39
ꠙꠞꠗꠣꠘ ꠁꠝꠣꠝꠞ ꠙꠛꠤꠔ꠆ꠞ ꠟꠦꠛꠣꠍ
1 ꠀꠟ꠆ꠟꠣꠞ ꠊꠞꠞ ꠙꠣꠇ ꠎꠣꠉꠣꠔ ꠁꠝꠣꠝꠔꠤ ꠇꠣꠝꠞ ꠡꠝꠄ ꠚꠤꠘ꠆ꠖꠣꠞ ꠟꠣꠉꠤ, ꠔꠣꠞꠣ ꠟꠣꠟ, ꠛꠣꠁꠋꠉꠘꠤ ꠀꠞ ꠟꠤꠟꠥꠀ ꠡꠥꠔꠣꠖꠤ ꠡꠥꠘ꠆ꠖꠞ ꠇꠞꠤ ꠟꠦꠛꠣꠍ ꠛꠣꠘꠣꠁꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠇꠞꠤ ꠁꠝꠣꠝ ꠢꠣꠞꠥꠘꠞ ꠟꠣꠉꠤ ꠙꠛꠤꠔ꠆ꠞ ꠟꠦꠛꠣꠍ ꠛꠣꠘꠣꠁꠟꠣ।
2 ꠅꠃ ꠃꠡ꠆ꠔꠣꠖ ꠇꠣꠞꠤꠉꠞ ꠅꠇꠟꠦ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ ꠀꠞ ꠡꠥꠘꠣꠖꠤ ꠙꠞꠗꠣꠘ ꠁꠝꠣꠝꠞ ꠄꠚꠞꠘ ꠛꠣꠘꠣꠁꠟꠣ। 3 ꠡꠥꠘꠣ ꠙꠤꠐꠣꠁꠀ ꠙꠣꠔ ꠛꠣꠘꠣꠁꠀ, ꠡꠥꠔꠣꠞ ꠟꠣꠈꠣꠘ ꠡꠥꠘꠣꠞ ꠔꠣꠞ ꠔꠤꠀꠞ ꠇꠞꠟꠣ। ꠛꠣꠖꠦ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ ꠀꠞ ꠡꠥꠘꠣꠞ ꠔꠣꠞ ꠄꠇꠟꠉꠦ ꠝꠤꠟꠣꠁꠀ ꠇꠣꠙꠠ ꠛꠣꠘꠣꠁꠟꠣ। 4 ꠄꠚꠞꠘꠞ ꠇꠣꠘ꠆ꠖꠞ ꠉꠣꠟꠣ ꠎꠥꠠꠣ ꠖꠤꠛꠣꠞ ꠟꠣꠉꠤ ꠖꠥꠈꠣꠘ ꠙꠐ꠆ꠐꠤ ꠛꠣꠘꠣꠁꠀ, ꠄꠚꠞꠘꠞ ꠃꠙꠞꠞ ꠇꠥꠘꠣꠔ ꠟꠣꠉꠣꠁꠟꠣ। 5 ꠄꠚꠞꠘꠞ ꠟꠉꠦ ꠎꠥꠠꠣ ꠟꠣꠉꠣꠁꠟ ꠙꠦꠐꠞ ꠃꠙꠞꠞ ꠛꠦꠟꠐ ꠈꠣꠘꠅ ꠄꠚꠞꠘꠞ ꠡꠥꠔꠣꠖꠤ ꠛꠣꠘꠣꠁꠟꠣ। ꠔꠣꠞꠣ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ ꠀꠞ ꠡꠥꠘꠣꠞ ꠔꠣꠞ ꠖꠤꠀ ꠑꠤꠇ ꠄꠚꠞꠘꠞ ꠘꠝꠥꠘꠣꠄ ꠛꠣꠘꠣꠁꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠇꠞꠤ ꠢꠇ꠆ꠇꠟꠔꠣ ꠛꠣꠘꠣꠁꠟ ꠅꠁꠟ।
6 ꠛꠣꠖꠦ ꠔꠣꠞꠣ ꠖꠥꠁꠐꠣ ꠀꠇꠤꠇ ꠙꠣꠔ꠆ꠔꠞ ꠇꠣꠐꠤꠀ, ꠄꠞ ꠃꠙꠞꠦ ꠡꠥꠘꠣꠞ ꠎꠣꠎꠁꠞ ꠛꠅꠀꠁꠟꠣ। ꠢꠥꠘꠣꠞ ꠅꠇꠟꠦ ꠖꠣꠝꠤ ꠙꠣꠔ꠆ꠔꠞ ꠈꠥꠖꠤꠀ ꠎꠦꠟꠣ ꠡꠤꠟ ꠛꠣꠘꠣꠁꠘ, ꠅꠃꠟꠣ ꠙꠣꠔ꠆ꠔꠞ ꠈꠥꠖꠤꠀ ꠁꠍꠞꠣꠁꠟꠞ ꠙꠥꠀꠂꠘ꠆ꠔꠞ ꠘꠣꠝ ꠟꠦꠈꠟꠣ। 7 ꠀꠞ ꠅꠃ ꠖꠥꠁꠅ ꠙꠣꠔ꠆ꠔꠞ ꠡꠥꠘꠣꠞ ꠎꠣꠎꠁꠞꠞ ꠝꠣꠎꠦ ꠟꠣꠉꠣꠁꠀ, ꠄꠚꠞꠘꠞ ꠇꠣꠘ꠆ꠖꠞ ꠚꠤꠔꠣꠞ ꠟꠉꠦ ꠛꠣꠘ꠆ꠖꠤꠟꠣ। ꠁꠍꠞꠣꠁꠟꠞ ꠙꠥꠀꠂꠘ꠆ꠔꠞ ꠛꠣꠄ ꠝꠣꠛꠥꠖꠞ ꠘꠎꠞ ꠞꠣꠈꠣꠞ ꠟꠣꠉꠤ ꠁꠟꠣ ꠇꠞꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃꠟꠣ ꠢꠇꠟꠔꠣ ꠇꠞꠣ ꠅꠁꠟ।
8 ꠛꠣꠖꠦ ꠄꠚꠞꠘꠞ ꠟꠣꠈꠣꠘ ꠜꠣꠟꠣ ꠃꠡ꠆ꠔꠣꠖ ꠖꠞ꠆ꠎꠤꠞꠦꠖꠤ ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠡꠥꠔꠣ, ꠖꠣꠝꠤ ꠡꠥꠔꠤ ꠇꠣꠙꠠ ꠀꠞ ꠡꠥꠘꠣꠖꠤ ꠛꠥꠇꠥꠞ ꠃꠙꠞꠞ ꠕꠟꠤ ꠛꠣꠘꠣꠁꠟ ꠅꠁꠟ। 9 ꠁꠐꠣ ꠅꠁꠟ ꠟꠣꠝ꠆ꠛꠣꠄ ꠀꠗꠣ ꠀꠔ, ꠙꠣꠡꠦ ꠀꠗꠣ ꠀꠔ, ꠌꠣꠁꠞꠇꠥꠘꠤ ꠖꠥꠁ ꠜꠣꠁꠘ꠆ꠎ ꠇꠞꠣ ꠇꠣꠙꠠ। 10 ꠄꠞ ꠃꠙꠞꠦ ꠔꠣꠞꠣ ꠌꠣꠁꠞ ꠢꠣꠁꠞ ꠇꠞꠤ ꠖꠣꠝꠤ ꠙꠣꠔ꠆ꠔꠞ ꠟꠣꠉꠣꠁꠟꠣ। ꠙꠄꠟꠣ ꠢꠣꠞꠤꠔ ꠁꠀꠇꠥꠔ, ꠙꠤꠔ ꠀꠞ ꠙꠣꠘ꠆ꠘꠣ ꠝꠘꠤ; 11 ꠖꠥꠍꠞꠣ ꠢꠣꠞꠤꠔ ꠟꠣꠟꠝꠘꠤ, ꠟꠤꠟ ꠝꠘꠤ ꠀꠞ ꠢꠤꠞꠣ; 12 ꠔꠤꠘ ꠘꠝ꠆ꠛꠞ ꠢꠣꠞꠤꠔ ꠚꠤꠞꠥꠎ, ꠉꠥꠝꠦꠖ ꠀꠞ ꠙꠖ꠆ꠖꠞꠣꠉ ꠝꠘꠤ; 13 ꠌꠣꠁꠞ ꠘꠝ꠆ꠛꠞ ꠢꠣꠞꠤꠔ ꠙꠥꠈꠞꠣꠎ, ꠛꠂꠖꠥꠞ꠆ꠎ ꠀꠞ ꠡꠥꠞꠥꠎ ꠝꠘꠤ। ꠁ ꠙꠣꠔ꠆ꠔꠞ ꠅꠇꠟ ꠡꠥꠘꠣꠞ ꠎꠣꠎꠁꠞꠞ ꠃꠙꠞꠦ ꠟꠣꠉꠣꠁꠟ ꠅꠁꠟ। 14 ꠁꠍꠞꠣꠁꠟꠞ ꠛꠣꠞꠅ ꠙꠥꠀꠞ ꠟꠣꠉꠤ ꠛꠣꠞꠅꠐꠣ ꠙꠣꠔ꠆ꠔꠞ ꠟꠣꠉꠣꠁꠟꠣ। ꠁꠔꠣ ꠄꠇꠅ ꠙꠣꠔ꠆ꠔꠞꠅ ꠄꠇ ꠄꠇ ꠙꠥꠀꠞ ꠘꠣꠝ ꠈꠥꠖꠤꠀ ꠟꠦꠈꠣ ꠅꠁꠟ, ꠎꠦꠟꠣ ꠈꠥꠖꠤꠀ ꠡꠤꠟ ꠛꠣꠘꠣꠁꠟ ꠅꠄ।
15 ꠛꠥꠇꠥꠞ ꠃꠙꠞꠞ ꠕꠟꠤꠞ ꠟꠣꠉꠤ ꠈꠣꠐꠤ ꠡꠥꠘꠣꠖꠤ ꠞꠡꠤꠞ ꠟꠣꠈꠣꠘ ꠙꠦꠌꠣꠁꠀ ꠖꠥꠇꠍꠣ ꠌꠦꠁꠘ ꠛꠣꠘꠣꠁꠟꠣ। 16 ꠀꠞ ꠡꠥꠘꠣꠞ ꠖꠥꠈꠣꠘ ꠎꠣꠎꠁꠞ ꠀꠞ ꠖꠥꠁꠐꠣ ꠇꠠꠣ ꠛꠣꠘꠣꠁꠀ, ꠛꠥꠇꠥꠞ ꠅꠃ ꠕꠟꠤꠞ ꠃꠙꠞꠞ ꠖꠥꠁ ꠇꠥꠘꠣꠔ ꠟꠣꠉꠣꠁꠟꠣ। 17 ꠀꠞ ꠌꠦꠁꠘ ꠖꠥꠁꠅꠉꠦꠍꠣ ꠖꠥꠁꠅ ꠇꠠꠣꠞ ꠟꠉꠦ ꠀꠐꠇꠣꠁꠟꠣ। 18 ꠖꠥꠁꠅ ꠇꠣꠘ꠆ꠖꠞ ꠄꠚꠞꠘꠞ ꠍꠣꠝꠘꠞ ꠚꠤꠔꠣꠔ ꠡꠥꠘꠣꠞ ꠎꠣꠎꠁꠞꠞ ꠟꠉꠦ ꠌꠦꠁꠘꠞ ꠄꠇ ꠝꠣꠕꠣ ꠛꠣꠘ꠆ꠖꠤꠟꠣ। 19 ꠀꠞꠅ ꠖꠥꠁꠐꠣ ꠡꠥꠘꠣꠞ ꠇꠠꠣ ꠛꠣꠘꠣꠁꠀ ꠛꠥꠇꠥꠞ ꠃꠙꠞꠞ ꠕꠟꠤꠞ ꠖꠥꠁ ꠇꠥꠘꠣꠔ ꠟꠣꠉꠣꠁꠟꠣ। ꠁ ꠖꠥꠁꠅꠐꠣ ꠄꠚꠞꠘꠞ ꠟꠉꠦ ꠛꠥꠇꠥꠞ ꠕꠟꠤꠞ ꠔꠟꠦ ꠞꠁꠟ। 20 ꠛꠣꠖꠦ ꠀꠞꠅ ꠖꠥꠁꠐꠣ ꠡꠥꠘꠣꠞ ꠇꠠꠣ ꠛꠣꠘꠣꠁꠀ, ꠄꠚꠞꠘꠞ ꠇꠣꠘ꠆ꠖꠞ ꠙꠐ꠆ꠐꠤꠞ ꠡꠁ ꠔꠟꠦꠖꠤ, ꠙꠦꠐꠞ ꠃꠙꠞꠞ ꠛꠦꠟꠐꠞ ꠃꠙꠞꠞ ꠡꠤꠟꠣꠁꠞ ꠇꠣꠍꠣꠔ ꠟꠣꠉꠣꠁ ꠖꠤꠟꠣ। 21 ꠀꠞ ꠛꠥꠇꠥꠞ ꠃꠙꠞꠞ ꠕꠟꠤꠞ ꠔꠟꠞ ꠇꠠꠣꠞ ꠟꠉꠦ ꠙꠦꠐꠞ ꠃꠙꠞꠞ ꠘꠇꠡꠣ ꠇꠞꠣ ꠛꠦꠟꠐꠞ ꠇꠠꠣ ꠛꠣꠘ꠆ꠖꠤꠟꠣ, ꠀꠞ ꠅꠃ ꠕꠟꠤꠄ ꠟꠠꠣ-ꠌꠠꠣ ꠘꠣ ꠇꠞꠣꠞ ꠟꠣꠉꠤ ꠔꠟꠞ ꠇꠠꠣꠞ ꠟꠉꠦ ꠟꠤꠟꠥꠀ ꠡꠥꠔꠣꠖꠤ ꠛꠣꠘ꠆ꠖꠤ ꠖꠤꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠇꠞꠍꠟꠣ।
22 ꠛꠣꠖꠦ ꠔꠣꠞꠣ ꠄꠚꠞꠘꠞ ꠔꠟꠞ ꠀꠟꠈꠦꠟ꠆ꠟꠣ ꠟꠤꠟꠥꠀ ꠞꠋꠉꠞ ꠡꠥꠔꠣꠖꠤ ꠛꠣꠁꠘ ꠇꠞꠟꠣ, 23 ꠀꠞ ꠝꠣꠕꠣ ꠢꠣꠞꠣꠁꠛꠣꠞ ꠛꠣꠟꠣ ꠉꠟꠣꠞ ꠚꠣꠇ ꠍꠤꠠꠔ ꠘꠣ ꠇꠞꠤ ꠄꠞ ꠌꠣꠁꠞꠅ ꠉꠣꠟꠣ ꠙꠐ꠆ꠐꠤ ꠖꠤꠀ ꠖꠠ ꠇꠞꠤ ꠛꠣꠁꠘ ꠇꠞꠟꠣ, ꠉꠟꠣꠞ ꠅꠃ ꠚꠣꠇ ꠞꠣꠈꠟꠣ ꠝꠣꠎ ꠛꠞꠣꠛꠞ। 24 ꠟꠤꠟꠥꠀ, ꠛꠣꠁꠋꠉꠘꠤ, ꠟꠣꠟ ꠞꠋꠉꠞ ꠙꠦꠌꠣꠁꠟ ꠡꠥꠔꠣꠖꠤ ꠀꠘꠥꠀꠞ ꠚꠟꠞ ꠟꠣꠈꠣꠘ ꠛꠣꠘꠣꠁꠟꠣ। ꠛꠣꠘꠣꠁꠀ ꠅꠉꠥꠁꠘꠞꠦ ꠀꠟꠈꠦꠟ꠆ꠟꠣꠞ ꠔꠟꠞ ꠝꠥꠠꠤꠞ ꠌꠣꠁꠞꠅꠛꠣꠄ ꠟꠣꠉꠣꠁꠟꠣ। 25 ꠛꠣꠖꠦ ꠈꠣꠐꠤ ꠡꠥꠘꠣꠞ ꠊꠥꠋꠉꠥꠞ ꠛꠣꠘꠣꠁꠀ ꠅꠃ ꠀꠘꠥꠀꠞꠞ ꠚꠣꠇꠦ ꠚꠣꠇꠦ ꠟꠣꠉꠣꠁꠟꠣ, 26 ꠀꠡ꠆ꠔꠣ ꠔꠟꠞ ꠝꠥꠠꠤꠔ ꠄꠉꠥ ꠇꠞꠤ ꠀꠘꠥꠀꠞ ꠀꠞ ꠄꠉꠥ ꠇꠞꠤ ꠊꠥꠋꠉꠥꠞ ꠟꠣꠉꠣꠁꠟ ꠅꠁꠟ। ꠄꠛꠣꠖꠔꠤ ꠇꠣꠝꠞ ꠛꠣꠟꠣ ꠁꠝꠣꠝ ꠍꠣꠛꠦ ꠅꠃ ꠀꠟꠈꠦꠟ꠆ꠟꠣ ꠚꠤꠘ꠆ꠖꠤꠔꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠄꠇ꠆ꠇꠦꠞꠦ ꠅꠃꠟꠣ ꠇꠞꠣ ꠅꠁꠟ।
27 ꠛꠣꠖꠦ ꠔꠣꠞꠣ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞ ꠟꠣꠉꠤ ꠖꠣꠝꠤ ꠡꠥꠔꠤ ꠡꠥꠔꠣꠖꠤ ꠙꠣꠁꠘ꠆ꠎꠣꠛꠤ ꠛꠣꠘꠣꠁꠟꠣ। 28 ꠝꠣꠕꠣꠞ ꠙꠣꠃꠉꠠꠤ ꠀꠞ ꠔꠇꠤꠉꠥꠁꠘꠅ ꠖꠣꠝꠤ ꠡꠥꠔꠤ ꠇꠣꠙꠠꠖꠤ ꠛꠣꠘꠣꠁꠟꠣ, ꠀꠞ ꠢꠣꠚ-ꠙꠦꠘ꠆ꠐꠞ ꠟꠣꠈꠣꠘ ꠎꠣꠋꠉꠤꠀꠅ ꠛꠣꠘꠣꠁꠟꠣ ꠅꠃ ꠇꠣꠙꠠꠖꠤ। 29 ꠇꠝꠞꠞ ꠄꠇꠈꠣꠘ ꠛꠘ꠆ꠖꠘꠤ ꠛꠣꠘꠣꠁꠟꠣ, ꠖꠣꠝꠤ ꠡꠥꠔꠤ ꠇꠣꠙꠠ, ꠟꠤꠟꠥꠀ, ꠛꠣꠁꠋꠉꠘꠤ ꠀꠞ ꠟꠣꠟ ꠡꠥꠔꠣꠖꠤ ꠘꠇꠡꠣ ꠇꠞꠤ ꠛꠣꠘꠣꠁꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠄꠇ꠆ꠇꠦꠞꠦ ꠅꠃꠟꠣ ꠇꠞꠣ ꠅꠁꠟ।
30 ꠀꠞ ꠙꠣꠃꠉꠠꠤꠞ ꠍꠣꠝꠘꠦ ꠟꠣꠉꠣꠘꠤꠞ ꠟꠣꠉꠤ, ꠈꠣꠐꠤ ꠡꠥꠘꠣꠞ ꠙꠣꠔꠖꠤ ꠄꠇꠈꠣꠘ ꠙꠛꠤꠔ꠆ꠞ ꠔꠣꠎ ꠔꠤꠀꠞ ꠇꠞꠟꠣ। ꠡꠤꠟꠞ ꠃꠙꠞꠦ ꠎꠦꠟꠣ ꠈꠥꠖꠤꠀ ꠟꠦꠈꠣ ꠅꠄ, ꠅꠃ ꠙꠣꠔꠞ ꠃꠙꠞꠦ ꠅꠟꠣ ꠈꠥꠖꠤꠀ ꠟꠦꠈꠟꠣ, “ꠝꠣꠛꠥꠖꠞ ꠘꠣꠝꠦ ꠙꠛꠤꠔ꠆ꠞ।” 31 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃ ꠢꠥꠇꠥꠝ ꠝꠣꠚꠤꠇꠃ ꠁ ꠙꠣꠔꠞꠦ ꠟꠤꠟꠥꠀ ꠡꠥꠔꠣꠖꠤ ꠙꠣꠃꠉꠠꠤꠞ ꠍꠣꠝꠘꠦ ꠛꠣꠘ꠆ꠖꠤ ꠖꠤꠟꠣ।
ꠝꠥꠍꠣ (ꠀ꠩) ꠄ ꠢꠇꠟꠔꠣ ꠡꠝꠎꠤꠀ ꠘꠤꠟꠣ
32 ꠅꠃ ꠟꠣꠈꠣꠘ ꠝꠤꠟꠘ-ꠔꠣꠝ꠆ꠛꠥ ꠡꠢ ꠀꠟ꠆ꠟꠣꠞ ꠊꠞꠞ ꠢꠇ꠆ꠇꠟ ꠇꠣꠝ-ꠇꠣꠎ ꠡꠦꠡ ꠅꠁꠟ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠛꠘꠤ ꠁꠍꠞꠣꠁꠟꠦ ꠄꠇ꠆ꠇꠦꠞꠦ ꠅꠃ ꠟꠣꠈꠣꠘ ꠢꠇꠟꠔꠣ ꠇꠞꠟꠣ। 33 ꠛꠣꠖꠦ ꠔꠣꠞꠣ ꠀꠟ꠆ꠟꠣꠞ ꠊꠞꠞ ꠟꠣꠉꠤ ꠛꠣꠘꠣꠁꠟ ꠢꠇ꠆ꠇꠟꠔꠣ ꠝꠥꠍꠣꠞ ꠇꠣꠍꠣꠔ ꠟꠁꠀ ꠀꠁꠟꠣ। ꠔꠣꠞꠣ ꠀꠘꠟꠣ:
ꠝꠤꠟꠘ-ꠔꠣꠝ꠆ꠛꠥ, ꠔꠣꠝ꠆ꠛꠥꠞ ꠢꠇꠟ ꠝꠣꠟ-ꠍꠣꠝꠣꠘꠣ, ꠢꠥꠇ, ꠚ꠆ꠞꠦꠁꠝ, ꠛꠣꠔ꠆ꠔꠤ, ꠈꠥꠐꠤ, ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ;
34 ꠟꠣꠟ ꠞꠋ ꠇꠞꠣ ꠝꠦꠠꠣꠞ ꠌꠣꠝꠠꠣꠞ ꠍꠣꠘꠤ, ꠚꠥʼꠞ ꠌꠣꠝꠠꠣꠞ ꠍꠣꠘꠤ, ꠢꠦꠞꠦꠝ ꠡꠞꠤꠚꠞ ꠛꠦꠠꠣꠞ ꠙꠞ꠆ꠖꠣ;
35 ꠡꠣꠢꠣꠖꠔ ꠡꠘ꠆ꠖꠥꠇ, ꠡꠘ꠆ꠖꠥꠇ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ, ꠡꠘ꠆ꠖꠥꠇꠞ ꠓꠣꠇꠘꠣ;
36 ꠐꠦꠛꠥꠟ, ꠐꠦꠛꠥꠟꠞ ꠢꠇꠟ ꠌꠤꠎ, ꠝꠣꠛꠥꠖꠞ ꠘꠣꠝꠞ ꠙꠛꠤꠔ꠆ꠞ ꠞꠥꠐꠤ;
37 ꠈꠣꠐꠤ ꠡꠥꠘꠣꠞ ꠌꠦꠞꠣꠉ ꠖꠣꠘꠤ, ꠄꠞ ꠟꠉꠞ ꠢꠇꠟ ꠌꠤꠎ, ꠎꠣꠟꠣꠘꠤꠞ ꠔꠦꠟ;
38 ꠡꠥꠘꠣꠞ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ, ꠈꠦꠟꠣꠚꠔꠤꠞ ꠔꠦꠟ, ꠈꠥꠡꠛꠄ ꠀꠟꠣ ꠀꠉꠞ, ꠀꠟ꠆ꠟꠣꠞ ꠊꠞꠞ ꠖꠥꠀꠞꠞ ꠙꠞ꠆ꠖꠣ;
39 ꠙꠤꠔꠟꠞ ꠇꠥꠞꠛꠣꠘꠤ ꠈꠣꠘꠣ, ꠙꠤꠔꠟꠞ ꠎꠣꠟꠤ, ꠇꠥꠞꠛꠣꠘꠤ ꠈꠣꠘꠣ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ, ꠇꠥꠞꠛꠣꠘꠤ ꠈꠣꠘꠣꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣ, ꠅꠎꠥꠞ ꠉꠣꠝꠟꠣ ꠀꠞ ꠄꠞ ꠔꠟꠞ ꠌꠇꠤ-ꠈꠣꠐ;
40 ꠃꠑꠣꠘꠞ ꠙꠞ꠆ꠖꠣꠁꠘ, ꠈꠥꠐꠤꠘ, ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ, ꠃꠑꠣꠘꠅ ꠢꠣꠝꠣꠘꠤꠞ ꠉꠦꠁꠐꠞ ꠙꠞ꠆ꠖꠣ, ꠃꠑꠣꠘꠞ ꠙꠦꠞꠦꠉ ꠀꠞ ꠖꠠꠤ;
ꠄꠇ ꠇꠕꠣꠄ, ꠝꠤꠟꠘ-ꠔꠣꠝ꠆ꠛꠥ ꠡꠢ ꠀꠟ꠆ꠟꠣꠞ ꠊꠞꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣ;
41 ꠀꠞ ꠙꠣꠇ ꠎꠣꠉꠣꠔ ꠁꠝꠣꠝꠔꠤ ꠇꠣꠝꠞ ꠟꠣꠉꠤ ꠁꠝꠣꠝ ꠢꠣꠞꠥꠘꠞ ꠙꠛꠤꠔ꠆ꠞ ꠟꠦꠛꠣꠍ, ꠀꠞ ꠔꠣꠘ ꠙꠥꠀꠂꠘ꠆ꠔꠞꠅ ꠁꠝꠣꠝꠔꠤꠞ ꠟꠦꠛꠣꠍ।
42 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃ ꠟꠣꠈꠣꠘ ꠛꠘꠤ ꠁꠍꠞꠣꠁꠟ ꠅꠇꠟꠦ ꠢꠇꠟ ꠇꠣꠝ ꠇꠞꠟꠣ। 43 ꠢꠦꠡꠦ ꠝꠥꠍꠣꠄ ꠁꠔꠣ ꠢꠇꠟꠔꠣ ꠖꠦꠈꠤꠀ ꠛꠥꠎꠟꠣ, ꠝꠣꠛꠥꠖꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃ ꠟꠣꠈꠣꠘꠃ ꠇꠞꠣ ꠅꠁꠍꠦ। ꠄꠞꠟꠣꠉꠤ ꠔꠣꠁꠘ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠖꠥꠀ ꠖꠤꠟꠣ।