1 ꠁꠀꠇꠥꠛꠦ ꠌꠣꠁꠀ ꠖꠦꠈꠟꠣ, ꠔꠣꠘ ꠛꠠ ꠜꠣꠁ ꠁꠡꠦ ꠌꠣꠁꠞ-ꠡ ꠝꠣꠘꠥꠡ ꠟꠁꠀ ꠀꠉꠥꠀꠁꠀ ꠀꠁꠞꠣ। ꠅꠃ ꠔꠣꠁꠘ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠔꠣꠘ ꠛꠤꠛꠤꠘ ꠟꠦꠀ ꠀꠞ ꠞꠣꠢꠦꠟꠣ ꠀꠞ ꠖꠥꠁꠅ ꠛꠣꠘ꠆ꠖꠤꠞ ꠉꠦꠍꠦ ꠛꠣꠐꠤꠀ ꠖꠤꠟꠣꠁꠟꠣ। 2 ꠔꠣꠁꠘ ꠔꠣꠘ ꠛꠣꠘ꠆ꠖꠤꠘ ꠀꠞ ꠔꠣꠞꠣꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠍꠣꠝꠘꠞ ꠇꠣꠔꠣꠞꠅ ꠞꠣꠈꠟꠣ। ꠛꠣꠖꠦ ꠟꠦꠀ ꠀꠞ ꠔꠣꠘ ꠢꠥꠞꠥꠔ꠆ꠔꠣꠁꠘ꠆ꠔꠞꠦ, ꠢꠇꠟ ꠢꠦꠡꠦ ꠞꠣꠈꠟꠣ ꠞꠣꠢꠦꠟꠣ ꠀꠞ ꠁꠃꠍꠥꠚꠞꠦ। 3 ꠀꠞ ꠘꠤꠎꠦ ꠄꠞꠣꠞ ꠀꠉꠦ ꠉꠤꠀ ꠡꠣꠔꠛꠣꠞ ꠝꠣꠐꠤꠔ ꠍꠁꠎꠖꠣ ꠇꠞꠤꠀ ꠔꠣꠘ ꠜꠣꠁꠞ ꠉꠦꠍꠦ ꠀꠎꠤꠞ ꠅꠁꠟꠣ।

4 ꠔꠦꠃ ꠁꠡꠦ ꠔꠣꠘ ꠉꠦꠍꠦ ꠖꠃꠠꠣꠁꠀ ꠀꠁꠀ ꠀꠁꠘ꠆ꠎꠣ ꠇꠞꠤ ꠉꠟꠣꠔ ꠗꠞꠤꠀ ꠢꠥꠋꠉꠣ ꠖꠤꠟꠣ, ꠀꠞ ꠖꠥꠁꠅꠎꠘꠦ ꠇꠣꠘ꠆ꠖꠤꠔꠣ ꠟꠣꠉꠟꠣ। 5 ꠛꠣꠖꠦ ꠁꠡꠦ ꠝꠥꠈ ꠔꠥꠟꠤꠀ ꠅꠃ ꠛꠦꠐꠤꠘ ꠀꠞ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠖꠦꠈꠤꠀ ꠎꠤꠇꠣꠁꠟꠣ, “ꠔꠥꠝꠣꠞ ꠟꠉꠦ ꠄꠞꠣ ꠇꠦꠉꠥ?” ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠄ ꠔꠣꠘ ꠞꠢꠝꠔꠦ ꠀꠙꠘꠣꠞ ꠉꠥꠟꠣꠝꠞꠦ ꠁ ꠢꠥꠞꠥꠔ꠆ꠔꠣꠁꠘ ꠖꠤꠍꠂꠘ।” 6 ꠔꠦꠃ ꠙꠄꠟꠣ ꠛꠣꠘ꠆ꠖꠤ ꠅꠇꠟꠦ ꠁꠡʼꠞ ꠇꠣꠍꠣꠔ ꠀꠁꠀ ꠔꠣꠞꠣꠞ ꠢꠥꠞꠥꠔ꠆ꠔꠣ ꠟꠁꠀ ꠝꠣꠕꠣ ꠘꠥꠀꠁꠟꠣ, 7 ꠛꠣꠖꠦ ꠟꠦꠀꠄꠅ ꠢꠥꠞꠥꠔ꠆ꠔꠣꠁꠘ꠆ꠔꠞꠦ ꠟꠁꠀ ꠀꠉꠥꠀꠁꠀ ꠝꠣꠕꠣ ꠘꠥꠀꠁꠟꠣ, ꠢꠦꠡꠦ ꠁꠃꠍꠥꠚ ꠀꠞ ꠞꠣꠢꠦꠟꠣꠄ ꠉꠤꠀ ꠝꠣꠕꠣ ꠘꠥꠀꠁꠟꠣ। 8 ꠔꠦꠃ ꠁꠡꠦ ꠇꠁꠟꠣ, “ꠙꠕꠅ ꠎꠦꠔꠣ ꠖꠟꠛꠟ ꠖꠦꠈꠟꠣꠝ, ꠁꠔꠣ ꠇꠤꠅꠞ ꠟꠣꠉꠤ?” ꠔꠣꠁꠘ ꠇꠁꠟꠣ, “ꠀꠝꠣꠞ ꠝꠥꠘꠤꠛꠞ ꠉꠦꠍꠦ ꠖꠄꠀ ꠙꠣꠅꠀꠞ ꠟꠣꠉꠤ।” 9 ꠁꠡꠦ ꠇꠁꠟꠣ, “ꠜꠣꠁꠞꠦ, ꠀꠝꠣꠞ ꠛꠃꠔꠔꠣ ꠀꠍꠦ, ꠔꠥꠝꠣꠞ ꠁꠔꠣ ꠔꠥꠝꠣꠞꠃ ꠕꠣꠇꠃꠇ।” 10 ꠔꠣꠁꠘ ꠇꠁꠟꠣ, “ꠎꠤ ꠘꠣ, ꠀꠝꠤ ꠝꠤꠘꠔ ꠇꠞꠤꠀ ꠇꠁꠀꠞ, ꠎꠥꠖꠤ ꠀꠝꠣꠞ ꠛꠣꠄ ꠀꠙꠘꠣꠞ ꠖꠄꠀ ꠅꠄ, ꠔꠣꠁꠟꠦ ꠀꠝꠣꠞ ꠖꠦꠅꠀ ꠁ ꠖꠣꠘ-ꠖꠇ꠆ꠇꠤꠘꠣ ꠀꠙꠘꠦ ꠘꠦꠃꠇ꠆ꠇꠣ। ꠀꠙꠘꠦ ꠎꠦꠛꠟꠣ ꠀꠝꠣꠞꠦ ꠈꠥꠡꠤ ꠝꠘꠦ ꠇꠛꠥꠟ ꠇꠞꠍꠂꠘ, ꠔꠦ ꠀꠙꠘꠣꠞ ꠝꠥꠈ ꠖꠦꠈꠣ ꠀꠞ ꠀꠟ꠆ꠟꠣꠞ ꠖꠤꠖꠣꠞ ꠙꠣꠅꠀ ꠀꠝꠣꠞ ꠟꠣꠉꠤ ꠢꠝꠣꠘ। 11 ꠀꠟ꠆ꠟꠣꠄ ꠀꠝꠣꠞꠦ ꠞꠢꠝꠔ ꠖꠣꠘ ꠇꠞꠍꠂꠘ, ꠀꠝꠣꠞ ꠛꠃꠔꠔꠣ ꠀꠍꠦ ꠀꠞ ꠅꠃ ꠎꠦꠔꠣ ꠃꠙꠢꠣꠞ ꠀꠙꠘꠣꠞ ꠟꠣꠉꠤ ꠀꠘꠍꠤ, ꠁꠔꠣ ꠀꠙꠘꠦ ꠘꠦꠃꠇ꠆ꠇꠣ।” ꠔꠣꠁꠘ ꠅꠃꠟꠣ ꠝꠤꠘꠔ-ꠇꠣꠎ꠆ꠎꠤ ꠇꠞꠣꠄ, ꠁꠡꠦ ꠁꠔꠣ ꠇꠛꠥꠟ ꠇꠞꠟꠣ। 12 ꠁꠡꠦ ꠇꠁꠟꠣ, “ꠌꠟꠅ, ꠀꠝꠞꠣ ꠞꠅꠀꠘꠣ ꠅꠁ, ꠀꠝꠤ ꠔꠥꠝꠣꠞ ꠟꠉꠦ ꠞꠁꠝꠥ।” 13 ꠁꠀꠇꠥꠛꠦ ꠔꠣꠘꠞꠦ ꠇꠁꠟꠣ, “ꠀꠝꠣꠞ ꠝꠥꠘꠤꠛꠦ ꠔ ꠎꠣꠘꠞꠣ, ꠁ ꠢꠥꠞꠥꠔ꠆ꠔꠣ ꠅꠇꠟꠅ ꠢꠥꠞꠥ ꠀꠞ ꠖꠥꠗꠣꠟ ꠉꠣꠁꠀꠁꠘ-ꠝꠦꠠꠤꠘꠅ ꠟꠉꠦ ꠀꠍꠦ, ꠛꠦꠎꠣꠘ ꠅꠁꠀ ꠁꠔꠣꠞꠦ ꠄꠇꠖꠤꠘꠃ ꠀꠐꠣꠁꠟꠦ, ꠢꠇ꠆ꠇꠟꠐꠤ ꠝꠞꠤꠎꠤꠛꠣ। 14 ꠔꠦ ꠝꠥꠘꠤꠛ, ꠀꠙꠘꠦ ꠀꠝꠣꠞ ꠀꠉꠦ ꠎꠣꠃꠇ꠆ꠇꠣꠉꠤ, ꠙꠡꠥꠞ ꠙꠣꠟ ꠀꠞ ꠢꠥꠞꠥꠔ꠆ꠔꠣ ꠅꠇꠟꠞ ꠌꠟꠣꠞ ꠈꠦꠝꠔꠣ ꠛꠥꠎꠤꠀ ꠀꠝꠤ ꠀꠡ꠆ꠔꠦ ꠀꠡ꠆ꠔꠦ ꠍꠦꠁꠞ ꠄꠟꠣꠇꠣꠔ ꠀꠙꠘꠣꠞ ꠉꠦꠍꠦ ꠀꠁꠞꠣꠝ।” 15 ꠁꠡꠦ ꠇꠁꠟꠣ, “ꠔꠣꠁꠟꠦ ꠀꠝꠣꠞ ꠟꠉꠞ ꠅꠔꠣ ꠇꠄꠎꠘꠞꠦ ꠔꠥꠝꠣꠞ ꠉꠦꠍꠦ ꠕꠁꠀ ꠎꠣꠁꠉꠤ।” ꠔꠣꠁꠘ ꠇꠁꠟꠣ, “ꠁꠔꠣꠞ ꠖꠞꠇꠣꠞ ꠇꠤꠔꠣ? ꠀꠝꠣꠞ ꠝꠥꠘꠤꠛꠞ ꠉꠦꠍꠦ ꠀꠝꠤ ꠎꠦ ꠞꠢꠝ ꠙꠣꠁꠍꠤ, ꠅꠐꠣꠃ ꠔ ꠛꠃꠔꠔꠣ।” 16 ꠀꠞ ꠁꠡ ꠢꠃ ꠖꠤꠘꠃ ꠍꠦꠁꠞꠞ ꠛꠣꠄ ꠞꠅꠀꠘꠣ ꠖꠤꠟꠣꠁꠟꠣ। 17 ꠅꠁꠟꠦ ꠁꠀꠇꠥꠛꠦ ꠡꠥꠇ꠆ꠇꠔꠅ ꠙꠃꠍꠤꠀ ꠘꠤꠎꠞ ꠟꠣꠉꠤ ꠒꠦꠞꠣ ꠛꠣꠘꠣꠁꠀ, ꠙꠡꠥꠞ ꠙꠣꠟꠞ ꠟꠣꠉꠤꠅ ꠇꠄꠈꠣꠘ ꠛꠣꠕꠣꠘ ꠛꠣꠘꠣꠁꠟꠣ, ꠔꠦꠃ ꠁ ꠎꠣꠉꠣꠞ ꠘꠣꠝ ꠅꠁꠟ ꠡꠥꠇ꠆ꠇꠔ [ꠝꠣꠘꠤ, ꠒꠦꠞꠣ ꠅꠇꠟ]।

18 ꠙꠖ꠆ꠖꠘ-ꠁꠞꠣꠝ ꠕꠘꠦ ꠛꠣꠞ ꠅꠁꠀ ꠁꠀꠇꠥꠛꠦ, ꠍꠢꠤ-ꠍꠣꠟꠣꠝꠔꠦ ꠇꠦꠘꠣꠘ ꠖꠦꠡꠞ ꠡꠤꠈꠤꠝ ꠐꠣꠃꠘꠅ ꠀꠁꠀ, ꠐꠣꠃꠘꠞ ꠛꠣꠞꠦ ꠔꠣꠝ꠆ꠛꠥꠁꠘ ꠉꠣꠠꠤꠟꠣ। 19 ꠢꠦꠡꠦ ꠅꠃ ꠔꠣꠝ꠆ꠛꠥꠀꠟꠣ ꠎꠝꠤꠘꠈꠣꠘ ꠔꠣꠁꠘ, ꠡꠤꠈꠤꠝꠞ ꠛꠣꠚ ꠢꠝꠥꠞꠞ ꠙꠥꠀꠂꠘ꠆ꠔꠞ ꠉꠦꠍ ꠕꠘꠦ, ꠞꠥꠙꠣꠞ ꠄꠇ-ꠡ ꠐꠦꠇꠣ ꠖꠤꠀ ꠈꠞꠤꠖ ꠇꠞꠟꠣ। 20 ꠀꠞ ꠢꠘꠅ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ ꠄꠞ ꠘꠣꠝ ꠖꠤꠟꠣ ꠄꠟ-ꠁꠟꠥꠢꠦ-ꠁꠍꠞꠣꠁꠟ [ꠝꠣꠘꠤ, ꠀꠟ꠆ꠟꠣ, ꠁꠍꠞꠣꠁꠟꠞ ꠃꠙꠞꠀꠟꠣ]।