1 ꠁꠛ꠆ꠞꠣꠢꠤꠝꠞ ꠎꠝꠣꠘꠣꠞ ꠟꠣꠈꠣꠘ ꠁꠚꠤꠞꠣꠅ ꠖꠦꠡꠅ ꠢꠤꠞꠛꠣꠞ ꠄꠇ ꠘꠤꠖꠣꠘ ꠖꠦꠈꠣ ꠖꠤꠟ। ꠔꠦꠃ ꠁꠍꠢꠣꠇ ꠉꠦꠞꠣꠞ ꠐꠣꠃꠘꠅ ꠚꠤꠟꠤꠡ꠆ꠔꠤꠘꠤ ꠅꠇꠟꠞ ꠛꠣꠖꠡꠣ ꠀꠛꠤꠝꠣꠟꠤꠇꠞ ꠉꠦꠍꠦ ꠉꠦꠟꠣꠉꠤ। 2 ꠀꠞ ꠝꠣꠛꠥꠖꠦ ꠁꠍꠢꠣꠇꠞꠦ ꠖꠤꠖꠣꠞ ꠖꠤꠀ ꠇꠁꠟꠣ, “ꠔꠥꠝꠤ ꠝꠤꠡꠞꠅ ꠟꠣꠝꠤꠀ ꠎꠣꠁꠅ ꠘꠣ। ꠀꠝꠤ ꠔꠥꠝꠣꠞꠦ ꠎꠦ ꠖꠦꠡꠞ ꠇꠕꠣ ꠇꠁꠝꠥ, ꠅꠘꠅꠃ ꠕꠣꠇꠤꠅ। 3 ꠅꠃ ꠖꠦꠡꠅ ꠔꠥꠝꠤ ꠝꠥꠍꠣꠚꠤꠞ ꠅꠁꠀ ꠞꠅ। ꠀꠝꠤ ꠔꠥꠝꠣꠞ ꠟꠉꠦ ꠞꠁꠀ, ꠔꠥꠝꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠝꠥ। ꠁ ꠖꠦꠡ ꠅꠇꠟ ꠀꠝꠤ ꠔꠥꠝꠣꠞꠦ ꠀꠞ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠖꠤꠝꠥ। ꠀꠞ ꠔꠥꠝꠣꠞ ꠛꠣꠚ ꠁꠛ꠆ꠞꠣꠢꠤꠝꠞ ꠉꠦꠍꠦ ꠀꠝꠤ ꠎꠦ ꠇꠍꠝ ꠇꠞꠍꠟꠣꠝ, ꠅꠇꠐꠣ ꠙꠥꠞꠣ ꠇꠞꠝꠥ। 4 ꠀꠝꠤ ꠔꠥꠝꠣꠞ ꠅꠀꠞꠤꠡ ꠅꠇꠟꠞꠦ ꠀꠍꠝꠣꠘꠞ ꠔꠦꠞꠣꠞ ꠟꠣꠈꠣꠘ ꠛꠦꠢꠤꠡꠣꠛ ꠇꠞꠝꠥ, ꠅꠃ ꠖꠦꠡ ꠅꠇꠟꠅ ꠔꠣꠞꠣꠞꠦ ꠖꠤꠝꠥ। ꠔꠥꠝꠣꠞ ꠅꠀꠞꠤꠡꠞꠦꠖꠤ, ꠖꠥꠘꠤꠀꠁꠞ ꠢꠇꠟ ꠎꠣꠔꠤꠄ ꠛꠞꠇꠔ ꠙꠣꠁꠛꠣ। 5 ꠁꠛ꠆ꠞꠣꠢꠤꠝꠦ ꠀꠝꠣꠞ ꠝꠣꠔ ꠢꠥꠘꠤꠀ, ꠀꠝꠣꠞ ꠢꠥꠇꠥꠝ, ꠀꠝꠣꠞ ꠀꠁꠘ ꠀꠞ ꠀꠝꠣꠞ ꠡꠞꠤꠅꠔ ꠅꠇꠟ ꠀꠝꠟ ꠇꠞꠍꠦ।”

6 ꠔꠦꠃ ꠁꠍꠢꠣꠇ ꠉꠦꠞꠣꠞ ꠐꠣꠃꠘꠅ ꠞꠁꠟꠣ। 7 ꠀꠞ ꠢꠤꠘꠞ ꠝꠣꠘꠡꠦ ꠔꠣꠘ ꠛꠃꠞ ꠇꠕꠣ ꠎꠤꠇꠣꠁꠟꠦ, ꠔꠣꠁꠘ ꠇꠁꠟꠣ ꠄꠁꠘ ꠀꠝꠣꠞ ꠛꠁꠘ। ꠄꠘꠞꠦ ꠛꠃ ꠇꠁꠔꠦ ꠔꠣꠁꠘ ꠒꠞꠣꠁꠟꠣ, ꠝꠘꠦ ꠇꠞꠟꠣ, ꠞꠦꠛꠦꠇꠣ ꠡꠥꠘ꠆ꠖꠞꠤ ꠇꠞꠤꠀ ꠢꠤꠘꠞ ꠝꠣꠘꠡꠦ ꠞꠦꠛꠦꠇꠣꠞꠦ ꠘꠦꠅꠀꠞ ꠟꠣꠉꠤ ꠔꠣꠘꠞꠦ ꠈꠥꠘ ꠇꠞꠤꠟꠤꠛꠣ। 8 ꠁꠍꠢꠣꠇ ꠛꠃꠔ ꠖꠤꠘ ꠢꠘꠅ ꠞꠅꠀꠞ ꠛꠣꠖꠦ ꠄꠇꠖꠤꠘ ꠚꠤꠟꠤꠡ꠆ꠔꠤꠘꠤ ꠅꠇꠟꠞ ꠛꠣꠖꠡꠣ ꠀꠛꠤꠝꠣꠟꠤꠇꠦ ꠔꠣꠘ ꠈꠤꠠꠇꠤ ꠛꠣꠄꠖꠤ ꠌꠣꠁꠀ ꠖꠦꠈꠟꠣ, ꠁꠍꠢꠣꠇꠦ ꠔꠣꠘ ꠛꠤꠛꠤ ꠞꠦꠛꠦꠇꠣꠞꠦ ꠝꠣꠄꠀ ꠇꠞꠞꠣ। 9 ꠖꠦꠈꠤꠀ ꠔꠣꠁꠘ ꠁꠍꠢꠣꠇꠞꠦ ꠘꠦꠅꠀꠁꠀ ꠇꠁꠟꠣ, “ꠖꠦꠈꠃꠇ꠆ꠇꠣ, ꠞꠦꠛꠦꠇꠣ ꠔ ꠀꠍꠟꠦ ꠀꠙꠘꠣꠞ ꠛꠤꠛꠤ, ꠔꠦ ꠀꠙꠘꠦ ꠇꠦꠘꠦ ꠔꠣꠘꠞꠦ ꠀꠙꠘꠣꠞ ꠛꠁꠘ ꠇꠁꠟꠣ?” ꠁꠍꠢꠣꠇꠦ ꠎꠥꠀꠙ ꠖꠤꠟꠣ, “ꠀꠝꠤ ꠝꠘꠦ ꠇꠞꠍꠟꠣꠝ ꠔꠣꠁꠞ ꠟꠣꠉꠤ ꠀꠝꠣꠞ ꠎꠣꠘ ꠀꠞꠣꠁꠝꠥ।” 10 ꠔꠦꠃ ꠀꠛꠤꠝꠣꠟꠤꠇꠦ ꠇꠁꠟꠣ, “ꠀꠝꠞꠣꠞ ꠟꠉꠦ ꠀꠙꠘꠦ ꠁꠔꠣ ꠇꠤꠔꠣ ꠛꠦꠛꠢꠣꠞ ꠇꠞꠟꠣ? ꠎꠦꠇꠥꠘꠥ ꠝꠣꠘꠡꠦ ꠔ ꠀꠙꠘꠣꠞ ꠛꠤꠛꠤꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠔ ꠌꠣꠁꠟ ꠅꠘꠦ ꠀꠞ ꠀꠙꠘꠦ ꠀꠝꠞꠣꠞꠦ ꠖꠥꠡꠤ ꠛꠣꠘꠣꠁꠟꠣ ꠅꠘꠦ।” 11 ꠛꠣꠖꠦ ꠀꠛꠤꠝꠣꠟꠤꠇꠦ ꠢꠇꠟ ꠝꠣꠘꠡꠞꠦ ꠅꠃ ꠢꠥꠇꠥꠝ ꠎꠣꠞꠤ ꠇꠞꠟꠣ, ꠇꠦꠃ ꠎꠥꠖꠤ ꠁꠍꠢꠣꠇ ꠛꠣ ꠔꠣꠘ ꠛꠤꠛꠤꠞ ꠡꠞꠤꠟꠅ ꠀꠔ ꠖꠦꠄ, ꠔꠣꠞꠦ ꠘꠤꠌꠄ ꠎꠣꠘꠦ ꠝꠣꠞꠣ ꠅꠁꠛ।

12 ꠀꠞ ꠁꠍꠢꠣꠇꠦ ꠢꠤ ꠛꠞꠍ ꠈꠦꠔ ꠇꠞꠤꠀ ꠔꠣꠘ ꠎꠝꠤꠘꠅ ꠞꠥꠀ ꠛꠤꠌ ꠕꠣꠇꠤ ꠄꠇ-ꠡ ꠉꠥꠘ ꠛꠦꠡꠤ ꠚꠡꠟ ꠙꠣꠁꠟꠣ, ꠝꠣꠛꠥꠖꠦ ꠔꠣꠘꠞꠦ ꠅꠃꠟꠣ ꠛꠞꠇꠔ ꠘꠣꠎꠤꠟ ꠇꠞꠟꠣ। 13 ꠔꠣꠘ ꠈꠣꠟꠤ ꠛꠣꠠꠔꠦꠃ ꠟꠣꠉꠟ, ꠀꠡ꠆ꠔꠦ ꠀꠡ꠆ꠔꠦ ꠔꠣꠁꠘ ꠈꠥꠛ ꠝꠣꠟꠖꠣꠞ ꠅꠁꠉꠦꠟꠣ। 14 ꠔꠣꠘ ꠉꠞꠥ-ꠍꠣꠉꠟ ꠀꠞ ꠉꠥꠟꠣꠝ-ꠛꠣꠘ꠆ꠖꠤ ꠅꠃꠟꠣ ꠛꠣꠠꠟ ꠎꠦꠘ, ꠁꠔꠣ ꠖꠦꠈꠤꠀ ꠚꠤꠟꠤꠡ꠆ꠔꠤꠘꠤ ꠅꠇꠟꠦ ꠁꠋꠡꠣꠁꠔꠣ ꠟꠣꠉꠟꠣ। 15 ꠀꠞ ꠔꠣꠘ ꠛꠣꠚ ꠁꠛ꠆ꠞꠣꠢꠤꠝꠞ ꠀꠝꠟꠅ, ꠔꠣꠘ ꠉꠥꠟꠣꠝ ꠅꠇꠟꠦ ꠎꠦ ꠇꠥꠀ ꠅꠇꠟ ꠈꠥꠖꠤꠍꠟꠣ, ꠚꠤꠟꠤꠡ꠆ꠔꠤꠘꠤ ꠅꠇꠟꠦ ꠁꠉꠥꠁꠘ ꠝꠣꠐꠤꠖꠤ ꠜꠞꠤꠀ ꠛꠘ꠆ꠖ ꠇꠞꠤꠟꠣꠁꠍꠟꠣ। 16 ꠛꠣꠖꠦ ꠀꠛꠤꠝꠣꠟꠤꠇꠦ ꠁꠍꠢꠣꠇꠞꠦ ꠇꠁꠟꠣ, “ꠀꠙꠘꠦ ꠀꠝꠞꠣꠞ ꠉꠦꠍ ꠕꠘꠦ ꠎꠣꠃꠇ꠆ꠇꠣꠉꠤ, ꠀꠙꠘꠦ ꠔ ꠀꠝꠞꠣ ꠕꠘꠦ ꠛꠦꠡꠤ ꠡꠇ꠆ꠔꠤꠀꠟꠣ ꠅꠁꠉꠦꠍꠂꠘ।”

17 ꠅꠃ ꠁꠍꠢꠣꠇꠦ ꠢꠘ ꠕꠘꠦ ꠢꠞꠤꠀ ꠉꠤꠀ ꠉꠦꠞꠣꠞ ꠝꠞꠣ ꠉꠣꠋꠉꠞ ꠌꠞꠅ ꠔꠣꠝ꠆ꠛꠥ ꠉꠣꠠꠤꠀ ꠞꠁꠟꠣ। 18 ꠀꠞ ꠔꠣꠘ ꠛꠣꠚ ꠁꠛ꠆ꠞꠣꠢꠤꠝꠞ ꠀꠝꠟꠞ ꠈꠥꠖꠣ ꠇꠥꠀꠁꠘ, ꠔꠣꠁꠘ ꠢꠤꠞꠛꠣꠞ ꠈꠥꠖꠤꠟꠣ, ꠇꠣꠞꠘ ꠁꠛ꠆ꠞꠣꠢꠤꠝꠞ ꠝꠃꠔꠞ ꠛꠣꠖꠦ ꠚꠤꠟꠤꠡ꠆ꠔꠤꠘꠤ ꠅꠇꠟꠦ ꠁꠔꠣ ꠜꠞꠤꠟꠣꠁꠍꠟꠣ। ꠀꠞ ꠔꠣꠘ ꠛꠣꠚꠦ ꠅꠃ ꠇꠥꠀꠁꠘ꠆ꠔꠞ ꠎꠦ ꠘꠣꠝ ꠞꠣꠈꠍꠟꠣ, ꠔꠣꠁꠘꠅ ꠅꠃ ꠘꠣꠝ ꠞꠣꠈꠟꠣ। 19 ꠁꠍꠢꠣꠇꠞ ꠉꠥꠟꠣꠝ ꠅꠇꠟꠦ ꠅꠃ ꠉꠣꠋꠉꠞ ꠌꠞꠅ ꠈꠥꠖꠤꠀ ꠙꠣꠘꠤꠞ ꠚꠥꠔꠀꠟꠣ ꠄꠇ ꠇꠥꠀ ꠙꠣꠁꠟꠣ। 20 ꠀꠞ ꠉꠦꠞꠣꠞꠞ ꠞꠣꠈꠣꠟ ꠅꠇꠟꠦ ꠔꠣꠘ ꠞꠣꠈꠣꠟ ꠅꠇꠟꠞ ꠟꠉꠦ ꠖꠞꠛꠣꠞ ꠇꠞꠤꠀ ꠇꠁꠟ, ꠁ ꠙꠣꠘꠤ ꠀꠝꠞꠣꠞ। ꠅꠃ ꠔꠣꠁꠘ ꠁ ꠇꠥꠀꠞ ꠘꠣꠝ ꠞꠣꠈꠟꠣ ꠄꠡꠇ [ꠝꠣꠘꠤ, ꠖꠞꠛꠣꠞ]। 21 ꠛꠣꠖꠦ ꠁꠍꠢꠣꠇꠞ ꠞꠣꠈꠣꠟ ꠅꠇꠟꠦ ꠀꠞꠅ ꠄꠇ ꠇꠥꠀ ꠈꠥꠖꠤꠟꠣ, ꠀꠞ ꠁꠐꠣ ꠟꠁꠀꠅ ꠔꠣꠞꠣ ꠖꠞꠛꠣꠞ ꠇꠞꠟꠣ। ꠅꠃ ꠔꠣꠁꠘ ꠁꠐꠣꠞ ꠘꠣꠝ ꠞꠣꠈꠟꠣ ꠡꠤꠐꠘꠣ [ꠝꠣꠘꠤ, ꠖꠥꠡꠝꠘꠤ]। 22 ꠢꠦꠡꠦ ꠔꠣꠁꠘ ꠢꠘ ꠕꠘꠦ ꠢꠞꠤꠀ ꠉꠤꠀ ꠀꠞꠅ ꠄꠇ ꠇꠥꠀ ꠈꠥꠖꠣꠁꠟꠣ, ꠁꠚꠤꠞꠣ ꠔꠣꠞꠣ ꠀꠞ ꠇꠥꠘꠥ ꠖꠞꠛꠣꠞ ꠇꠞꠟꠣ ꠘꠣ। ꠔꠦꠃ ꠁꠍꠢꠣꠇꠦ ꠅꠃ ꠇꠥꠀꠞ ꠘꠣꠝ ꠞꠣꠈꠟꠣ ꠞꠢꠛꠔ [ꠝꠣꠘꠤ, ꠛꠃꠔ ꠎꠣꠉꠣ]। ꠔꠣꠁꠘ ꠇꠁꠟꠣ, “ꠅꠈꠘ ꠝꠣꠛꠥꠖꠦꠃ ꠀꠝꠞꠣꠞꠦ ꠛꠃꠔ ꠎꠣꠉꠣ ꠖꠤꠟꠣ, ꠀꠝꠞꠣ ꠁ ꠖꠦꠡꠅ ꠀꠞꠅ ꠛꠣꠠꠔꠣꠝ ꠙꠣꠞꠝꠥ।”

23 ꠛꠣꠖꠦ ꠁꠍꠢꠣꠇꠦ ꠢꠘ ꠕꠘꠦ ꠢꠞꠤꠀ ꠛꠦꠞ-ꠡꠦꠛꠣꠔ ꠉꠦꠟꠣꠉꠤ। 24 ꠢꠃ ꠞꠣꠁꠔꠃ ꠝꠣꠛꠥꠖꠦ ꠔꠣꠘꠞꠦ ꠖꠤꠖꠣꠞ ꠖꠤꠀ ꠇꠁꠟꠣ, “ꠀꠝꠤ ꠔꠥꠝꠣꠞ ꠛꠣꠚ ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ। ꠔꠥꠝꠤ ꠒꠞꠣꠁꠅ ꠘꠣ, ꠀꠝꠣꠞ ꠉꠥꠟꠣꠝ ꠁꠛ꠆ꠞꠣꠢꠤꠝꠞ ꠈꠣꠔꠤꠞꠦ ꠀꠝꠤ ꠔꠥꠝꠣꠞ ꠟꠉꠦ ꠀꠍꠤ। ꠀꠝꠤ ꠔꠥꠝꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠝꠥ ꠀꠞ ꠔꠥꠝꠣꠞ ꠛꠋꠡ ꠛꠣꠠꠣꠁꠝꠥ।” 25 ꠅꠃ ꠁꠍꠢꠣꠇꠦ ꠢꠘꠅ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ ꠝꠣꠛꠥꠖꠞ ꠘꠣꠝ ꠟꠁꠟꠣ। ꠢꠘꠅ ꠔꠣꠁꠘ ꠔꠣꠘ ꠔꠣꠝ꠆ꠛꠥ ꠉꠣꠠꠤꠟꠣ ꠀꠞ ꠔꠣꠘ ꠉꠥꠟꠣꠝ ꠅꠇꠟꠦ ꠄꠇ ꠇꠥꠀ ꠈꠥꠖꠤꠟꠣ।

26 ꠛꠣꠖꠦ ꠀꠛꠤꠝꠣꠟꠤꠇꠦ ꠔꠣꠘ ꠃꠎꠤꠞ ꠅꠢꠥꠎꠔ ꠀꠞ ꠡꠦꠘꠣꠙꠔꠤ ꠚꠤꠈꠥꠟꠞꠦ ꠟꠁꠀ ꠉꠦꠞꠣꠞ ꠕꠣꠇꠤ ꠁꠍꠢꠣꠇꠞ ꠉꠦꠍꠦ ꠀꠁꠟꠣ। 27 ꠁꠍꠢꠣꠇꠦ ꠄꠞꠣꠞꠦ ꠇꠁꠟꠣ, “ꠀꠙꠘꠣꠞꠣ ꠀꠝꠣꠞ ꠉꠦꠍꠦ ꠇꠤꠔꠣꠞ ꠟꠣꠉꠤ ꠀꠁꠟꠣ? ꠀꠙꠘꠣꠞꠣ ꠔ ꠁꠋꠡꠣ ꠇꠞꠤꠀ ꠀꠝꠣꠞꠦ ꠀꠙꠘꠣꠞꠣꠞ ꠉꠦꠍ ꠕꠘꠦ ꠈꠦꠖꠣꠁ ꠖꠤꠟꠣꠁꠍꠂꠘ।” 28 ꠔꠣꠞꠣ ꠇꠁꠟꠣ, “ꠀꠝꠞꠣ ꠅꠈꠘ ꠍꠣꠚ ꠛꠥꠎꠤꠀꠞ ꠎꠦꠘ, ꠝꠣꠛꠥꠖ ꠀꠙꠘꠣꠞ ꠟꠉꠦ ꠀꠍꠂꠘ। ꠄꠞꠟꠣꠉꠤ ꠀꠙꠘꠣꠞ ꠟꠉꠦ ꠀꠝꠞꠣꠞ ꠄꠉꠥ ꠅꠀꠖꠣ ꠅꠁꠎꠣꠃꠇ। ꠀꠃꠇ꠆ꠇꠣ, ꠀꠝꠞꠣ ꠄꠇ ꠌꠥꠇ꠆ꠔꠤ ꠇꠞꠤꠟꠣꠁ। 29 ꠀꠝꠞꠣ ꠎꠦꠟꠣ ꠀꠙꠘꠣꠞꠦ ꠍꠁꠍꠤ ꠘꠣ ꠀꠞ ꠀꠙꠘꠣꠞ ꠜꠣꠟꠣꠁ ꠍꠣꠠꠣ ꠇꠥꠘꠥ ꠈꠦꠔꠤ ꠇꠞꠍꠤ ꠘꠣ, ꠎꠦꠟꠣ ꠀꠙꠘꠣꠞꠦ ꠡꠣꠘ꠆ꠔꠤꠄ ꠛꠤꠖꠣꠄ ꠖꠤꠍꠤ, ꠅꠃꠟꠣ ꠀꠙꠘꠦꠅ ꠀꠝꠞꠣꠞꠦ ꠈꠦꠔꠤ ꠇꠞꠔꠣ ꠘꠣ। ꠀꠙꠘꠦꠃ ꠔ ꠝꠣꠛꠥꠖꠞ ꠛꠞꠇꠔꠞ ꠝꠣꠘꠥꠡ।” 30 ꠛꠣꠖꠦ ꠁꠍꠢꠣꠇꠦ ꠔꠣꠞꠣꠞ ꠟꠣꠉꠤ ꠈꠣꠘꠣ-ꠖꠣꠘꠣ ꠎꠥꠁꠔ ꠇꠞꠟꠦ, ꠔꠣꠞꠣ ꠈꠣꠘꠣ-ꠖꠣꠘꠣ ꠇꠞꠟꠣ। 31 ꠛꠣꠖꠞ ꠖꠤꠘ ꠛꠤꠀꠘꠦ ꠃꠑꠤꠀ ꠔꠣꠞꠣ ꠖꠥꠁꠅꠎꠘꠦ ꠇꠍꠝ ꠇꠞꠟꠣ। ꠀꠞ ꠁꠍꠢꠣꠇꠦ ꠔꠣꠞꠣꠞꠦ ꠛꠤꠖꠣꠄ ꠖꠤꠟꠦ, ꠔꠣꠞꠣ ꠖꠤꠟꠞ ꠝꠣꠎꠦ ꠡꠣꠘ꠆ꠔꠤ ꠙꠣꠁꠀ ꠞꠅꠀꠘꠣ ꠅꠁꠟꠣ। 32 ꠢꠃ ꠖꠤꠘꠃ ꠔꠣꠘ ꠉꠥꠟꠣꠝ ꠅꠇꠟꠦ ꠀꠁꠀ ꠔꠣꠞꠣꠞ ꠈꠥꠖꠣ ꠄꠇ ꠇꠥꠀꠞ ꠈꠛꠞ ꠎꠣꠘꠣꠁꠟꠣ, ꠔꠣꠞꠣ ꠙꠣꠘꠤꠞ ꠟꠣꠉꠣꠟ ꠙꠣꠁꠍꠂꠘ। 33 ꠅꠃ ꠔꠣꠁꠘ ꠄꠞ ꠘꠣꠝ ꠖꠤꠟꠣ ꠡꠦꠛꠣ [ꠝꠣꠘꠤ, ꠇꠍꠝ]। ꠄꠞꠟꠣꠉꠤ ꠀꠁꠎꠅ ꠢꠤꠘꠞ ꠘꠣꠝ ꠛꠦꠞ-ꠡꠦꠛꠣ ꠞꠁꠍꠦ।

34 ꠁꠡꠦ ꠌꠣꠟ꠆ꠟꠤꠡ ꠛꠞꠍ ꠛꠄꠅꠡꠅ ꠢꠤꠐ꠆ꠐꠤ ꠛꠦꠞꠤꠞ ꠙꠥꠠꠤ ꠎꠤꠢꠥꠖꠤꠕ ꠀꠞ ꠢꠤꠐ꠆ꠐꠤ ꠄꠟꠘꠞ ꠙꠥꠠꠤ ꠛꠣꠡꠝꠔꠞꠦ ꠡꠣꠖꠤ ꠇꠞꠟꠣ। 35 ꠁ ꠖꠥꠁꠅ ꠛꠦꠐꠤꠄ ꠁꠍꠢꠣꠇ ꠀꠞ ꠞꠦꠛꠦꠇꠣꠞ ꠎꠣꠘꠞ ꠝꠣꠎꠦ ꠈꠥꠛ ꠖꠥꠈ ꠖꠤꠟꠣ।