1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 2 “ꠔꠥꠝꠤ ꠛꠍꠞꠞ ꠙꠄꠟꠣ ꠌꠣꠘ꠆ꠖꠞ ꠙꠄꠟꠣ ꠔꠣꠞꠤꠈꠅ ꠝꠤꠟꠘ-ꠔꠣꠝ꠆ꠛꠥ ꠡꠢ ꠀꠝꠣꠞ ꠊꠞꠞꠦ ꠈꠣꠠꠣ ꠇꠞꠤꠅ। 3 ꠊꠞꠞ ꠜꠤꠔꠞꠦ ꠡꠣꠢꠣꠖꠔ ꠡꠘ꠆ꠖꠥꠇꠞꠦ ꠢꠣꠞꠣꠁꠀ, ꠝꠣꠎꠦ ꠙꠞ꠆ꠖꠣ ꠐꠣꠘꠣꠁꠀ ꠡꠘ꠆ꠖꠥꠇꠞꠦ ꠀꠅꠠꠦ ꠕꠁꠅ। 4 ꠐꠦꠛꠥꠟꠞꠦꠅ ꠜꠤꠔꠞꠦ ꠢꠣꠞꠣꠁꠀ, ꠄꠞ ꠃꠙꠞꠞ ꠌꠤꠎ ꠅꠇꠟ ꠢꠣꠎꠣꠁꠅ। ꠛꠣꠖꠦ ꠌꠦꠞꠣꠉ ꠖꠣꠘꠤ ꠜꠤꠔꠞꠦ ꠀꠘꠤꠀ ꠔꠣꠞ ꠌꠦꠞꠣꠉ ꠅꠇꠟ ꠎꠣꠟꠣꠁ ꠖꠤꠅ। 5 ꠡꠥꠘꠣꠖꠤ ꠛꠣꠘꠣꠁꠟ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ ꠡꠣꠢꠣꠖꠔ ꠡꠘ꠆ꠖꠥꠇꠞ ꠍꠣꠝꠘꠦ ꠕꠁꠅ, ꠕꠁꠀ ꠀꠝꠣꠞ ꠊꠞꠞ ꠖꠥꠀꠞꠞ ꠙꠞ꠆ꠖꠣ ꠟꠣꠉꠣꠁꠅ। 6 ꠀꠝꠣꠞ ꠊꠞꠞ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣ ꠕꠁꠅ। 7 ꠇꠥꠞꠛꠣꠘꠤ ꠈꠣꠘꠣ ꠀꠞ ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠈꠣꠘꠅ ꠅꠎꠥꠞ ꠉꠣꠝꠟꠣ ꠙꠣꠘꠤꠖꠤ ꠜꠞꠤꠀ ꠕꠁꠅ। 8 ꠛꠣꠖꠦ ꠃꠑꠣꠘꠞ ꠌꠣꠁꠞꠅ ꠉꠣꠟꠣꠛꠣꠄ ꠙꠞ꠆ꠖꠣ ꠐꠣꠘꠣꠁꠅ, ꠀꠞ ꠃꠑꠣꠘꠞ ꠉꠦꠁꠐꠅ-ꠅ ꠙꠞ꠆ꠖꠣ ꠟꠣꠉꠣꠁꠅ।

9 “ꠛꠣꠖꠦ ꠔꠥꠝꠤ ꠈꠦꠟꠣꠚꠔꠤꠞ ꠔꠦꠟ ꠖꠤꠀ ꠀꠝꠣꠞ ꠊꠞ ꠀꠞ ꠀꠝꠣꠞ ꠊꠞꠞ ꠢꠇꠟ ꠝꠣꠟ-ꠍꠣꠝꠣꠘꠣꠞꠦ ꠙꠛꠤꠔ꠆ꠞ ꠇꠞꠤꠅ। ꠔꠦꠃ ꠁꠔꠣ ꠢꠇꠟꠔꠣ ꠝꠢꠣ ꠙꠣꠇ-ꠙꠛꠤꠔ꠆ꠞ ꠅꠁꠛ। 10 ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦꠅ ꠈꠦꠟꠣꠚꠔꠤꠞ ꠔꠦꠟ ꠖꠤꠀ ꠙꠛꠤꠔ꠆ꠞ ꠇꠞꠤꠅ। ꠇꠥꠞꠛꠣꠘꠤ ꠈꠣꠘꠣꠞ ꠢꠇꠟ ꠝꠣꠟ-ꠍꠣꠝꠣꠘꠣꠞꠦꠅ ꠙꠛꠤꠔ꠆ꠞ ꠇꠞꠤꠅ। ꠔꠦꠃ ꠁ ꠇꠥꠞꠛꠣꠘꠤ ꠈꠣꠘꠣ ꠝꠢꠣ-ꠙꠛꠤꠔ꠆ꠞ ꠌꠤꠎ ꠅꠁꠛ। 11 ꠅꠎꠥꠞ ꠙꠣꠘꠤꠞ ꠉꠣꠝꠟꠣ ꠀꠞ ꠄꠞ ꠔꠟꠞ ꠌꠇꠤ-ꠈꠣꠐꠞꠦꠅ ꠈꠦꠟꠣꠚꠔꠤꠞ ꠔꠦꠟ ꠖꠤꠀ ꠙꠛꠤꠔ꠆ꠞ ꠇꠞꠤꠅ।

12 “ꠛꠣꠖꠦ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘꠞꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠀꠘꠤꠀ ꠙꠣꠘꠤꠖꠤ ꠘꠣꠅꠀꠁ ꠖꠤꠅ। 13 ꠘꠣꠅꠀꠘꠤꠞ ꠛꠣꠖꠦ ꠢꠣꠞꠥꠘꠞꠦ ꠙꠣꠇ-ꠙꠛꠤꠔ꠆ꠞ ꠟꠦꠛꠣꠍ ꠅꠇꠟ ꠚꠤꠘ꠆ꠖꠣꠁꠅ, ꠀꠞ ꠀꠝꠣꠞ ꠁꠝꠣꠝ ꠅꠀꠞ ꠟꠣꠉꠤ ꠔꠣꠞꠦ ꠙꠛꠤꠔ꠆ꠞ ꠔꠦꠟ ꠟꠣꠉꠣꠁꠀ ꠈꠦꠟꠣꠚꠔꠤ ꠖꠤꠀ ꠙꠛꠤꠔ꠆ꠞ ꠇꠞꠤꠅ। 14 ꠔꠣꠞ ꠙꠥꠀꠂꠘ꠆ꠔꠞꠦ ꠀꠘꠤꠀ ꠁꠝꠣꠝꠔꠤꠞ ꠙꠣꠁꠘ꠆ꠎꠣꠛꠤ ꠚꠤꠘ꠆ꠖꠣꠁꠅ। 15 ꠔꠣꠞꠣꠞ ꠛꠣꠚꠞꠦ ꠎꠦꠟꠣ ꠙꠛꠤꠔ꠆ꠞ ꠔꠦꠟꠖꠤ ꠁꠝꠣꠝꠔꠤ ꠇꠣꠝꠞ ꠈꠦꠟꠣꠚꠔꠤ ꠖꠤꠍ, ꠔꠣꠞꠣꠞꠦꠅ ꠅꠃꠟꠣ ꠈꠦꠟꠣꠚꠔꠤ ꠖꠤꠅ, ꠎꠣꠔꠦ ꠔꠣꠞꠣꠅ ꠀꠝꠣꠞ ꠁꠝꠣꠝꠔꠤ ꠇꠣꠝ ꠇꠞꠔꠣ ꠙꠣꠞꠂꠘ। ꠁ ꠈꠦꠟꠣꠚꠔꠤꠞ ꠝꠣꠎꠖꠤ ꠁꠝꠣꠝꠔꠤꠞ ꠎꠦ ꠘꠤꠅꠝ ꠌꠣꠟꠥ ꠅꠁꠛ, ꠁꠔꠣ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠌꠣꠟꠥ ꠞꠁꠛ।”

16 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠝꠥꠍꠣꠄ ꠁꠔꠣ ꠢꠇꠟꠔꠣ ꠇꠞꠟꠣ। 17 ꠖꠥꠍꠞꠣ ꠛꠍꠞꠞ ꠙꠄꠟꠣ ꠌꠣꠘ꠆ꠖꠞ ꠙꠄꠟꠣ ꠔꠣꠞꠤꠈꠅ ꠀꠟ꠆ꠟꠣꠞ ꠊꠞ ꠈꠣꠠꠣ ꠇꠞꠣ ꠅꠁꠟ। 18 ꠝꠥꠍꠣꠄ ꠁ ꠊꠞ ꠈꠣꠠꠣ ꠇꠞꠟꠣ, ꠙꠄꠟꠣ ꠄꠞ ꠈꠥꠐꠤꠞ ꠔꠟꠞ ꠌꠥꠘ꠆ꠉꠤ ꠛꠅꠀꠁꠟꠣ, ꠈꠥꠐꠤꠘ ꠃꠛꠣ ꠇꠞꠟꠣ, ꠛꠦꠠꠣꠞ ꠚ꠆ꠞꠦꠁꠝ ꠟꠣꠉꠣꠁꠟꠣ, ꠚ꠆ꠞꠦꠁꠝꠞ ꠜꠤꠔꠞꠦꠖꠤ ꠛꠣꠔ꠆ꠔꠤ ꠖꠤꠟꠣ। 19 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠣꠁꠘ ꠍꠣꠉꠟꠞ ꠞꠥꠝꠣ ꠖꠤꠀ ꠊꠞꠞ ꠙꠄꠟꠣ ꠍꠣꠘꠤ ꠖꠤꠟꠣ, ꠄꠞ ꠃꠙꠞꠦ ꠖꠤꠟꠣ ꠀꠞꠅ ꠖꠥꠁꠐꠣ ꠍꠣꠘꠤ।

20 ꠛꠣꠖꠦ ꠢꠃ ꠖꠥꠁꠅꠈꠣꠘ ꠙꠛꠤꠔ꠆ꠞ ꠡꠣꠢꠣꠖꠔ ꠙꠣꠔ꠆ꠔꠞ ꠀꠘꠤꠀ ꠡꠘ꠆ꠖꠥꠇꠞ ꠜꠤꠔꠞꠦ ꠢꠣꠞꠣꠁꠟꠣ। ꠡꠘ꠆ꠖꠥꠇ ꠛꠁꠀ ꠘꠦꠅꠀꠞ ꠛꠦꠘ꠆ꠖꠣ ꠟꠣꠉꠣꠁꠟꠣ, ꠡꠘ꠆ꠖꠥꠇꠞ ꠃꠙꠞꠞ ꠓꠣꠇꠘꠣꠅ ꠟꠣꠉꠣꠁꠟꠣ। 21 ꠀꠞ ꠡꠘ꠆ꠖꠥꠇꠞꠦ ꠘꠤꠀ ꠀꠟ꠆ꠟꠣꠞ ꠊꠞꠞ ꠜꠤꠔꠞꠦ ꠢꠣꠞꠣꠁꠟꠣ। ꠢꠣꠞꠣꠁꠀ ꠙꠞ꠆ꠖꠣ ꠐꠣꠘꠣꠁꠀ ꠡꠘ꠆ꠖꠥꠇꠞꠦ ꠀꠅꠠꠦ ꠞꠣꠈꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ।

22 ꠡꠘ꠆ꠖꠥꠇꠞ ꠅꠃ ꠙꠞ꠆ꠖꠣꠞ ꠛꠣꠞꠦ ꠃꠔ꠆ꠔꠞ ꠉꠣꠟꠣꠛꠣꠄ, ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠦ ꠙꠛꠤꠔ꠆ꠞ ꠞꠥꠐꠤꠞ ꠐꠦꠛꠥꠟ ꠞꠣꠈꠟꠣ। 23 ꠐꠦꠛꠥꠟꠞ ꠃꠙꠞꠦ ꠝꠣꠛꠥꠖꠞ ꠘꠣꠝꠞ ꠙꠛꠤꠔ꠆ꠞ ꠞꠥꠐꠤ ꠢꠣꠎꠣꠁꠀ ꠕꠁꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ।

24 ꠐꠦꠛꠥꠟꠞ ꠍꠣꠝꠘꠦ ꠔꠣꠝ꠆ꠛꠥꠞ ꠖꠇ꠆ꠇꠤꠘ ꠉꠣꠟꠣꠔ ꠌꠦꠞꠣꠉ ꠖꠣꠘꠤ ꠕꠁꠟꠣ। 25 ꠛꠣꠖꠦ ꠝꠣꠛꠥꠖꠞ ꠍꠣꠝꠘꠦ ꠌꠦꠞꠣꠉ ꠉꠥꠁꠘ ꠎꠣꠟꠣꠁꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ।

26 ꠝꠤꠟꠘ-ꠔꠣꠝ꠆ꠛꠥꠞ ꠝꠣꠎꠈꠣꠘꠞ ꠙꠞ꠆ꠖꠣꠞ ꠍꠣꠝꠘꠦ ꠡꠥꠘꠣꠖꠤ ꠛꠣꠘꠣꠁꠟ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ ꠕꠁꠟꠣ। 27 ꠅꠈꠣꠘꠞ ꠃꠙꠞꠦ ꠈꠥꠡꠛꠄ ꠀꠟꠣ ꠀꠉꠞ ꠎꠣꠟꠣꠁꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ। 28 ꠛꠣꠖꠦ ꠝꠥꠍꠣꠄ ꠖꠥꠀꠞꠞ ꠙꠞ꠆ꠖꠣ ꠐꠣꠘꠣꠁꠟꠣ।

29 ꠔꠣꠁꠘ ꠀꠟ꠆ꠟꠣꠞ ꠊꠞꠞ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠇꠣꠘ꠆ꠖꠣꠔ ꠎꠣꠟꠣꠁꠟ ꠇꠥꠞꠛꠣꠘꠤ ꠈꠣꠘꠣ ꠕꠁꠟꠣ। ꠕꠁꠀ ꠄꠞ ꠃꠙꠞꠦ ꠎꠣꠟꠣꠁꠟ ꠙꠡꠥ ꠇꠥꠞꠛꠣꠘꠤ ꠀꠞ ꠗꠣꠘ-ꠉꠝꠞ ꠍꠖꠉꠣ ꠖꠤꠟꠣ, ꠎꠦꠟꠣ ꠝꠣꠛꠥꠖꠦ ꠝꠥꠍꠣꠞꠦ ꠢꠥꠇꠥꠝ ꠖꠤꠍꠟꠣ।

30 ꠛꠣꠖꠦ ꠝꠤꠟꠘ-ꠔꠣꠝ꠆ꠛꠥ ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠝꠣꠎꠈꠣꠘꠅ ꠅꠎꠥꠞ ꠉꠣꠝꠟꠣ ꠕꠁꠟꠣ, ꠕꠁꠀ ꠅꠎꠥꠞ ꠙꠣꠘꠤ ꠜꠞꠤꠀ ꠖꠤꠟꠣ। 31 ꠅꠃ ꠙꠣꠘꠤ ꠖꠤꠀ ꠝꠥꠍꠣ, ꠢꠣꠞꠥꠘ ꠀꠞ ꠢꠣꠞꠥꠘꠞ ꠙꠥꠀꠂꠘ꠆ꠔꠦ ꠅꠎꠥ ꠇꠞꠔꠣ। 32 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠣꠞꠣ ꠝꠤꠟꠘ-ꠔꠣꠝ꠆ꠛꠥꠔ ꠢꠣꠝꠣꠘꠤꠞ ꠀꠉꠦ, ꠛꠣ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠎꠣꠅꠀꠞ ꠀꠉꠦ ꠅꠎꠥ ꠇꠞꠔꠣ। 33 ꠛꠣꠖꠦ ꠝꠥꠍꠣꠄ ꠀꠟ꠆ꠟꠣꠞ ꠊꠞ ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅꠛꠣꠄ ꠙꠞ꠆ꠖꠣ ꠐꠣꠘꠣꠁꠀ ꠃꠑꠣꠘ ꠛꠣꠘꠣꠁꠟꠣ। ꠃꠑꠣꠘꠞ ꠉꠦꠁꠐꠞ ꠙꠞ꠆ꠖꠣ ꠟꠣꠉꠣꠁꠟꠣ। ꠅꠃ ꠟꠣꠈꠣꠘ ꠝꠥꠍꠣꠄ ꠔꠣꠘ ꠢꠇꠟ ꠇꠣꠝ ꠡꠦꠡ ꠇꠞꠟꠣ।

34 ꠇꠣꠝ ꠡꠦꠡ ꠇꠞꠤꠀ ꠢꠣꠞꠟꠦ, ꠉꠣꠁꠛꠤ ꠝꠦꠊꠞ ꠈꠥꠐꠤ ꠀꠁꠀ ꠅꠃ ꠝꠤꠟꠘ-ꠔꠣꠝ꠆ꠛꠥꠞꠦ ꠉꠥꠞꠤꠟꠤꠟ, ꠝꠣꠛꠥꠖꠞ ꠝꠢꠤꠝꠣ ꠀꠞ ꠇꠥꠖꠞꠔꠦ ꠀꠡ꠆ꠔꠣ ꠊꠞ ꠜꠞꠤꠉꠦꠟ। 35 ꠄꠞꠟꠣꠉꠤ ꠝꠥꠍꠣ ꠀꠞ ꠝꠤꠟꠘ-ꠔꠣꠝ꠆ꠛꠥꠔ ꠢꠣꠝꠣꠁꠔꠣ ꠙꠣꠞꠟꠣ ꠘꠣ, ꠇꠣꠞꠘ ꠄꠞ ꠃꠙꠞꠦ ꠢꠃ ꠝꠦꠊꠞ ꠈꠥꠐꠤ ꠀꠍꠤꠟ, ꠀꠞ ꠝꠣꠛꠥꠖꠞ ꠇꠥꠖꠞꠔꠤ ꠝꠢꠤꠝꠣꠄ ꠀꠡ꠆ꠔꠣ ꠊꠞ ꠜꠞꠤ ꠉꠦꠍꠤꠟ।

36 ꠛꠘꠤ ꠁꠍꠞꠣꠁꠟꠞ ꠅꠃ ꠀꠡ꠆ꠔꠣ ꠍꠚꠞꠞ ꠝꠣꠎꠦ, ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠕꠣꠇꠤ ꠝꠦꠊꠞ ꠈꠥꠐꠤ ꠢꠞꠤꠀ ꠢꠣꠞꠟꠦ ꠔꠣꠞꠣ ꠀꠐꠤꠀ ꠞꠅꠀꠘꠣ ꠖꠤꠔꠣ। 37 ꠅꠁꠟꠦ ꠝꠦꠊꠞ ꠈꠥꠐꠤ ꠃꠙꠞꠦ ꠕꠣꠇꠤ ꠘꠣ ꠢꠞꠣ ꠙꠞ꠆ꠎꠘ꠆ꠔ ꠔꠣꠞꠣ ꠛꠣꠞ ꠅꠁꠔꠣ ꠘꠣ, ꠅꠃ ꠈꠥꠐꠤ ꠢꠞꠣꠞ ꠟꠣꠉꠤ ꠛꠣꠞ ꠌꠣꠁꠔꠣ। 38 ꠇꠣꠞꠘ ꠛꠘꠤ ꠁꠍꠞꠣꠁꠟꠞ ꠅꠃ ꠀꠡ꠆ꠔꠣ ꠍꠚꠞꠞ ꠝꠣꠎꠦꠃ, ꠖꠤꠘꠞ ꠛꠣꠟꠣ ꠔꠣꠞꠣꠞ ꠌꠈꠥꠞ ꠍꠣꠝꠘꠦ ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠝꠦꠊꠞ ꠈꠥꠐꠤ ꠞꠁꠔ, ꠀꠞ ꠞꠣꠁꠔꠞ ꠛꠣꠟꠣ ꠞꠁꠔ ꠀꠉꠥꠁꠘꠞ ꠈꠥꠐꠤ॥