1 ꠁ ꠊꠐꠘꠣꠞ ꠛꠣꠖꠦ ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞ ꠄꠇ ꠙꠞꠤꠇ꠆ꠇꠣ ꠟꠁꠟꠣ। ꠀꠟ꠆ꠟꠣꠄ ꠔꠣꠘꠞꠦ ꠒꠣꠇ ꠖꠤꠟꠣ, “ꠁꠛ꠆ꠞꠣꠢꠤꠝ!” ꠔꠣꠁꠘ ꠎꠥꠀꠙ ꠖꠤꠟꠣ, “ꠅꠃꠘꠥ ꠀꠝꠤ।” 2 ꠝꠣꠛꠥꠖꠦ ꠚꠞꠝꠣꠁꠟꠣ, “ꠔꠥꠝꠣꠞ ꠙꠥꠀꠞꠦ, ꠎꠣꠞꠦ ꠔꠥꠝꠤ ꠅꠔ ꠝꠢꠛ꠆ꠛꠔ ꠇꠞꠅ, ꠢꠃ ꠈꠣꠍ ꠝꠣꠄꠀꠞ ꠙꠥꠔ ꠁꠍꠢꠣꠇꠞꠦ ꠟꠁꠀ ꠔꠥꠝꠤ ꠝꠥꠞꠤꠀ ꠄꠟꠣꠇꠣꠔ ꠎꠣꠅ। ꠢꠈꠣꠘꠅ ꠎꠦ ꠙꠣꠠꠞ ꠇꠕꠣ ꠀꠝꠤ ꠔꠥꠝꠣꠞꠦ ꠇꠁꠝꠥ, ꠄꠞ ꠃꠙꠞꠦ ꠔꠣꠞꠦ ꠘꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠦꠅ।” 3 ꠔꠦꠃ ꠁꠛ꠆ꠞꠣꠢꠤꠝꠦ ꠚꠎꠞꠦ ꠃꠑꠤꠀ ꠉꠣꠗꠣꠞ ꠙꠤꠑꠤꠔ ꠉꠖ꠆ꠖꠤ ꠟꠣꠉꠣꠁꠀ ꠔꠣꠘ ꠙꠥꠀ ꠁꠍꠢꠣꠇ, ꠖꠥꠁꠎꠘ ꠉꠥꠟꠣꠝ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠟꠣꠇꠠꠤ ꠇꠣꠐꠤꠀ ꠟꠁꠀ, ꠎꠦ ꠎꠣꠉꠣꠞ ꠇꠕꠣ ꠀꠟ꠆ꠟꠣꠄ ꠔꠣꠘꠞꠦ ꠇꠁꠍꠟꠣ, ꠢꠛꠣꠄꠖꠤ ꠞꠅꠀꠘꠣ ꠅꠁꠟꠣ। 4 ꠔꠤꠘ ꠖꠤꠘꠞ ꠖꠤꠘ ꠁꠛ꠆ꠞꠣꠢꠤꠝꠦ ꠌꠃꠈ ꠔꠥꠟꠤꠀ ꠌꠣꠁꠔꠦꠃ ꠖꠥꠞꠁ ꠕꠣꠇꠤ ꠢꠃ ꠎꠣꠉꠣꠈꠣꠘ ꠖꠦꠈꠟꠣ। 5 ꠅꠃ ꠔꠣꠘ ꠉꠥꠟꠣꠝ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣ ꠉꠣꠗꠣꠐꠣ ꠟꠁꠀ ꠅꠘꠅ ꠃꠛꠣꠅ, ꠀꠝꠤ ꠀꠞ ꠀꠝꠣꠞ ꠙꠥꠀ ꠢꠘꠅ ꠉꠤꠀ ꠄꠛꠣꠖꠔꠤ ꠡꠦꠡ ꠇꠞꠤꠀ ꠢꠣꠞꠟꠦ ꠔꠥꠝꠞꠣꠞ ꠉꠦꠍꠦ ꠀꠁꠝꠥ।” 6 ꠁꠛ꠆ꠞꠣꠢꠤꠝꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠇꠠꠤꠞ ꠀꠐꠣ ꠔꠣꠘ ꠙꠥꠀ ꠁꠍꠢꠣꠇꠞ ꠇꠣꠘ꠆ꠖꠅ ꠔꠥꠟꠤꠀ ꠖꠤꠀ ꠘꠤꠎꠦ ꠀꠉꠥꠁꠘꠞ ꠙꠣꠔꠤꠟ ꠀꠞ ꠍꠥꠞꠤ ꠟꠁꠀ, ꠖꠥꠁꠅ ꠎꠘꠦ ꠍꠣꠝꠘꠞ ꠛꠣꠄ ꠀꠉꠥꠀꠁꠟꠣ। 7 ꠅꠃ ꠁꠍꠢꠣꠇꠦ ꠔꠣꠘ ꠛꠣꠚꠞꠦ ꠇꠁꠟꠣ, “ꠛꠣꠛꠣ।” ꠔꠣꠁꠘ ꠇꠁꠟꠣ, “ꠇꠤꠔꠣꠞꠦ ꠛꠣꠚ ꠇꠅ?” ꠁꠍꠢꠣꠇꠦ ꠇꠁꠟꠣ, “ꠁꠘꠅ ꠔ ꠟꠣꠇꠠꠤ ꠀꠞ ꠀꠉꠥꠁꠘ ꠀꠍꠦ, ꠔꠦ ꠇꠥꠞꠛꠣꠘꠤꠞ ꠝꠦꠠꠣ-ꠛꠣꠁꠌ꠆ꠌꠣ ꠇꠥꠀꠁ?” 8 ꠔꠣꠁꠘ ꠎꠥꠀꠙ ꠖꠤꠟꠣ, “ꠛꠣꠛꠣꠞꠦ, ꠇꠥꠞꠛꠣꠘꠤꠞ ꠟꠣꠉꠤ ꠀꠟ꠆ꠟꠣꠄ ꠘꠤꠎꠦꠃ ꠝꠦꠠꠣ-ꠛꠣꠁꠌ꠆ꠌꠣ ꠎꠥꠉꠣꠁꠛꠣ।” ꠅꠔꠣ ꠝꠣꠔꠔꠦ ꠝꠣꠔꠔꠦ ꠔꠣꠞꠣ ꠀꠉꠥꠀꠁ ꠉꠦꠟꠣ।

9 ꠀꠟ꠆ꠟꠣꠞ ꠙꠍꠘ꠆ꠖꠞ ꠎꠣꠉꠣꠔ ꠙꠃꠍꠤꠀ ꠁꠛ꠆ꠞꠣꠢꠤꠝꠦ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ, ꠟꠣꠇꠠꠤ ꠢꠣꠎꠣꠁꠟꠣ। ꠛꠣꠖꠦ ꠘꠤꠎꠞ ꠙꠥꠀ ꠁꠍꠢꠣꠇꠞꠦ ꠛꠣꠘ꠆ꠖꠤꠀ ꠅꠃ ꠖꠣꠞꠥꠞ ꠃꠙꠞꠦ ꠢꠥꠔꠣꠁꠟꠣ। 10 ꠀꠞ ꠔꠣꠁꠘ ꠘꠤꠎꠞ ꠙꠥꠀꠞꠦ ꠇꠥꠞꠛꠣꠘꠤꠞ ꠟꠣꠉꠤ ꠍꠥꠞꠤ ꠀꠔꠅ ꠟꠁꠟꠣ। 11 ꠅꠃ ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠀꠍꠝꠣꠘ ꠕꠘꠦ ꠔꠣꠘꠦ ꠒꠣꠇ ꠖꠤꠟꠣ, “ꠁꠛ꠆ꠞꠣꠢꠤꠝ! ꠅ ꠁꠛ꠆ꠞꠣꠢꠤꠝ!” ꠔꠣꠁꠘ ꠇꠁꠟꠣ, “ꠅꠃꠘꠥ ꠀꠝꠤ।” 12 ꠚꠤꠞꠤꠡ꠆ꠔꠣꠄ ꠇꠁꠟꠣ, “ꠙꠥꠀꠉꠥꠞ ꠛꠣꠄ ꠔꠥꠝꠣꠞ ꠀꠔ ꠔꠥꠟꠤꠅ ꠘꠣ, ꠔꠣꠞꠦ ꠀꠞ ꠇꠥꠘ꠆ꠔꠣꠃ ꠇꠞꠤꠅ ꠘꠣ। ꠔꠥꠝꠤ ꠎꠦꠘ ꠀꠟ꠆ꠟꠣꠞꠦ ꠒꠞꠣꠅ ꠁꠔꠣ ꠛꠥꠎꠣ ꠉꠦꠍꠦ, ꠇꠣꠞꠘ ꠀꠝꠣꠞꠦ ꠔꠥꠝꠣꠞ ꠙꠥꠀ, ꠔꠥꠝꠣꠞ ꠈꠣꠍ ꠝꠣꠄꠀꠞ ꠙꠥꠀ ꠖꠣꠘ ꠇꠞꠔꠦꠅ ꠘꠣ-ꠈꠥꠡ ꠅꠁꠍ ꠘꠣ।” 13 ꠁꠛ꠆ꠞꠣꠢꠤꠝꠦ ꠌꠃꠈ ꠔꠥꠟꠤ ꠌꠣꠁꠀ ꠖꠦꠈꠂꠘ, ꠔꠣꠘ ꠈꠞꠦ ꠄꠇꠐꠣ ꠖꠥꠝ꠆ꠛꠣ ꠀꠞ ꠔꠣꠞ ꠢꠤꠋ ꠎꠋꠉꠟꠞ ꠝꠣꠎꠦ ꠀꠐꠇꠤ ꠞꠁꠍꠦ। ꠅꠃ ꠔꠣꠁꠘ ꠉꠤꠀ ꠖꠥꠝ꠆ꠛꠣꠐꠣ ꠀꠘꠤꠀ, ꠘꠤꠎꠞ ꠙꠥꠀꠞ ꠛꠖꠟꠣ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠟꠣ। 14 ꠔꠣꠁꠘ ꠢꠤ ꠎꠣꠉꠣꠞ ꠘꠣꠝ ꠞꠣꠈꠟꠣ ꠁꠀꠅꠄꠢ-ꠎꠤꠞꠤꠢ [ꠝꠣꠘꠤ, ꠝꠣꠛꠥꠖꠦ ꠎꠥꠉꠣꠁꠘ]। ꠄꠞꠟꠣꠉꠤ ꠅꠈꠘꠅ ꠝꠣꠘꠡꠦ ꠇꠂꠘ, “ꠝꠣꠛꠥꠖꠞ ꠙꠣꠠꠅ ꠎꠥꠉꠣꠁꠟ ꠅꠁꠛ।”

15 ꠝꠣꠛꠥꠖꠞ ꠚꠤꠞꠤꠡ꠆ꠔꠣꠄ ꠀꠍꠝꠣꠘ ꠕꠘꠦ ꠢꠤꠞꠛꠣꠞ ꠁꠛ꠆ꠞꠣꠢꠤꠝꠞꠦ ꠒꠣꠇꠤꠀ ꠇꠁꠟꠣ, 16 “ꠢꠥꠘꠅ, ꠝꠣꠛꠥꠖꠦ ꠇꠁꠞꠣ, ꠔꠥꠝꠤ ꠅꠃꠟꠣ ꠇꠞꠟꠣꠄ, ꠔꠥꠝꠣꠞ ꠙꠥꠀꠞꠦ, ꠔꠥꠝꠣꠞ ꠈꠣꠍ ꠝꠣꠄꠀꠞ ꠙꠥꠀꠞꠦ ꠖꠣꠘ ꠇꠞꠔꠦꠅ ꠘꠣꠞꠣꠎ ꠅꠁꠟꠣꠄ ꠘꠣ। ꠄꠞꠟꠣꠉꠤ ꠀꠝꠤ ꠝꠣꠛꠥꠖꠦ ꠇꠍꠝ ꠇꠞꠤꠀ ꠇꠁꠀꠞ, 17 ꠀꠝꠤ ꠘꠤꠌꠄ ꠔꠥꠝꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠝꠥ, ꠔꠥꠝꠣꠞ ꠛꠋꠡꠞꠦ ꠀꠍꠝꠣꠘꠞ ꠔꠦꠞꠣ ꠀꠞ ꠖꠞꠤꠀꠞ ꠌꠞꠞ ꠛꠣꠟꠥꠞ ꠟꠣꠈꠣꠘ ꠛꠦꠢꠤꠡꠣꠛ ꠇꠞꠝꠥ। ꠔꠥꠝꠣꠞ ꠛꠋꠡꠄ ꠔꠣꠞꠣꠞ ꠖꠥꠡꠝꠘꠞ ꠐꠣꠃꠘ ꠅꠇꠟ ꠖꠈꠟ ꠇꠞꠛꠣ। 18 ꠀꠞ ꠔꠥꠝꠣꠞ ꠛꠋꠡꠞ ꠃꠍꠤꠟ꠆ꠟꠣꠄ ꠖꠥꠘꠤꠀꠞ ꠢꠇꠟ ꠎꠣꠔꠤꠄ ꠛꠞꠇꠔ ꠢꠣꠍꠤꠟ ꠇꠞꠛꠣ। ꠇꠣꠞꠘ ꠔꠥꠝꠤ ꠀꠝꠣꠞ ꠢꠥꠇꠥꠝ ꠝꠣꠘꠍ।” 19 ꠛꠣꠖꠦ ꠁꠛ꠆ꠞꠣꠢꠤꠝꠦ ꠔꠣꠘ ꠉꠥꠟꠣꠝ ꠅꠇꠟꠞ ꠉꠦꠍꠦ ꠚꠤꠞꠤꠀ ꠀꠁꠟꠣ, ꠀꠞ ꠔꠣꠞꠣ ꠄꠇꠟꠉꠦ ꠛꠦꠞ-ꠡꠦꠛꠣ ꠘꠣꠝꠞ ꠎꠣꠉꠣꠔ ꠉꠦꠟꠣ। ꠅꠃ ꠎꠣꠉꠣꠔꠃ ꠔꠣꠁꠘ ꠛꠡꠔꠤ ꠇꠞꠟꠣ।

20 ꠁ ꠊꠐꠘꠣꠞ ꠛꠣꠖꠦ ꠁꠛ꠆ꠞꠣꠢꠤꠝꠦ ꠈꠛꠞ ꠙꠣꠁꠟꠣ, ꠔꠣꠘ ꠜꠣꠁ ꠘꠣꠢꠥꠞꠞ ꠛꠤꠛꠤ ꠝꠤꠟꠇꠣꠞ ꠇꠄꠉꠥ ꠙꠥꠀꠂꠘ ꠅꠁꠍꠂꠘ। 21 ꠄꠞ ꠛꠠ ꠙꠥꠀꠞ ꠘꠣꠝ ꠀꠃꠎ, ꠔꠣꠞ ꠜꠣꠁꠀꠁꠘ꠆ꠔꠞ ꠘꠣꠝ ꠛꠥꠎ, ꠀꠞ ꠅꠞꠣꠝꠞ ꠛꠣꠚ ꠇꠝꠥꠄꠟ, 22 ꠄꠞꠛꠣꠖꠦ ꠇꠦꠍꠖ, ꠢꠡꠅ, ꠙꠤꠟꠖꠡ, ꠎꠤꠖꠟꠚ ꠀꠞ ꠛꠕꠥꠄꠟ। ꠛꠕꠥꠄꠟꠞ ꠙꠥꠠꠤꠞ ꠘꠣꠝ ꠞꠦꠛꠦꠇꠣ। 23 ꠁꠛ꠆ꠞꠣꠢꠤꠝꠞ ꠜꠣꠁ ꠘꠣꠢꠥꠞꠞ ꠛꠤꠛꠤ ꠝꠤꠟꠇꠣꠞ ꠙꠦꠐꠅ ꠕꠣꠇꠤ ꠁ ꠀꠐꠎꠘ ꠙꠥꠀꠞ ꠎꠘꠝ ꠅꠁꠍꠤꠟ। 24 ꠘꠣꠢꠥꠞꠞ ꠄꠇ ꠢꠣꠋꠉꠣꠞ ꠛꠃ ꠀꠍꠤꠟ, ꠔꠣꠁꠞ ꠘꠣꠝ ꠞꠃꠝꠣ। ꠔꠣꠁꠞ ꠙꠦꠐꠅ ꠐꠦꠛꠢ, ꠉꠢꠝ, ꠔꠢꠡ ꠀꠞ ꠝꠣꠈꠣꠞ ꠎꠘꠝ ꠅꠁꠍꠤꠟ।