꠞ ꠐꠦꠇꠣꠃ ꠅꠁꠛ ꠄꠞ ꠈꠦꠔꠤ-ꠙꠥꠞꠘ।

16 “ꠛꠤꠀꠞ ꠀꠈꠔ ꠅꠁꠍꠦ ꠘꠣ, ꠅꠃꠟꠣ ꠇꠥꠘꠥ ꠡꠔꠤ ꠙꠥꠠꠤꠞꠦ ꠇꠦꠃ ꠎꠥꠖꠤ ꠝꠤꠍꠣ ꠝꠣꠔꠤꠀ ꠀꠘꠤꠀ ꠔꠣꠁꠞ ꠟꠉꠦ ꠎꠤꠘꠣ ꠇꠞꠤꠟꠣꠄ, ꠔꠣꠁꠟꠦ ꠢꠃ ꠛꠦꠐꠣꠄ ꠙꠥꠠꠤꠞ ꠛꠣꠚꠞꠦ ꠎꠞꠤꠝꠣꠘꠣ ꠖꠤꠀ ꠅꠃ ꠙꠥꠠꠤꠞꠦ ꠛꠤꠀ ꠇꠞꠔꠦ ꠅꠁꠛ। 17 ꠅꠁꠟꠦ ꠙꠥꠠꠤꠞ ꠛꠣꠚꠦ ꠎꠥꠖꠤ ꠔꠣꠞ ꠙꠥꠠꠤꠞꠦ ꠁ ꠙꠥꠀꠞ ꠉꠦꠍꠦ ꠛꠤꠀ ꠖꠤꠔꠦ ꠇꠥꠘꠥꠝꠘ꠆ꠔꠦꠃ ꠞꠣꠎꠤ ꠘꠣ ꠅꠄ, ꠔꠣ-ꠅ ꠁ ꠎꠞꠤꠝꠣꠘꠣ ꠖꠤꠔꠦ ꠅꠁꠛ।

18 “ꠇꠥꠘꠥ ꠎꠣꠖꠥꠉꠤꠞ ꠛꠦꠐꠤꠞꠦ ꠔꠥꠝꠤ ꠎꠤꠔꠣ ꠞꠣꠈꠤꠅ ꠘꠣ।

19 “ꠇꠥꠘꠥ ꠙꠡꠥꠞ ꠟꠉꠦ ꠇꠦꠃ ꠎꠤꠘꠣ ꠇꠞꠟꠦ, ꠔꠣꠞꠦ ꠘꠤꠌꠄ ꠎꠣꠘꠦ ꠝꠣꠞꠣ ꠅꠁꠛ।

20 “ꠈꠣꠟꠤ ꠝꠣꠛꠥꠖ ꠍꠣꠠꠣ ꠖꠥꠍꠞꠣ ꠇꠥꠘ꠆ꠔꠣꠞ ꠘꠣꠝꠦ ꠎꠥꠖꠤ ꠇꠦꠃ ꠇꠥꠘꠥ ꠛꠟꠤ-ꠙꠡꠣꠖ ꠖꠦꠄ, ꠔꠦ ꠔꠣꠞꠦꠅ ꠡꠦꠡ ꠇꠞꠤꠟꠔꠦ ꠅꠁꠛ।

21 “ꠇꠥꠘꠥ ꠜꠤꠘ-ꠖꠦꠡꠤ ꠝꠣꠘꠡꠞ ꠟꠉꠦ ꠛꠣꠖ ꠛꠦꠛꠢꠣꠞ ꠇꠞꠤꠅ ꠘꠣ, ꠔꠣꠞꠦ ꠎꠥꠟꠥꠝ ꠇꠞꠤꠅ ꠘꠣ। ꠝꠘꠅ ꠞꠣꠈꠤꠅ, ꠔꠥꠝꠞꠣꠅ ꠄꠇ ꠡꠝꠄ ꠝꠤꠡꠞ ꠖꠦꠡꠅ ꠝꠥꠍꠣꠚꠤꠞ ꠀꠍꠟꠣꠄ।

22 “ꠇꠥꠘꠥ ꠠꠣꠠꠤ ꠛꠦꠐꠤꠞꠦ ꠛꠣ ꠇꠥꠘꠥ ꠄꠔꠤꠝ ꠢꠥꠞꠥꠔ꠆ꠔꠣꠞꠦ ꠖꠥꠈ ꠖꠤꠅ ꠘꠣ। 23 ꠔꠣꠞꠣꠞꠦ ꠖꠥꠈ ꠖꠤꠟꠦ ꠔꠣꠞꠣ ꠎꠥꠖꠤ ꠇꠣꠘ꠆ꠖꠦ, ꠔꠦ ꠁ ꠇꠣꠘ꠆ꠖꠘ ꠘꠤꠌꠄ ꠀꠝꠤ ꠇꠛꠥꠟ ꠇꠞꠝꠥ। 24 ꠄꠔꠦ ꠀꠝꠣꠞ ꠉꠥꠍꠣ ꠅꠁꠛ ꠀꠉꠥꠁꠘ ꠛꠞꠣꠛꠞ। ꠔꠥꠝꠞꠣ ꠎꠥꠖ꠆ꠖꠔ ꠙꠠꠤꠀ ꠝꠞꠛꠣꠄ, ꠔꠥꠝꠞꠣꠞ ꠛꠃꠅ ꠠꠣꠠꠤ ꠅꠁꠛ, ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘꠅ ꠅꠃꠟꠣ ꠄꠔꠤꠝ ꠅꠁꠛꠣ।

25 “ꠔꠥꠝꠞꠣ ꠎꠥꠖꠤ ꠀꠝꠣꠞ ꠇꠥꠘꠥ ꠅꠜꠣꠛꠤ ꠛꠘ꠆ꠖꠣꠞꠦ ꠇꠞꠎ ꠖꠦꠅ, ꠔꠣꠁꠟꠦ ꠡꠥꠖꠈꠥꠞꠞ ꠟꠣꠈꠣꠘ ꠔꠣꠞ ꠉꠦꠍ ꠕꠣꠇꠤ ꠡꠥꠖ ꠘꠤꠅ ꠘꠣ। 26 ꠇꠦꠃꠞꠞ ꠉꠔꠞꠞ ꠌꠣꠖ꠆ꠖꠞ ꠛꠘ꠆ꠖꠇ ꠞꠣꠈꠟꠦ, ꠡꠥꠞꠥꠎ ꠒꠥꠛꠣꠞ ꠀꠉꠦꠃ ꠔꠣꠞ ꠌꠣꠖ꠆ꠖꠞ ꠚꠤꠞꠔ ꠖꠤꠟꠣꠁꠅ। 27 ꠇꠣꠞꠘ ꠃꠠꠤꠛꠣꠞ ꠟꠣꠉꠤ ꠅꠐꠣꠃ ꠔꠣꠞ ꠄꠇꠝꠣꠔ꠆ꠞ ꠡꠝ꠆ꠛꠟ। ꠁꠈꠣꠘ ꠘꠤꠟꠦꠉꠤ ꠢꠦ ꠇꠤꠔꠣ ꠃꠠꠤꠀ ꠢꠥꠔꠤꠛ? ꠢꠥꠘꠅ, ꠢꠦ ꠎꠥꠖꠤ ꠀꠝꠣꠞ ꠉꠦꠍꠦ ꠇꠣꠘ꠆ꠖꠦ, ꠔꠦ ꠀꠝꠤ ꠔ ꠞꠢꠝꠣꠘꠥꠞ ꠞꠢꠤꠝ, ꠀꠝꠤ ꠔꠣꠞ ꠇꠣꠘ꠆ꠖꠘ ꠢꠥꠘꠝꠥꠃ।

28 “ꠔꠥꠝꠤ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠝꠣꠔꠤꠅ ꠘꠣ, ꠔꠥꠝꠣꠞ ꠇꠥꠘꠥ ꠛꠤꠌꠣꠞꠇ-ꠡꠣꠟꠤꠡꠞꠦꠅ ꠛꠖ꠆ꠖꠥꠀ ꠖꠤꠅ ꠘꠣ।

29 “ꠔꠥꠝꠞꠣꠞ ꠈꠦꠔꠞ ꠚꠡꠟ ꠛꠣ ꠀꠋꠉꠥꠞꠞ ꠡꠞꠛꠔꠞ ꠎꠦ ꠛꠣꠐ ꠀꠝꠣꠞꠦ ꠖꠤꠛꠣꠞ ꠇꠕꠣ, ꠀꠝꠣꠞ ꠁ ꠛꠣꠐ ꠖꠤꠔꠦ ꠖꠦꠞꠤ ꠇꠞꠤꠅ ꠘꠣ। ꠔꠥꠝꠞꠣ ꠢꠇꠟꠞ ꠛꠠ ꠙꠥꠀꠂꠘ ꠀꠝꠣꠞꠦ ꠖꠤꠟꠣꠁꠛꠣꠄ। 30 ꠔꠥꠝꠞꠣꠞ ꠉꠞꠥ-ꠛꠣꠍꠥꠞ ꠀꠞ ꠍꠣꠉꠟ-ꠝꠦꠠꠣꠞ ꠟꠣꠉꠤꠅ ꠅꠃ ꠄꠇ ꠡꠝꠣꠘ ꠢꠥꠇꠥꠝ। ꠁꠔꠣꠞ ꠢꠇꠟ ꠛꠠ ꠝꠦꠖꠣ ꠛꠣꠁꠌ꠆ꠌꠣꠁꠘ ꠡꠣꠔꠖꠤꠘ ꠙꠞ꠆ꠎꠘ꠆ꠔ ꠔꠣꠞꠣꠞ ꠝꠣʼꠞ ꠉꠦꠍꠦ ꠞꠁꠛꠣ, ꠀꠐ ꠖꠤꠘꠞ ꠖꠤꠘ ꠀꠝꠣꠞꠦ ꠖꠤꠟꠣꠁꠛꠣꠄ।

31 “ꠔꠥꠝꠞꠣꠃ ꠅꠁꠛꠣꠄ ꠀꠝꠣꠞ ꠙꠣꠇ-ꠙꠛꠤꠔ꠆ꠞ ꠛꠘ꠆ꠖꠣ। ꠎꠋꠟꠤ ꠎꠣꠘꠥꠀꠞꠦ ꠝꠣꠞꠤꠀ ꠚꠣꠟꠣꠁꠍꠦ, ꠁꠟꠣ ꠇꠥꠘꠥ ꠎꠣꠘꠖꠣꠞꠞ ꠉꠥꠡ꠆ꠔ ꠔꠥꠝꠞꠣ ꠈꠣꠁꠅ ꠘꠣ; ꠁꠔꠣ ꠇꠥꠇꠥꠞꠞꠦ ꠈꠣꠅꠀꠁꠅ।