34
ꠛꠤꠛꠤ ꠖꠤꠘꠣꠞ ꠟꠉꠦ ꠈꠛꠤꠍꠤ ꠇꠣꠝꠞ ꠛꠖꠟꠣ ꠟꠅꠀ
ꠟꠦꠀꠞ ꠊꠞꠅ ꠖꠤꠘꠣ ꠘꠣꠝꠦ ꠁꠀꠇꠥꠛꠞ ꠎꠦ ꠙꠥꠠꠤ ꠅꠁꠍꠤꠟ, ꠄꠁꠘ ꠄꠇꠖꠤꠘ ꠢꠘꠞ ꠙꠥꠠꠤꠘ꠆ꠔꠞ ꠟꠉꠦ ꠖꠦꠈꠣ ꠇꠞꠣꠔ ꠉꠦꠟꠣ। ꠀꠞ ꠡꠤꠈꠤꠝ ꠘꠣꠝꠞ ꠄꠇꠎꠘ ꠝꠣꠘꠡꠞ ꠌꠃꠈꠅ ꠙꠠꠟꠣ। ꠁ ꠡꠤꠈꠤꠝ ꠀꠍꠤꠟ ꠢꠤꠛ꠆ꠛꠤ ꠎꠣꠔꠤꠞ ꠡꠞ꠆ꠖꠣꠞ ꠢꠝꠥꠞꠞ ꠙꠥꠀ। ꠡꠤꠈꠤꠝꠦ ꠄꠞꠦ ꠎꠥꠞ ꠇꠞꠤ ꠗꠞꠤꠀ ꠘꠤꠀ ꠈꠛꠤꠍꠤ ꠇꠣꠝ ꠇꠞꠤꠟ꠆ꠟ। ꠖꠤꠘꠣꠞ ꠛꠣꠄ ꠔꠣꠞ ꠖꠤꠟ ꠀꠡꠤꠇ ꠅꠁꠉꠦꠟ। ꠢꠦ ꠄꠞꠦ ꠝꠢꠛ꠆ꠛꠔ ꠇꠞꠤ ꠄꠞ ꠟꠉꠦ ꠝꠤꠑꠣ ꠝꠤꠑꠣ ꠝꠣꠔ ꠝꠣꠔꠤꠟ। ꠛꠣꠖꠦ ꠡꠤꠈꠤꠝꠦ ꠔꠣꠞ ꠛꠣꠚ ꠢꠝꠥꠞꠞꠦ ꠇꠁꠟ, “ꠔꠥꠝꠤ ꠅꠃ ꠇꠁꠘꠣꠞꠦ ꠀꠝꠣꠞ ꠟꠉꠦ ꠛꠤꠀꠞ ꠛꠘ꠆ꠖꠛꠡ꠆ꠔ ꠇꠞꠅ।”
ꠁꠀꠇꠥꠛꠦ ꠈꠛꠞ ꠙꠣꠁꠟꠣ, ꠡꠤꠈꠤꠝꠦ ꠔꠣꠘ ꠙꠥꠠꠤꠞꠦ ꠛꠦꠁꠎ꠆ꠎꠔꠤ ꠇꠞꠍꠦ, ꠅꠁꠟꠦ ꠔꠣꠘ ꠙꠥꠀꠂꠘ ꠙꠡꠥꠞ ꠙꠣꠟ ꠟꠁꠀ ꠛꠘ꠆ꠖꠅ ꠕꠣꠇꠣꠄ, ꠔꠣꠁꠘ ꠘꠣ-ꠝꠣꠔꠤꠀ ꠘꠤꠞꠣꠁ ꠞꠁꠟꠣ। ꠡꠤꠈꠤꠝꠞ ꠛꠣꠚ ꠢꠝꠥꠞꠦ ꠁꠀꠇꠥꠛꠞ ꠉꠦꠍꠦ ꠛꠤꠀꠞ ꠝꠣꠔ ꠟꠁꠀ ꠀꠁꠟ, ꠀꠞ ꠁ ꠈꠛꠞ ꠢꠥꠘꠤꠀ ꠁꠀꠇꠥꠛꠞ ꠙꠥꠀꠂꠘꠅ ꠛꠘ꠆ꠖꠅ ꠕꠘꠦ ꠀꠁꠟꠣ। ꠔꠣꠞꠣ ꠛꠦꠕꠣꠄꠀ ꠉꠥꠍꠣ ꠀꠞ ꠉꠞꠝ ꠅꠁꠟꠣ, ꠇꠣꠞꠘ ꠁꠀꠇꠥꠛꠞ ꠙꠥꠠꠤꠞꠦ ꠛꠦꠁꠎ꠆ꠎꠔꠤ ꠇꠞꠣꠄ ꠡꠤꠈꠤꠝꠦ ꠀꠡ꠆ꠔꠣ ꠁꠍꠞꠣꠁꠟꠞ ꠟꠉꠦ ꠛꠦꠁꠎ꠆ꠎꠔꠤ ꠀꠞ ꠘꠣꠎꠣꠁꠎ ꠇꠣꠝ ꠇꠞꠍꠦ।
ꠔꠦꠃ ꠢꠝꠥꠞꠦ ꠄꠞꠣꠞꠦ ꠇꠁꠟ, “ꠀꠙꠘꠣꠞꠣꠞ ꠇꠁꠘꠣꠞ ꠟꠣꠉꠤ ꠀꠝꠣꠞ ꠙꠥꠀ ꠀꠡꠤꠇ ꠅꠁꠉꠦꠍꠦ। ꠖꠄꠀ ꠇꠞꠤ, ꠀꠝꠣꠞ ꠙꠥꠀꠞ ꠟꠉꠦ ꠄꠞ ꠡꠣꠖꠤ ꠖꠤꠟꠣꠃꠇ꠆ꠇꠣ। ꠀꠝꠞꠣꠞ ꠟꠉꠦ ꠇꠥꠐꠥꠝꠤꠔꠣ ꠇꠞꠃꠇ꠆ꠇꠣ, ꠀꠝꠞꠣꠞ ꠇꠁꠘꠣꠁꠘ꠆ꠔꠞꠦ ꠀꠙꠘꠣꠞꠣ ꠘꠦꠃꠇ꠆ꠇꠣ ꠀꠞ ꠀꠙꠘꠣꠞꠣꠞꠔꠣ ꠀꠝꠞꠣꠞꠦ ꠖꠦꠃꠇ꠆ꠇꠣ। 10 ꠀꠞ ꠀꠝꠞꠣꠞ ꠟꠉꠦ ꠕꠣꠇꠃꠇ꠆ꠇꠣ, ꠁ ꠀꠡ꠆ꠔꠣ ꠖꠦꠡꠃ ꠔ ꠍꠣꠝꠘꠦ ꠞꠁꠍꠦ, ꠀꠙꠘꠣꠞꠣ ꠅꠘꠅꠃ ꠕꠣꠇꠂꠘ, ꠇꠣꠄ-ꠇꠣꠞꠛꠣꠞ ꠇꠞꠤꠀ, ꠘꠤꠎꠞ ꠝꠣꠟꠤꠇꠣꠘꠣ ꠇꠣꠁꠝ ꠇꠞꠂꠘ।” 11 ꠡꠤꠈꠤꠝꠦ ꠖꠤꠘꠣꠞ ꠛꠣꠚ-ꠜꠣꠁꠞꠦ ꠇꠁꠟꠣ, “ꠀꠝꠣꠞ ꠛꠣꠄ ꠀꠙꠘꠣꠞꠣ ꠖꠄꠀ ꠇꠞꠂꠘ, ꠀꠙꠘꠣꠞꠣ ꠀꠝꠣꠞ ꠉꠦꠍꠦ ꠎꠦꠔꠣ ꠌꠣꠁꠛꠣ, ꠀꠝꠤ ꠅꠔꠣꠃ ꠖꠤꠝꠥ। 12 ꠝꠢꠞꠣꠘꠣ ꠀꠞ ꠝꠣꠟ-ꠍꠣꠝꠣꠘꠣ ꠀꠙꠘꠣꠞꠣ ꠎꠦꠔꠣ ꠖꠣꠛꠤ ꠇꠞꠛꠣ ꠀꠝꠤ ꠖꠤꠝꠥ, ꠎꠦꠇꠥꠘꠥ ꠟꠣꠈꠣꠘꠃ ꠖꠤꠘꠣꠞꠦ ꠀꠝꠣꠞ ꠟꠉꠦ ꠛꠤꠀ ꠖꠦꠃꠇ꠆ꠇꠣ।”
13 ꠡꠤꠈꠤꠝꠦ ꠔꠣꠞꠣꠞ ꠛꠁꠘꠞꠦ ꠛꠦꠁꠎ꠆ꠎꠔꠤ ꠇꠞꠍꠤꠟ ꠇꠞꠤ ꠁꠀꠇꠥꠛꠞ ꠙꠥꠀꠂꠘ꠆ꠔꠦ ꠔꠣꠞꠦ ꠀꠞ ꠔꠣꠞ ꠛꠣꠚ ꠢꠝꠥꠞꠞꠦ ꠜꠣꠘꠣ ꠖꠦꠈꠣꠁꠀ ꠇꠁꠟꠣ, 14 “ꠝꠍꠟꠝꠣꠘꠤ ꠇꠣꠝ ꠘꠣ ꠇꠞꠣꠁꠟ ꠇꠥꠘꠥ ꠖꠣꠝꠣꠘ꠆ꠖꠞ ꠟꠉꠦ ꠀꠝꠞꠣꠞ ꠛꠁꠘꠞꠦ ꠛꠤꠀ ꠖꠤꠟꠦ ꠀꠝꠞꠣꠞ ꠛꠦꠁꠎ꠆ꠎꠔꠤ ꠅꠁꠛ। 15 ꠅꠁꠟꠦ ꠅꠃ ꠇꠣꠝ ꠇꠞꠟꠦ ꠀꠝꠞꠣ ꠞꠣꠎꠤ ꠅꠁꠝꠥ, ꠀꠙꠘꠣꠞꠣ ꠢꠇꠟ ꠛꠦꠐꠣꠁꠘ꠆ꠔꠦ ꠝꠍꠟꠝꠣꠘꠤ ꠇꠞꠣꠁꠀ, ꠀꠝꠞꠣꠞ ꠟꠣꠈꠣꠘ ꠅꠁꠛꠣ। 16 ꠔꠣꠁꠟꠦ ꠀꠝꠞꠣꠞ ꠙꠥꠠꠤꠘ꠆ꠔꠞꠦ ꠀꠙꠘꠣꠞꠣꠞ ꠉꠦꠍꠦ ꠖꠤꠝꠥ ꠀꠞ ꠀꠙꠘꠣꠞꠣꠞ ꠙꠥꠠꠤꠘ꠆ꠔꠞꠦꠅ ꠀꠝꠞꠣ ꠀꠘꠝꠥ, ꠀꠝꠞꠣꠅ ꠀꠙꠘꠣꠞꠣꠞ ꠟꠉꠦ ꠄꠇ ꠎꠣꠔꠤ ꠅꠁꠀ ꠛꠡꠔ ꠇꠞꠝꠥ। 17 ꠅꠁꠟꠦ ꠀꠙꠘꠣꠞꠣ ꠁ ꠝꠍꠟꠝꠣꠘꠤꠞ ꠇꠕꠣ ꠘꠣ ꠝꠣꠘꠟꠦ, ꠀꠝꠞꠣꠞ ꠇꠁꠘꠣꠞꠦ ꠟꠁꠀ ꠎꠣꠁꠝꠥꠉꠤ।”
18 ꠔꠦꠃ ꠔꠣꠞꠣꠞ ꠁ ꠝꠣꠔꠦ ꠢꠝꠥꠞ ꠀꠞ ꠔꠣꠞ ꠙꠥꠀ ꠡꠤꠈꠤꠝ ꠈꠥꠡꠤ ꠅꠁꠟꠣ। 19 ꠅꠃ ꠡꠤꠈꠤꠝ ꠅꠁꠟ ꠉꠥꠡ꠆ꠐꠤꠞ ꠝꠣꠎꠦ ꠢꠇꠟ ꠕꠘꠦ ꠖꠣꠝꠤ ꠝꠣꠘꠥꠡ। ꠢꠦ ꠖꠦꠞꠤ ꠘꠣ ꠇꠞꠤꠀ ꠇꠕꠣ ꠝꠣꠘꠤꠟꠣꠁꠟ, ꠇꠣꠞꠘ ꠁꠀꠇꠥꠛꠞ ꠙꠥꠠꠤꠞ ꠛꠣꠄ ꠢꠦ ꠀꠡꠤꠇ ꠀꠍꠤꠟ। 20 ꠛꠣꠖꠦ ꠐꠣꠃꠘꠞ ꠖꠥꠀꠞꠞ ꠉꠦꠍꠦ ꠀꠁꠀ, ꠢꠝꠥꠞ ꠀꠞ ꠔꠣꠘ ꠙꠥꠀꠄ ꠢꠇ꠆ꠇꠟ ꠝꠣꠘꠡꠞ ꠟꠉꠦ ꠝꠣꠔꠤꠀ ꠇꠁꠟꠣ, 21 “ꠁ ꠝꠣꠘꠥꠡꠉꠥꠁꠘ꠆ꠔꠦ ꠀꠝꠞꠣꠞꠦ ꠇꠥꠘꠥ ꠎꠣꠝꠦꠟꠣ ꠇꠞꠦꠞ ꠘꠣ। ꠀꠝꠞꠣꠞ ꠖꠦꠡꠅ ꠄꠞꠣꠞ ꠕꠣꠇꠣꠞ ꠟꠣꠉꠤ ꠛꠃꠔ ꠎꠣꠉꠣꠅ ꠀꠍꠦ, ꠔꠦ ꠄꠞꠣ ꠅꠘꠅꠃ ꠕꠣꠇꠃꠇ ꠀꠞ ꠇꠣꠄ-ꠇꠣꠞꠛꠣꠞ ꠇꠞꠃꠇ, ꠀꠝꠞꠣ ꠄꠞꠣꠞ ꠙꠥꠠꠤꠘ꠆ꠔꠞꠦ ꠛꠤꠀ ꠇꠞꠤꠀ ꠀꠘꠤ ꠀꠞ ꠀꠝꠞꠣꠞ ꠙꠥꠠꠤꠘ꠆ꠔꠞꠦꠅ ꠔꠣꠞꠣꠞ ꠉꠦꠍꠦ ꠖꠦꠁ। 22 ꠅꠁꠟꠦ ꠀꠝꠞꠣ ꠄꠇꠈꠣꠘ ꠇꠣꠝ ꠇꠞꠟꠦ, ꠔꠣꠞꠣ ꠀꠝꠞꠣꠞ ꠟꠉꠦ ꠄꠇ ꠎꠣꠔꠤ ꠅꠁꠔꠦ ꠞꠣꠎꠤ ꠀꠍꠂꠘ। ꠇꠣꠝꠐꠣ ꠅꠁꠟ, ꠔꠣꠞꠣꠞ ꠟꠣꠈꠣꠘ ꠀꠝꠞꠣꠞꠅ ꠢꠇ꠆ꠇꠟ ꠛꠦꠐꠣꠁꠘ꠆ꠔꠞ ꠝꠍꠟꠝꠣꠘꠤ ꠇꠞꠣꠘꠤ ꠟꠣꠉꠛ। 23 ꠀꠞ ꠔꠣꠞꠣꠞ ꠉꠞꠥ-ꠝꠦꠠꠣ, ꠝꠣꠟ-ꠍꠣꠝꠣꠘꠣ ꠢꠇ꠆ꠇꠟꠔꠣꠃ ꠔ ꠀꠝꠞꠣꠞ ꠅꠁꠛ, ꠔꠣꠞꠣꠞ ꠇꠕꠣꠄ ꠞꠣꠎꠤ ꠅꠁꠟꠦꠃ ꠔꠣꠞꠣ ꠀꠝꠞꠣꠞ ꠟꠉꠦ ꠕꠣꠇꠛꠣ।” 24 ꠅꠃ ꠐꠣꠃꠘꠞ ꠢꠇꠟ ꠛꠦꠐꠣꠁꠘ ꠢꠝꠥꠞ ꠀꠞ ꠔꠣꠘ ꠙꠥꠀ ꠡꠤꠈꠤꠝꠞ ꠝꠣꠔꠦ ꠞꠣꠎꠤ ꠅꠁꠟ, ꠀꠞ ꠔꠣꠞꠣ ꠢꠇꠟꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ।
25 ꠢꠦꠡꠦ ꠔꠤꠘ ꠖꠤꠘꠞ ꠖꠤꠘ ꠎꠦꠛꠟꠣ ꠢꠇꠟ ꠛꠦꠐꠣꠁꠘ꠆ꠔꠦ ꠝꠍꠟꠝꠣꠘꠤꠞ ꠛꠦꠖꠘꠣꠄ ꠇꠡ꠆ꠐ ꠙꠣꠁꠞꠣ, ꠅꠃ ꠡꠝꠄ ꠖꠤꠘꠣꠞ ꠀꠙꠘ ꠜꠣꠁ ꠁꠀꠇꠥꠛꠞ ꠖꠥꠁ ꠙꠥꠀ ꠡꠤꠝꠤꠅꠘ ꠀꠞ ꠟꠦꠛꠤ, ꠔꠣꠞꠣꠞ ꠔꠟꠥꠀꠞ ꠟꠁꠀ ꠐꠣꠃꠘꠅ ꠢꠣꠝꠣꠁꠀ, ꠄꠞꠣꠞꠦ ꠛꠦ-ꠈꠤꠀꠟꠅ ꠙꠣꠁꠀ ꠢꠇꠟ ꠛꠦꠐꠣꠁꠘ꠆ꠔꠞꠦ ꠝꠣꠞꠤꠟꠤꠟ। 26 ꠔꠣꠞꠣ ꠢꠝꠥꠞ ꠀꠞ ꠔꠣꠘ ꠙꠥꠀ ꠡꠤꠈꠤꠝꠞꠦꠅ ꠔꠟꠥꠀꠞꠖꠤ ꠎꠣꠘꠦ ꠝꠣꠞꠤꠀ ꠡꠤꠈꠤꠝꠞ ꠊꠞ ꠕꠘꠦ ꠖꠤꠘꠣꠞꠦ ꠟꠁꠀ ꠀꠁꠟ। 27 ꠄꠞꠣ ꠔꠣꠞꠣꠞ ꠛꠁꠘꠞꠦ ꠛꠦꠁꠎ꠆ꠎꠔꠤ ꠇꠞꠍꠤꠟ ꠇꠞꠤ, ꠁꠀꠇꠥꠛꠞ ꠢꠇꠟ ꠙꠥꠀꠂꠘ꠆ꠔꠦ ꠝꠞꠣ ꠟꠣꠡꠞ ꠉꠦꠍꠦ ꠀꠁꠀ ꠐꠣꠃꠘꠅ ꠟꠥꠐ-ꠔꠞꠣꠎ ꠇꠞꠟꠣ। 28 ꠀꠞ ꠐꠣꠃꠘꠞ ꠜꠤꠔꠞ-ꠛꠣꠁꠞꠞ ꠉꠞꠥ-ꠉꠣꠗꠣ, ꠍꠣꠉꠟ-ꠝꠦꠠꠣ, ꠀꠞ ꠈꠦꠔꠞ ꠢꠇꠟꠔꠣ ꠟꠥꠐꠤꠀ ꠟꠁꠀ ꠀꠁꠟꠣ। 29 ꠢꠇꠟ ꠝꠣꠟ-ꠍꠣꠝꠣꠘꠣ, ꠙꠥꠀ-ꠙꠥꠠꠤꠘ, ꠛꠦꠐꠤꠘ, ꠀꠞ ꠊꠞꠞ ꠢꠇꠟꠔꠣꠅ ꠟꠥꠐ-ꠙꠣꠐ ꠇꠞꠟꠣ। 30 ꠢꠦꠡꠦ ꠁꠀꠇꠥꠛꠦ ꠡꠤꠝꠤꠅꠘ ꠀꠞ ꠟꠦꠛꠤꠞꠦ ꠇꠁꠟꠣ, “ꠔꠥꠝꠞꠣ ꠁ ꠖꠦꠡꠞ ꠇꠦꠘꠣꠘꠤ ꠀꠞ ꠚꠣꠞꠤꠎꠤ ꠅꠇꠟꠞ ꠉꠦꠍꠦ ꠀꠝꠣꠞꠦ ꠙꠌꠣ-ꠊꠤꠘ꠆ꠘꠣꠞ ꠝꠣꠘꠥꠡ ꠛꠣꠘꠣꠁꠀ ꠝꠍꠤꠛꠔꠅ ꠚꠣꠟꠣꠁꠍ। ꠀꠝꠣꠞ ꠝꠣꠘꠥꠡ ꠇꠝ, ꠅꠈꠘ ꠔꠣꠞꠣ ꠄꠇꠈꠣꠘꠅ ꠅꠁꠀ ꠀꠝꠣꠞꠦ ꠢꠣꠝꠟꠣ ꠇꠞꠟꠦ, ꠀꠝꠤ ꠙꠞꠤꠛꠣꠞꠞ ꠢꠇ꠆ꠇꠟꠞꠦ ꠟꠁꠀ ꠝꠞꠝꠥ।” 31 ꠔꠣꠞꠣ ꠎꠥꠀꠙ ꠖꠤꠟꠣ, “ꠢꠦ ꠀꠝꠞꠣꠞ ꠛꠁꠘꠞꠦ ꠘꠤꠀ ꠈꠣꠘꠇꠤ ꠛꠣꠘꠣꠁꠟꠤꠔ ꠘꠤ?”