1 “ꠔꠥꠝꠞꠣ ꠝꠤꠍꠣ ꠇꠥꠘꠥ ꠛꠖꠘꠣꠝ ꠛꠣꠞ ꠇꠞꠤꠅ ꠘꠣ। ꠙꠇ꠆ꠇꠙꠣꠔꠤ ꠇꠞꠤ ꠝꠤꠍꠣ ꠡꠣꠇ꠆ꠇꠤ ꠖꠤꠀ ꠇꠥꠘꠥ ꠈꠛꠤꠍ ꠝꠣꠘꠡꠞꠦ ꠡꠣꠁꠎ꠆ꠎ ꠇꠞꠤꠅ ꠘꠣ। 2 ꠡꠝꠣꠎꠞ ꠖꠡꠎꠘꠦ ꠅꠁꠘ꠆ꠘꠣꠄ ꠇꠞꠦꠞ ꠖꠦꠈꠤꠀ ꠔꠥꠝꠤꠅ ꠅꠃꠟꠣ ꠇꠞꠤꠅ ꠘꠣ। ꠇꠥꠘꠥ ꠝꠣꠝꠟꠣ-ꠝꠇꠖ꠆ꠖꠝꠣꠞ ꠡꠣꠇ꠆ꠇꠤ ꠖꠦꠅꠀꠔ ꠉꠤꠀ, ꠡꠇ꠆ꠔꠤꠀꠟꠣ ꠖꠟꠞ ꠙꠇ꠆ꠇ ꠟꠁꠀ ꠅꠁꠘ꠆ꠘꠣꠄ ꠇꠣꠝ ꠇꠞꠤꠅ ꠘꠣ। 3 ꠀꠞ ꠇꠥꠘꠥ ꠉꠞꠤꠛꠞ ꠛꠤꠌꠣꠞꠅ ꠉꠤꠀ, ꠢꠦ ꠉꠞꠤꠛ ꠉꠔꠤꠇꠦꠃ ꠔꠣꠞ ꠙꠇ꠆ꠇ ꠟꠁꠅ ꠘꠣ।

4 “ꠔꠥꠝꠣꠞ ꠖꠥꠡꠝꠘꠞ ꠇꠥꠘꠥ ꠉꠞꠥ-ꠉꠣꠗꠣꠞꠦ ꠛꠦ-ꠙꠕꠦ ꠎꠣꠅꠀꠔ ꠖꠦꠈꠟꠦ, ꠁꠐꠣ ꠚꠤꠞꠣꠁꠀ ꠀꠘꠤꠀ ꠔꠣꠞ ꠉꠦꠍꠦ ꠖꠤꠅ। 5 ꠔꠥꠝꠣꠞꠦ ꠁꠋꠡꠣ ꠇꠞꠦ ꠁꠟꠣ ꠇꠥꠘꠥ ꠝꠣꠘꠡꠞ ꠉꠣꠗꠣꠞꠦ ꠜꠣꠞꠞ ꠔꠟꠦ ꠙꠠꠤꠉꠦꠍꠦ ꠖꠦꠈꠟꠦ, ꠔꠣꠞꠦ ꠁꠟꠣ ꠚꠣꠟꠣꠁꠀ ꠎꠣꠁꠅ ꠘꠣ। ꠅꠃ ꠉꠣꠗꠣꠞꠦ ꠔꠥꠟꠣꠔ ꠔꠥꠝꠤ ꠅꠛꠡ꠆ꠡꠁ ꠡꠣꠁꠎ꠆ꠎ ꠇꠞꠛꠣꠄ।

6 “ꠇꠥꠘꠥ ꠉꠞꠤꠛꠞ ꠝꠣꠝꠟꠣ-ꠝꠇꠖ꠆ꠖꠝꠣꠔ ꠅꠁꠘ꠆ꠘꠣꠄ ꠡꠣꠟꠤꠡꠤ ꠇꠞꠤꠅ ꠘꠣ। 7 ꠢꠣꠎꠣꠁꠟ ꠝꠤꠍꠣ ꠝꠣꠝꠟꠣ ꠕꠣꠇꠤ ꠢꠞꠤꠀ ꠞꠁꠅ। ꠇꠥꠘꠥ ꠛꠦ-ꠇꠍꠥꠞ ꠛꠣ ꠘꠤ-ꠅꠙꠞꠣꠗꠤ ꠝꠣꠘꠡꠞꠦ ꠝꠃꠔꠞ ꠡꠣꠎꠣ ꠖꠤꠅ ꠘꠣ। ꠎꠦꠉꠤꠄ ꠁꠟꠣ ꠅꠁꠘ꠆ꠘꠣꠄ ꠇꠞꠛ, ꠔꠣꠞꠦ ꠀꠝꠤ ꠍꠣꠠꠔꠣꠝ ꠘꠣꠄ। 8 ꠊꠥꠡ ꠈꠣꠁꠅ ꠘꠣ, ꠇꠣꠞꠘ ꠊꠥꠡꠦ ꠌꠃꠈ ꠀꠟꠣ ꠝꠣꠘꠡꠞꠦꠅ ꠀꠘ꠆ꠖꠣ ꠇꠞꠤꠟꠣꠄ। ꠊꠥꠡꠦ ꠜꠣꠟꠣ ꠝꠣꠘꠡꠞ ꠝꠣꠔꠞ ꠝꠣꠎꠦꠅ ꠙꠦꠌ ꠟꠣꠉꠣꠁ ꠖꠦꠄ।

9 “ꠇꠥꠘꠥ ꠜꠤꠘ-ꠖꠦꠡꠤ ꠝꠣꠘꠡꠞ ꠃꠙꠞꠦ ꠎꠥꠟꠥꠝ ꠇꠞꠤꠅ ꠘꠣ। ꠝꠥꠍꠣꠚꠤꠞꠞ ꠢꠣꠟ-ꠢꠇꠤꠇꠔ ꠔ ꠔꠥꠝꠞꠣ ꠎꠣꠘ, ꠇꠣꠞꠘ ꠔꠥꠝꠞꠣꠅ ꠝꠤꠡꠞ ꠖꠦꠡꠅ ꠝꠥꠍꠣꠚꠤꠞ ꠀꠍꠟꠣꠄ।

10 “ꠔꠥꠝꠞꠣ ꠄꠇꠟꠣꠉꠣꠞꠦ ꠍꠄ ꠛꠞꠍ ꠎꠝꠤꠘꠅ ꠈꠦꠔ ꠇꠞꠤꠅ ꠀꠞ ꠚꠡꠟ ꠇꠣꠐꠤꠅ, 11 ꠛꠣꠖꠦ ꠡꠣꠔ ꠘꠝ꠆ꠛꠞ ꠛꠞꠍꠅ ꠎꠝꠤꠘꠅ ꠇꠥꠘꠥ ꠈꠦꠔ ꠘꠣ ꠇꠞꠤꠀ ꠙꠔꠤꠔ ꠞꠣꠈꠤꠅ, ꠎꠝꠤꠘꠞꠦ ꠀꠞꠣꠝ ꠖꠤꠅ। ꠄꠔꠦ ꠎꠝꠤꠘꠅ ꠄꠝꠘꠦꠃ ꠎꠦꠔꠣ ꠚꠟꠤꠛ, ꠅꠔꠣ ꠔꠥꠝꠞꠣꠞ ꠉꠞꠤꠛ ꠅꠇꠟꠦ ꠈꠣꠁꠀ ꠛꠣꠌꠤꠛꠣ। ꠔꠣꠞꠣ ꠘꠦꠅꠀꠞ ꠛꠣꠖꠦ ꠎꠦꠔꠣ ꠙꠠꠤ ꠞꠁꠛ, ꠁꠔꠣ ꠎꠋꠟꠤ ꠙꠡꠥ-ꠙꠣꠈꠤꠘ꠆ꠔꠦ ꠈꠣꠁꠛꠣ। ꠔꠥꠝꠞꠣꠞ ꠀꠋꠉꠥꠞꠞ ꠛꠣꠉꠣꠘ ꠛꠣ ꠎꠄꠔꠥꠘ ꠛꠣꠉꠣꠘꠞ ꠟꠣꠉꠤꠅ ꠅꠃ ꠢꠥꠇꠥꠝ ꠝꠣꠘꠤꠅ।

12 “ꠔꠥꠝꠞꠣ ꠢꠣꠙ꠆ꠔꠣꠔ ꠍꠄ ꠖꠤꠘ ꠇꠣꠝ ꠇꠞꠤꠅ, ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠔ ꠎꠥꠝ꠆ꠝꠣꠛꠣꠞ, ꠁꠖꠤꠘ ꠇꠥꠘ꠆ꠔꠣ ꠇꠞꠤꠅ ꠘꠣ। ꠔꠦꠃ ꠔꠥꠝꠞꠣꠞ ꠉꠞꠥ-ꠉꠣꠗꠣꠄ ꠎꠤꠞꠣꠁꠛꠣ, ꠀꠞ ꠔꠥꠝꠞꠣꠞ ꠛꠣꠠꠤꠔ ꠎꠘꠝꠤꠍꠦ ꠁ ꠉꠥꠟꠣꠝ ꠀꠞ ꠝꠥꠍꠣꠚꠤꠞ ꠅꠇꠟꠞ ꠎꠣꠘꠦꠅ ꠀꠞꠣꠝ ꠙꠣꠁꠛ।

13 “ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠟꠣꠝ, ꠁꠔꠣ ꠈꠥꠛ ꠢꠥꠡꠤꠀꠞ ꠅꠁꠀ ꠀꠝꠟ ꠇꠞꠤꠅ। ꠇꠥꠘꠥ ꠖꠦꠛꠔꠣꠞ ꠘꠣꠝ ꠝꠥꠈꠅ ꠟꠁꠅ ꠘꠣ, ꠁꠔꠣꠞ ꠘꠣꠝ ꠎꠣꠘꠥ ꠔꠥꠝꠞꠣꠞ ꠝꠥꠈꠅ ꠘꠣ ꠢꠥꠘꠣ ꠎꠣꠄ।

14 “ꠔꠥꠝꠞꠣ ꠙꠞꠔꠦꠇ ꠛꠞꠍ ꠔꠤꠘꠛꠣꠞ ꠀꠝꠣꠞ ꠘꠣꠝꠦ ꠁꠖ ꠀꠖꠣꠄ ꠇꠞꠤꠅ। 15 ꠙꠄꠟꠣ, ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ ꠀꠖꠣꠄ ꠇꠞꠤꠅ। ꠀꠝꠤ ꠎꠦꠟꠣ ꠢꠥꠇꠥꠝ ꠇꠞꠍꠤ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠀꠛꠤꠛ ꠌꠣꠘ꠆ꠖꠞ ꠡꠣꠔꠖꠤꠘ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠅ, ꠇꠣꠞꠘ ꠅꠃ ꠌꠣꠘ꠆ꠖꠅ ꠔꠥꠝꠞꠣ ꠝꠤꠡꠞ ꠕꠣꠇꠤ ꠛꠣꠞ ꠅꠁꠀ ꠀꠁꠍꠟꠣꠄ। ꠁꠖꠞ ꠡꠝꠄ ꠟꠤꠟ꠆ꠟꠣ-ꠍꠖꠉꠣ ꠍꠣꠠꠣ ꠔꠥꠝꠞꠣꠞ ꠇꠦꠃ ꠎꠣꠘꠥ ꠈꠣꠟꠤ ꠀꠔꠦ ꠀꠝꠣꠞ ꠉꠦꠍꠦ ꠘꠣ ꠀꠄ। 16 ꠖꠥꠍꠞꠣ, ꠔꠥꠝꠞꠣ ꠚꠡꠟ ꠖꠣꠅꠀꠞ ꠁꠖ ꠝꠣꠘꠤꠅ। ꠈꠦꠔꠞ ꠝꠣꠎꠦ ꠔꠥꠝꠞꠣ ꠎꠦꠔꠣ ꠞꠥꠁꠍ, ꠁꠔꠣ ꠖꠣꠅꠀꠞ ꠛꠣꠖꠦ ꠙꠄꠟꠣ ꠚꠡꠟ ꠖꠤꠀꠃ ꠁꠖ ꠇꠞꠤꠅ। ꠔꠤꠍꠞꠣ ꠁꠖ, ꠛꠍꠞꠞ ꠢꠦꠡ ꠌꠣꠘ꠆ꠖꠅ ꠛꠣꠉꠣꠘꠞ ꠙꠣꠇꠘꠣ ꠚꠟ ꠛꠣꠠꠤꠔ ꠀꠘꠣꠞ ꠛꠣꠖꠦ ꠒꠦꠞꠣ-ꠊꠞꠞ ꠁꠖ ꠇꠞꠤꠅ। 17 ꠅꠃ ꠔꠤꠘꠅ ꠁꠖꠞ ꠡꠝꠄ, ꠛꠍꠞꠅ ꠔꠤꠘꠛꠣꠞ ꠔꠥꠝꠞꠣꠞ ꠢꠇꠟ ꠛꠦꠐꠣꠁꠘ ꠀꠁꠀ ꠢꠎ ꠇꠞꠣꠞ ꠘꠤꠅꠔꠦ ꠀꠝꠤ ꠀꠟ꠆ꠟꠣ ꠝꠣꠟꠤꠇꠞ ꠍꠣꠝꠘꠦ ꠀꠎꠤꠞ ꠅꠁꠅ।

18 “ꠔꠥꠝꠞꠣ ꠎꠦꠛꠟꠣ ꠀꠝꠣꠞ ꠘꠣꠝꠦ ꠙꠡꠥ ꠇꠥꠞꠛꠣꠘꠤ ꠖꠦꠅ, ꠅꠃ ꠡꠝꠄ ꠈꠣꠝꠤꠞ ꠀꠟꠣ ꠇꠥꠘꠥꠎꠣꠔ ꠞꠥꠐꠤ ꠁꠔꠣꠞ ꠟꠉꠦ ꠙꠥꠞꠣꠁꠀ ꠟꠤꠟ꠆ꠟꠣ ꠖꠤꠅ ꠘꠣ। ꠁꠖꠞ ꠡꠝꠄ ꠀꠝꠣꠞ ꠘꠣꠝꠦ ꠎꠦꠔꠣ ꠙꠡꠥ ꠇꠥꠞꠛꠣꠘꠤ ꠖꠤꠛꠣꠄ, ꠁꠔꠣꠞ ꠌꠞ꠆ꠛꠤꠀꠟꠣ ꠐꠥꠇꠞꠣꠁꠘ ꠛꠤꠀꠘ ꠙꠞ꠆ꠎꠘ꠆ꠔ ꠞꠣꠈꠤꠅ ꠘꠣ। 19 ꠔꠥꠝꠞꠣꠞ ꠈꠦꠔꠞ ꠢꠇꠟ ꠕꠣꠇꠤ ꠜꠣꠟꠣ ꠚꠡꠟ, ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠊꠞꠅ ꠀꠘꠤꠅ।

“ꠀꠞ ꠢꠥꠘꠅ, ꠇꠥꠘꠥ ꠍꠣꠉꠟꠞ ꠛꠣꠁꠌ꠆ꠌꠣꠞ ꠉꠥꠡ꠆ꠔ ꠔꠣꠞ ꠝꠣʼꠞ ꠖꠥꠗ ꠖꠤꠀ ꠞꠣꠘ꠆ꠖꠤꠅ ꠘꠣ।

20 “ꠀꠝꠤ ꠔꠥꠝꠞꠣꠞ ꠟꠣꠉꠤ ꠎꠦ ꠎꠣꠉꠣ ꠎꠥꠁꠔ ꠇꠞꠤ ꠞꠣꠈꠍꠤ, ꠢꠘꠅ ꠔꠥꠝꠞꠣꠞꠦ ꠢꠦꠚꠣꠎꠔꠦ ꠙꠃꠍꠣꠘꠤꠞ ꠟꠣꠉꠤ, ꠀꠝꠤ ꠔꠥꠝꠞꠣꠞ ꠀꠉꠦ ꠀꠉꠦ ꠄꠇꠎꠘ ꠚꠤꠞꠤꠡ꠆ꠔꠣ ꠙꠣꠑꠣꠁꠝꠥ। 21 ꠔꠥꠝꠞꠣ ꠄꠘ ꠇꠕꠣ ꠝꠘ ꠖꠤꠀ ꠢꠥꠘꠤꠅ ꠀꠞ ꠝꠣꠘꠤꠅ, ꠄꠘ ꠟꠉꠦ ꠔ ꠀꠝꠤꠅ ꠀꠍꠤ। ꠢꠥꠡꠤꠀꠞ ꠞꠁꠅ, ꠄꠘ ꠛꠤꠞꠥꠖ꠆ꠖꠦ ꠎꠣꠁꠅ ꠘꠣ। ꠀꠞꠘꠣꠄ ꠄꠁꠘ ꠔꠥꠝꠞꠣꠞ ꠅꠙꠞꠣꠗ ꠝꠣꠚ ꠇꠞꠔꠣ ꠘꠣꠄ। 22 ꠅꠁꠟꠦ ꠔꠥꠝꠞꠣ ꠎꠥꠖꠤ ꠄꠘ ꠢꠥꠇꠥꠝ ꠝꠣꠘꠅ, ꠀꠞ ꠀꠝꠤ ꠎꠦꠟꠣ ꠇꠁꠍꠤ ꠅꠃꠟꠣ ꠌꠟꠅ, ꠔꠣꠁꠟꠦ ꠔꠥꠝꠞꠣꠞ ꠖꠥꠡꠝꠘꠞ ꠟꠉꠦ ꠀꠝꠤ ꠖꠥꠡꠝꠘꠤ ꠇꠞꠝꠥ, ꠎꠦꠞꠣ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠟꠣꠉꠛ, ꠀꠝꠤ ꠔꠣꠞꠣꠞ ꠛꠤꠞꠥꠖ꠆ꠖꠦ ꠟꠣꠉꠝꠥ। 23 ꠀꠝꠥꠞꠤ, ꠢꠤꠐ꠆ꠐꠤ, ꠚꠣꠞꠤꠎꠤ, ꠇꠦꠘꠣꠘꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞ ꠖꠦꠡꠅ ꠀꠝꠣꠞ ꠚꠤꠞꠤꠡ꠆ꠔꠣꠄ ꠔꠥꠝꠞꠣꠞꠦ ꠘꠤꠀ ꠢꠣꠞꠣꠁꠛꠣ। ꠀꠝꠤ ꠔꠣꠞꠣ ꠢꠇꠟꠐꠤꠞꠦ ꠛꠤꠘꠣꠡ ꠇꠞꠤꠟꠤꠝꠥ। 24 ꠔꠥꠝꠞꠣ ꠔꠣꠞꠣꠞ ꠖꠦꠛꠔꠣꠞꠦ ꠙꠥꠎꠣ ꠇꠞꠤꠅ ꠘꠣ, ꠈꠦꠎꠝꠔꠅ ꠇꠞꠤꠅ ꠘꠣ, ꠀꠞ ꠢꠤꠘꠞ ꠝꠣꠘꠡꠦ ꠎꠦꠔꠣ ꠇꠞꠂꠘ ꠔꠥꠝꠞꠣ ꠁꠔꠣ ꠇꠞꠤꠅ ꠘꠣ। ꠔꠥꠝꠞꠣ ꠔꠣꠞꠣꠞ ꠖꠦꠛ-ꠖꠦꠛꠤꠞ ꠝꠥꠞ꠆ꠔꠤꠘ ꠀꠞ ꠔꠣꠞꠣꠞ ꠙꠥꠎꠣꠞ ꠝꠘ꠆ꠒꠙ ꠅꠇꠟ ꠜꠣꠋꠉꠤꠀ ꠌꠥꠞꠝꠣꠞ ꠇꠞꠤꠟꠤꠅ। 25 ꠔꠥꠝꠞꠣ ꠈꠣꠟꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ, ꠝꠣꠘꠤ ꠀꠝꠣꠞ ꠄꠛꠣꠖꠔ ꠇꠞꠤꠅ। ꠔꠦꠃ ꠔꠥꠝꠞꠣꠞ ꠞꠤꠎꠦꠇꠞ ꠝꠣꠎꠦ ꠞꠢꠝꠔ ꠖꠤꠝꠥ, ꠀꠞ ꠔꠥꠝꠞꠣꠞ ꠢꠇ꠆ꠇꠟ ꠛꠦꠝꠣꠞ-ꠀꠎꠣꠞ ꠖꠥꠞ ꠇꠞꠝꠥ। 26 ꠔꠥꠝꠞꠣꠞ ꠖꠦꠡꠞ ꠇꠥꠘꠥ ꠛꠦꠐꠤꠞ ꠙꠦꠐꠞ ꠢꠥꠞꠥꠔ꠆ꠔꠣ ꠘꠡ꠆ꠐ ꠅꠁꠔ ꠘꠣꠄ, ꠇꠦꠃ ꠀꠐꠈꠥꠞꠣ ꠞꠁꠔ ꠘꠣꠄ। ꠀꠝꠤ ꠔꠥꠝꠞꠣꠞꠦ ꠙꠥꠞꠣꠙꠥꠞ ꠢꠣꠄꠀꠔꠤ ꠙꠞ꠆ꠎꠘ꠆ꠔ ꠛꠣꠌꠣꠁꠀ ꠞꠣꠈꠝꠥ। 27 ꠔꠥꠝꠞꠣ ꠎꠔ ꠎꠣꠔꠤꠞ ꠇꠣꠍꠣꠔ ꠎꠣꠁꠛꠣꠄ, ꠔꠣꠞꠣꠞ ꠖꠤꠟꠞ ꠝꠣꠎꠦ ꠀꠉ ꠕꠣꠇꠤ ꠀꠝꠣꠞ ꠒꠞ-ꠈꠚ ꠙꠄꠖꠣ ꠇꠞꠝꠥ, ꠔꠣꠞꠣꠞꠦ ꠛꠦꠖꠤꠡꠣ ꠛꠣꠘꠣꠁꠟꠤꠝꠥ। ꠔꠥꠝꠞꠣꠞ ꠢꠇ꠆ꠇꠟ ꠖꠥꠡꠝꠘ ꠈꠞꠦꠖꠤ ꠜꠣꠉꠤꠛꠣ। 28 ꠢꠤꠛ꠆ꠛꠤ, ꠇꠦꠘꠣꠘꠤ ꠀꠞ ꠢꠤꠐ꠆ꠐꠤ ꠅꠇꠟꠞꠦ ꠔꠥꠝꠞꠣꠞ ꠍꠣꠝꠘꠣ ꠕꠣꠇꠤ ꠈꠦꠖꠣꠁꠛꠣꠞ ꠟꠣꠉꠤ, ꠀꠝꠤ ꠔꠥꠝꠞꠣꠞ ꠀꠉꠦ ꠇꠞꠤ ꠜꠤꠋꠉꠥꠟꠞ ꠙꠣꠟ ꠙꠣꠑꠣꠁꠝꠥ। 29 ꠅꠁꠟꠦ ꠀꠝꠤ ꠔꠣꠞꠣ ꠢꠇ꠆ꠇꠟꠞꠦ ꠄꠇꠁ ꠛꠍꠞꠞ ꠜꠤꠔꠞꠦ ꠈꠦꠖꠣꠁꠔꠣꠝ ꠘꠣꠄ, ꠀꠞꠘꠣꠄ ꠀꠡ꠆ꠔꠣ ꠖꠦꠡ ꠙꠔꠤꠔ ꠞꠁꠀ ꠎꠋꠟꠤ ꠎꠣꠘꠥꠀꠞꠦ ꠜꠞꠤꠎꠤꠛꠣ, ꠛꠣꠖꠦ ꠁꠔꠣꠄ ꠔꠥꠝꠞꠣꠞꠦ ꠍꠣꠔꠣꠁꠛꠣ। 30 ꠀꠝꠤ ꠀꠡ꠆ꠔꠦ ꠀꠡ꠆ꠔꠦ ꠔꠣꠞꠣꠞꠦ ꠈꠦꠖꠣꠁꠝꠥ, ꠀꠞ ꠔꠥꠝꠞꠣꠞ ꠝꠣꠘꠥꠡ ꠛꠣꠠꠤꠀ ꠀꠡ꠆ꠔꠣ ꠖꠦꠡ ꠀꠛꠣꠖ ꠇꠞꠛꠣꠄ। 31 ꠀꠝꠤ ꠘꠤꠟ ꠖꠞꠤꠀ ꠕꠣꠇꠤ ꠚꠤꠟꠤꠡ꠆ꠔꠤꠘꠤ ꠖꠦꠡꠞ ꠡꠣꠉꠞ, ꠝꠣꠘꠤ ꠜꠥꠝꠗꠤꠅ ꠡꠣꠉꠞ ꠙꠞ꠆ꠎꠘ꠆ꠔ, ꠀꠞ ꠖꠃꠇꠘꠞ ꠝꠞꠥꠜꠥꠝꠤ ꠕꠣꠇꠤ ꠚꠥꠞꠣꠔ ꠉꠣꠋ ꠙꠞ꠆ꠎꠘ꠆ꠔ ꠔꠥꠝꠞꠣꠞ ꠖꠦꠡꠞ ꠡꠤꠝꠣꠘꠣ ꠉꠣꠠꠝꠥ। ꠁ ꠖꠦꠡꠅ ꠎꠦꠞꠣ ꠛꠡꠔ ꠇꠞꠦꠞ ꠔꠣꠞꠣꠞꠦ ꠔꠥꠝꠞꠣꠞ ꠀꠔꠅ ꠡꠙꠤꠝꠥ, ꠀꠞ ꠔꠥꠝꠞꠣ ꠔꠣꠞꠣꠞꠦ ꠁ ꠖꠦꠡ ꠕꠣꠇꠤ ꠈꠦꠖꠣꠁ ꠖꠤꠛꠣꠄ। 32 ꠔꠣꠞꠣꠞ ꠟꠉꠦ ꠛꠣ ꠔꠣꠞꠣꠞ ꠖꠦꠛꠔꠣ ꠅꠇꠟꠞ ꠟꠉꠦ ꠔꠥꠝꠞꠣ ꠇꠥꠘꠥ ꠌꠥꠇ꠆ꠔꠤ ꠇꠞꠤꠅ ꠘꠣ। 33 ꠔꠥꠝꠞꠣꠞ ꠖꠦꠡꠞ ꠜꠤꠔꠞꠦ ꠔꠣꠞꠣꠞꠦ ꠞꠁꠛꠣꠞ ꠖꠤꠅ ꠘꠣ। ꠀꠞꠘꠣꠄ ꠔꠣꠞꠣ ꠔꠥꠝꠞꠣꠞꠦ ꠀꠝꠣꠞ ꠉꠦꠍ ꠕꠣꠇꠤ ꠢꠞꠣꠁꠀ ꠉꠥꠘꠣꠞ ꠙꠕꠦ ꠐꠣꠘꠤꠀ ꠘꠤꠛꠉꠤ। ꠔꠥꠝꠞꠣ ꠎꠥꠖꠤ ꠔꠣꠞꠣꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠅ, ꠔꠣꠁꠟꠦ ꠘꠤꠌ꠆ꠌꠤꠔ ꠔꠥꠝꠞꠣꠅ ꠔꠣꠞꠣꠞ ꠚꠣꠘ꠆ꠖꠅ ꠢꠣꠝꠣꠁꠛꠣꠄ।”