1 ꠛꠣꠖꠦ ꠁꠀꠇꠥꠛꠞ ꠇꠣꠘꠅ ꠀꠁꠟ ꠟꠣꠛꠘꠞ ꠙꠥꠀꠂꠘ꠆ꠔꠦ ꠝꠣꠔꠤꠞꠣ ꠎꠦꠘ, “ꠁꠀꠇꠥꠛꠦ ꠀꠝꠞꠣꠞ ꠛꠣꠚꠞ ꠢꠇ꠆ꠇꠟꠔꠣ ꠘꠤꠍꠦꠉꠤ, ꠀꠞ ꠀꠝꠞꠣꠞ ꠛꠣꠚꠞ ꠝꠣꠟ ꠖꠤꠀꠃ ꠢꠦ ꠝꠣꠟꠖꠣꠞ ꠅꠁꠉꠦꠍꠦ।” 2 ꠀꠞ ꠁꠀꠇꠥꠛꠦꠅ ꠈꠤꠀꠟ ꠇꠞꠟꠣ, ꠔꠣꠘꠛꠣꠄꠖꠤ ꠟꠣꠛꠘꠞ ꠀꠉꠞ ꠢꠤ ꠝꠘꠞ ꠜꠣꠛ ꠀꠞ ꠘꠣꠄ। 3 ꠝꠣꠛꠥꠖꠦ ꠁꠀꠇꠥꠛꠞꠦ ꠇꠁꠟꠣ, ꠔꠥꠝꠤ ꠔꠥꠝꠣꠞ ꠛꠣꠚ-ꠖꠣꠖꠣꠞ ꠖꠦꠡꠅ ꠘꠤꠎꠞ ꠝꠣꠘꠡꠞ ꠉꠦꠍꠦ ꠚꠤꠞꠤꠀ ꠎꠣꠅꠉꠤ। ꠀꠝꠤ ꠔꠥꠝꠣꠞ ꠟꠉꠦ ꠕꠣꠇꠝꠥ। 4 ꠅꠃ ꠁꠀꠇꠥꠛꠦ ꠈꠛꠞꠤꠀ ꠙꠣꠑꠣꠁꠀ ꠟꠦꠀ ꠀꠞ ꠞꠣꠢꠦꠟꠣꠞꠦ ꠛꠘ꠆ꠖꠅ ꠔꠣꠘ ꠙꠡꠥꠞ ꠙꠣꠟꠞ ꠉꠦꠍꠦ ꠀꠘꠣꠁꠀ ꠇꠁꠟꠣ, 5 “ꠀꠝꠤ ꠔꠥꠝꠣꠞꠔꠣꠘꠞ ꠛꠣꠚꠞ ꠝꠥꠈ ꠖꠦꠈꠤꠀ ꠛꠥꠎꠤꠀꠞ, ꠔꠣꠘ ꠀꠉꠞ ꠢꠤ ꠝꠘꠞ ꠜꠣꠛ ꠀꠝꠣꠞ ꠛꠣꠄ ꠘꠣꠄ, ꠅꠁꠟꠦ ꠀꠝꠣꠞ ꠛꠣꠚꠞ ꠝꠣꠛꠥꠖ ꠀꠟ꠆ꠟꠣ ꠀꠝꠣꠞ ꠟꠉꠦ ꠟꠉꠦ ꠞꠁꠍꠂꠘ। 6 ꠔꠥꠝꠤꠔꠣꠁꠘ ꠔ ꠎꠣꠘ ꠎꠦꠘ, ꠀꠝꠤ ꠀꠝꠣꠞ ꠢꠇꠟ ꠡꠇ꠆ꠔꠤ ꠖꠤꠀꠃ ꠔꠣꠘ ꠇꠔ ꠉꠥꠟꠣꠝꠤ ꠇꠞꠍꠤ, 7 ꠔꠣ-ꠅ ꠔꠣꠁꠘ ꠀꠝꠣꠞꠦ ꠐꠉꠤꠍꠂꠘ ꠀꠞ ꠖꠡ-ꠖꠡꠛꠣꠞ ꠇꠞꠤꠀ ꠀꠝꠣꠞ ꠛꠦꠔꠘ ꠛꠖꠟꠣꠁꠍꠂꠘ, ꠅꠁꠟꠦ ꠀꠟ꠆ꠟꠣꠄ ꠀꠝꠣꠞ ꠇꠥꠘꠥ ꠈꠦꠔꠤ ꠅꠁꠔꠦ ꠖꠤꠍꠂꠘ ꠘꠣ। 8 ꠔꠣꠁꠘ ꠎꠦꠛꠟꠣ ꠇꠁꠟꠣ, ꠔꠥꠝꠣꠞ ꠛꠦꠔꠘ ꠅꠁꠛ, ꠚꠥꠐꠣ ꠚꠥꠐꠣ ꠞꠋꠉꠞ ꠙꠡꠥ, ꠔꠦꠃ ꠙꠣꠟꠞ ꠢꠇꠟ ꠙꠡꠥꠄ ꠅꠃ ꠟꠣꠈꠣꠘ ꠛꠣꠁꠌ꠆ꠌꠣ ꠖꠤꠟ। ꠢꠤꠞꠛꠣꠞ ꠔꠣꠁꠘ ꠎꠦꠛꠟꠣ ꠇꠁꠟꠣ, ꠔꠥꠝꠣꠞ ꠛꠦꠔꠘ ꠅꠁꠛ ꠒꠥꠞꠣꠀꠟꠣ ꠙꠡꠥ, ꠔꠦꠃ ꠙꠣꠟꠞ ꠢꠇꠟ ꠙꠡꠥꠄ ꠒꠥꠞꠣꠀꠟꠣ ꠛꠣꠁꠌ꠆ꠌꠣ ꠖꠤꠟ। 9 ꠀꠟ꠆ꠟꠣꠄ ꠅꠃ ꠟꠣꠈꠣꠘ ꠇꠞꠤ ꠔꠣꠘ ꠙꠣꠟꠞ ꠙꠡꠥ ꠀꠘꠤꠀ ꠀꠝꠣꠞꠦ ꠖꠤꠍꠂꠘ।

10 “ꠄꠇꠛꠣꠞ ꠙꠡꠥꠁꠘ꠆ꠔꠦ ꠚꠣꠟ ꠈꠣꠅꠀꠞ ꠡꠝꠄ ꠀꠝꠤ ꠈꠥꠀꠛꠦ ꠖꠦꠈꠟꠣꠝ, ꠝꠦꠠꠤ-ꠍꠣꠉꠤꠘ꠆ꠔꠞ ꠃꠙꠞꠦ ꠎꠦ ꠙꠣꠑꠣ ꠅꠇꠟ ꠃꠑꠤꠞꠣ, ꠁꠉꠥꠁꠘ ꠒꠥꠞꠣꠀꠟꠣ, ꠍꠤꠔ꠆ꠞꠣ ꠀꠞ ꠚꠥꠐꠣ ꠚꠥꠐꠣ ꠞꠋꠉꠞ। 11 ꠈꠥꠀꠛꠞ ꠝꠣꠎꠦ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠄ ꠀꠝꠣꠞꠦ ꠒꠣꠇꠤꠟꠣ, ‘ꠁꠀꠇꠥꠛ!’ ꠀꠝꠤ ꠇꠁꠟꠣꠝ, ‘ꠅꠃꠘꠥ ꠀꠝꠤ।’ 12 ꠔꠣꠁꠘ ꠇꠁꠟꠣ, ‘ꠔꠥꠝꠤ ꠌꠃꠈ ꠔꠥꠟꠤꠀ ꠖꠦꠈꠅ, ꠝꠦꠠꠤ-ꠍꠣꠉꠤꠘ꠆ꠔꠞ ꠃꠙꠞꠦ ꠎꠦꠔꠣ ꠙꠣꠑꠣꠁꠘ ꠃꠑꠤꠞꠣ, ꠢꠇ꠆ꠇꠟꠐꠤ ꠒꠥꠞꠣꠀꠟꠣ, ꠍꠤꠔ꠆ꠞꠣ ꠀꠞ ꠚꠥꠐꠣ ꠚꠥꠐꠣ ꠞꠋꠉꠞ। ꠟꠣꠛꠘꠦ ꠔꠥꠝꠣꠞ ꠟꠉꠦ ꠎꠦꠔꠣ ꠎꠦꠔꠣ ꠇꠞꠍꠦ, ꠁꠔꠣ ꠢꠇꠟꠔꠣꠃ ꠀꠝꠤ ꠖꠦꠈꠍꠤ। 13 ꠀꠝꠤ ꠢꠃ ꠛꠦꠕꠦꠟꠞ ꠀꠟ꠆ꠟꠣ, ꠎꠦꠘꠅ ꠔꠥꠝꠤ ꠈꠥꠐꠤꠞ ꠃꠙꠞꠦ ꠔꠦꠟ ꠓꠣꠟꠤꠀ ꠀꠝꠣꠞ ꠘꠣꠝꠦ ꠇꠍꠝ ꠇꠞꠍꠟꠣꠄ। ꠅꠈꠘ ꠌꠟꠅ, ꠁ ꠖꠦꠡ ꠍꠣꠠꠤꠀ ꠔꠥꠝꠣꠞ ꠎꠘꠝ ꠝꠣꠐꠤꠔ ꠚꠤꠞꠔ ꠎꠣꠅ।’ ”

14 ꠅꠃ ꠟꠦꠀ ꠀꠞ ꠞꠣꠢꠦꠟꠣꠄ ꠇꠁꠟꠣ, “ꠛꠣꠛꠣꠞ ꠡꠝ꠆ꠙꠔ꠆ꠔꠤꠞ ꠇꠥꠘꠥ ꠖꠣꠛꠤ ꠀꠞ ꠀꠝꠞꠣꠞ ꠞꠁꠟ ꠘꠤ? 15 ꠔꠣꠁꠘ ꠔ ꠀꠝꠞꠣꠞꠦ ꠛꠦꠉꠣꠘꠣ ꠝꠣꠘꠥꠡ ꠝꠘꠅ ꠇꠞꠤꠀ, ꠀꠝꠞꠣꠞꠦ ꠛꠦꠌꠤꠟꠣꠁꠍꠂꠘ ꠀꠞ ꠀꠝꠞꠣꠞ ꠢꠇ꠆ꠇꠟꠔꠣꠃ ꠈꠣꠁꠟꠤꠍꠂꠘ। 16 ꠄꠞꠟꠣꠉꠤ ꠀꠟ꠆ꠟꠣꠄ ꠀꠝꠞꠣꠞ ꠛꠣꠛꠣꠞ ꠍꠣꠝꠣꠘꠣ ꠕꠘꠦ ꠎꠔꠔꠣ ꠘꠤꠍꠂꠘ, ꠁ ꠢꠇ꠆ꠇꠟꠐꠤꠃ ꠅꠈꠘ ꠀꠝꠞꠣꠞ ꠀꠞ ꠀꠝꠞꠣꠞ ꠀꠅꠟꠣꠖꠞ ꠅꠁꠍꠦ। ꠔꠦ ꠀꠟ꠆ꠟꠣꠄ ꠔꠥꠝꠣꠞꠦ ꠎꠦꠟꠣ ꠢꠥꠇꠥꠝ ꠇꠞꠍꠂꠘ, ꠔꠥꠝꠤꠅ ꠅꠃꠟꠣ ꠇꠞꠅ।”

17 ꠛꠣꠖꠦ ꠁꠀꠇꠥꠛꠦ ꠔꠣꠘ ꠢꠥꠞꠥꠔ꠆ꠔꠣꠁꠘ ꠀꠞ ꠛꠤꠛꠤꠘ꠆ꠔꠞꠦ ꠃꠐꠞ ꠃꠙꠞꠦ ꠔꠥꠟꠤꠀ, 18 ꠙꠖ꠆ꠖꠘ-ꠁꠞꠣꠝꠅ ꠔꠣꠘ ꠇꠣꠝꠣꠁꠟ ꠙꠡꠥ ꠅꠇꠟ ꠀꠞ ꠝꠣꠟ-ꠍꠣꠝꠣꠘꠣ ꠢꠇ꠆ꠇꠟꠔꠣ ꠟꠁꠀ, ꠇꠦꠘꠣꠘ ꠖꠦꠡꠅ ꠔꠣꠘ ꠛꠣꠚ ꠁꠍꠢꠣꠇꠞ ꠉꠦꠍꠦ ꠞꠅꠀꠘꠣ ꠖꠤꠟꠣꠁꠟꠣ। 19 ꠢꠃ ꠡꠝꠄ ꠟꠣꠛꠘꠦ ꠔꠣꠘ ꠝꠦꠠꠣꠁꠘ꠆ꠔꠞ ꠞꠥꠝꠣ ꠇꠣꠐꠣꠞ ꠟꠣꠉꠤ ꠉꠦꠍꠟꠣ, ꠀꠞ ꠅꠃ ꠚꠣꠇꠦ ꠞꠣꠢꠦꠟꠣꠄ ꠔꠣꠘ ꠛꠣꠚꠞ ꠝꠥꠞ꠆ꠔꠤ ꠅꠇꠟ ꠌꠥꠞꠤ ꠇꠞꠤꠟꠤꠟꠣ। 20 ꠁꠀꠇꠥꠛꠦ ꠔꠣꠘ ꠎꠣꠅꠀꠞ ꠇꠕꠣ ꠅꠞꠣꠝꠤ ꠟꠣꠛꠘꠞꠦ ꠘꠣ ꠎꠣꠘꠣꠁꠀ ꠔꠣꠘꠞꠦ ꠐꠉꠤꠟꠣ। 21 ꠀꠞ ꠔꠣꠁꠘ ꠢꠇ꠆ꠇꠟꠔꠣ ꠟꠁꠀ ꠜꠣꠉꠤꠀ, ꠚꠥꠞꠣꠔ ꠉꠣꠋ ꠙꠣꠞ ꠅꠁꠀ ꠉꠤꠟꠤꠅꠖꠞ ꠙꠣꠠꠞ ꠍꠣꠝꠘꠦꠖꠤ ꠎꠣꠅꠀꠔ ꠞꠁꠟꠣ।

22 ꠎꠣꠅꠀꠞ ꠔꠤꠘ ꠖꠤꠘ ꠛꠣꠖꠦ ꠟꠣꠛꠘꠦ ꠢꠥꠘꠟꠣ ꠎꠦꠘ, ꠁꠀꠇꠥꠛ ꠜꠣꠉꠤꠀ ꠉꠦꠍꠂꠘꠉꠤ। 23 ꠅꠃ ꠔꠣꠁꠘ ꠈꠦꠡ-ꠇꠥꠐꠥꠝꠞꠦ ꠟꠁꠀ, ꠁꠀꠇꠥꠛꠞ ꠈꠞꠦ ꠅꠁꠀ ꠡꠣꠔ ꠖꠤꠘꠞ ꠙꠕ ꠉꠤꠀ, ꠉꠤꠟꠤꠅꠖꠞ ꠙꠣꠠꠅ ꠔꠣꠞꠣꠞ ꠟꠣꠉꠣꠟ ꠙꠣꠁꠟꠣ। 24 ꠅꠁꠟꠦ ꠞꠣꠁꠔꠞ ꠛꠣꠟꠣ ꠀꠟ꠆ꠟꠣꠄ ꠈꠥꠀꠛꠦ ꠅꠞꠣꠝꠤ ꠟꠣꠛꠘꠞ ꠉꠦꠍꠦ ꠀꠁꠀ ꠇꠁꠟꠣ, “ꠈꠛꠞꠖꠣꠞ! ꠁꠀꠇꠥꠛꠞꠦ ꠜꠣꠟꠣ-ꠛꠥꠞꠣ ꠇꠥꠘ꠆ꠔꠣꠃ ꠇꠁꠅ ꠘꠣ।”

25 ꠁꠀꠇꠥꠛꠦ ꠙꠣꠠꠞ ꠝꠣꠎꠦ ꠔꠣꠝ꠆ꠛꠥ ꠉꠣꠠꠤꠍꠟꠣ, ꠀꠞ ꠟꠣꠛꠘꠦ ꠉꠤꠀ ꠔꠣꠘꠞꠦ ꠅꠘꠅꠃ ꠟꠣꠉꠣꠟ ꠙꠣꠁꠟꠤꠟꠣ, ꠔꠦꠃ ꠟꠣꠛꠘ ꠀꠞ ꠔꠣꠘ ꠈꠦꠡ-ꠇꠥꠐꠥꠝ ꠅꠇꠟꠦꠅ ꠉꠤꠟꠤꠅꠖꠞ ꠢꠃ ꠙꠣꠠꠞ ꠝꠣꠎꠦ ꠔꠣꠝ꠆ꠛꠥ ꠉꠣꠠꠤꠟꠣ। 26 ꠛꠣꠖꠦ ꠟꠣꠛꠘꠦ ꠁꠀꠇꠥꠛꠞꠦ ꠇꠁꠟꠣ, “ꠔꠥꠝꠤ ꠇꠦꠘꠦ ꠁꠔꠣ ꠇꠞꠟꠣꠄ? ꠀꠝꠣꠞꠦ ꠐꠉꠤꠀ ꠀꠝꠣꠞ ꠙꠥꠠꠤꠘ꠆ꠔꠞꠦ ꠇꠦꠘꠦ ꠎꠥꠖ꠆ꠖꠞ ꠛꠘ꠆ꠖꠤꠞ ꠟꠣꠈꠣꠘ ꠟꠁꠀ ꠀꠁꠟꠣꠄ? 27 ꠇꠦꠘꠦ ꠔꠥꠝꠤ ꠗꠥꠇꠣ ꠖꠤꠀ ꠀꠝꠣꠞꠦ ꠘꠣ ꠎꠣꠘꠣꠁꠀ, ꠟꠥꠇꠣꠁꠀ ꠜꠣꠉꠤꠀ ꠀꠁꠟꠣꠄ? ꠀꠝꠣꠞꠦ ꠎꠣꠘꠣꠁꠟꠦ ꠔ ꠀꠝꠤ ꠈꠥꠡꠤ-ꠛꠣꠡꠤ ꠇꠞꠤꠀ, ꠖꠥꠔꠣꠞꠣ ꠀꠞ ꠝꠘ꠆ꠖꠤꠞꠣ ꠛꠣꠎꠣꠁꠀ ꠉꠣꠘ ꠉꠣꠁꠀ, ꠔꠥꠝꠣꠞꠦ ꠛꠤꠖꠣꠄ ꠖꠤꠟꠣꠝ ꠅꠘꠦ। 28 ꠔꠥꠝꠤ ꠀꠝꠣꠞ ꠙꠥꠠꠤꠘ꠆ꠔꠞꠦ ꠀꠞ ꠘꠣꠔꠤꠘꠡꠣꠞꠦꠅ ꠢꠥꠋꠉꠣ ꠖꠤꠔꠦꠅ ꠖꠤꠟꠣꠄ ꠘꠣ, ꠛꠦꠀꠈꠟꠞ ꠝꠔ ꠇꠣꠝ ꠇꠞꠟꠣꠄ। 29 ꠅꠈꠘ ꠀꠝꠤ ꠔ ꠔꠥꠝꠞꠣꠞ ꠈꠦꠔꠤ ꠇꠞꠔꠣꠝ ꠙꠣꠞꠝꠥ, ꠅꠁꠟꠦ ꠔꠥꠝꠞꠣꠞ ꠛꠣꠚ-ꠖꠣꠖꠣꠞ ꠀꠟ꠆ꠟꠣꠄ ꠉꠔ ꠞꠣꠁꠔ ꠀꠝꠣꠞꠦ ꠇꠁꠍꠂꠘ, ‘ꠈꠛꠞꠖꠣꠞ! ꠁꠀꠇꠥꠛꠞꠦ ꠜꠣꠟꠣ-ꠛꠥꠞꠣ ꠇꠥꠘ꠆ꠔꠣꠃ ꠇꠁꠅ ꠘꠣ।’ 30 ꠔꠥꠝꠣꠞ ꠛꠣꠚꠞ ꠛꠣꠠꠤꠔ ꠎꠣꠅꠀꠞ ꠟꠣꠉꠤ ꠝꠘꠦ ꠇꠣꠘ꠆ꠖꠤꠍꠤꠟ ꠇꠞꠤ, ꠔꠥꠝꠤ ꠜꠣꠉꠤꠀ ꠀꠁꠍ ꠝꠣꠘꠟꠣꠝ, ꠔꠦ ꠀꠝꠣꠞ ꠖꠦꠛꠔꠣ ꠅꠇꠟ ꠇꠦꠘꠦ ꠌꠥꠞꠤ ꠇꠞꠟꠣꠄ?” 31 ꠁꠀꠇꠥꠛꠦ ꠎꠥꠀꠙ ꠖꠤꠟꠣ, “ꠀꠝꠤ ꠒꠞꠣꠁꠍꠟꠣꠝ, ꠝꠘꠅ ꠇꠞꠍꠟꠣꠝ, ꠀꠙꠘꠦ ꠎꠥꠞ ꠇꠞꠤꠀ ꠀꠙꠘꠣꠞ ꠙꠥꠠꠤꠘ꠆ꠔꠞꠦ, ꠀꠝꠣꠞ ꠉꠦꠍ ꠕꠘꠦ ꠇꠣꠠꠤꠀ ꠞꠣꠈꠤ ꠖꠤꠛꠣ। 32 ꠔꠦ ꠅꠈꠘ ꠎꠣꠞ ꠉꠦꠍꠦ ꠀꠙꠘꠣꠞ ꠖꠦꠛꠔꠣꠁꠘ ꠙꠣꠁꠛꠣ, ꠔꠣꠞꠦ ꠎꠤꠔꠣ ꠞꠣꠈꠔꠣꠝ ꠘꠣꠄ। ꠀꠝꠞꠣꠞ ꠈꠦꠡ-ꠇꠥꠐꠝꠞ ꠍꠣꠝꠘꠦ ꠢꠇ꠆ꠇꠟꠔꠣ ꠔꠣꠟ꠆ꠟꠣꠡ ꠇꠞꠤꠀ ꠎꠥꠖꠤ ꠀꠙꠘꠣꠞ ꠇꠥꠘ꠆ꠔꠣ ꠙꠣꠁꠘ, ꠔꠣꠁꠟꠦ ꠘꠦꠃꠇ꠆ꠇꠣꠉꠤ।” ꠢꠃ ꠝꠥꠞ꠆ꠔꠤ ꠅꠇꠟ ꠎꠦꠘ ꠞꠣꠢꠦꠟꠣꠄ ꠌꠥꠞꠤ ꠇꠞꠍꠂꠘ, ꠁꠔꠣ ꠔ ꠁꠀꠇꠥꠛꠦ ꠎꠣꠘꠂꠘ ꠘꠣ।

33 ꠅꠃ ꠟꠣꠛꠘꠦ ꠁꠀꠇꠥꠛ, ꠟꠦꠀ ꠀꠞ ꠖꠥꠁꠅ ꠛꠣꠘ꠆ꠖꠤꠞ ꠔꠣꠝ꠆ꠛꠥꠔ ꠢꠣꠝꠣꠁꠀ ꠢꠇꠟꠔꠣ ꠔꠥꠇꠣꠁꠀ ꠇꠥꠘ꠆ꠔꠣ ꠘꠣ ꠙꠣꠁꠀ, ꠢꠦꠡꠦ ꠟꠦꠀꠞ ꠔꠣꠝ꠆ꠛꠥ ꠕꠘꠦ ꠞꠣꠢꠦꠟꠣꠞ ꠔꠣꠝ꠆ꠛꠥꠔ ꠉꠤꠀ ꠢꠣꠝꠣꠁꠟꠣ। 34 ꠞꠣꠢꠦꠟꠣꠄ ꠁ ꠝꠥꠞ꠆ꠔꠤ ꠅꠇꠟ ꠘꠤꠀ ꠃꠐꠞ ꠉꠖ꠆ꠖꠤꠞ ꠜꠤꠔꠞꠦ ꠕꠁꠀ, ꠔꠣꠁꠘ ꠅꠃ ꠉꠖ꠆ꠖꠤꠞ ꠃꠙꠞꠦ ꠛꠁꠟꠣ। ꠟꠣꠛꠘꠦ ꠔꠣꠘ ꠔꠣꠝ꠆ꠛꠥꠞ ꠢꠇꠟꠔꠣ ꠔꠥꠇꠣꠁꠀ ꠢꠘꠅ-ꠅ ꠁꠔꠣ ꠙꠣꠁꠟꠣ ꠘꠣ। 35 ꠀꠞ ꠞꠣꠢꠦꠟꠣꠄ ꠔꠣꠘ ꠛꠣꠚꠞꠦ ꠇꠁꠟꠣ, “ꠛꠣꠎꠣꠘ ꠀꠝꠤ ꠃꠑꠤꠀ ꠃꠛꠣꠁꠔꠣꠝ ꠙꠣꠞꠤꠀꠞ ꠘꠣ ꠇꠞꠤ ꠀꠙꠘꠦ ꠛꠦꠎꠣꠞ ꠅꠁꠘ ꠘꠣ ꠎꠦꠘ, ꠛꠦꠐꠤꠀꠞꠣ ꠛꠦꠝꠣꠞꠞ ꠟꠣꠉꠤ ꠀꠝꠣꠞ ꠡꠞꠤꠟ ꠈꠣꠞꠣꠙ।” ꠅꠃ ꠟꠣꠛꠘꠦ ꠢꠤ ꠝꠥꠞ꠆ꠔꠤ ꠅꠇꠟ ꠀꠞ ꠔꠥꠇꠣꠁꠀ ꠙꠣꠁꠟꠣ ꠘꠣ।

36 ꠢꠦꠡꠦ ꠁꠀꠇꠥꠛꠦ ꠉꠥꠍꠣ ꠅꠁꠀ ꠟꠣꠛꠘꠞꠦ ꠍꠤꠠꠣꠁꠀ ꠇꠁꠟꠣ, “ꠀꠝꠣꠞ ꠅꠙꠞꠣꠗ ꠇꠤꠀꠘꠅ? ꠀꠝꠤ ꠇꠤꠔꠣ ꠖꠥꠡ ꠇꠞꠍꠤ, ꠀꠙꠘꠦ ꠀꠝꠣꠞ ꠈꠞꠦ ꠅꠁꠀ ꠅꠃꠟꠣ ꠈꠦꠖꠣꠘꠤꠔ ꠀꠁꠟꠣ? 37 ꠀꠝꠣꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠀꠃꠟꠣꠁꠀ ꠀꠙꠘꠣꠞ ꠊꠞꠞ ꠇꠥꠘ ꠎꠤꠘꠤꠡꠈꠣꠘ ꠙꠣꠁꠟꠣ? ꠙꠣꠁꠟꠦ ꠁꠔꠣ ꠀꠙꠘꠣꠞ-ꠀꠝꠣꠞ ꠈꠦꠡ-ꠇꠥꠐꠝꠞ ꠍꠣꠝꠘꠦ ꠞꠣꠈꠃꠇ꠆ꠇꠣ, ꠔꠣꠞꠣ ꠀꠝꠞꠣꠞ ꠛꠤꠌꠣꠞ ꠇꠞꠛꠣ। 38 ꠀꠝꠤ ꠁ ꠛꠤꠡ ꠛꠞꠍ ꠀꠙꠘꠣꠞ ꠟꠉꠦ ꠀꠍꠟꠣꠝ। ꠄꠞ ꠝꠣꠎꠦ ꠀꠙꠘꠣꠞ ꠇꠥꠘꠥ ꠝꠦꠠꠤ ꠛꠣ ꠍꠣꠉꠤꠞ ꠙꠦꠐꠞ ꠛꠣꠁꠌ꠆ꠌꠣ ꠘꠡ꠆ꠐ ꠅꠁꠍꠦ ꠘꠣ ꠛꠣ ꠀꠙꠘꠣꠞ ꠙꠣꠟꠞ ꠇꠥꠘꠥ ꠝꠦꠠꠣꠅ ꠀꠝꠤ ꠈꠣꠁꠍꠤ ꠘꠣ। 39 ꠀꠞ ꠎꠋꠟꠤ ꠎꠣꠘꠥꠀꠞꠦ ꠝꠣꠞꠣ ꠇꠥꠘꠥ ꠙꠡꠥꠅ ꠀꠙꠘꠣꠞ ꠉꠦꠍꠦ ꠀꠘꠍꠤ ꠘꠣ, ꠁꠔꠣ ꠀꠝꠤ ꠘꠤꠎꠦꠃ ꠙꠥꠞꠤꠀ ꠖꠤꠍꠤ। ꠖꠤꠘꠅ ꠛꠣ ꠞꠣꠁꠔ ꠇꠥꠘꠥ ꠙꠡꠥ ꠌꠥꠞꠤ ꠅꠁꠟꠦ, ꠀꠙꠘꠦ ꠀꠝꠣꠞ ꠉꠦꠍ ꠕꠣꠇꠤ ꠜꠞꠤꠀ ꠟꠁꠍꠂꠘ। 40 ꠀꠝꠤ ꠅꠃꠟꠣ ꠖꠤꠘ ꠇꠣꠐꠣꠁꠍꠤ, ꠖꠤꠘꠅ ꠎꠟꠍꠤ ꠉꠞꠝꠦ ꠀꠞ ꠞꠣꠁꠔꠦ ꠇꠣꠙꠍꠤ ꠡꠤꠔꠦ। ꠀꠝꠣꠞ ꠌꠈꠥꠔ ꠊꠥꠝ ꠀꠁꠔ ꠘꠣ। 41 ꠎꠦ ꠛꠤꠡ ꠛꠞꠍ ꠀꠙꠘꠣꠞ ꠛꠣꠠꠤꠔ ꠞꠁꠍꠤ, ꠄꠞ ꠌꠃꠖ꠆ꠖ ꠛꠞꠍ ꠀꠝꠤ ꠀꠙꠘꠣꠞ ꠖꠥꠁ ꠙꠥꠠꠤꠞ ꠟꠣꠉꠤ ꠉꠥꠟꠣꠝꠤ ꠇꠞꠍꠤ, ꠀꠞ ꠍꠄ ꠛꠞꠍ ꠉꠦꠍꠦ ꠀꠙꠘꠣꠞ ꠙꠡꠥꠞ ꠟꠣꠉꠤ। ꠄꠞ ꠝꠣꠎꠦ ꠀꠙꠘꠦ ꠖꠡ-ꠖꠡꠛꠣꠞ ꠀꠝꠣꠞ ꠛꠦꠔꠘꠅ ꠛꠖꠟꠣꠁꠍꠂꠘ। 42 ꠀꠟ꠆ꠟꠣ ꠙꠣꠇ, ꠎꠣꠘꠞꠦ ꠀꠝꠣꠞ ꠛꠣꠚ ꠁꠍꠢꠣꠇꠦ ꠝꠣꠛꠥꠖ ꠢꠤꠡꠣꠛꠦ ꠒꠞꠣꠁꠔꠣ, ꠎꠦꠁꠘ ꠀꠝꠣꠞ ꠖꠣꠖꠣ ꠁꠛ꠆ꠞꠣꠢꠤꠝꠞꠅ ꠝꠣꠛꠥꠖ, ꠔꠣꠁꠘ ꠎꠥꠖꠤ ꠀꠝꠣꠞ ꠟꠉꠦ ꠘꠣ ꠕꠣꠇꠔꠣ, ꠔꠦ ꠢꠣꠍꠣꠃ ꠅꠈꠘ ꠀꠙꠘꠦ ꠀꠝꠣꠞꠦ ꠈꠣꠟꠤ ꠀꠔꠦ ꠛꠤꠖꠣꠄ ꠖꠤꠟꠣ ꠅꠘꠦ। ꠀꠟ꠆ꠟꠣꠄ ꠀꠝꠣꠞ ꠝꠦꠘꠔ ꠀꠞ ꠖꠥꠈ ꠖꠦꠈꠍꠂꠘ। ꠄꠞꠟꠣꠉꠤꠃ ꠔꠣꠁꠘ ꠇꠣꠁꠟ ꠞꠣꠁꠔ ꠀꠙꠘꠣꠞꠦ ꠗꠝꠇꠣꠁꠍꠂꠘ।”

43 ꠟꠣꠛꠘꠦ ꠁꠀꠇꠥꠛꠞꠦ ꠎꠥꠀꠙ ꠖꠤꠟꠣ, “ꠁ ꠙꠥꠠꠤꠘ ꠀꠝꠣꠞꠃ ꠙꠥꠠꠤꠘ, ꠀꠞ ꠅꠃ ꠢꠥꠞꠥꠔ꠆ꠔꠣꠁꠘ ꠀꠝꠣꠞꠃ ꠘꠣꠔꠤꠘꠡꠣ, ꠀꠞ ꠁ ꠙꠡꠥꠞ ꠙꠣꠟ ꠅꠇꠟꠅ ꠀꠝꠣꠞ। ꠔꠥꠝꠤ ꠅꠘꠅ ꠎꠔꠔꠣ ꠖꠦꠈꠞꠣꠄ, ꠢꠇꠟꠔꠣꠃ ꠀꠝꠣꠞ, ꠔꠣ-ꠅ ꠀꠝꠣꠞ ꠙꠥꠠꠤꠘ꠆ꠔꠞꠦ ꠛꠣ ꠔꠣꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠀꠝꠤ ꠀꠞ ꠇꠤꠔꠣ ꠇꠞꠝꠥ? 44 ꠀꠅ, ꠀꠝꠞꠣ ꠖꠥꠁꠅꠎꠘꠦ ꠄꠇ ꠌꠥꠇ꠆ꠔꠤ ꠇꠞꠤꠟꠣꠁ। ꠅꠃ ꠌꠥꠇ꠆ꠔꠤꠞ ꠘꠤꠡꠣꠘꠣꠐꠣ ꠔꠥꠝꠣꠞ-ꠀꠝꠣꠞ ꠝꠣꠎꠦ ꠡꠣꠇ꠆ꠇꠤ ꠞꠁꠛ।” 45 ꠅꠃ ꠁꠀꠇꠥꠛꠦ ꠄꠇ ꠙꠣꠔ꠆ꠔꠞ ꠟꠁꠀ ꠈꠥꠐꠤ ꠉꠣꠠꠤꠟꠣ। 46 ꠀꠞ ꠔꠣꠘ ꠈꠦꠡ-ꠇꠥꠐꠥꠝ ꠅꠇꠟꠞꠦ ꠇꠁꠟꠣ, “ꠀꠙꠘꠣꠞꠣꠅ ꠙꠣꠔ꠆ꠔꠞ ꠀꠘꠃꠇ꠆ꠇꠣ।” ꠔꠦꠃ ꠔꠣꠞꠣꠅ ꠙꠣꠔ꠆ꠔꠞ ꠀꠘꠤꠀ ꠄꠇ ꠜꠤꠐꠣ ꠛꠣꠘꠣꠁꠟꠣ, ꠢꠦꠡꠦ ꠅꠃ ꠜꠤꠐꠣꠞ ꠉꠦꠍꠦ ꠈꠣꠘꠤ ꠈꠣꠁꠟꠣ। 47 ꠟꠣꠛꠘꠦ ꠢꠃ ꠜꠤꠐꠣꠞ ꠘꠣꠝ ꠞꠣꠈꠟꠣ ꠎꠤꠉꠞ-ꠡꠣꠢꠖꠥꠔꠣ [ꠝꠣꠘꠤ, ꠡꠣꠇ꠆ꠇꠤ-ꠜꠤꠐꠣ] ꠅꠁꠟꠦ ꠁꠀꠇꠥꠛꠦ ꠄꠞ ꠘꠣꠝ ꠞꠣꠈꠟꠣ ꠉꠟ-ꠄꠖ। 48 ꠟꠣꠛꠘꠦ ꠇꠁꠟꠣ, “ꠅꠃ ꠜꠤꠐꠣ ꠅꠈꠘ ꠕꠘꠦ ꠔꠥꠝꠣꠞ-ꠀꠝꠣꠞ ꠡꠣꠇ꠆ꠇꠤ ꠅꠁꠟ।” ꠄꠞꠟꠣꠉꠤ ꠅꠃ ꠜꠤꠐꠣꠞ ꠘꠣꠝ ꠅꠁꠟ ꠉꠟ-ꠄꠖ, 49 ꠀꠞ ꠅꠃ ꠈꠥꠐꠤꠞ ꠘꠣꠝ ꠅꠁꠟ ꠝꠤꠡꠙꠣ [ꠝꠣꠘꠤ, ꠙꠣꠢꠣꠞꠣꠞ ꠎꠣꠉꠣ]। ꠟꠣꠛꠘꠦ ꠇꠁꠟꠣ, “ꠀꠝꠞꠣ ꠎꠦꠛꠟꠣ ꠢꠞꠤꠀ ꠎꠣꠁꠝꠥꠉꠤ ꠅꠃ ꠡꠝꠄ ꠝꠣꠛꠥꠖꠦꠃ ꠔꠥꠝꠣꠞ-ꠀꠝꠣꠞ ꠙꠣꠢꠣꠞꠣ ꠖꠤꠛꠣ। 50 ꠔꠥꠝꠤ ꠎꠥꠖꠤ ꠀꠝꠣꠞ ꠙꠥꠠꠤꠘ꠆ꠔꠞꠦ ꠖꠥꠈ ꠖꠦꠅ ꠛꠣ ꠀꠝꠣꠞ ꠙꠥꠠꠤꠘ ꠍꠣꠠꠣ ꠀꠞ ꠇꠦꠃꠞꠞꠦ ꠛꠤꠀ ꠇꠞꠅ, ꠔꠣꠁꠟꠦ ꠇꠥꠘꠥ ꠝꠣꠘꠥꠡ ꠀꠝꠞꠣꠞ ꠟꠉꠦ ꠘꠣ ꠞꠁꠟꠦꠅ ꠀꠟ꠆ꠟꠣ ꠀꠝꠞꠣꠞ ꠡꠣꠇ꠆ꠇꠤ ꠞꠁꠟꠣ।”

51 ꠟꠣꠛꠘꠦ ꠁꠀꠇꠥꠛꠞꠦ ꠀꠞꠅ ꠇꠁꠟꠣ, “ꠅꠃ ꠜꠤꠐꠣ ꠛꠣꠄ ꠀꠞ ꠅꠃ ꠈꠥꠐꠤꠞ ꠛꠣꠄ ꠌꠣꠅ, ꠁꠐꠣ ꠔꠥꠝꠣꠞ-ꠀꠝꠣꠞ ꠝꠣꠎꠈꠣꠘꠅ ꠀꠝꠤ ꠉꠣꠠꠟꠣꠝ। 52 ꠁ ꠖꠥꠁꠅꠐꠣ ꠔꠥꠝꠣꠞ-ꠀꠝꠣꠞ ꠡꠣꠇ꠆ꠇꠤ ꠞꠁꠟ। ꠔꠥꠝꠤꠅ ꠁꠋꠡꠣ ꠇꠞꠤ ꠅꠃ ꠜꠤꠐꠣ ꠀꠞ ꠈꠥꠐꠤ ꠒꠤꠋꠉꠣꠁꠀ ꠀꠁꠛꠣꠄ ꠘꠣ ꠀꠞ ꠀꠝꠤꠅ ꠛꠥꠞꠣꠁꠞ ꠘꠤꠅꠔꠦ ꠁꠔꠣ ꠒꠤꠋꠉꠣꠁꠀ ꠎꠣꠁꠔꠣꠝ ꠘꠣꠄ। 53 ꠁꠛ꠆ꠞꠣꠢꠤꠝꠞ ꠀꠟ꠆ꠟꠣ, ꠘꠣꠢꠥꠞꠞ ꠃꠙꠞꠀꠟꠣ ꠀꠞ ꠔꠣꠞꠣꠞ ꠛꠣꠚꠞ ꠃꠙꠞꠀꠟꠣꠄ ꠔꠥꠝꠣꠞ-ꠀꠝꠣꠞ ꠛꠤꠌꠣꠞ ꠇꠞꠛꠣ।” ꠀꠞ ꠁꠀꠇꠥꠛꠦ, ꠔꠣꠘ ꠛꠣꠚ ꠁꠍꠢꠣꠇꠦ ꠎꠣꠘꠞꠦ ꠒꠞꠣꠁꠔꠣ ꠔꠣꠘ ꠘꠣꠝꠦ ꠇꠍꠝ ꠇꠞꠟꠣ। 54 ꠁꠀꠇꠥꠛꠦ ꠢꠃ ꠙꠣꠠꠞ ꠃꠙꠞꠦ ꠇꠥꠞꠛꠣꠘꠤ ꠇꠞꠤꠀ ꠔꠣꠘ ꠈꠦꠡ-ꠇꠥꠐꠥꠝ ꠅꠇꠟꠞꠦ ꠈꠣꠅꠀꠞ ꠖꠣꠅꠀꠔ ꠖꠤꠟꠣ। ꠈꠣꠅꠀ-ꠖꠣꠅꠀ ꠡꠦꠡ ꠇꠞꠤꠀ ꠢꠣꠞꠤ ꠔꠣꠞꠣ ꠢꠃ ꠙꠣꠠꠞ ꠝꠣꠎꠦ ꠞꠣꠁꠔ ꠞꠁꠟꠣ।

55 ꠛꠣꠖꠞ ꠖꠤꠘ ꠚꠎꠞꠦ ꠟꠣꠛꠘꠦ ꠔꠣꠘ ꠙꠥꠠꠤꠘ꠆ꠔꠞꠦ ꠀꠞ ꠘꠣꠔꠤꠘꠡꠣꠞꠦ ꠢꠥꠋꠉꠣ ꠖꠤꠀ ꠖꠥꠀ ꠇꠞꠟꠣ, ꠢꠦꠡꠦ ꠔꠣꠘ ꠛꠣꠠꠤ ꠝꠥꠈꠣ ꠙꠕ ꠖꠤꠟꠣ।