1 ꠄꠞꠛꠣꠖꠦ ꠀꠟ꠆ꠟꠣ ꠙꠣꠇꠦ ꠁꠀꠇꠥꠛꠞꠦ ꠇꠁꠟꠣ, “ꠔꠥꠝꠤ ꠢꠤꠞꠛꠣꠞ ꠛꠦꠕꠦꠟꠅ ꠎꠣꠅꠉꠤ। ꠔꠥꠝꠣꠞ ꠜꠣꠁ ꠁꠡʼꠞ ꠉꠦꠍ ꠕꠘꠦ ꠜꠣꠉꠤꠛꠣꠞ ꠛꠣꠟꠣ, ꠎꠦꠁꠘ ꠔꠥꠝꠣꠞꠦ ꠖꠞꠡꠘ ꠖꠤꠍꠟꠣ, ꠢꠃ ꠀꠟ꠆ꠟꠣ ꠙꠣꠇꠞ ꠘꠣꠝꠦ ꠔꠥꠝꠤ ꠢꠘꠅ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠅ।” 2 ꠔꠦꠃ ꠁꠀꠇꠥꠛꠦ ꠔꠣꠘ ꠀꠙꠘ ꠝꠣꠘꠡꠞꠦ ꠀꠞ ꠟꠉꠞ ꠢꠇꠟꠞꠦ ꠇꠁꠟꠣ, “ꠔꠥꠝꠞꠣꠞ ꠉꠦꠍꠦ ꠖꠦꠛꠔꠣꠞ ꠎꠦꠔꠣ ꠝꠥꠞ꠆ꠔꠤꠘ ꠀꠍꠦ, ꠁꠔꠣ ꠢꠇ꠆ꠇꠟꠐꠤ ꠚꠣꠟꠣꠅ; ꠀꠞ ꠢꠇꠟꠦ ꠙꠣꠇ-ꠍꠣꠚ ꠅꠁꠀ, ꠍꠣꠚ-ꠍꠥꠔꠞꠣ ꠟꠦꠛꠣꠍ ꠚꠤꠘ꠆ꠖꠅ। 3 ꠀꠞ ꠌꠟꠅ, ꠀꠝꠞꠣ ꠛꠦꠕꠦꠟꠅ ꠎꠣꠁꠔꠣꠝꠉꠤ। ꠢꠘꠅ ꠀꠝꠤ ꠀꠟ꠆ꠟꠣꠞ ꠘꠣꠝꠦ ꠄꠇꠈꠣꠘ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠝꠥ, ꠎꠦꠁꠘ ꠝꠍꠤꠛꠔꠞ ꠖꠤꠘꠅ ꠀꠝꠣꠞ ꠖꠥꠀ ꠇꠛꠥꠟ ꠇꠞꠍꠟꠣ, ꠀꠞ ꠀꠝꠣꠞ ꠍꠚꠞꠞ ꠟꠉꠤ ꠅꠁꠍꠟꠣ।” 4 ꠔꠦꠃ ꠔꠣꠞꠣꠞ ꠎꠔ ꠟꠣꠈꠣꠘ ꠖꠦꠛꠔꠣꠞ ꠝꠥꠞ꠆ꠔꠤꠘ ꠀꠞ ꠇꠣꠘꠞ ꠎꠦꠅꠞꠣꠔ ꠀꠍꠤꠟ, ꠢꠇꠟꠔꠣ ꠁꠀꠇꠥꠛꠞ ꠀꠔꠅ ꠖꠤꠟꠣꠁꠟꠣ। ꠔꠣꠁꠘ ꠁꠔꠣ ꠘꠤꠀ ꠡꠤꠈꠤꠝ ꠐꠣꠃꠘꠞ ꠇꠣꠘ꠆ꠖꠣꠔ ꠄꠟꠘ ꠉꠣꠍꠞ ꠔꠟꠦ ꠉꠣꠠꠤꠟꠣꠁꠟꠣ।

5 ꠛꠣꠖꠦ ꠔꠣꠞꠣ ꠢꠘ ꠕꠘꠦ ꠞꠅꠀꠘꠣ ꠅꠁꠟꠣ ꠀꠞ ꠀꠟ꠆ꠟꠣꠄ ꠌꠣꠁꠞꠅꠛꠣꠄ ꠢꠇꠟ ꠉꠣꠃ-ꠉꠦꠞꠣꠝꠅ ꠄꠇ ꠒꠞ ꠙꠄꠖꠣ ꠇꠞꠟꠣ, ꠔꠦꠃ ꠢꠤꠘꠞ ꠇꠥꠘꠥ ꠝꠣꠘꠡꠦ ꠁꠀꠇꠥꠛꠞ ꠙꠥꠀꠂꠘ꠆ꠔꠞꠦ ꠈꠦꠖꠣꠘꠤꠔ ꠉꠦꠟ ꠘꠣ। 6 ꠢꠦꠡꠦ ꠁꠀꠇꠥꠛ ꠀꠞ ꠔꠣꠘ ꠟꠉꠞ ꠢꠇꠟꠦ ꠇꠦꠘꠣꠘ ꠖꠦꠡꠞ ꠟꠥꠎ ꠘꠣꠝꠞ ꠎꠣꠉꠣ, ꠝꠣꠘꠤ ꠛꠦꠕꠦꠟꠅ ꠀꠁꠀ ꠙꠃꠍꠟꠣ। 7 ꠅꠘꠅ ꠔꠣꠁꠘ ꠄꠇ ꠇꠥꠞꠛꠣꠘꠤ ꠈꠣꠘꠣ ꠛꠣꠘꠣꠁꠀ, ꠅꠃ ꠎꠣꠉꠣꠞ ꠘꠣꠝ ꠖꠤꠟꠣ ꠄꠟ-ꠛꠦꠕꠦꠟ [ꠝꠣꠘꠤ, ꠛꠦꠕꠦꠟꠞ ꠀꠟ꠆ꠟꠣ], ꠇꠣꠞꠘ ꠜꠣꠁꠞ ꠉꠦꠍ ꠕꠣꠇꠤ ꠜꠣꠉꠤꠛꠣꠞ ꠛꠣꠟꠣ ꠀꠟ꠆ꠟꠣꠄ ꠅꠘꠅꠃ ꠔꠣꠘꠞꠦ ꠖꠤꠖꠣꠞ-ꠖꠞꠡꠘ ꠖꠤꠍꠟꠣ। 8 ꠀꠞ ꠞꠦꠛꠦꠇꠣꠞ ꠖꠣꠁꠝꠣ ꠖꠛꠥꠞꠣ ꠝꠣꠞꠣ ꠉꠦꠟꠣ। ꠔꠣꠘꠦ ꠛꠦꠕꠦꠟꠞ ꠟꠣꠝꠣꠔ ꠄꠇ ꠄꠟꠘ ꠉꠣꠍꠞ ꠔꠟꠦ ꠝꠣꠐꠤ ꠖꠤꠟꠣ, ꠔꠦꠃ ꠁ ꠎꠣꠉꠣꠞ ꠘꠣꠝ ꠅꠁꠟ ꠄꠟꠘ-ꠛꠣꠈꠥꠔ [ꠝꠣꠘꠤ, ꠇꠣꠘ꠆ꠖꠘꠞ ꠉꠣꠍ]।

9 ꠁꠀꠇꠥꠛꠦ ꠙꠖ꠆ꠖꠘ-ꠁꠞꠣꠝ ꠕꠣꠇꠤ ꠀꠅꠀꠞ ꠛꠣꠖꠦ, ꠀꠟ꠆ꠟꠣꠄ ꠢꠤꠞꠛꠣꠞ ꠔꠣꠘꠞꠦ ꠖꠤꠖꠣꠞ ꠖꠤꠀ ꠛꠞꠇꠔ ꠘꠣꠎꠤꠟ ꠇꠞꠟꠣ। 10 ꠀꠟ꠆ꠟꠣꠄ ꠇꠁꠟꠣ, “ꠔꠥꠝꠣꠞ ꠘꠣꠝ ꠔ ꠁꠀꠇꠥꠛ; ꠅꠁꠟꠦ ꠝꠣꠘꠡꠦ ꠔꠥꠝꠣꠞꠦ ꠀꠞ ꠁꠀꠇꠥꠛ ꠇꠁꠀ ꠒꠣꠇꠔꠣ ꠘꠣꠄ, ꠔꠥꠝꠣꠞꠦ ꠁꠍꠞꠣꠁꠟ ꠇꠁꠛꠣ।” ꠔꠦꠃ ꠔꠣꠘ ꠘꠣꠝ ꠅꠁꠟ ꠁꠍꠞꠣꠁꠟ। 11 ꠀꠟ꠆ꠟꠣꠄ ꠔꠣꠘꠞꠦ ꠇꠁꠟꠣ, “ꠀꠝꠤꠃ ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣ। ꠔꠥꠝꠤ ꠚꠟꠀꠟꠣ ꠅꠁꠀ ꠛꠣꠠꠅ। ꠔꠥꠝꠣ ꠕꠘꠦ ꠄꠇ ꠎꠣꠔꠤ ꠙꠄꠖꠣ ꠅꠁꠛ, ꠁꠐꠣ ꠅꠁꠛ ꠛꠃꠔ ꠉꠥꠡ꠆ꠐꠤꠀꠟꠣ ꠎꠣꠔꠤ, ꠀꠞ ꠔꠥꠝꠣꠞ ꠈꠣꠘ꠆ꠖꠣꠘꠅ ꠛꠣꠖꠡꠣ ꠅꠇꠟ ꠙꠄꠖꠣ ꠅꠁꠛꠣ। 12 ꠀꠝꠤ ꠁꠛ꠆ꠞꠣꠢꠤꠝ ꠀꠞ ꠁꠍꠢꠣꠇꠞꠦ ꠎꠦ ꠖꠦꠡ ꠖꠣꠘ ꠇꠞꠍꠤ, ꠢꠃ ꠖꠦꠡ ꠅꠈꠘ ꠔꠥꠝꠣꠞꠦ ꠀꠞ ꠔꠥꠝꠣꠞ ꠛꠣꠖꠞ ꠅꠀꠞꠤꠡꠞꠦ ꠖꠤꠝꠥ।” 13 ꠀꠟ꠆ꠟꠣꠄ ꠢꠘꠅ ꠁꠀꠇꠥꠛꠞ ꠟꠉꠦ ꠛꠣꠔꠌꠤꠔ ꠇꠞꠤꠀ ꠢꠣꠞꠟꠦ ꠀꠍꠝꠣꠘꠅ ꠔꠡꠞꠤꠚ ꠘꠤꠟꠣꠉꠤ। 14 ꠁꠀꠇꠥꠛꠦ ꠢꠃ ꠛꠣꠔꠌꠤꠔꠞ ꠎꠣꠉꠣꠔ ꠙꠣꠔ꠆ꠔꠞꠞ ꠄꠇ ꠈꠥꠐꠤ ꠉꠣꠠꠤꠀ, ꠄꠞ ꠃꠙꠞꠦ ꠔꠣꠁꠘ ꠀꠟ꠆ꠟꠣꠞ ꠘꠣꠝꠦ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠓꠣꠟꠤꠟꠣ, ꠢꠦꠡꠦ ꠔꠦꠟꠅ ꠓꠣꠟꠤꠟꠣ। 15 ꠀꠟ꠆ꠟꠣꠄ ꠎꠦꠈꠣꠘꠅ ꠔꠣꠘꠞꠦ ꠖꠤꠖꠣꠞ ꠖꠤꠍꠟꠣ, ꠁꠀꠇꠥꠛꠦ ꠁ ꠎꠣꠉꠣꠞ ꠘꠣꠝ ꠞꠣꠈꠍꠟꠣ ꠛꠦꠕꠦꠟ।

16 ꠛꠣꠖꠦ ꠁꠀꠇꠥꠛ ꠀꠞ ꠔꠣꠘ ꠟꠉꠞ ꠢꠇꠟꠦ ꠛꠦꠕꠦꠟ ꠕꠣꠇꠤ ꠞꠅꠀꠘꠣ ꠇꠞꠤꠀ ꠁꠚ꠆ꠞꠣꠕꠅ ꠙꠃꠍꠣꠞ ꠛꠣꠇ꠆ꠇꠣ ꠀꠉꠦ, ꠞꠣꠢꠦꠟꠣꠞ ꠢꠥꠞꠥꠔ꠆ꠔꠣ ꠅꠀꠞ ꠛꠤꠡꠦ ꠗꠞꠟ, ꠔꠣꠘ ꠈꠥꠛ ꠔꠇꠟꠤꠚ ꠅꠁꠟ। 17 ꠢꠥꠞꠥꠔ꠆ꠔꠣ ꠅꠀꠞ ꠛꠤꠡ ꠀꠞꠅ ꠛꠣꠠꠟ, ꠔꠦꠃ ꠖꠣꠁ ꠛꠦꠐꠤꠄ ꠇꠁꠟ, “ꠒꠞꠣꠁꠅ ꠘꠣ ꠉ, ꠁꠛꠣꠞꠅ ꠔꠥꠝꠣꠞ ꠊꠞꠅ ꠙꠥꠀ ꠅꠁꠛ।” 18 ꠅꠁꠟꠦ ꠞꠣꠢꠦꠟꠣ ꠝꠣꠞꠣ ꠉꠦꠟꠣ। ꠝꠞꠣꠞ ꠡꠝꠄ ꠔꠣꠁꠘ ꠙꠥꠀꠞ ꠘꠣꠝ ꠞꠣꠈꠟꠣ ꠛꠤꠘ-ꠅꠘꠤ [ꠝꠣꠘꠤ, ꠀꠝꠣꠞ ꠔꠇꠟꠤꠚꠞ ꠙꠥꠀ] ꠅꠁꠟꠦ ꠛꠣꠚꠦ ꠔꠣꠞ ꠘꠣꠝ ꠞꠣꠈꠟꠣ ꠛꠤꠘ-ꠁꠀꠝꠤꠘ [ꠝꠣꠘꠤ, ꠀꠝꠣꠞ ꠛꠟꠞ ꠙꠥꠀ]। 19 ꠞꠣꠢꠦꠟꠣꠞ ꠝꠃꠔꠞ ꠛꠣꠖꠦ ꠁꠚ꠆ꠞꠣꠕ, ꠝꠣꠘꠤ ꠛꠦꠕꠦꠟꠢꠣꠝ, ꠎꠣꠅꠀꠞ ꠙꠕꠞ ꠇꠣꠘ꠆ꠖꠣꠔ ꠔꠣꠘꠞꠦ ꠝꠣꠐꠤ ꠖꠦꠅꠀ ꠅꠁꠟ। 20 ꠝꠣꠐꠤ ꠖꠤꠀ ꠢꠣꠞꠟꠦ ꠁꠀꠇꠥꠛꠦ ꠔꠣꠘ ꠇꠄꠛꠞꠞ ꠃꠙꠞꠦ ꠄꠇ ꠙꠣꠔ꠆ꠔꠞꠞ ꠈꠥꠐꠤ ꠉꠣꠠꠟꠣ, ꠁ ꠈꠥꠐꠤ ꠀꠁꠎꠅ ꠅꠘꠅ ꠀꠍꠦ। 21 ꠅꠘ ꠕꠘꠦ ꠁꠍꠞꠣꠁꠟꠦ ꠢꠤꠞꠛꠣꠞ ꠞꠅꠀꠘꠣ ꠖꠤꠟꠣ, ꠀꠞ ꠄꠖꠞ ꠝꠤꠘꠣꠞ ꠚꠣꠟꠣꠁꠀ ꠀꠁꠀ ꠔꠣꠘ ꠔꠣꠝ꠆ꠛꠥ ꠉꠣꠠꠤꠟꠣ।

22 ꠁꠍꠞꠣꠁꠟ ꠎꠦꠛꠟꠣ ꠢꠘꠅ ꠞꠁꠞꠣ, ꠅꠃ ꠚꠣꠇꠅ ꠞꠥꠛꠦꠘꠦ ꠉꠤꠀ ꠔꠣꠞ ꠛꠣꠚꠞ ꠛꠣꠖꠞ ꠛꠤꠀꠞ ꠛꠃ ꠛꠤꠟꠢꠣꠞ ꠟꠉꠦ ꠎꠤꠘꠣ ꠇꠞꠟ ꠀꠞ ꠁꠔꠣ ꠁꠍꠞꠣꠁꠟꠞ ꠇꠣꠘꠅ ꠉꠦꠟ।

23 ꠁꠀꠇꠥꠛꠞ ꠛꠣꠞꠅꠎꠘ ꠙꠥꠀ ꠀꠍꠟꠣ, ꠟꠦꠀꠞ ꠔꠞꠚꠣ ꠔꠣꠘ ꠛꠠ ꠙꠥꠀ ꠞꠥꠛꠦꠘ, ꠛꠣꠖꠦ ꠡꠤꠝꠤꠅꠘ, ꠟꠦꠛꠤ, ꠄꠢꠥꠖꠣ, ꠁꠍꠣꠈꠞ ꠀꠞ ꠍꠛꠥꠟꠘ। 24 ꠞꠣꠢꠦꠟꠣꠞ ꠔꠞꠚꠣ ꠁꠃꠍꠥꠚ ꠀꠞ ꠛꠤꠘ-ꠁꠀꠝꠤꠘ। 25 ꠞꠣꠢꠦꠟꠣꠞ ꠛꠣꠘ꠆ꠖꠤ ꠛꠤꠟꠢꠣꠞ ꠔꠞꠚꠣ, ꠖꠣꠘ ꠀꠞ ꠘꠙ꠆ꠔꠣꠟꠤ। 26 ꠟꠦꠀꠞ ꠛꠣꠘ꠆ꠖꠤ ꠎꠤꠟꠙꠣꠞ ꠔꠞꠚꠣ, ꠍꠣꠖꠥ ꠀꠞ ꠀꠡꠤꠞ। ꠔꠣꠘ ꠅꠃ ꠢꠥꠞꠥꠔ꠆ꠔꠣ ꠅꠇꠟ ꠙꠖ꠆ꠖꠘ-ꠁꠞꠣꠝꠅ ꠅꠁꠍꠟꠣ।

27 ꠢꠦꠡꠦ ꠁꠀꠇꠥꠛ ꠇꠤꠞꠤꠅꠔ-ꠅꠞ꠆ꠛꠞ, ꠝꠣꠘꠤ ꠢꠦꠛꠞꠘꠞ ꠇꠣꠍꠣꠔ ꠝꠝ꠆ꠞꠤ ꠘꠣꠝꠞ ꠎꠣꠉꠣꠔ, ꠔꠣꠘ ꠛꠣꠚ ꠁꠍꠢꠣꠇꠞ ꠉꠦꠍꠦ ꠀꠁꠟꠣ। ꠅꠃ ꠎꠣꠉꠣꠔ ꠁꠛ꠆ꠞꠣꠢꠤꠝ ꠀꠞ ꠁꠍꠢꠣꠇꠦꠅ ꠛꠡꠔ ꠇꠞꠔꠣ। 28 ꠁꠍꠢꠣꠇꠞ ꠛꠄꠅꠡ ꠄꠇ-ꠡ ꠀꠡꠤ ꠛꠞꠍ ꠅꠁꠍꠤꠟ। 29 ꠀꠞ ꠁꠍꠢꠣꠇ ꠙꠥꠞꠣꠙꠥꠞ ꠛꠥꠠꠣ ꠅꠁꠀ, ꠝꠥꠞꠛ꠆ꠛꠤ ꠛꠄꠅꠡꠅ ꠝꠣꠞꠣ ꠉꠤꠀ ꠔꠣꠘ ꠛꠣꠚ-ꠖꠣꠖꠣꠞ ꠉꠦꠍꠦ ꠉꠤꠀ ꠀꠎꠤꠟꠣ। ꠔꠣꠘ ꠙꠥꠀ ꠁꠡ ꠀꠞ ꠁꠀꠇꠥꠛꠦ ꠔꠣꠘꠞꠦ ꠖꠣꠚꠘ ꠇꠞꠟꠣ।