1 ꠝꠥꠞꠛ꠆ꠛꠤ ꠛꠄꠅꠡꠅ ꠁꠍꠢꠣꠇꠞ ꠌꠃꠈꠞ ꠎꠥꠔꠤ ꠇꠝꠤ ꠎꠣꠅꠀꠄ ꠔꠣꠁꠘ ꠀꠞ ꠌꠃꠈꠦ ꠖꠦꠈꠔꠣ ꠘꠣ। ꠔꠣꠁꠘ ꠔꠣꠘ ꠛꠠ ꠙꠥꠀ ꠁꠡʼꠞꠦ ꠀꠘꠣꠁꠀ ꠇꠁꠟꠣ, “ꠛꠣꠛꠣꠞꠦ।” ꠁꠡꠦ ꠎꠥꠀꠙ ꠖꠤꠟꠣ, “ꠅꠃꠘꠥ ꠀꠝꠤ।” 2 ꠔꠣꠁꠘ ꠇꠁꠟꠣ, “ꠖꠦꠈꠅ, ꠀꠝꠤ ꠔ ꠛꠥꠠꠣ ꠅꠁꠉꠦꠍꠤ, ꠇꠥꠘꠖꠤꠘ ꠝꠞꠤꠎꠤꠝꠥ ꠇꠁꠔꠣꠝ ꠙꠣꠞꠤꠀꠞ ꠘꠣ। 3 ꠔꠥꠝꠤ ꠄꠉꠥ ꠇꠣꠝ ꠇꠞꠅ; ꠔꠥꠝꠣꠞ ꠀꠔꠤꠀꠞ, ꠔꠤꠞ-ꠗꠘꠥꠇ ꠟꠁꠀ ꠎꠋꠉꠟꠅ ꠡꠤꠇꠣꠞꠅ ꠎꠣꠅ, ꠀꠞ ꠀꠝꠣꠞ ꠟꠣꠉꠤ ꠇꠥꠘ꠆ꠔꠣ ꠡꠤꠇꠣꠞ ꠇꠞꠤꠀ, 4 ꠀꠝꠣꠞ ꠙꠍꠘ꠆ꠖꠞ ꠜꠣꠟꠣ ꠈꠣꠘꠤ ꠔꠂꠀꠞ ꠇꠞꠤ ꠀꠘꠅ, ꠔꠦꠃ ꠝꠞꠣꠞ ꠀꠉꠦ ꠁꠔꠣ ꠈꠣꠁꠀ ꠀꠝꠣꠞ ꠎꠣꠘꠦ ꠔꠥꠝꠣꠞꠦ ꠖꠥꠀ ꠖꠤꠛ।”

5 ꠁꠍꠢꠣꠇꠦ ꠎꠦꠛꠟꠣ ꠔꠣꠘ ꠙꠥꠀ ꠁꠡʼꠞ ꠟꠉꠦ ꠁꠔꠣ ꠝꠣꠔꠤꠞꠣ, ꠁ ꠡꠝꠄ ꠞꠦꠛꠦꠇꠣꠄ ꠁꠔꠣ ꠢꠥꠘꠍꠤꠟꠣ। ꠔꠦꠃ ꠁꠡ ꠎꠦꠛꠟꠣ ꠡꠤꠇꠣꠞꠅ ꠉꠦꠟꠣꠉꠤ, 6 ꠔꠣꠁꠘ ꠀꠁꠀ ꠔꠣꠘ ꠙꠥꠀ ꠁꠀꠇꠥꠛꠞꠦ ꠇꠁꠟꠣ, “ꠢꠥꠘꠅ, ꠀꠝꠤ ꠢꠥꠘꠟꠣꠝ ꠔꠥꠝꠣꠞ ꠛꠣꠚꠦ ꠔꠥꠝꠣꠞ ꠜꠣꠁ ꠁꠡʼꠞꠦ ꠇꠁꠞꠣ, 7 ‘ꠔꠥꠝꠤ ꠀꠝꠣꠞ ꠟꠣꠉꠤ ꠇꠥꠘ꠆ꠔꠣ ꠡꠤꠇꠣꠞ ꠇꠞꠤ ꠜꠣꠟꠣ ꠈꠣꠘꠤ ꠔꠂꠀꠞ ꠇꠞꠅ, ꠔꠦꠃ ꠀꠝꠤ ꠝꠞꠣꠞ ꠀꠉꠦ ꠅꠔꠣ ꠈꠣꠁꠀ, ꠝꠣꠛꠥꠖꠞ ꠍꠣꠝꠘꠦ ꠔꠥꠝꠣꠞꠦ ꠖꠥꠀ ꠖꠤꠝꠥ।’ 8 ꠔꠦ ꠞꠦ ꠙꠥꠔ, ꠀꠝꠤ ꠔꠥꠝꠣꠞꠦ ꠅꠈꠘ ꠎꠦꠔꠣ ꠇꠞꠔꠣꠄ ꠇꠁꠝꠥ, ꠔꠥꠝꠤ ꠅꠃꠟꠣ ꠢꠥꠘꠤꠅ। 9 ꠔꠥꠝꠤ ꠉꠤꠀ ꠙꠣꠟ ꠕꠣꠇꠤ ꠖꠥꠁꠐꠣ ꠔꠣꠎꠣ ꠈꠡꠤ ꠀꠘꠅ। ꠀꠝꠤ ꠁꠔꠣꠖꠤ ꠔꠥꠝꠣꠞ ꠛꠣꠚꠞ ꠡꠈꠞ ꠈꠣꠘꠤ, ꠀꠌꠣꠘꠇ ꠝꠎꠣ ꠇꠞꠤ ꠞꠣꠘ꠆ꠖꠤꠀ ꠖꠦꠁ। 10 ꠔꠦꠃ ꠔꠥꠝꠤ ꠅꠔꠣ ꠟꠁꠀ ꠔꠥꠝꠣꠞ ꠛꠣꠚꠞ ꠉꠦꠍꠦ ꠎꠣꠁꠅ, ꠔꠣꠁꠘ ꠁꠔꠣ ꠈꠣꠁꠀ ꠝꠞꠣꠞ ꠀꠉꠦ ꠔꠥꠝꠣꠞꠦ ꠖꠥꠀ ꠇꠞꠛꠣ।” 11 ꠁꠀꠇꠥꠛꠦ ꠔꠣꠘ ꠝꠣʼꠞꠦ ꠇꠁꠟꠣ, “ꠢꠥꠘꠅ, ꠀꠝꠣꠞ ꠜꠣꠁ ꠁꠡʼꠞ ꠡꠞꠤꠟ ꠔ ꠞꠥꠝꠣꠀꠟꠣ, ꠀꠝꠣꠞ ꠡꠞꠤꠟꠅ ꠔ ꠞꠥꠝꠣ ꠘꠣꠄ। 12 ꠎꠥꠖꠤ ꠛꠣꠛꠣꠄ ꠀꠝꠣꠞ ꠡꠞꠤꠟꠅ ꠀꠔꠣꠁꠘ, ꠔꠦ ꠝꠘꠅ ꠇꠞꠛꠣ ꠀꠝꠤ ꠔꠣꠘꠦ ꠗꠥꠇꠣ ꠖꠤꠀꠞ, ꠔꠣꠁꠟꠦ ꠀꠝꠤ ꠖꠥꠀꠞ ꠛꠖꠟꠣ ꠀꠞꠅ ꠟꠣꠘ꠆ꠘꠔ ꠒꠣꠇꠤꠀ ꠀꠘꠝꠥ।” 13 ꠔꠦꠃ ꠔꠣꠘ ꠝꠣʼꠄ ꠇꠁꠟꠣ, “ꠙꠥꠔꠞꠦ, ꠔꠥꠝꠣꠞ ꠁ ꠟꠣꠘ꠆ꠘꠔ ꠀꠝꠣꠞ ꠃꠙꠞꠦꠃ ꠙꠠꠃꠇ। ꠔꠥꠝꠤ ꠈꠣꠟꠤ ꠀꠝꠣꠞ ꠝꠣꠔꠈꠣꠘ ꠢꠥꠘꠅ ꠀꠞ ꠈꠡꠤꠉꠥꠁꠘ ꠀꠘꠤꠀ ꠖꠦꠅ।” 14 ꠅꠃ ꠁꠀꠇꠥꠛꠦ ꠉꠤꠀ ꠈꠡꠤ ꠀꠘꠤꠀ ꠔꠣꠘ ꠝꠣʼꠞꠦ ꠖꠤꠟꠣ। ꠀꠞ ꠔꠣꠘ ꠛꠣꠚꠦ ꠎꠦꠟꠣ ꠡꠈ ꠇꠞꠂꠘ, ꠔꠣꠁꠘ ꠅꠃꠟꠣ ꠝꠎꠣ ꠇꠞꠤ ꠞꠣꠘ꠆ꠖꠤꠟꠣ। 15 ꠛꠣꠖꠦ ꠔꠣꠁꠘ ꠊꠞꠞ ꠝꠣꠎꠦ ꠕꠅꠀ ꠛꠠ ꠙꠥꠀ ꠁꠡʼꠞ ꠜꠣꠟꠣ ꠜꠣꠟꠣ ꠇꠣꠙꠠ-ꠌꠥꠙꠠ ꠀꠘꠤꠀ ꠔꠣꠘ ꠢꠥꠞꠥ ꠙꠥꠀ ꠁꠀꠇꠥꠛꠞꠦ ꠚꠤꠘ꠆ꠖꠣꠁꠟꠣ। 16 ꠁꠀꠇꠥꠛꠞ ꠀꠔꠅ ꠀꠞ ꠉꠟꠣꠔ ꠎꠦ ꠎꠣꠉꠣꠔ ꠞꠥꠝꠣ ꠘꠣꠄ, ꠢꠃ ꠎꠣꠉꠣꠔ ꠅꠃ ꠈꠡꠤꠞ ꠌꠣꠝꠠꠣ ꠟꠣꠉꠣꠁ ꠖꠤꠟꠣ। 17 ꠀꠞ ꠘꠤꠎꠞ ꠞꠣꠘ꠆ꠖꠣ ꠢꠃ ꠝꠎꠣꠞ ꠈꠣꠘꠤ ꠀꠞ ꠞꠥꠐꠤ ꠔꠣꠘ ꠙꠥꠀ ꠁꠀꠇꠥꠛꠞ ꠀꠔꠅ ꠖꠤꠟꠣ।

18 ꠁꠀꠇꠥꠛꠦ ꠔꠣꠘ ꠛꠣꠚꠞ ꠉꠦꠍꠦ ꠉꠤꠀ ꠒꠣꠇ ꠖꠤꠟꠣ, “ꠛꠣꠛꠣ।” ꠁꠍꠢꠣꠇꠦ ꠎꠥꠀꠙ ꠖꠤꠟꠣ, “ꠅꠃꠘꠥ ꠀꠝꠤ, ꠔꠥꠝꠤ ꠇꠦ ꠞꠦ ꠙꠥꠔ?” 19 ꠁꠀꠇꠥꠛꠦ ꠔꠣꠘ ꠛꠣꠚꠞꠦ ꠇꠁꠟꠣ, “ꠀꠝꠤ ꠀꠙꠘꠣꠞ ꠛꠠ ꠙꠥꠀ ꠁꠡ। ꠀꠙꠘꠦ ꠀꠝꠣꠞꠦ ꠎꠦꠟꠣ ꠇꠁꠍꠟꠣ, ꠀꠝꠤ ꠅꠃꠟꠣ ꠇꠞꠍꠤ। ꠖꠄꠀ ꠇꠞꠤ ꠃꠑꠤꠀ ꠛꠃꠇ꠆ꠇꠣ, ꠀꠝꠣꠞ ꠡꠤꠇꠣꠞꠞ ꠉꠥꠡ꠆ꠔ ꠈꠣꠃꠇ꠆ꠇꠣ, ꠈꠣꠁꠀ ꠢꠣꠞꠟꠦ ꠀꠙꠘꠦ ꠀꠝꠣꠞꠦ ꠖꠥꠀ ꠖꠤꠛꠣ।” 20 ꠁꠍꠢꠣꠇꠦ ꠔꠣꠘ ꠙꠥꠀꠞꠦ ꠇꠁꠟꠣ, “ꠛꠣꠛꠣꠞꠦ, ꠔꠥꠝꠤ ꠅꠔ ꠎꠟꠖꠤ ꠡꠤꠇꠣꠞ ꠙꠣꠁꠟꠣꠄ ꠇꠤꠟꠣ?” ꠔꠣꠁꠘ ꠇꠁꠟꠣ, “ꠀꠙꠘꠣꠞ ꠝꠣꠛꠥꠖ ꠀꠟ꠆ꠟꠣꠄ ꠝꠤꠟꠣꠁ ꠖꠤꠍꠂꠘ।” 21 ꠅꠃ ꠁꠍꠢꠣꠇꠦ ꠁꠀꠇꠥꠛꠞꠦ ꠇꠁꠟꠣ, “ꠛꠣꠛꠣ, ꠀꠝꠣꠞ ꠇꠣꠍꠣꠔ ꠀꠅ ꠔꠦꠃ ꠔꠥꠝꠣꠞ ꠉꠔꠞꠅ ꠀꠔ ꠖꠤꠀ ꠛꠥꠎꠝꠥ, ꠔꠥꠝꠤ ꠢꠣꠍꠣꠃ ꠀꠝꠣꠞ ꠙꠥꠀ ꠁꠡ ꠘꠤ।” 22 ꠁꠀꠇꠥꠛ ꠔꠣꠘ ꠛꠣꠚ ꠁꠍꠢꠣꠇꠞ ꠀꠞꠅ ꠇꠣꠍꠣꠔ ꠉꠦꠟꠣ। ꠔꠣꠁꠘ ꠡꠞꠤꠟꠅ ꠀꠔꠣꠁꠀ ꠇꠁꠟꠣ, “ꠉꠟꠣꠞ ꠀꠅꠀꠎꠐꠣ ꠁꠀꠇꠥꠛꠞ, ꠅꠁꠟꠦ ꠀꠔ ꠖꠥꠁꠅꠈꠣꠘ ꠔ ꠁꠡʼꠞ।” 23 ꠁꠀꠇꠥꠛꠞ ꠀꠔ ꠔꠣꠘ ꠜꠣꠁ ꠁꠡʼꠞ ꠝꠔ ꠞꠥꠝꠦ ꠜꠞꠣ ꠀꠍꠤꠟ ꠇꠞꠤ ꠁꠍꠢꠣꠇꠦ ꠔꠣꠘꠞꠦ ꠌꠤꠘꠟꠣ ꠘꠣ। ꠅꠃ ꠔꠣꠁꠘ ꠁꠀꠇꠥꠛꠞꠦ ꠖꠥꠀ ꠖꠤꠟꠣ। 24 ꠔꠣꠁꠘ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠢꠣꠍꠣꠃ ꠀꠝꠣꠞ ꠙꠥꠀ ꠁꠡ ꠘꠤ?” ꠁꠀꠇꠥꠛꠦ ꠇꠁꠟꠣ, “ꠎꠤꠅꠄ ꠛꠣꠛꠣ।” 25 ꠅꠃ ꠁꠍꠢꠣꠇꠦ ꠇꠁꠟꠣ, “ꠙꠥꠀꠞ ꠡꠤꠇꠣꠞꠞ ꠉꠥꠡ꠆ꠔ ꠀꠝꠣꠞ ꠉꠦꠍꠦ ꠀꠘꠅ, ꠁꠔꠣ ꠈꠣꠁꠀ ꠢꠣꠞꠟꠦ ꠀꠝꠣꠞ ꠎꠣꠘꠦ ꠔꠥꠝꠣꠞꠦ ꠖꠥꠀ ꠖꠤꠛ।” ꠁꠀꠇꠥꠛꠦ ꠉꠥꠡ꠆ꠔ ꠟꠁꠀ ꠀꠁꠟꠦ ꠔꠣꠁꠘ ꠈꠣꠁꠟꠣ। ꠛꠣꠖꠦ ꠔꠣꠘꠞꠦ ꠀꠋꠉꠥꠞꠞ ꠡꠞꠛꠔ ꠖꠤꠟꠦ ꠔꠣꠁꠘ ꠄꠅꠔꠣ ꠈꠣꠁꠟꠣ। 26 ꠢꠦꠡꠦ ꠔꠣꠘ ꠛꠣꠚꠦ ꠇꠁꠟꠣ, “ꠅ ꠙꠥꠔ ꠀꠅ, ꠇꠣꠍꠣꠔ ꠀꠁꠀ ꠀꠝꠣꠞꠦ ꠢꠥꠋꠉꠣ ꠖꠦꠅ।” 27 ꠅꠃ ꠁꠀꠇꠥꠛꠦ ꠇꠣꠍꠣꠔ ꠉꠤꠀ ꠢꠥꠋꠉꠣ ꠖꠤꠟꠣ, ꠀꠞ ꠁꠍꠢꠣꠇꠦ ꠔꠣꠘ ꠡꠞꠤꠟꠞ ꠇꠣꠙꠠꠞ ꠊꠦꠞꠣꠘ ꠢꠥꠋꠉꠤꠀ ꠔꠣꠘꠞꠦ ꠖꠥꠀ ꠖꠤꠟꠣ, “ꠖꠦꠈꠅ, ꠀꠝꠣꠞ ꠙꠥꠀꠞ ꠊꠦꠞꠣꠘ ꠔ ꠝꠣꠛꠥꠖꠞ ꠛꠞꠇꠔꠤ ꠈꠦꠔꠞ ꠊꠦꠞꠣꠘꠞ ꠟꠣꠈꠣꠘ। 28 ꠀꠟ꠆ꠟꠣꠄ ꠀꠍꠝꠣꠘꠞ ꠈꠥꠀ ꠕꠘꠦ ꠀꠞ ꠞꠡꠣꠁꠟ ꠎꠝꠤꠘ ꠕꠘꠦ ꠔꠥꠝꠣꠞꠦ ꠖꠦꠃꠇ꠆ꠇꠣ; ꠛꠃꠔ ꠚꠡꠟ ꠀꠞ ꠀꠋꠉꠥꠞꠞ ꠡꠞꠛꠔ ꠔꠥꠝꠣꠞꠦ ꠖꠦꠃꠇ꠆ꠇꠣ। 29 ꠢꠇꠟ ꠝꠣꠘꠥꠡ ꠔꠥꠝꠣꠞ ꠉꠥꠟꠣꠝ ꠅꠃꠇ, ꠢꠇꠟ ꠎꠣꠔꠤꠄ ꠔꠥꠝꠣꠞ ꠉꠦꠍꠦ ꠝꠣꠕꠣ ꠘꠥꠀꠃꠇ। ꠘꠤꠎꠞ ꠎꠣꠔꠞ ꠝꠣꠎꠦ ꠔꠥꠝꠤ ꠛꠠ ꠝꠥꠞꠛ꠆ꠛꠤ ꠅꠅ, ꠔꠥꠝꠣꠞ ꠝꠣʼꠞ ꠙꠦꠐꠞ ꠜꠣꠁꠀꠁꠘ꠆ꠔꠦ ꠔꠥꠝꠣꠞ ꠉꠦꠍꠦ ꠝꠣꠕꠣ ꠘꠥꠀꠃꠇ। ꠎꠦ ꠔꠥꠝꠣꠞꠦ ꠟꠣꠘ꠆ꠘꠔ ꠖꠤꠛ, ꠔꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ। ꠎꠦ ꠔꠥꠝꠣꠞꠦ ꠖꠥꠀ ꠇꠞꠛ, ꠢꠦ ꠞꠢꠝꠔꠤ ꠅꠃꠇ।”

30 ꠁꠍꠢꠣꠇꠦ ꠁꠀꠇꠥꠛꠞꠦ ꠖꠥꠀ ꠇꠞꠣ ꠡꠦꠡ ꠅꠁꠟꠦ, ꠁꠀꠇꠥꠛ ꠔꠣꠘ ꠛꠣꠚ ꠁꠍꠢꠣꠇꠞ ꠍꠣꠝꠘꠦ ꠕꠘꠦ ꠢꠞꠔꠦꠃ, ꠔꠣꠘ ꠜꠣꠁ ꠁꠡꠦ ꠡꠤꠇꠣꠞ ꠟꠁꠀ ꠊꠞꠅ ꠀꠁꠟꠣ। 31 ꠔꠣꠁꠘꠅ ꠜꠣꠟꠣ ꠈꠣꠘꠤ ꠔꠂꠀꠞ ꠇꠞꠤꠀ ꠛꠣꠚꠞ ꠉꠦꠍꠦ ꠟꠁꠀ ꠀꠁꠀ ꠇꠁꠟꠣ, “ꠛꠣꠛꠣ, ꠃꠑꠤꠀ ꠛꠁꠀ ꠀꠙꠘꠣꠞ ꠙꠥꠀꠞ ꠡꠤꠇꠣꠞꠞ ꠉꠥꠡ꠆ꠔ ꠈꠣꠃꠇ꠆ꠇꠣ, ꠈꠣꠁꠀ ꠢꠣꠞꠟꠦ ꠀꠙꠘꠣꠞ ꠎꠣꠘꠦ ꠀꠝꠣꠞꠦ ꠖꠥꠀ ꠖꠤꠛꠣ।” 32 ꠅꠃ ꠔꠣꠘ ꠛꠣꠚꠦ ꠇꠁꠟꠣ, “ꠔꠥꠝꠤ ꠇꠦ?” ꠔꠣꠁꠘ ꠇꠁꠟꠣ, “ꠛꠣꠛꠣ, ꠀꠝꠤ ꠔ ꠀꠙꠘꠣꠞ ꠛꠠ ꠙꠥꠀ ꠁꠡ।” 33 ꠀꠞ ꠁꠍꠢꠣꠇꠞ ꠡꠞꠤꠟꠅ ꠛꠦꠎꠥꠁꠔꠣ ꠇꠣꠙꠣ ꠡꠥꠞꠥ ꠅꠁꠟ। ꠇꠣꠙꠤ ꠇꠣꠙꠤ ꠔꠣꠁꠘ ꠇꠁꠟꠣ, “ꠔꠣꠁꠟꠦ ꠀꠝꠣꠞ ꠉꠦꠍꠦ ꠡꠤꠇꠣꠞꠞ ꠉꠥꠡ꠆ꠔ ꠟꠁꠀ ꠎꠦ ꠀꠁꠍꠤꠟ, ꠁꠉꠥ ꠇꠦ? ꠔꠥꠝꠤ ꠀꠁꠛꠣꠞ ꠀꠉꠦꠃ ꠀꠝꠤ ꠅꠔꠣ ꠈꠣꠁꠀ ꠔꠣꠞꠦ ꠖꠥꠀ ꠖꠤꠍꠤ, ꠀꠞ ꠖꠥꠀꠞ ꠚꠟ ꠢꠦ-ꠃ ꠙꠣꠁꠛ।” 34 ꠛꠣꠚꠞ ꠝꠣꠔ ꠢꠥꠘꠤꠀꠃ ꠁꠡꠦ ꠄꠇꠦꠛꠣꠞꠦ ꠛꠥꠇ ꠜꠣꠋꠉꠤꠀ ꠌꠤꠟ꠆ꠟꠣꠁꠀ ꠔꠣꠘ ꠛꠣꠚꠞꠦ ꠇꠁꠟꠣ, “ꠛꠣꠎꠣꠘ, ꠀꠝꠣꠞꠦ, ꠀꠝꠣꠞꠦꠅ ꠖꠥꠀ ꠇꠞꠅ!” 35 ꠁꠍꠢꠣꠇꠦ ꠇꠁꠟꠣ, “ꠔꠥꠝꠣꠞ ꠜꠣꠁꠄ ꠀꠁꠀ ꠌꠔꠥꠞꠤ ꠇꠞꠤꠀ ꠔꠥꠝꠣꠞ ꠙꠣꠅꠘꠣ ꠖꠥꠀ ꠘꠤꠍꠦꠉꠤ।” 36 ꠁꠡꠦ ꠇꠁꠟꠣ, “ꠔꠣꠞ ꠘꠣꠝ ꠁꠀꠇꠥꠛ [ꠝꠣꠘꠤ, ꠗꠥꠇꠣꠛꠣꠎ] ꠘꠣꠄ ꠘꠤ? ꠢꠣꠍꠣꠃ ꠢꠦ ꠖꠥꠁꠛꠣꠞ ꠀꠝꠣꠞꠦ ꠗꠥꠇꠣ ꠖꠤꠍꠦ। ꠛꠠ ꠙꠥꠀ ꠢꠤꠡꠣꠛꠦ ꠀꠝꠣꠞ ꠝꠣꠟꠤꠇꠣꠘꠣ ꠢꠦ ꠀꠉꠦ ꠌꠥꠞꠤ ꠇꠞꠤ ꠘꠤꠍꠤꠟ, ꠀꠞ ꠖꠦꠈꠃꠇ꠆ꠇꠣ, ꠁꠚꠤꠞꠣ ꠀꠝꠣꠞ ꠖꠥꠀꠅ ꠟꠁꠀ ꠉꠦꠟꠉꠤ।” ꠔꠣꠁꠘ ꠚꠤꠞꠤꠀ ꠇꠁꠟꠣ, “ꠀꠙꠘꠦ ꠀꠝꠣꠞ ꠟꠣꠉꠤ ꠇꠥꠘꠥ ꠖꠥꠀꠃ ꠞꠣꠈꠍꠂꠘ ꠘꠣ ꠘꠤ?” 37 ꠁꠍꠢꠣꠇꠦ ꠎꠥꠀꠙ ꠖꠤꠟꠣ, “ꠢꠥꠘꠅ, ꠀꠝꠤ ꠔꠣꠞꠦ ꠔꠥꠝꠣꠞ ꠘꠦꠔꠣ ꠛꠣꠘꠣꠁꠍꠤ, ꠀꠞ ꠔꠣꠞ ꠉꠥꠡ꠆ꠐꠤꠞꠦ ꠔꠣꠞ ꠉꠥꠟꠣꠝ ꠛꠣꠘꠣꠁꠍꠤ, ꠔꠣꠞꠦ ꠚꠡꠟ ꠀꠞ ꠀꠋꠉꠥꠞꠞ ꠡꠞꠛꠔ ꠖꠤꠀ ꠍꠣꠝꠣꠘꠤ ꠇꠞꠍꠤ; ꠅꠈꠘ ꠔꠥꠝꠣꠞ ꠟꠣꠉꠤ ꠀꠞ ꠇꠤꠔꠣ ꠇꠞꠔꠣꠝꠞꠦ ꠙꠥꠔ?” 38 ꠁꠡꠦ ꠚꠤꠞꠤꠀ ꠔꠣꠘ ꠛꠣꠚꠞꠦ ꠇꠁꠟꠣ, “ꠅ ꠛꠣꠎꠣꠘ, ꠀꠙꠘꠣꠞ ꠉꠦꠍꠦ ꠇꠤꠔꠣ ꠅꠃ ꠄꠇ ꠖꠥꠀꠃ ꠀꠍꠤꠟ ꠘꠤ? ꠛꠣꠎꠣꠘ ꠞꠦꠛꠣ, ꠀꠙꠘꠦ ꠀꠝꠣꠞꠦ, ꠀꠝꠣꠞꠦꠅ ꠖꠥꠀ ꠇꠞꠃꠇ꠆ꠇꠣ!” ꠅꠔꠣ ꠇꠁꠀ ꠔꠣꠁꠘ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠣꠘ꠆ꠖꠣꠔ ꠟꠣꠉꠟꠣ।

39 ꠅꠃ ꠔꠣꠘ ꠛꠣꠚ ꠁꠍꠢꠣꠇꠦ ꠇꠁꠟꠣ, “ꠔꠥꠝꠣꠞ ꠛꠡꠔꠈꠣꠘꠣꠞ ꠝꠣꠐꠤ ꠘꠤꠞꠡ ꠅꠁꠛ, ꠢꠤꠘꠅ ꠀꠍꠝꠣꠘꠞ ꠈꠥꠀꠅ ꠙꠠꠔ ꠘꠣꠄ। 40 ꠔꠟꠥꠀꠞꠃ ꠔꠥꠝꠣꠞ ꠎꠤꠘ꠆ꠖꠦꠉꠤ ꠅꠁꠛ, ꠀꠞ ꠘꠤꠎꠞ ꠜꠣꠁꠞ ꠉꠥꠟꠣꠝ ꠅꠁꠛꠣꠄ; ꠅꠁꠟꠦ ꠎꠦꠛꠟꠣ ꠔꠥꠝꠤ ꠘꠣ-ꠝꠣꠘꠞꠣ ꠅꠁꠎꠤꠛꠣꠄ, ꠅꠃ ꠡꠝꠄ ꠘꠤꠎꠞ ꠉꠞ꠆ꠖꠘꠣ ꠕꠣꠇꠤ ꠔꠣꠞ ꠎꠥꠀꠟ ꠢꠞꠣꠁꠛꠣꠄ।”

41 ꠁꠀꠇꠥꠛꠦ ꠔꠣꠘ ꠛꠣꠚꠞ ꠉꠦꠍ ꠕꠘꠦ ꠖꠥꠀ ꠙꠣꠁꠍꠟꠣ ꠇꠞꠤ ꠁꠡꠦ ꠔꠣꠘꠞꠦ ꠁꠋꠡꠣꠁꠔꠣ ꠟꠣꠉꠟꠣ। ꠁꠡꠦ ꠝꠘꠦ ꠝꠘꠦ ꠇꠁꠟꠣ, “ꠀꠝꠣꠞ ꠛꠣꠚꠞ ꠟꠣꠉꠤ ꠝꠃꠔꠞ ꠇꠣꠘ꠆ꠖꠘꠞ ꠖꠤꠘ ꠀꠁꠌ꠆ꠌꠦ। ꠄꠞꠛꠣꠖꠦꠃ ꠔꠣꠞꠦ ꠈꠥꠘ ꠇꠞꠝꠥ।” 42 ꠞꠦꠛꠦꠇꠣꠄ ꠔꠣꠘ ꠛꠠ ꠙꠥꠀ ꠁꠡʼꠞ ꠁꠔꠣ ꠝꠣꠔꠣ-ꠝꠣꠔꠤ ꠢꠥꠘꠟꠣ, ꠔꠦꠃ ꠢꠥꠞꠥ ꠙꠥꠀ ꠁꠀꠇꠥꠛꠞꠦ ꠀꠘꠣꠁꠀ ꠇꠁꠟꠣ, “ꠢꠥꠘꠅ, ꠔꠥꠝꠣꠞ ꠜꠣꠁ ꠁꠡꠦ ꠔꠥꠝꠣꠞꠦ ꠈꠥꠘ ꠇꠞꠣꠞ ꠘꠤꠅꠔꠦ ꠖꠤꠟꠞꠦ ꠛꠣꠘ꠆ꠖꠤꠟꠣꠁꠍꠦ। 43 ꠀꠝꠣꠞ ꠙꠥꠔ, ꠔꠥꠝꠤ ꠀꠝꠣꠞ ꠝꠣꠔꠈꠣꠘ ꠢꠥꠘꠅ, ꠔꠥꠝꠤ ꠢꠣꠞꠣꠘ ꠐꠣꠃꠘꠅ ꠀꠝꠣꠞ ꠜꠣꠁ ꠟꠣꠛꠘꠞ ꠉꠦꠍꠦ ꠢꠞꠤꠀ ꠎꠣꠅꠉꠤ, 44 ꠀꠞ ꠔꠥꠝꠣꠞ ꠜꠣꠁꠞ ꠉꠥꠍꠣ ꠘꠣ ꠇꠝꠣ ꠙꠞ꠆ꠎꠘ꠆ꠔ ꠔꠣꠘ ꠉꠦꠍꠦ ꠕꠣꠇꠅ। 45 ꠔꠣꠞ ꠉꠥꠍꠣ ꠇꠝꠤꠉꠦꠟꠦ, ꠔꠥꠝꠤ ꠔꠣꠞ ꠟꠉꠦ ꠎꠦꠔꠣ ꠇꠞꠍ ꠁꠔꠣ ꠢꠦ ꠚꠣꠃꠞꠤꠟꠤꠟꠦ, ꠀꠝꠤ ꠈꠛꠞꠤꠀꠖꠤ ꠔꠥꠝꠣꠞꠦ ꠀꠘꠣꠁꠝꠥ। ꠇꠤꠔꠣꠟ꠆ꠟꠣꠉꠤ ꠀꠝꠤ ꠄꠇꠖꠤꠘꠦ ꠔꠥꠝꠞꠣ ꠖꠥꠁꠅꠎꠘꠞꠦ ꠀꠞꠣꠁꠔꠣꠝ?”

46 ꠛꠣꠖꠦ ꠞꠦꠛꠦꠇꠣꠄ ꠁꠍꠢꠣꠇꠞꠦ ꠇꠁꠟꠣ, “ꠅꠃ ꠢꠤꠐ꠆ꠐꠤ ꠙꠥꠠꠤꠘ꠆ꠔꠞ ꠟꠣꠉꠤ ꠀꠝꠣꠞ ꠀꠞ ꠛꠣꠌꠣꠞ ꠡ꠆ꠛꠣꠖ ꠘꠣꠁ। ꠁꠀꠇꠥꠛꠦꠅ ꠎꠥꠖꠤ ꠅꠃ ꠟꠣꠈꠣꠘ, ꠁ ꠖꠦꠡꠞ ꠇꠥꠘꠥ ꠢꠤꠐ꠆ꠐꠤ ꠙꠥꠠꠤꠞꠦ ꠡꠣꠖꠤ ꠇꠞꠤꠟꠣꠄ, ꠔꠣꠁꠟꠦ ꠀꠝꠣꠞ ꠀꠞ ꠛꠣꠌꠤꠀꠃ ꠟꠣꠜ ꠇꠤꠔꠣ?”