34
ꠘꠄꠀ ꠡꠣꠢꠣꠖꠔ ꠙꠣꠔ꠆ꠔꠞ
1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠀꠉꠞ ꠙꠣꠔ꠆ꠔꠞꠞ ꠟꠣꠈꠣꠘ ꠔꠥꠝꠤ ꠘꠄꠀ ꠖꠥꠈꠣꠘ ꠙꠣꠔ꠆ꠔꠞ ꠔꠤꠀꠞ ꠇꠞꠅ। ꠔꠥꠝꠤ ꠎꠦ ꠖꠥꠈꠣꠘ ꠜꠣꠋꠉꠤꠍꠟꠣꠄ, ꠢꠤ ꠙꠣꠔ꠆ꠔꠞꠞ ꠝꠣꠎꠦ ꠎꠦ ꠢꠥꠇꠥꠝ ꠟꠦꠈꠣ ꠀꠍꠤꠟ, ꠅꠃ ꠢꠥꠇꠥꠝ ꠅꠇꠟ ꠀꠝꠤ ꠢꠤꠞꠛꠣꠞ ꠁ ꠖꠥꠁꠅ ꠙꠣꠔ꠆ꠔꠞꠅ ꠟꠦꠈꠤꠀ ꠖꠤꠝꠥ। 2 ꠚꠎꠞ ꠛꠣꠖꠦꠃ ꠔꠥꠝꠤ ꠔꠤꠀꠞ ꠅꠁꠀ ꠔꠥꠞ ꠙꠣꠠꠞ ꠃꠙꠞꠦ ꠃꠑꠤꠅ। ꠃꠑꠤꠀ ꠙꠣꠠꠞ ꠝꠣꠕꠣꠔ ꠀꠝꠣꠞ ꠍꠣꠝꠘꠦ ꠀꠎꠤꠞ ꠅꠁꠅ। 3 ꠔꠥꠝꠣꠞ ꠟꠉꠦ ꠇꠥꠘꠥ ꠝꠣꠘꠡꠞꠦ ꠀꠘꠤꠅ ꠘꠣ, ꠁ ꠙꠣꠠꠞ ꠇꠥꠘꠥꠈꠣꠘꠅ ꠎꠣꠔꠦ ꠇꠥꠘꠥ ꠝꠣꠘꠥꠡ ꠘꠣ ꠀꠄ। ꠙꠣꠠꠞ ꠇꠣꠘ꠆ꠖꠣꠔ ꠇꠥꠘꠥ ꠉꠞꠥ-ꠍꠣꠉꠟ ꠛꠣ ꠝꠦꠠꠣ-ꠝꠦꠠꠤꠞꠦ ꠞꠣꠈꠔꠦ ꠖꠤꠅ ꠘꠣ।”
4 ꠔꠦꠃ ꠝꠥꠍꠣꠄ ꠀꠉꠞ ꠙꠣꠔ꠆ꠔꠞꠞ ꠟꠣꠈꠣꠘ ꠖꠥꠈꠣꠘ ꠙꠣꠔ꠆ꠔꠞ ꠛꠣꠘꠣꠁꠟꠣ, ꠀꠞ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠚꠎꠞꠦ ꠃꠑꠤꠀ ꠙꠣꠔ꠆ꠔꠞ ꠖꠥꠁꠅꠈꠣꠘ ꠀꠔꠅ ꠟꠁꠀ ꠔꠥꠞ ꠙꠣꠠꠞ ꠃꠙꠞꠦ ꠃꠑꠤꠟꠣ। 5 ꠀꠞ ꠝꠣꠛꠥꠖꠅ ꠝꠦꠊꠞ ꠇꠣꠟꠘꠤꠞ ꠝꠣꠎꠦ ꠟꠣꠝꠤꠀ ꠀꠁꠟꠣ। ꠔꠣꠁꠘ ꠢꠎꠞꠔ ꠝꠥꠍꠣꠞ ꠗꠣꠞꠅ ꠃꠛꠣꠁꠀ ꠔꠣꠘ “ꠝꠣꠛꠥꠖ, ꠎꠦꠁꠘ ꠀꠍꠂꠘ” ꠘꠣꠝ ꠄꠟꠣꠘ ꠇꠞꠟꠣ। 6 ꠔꠣꠁꠘ ꠝꠥꠍꠣꠞ ꠍꠣꠝꠘꠣ ꠖꠤꠀ ꠔꠡꠞꠤꠚ ꠘꠤꠟꠣ, ꠀꠞ ꠅꠃ ꠇꠣꠟꠣꠝ ꠄꠟꠣꠘ ꠇꠞꠤ ꠇꠞꠤ ꠉꠦꠟꠣ,
“ꠝꠣꠛꠥꠖ, ꠎꠦꠁꠘ ꠀꠍꠂꠘ,
ꠞꠢꠝꠣꠘ ꠀꠞ ꠞꠢꠤꠝ ꠀꠟ꠆ꠟꠣ,
ꠔꠣꠁꠘ ꠉꠥꠍꠣ ꠇꠞꠂꠘ ꠗꠤꠞ ꠉꠔꠤꠄ,
ꠔꠣꠘ ꠅꠛꠤꠞꠣꠝ ꠝꠣꠄꠀ-ꠝꠢꠛ꠆ꠛꠔ ꠀꠞ ꠢꠇ-ꠢꠣꠟꠣꠟꠤꠞ ꠇꠥꠘꠥ ꠡꠤꠝꠣ ꠘꠣꠁ।
7 ꠔꠣꠁꠘ ꠀꠎꠣꠞ ꠀꠎꠣꠞ ꠅꠀꠞꠤꠡ ꠙꠞ꠆ꠎꠘ꠆ꠔ ꠅꠛꠤꠞꠣꠝ ꠝꠣꠄꠀ-ꠝꠢꠛ꠆ꠛꠔ ꠇꠞꠂꠘ,
ꠝꠣꠘꠡꠞ ꠅꠁꠘ꠆ꠘꠣꠄ-ꠅꠙꠞꠣꠗ, ꠘꠣꠚꠞꠝꠣꠘꠤ ꠀꠞ ꠉꠥꠘꠣꠞ ꠝꠣꠚꠤ ꠖꠦꠁꠘ,
ꠅꠁꠟꠦ ꠖꠥꠡꠤ ꠎꠘꠞꠦ ꠡꠣꠎꠣꠅ ꠖꠦꠁꠘ।
ꠛꠣꠚ-ꠖꠣꠖꠣꠞ ꠘꠣꠚꠞꠝꠣꠘꠤꠞ ꠡꠣꠎꠣ,
ꠔꠣꠞꠣꠞ ꠘꠣꠔꠤ-ꠙꠥꠔꠤ ꠙꠞ꠆ꠎꠘ꠆ꠔ ꠛꠞ꠆ꠔꠣꠁꠘ।”
8 ꠁꠈꠣꠘ ꠢꠥꠘꠤꠀꠃ ꠝꠥꠍꠣ ꠘꠛꠤ ꠟꠉꠦ ꠟꠉꠦ ꠍꠁꠎꠖꠣꠔ ꠙꠠꠤꠀ ꠇꠁꠟꠣ, 9 “ꠅ ꠝꠣꠟꠤꠇ, ꠀꠝꠤ ꠎꠥꠖꠤ ꠔꠥꠝꠣꠞ ꠖꠞꠛꠣꠞꠅ ꠞꠢꠝꠔ ꠙꠣꠁ, ꠔꠦ ꠝꠦꠢꠦꠞꠛꠣꠘꠤ ꠇꠞꠤ ꠔꠥꠝꠤꠅ ꠀꠝꠞꠣꠞ ꠟꠉ ꠈꠣꠘꠅ ꠌꠟꠅ। ꠅꠃ ꠎꠣꠔꠤ ꠎꠥꠖꠤꠅ ꠈꠥꠛ ꠉꠣꠠꠔꠦꠠꠣ-ꠄꠇꠉꠥꠁꠀ ꠎꠣꠔ, ꠔꠣ-ꠅ ꠔꠥꠝꠤ ꠀꠝꠞꠣꠞ ꠉꠥꠘꠣ ꠀꠞ ꠇꠍꠥꠞꠤꠞꠦ ꠝꠣꠚ ꠇꠞꠤꠀ ꠖꠤꠟꠣꠅ। ꠀꠝꠞꠣꠞꠦ ꠔꠥꠝꠣꠞ ꠀꠙꠘ ꠙ꠆ꠞꠎꠣ ꠢꠤꠡꠣꠛꠦ ꠇꠛꠥꠟ ꠇꠞꠤꠟꠣꠅ।”
10 ꠝꠣꠛꠥꠖꠦ ꠇꠁꠟꠣ, “ꠢꠥꠘꠅ, ꠀꠝꠤ ꠄꠇ ꠃꠍꠤꠟ꠆ꠟꠣ ꠛꠅꠀꠁꠟ ꠇꠞꠤꠀꠞ, ꠀꠝꠤ ꠔꠥꠝꠣꠞ ꠢꠇꠟ ꠝꠣꠘꠡꠞ ꠍꠣꠝꠘꠦ ꠅꠃ ꠟꠣꠈꠣꠘ ꠇꠦꠞꠣꠝꠔꠤ ꠇꠣꠝ ꠖꠦꠈꠣꠁꠝꠥ, ꠎꠦꠔꠣ ꠀꠡ꠆ꠔꠣ ꠖꠥꠘꠤꠀꠞ ꠇꠥꠘꠥ ꠎꠣꠔꠤꠞ ꠍꠣꠝꠘꠦ ꠇꠥꠘꠥꠖꠤꠘꠅ ꠇꠞꠣ ꠅꠁꠍꠦ ꠘꠣ। ꠔꠥꠝꠤ ꠅꠃ ꠎꠦꠔꠣ ꠝꠣꠘꠡꠞ ꠟꠉꠦ ꠛꠡꠔ ꠇꠞꠞꠣꠄ, ꠔꠣꠞꠣ ꠖꠦꠈꠛꠣ, ꠀꠝꠤ ꠝꠣꠛꠥꠖꠦ ꠔꠥꠝꠞꠣꠞ ꠟꠣꠉꠤ ꠇꠤꠔꠣ ꠇꠞꠤꠀꠞ, ꠁꠔꠣ ꠖꠦꠈꠤꠀ ꠔꠣꠞꠣꠞ ꠎꠣꠘꠅ ꠒꠞ ꠢꠣꠝꠣꠁꠛ। 11 ꠀꠝꠤ ꠀꠁꠎ ꠔꠥꠝꠞꠣꠞꠦ ꠎꠦꠔꠣ ꠢꠥꠇꠥꠝ ꠖꠤꠝꠥ, ꠁꠔꠣ ꠈꠤꠀꠟ ꠇꠞꠤ ꠀꠝꠟ ꠇꠞꠅ। ꠀꠝꠤ ꠀꠝꠥꠞꠤ, ꠇꠦꠘꠣꠘꠤ, ꠢꠤꠐ꠆ꠐꠤ, ꠚꠣꠞꠤꠎꠤ, ꠢꠤꠛ꠆ꠛꠤ ꠀꠞ ꠎꠤꠛꠥꠎꠤ ꠅꠇꠟꠞꠦ ꠔꠥꠝꠞꠣꠞ ꠍꠣꠝꠘꠣ ꠕꠣꠇꠤ ꠈꠦꠖꠣꠁ ꠖꠤꠝꠥ। 12 ꠅꠁꠟꠦ ꠈꠛꠞꠖꠣꠞ! ꠔꠥꠝꠞꠣ ꠎꠦ ꠖꠦꠡꠅ ꠎꠣꠁꠞꠣꠄ, ꠁ ꠖꠦꠡꠞ ꠝꠣꠘꠡꠞ ꠟꠉꠦ ꠇꠥꠘꠥꠎꠣꠔ ꠌꠥꠇ꠆ꠔꠤ ꠇꠞꠤꠅ ꠘꠣ, ꠀꠞꠘꠣꠄ ꠚꠣꠘ꠆ꠖꠅ ꠢꠣꠝꠣꠁꠛꠣꠄ। 13 ꠔꠥꠝꠞꠣ ꠔꠣꠞꠣꠞ ꠙꠥꠎꠣ-ꠝꠘ꠆ꠒꠙ ꠜꠣꠋꠉꠤꠀ ꠐꠥꠇꠞꠣ ꠐꠥꠇꠞꠣ ꠇꠞꠛꠣꠄ, ꠔꠣꠞꠣꠞ ꠛꠟꠤ ꠈꠣꠘꠣꠁꠘ ꠜꠣꠋꠉꠤꠟꠤꠛꠣꠄ, ꠀꠞ ꠔꠣꠞꠣꠞ ꠀꠡꠦꠞꠣ-ꠖꠦꠛꠤꠞ ꠘꠤꠡꠣꠘꠣ ꠈꠥꠐꠤ ꠅꠇꠟ ꠇꠣꠐꠤꠀ ꠚꠣꠟꠣꠁꠛꠣꠄ। 14 ꠔꠥꠝꠞꠣ ꠇꠥꠘꠥ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠤꠅ ꠘꠣ। ꠀꠝꠤ ꠀꠟ꠆ꠟꠣ ꠔ ꠟꠣ-ꠡꠞꠤꠇ ꠝꠣꠛꠥꠖ, ꠇꠥꠘꠥ ꠡꠞꠤꠇ ꠡꠁꠎ꠆ꠎ ꠇꠞꠤ ꠘꠣ, ꠀꠝꠣꠞ ꠙꠣꠅꠘꠣ ꠄꠛꠣꠖꠔ ꠀꠝꠤ ꠌꠣꠁꠃ ꠌꠣꠁ।
15 “ꠢꠃ ꠖꠦꠡꠞ ꠝꠣꠘꠡꠞ ꠟꠉꠦ ꠇꠥꠘꠥꠎꠣꠔ ꠌꠥꠇ꠆ꠔꠤ ꠇꠞꠤꠅ ꠘꠣ, ꠀꠞꠘꠣꠄ ꠔꠣꠞꠣ ꠎꠦꠛꠟꠣ ꠡꠤꠞꠤꠇꠤ ꠇꠣꠝꠞ ꠘꠤꠅꠔꠦ, ꠔꠣꠞꠣꠞ ꠖꠦꠛ-ꠖꠦꠛꠤꠞ ꠍꠣꠝꠘꠦ ꠘꠤꠎꠞꠦ ꠡꠙꠤꠀ ꠖꠤꠛꠣ, ꠖꠦꠛꠔꠣꠞ ꠘꠣꠝꠦ ꠛꠟꠤ ꠖꠤꠛꠣ, ꠅꠃ ꠡꠝꠄ ꠔꠣꠞꠣ ꠔꠥꠝꠞꠣꠞꠦꠅ ꠖꠣꠅꠔ ꠖꠤꠛꠣ ꠀꠞ ꠔꠥꠝꠞꠣ ꠉꠤꠀ ꠔꠣꠞꠣꠞ ꠅꠃ ꠛꠟꠤꠞ ꠉꠥꠡ꠆ꠔ ꠈꠣꠁꠛꠣꠄ। 16 ꠔꠥꠝꠞꠣꠞ ꠙꠥꠀꠂꠘ꠆ꠔꠞ ꠟꠉꠦ ꠔꠣꠞꠣꠞ ꠙꠥꠠꠤꠘ꠆ꠔꠞ ꠛꠤꠀ-ꠡꠣꠖꠤ ꠖꠤꠛꠣꠄ, ꠀꠞ ꠅꠃ ꠙꠥꠠꠤꠘ꠆ꠔꠦ ꠔꠣꠞꠣꠞ ꠖꠦꠛꠔꠣꠞ ꠉꠦꠍꠦ ꠉꠤꠀ ꠡꠤꠞꠤꠇꠤ ꠇꠣꠝ ꠇꠞꠛꠣ, ꠔꠣꠞꠣꠞ ꠟꠉꠦ ꠔꠥꠝꠞꠣꠞ ꠙꠥꠀꠂꠘ꠆ꠔꠞꠦꠅ ꠐꠣꠘꠛꠣ।
17 “ꠔꠥꠝꠞꠣ ꠘꠤꠎꠞ ꠟꠣꠉꠤ ꠇꠥꠘꠥꠎꠣꠔꠞ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ।
18 “ꠔꠥꠝꠞꠣ ꠈꠣꠝꠤꠞ ꠍꠣꠠꠣ ꠞꠥꠐꠤꠞ ꠁꠖ ꠀꠖꠣꠄ ꠇꠞꠤꠅ। ꠡꠣꠔ ꠖꠤꠘ ꠈꠣꠝꠤꠞ ꠍꠣꠠꠣ ꠞꠥꠐꠤ ꠈꠣꠁꠅ। ꠀꠛꠤꠛ ꠌꠣꠘ꠆ꠖꠞ ꠑꠤꠇ ꠇꠞꠣ ꠔꠣꠞꠤꠈꠅ ꠔꠥꠝꠞꠣꠞꠦ ꠎꠦꠟꠣ ꠢꠥꠇꠥꠝ ꠖꠦꠅꠀ ꠅꠁꠍꠦ, ꠅꠃ ꠟꠣꠈꠣꠘ ꠁꠖ ꠀꠖꠣꠄ ꠇꠞꠤꠅ। ꠝꠘꠅ ꠞꠣꠈꠤꠅ, ꠅꠃ ꠌꠣꠘ꠆ꠖꠅ ꠔꠥꠝꠞꠣ ꠝꠤꠡꠞ ꠕꠣꠇꠤ ꠛꠣꠞ ꠅꠁꠀ ꠀꠁꠍꠟꠣꠄ।
19 “ꠔꠥꠝꠞꠣꠞ ꠙꠦꠐꠞ ꠙꠄꠖꠣ ꠢꠇꠟ ꠙꠄꠟꠣ ꠙꠥꠀ ꠀꠝꠣꠞ ꠅꠁꠛ। ꠄꠞꠟꠉꠦ ꠔꠥꠝꠞꠣꠞ ꠉꠞꠥ-ꠍꠣꠉꠟ ꠛꠣ ꠙꠡꠥꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠅ ꠀꠝꠣꠞ ꠅꠁꠛ। 20 ꠈꠣꠟꠤ ꠉꠣꠗꠤꠘ꠆ꠔꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞ ꠛꠖꠟꠣ, ꠀꠝꠣꠞꠦ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠛꠖꠟꠣ ꠖꠤꠀ ꠅꠉꠥꠞꠦ ꠈꠣꠟꠣꠍ ꠇꠞꠤꠀ ꠘꠤꠅ। ꠈꠣꠟꠣꠍ ꠘꠣ ꠇꠞꠣꠁꠟꠦ ꠅꠉꠥꠞ ꠉꠞ꠆ꠖꠘꠣ ꠜꠣꠋꠉꠤꠟꠤꠅ। ꠔꠥꠝꠞꠣꠞ ꠢꠇ꠆ꠇꠟ ꠛꠠ ꠙꠥꠀꠂꠘꠞꠦ ꠅꠟꠣ ꠈꠣꠟꠣꠍ ꠇꠞꠣꠁ ꠘꠤꠅ।
“ꠢꠥꠘꠅ, ꠁꠖꠞ ꠡꠝꠄ ꠇꠦꠃ ꠈꠣꠟꠤ ꠀꠔꠦ ꠀꠝꠣꠞ ꠇꠣꠍꠣꠔ ꠀꠁꠅ ꠘꠣ।
21 “ꠢꠣꠙ꠆ꠔꠣꠞ ꠍꠄꠖꠤꠘ ꠔꠥꠝꠞꠣ ꠇꠣꠝ ꠇꠞꠤꠅ, ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠎꠤꠞꠣꠁꠅ। ꠈꠦꠔ ꠇꠞꠣ ꠀꠞ ꠚꠡꠟ ꠖꠣꠅꠀꠞ ꠛꠣꠟꠣꠅ ꠎꠤꠞꠣꠁꠅ।
22 “ꠅꠃ ꠔꠤꠘꠅ ꠁꠖ ꠔꠥꠝꠞꠣ ꠝꠣꠘꠤꠅ, ꠙꠘ꠆ꠌꠣꠁꠡꠣ ꠁꠖ, ꠈꠦꠔꠞ ꠙꠄꠟꠣ ꠖꠣꠅꠀ ꠉꠝ ꠖꠤꠀ ꠘꠄꠀ ꠚꠡꠟꠞ ꠁꠖ, ꠀꠞ ꠛꠍꠞꠞ ꠢꠦꠡ ꠝꠣꠡꠅ ꠛꠣꠉꠣꠘꠞ ꠙꠣꠇꠘꠣ ꠚꠟ ꠛꠣꠠꠤꠔ ꠀꠘꠤꠀ ꠒꠦꠞꠣ-ꠊꠞꠞ ꠁꠖ ꠀꠖꠣꠄ ꠇꠞꠤꠅ। 23 ꠛꠍꠞꠅ ꠔꠤꠘꠛꠣꠞ ꠔꠥꠝꠞꠣꠞ ꠢꠇꠟ ꠛꠦꠐꠣꠁꠘ ꠀꠁꠀ ꠢꠎ ꠇꠞꠣꠞ ꠘꠤꠅꠔꠦ ꠀꠝꠣꠞ ꠉꠦꠍꠦ ꠀꠎꠤꠞ ꠅꠁꠅ। ꠝꠘꠅ ꠞꠣꠈꠤꠅ, ꠀꠝꠤꠃ ꠝꠣꠛꠥꠖ, ꠛꠘꠤ ꠁꠍꠞꠣꠁꠟꠞ ꠀꠟ꠆ꠟꠣ। 24 ꠀꠝꠤ ꠢꠃ ꠖꠦꠡꠞ ꠢꠇꠟ ꠎꠣꠔꠤꠞꠦ ꠔꠥꠝꠞꠣꠞ ꠍꠣꠝꠘ ꠕꠣꠇꠤ ꠈꠦꠖꠣꠁ ꠖꠤꠝꠥ। ꠔꠥꠝꠞꠣꠞ ꠖꠦꠡꠞ ꠡꠤꠝꠣꠘꠣ ꠛꠣꠠꠣꠁꠀ ꠛꠠ ꠇꠞꠝꠥ। ꠔꠥꠝꠞꠣ ꠛꠍꠞꠅ ꠔꠤꠘꠛꠣꠞ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠅꠁꠅ, ꠔꠦꠃ ꠔꠥꠝꠞꠣꠞ ꠎꠣꠉꠣ-ꠎꠝꠤꠘꠞ ꠛꠣꠄ ꠇꠦꠃ ꠟꠣꠟꠌ ꠇꠞꠔ ꠘꠣꠄ।
25 “ꠀꠝꠣꠞ ꠘꠣꠝꠞ ꠇꠥꠞꠛꠣꠘꠤꠞ ꠙꠡꠥꠞ ꠟꠉꠦ ꠔꠥꠝꠞꠣ ꠈꠣꠝꠤꠞ ꠀꠟꠣ ꠇꠥꠘ꠆ꠔꠣ ꠟꠤꠟ꠆ꠟꠣ-ꠇꠥꠞꠛꠣꠘꠤ ꠖꠤꠅ ꠘꠣ। ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤꠞ ꠇꠥꠘꠥꠎꠣꠔ ꠈꠣꠘꠤ ꠛꠤꠀꠘ ꠙꠞ꠆ꠎꠘ꠆ꠔ ꠞꠣꠈꠤꠅ ꠘꠣ।
26 “ꠔꠥꠝꠞꠣꠞ ꠈꠦꠔꠞ ꠖꠣꠅꠀ ꠙꠄꠟꠣ ꠚꠡꠟꠞ ꠢꠇꠟ ꠕꠣꠇꠤ ꠜꠣꠟꠣ ꠅꠋꠡ ꠀꠟ꠆ꠟꠣ ꠝꠣꠛꠥꠖꠞ ꠊꠞꠅ ꠟꠁꠀ ꠀꠁꠅ।
“ꠀꠞ ꠢꠥꠘꠅ, ꠍꠣꠉꠟꠞ ꠛꠣꠁꠌ꠆ꠌꠣꠞ ꠉꠥꠡ꠆ꠔ ꠔꠣꠞ ꠝꠣʼꠞ ꠖꠥꠗꠖꠤ ꠞꠣꠘ꠆ꠖꠤꠅ ꠘꠣ।”
27 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠥꠝꠤ ꠁ ꠇꠣꠟꠣꠝ ꠅꠇꠟ ꠟꠦꠈꠤꠀ ꠕꠅ। ꠀꠝꠤ ꠅꠃ ꠇꠣꠟꠣꠝ ꠝꠣꠚꠤꠇ ꠔꠥꠝꠣꠞ ꠟꠉꠦ ꠀꠞ ꠛꠘꠤ ꠁꠍꠞꠣꠁꠟꠞ ꠟꠉꠦ ꠀꠝꠣꠞ ꠝꠤꠟꠘꠞ ꠃꠍꠤꠟ꠆ꠟꠣ ꠛꠅꠀꠁꠟ ꠇꠞꠟꠣꠝ।” 28 ꠅꠃ ꠡꠝꠄ ꠝꠥꠍꠣ ꠘꠛꠤ ꠌꠣꠟ꠆ꠟꠤꠡ ꠖꠤꠘ ꠌꠣꠟ꠆ꠟꠤꠡ ꠞꠣꠁꠔ ꠝꠣꠛꠥꠖꠞ ꠗꠣꠞꠅ ꠙꠣꠠꠞ ꠃꠙꠞꠦ ꠞꠁꠟꠣ। ꠔꠣꠁꠘ ꠇꠥꠘꠥꠎꠣꠔ ꠖꠣꠘꠣ-ꠙꠣꠘꠤ ꠈꠣꠁꠟꠣ ꠘꠣ। ꠝꠣꠛꠥꠖꠦ ꠢꠃ ꠖꠥꠁꠅ ꠙꠣꠔ꠆ꠔꠞꠞ ꠃꠙꠞꠦ ꠔꠣꠘ ꠟꠉꠦ ꠝꠤꠟꠘꠞ ꠃꠍꠤꠟ꠆ꠟꠣꠞ ꠅꠃ ꠀꠄꠀꠔ ꠅꠇꠟ, ꠝꠣꠘꠤ ꠡꠞꠤꠅꠔꠞ ꠖꠡꠐꠣ ꠢꠥꠇꠥꠝ-ꠀꠢꠇꠣꠝ ꠟꠦꠈꠤꠀ ꠖꠤꠟꠣ।
ꠢꠎꠞꠔ ꠝꠥꠍꠣ (ꠀ꠩) ꠅꠞ ꠘꠥꠞꠣꠘꠤ ꠍꠥꠞꠔ
29 ꠔꠦꠃ ꠝꠥꠍꠣꠄ ꠡꠣꠢꠣꠖꠔ ꠙꠣꠔ꠆ꠔꠞ ꠖꠥꠁꠅꠈꠣꠘ ꠀꠔꠅ ꠟꠁꠀ ꠔꠥꠞ ꠙꠣꠠ ꠕꠣꠇꠤ ꠟꠣꠝꠤꠀ ꠀꠁꠟꠣ। ꠝꠣꠛꠥꠖꠞ ꠟꠉꠦ ꠛꠣꠔꠌꠤꠔ ꠇꠞꠣꠄ ꠝꠥꠍꠣꠞ ꠝꠥꠈꠞ ꠍꠥꠞꠔ ꠘꠥꠞꠣꠘꠤ ꠅꠁꠉꠦꠟ, ꠅꠁꠟꠦ ꠝꠥꠍꠣꠄ ꠁꠈꠣꠘ ꠐꠦꠞ ꠙꠣꠁꠟꠣ ꠘꠣ। 30 ꠅꠃ ꠡꠝꠄ ꠢꠣꠞꠥꠘ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠦ ꠝꠥꠍꠣꠞ ꠘꠥꠞꠣꠘꠤ ꠍꠥꠞꠔ ꠖꠦꠈꠟꠣ, ꠖꠦꠈꠤꠀ ꠔꠣꠞꠣ ꠇꠣꠍꠣꠔ ꠀꠁꠔꠦ ꠒꠞꠣꠁꠉꠦꠟꠣ। 31 ꠅꠁꠟꠦ ꠝꠥꠍꠣꠄ ꠔꠣꠞꠣꠞꠦ ꠒꠣꠇ ꠖꠤꠟꠣ, ꠔꠦꠃ ꠢꠣꠞꠥꠘ ꠀꠞ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠅꠇꠟ ꠔꠣꠘ ꠉꠦꠍꠦ ꠀꠁꠟꠣ, ꠀꠞ ꠝꠥꠍꠣꠄ ꠔꠣꠞꠣꠞ ꠟꠉꠦ ꠝꠣꠔ-ꠇꠕꠣ ꠝꠣꠔꠤꠟꠣ। 32 ꠛꠣꠖꠦ ꠢꠇꠟ ꠛꠘꠤ ꠁꠍꠞꠣꠁꠟ ꠔꠣꠘ ꠇꠣꠍꠣꠔ ꠀꠁꠟꠣ। ꠀꠁꠀ ꠢꠣꠞꠟꠦ ꠔꠣꠁꠘ ꠔꠥꠞ ꠙꠣꠠꠞ ꠃꠙꠞꠦ ꠝꠣꠛꠥꠖꠞ ꠖꠦꠅꠀ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠔꠣꠞꠣꠞꠦ ꠎꠣꠘꠣꠁꠟꠣ।
33 ꠔꠣꠞꠣꠞ ꠟꠉꠦ ꠝꠣꠔ-ꠇꠕꠣ ꠡꠦꠡ ꠅꠁꠉꠦꠟꠦ ꠝꠥꠍꠣꠄ ꠔꠣꠘ ꠘꠥꠞꠣꠘꠤ ꠌꠦꠢꠣꠞꠣ ꠟꠥꠇꠣꠘꠤꠞ ꠟꠣꠉꠤ ꠝꠥꠈꠅ ꠙꠞ꠆ꠖꠣ ꠟꠣꠉꠣꠁ ꠖꠤꠟꠣ। 34 ꠅꠁꠟꠦ ꠝꠥꠍꠣꠄ ꠎꠦꠛꠟꠣ ꠝꠣꠛꠥꠖꠞ ꠟꠉꠦ ꠛꠣꠔꠌꠤꠔꠞ ꠟꠣꠉꠤ ꠈꠣꠘꠦꠇꠣꠞ ꠜꠤꠔꠞꠦ ꠔꠣꠘ ꠍꠣꠝꠘꠦ ꠎꠣꠁꠔꠣ, ꠅꠃ ꠡꠝꠄ ꠁ ꠙꠞ꠆ꠖꠣ ꠈꠥꠟꠤꠟꠤꠔꠣ। ꠛꠣꠖꠦ ꠛꠣꠞꠦ ꠀꠁꠀ ꠙꠞ꠆ꠖꠣ ꠟꠣꠉꠣꠁꠔꠣ, ꠀꠞ ꠀꠟ꠆ꠟꠣꠞ ꠖꠦꠅꠀ ꠢꠥꠇꠥꠝ ꠅꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠔꠣ। 35 ꠢꠇꠟ ꠝꠣꠘꠡꠦ ꠖꠦꠈꠔꠣ ꠝꠥꠍꠣꠞ ꠝꠥꠈ ꠘꠥꠞꠣꠘꠤ ꠅꠁꠉꠦꠍꠦ। ꠝꠥꠍꠣꠄ ꠔꠣꠘ ꠝꠥꠈ ꠉꠥꠞꠤꠟꠤꠔꠣ ꠀꠞ ꠝꠣꠛꠥꠖꠞ ꠍꠣꠝꠘꠦ ꠎꠣꠅꠀꠞ ꠀꠉ ꠙꠞ꠆ꠎꠘ꠆ꠔ ꠔꠣꠘ ꠝꠥꠈ ꠉꠥꠞꠣ ꠞꠁꠔ।