1 ꠝꠣꠛꠥꠖꠦ ꠔꠣꠘ ꠇꠣꠟꠣꠝ ꠝꠥꠔꠣꠛꠦꠇ ꠛꠤꠛꠤ ꠍꠣꠄꠞꠣꠞꠦ ꠢꠦꠚꠣꠎꠔ ꠇꠞꠟꠣ, ꠔꠣꠁꠘ ꠎꠦꠟꠣ ꠅꠀꠖꠣ ꠇꠞꠍꠟꠣ, ꠅꠟꠣꠃ ꠇꠞꠟꠣ। 2 ꠀꠞ ꠛꠤꠛꠤ ꠍꠣꠄꠞꠣꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ। ꠀꠟ꠆ꠟꠣꠄ ꠎꠦ ꠡꠝꠄꠇꠥꠞ ꠇꠕꠣ ꠇꠁꠍꠟꠣ, ꠢꠃ ꠡꠝꠄꠄꠃ ꠁꠛ꠆ꠞꠣꠢꠤꠝꠞ ꠝꠥꠞꠛ꠆ꠛꠤ ꠛꠄꠅꠡꠅ ꠔꠣꠘ ꠙꠥꠀꠞ ꠎꠘꠝ ꠅꠁꠟ। 3 ꠁꠛ꠆ꠞꠣꠢꠤꠝꠦ ꠍꠣꠄꠞꠣꠞ ꠊꠞꠞ ꠔꠣꠘ ꠅꠃ ꠙꠥꠀꠞ ꠘꠣꠝ ꠞꠣꠈꠟꠣ ꠁꠍꠢꠣꠇ [ꠝꠣꠘꠤ, ꠀꠡꠣ]। 4 ꠀꠟ꠆ꠟꠣꠞ ꠢꠥꠇꠥꠝ ꠝꠔ ꠔꠣꠁꠘ ꠀꠐ ꠖꠤꠘꠞ ꠖꠤꠘ ꠔꠣꠘ ꠙꠥꠀ ꠁꠍꠢꠣꠇꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟꠣ। 5 ꠁꠛ꠆ꠞꠣꠢꠤꠝꠞ ꠄꠇ-ꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠁꠍꠢꠣꠇꠞ ꠎꠘꠝ ꠅꠁꠟ। 6 ꠛꠤꠛꠤ ꠍꠣꠄꠞꠣꠄ ꠇꠁꠟꠣ, “ꠀꠟ꠆ꠟꠣꠄ ꠀꠝꠣꠞ ꠝꠥꠈꠅ ꠀꠡꠤ ꠛꠣꠞ ꠇꠞꠟꠣ, ꠀꠞ ꠁꠔꠣ ꠎꠦ ꠢꠥꠘꠛ, ꠢꠦ-ꠅ ꠀꠝꠣꠞ ꠟꠉꠦ ꠀꠡꠤꠛ।” 7 ꠔꠣꠁꠘ ꠀꠞꠅ ꠇꠁꠟꠣ, “ꠍꠣꠄꠞꠣꠄ ꠙꠥꠀꠂꠘ꠆ꠔꠞꠦ ꠛꠥꠇꠥꠞ ꠖꠥꠗ ꠈꠣꠅꠀꠁꠛ, ꠁꠔꠣ ꠁꠛ꠆ꠞꠣꠢꠤꠝꠞꠦ ꠇꠦ ꠇꠁꠟ ꠅꠘꠦ? ꠀꠞ ꠅꠈꠘ ꠔ ꠅꠃ ꠛꠥꠠꠣ ꠛꠄꠅꠡꠅ, ꠀꠝꠣꠞ ꠙꠦꠐꠅ ꠔꠣꠘ ꠙꠥꠀ ꠙꠄꠖꠣ ꠅꠁꠟ।”

8 ꠁꠍꠢꠣꠇ ꠛꠠ ꠅꠀꠞ ꠛꠣꠖꠦ ꠎꠦꠖꠤꠘ ꠔꠣꠘꠦ ꠝꠣʼꠞ ꠖꠥꠗ ꠍꠣꠠꠣꠁꠟ ꠅꠁꠟ, ꠢꠃꠖꠤꠘ ꠁꠛ꠆ꠞꠣꠢꠤꠝꠦ ꠄꠇ ꠛꠠ ꠝꠦꠎꠛꠣꠘꠤ ꠇꠞꠟꠣ। 9 ꠀꠞ ꠝꠤꠡꠞꠤ ꠢꠣꠎꠦꠞꠣꠞ ꠙꠦꠐꠅ ꠁꠛ꠆ꠞꠣꠢꠤꠝꠞ ꠎꠦ ꠙꠥꠀ ꠅꠁꠍꠤꠟ, ꠍꠣꠄꠞꠣꠄ ꠖꠦꠈꠟꠣ ꠢꠦ ꠔꠣꠝꠡꠣ ꠇꠞꠦꠞ। 10 ꠅꠃ ꠔꠣꠁꠘ ꠁꠛ꠆ꠞꠣꠢꠤꠝꠞꠦ ꠇꠁꠟꠣ, “ꠙꠥꠀ ꠡꠢ ꠁ ꠛꠣꠘ꠆ꠖꠤꠞꠦ ꠛꠣꠞ ꠇꠞꠤ ꠖꠦꠅ, ꠛꠣꠘ꠆ꠖꠤꠞ ꠙꠥꠀ ꠀꠝꠣꠞ ꠁꠍꠢꠣꠇꠞ ꠟꠉꠦ ꠅꠋꠡꠤꠖꠣꠞ ꠅꠁꠔ ꠙꠣꠞꠔ ꠘꠣꠄ।” 11 ꠙꠥꠀꠞ ꠁꠔꠣ ꠢꠥꠘꠤꠀ ꠁꠛ꠆ꠞꠣꠢꠤꠝꠦ ꠝꠘꠅ ꠈꠥꠛ ꠔꠇꠟꠤꠚ ꠙꠣꠁꠟꠣ। 12 ꠅꠃ ꠀꠟ꠆ꠟꠣꠄ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞ ꠛꠣꠘ꠆ꠖꠤ ꠀꠞ ꠔꠣꠁꠞ ꠙꠥꠀꠞ ꠟꠣꠉꠤ ꠔꠥꠝꠤ ꠛꠦꠎꠣꠞ ꠅꠁꠅ ꠘꠣ। ꠍꠣꠄꠞꠣꠄ ꠎꠦꠟꠣ ꠔꠥꠝꠣꠞꠦ ꠇꠁꠍꠦ ꠅꠃꠟꠣ ꠇꠞꠅ, ꠇꠣꠞꠘ ꠔꠥꠝꠣꠞ ꠙꠥꠀ ꠁꠍꠢꠣꠇꠞ ꠈꠣꠘ꠆ꠖꠣꠘꠞꠦꠃ ꠔꠥꠝꠣꠞ ꠈꠣꠘ꠆ꠖꠣꠘ ꠇꠁꠀ ꠉꠘꠣ ꠅꠁꠛ। 13 ꠀꠞ ꠁ ꠛꠣꠘ꠆ꠖꠤꠞ ꠔꠞꠚꠣ ꠙꠥꠀ ꠕꠣꠇꠤꠅ ꠀꠝꠤ ꠄꠇꠐꠣ ꠎꠣꠔꠤ ꠔꠂꠀꠞ ꠇꠞꠝꠥ, ꠇꠣꠞꠘ ꠢꠦ-ꠅ ꠔ ꠔꠥꠝꠣꠞ ꠀꠅꠟꠣꠖ।” 14 ꠅꠃ ꠁꠛ꠆ꠞꠣꠢꠤꠝꠦ ꠀꠉꠥꠀꠘ ꠃꠑꠤꠀ ꠇꠤꠍꠥ ꠞꠥꠐꠤ ꠀꠞ ꠙꠣꠘꠤ ꠜꠞꠣ ꠄꠇꠐꠣ ꠌꠣꠝꠠꠣꠞ ꠕꠟꠤ ꠢꠣꠎꠣꠁꠀ ꠢꠣꠎꠦꠞꠣꠞ ꠇꠣꠘ꠆ꠖꠅ ꠔꠥꠟꠤꠀ ꠖꠤꠀ, ꠙꠥꠀꠉꠥꠞꠦ ꠔꠣꠁꠞ ꠀꠔꠅ ꠡꠙꠤꠀ ꠛꠤꠖꠣꠄ ꠇꠞꠟꠣ। ꠢꠤꠘ ꠕꠘꠦ ꠛꠣꠞ ꠅꠁꠀ ꠢꠣꠎꠦꠞꠣꠄ ꠛꠦꠞ-ꠡꠦꠛꠣꠞ ꠝꠞꠥꠜꠥꠝꠤꠞ ꠝꠣꠎꠦ ꠌꠇ꠆ꠇꠞ ꠖꠤꠔꠣ ꠟꠣꠉꠟꠣ।

15 ꠕꠟꠤꠞ ꠙꠣꠘꠤ ꠡꠦꠡ ꠅꠁꠉꠦꠟꠦ ꠔꠣꠁꠘ ꠙꠥꠀꠞꠦ ꠄꠇꠐꠣ ꠎꠋꠟꠣꠞ ꠔꠟꠦ ꠢꠥꠔꠣꠁꠀ ꠕꠁꠟꠣ। 16 ꠀꠞ ꠄꠇ ꠒꠣꠇꠞ ꠙꠞꠤꠝꠣꠘ ꠖꠥꠞꠁ ꠉꠤꠀ ꠔꠣꠁꠘ ꠛꠁꠞꠁꠟꠣ। “ꠙꠥꠀꠞ ꠝꠃꠔ ꠎꠣꠔꠦ ꠀꠝꠣꠞ ꠌꠃꠈꠦ ꠘꠣ ꠖꠦꠈꠤ,” ꠝꠘꠦ ꠝꠘꠦ ꠇꠁꠀ, ꠔꠣꠁꠘ ꠢꠘꠅ ꠛꠁꠀꠃ ꠌꠤꠟ꠆ꠟꠣꠁꠀ ꠇꠣꠘ꠆ꠖꠤꠟꠣ। 17 ꠙꠥꠀꠉꠥꠞ ꠇꠣꠘ꠆ꠖꠘ ꠀꠟ꠆ꠟꠣꠄ ꠢꠥꠘꠟꠣ, ꠀꠞ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠄ ꠀꠍꠝꠣꠘ ꠕꠘꠦ ꠒꠣꠇꠤꠀ ꠢꠣꠎꠦꠞꠣꠞꠦ ꠇꠁꠟꠣ, “ꠢꠣꠎꠦꠞꠣ, ꠅ ꠢꠣꠎꠦꠞꠣ, ꠔꠥꠝꠣꠞ ꠇꠤꠔꠣ ꠅꠁꠍꠦ? ꠒꠞꠣꠁꠅ ꠘꠣ, ꠙꠥꠀꠉꠥ ꠎꠦꠘꠅ ꠀꠍꠦ, ꠢꠘ ꠕꠣꠇꠤꠃ ꠔꠣꠞ ꠇꠣꠘ꠆ꠖꠘ ꠀꠟ꠆ꠟꠣꠄ ꠢꠥꠘꠍꠂꠘ। 18 ꠔꠥꠝꠤ ꠃꠑꠤꠀ ꠙꠥꠀꠉꠥꠞ ꠀꠔꠅ ꠗꠞꠅ, ꠀꠝꠤ ꠔꠣꠞꠦꠖꠤ ꠄꠇ ꠛꠤꠞꠣꠐ ꠎꠣꠔꠤ ꠙꠄꠖꠣ ꠇꠞꠝꠥ।” 19 ꠅꠃ ꠀꠟ꠆ꠟꠣꠄ ꠢꠣꠎꠦꠞꠣꠞ ꠌꠃꠈ ꠈꠥꠟꠤꠀ ꠖꠤꠟꠣ, ꠀꠞ ꠔꠣꠁꠘ ꠄꠇ ꠇꠥꠀ ꠖꠦꠈꠟꠣ। ꠢꠤ ꠇꠥꠀ ꠕꠘꠦ ꠌꠣꠝꠠꠣꠞ ꠕꠟꠤꠔ ꠙꠣꠘꠤ ꠜꠞꠤ ꠀꠘꠤꠀ ꠙꠥꠀꠞꠦ ꠈꠣꠅꠀꠁꠟꠣ।

20 ꠀꠟ꠆ꠟꠣꠄ ꠢꠃ ꠙꠥꠀꠞꠦ ꠢꠦꠚꠣꠎꠔ ꠇꠞꠟꠣ। ꠢꠦ ꠛꠠ ꠅꠁꠟ, ꠀꠞ ꠝꠞꠥꠜꠥꠝꠤꠔ ꠕꠣꠇꠤꠀ ꠔꠤꠞ-ꠗꠘꠥꠇ ꠌꠣꠟꠣꠘꠤꠞ ꠃꠡ꠆ꠔꠣꠖ ꠅꠁꠟ। 21 ꠢꠦ ꠚꠣꠞꠣꠘ ꠝꠞꠥꠜꠥꠝꠤꠔ ꠕꠣꠇꠔ। ꠔꠣꠞ ꠝꠣʼꠄ ꠝꠤꠡꠞꠞ ꠄꠇ ꠙꠥꠠꠤꠞꠦ ꠀꠘꠤꠀ ꠔꠣꠞꠦ ꠛꠤꠀ ꠇꠞꠣꠁꠟꠣ।

22 ꠢꠃ ꠡꠝꠄ ꠀꠛꠤꠝꠣꠟꠤꠇ ꠀꠞ ꠔꠣꠘ ꠡꠦꠘꠣꠙꠔꠤ ꠚꠤꠈꠥꠟꠦ ꠁꠛ꠆ꠞꠣꠢꠤꠝꠞꠦ ꠇꠁꠟꠣ, “ꠀꠙꠘꠦ ꠎꠦꠔꠣꠃ ꠇꠞꠂꠘ, ꠅꠔꠣꠔꠃ ꠀꠟ꠆ꠟꠣꠄ ꠀꠙꠘꠣꠞ ꠟꠉꠦ ꠕꠣꠇꠂꠘ। 23 ꠄꠞꠟꠣꠉꠤ ꠀꠟ꠆ꠟꠣꠞ ꠘꠣꠝꠦ ꠀꠙꠘꠦ ꠅꠈꠘ ꠅꠘꠅ ꠀꠝꠣꠞ ꠉꠦꠍꠦ ꠇꠍꠝ ꠇꠞꠃꠇ꠆ꠇꠣ, ꠀꠝꠣꠞ ꠛꠣ ꠀꠝꠣꠞ ꠀꠅꠟꠣꠖ ꠅꠇꠟꠞ ꠟꠉꠦ, ꠀꠙꠘꠦ ꠇꠥꠘꠥ ꠛꠦꠁꠝꠣꠘꠤ ꠇꠞꠔꠣ ꠘꠣꠄ। ꠀꠞ ꠀꠝꠤ ꠎꠦꠟꠣ ꠀꠙꠘꠣꠞꠦ ꠖꠄꠀ ꠖꠦꠈꠣꠁꠍꠤ, ꠀꠙꠘꠦꠅ ꠀꠝꠣꠞ ꠟꠉꠦ ꠀꠞ ꠀꠙꠘꠣꠞ ꠝꠥꠍꠣꠚꠤꠞꠤꠞ ꠎꠣꠉꠣ, ꠁ ꠖꠦꠡꠞ ꠟꠉꠦ ꠅꠃꠟꠣ ꠖꠄꠀꠞ ꠘꠎꠞ ꠞꠣꠈꠛꠣ।” 24 ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠎꠤꠅꠄ, ꠇꠍꠝ ꠇꠞꠟꠣꠝ।”

25 ꠀꠞ ꠀꠛꠤꠝꠣꠟꠤꠇꠞ ꠉꠥꠟꠣꠝ ꠅꠇꠟꠦ ꠄꠇꠐꠣ ꠙꠣꠘꠤꠞ ꠇꠥꠀ ꠎꠥꠞꠦ ꠘꠤꠍꠤꠟꠉꠤ ꠇꠞꠤ, ꠔꠣꠁꠘ ꠘꠣꠟꠤꠡ ꠖꠤꠟꠣ। 26 ꠀꠛꠤꠝꠣꠟꠤꠇꠦ ꠎꠥꠀꠙ ꠖꠤꠟꠣ, “ꠁꠔꠣ ꠇꠣꠝ ꠇꠦ ꠇꠞꠍꠦ ꠀꠝꠤ ꠔ ꠎꠣꠘꠤ ꠘꠣ। ꠀꠙꠘꠦꠅ ꠀꠝꠣꠞꠦ ꠁꠔꠣ ꠇꠁꠍꠂꠘ ꠘꠣ, ꠀꠁꠎꠃ ꠀꠝꠤ ꠁꠇꠐꠣ ꠢꠥꠘꠟꠣꠝ।” 27 ꠛꠣꠖꠦ ꠁꠛ꠆ꠞꠣꠢꠤꠝꠦ ꠇꠤꠍꠥ ꠝꠦꠠꠣ ꠀꠞ ꠉꠞꠥ ꠀꠘꠤꠀ ꠀꠛꠤꠝꠣꠟꠤꠇꠞꠦ ꠖꠤꠟꠣ ꠀꠞ ꠖꠥꠁꠅꠎꠘꠦ ꠌꠥꠇ꠆ꠔꠤ ꠇꠞꠟꠣ। 28 ꠀꠞ ꠁꠛ꠆ꠞꠣꠢꠤꠝꠦ ꠙꠣꠟ ꠕꠘꠦ ꠡꠣꠔꠉꠥ ꠝꠦꠠꠤ-ꠛꠣꠁꠌ꠆ꠌꠣ ꠀꠟꠉꠣꠁꠟꠣ। 29 ꠀꠛꠤꠝꠣꠟꠤꠇꠦ ꠔꠣꠘꠦ ꠎꠤꠇꠣꠁꠟꠣ, “ꠁ ꠝꠦꠠꠤ-ꠛꠣꠁꠌ꠆ꠌꠣ ꠡꠣꠔꠉꠥ ꠀꠟꠉꠣ ꠇꠞꠣꠞ ꠝꠣꠘꠤ ꠇꠤꠔꠣ?” 30 ꠁꠛ꠆ꠞꠣꠢꠤꠝꠦ ꠇꠁꠟꠣ, “ꠀꠙꠘꠦ ꠅꠉꠥꠁꠘ꠆ꠔꠞꠦ ꠘꠦꠃꠇ꠆ꠇꠣ। ꠁ ꠇꠥꠀꠐꠣ ꠎꠦ ꠀꠝꠤ ꠈꠥꠖꠍꠤ ꠁꠇꠐꠣ ꠅꠁꠟ ꠔꠣꠞ ꠙꠞꠝꠣꠘ।” 31 ꠄꠞꠟꠣꠉꠤ ꠅꠃ ꠎꠣꠉꠣꠞ ꠘꠣꠝ ꠅꠁꠟ ꠛꠦꠞ-ꠡꠦꠛꠣ [ꠝꠣꠘꠤ, ꠇꠍꠝꠞ ꠇꠥꠀ], ꠅꠘꠅꠃ ꠔꠣꠞꠣ ꠖꠥꠁꠅ ꠎꠘꠦ ꠇꠍꠝ ꠇꠞꠍꠟꠣ। 32 ꠔꠣꠞꠣ ꠛꠦꠞ-ꠡꠦꠛꠣꠔ ꠅꠃ ꠌꠥꠇ꠆ꠔꠤ ꠇꠞꠣꠞ ꠛꠣꠖꠦ, ꠀꠛꠤꠝꠣꠟꠤꠇ ꠀꠞ ꠔꠣꠘ ꠡꠦꠘꠣꠙꠔꠤ ꠚꠤꠈꠥꠟ ꠃꠑꠤꠀ ꠚꠤꠟꠤꠡ꠆ꠔꠤꠘꠤ ꠅꠇꠟꠞ ꠖꠦꠡꠅ ꠚꠤꠞꠤꠀ ꠉꠦꠟꠣꠉꠤ। 33 ꠛꠣꠖꠦ ꠁꠛ꠆ꠞꠣꠢꠤꠝꠦ ꠛꠦꠞ-ꠡꠦꠛꠣꠔ ꠄꠇꠐꠣ ꠏꠣꠃ ꠉꠣꠍ ꠞꠥꠁꠟꠣ, ꠀꠞ ꠎꠦ ꠝꠣꠛꠥꠖꠞ ꠡꠥꠞꠥꠅ ꠘꠣꠄ ꠡꠦꠡꠅ ꠘꠣꠄ, ꠔꠣꠘ ꠄꠛꠣꠖꠔ ꠇꠞꠟꠣ। 34 ꠀꠞ ꠁꠛ꠆ꠞꠣꠢꠤꠝꠦ ꠚꠤꠟꠤꠡ꠆ꠔꠤꠘꠤ ꠅꠇꠟꠞ ꠖꠦꠡꠅ ꠛꠃꠔ ꠖꠤꠘ ꠇꠣꠐꠣꠁꠟꠣ।