1 ꠞꠣꠢꠦꠟꠣꠄ ꠎꠦꠛꠟꠣ ꠖꠦꠈꠟꠣ, ꠔꠣꠘ ꠊꠞꠅ ꠁꠀꠇꠥꠛꠞ ꠇꠥꠘꠥ ꠀꠅꠟꠣꠖ ꠅꠁꠞꠣ ꠘꠣ, ꠅꠃ ꠡꠝꠄ ꠔꠣꠘ ꠛꠘꠤꠞ ꠛꠣꠄ ꠁꠋꠡꠣ ꠙꠄꠖꠣ ꠅꠁꠟ। ꠔꠣꠁꠘ ꠁꠀꠇꠥꠛꠞꠦ ꠇꠁꠟꠣ, “ꠀꠝꠣꠞꠦ ꠀꠅꠟꠣꠖ ꠖꠦꠅ, ꠘꠣꠁꠟꠦ ꠀꠝꠤ ꠝꠞꠤꠎꠤꠝꠥ!” 2 ꠔꠦꠃ ꠞꠣꠢꠦꠟꠣꠞ ꠟꠉꠦ ꠁꠀꠇꠥꠛꠦ ꠈꠥꠛ ꠉꠥꠍꠣ ꠇꠞꠤꠀ ꠇꠁꠟꠣ, “ꠀꠝꠤ ꠇꠥꠘꠥ ꠀꠟ꠆ꠟꠣ ꠘꠤ? ꠔꠣꠁꠘꠃ ꠔ ꠔꠥꠝꠣꠞ ꠙꠦꠐ ꠛꠘ꠆ꠖ ꠇꠞꠤ ꠖꠤꠍꠂꠘ।” 3 ꠞꠣꠢꠦꠟꠣꠄ ꠇꠁꠟꠣ, “ꠢꠥꠘꠃꠇ꠆ꠇꠣ, ꠀꠝꠣꠞ ꠛꠣꠘ꠆ꠖꠤ ꠛꠤꠟꠢꠣ ꠅꠘꠅ ꠀꠍꠦ, ꠀꠙꠘꠦ ꠔꠣꠁꠞ ꠉꠦꠍꠦ ꠎꠣꠃꠇ꠆ꠇꠣ, ꠔꠣꠁꠞꠦꠖꠤ ꠢꠥꠞꠥꠔ꠆ꠔꠣ ꠙꠣꠁꠀ ꠀꠝꠤꠅ ꠢꠥꠞꠥꠔ꠆ꠔꠣ ꠀꠟꠣ ꠅꠁꠎꠤꠔꠣꠝ ꠙꠣꠞꠤ।” 4 ꠅꠈꠣꠘ ꠇꠁꠀ ꠢꠣꠞꠤ ꠞꠣꠢꠦꠟꠣꠄ ꠔꠣꠘ ꠛꠣꠘ꠆ꠖꠤ ꠛꠤꠟꠢꠣꠞꠦ ꠁꠀꠇꠥꠛꠞ ꠉꠦꠍꠦ ꠢꠣꠋꠉꠣ ꠖꠤꠟꠣ, ꠀꠞ ꠁꠀꠇꠥꠛ ꠔꠣꠁꠞ ꠉꠦꠍꠦ ꠞꠁꠟꠣ। 5 ꠔꠦꠃ ꠛꠤꠟꠢꠣꠞ ꠊꠞꠅ ꠁꠀꠇꠥꠛꠞ ꠄꠇ ꠙꠥꠀ ꠅꠁꠟ। 6 ꠀꠞ ꠞꠣꠢꠦꠟꠣꠄ ꠇꠁꠟꠣ, “ꠀꠟ꠆ꠟꠣꠄ ꠀꠝꠣꠞꠦ ꠁꠘꠍꠣꠚ ꠇꠞꠍꠂꠘ, ꠀꠞ ꠀꠝꠣꠞ ꠀꠢꠣꠎꠣꠞꠤ ꠢꠥꠘꠤꠀ ꠄꠉꠥ ꠙꠥꠀ ꠖꠤꠍꠂꠘ।” ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠖꠣꠘ [ꠝꠣꠘꠤ, ꠁꠘꠍꠣꠚ]। 7 ꠛꠣꠖꠦ ꠞꠣꠢꠦꠟꠣꠞ ꠛꠣꠘ꠆ꠖꠤ ꠛꠤꠟꠢꠣꠞ ꠊꠞꠅ ꠢꠤꠞꠛꠣꠞ ꠁꠀꠇꠥꠛꠞ ꠖꠥꠍꠞꠣ ꠙꠥꠀ ꠙꠄꠖꠣ ꠅꠁꠟ। 8 ꠀꠞ ꠞꠣꠢꠦꠟꠣꠄ ꠇꠁꠟꠣ, “ꠛꠁꠘꠞ ꠟꠉꠦ ꠝꠢꠣ ꠟꠣꠠꠣꠁꠔ ꠀꠝꠤ ꠎꠤꠔꠍꠤ।” ꠅꠃ ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠘꠙ꠆ꠔꠣꠟꠤ [ꠝꠣꠘꠤ, ꠟꠣꠠꠣꠁ]।

9 ꠟꠦꠀꠄ ꠎꠦꠛꠟꠣ ꠖꠦꠈꠟꠣ ꠔꠣꠘ ꠊꠞꠅ ꠀꠞ ꠢꠥꠞꠥꠔ꠆ꠔꠣ ꠅꠁꠞꠣ ꠘꠣ, ꠔꠦꠃ ꠔꠣꠁꠘꠅ ꠔꠣꠘ ꠛꠣꠘ꠆ꠖꠤ ꠎꠤꠟꠙꠣꠞꠦ ꠁꠀꠇꠥꠛꠞ ꠉꠦꠍꠦ ꠢꠣꠋꠉꠣ ꠖꠤꠟꠣ। 10 ꠔꠦꠃ ꠟꠦꠀꠞ ꠛꠣꠘ꠆ꠖꠤ ꠎꠤꠟꠙꠣꠞ ꠙꠦꠐꠅ ꠁꠀꠇꠥꠛꠞ ꠄꠇ ꠙꠥꠀ ꠅꠁꠟ। 11 ꠀꠞ ꠟꠦꠀꠄ ꠇꠁꠟꠣ, “ꠀꠝꠣꠞ ꠇꠙꠣꠟ ꠈꠥꠟꠍꠦ!” ꠔꠣꠁꠘ ꠄꠞ ꠘꠣꠝ ꠞꠣꠈꠟꠣ ꠍꠣꠖꠥ [ꠝꠣꠘꠤ, ꠇꠙꠣꠟ]। 12 ꠛꠣꠖꠦ ꠟꠦꠀꠞ ꠛꠣꠘ꠆ꠖꠤ ꠎꠤꠟꠙꠣꠞ ꠊꠞꠅ ꠁꠀꠇꠥꠛꠞ ꠀꠞꠇ ꠙꠥꠀ ꠅꠁꠟ। 13 ꠀꠞ ꠟꠦꠀꠄ ꠇꠁꠟꠣ, “ꠀꠝꠣꠞ ꠇꠔ ꠡꠥꠈ! ꠢꠇꠟ ꠛꠦꠐꠤꠘ꠆ꠔꠦ ꠀꠝꠣꠞꠦ ꠡꠥꠈꠤ ꠇꠁꠛꠣ।” ꠔꠦꠃ ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠀꠡꠤꠞ [ꠝꠣꠘꠤ, ꠡꠥꠈꠤ]।

14 ꠉꠝ ꠖꠣꠅꠀꠞ ꠡꠝꠄ ꠞꠥꠛꠦꠘꠦ ꠛꠘ꠆ꠖꠅ ꠉꠤꠀ ꠇꠤꠍꠥ ꠗꠥꠔꠞꠣ-ꠉꠥꠐꠣ ꠙꠣꠁꠀ, ꠔꠣꠘ ꠝꠣ ꠟꠦꠀꠞ ꠉꠦꠍꠦ ꠀꠘꠤꠀ ꠖꠤꠟꠣ। ꠀꠞ ꠞꠣꠢꠦꠟꠣꠄ ꠟꠦꠀꠞꠦ ꠇꠁꠟꠣ, “ꠔꠥꠝꠣꠞ ꠙꠥꠀꠞ ꠇꠄꠉꠥ ꠗꠥꠔꠞꠣ-ꠉꠥꠐꠣ ꠀꠝꠣꠞꠦ ꠖꠦꠅꠌꠣꠁꠘ।” 15 ꠟꠦꠀꠄ ꠇꠁꠟꠣ, “ꠔꠥꠝꠤ ꠀꠝꠣꠞ ꠎꠣꠝꠣꠁꠞꠦ ꠖꠈꠟ ꠇꠞꠍ, ꠁꠔꠣꠄ ꠅꠁꠍꠦ ꠘꠣ ꠘꠤ? ꠅꠈꠘ ꠀꠝꠣꠞ ꠙꠥꠀꠞ ꠗꠥꠔꠞꠣ-ꠉꠥꠐꠣꠅ ꠌꠣꠁꠞꠣꠄ ꠘꠤ?” ꠞꠣꠢꠦꠟꠣꠄ ꠇꠁꠟꠣ, “ꠔꠣꠁꠟꠦ ꠔꠥꠝꠣꠞ ꠙꠥꠀꠞ ꠗꠥꠔꠞꠣ-ꠉꠥꠐꠣꠞ ꠛꠖꠟꠣ ꠀꠁꠎ ꠞꠣꠁꠔ ꠔꠣꠁꠘ ꠔꠥꠝꠣꠞ ꠟꠉꠦ ꠞꠁꠛꠣ ꠘꠦ।” 16 ꠢꠣꠁꠘ꠆ꠎꠣ ꠛꠣꠟꠣ ꠁꠀꠇꠥꠛꠦ ꠛꠘ꠆ꠖꠅ ꠕꠘꠦ ꠀꠁꠔꠦꠃ ꠟꠦꠀꠄ ꠛꠣꠞ ꠅꠁꠀ ꠔꠣꠘꠦ ꠇꠁꠟꠣ, “ꠀꠁꠎ ꠀꠝꠣꠞ ꠟꠉꠦ ꠞꠁꠛꠣꠄ, ꠇꠣꠞꠘ ꠀꠝꠣꠞ ꠙꠥꠀꠞ ꠗꠥꠔꠞꠣ-ꠉꠥꠐꠣꠞ ꠛꠖꠟꠣ ꠀꠝꠤ ꠔꠥꠝꠣꠞꠦ ꠀꠅꠟꠣꠔ ꠘꠤꠍꠤ।” ꠅꠃ ꠢꠤ ꠞꠣꠁꠔ ꠔꠣꠁꠘ ꠟꠦꠀꠞ ꠊꠞꠅ ꠢꠥꠔꠤꠟꠣ। 17 ꠀꠟ꠆ꠟꠣꠄ ꠟꠦꠀꠞ ꠖꠥꠀ ꠇꠛꠥꠟ ꠇꠞꠣꠄ, ꠔꠣꠘ ꠊꠞꠅ ꠁꠀꠇꠥꠛꠞ ꠙꠣꠌ ꠘꠝ꠆ꠛꠞ ꠙꠥꠀꠞ ꠎꠘꠝ ꠅꠁꠟ। 18 ꠅꠃ ꠟꠦꠀꠄ ꠇꠁꠟꠣ, “ꠀꠝꠣꠞ ꠎꠣꠝꠣꠁꠞ ꠉꠦꠍꠦ ꠀꠝꠣꠞ ꠛꠣꠘ꠆ꠖꠤꠞꠦ ꠖꠤꠍꠟꠣꠝ ꠇꠞꠤ, ꠀꠟ꠆ꠟꠣꠄ ꠀꠝꠣꠞꠦ ꠄꠞ ꠛꠖꠟꠣ ꠖꠤꠟꠣ।” ꠄꠞꠟꠣꠉꠤ ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠁꠍꠣꠈꠞ [ꠝꠣꠘꠤ, ꠛꠖꠟꠣ]। 19 ꠛꠣꠖꠦ ꠢꠤꠞꠛꠣꠞ ꠟꠦꠀꠞ ꠊꠞꠅ ꠁꠀꠇꠥꠛꠞ ꠍꠄ ꠘꠝ꠆ꠛꠞ ꠙꠥꠀꠞ ꠎꠘꠝ ꠅꠁꠟ। 20 ꠟꠦꠀꠄ ꠇꠁꠟꠣ, “ꠀꠟ꠆ꠟꠣꠄ ꠀꠝꠣꠞꠦ ꠛꠃꠔ ꠛꠠ ꠄꠇ ꠘꠤꠀꠝꠔ ꠖꠤꠟꠣ। ꠅꠈꠘ ꠀꠝꠣꠞ ꠎꠣꠝꠣꠁꠄ ꠀꠝꠣꠞꠦ ꠖꠣꠝ ꠖꠤꠛꠣ, ꠇꠣꠞꠘ ꠀꠝꠤ ꠔꠣꠘ ꠍꠄꠉꠥ ꠙꠥꠀꠞ ꠎꠘꠝ ꠖꠤꠍꠤ।” ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠍꠛꠥꠟꠘ [ꠝꠣꠘꠤ, ꠖꠣꠝ]। 21 ꠢꠦꠡꠦ ꠟꠦꠀꠞ ꠄꠇ ꠙꠥꠠꠤ ꠅꠁꠟ, ꠔꠣꠁꠞ ꠘꠣꠝ ꠞꠣꠈꠟꠣ ꠖꠤꠘꠣ।

22 ꠀꠟ꠆ꠟꠣꠄ ꠞꠣꠢꠦꠟꠣꠞ ꠛꠣꠄꠅ ꠈꠤꠀꠟ ꠇꠞꠟꠣ। ꠔꠣꠁꠘ ꠞꠣꠢꠦꠟꠣꠞ ꠖꠥꠀ ꠇꠛꠥꠟ ꠇꠞꠤꠀ, ꠔꠣꠘꠞꠦ ꠢꠥꠞꠥꠔ꠆ꠔꠣ ꠙꠄꠖꠣꠞ ꠔꠣꠇ꠆ꠇꠔ ꠖꠤꠟꠣ। 23 ꠀꠞ ꠞꠣꠢꠦꠟꠣꠞ ꠊꠞꠅ ꠄꠇ ꠙꠥꠀ ꠅꠁꠟꠦ ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠄ ꠀꠝꠣꠞ ꠡꠞꠝ ꠢꠞꠣꠁꠍꠂꠘ।” 24 ꠔꠣꠁꠘ ꠁ ꠙꠥꠀꠞ ꠘꠣꠝ ꠞꠣꠈꠟꠣ ꠁꠃꠍꠥꠚ [ꠝꠣꠘꠤ, ꠛꠣꠠꠣꠘꠤ]। ꠔꠣꠁꠘ ꠇꠁꠟꠣ, “ꠝꠣꠛꠥꠖꠦ ꠀꠝꠣꠞꠦ ꠀꠞꠅꠉꠥ ꠙꠥꠀ ꠛꠣꠠꠣꠁ ꠖꠦꠃꠇ꠆ꠇꠣ।”

25 ꠞꠣꠢꠦꠟꠣꠞ ꠊꠞꠅ ꠁꠃꠍꠥꠚ ꠅꠀꠞ ꠛꠣꠖꠦ, ꠁꠀꠇꠥꠛꠦ ꠟꠣꠛꠘꠞꠦ ꠇꠁꠟꠣ, “ꠅꠈꠘ ꠀꠝꠣꠞꠦ ꠛꠤꠖꠣꠄ ꠖꠤꠟꠣꠃꠇ꠆ꠇꠣ, ꠀꠝꠤ ꠘꠤꠎꠞ ꠖꠦꠡꠞ ꠛꠣꠠꠤꠔ ꠎꠣꠁꠉꠤ। 26 ꠀꠙꠘꠦ ꠔ ꠎꠣꠘꠂꠘ, ꠀꠝꠤ ꠇꠤꠟꠣ ꠀꠙꠘꠣꠞ ꠉꠥꠟꠣꠝꠤ ꠇꠞꠍꠤ, ꠀꠝꠤ ꠀꠝꠣꠞ ꠛꠃꠀꠁꠘ ꠀꠞ ꠙꠥꠀ-ꠙꠥꠠꠤꠞ ꠟꠣꠉꠤ ꠀꠙꠘꠣꠞ ꠉꠥꠟꠣꠝꠤ ꠇꠞꠍꠤ। ꠅꠈꠘ ꠔꠣꠞꠣꠞꠦ ꠟꠁꠀ ꠀꠝꠣꠞꠦ ꠎꠣꠁꠔꠦ ꠖꠦꠃꠇ꠆ꠇꠣ।” 27 ꠟꠣꠛꠘꠦ ꠔꠣꠘꠞꠦ ꠇꠁꠟꠣ, “ꠀꠝꠣꠞ ꠟꠣꠉꠤ ꠎꠥꠖꠤ ꠔꠥꠝꠣꠞ ꠝꠣꠄꠀ ꠕꠣꠇꠦ, ꠔꠦ ꠎꠣꠁꠅ ꠘꠣ। ꠀꠝꠤ ꠀꠟꠣꠝꠔꠦ ꠛꠥꠎꠤꠀꠞ ꠎꠦꠘ, ꠔꠥꠝꠣꠞ ꠈꠣꠔꠤꠞꠦ ꠝꠣꠛꠥꠖꠦ ꠀꠝꠣꠞꠦꠅ ꠛꠞꠇꠔ ꠘꠣꠎꠤꠟ ꠇꠞꠍꠂꠘ। 28 ꠔꠥꠝꠣꠞ ꠛꠦꠔꠘ ꠔꠥꠝꠤ ꠘꠤꠎꠦꠃ ꠇꠁꠟꠣꠅ। ꠀꠝꠤ ꠔꠥꠝꠣꠞꠦ ꠅꠟꠣꠃ ꠖꠤꠝꠥ।” 29 ꠅꠃ ꠁꠀꠇꠥꠛꠦ ꠔꠣꠘꠞꠦ ꠇꠁꠟꠣ, “ꠀꠝꠤ ꠇꠤꠟꠣ ꠀꠙꠘꠣꠞ ꠉꠥꠟꠣꠝꠤ ꠇꠞꠍꠤ, ꠀꠞ ꠀꠝꠣꠞ ꠀꠔꠅ ꠀꠙꠘꠣꠞ ꠙꠡꠥꠞ ꠙꠣꠟ ꠇꠤꠟꠣꠈꠣꠘ ꠅꠁꠍꠦ, ꠁꠔꠣ ꠀꠙꠘꠦꠃ ꠎꠣꠘꠂꠘ। 30 ꠀꠝꠤ ꠀꠅꠀꠞ ꠀꠉꠦ ꠀꠙꠘꠦ ꠉꠞꠤꠛ ꠀꠍꠟꠣ। ꠀꠞ ꠅꠈꠘ ꠔ ꠛꠣꠠꠤꠀ ꠛꠃꠔꠔꠣ ꠅꠁꠍꠦ। ꠀꠝꠣꠞ ꠇꠣꠞꠘꠦ ꠝꠣꠛꠥꠖꠦ ꠀꠙꠘꠣꠞꠦ ꠛꠃꠔ ꠛꠞꠇꠔ ꠖꠤꠍꠂꠘ। ꠅꠁꠟꠦ ꠀꠝꠣꠞ ꠘꠤꠎꠞ ꠙꠞꠤꠛꠣꠞꠞ ꠟꠣꠉꠤ ꠇꠥꠘꠖꠤꠘ ꠇꠣꠝꠣꠁ ꠇꠞꠔꠣꠝ?” 31 ꠔꠦꠃ ꠟꠣꠛꠘꠦ ꠇꠁꠟꠣ, “ꠀꠝꠤ ꠔꠥꠝꠣꠞꠦ ꠇꠤꠔꠣ ꠖꠤꠔꠣꠝ?” ꠁꠀꠇꠥꠛꠦ ꠇꠁꠟꠣ, “ꠀꠙꠘꠦ ꠀꠝꠣꠞꠦ ꠇꠥꠘ꠆ꠔꠣꠃ ꠘꠣ ꠖꠤꠀ ꠎꠥꠖꠤ ꠀꠝꠣꠞ ꠄꠉꠥ ꠝꠣꠔ ꠞꠣꠈꠂꠘ, ꠔꠦ ꠀꠝꠤ ꠢꠤꠞꠛꠣꠞ ꠀꠙꠘꠣꠞ ꠙꠡꠥꠞ ꠙꠣꠟꠞ ꠈꠦꠎꠝꠔ ꠇꠞꠝꠥ। 32 ꠀꠝꠤ ꠀꠁꠎ ꠀꠙꠘꠣꠞ ꠙꠡꠥꠞ ꠙꠣꠟꠞ ꠝꠣꠎꠦ ꠉꠤꠀ, ꠚꠥꠐꠣ ꠚꠥꠐꠣ ꠖꠣꠉꠀꠟꠣ ꠀꠞ ꠇꠣꠟꠣ ꠀꠞ ꠍꠤꠔ꠆ꠞꠣ ꠝꠦꠠꠣꠁꠘ ꠀꠞ ꠍꠣꠉꠟꠞ ꠝꠣꠎꠦ ꠍꠤꠔ꠆ꠞꠣ ꠀꠞ ꠚꠥꠐꠣ ꠚꠥꠐꠣ ꠞꠋꠉꠞ ꠢꠇ꠆ꠇꠟꠐꠤ ꠀꠝꠣꠞ ꠛꠦꠔꠘ ꠛꠣꠛꠔ ꠘꠤꠝꠥꠉꠤ। 33 ꠔꠦꠃ ꠀꠙꠘꠦ ꠎꠦꠛꠟꠣꠃ ꠛꠦꠔꠘꠞ ꠇꠣꠞꠘꠦ ꠀꠁꠛꠣ, ꠁ ꠡꠝꠄ ꠖꠦꠈꠛꠣ, ꠀꠝꠣꠞ ꠁꠝꠣꠘꠖꠣꠞꠤꠄ ꠀꠝꠣꠞ ꠟꠣꠉꠤ ꠎꠥꠀꠙ ꠖꠤꠛ। ꠀꠞ ꠚꠥꠐꠣ ꠚꠥꠐꠣ ꠖꠣꠉꠀꠟꠣ ꠀꠞ ꠇꠣꠟꠣ ꠀꠞ ꠍꠤꠔ꠆ꠞꠣ ꠝꠦꠠꠣꠁꠘ ꠀꠞ ꠍꠣꠉꠟꠞ ꠝꠣꠎꠦ ꠍꠤꠔ꠆ꠞꠣ ꠀꠞ ꠚꠥꠐꠣ ꠚꠥꠐꠣ ꠞꠋꠉꠞꠔꠣ ꠍꠣꠠꠣ ꠀꠞ ꠇꠥꠘ꠆ꠔꠣ ꠙꠣꠁꠟꠦ ꠝꠘꠅ ꠇꠞꠛꠣ, ꠀꠝꠤ ꠌꠥꠞꠤ ꠇꠞꠍꠤ।” 34 ꠅꠃ ꠟꠣꠛꠘꠦ ꠇꠁꠟꠣ, “ꠀꠁꠌ꠆ꠍꠣ, ꠔꠥꠝꠣꠞ ꠇꠕꠣꠃ ꠑꠤꠇ ꠕꠣꠇꠃꠇ।” 35 ꠟꠣꠛꠘꠦ ꠢꠃ ꠖꠤꠘꠃ ꠙꠣꠟ ꠕꠣꠇꠤ ꠟꠣꠝ꠆ꠛꠣ ꠖꠣꠉꠀꠟꠣ ꠀꠞ ꠍꠤꠔ꠆ꠞꠣ ꠍꠣꠉꠟ, ꠚꠥꠐꠣ ꠚꠥꠐꠣ ꠖꠣꠉ ꠀꠞ ꠍꠤꠔ꠆ꠞꠣ ꠕꠥꠠꠣ ꠕꠥꠠꠣ ꠗꠟꠣ ꠍꠣꠉꠤꠘ ꠀꠞ ꠇꠣꠟꠣ ꠝꠦꠠꠣ ꠅꠇꠟ ꠀꠟꠉꠣꠁꠀ ꠘꠤꠎꠞ ꠙꠥꠀꠂꠘ꠆ꠔꠞ ꠉꠦꠍꠦ ꠖꠤꠟꠣꠁꠟꠣ। 36 ꠖꠤꠀ ꠔꠣꠁꠘ ꠁꠀꠇꠥꠛꠞ ꠉꠦꠍ ꠕꠣꠇꠤ ꠔꠤꠘ ꠖꠤꠘꠞ ꠙꠕ ꠖꠥꠞꠁ ꠢꠞꠤꠀ ꠉꠦꠟꠣꠉꠤ ꠀꠞ ꠁꠀꠇꠥꠛꠦ ꠟꠣꠛꠘꠞ ꠛꠣꠇꠤ ꠙꠣꠟ ꠅꠇꠟꠞꠦ ꠞꠣꠈꠣꠔ ꠞꠁꠟꠣ।

37 ꠁꠀꠇꠥꠛꠦ ꠟꠤꠛꠘꠤ, ꠟꠣꠃꠎ ꠀꠞ ꠀꠞ꠆ꠝꠥꠘ ꠉꠣꠍꠞ ꠇꠣꠌꠣ ꠒꠣꠟ ꠇꠣꠐꠤꠀ ꠃꠙꠞꠦ ꠕꠣꠇꠤ ꠛꠣꠇꠟ ꠚꠣꠟꠣꠁꠀ ꠒꠣꠟꠞ ꠝꠣꠎꠦ ꠟꠣꠝ꠆ꠛꠣ ꠟꠣꠝ꠆ꠛꠣ ꠗꠟꠣ ꠖꠣꠉ ꠖꠤꠟꠣ। 38 ꠍꠣꠉꠟꠞ ꠙꠣꠟꠦ ꠀꠁꠀ ꠎꠦꠈꠣꠘꠅ ꠙꠣꠘꠤ ꠈꠣꠁꠘ, ꠔꠣꠁꠘ ꠅꠃ ꠛꠣꠇꠟ ꠚꠣꠟꠣꠁꠟ ꠖꠣꠉꠀꠟꠣ ꠒꠣꠟ ꠅꠇꠟ, ꠢꠘꠅ ꠙꠣꠘꠤꠞ ꠉꠣꠝꠟꠣꠞ ꠍꠣꠝꠘꠦ ꠕꠁꠟꠣ। ꠀꠞ ꠙꠣꠘꠤ ꠈꠣꠅꠀꠞ ꠡꠝꠄ ꠄꠞꠣ ꠚꠣꠟ ꠈꠣꠁꠔ। 39 ꠔꠦꠃ ꠅꠃ ꠒꠣꠟꠞ ꠉꠦꠍꠦ ꠀꠁꠀ ꠚꠣꠟ ꠈꠣꠅꠀꠄ ꠔꠣꠞꠣꠞ ꠛꠣꠁꠌ꠆ꠌꠣꠁꠘꠅ ꠍꠤꠔ꠆ꠞꠣ, ꠟꠣꠝ꠆ꠛꠣ ꠖꠣꠉꠀꠟꠣ ꠀꠞ ꠚꠥꠐꠣ ꠚꠥꠐꠣ ꠞꠋꠉꠞ ꠅꠁꠔꠣ।

40 ꠛꠣꠖꠦ ꠔꠣꠁꠘ ꠅꠃ ꠛꠣꠁꠌ꠆ꠌꠣꠁꠘ ꠀꠟꠉꠣꠁꠔꠣ, ꠀꠞ ꠟꠣꠛꠘꠞ ꠒꠥꠞꠣꠀꠟꠣ ꠀꠞ ꠇꠣꠟꠣ ꠝꠦꠠꠣꠁꠘ꠆ꠔꠞ ꠛꠣꠄ ꠝꠦꠠꠤꠘ꠆ꠔꠞ ꠌꠃꠈ ꠞꠣꠈꠣꠁꠔꠣ। ꠅꠃ ꠟꠣꠈꠣꠘ ꠔꠣꠁꠘ, ꠔꠣꠘ ꠘꠤꠎꠞ ꠙꠣꠟꠞꠦ ꠟꠣꠛꠘꠞ ꠙꠣꠟꠞ ꠟꠉꠦ ꠝꠤꠟꠣꠁꠔꠣ ꠘꠣ। 41 ꠀꠞ ꠎꠥꠞꠀꠟꠣ ꠝꠦꠠꠤ-ꠍꠣꠉꠤꠘ꠆ꠔꠦ ꠚꠣꠟ ꠈꠣꠅꠀꠞ ꠡꠝꠄ, ꠔꠣꠁꠘ ꠉꠣꠝꠟꠣꠔ ꠔꠣꠞꠣꠞ ꠌꠃꠈꠞ ꠍꠣꠝꠘꠦ ꠅꠃ ꠒꠣꠟ ꠅꠇꠟ ꠕꠁꠔꠣ, 42 ꠅꠁꠟꠦ ꠇꠝꠎꠥꠞ ꠙꠡꠥꠞ ꠍꠣꠝꠘꠦ ꠁ ꠒꠣꠟꠣꠁꠘ ꠕꠁꠔꠣ ꠘꠣ। ꠔꠦꠃ ꠟꠣꠛꠘꠞ ꠙꠡꠥꠁꠘ ꠅꠁꠔꠣ ꠇꠝꠎꠥꠞ, ꠀꠞ ꠁꠀꠇꠥꠛꠞ ꠙꠡꠥꠁꠘ ꠅꠁꠔꠣ ꠎꠥꠞꠀꠟꠣ। 43 ꠅꠃ ꠟꠣꠈꠣꠘ ꠇꠣꠝ ꠇꠞꠤꠀ ꠔꠣꠁꠘ ꠛꠃꠔ ꠗꠘꠤ ꠅꠁꠟꠣ। ꠔꠣꠘ ꠉꠥꠟꠣꠝ-ꠛꠣꠘ꠆ꠖꠤ, ꠃꠐ-ꠉꠣꠗꠣ ꠀꠞ ꠙꠡꠥꠞ ꠙꠣꠟ ꠛꠃꠔ ꠛꠣꠠꠤꠉꠦꠟ।