1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠎꠣꠅ, ꠔꠥꠝꠤ ꠅꠃ ꠎꠦꠞꠣꠞꠦ ꠝꠤꠡꠞ ꠕꠣꠇꠤ ꠀꠘꠍ, ꠄꠞꠣꠞꠦ ꠟꠁꠀ ꠅꠈꠘꠃ ꠁ ꠎꠣꠉꠣ ꠍꠣꠠꠤꠀ ꠎꠣꠅꠉꠤ। ꠀꠝꠣꠞ ꠅꠀꠖꠣ ꠇꠞꠣ ꠢꠃ ꠖꠦꠡꠅ ꠎꠣꠅ। ꠀꠝꠤ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠉꠦꠍꠦ ꠅꠀꠖꠣ ꠇꠞꠍꠟꠣꠝ, ꠔꠣꠞꠣꠞ ꠅꠀꠞꠤꠡ ꠅꠇꠟꠞꠦ ꠅꠃ ꠖꠦꠡ ꠅꠇꠟ ꠖꠤꠝꠥ, ꠔꠦ ꠔꠥꠝꠤ ꠔꠣꠞꠣꠞꠦ ꠟꠁꠀ ꠢꠘꠅ ꠎꠣꠅꠉꠤ। 2 ꠀꠝꠤ ꠔꠥꠝꠞꠣꠞ ꠀꠉꠦ ꠇꠞꠤ ꠄꠇꠎꠘ ꠚꠤꠞꠤꠡ꠆ꠔꠣ ꠙꠣꠑꠣꠁꠝꠥ। ꠄꠁꠘ ꠉꠤꠀ ꠢꠘꠞ ꠇꠦꠘꠣꠘꠤ, ꠀꠝꠥꠞꠤ, ꠢꠤꠐ꠆ꠐꠤ, ꠚꠣꠞꠤꠎꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞꠦ ꠈꠦꠖꠣꠁ ꠖꠤꠛꠣ। 3 ꠁꠔꠣ ꠔ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡ। ꠅꠁꠟꠦ ꠀꠝꠤ ꠔꠥꠝꠞꠣꠞ ꠟꠉꠦ ꠅꠁꠀ ꠎꠣꠁꠔꠣꠝ ꠘꠣꠄ, ꠇꠣꠞꠘ ꠔꠥꠝꠞꠣ ꠈꠥꠛ ꠉꠣꠠꠔꠦꠠꠣ-ꠄꠇꠉꠥꠁꠀ ꠎꠣꠔ, ꠇꠤꠎꠣꠘꠥ ꠀꠝꠤ ꠙꠕꠞ ꠝꠣꠎꠦꠃ ꠔꠥꠝꠞꠣꠞꠦ ꠘꠤꠙꠣꠔ ꠇꠞꠤꠟꠣꠁ।”

4 ꠁ ꠛꠤꠙꠖꠞ ꠇꠕꠣ ꠢꠥꠘꠤꠀ ꠝꠣꠘꠡꠦ ꠇꠣꠘ꠆ꠖꠣ-ꠇꠣꠐꠤ ꠟꠣꠉꠣꠁꠟꠣ। ꠔꠣꠞꠣ ꠇꠦꠃ ꠇꠥꠘꠥꠎꠣꠔ ꠉꠄꠘꠣ-ꠉꠣꠐꠤ ꠚꠤꠘꠟꠣ ꠘꠣ। 5 ꠇꠣꠞꠘ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠍꠟꠣ, “ꠔꠥꠝꠤ ꠛꠘꠤ ꠁꠍꠞꠣꠁꠟ ꠅꠇꠟꠞꠦ ꠇꠅ, ꠔꠥꠝꠞꠣ ꠅꠁꠟꠣꠄ ꠉꠣꠠꠔꠦꠠꠣ-ꠄꠇꠉꠥꠁꠀ ꠎꠣꠔ। ꠀꠝꠤ ꠄꠇ ꠙꠟꠇꠞ ꠟꠣꠉꠤ ꠉꠦꠟꠦꠅ ꠔꠥꠝꠞꠣꠞꠦ ꠘꠤꠙꠣꠔ ꠇꠞꠤꠟꠤꠝꠥ। ꠔꠥꠝꠞꠣꠞ ꠉꠔꠞꠅ ꠕꠣꠇꠤ ꠢꠇꠟ ꠉꠄꠘꠣ-ꠉꠣꠐꠤ ꠈꠥꠟꠤꠟꠣꠅ, ꠔꠦꠃ ꠀꠝꠤ ꠛꠥꠎꠝꠥ, ꠔꠥꠝꠞꠣꠞ ꠟꠣꠉꠤ ꠇꠤꠔꠣ ꠇꠞꠔꠣꠝ।” 6 ꠔꠦꠃ ꠛꠘꠤ ꠁꠍꠞꠣꠁꠟꠦ ꠔꠥꠞ ꠙꠣꠠꠅꠃ ꠔꠣꠞꠣꠞ ꠉꠄꠘꠣ-ꠉꠣꠐꠤ ꠢꠇꠟꠔꠣ ꠈꠥꠟꠤꠟꠤꠟꠣ, ꠁꠔꠣ ꠀꠞ ꠚꠤꠘꠟꠣ ꠘꠣ।

7 ꠢꠎꠞꠔ ꠝꠥꠍꠣꠞ ꠄꠇ ꠔꠣꠝ꠆ꠛꠥ ꠀꠍꠤꠟ, ꠔꠣꠁꠘ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠛꠣꠞꠦ ꠖꠥꠞꠁ ꠘꠤꠀ ꠅꠃ ꠔꠣꠝ꠆ꠛꠥ ꠙꠣꠔꠤꠔꠣ, ꠁ ꠔꠣꠝ꠆ꠛꠥꠞꠦ ꠔꠣꠁꠘ ꠈꠣꠘꠦꠇꠣ-ꠔꠣꠝ꠆ꠛꠥ ꠇꠁꠀ ꠒꠣꠇꠤꠔꠣ। ꠝꠣꠛꠥꠖꠞ ꠉꠦꠍ ꠕꠣꠇꠤ ꠇꠦꠃ ꠇꠥꠘ꠆ꠔꠣ ꠎꠣꠘꠔꠦ ꠌꠣꠁꠟꠦ ꠔꠣꠞꠣ ꠅꠃ ꠈꠣꠘꠦꠇꠣꠞ ꠉꠦꠍꠦ ꠎꠣꠁꠔꠣ। 8 ꠝꠥꠍꠣ ꠎꠦꠛꠟꠣ ꠢꠤ ꠈꠣꠘꠦꠇꠣ ꠡꠞꠤꠚꠅ ꠞꠅꠀꠘꠣ ꠖꠤꠔꠣ, ꠅꠃ ꠡꠝꠄ ꠢꠇ꠆ꠇꠟ ꠝꠣꠘꠥꠡ ꠎꠣꠞꠎꠤꠞ ꠔꠣꠝ꠆ꠛꠥꠞ ꠖꠥꠀꠞꠅ ꠃꠛꠣꠁꠔꠣ ꠀꠞ ꠝꠥꠍꠣ ꠈꠣꠘꠦꠇꠣꠔ ꠘꠣ ꠢꠣꠝꠣꠘꠤ ꠙꠞ꠆ꠎꠘ꠆ꠔ ꠢꠇꠟꠦ ꠔꠣꠘ ꠛꠣꠄ ꠌꠣꠁ ꠞꠁꠔ। 9 ꠔꠣꠁꠘ ꠢꠤ ꠈꠣꠘꠦꠇꠣ ꠡꠞꠤꠚꠅ ꠢꠣꠝꠣꠘꠤꠞ ꠛꠣꠖꠦꠃ ꠀꠟ꠆ꠟꠣꠁ ꠝꠦꠊꠞ ꠈꠥꠐꠤ ꠈꠣꠘꠦꠇꠣꠞ ꠖꠥꠀꠞꠞ ꠝꠥꠈꠅ ꠟꠣꠝꠤꠀ ꠀꠁꠔ, ꠀꠞ ꠝꠣꠛꠥꠖꠦ ꠎꠔꠛꠁꠟ ꠝꠥꠍꠣꠞ ꠟꠉꠦ ꠛꠣꠔꠌꠤꠔ ꠇꠞꠔꠣ, ꠅꠔꠛꠁꠟ ꠁ ꠈꠥꠐꠤ ꠅꠘꠅ ꠞꠁꠔ। 10 ꠝꠣꠘꠡꠦ ꠎꠦꠛꠟꠣꠃ ꠁ ꠝꠦꠊꠞ ꠈꠥꠐꠤꠞꠦ ꠈꠣꠘꠦꠇꠣꠞ ꠖꠥꠀꠞꠞ ꠉꠦꠍꠦ ꠖꠦꠈꠔ, ꠅꠃ ꠡꠝꠄ ꠔꠣꠞꠣ ꠎꠣꠞꠎꠤꠞ ꠖꠥꠀꠞꠞ ꠉꠦꠍ ꠕꠣꠇꠤ ꠝꠣꠛꠥꠖꠞꠦ ꠍꠁꠎꠖꠣ ꠇꠞꠔ। 11 ꠇꠥꠘꠥ ꠝꠣꠘꠡꠦ ꠔꠣꠞ ꠖꠥꠡ꠆ꠔꠞ ꠟꠉꠦ ꠝꠥꠈꠣꠝꠥꠈꠤ ꠛꠁꠀ ꠎꠦꠟꠣ ꠛꠣꠔꠌꠤꠔ ꠇꠞꠦ, ꠝꠣꠛꠥꠖꠦꠅ ꠝꠥꠍꠣꠞ ꠟꠉꠦ ꠅꠃꠟꠣ ꠝꠥꠈꠣꠝꠥꠈꠤ ꠛꠣꠔꠌꠤꠔ ꠇꠞꠔꠣ। ꠛꠣꠖꠦ ꠝꠥꠍꠣ ꠇꠦꠝ꠆ꠙꠅ ꠚꠤꠞꠤꠀ ꠀꠁꠔꠣ, ꠅꠁꠟꠦ ꠔꠣꠘ ꠈꠣꠖꠤꠝ ꠘꠥꠘꠞ ꠙꠥꠀ ꠁꠃꠍꠣ ꠘꠣꠝꠞ ꠁ ꠎꠥꠀꠘ, ꠈꠣꠘꠦꠇꠣ ꠡꠞꠤꠚ ꠕꠣꠇꠤ ꠛꠣꠞ ꠅꠁꠔꠣ ꠘꠣ।

12 ꠝꠥꠍꠣꠄ ꠝꠣꠛꠥꠖꠞ ꠖꠞꠛꠣꠞꠅ ꠀꠞꠎ ꠇꠞꠟꠣ, “ꠝꠣꠛꠥꠖ, ꠔꠥꠝꠤ ꠔ ꠇꠁꠞꠣꠄ ꠀꠝꠤ ꠅꠔꠣ ꠝꠣꠘꠡꠞꠦ ꠟꠁꠀ ꠎꠣꠁꠔꠣꠝꠉꠤ, ꠅꠁꠟꠦ ꠀꠝꠣꠞ ꠟꠉꠦ ꠀꠞ ꠇꠣꠞꠦ ꠖꠤꠞꠣꠄ, ꠁꠈꠣꠘ ꠔ ꠀꠝꠣꠞꠦ ꠎꠣꠘꠣꠁꠟꠣꠄ ꠘꠣ। ꠔꠥꠝꠤ ꠈꠣꠟꠤ ꠇꠁꠟꠣꠄ, ꠔꠥꠝꠤ ꠀꠝꠣꠞꠦ ꠔꠥꠝꠣꠞ ꠘꠤꠎꠞ ꠎꠘ ꠝꠘꠅ ꠇꠞꠅ ꠀꠞ ꠀꠝꠣꠞꠦ ꠔꠥꠝꠣꠞ ꠈꠣꠍ ꠝꠣꠄꠀꠞ ꠘꠎꠞꠅ ꠞꠣꠈꠍ। 13 ꠔꠦ ꠢꠣꠍꠣꠃ ꠎꠥꠖꠤ ꠀꠝꠤ ꠔꠥꠝꠣꠞ ꠝꠣꠄꠀꠞ ꠘꠎꠞꠅ ꠕꠣꠇꠤ, ꠔꠣꠁꠟꠦ ꠔꠥꠝꠤ ꠇꠥꠘ ꠈꠤꠀꠟꠦ ꠇꠤꠔꠣ ꠇꠞꠅ, ꠅꠔꠣ ꠀꠝꠣꠞꠦ ꠎꠣꠘꠣꠅ, ꠎꠣꠔꠦ ꠀꠝꠤ ꠔꠥꠝꠣꠞꠦ ꠙꠥꠞꠣꠙꠥꠞ ꠌꠤꠘꠤ ꠀꠞ ꠔꠥꠝꠣꠞ ꠞꠢꠝꠔꠞ ꠝꠣꠎꠦ ꠞꠁ। ꠔꠥꠝꠤ ꠔ ꠎꠣꠘꠃ, ꠁ ꠁꠍꠞꠣꠁꠟ ꠎꠣꠔꠤ ꠔꠥꠝꠣꠞꠃ ꠙ꠆ꠞꠎꠣ।” 14 ꠝꠣꠛꠥꠖꠦ ꠎꠥꠀꠙ ꠖꠤꠟꠣ, “ꠢꠥꠘꠅ, ꠀꠝꠤ ꠘꠤꠎꠦꠃ ꠔꠥꠝꠣꠞ ꠟꠉꠦ ꠅꠁꠀ ꠎꠣꠁꠝꠥ ꠀꠞ ꠔꠥꠝꠣꠞꠦ ꠀꠞꠣꠝ ꠖꠤꠝꠥ।” 15 ꠅꠃ ꠔꠣꠁꠘ ꠇꠁꠟꠣ, “ꠔꠥꠝꠤ ꠎꠥꠖꠤ ꠀꠝꠞꠣꠞ ꠟꠉꠦ ꠘꠣ ꠎꠣꠅ, ꠔꠦ ꠀꠝꠞꠣꠞꠦ ꠁꠘ ꠕꠣꠇꠤ ꠛꠤꠖꠣꠄ ꠖꠤꠅ ꠘꠣ। 16 ꠔꠥꠝꠤ ꠘꠣ ꠉꠦꠟꠦ ꠝꠣꠘꠡꠦ ꠇꠤꠟꠣ ꠛꠥꠎꠛꠣ, ꠀꠝꠣꠞ ꠃꠙꠞꠦ ꠀꠞ ꠔꠥꠝꠣꠞ ꠁ ꠛꠘ꠆ꠖꠣ ꠅꠇꠟꠞ ꠃꠙꠞꠦ ꠔꠥꠝꠣꠞ ꠞꠢꠝꠔ ꠀꠍꠦ? ꠀꠝꠞꠣꠃ ꠎꠦꠘ ꠖꠥꠘꠤꠀꠞ ꠢꠇꠟ ꠎꠣꠔꠤ ꠕꠣꠇꠤ ꠀꠟꠣꠖꠣ, ꠁꠈꠣꠘ ꠇꠤꠟꠣ ꠛꠥꠎꠛꠣ?” 17 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠑꠤꠇ ꠀꠍꠦ, ꠔꠥꠝꠤ ꠎꠦꠟꠣ ꠇꠁꠟꠣꠄ, ꠀꠝꠤ ꠅꠟꠣ ꠇꠞꠝꠥ। ꠔꠥꠝꠤ ꠔ ꠀꠝꠣꠞ ꠝꠣꠄꠀꠞ ꠘꠎꠞꠅ ꠀꠍ, ꠔꠥꠝꠣꠞꠦ ꠀꠝꠣꠞ ꠘꠤꠎꠞ ꠀꠙꠘ ꠝꠘꠅ ꠇꠞꠤ।”

18 ꠔꠦꠃ ꠝꠥꠍꠣꠄ ꠀꠞꠎ ꠇꠞꠟꠣ, “ꠔꠦ ꠔꠥꠝꠣꠞ ꠡꠣꠘ-ꠔꠎꠟ꠆ꠟꠤ ꠀꠝꠣꠞꠦ ꠖꠦꠈꠣꠅꠘꠣ।” 19 ꠝꠣꠛꠥꠖꠦ ꠇꠁꠟꠣ, “ꠀꠝꠤ ꠎꠣꠞꠦ ꠈꠥꠡꠤ ꠖꠄꠀ ꠇꠞꠝꠥ, ꠀꠞ ꠎꠣꠞꠦ ꠈꠥꠡꠤ ꠞꠢꠝ ꠇꠞꠝꠥ। ꠢꠥꠘꠅ, ꠔꠥꠝꠣꠞ ꠍꠣꠝꠘꠦꠖꠤ ꠀꠝꠤ ꠀꠝꠣꠞ ꠢꠇ꠆ꠇꠟ ꠘꠦꠇ ꠍꠥꠞꠔ ꠎꠣꠁꠞ ꠇꠞꠝꠥ। ‘ꠝꠣꠛꠥꠖ, ꠎꠦꠁꠘ ꠀꠍꠂꠘ’ ꠔꠥꠝꠣꠞ ꠍꠣꠝꠘꠦ ꠀꠝꠤ ꠀꠝꠣꠞ ꠅꠃ ꠘꠣꠝ ꠄꠟꠣꠘ ꠇꠞꠝꠥ। 20 ꠅꠁꠟꠦ ꠀꠝꠣꠞ ꠝꠥꠈ ꠖꠦꠈꠣꠞ ꠔꠣꠇ꠆ꠇꠔ ꠔꠥꠝꠣꠞ ꠅꠁꠔ ꠘꠣꠄ। ꠇꠣꠞꠘ ꠀꠝꠣꠞꠦ ꠖꠦꠈꠤꠟ꠆ꠟꠦ ꠇꠥꠘꠥ ꠀꠖꠝ ꠎꠣꠔ ꠛꠣꠌꠦ ꠘꠣ। 21 ꠔꠦ ꠢꠥꠘꠅ, ꠔꠥꠝꠤ ꠀꠝꠣꠞ ꠇꠣꠍꠣꠞ ꠅꠃ ꠎꠣꠉꠣ ꠛꠣꠄ ꠌꠣꠅ, ꠖꠦꠈꠞꠣꠄ ꠘꠤ, ꠙꠣꠔ꠆ꠔꠞꠞ ꠄꠇ ꠕꠣꠇ ꠀꠍꠦ, ꠅꠃ ꠕꠣꠇꠞ ꠃꠙꠞꠦ ꠔꠥꠝꠤ ꠃꠛꠣꠅ। 22 ꠔꠦꠃ ꠔꠥꠝꠣꠞ ꠍꠣꠝꠘꠦ ꠖꠤꠀ ꠀꠝꠣꠞ ꠡꠣꠘ-ꠔꠎꠟ꠆ꠟꠤ ꠎꠣꠅꠀꠞ ꠛꠣꠟꠣ, ꠀꠝꠤ ꠔꠥꠝꠣꠞꠦ ꠅꠃ ꠙꠣꠔ꠆ꠔꠞꠞ ꠚꠣꠐꠣꠞ ꠜꠤꠔꠞꠦ ꠢꠣꠞꠣꠁꠝꠥ। ꠀꠝꠤ ꠘꠣ ꠎꠣꠅꠀ ꠙꠞ꠆ꠎꠘ꠆ꠔ, ꠀꠝꠣꠞ ꠀꠔ ꠖꠤꠀ ꠔꠥꠝꠣꠞꠦ ꠉꠥꠞꠤꠀ ꠞꠣꠈꠝꠥ। 23 ꠛꠣꠖꠦ ꠀꠝꠣꠞ ꠀꠔ ꠢꠞꠣꠁꠟꠦ, ꠔꠥꠝꠤ ꠀꠝꠣꠞ ꠈꠞ ꠉꠣꠟꠣ ꠖꠦꠈꠔꠣꠄ ꠙꠣꠞꠛꠣꠄ, ꠅꠁꠟꠦ ꠇꠦꠃ ꠀꠝꠣꠞ ꠝꠥꠈꠞ ꠖꠤꠖꠣꠞ ꠙꠣꠁꠔ ꠘꠣꠄ।”