1 ꠁꠍꠞꠣꠁꠟꠦ ꠔꠣꠘ ꠢꠇ꠆ꠇꠟꠔꠣ ꠟꠁꠀ ꠛꠣꠞ ꠅꠁꠉꠦꠟꠣ। ꠀꠞ ꠛꠦꠞ-ꠡꠦꠛꠣꠔ ꠀꠁꠀ ꠔꠣꠘ ꠛꠣꠚ ꠁꠍꠢꠣꠇꠞ ꠀꠟ꠆ꠟꠣꠞ ꠘꠣꠝꠦ ꠇꠥꠞꠛꠣꠘꠤ ꠇꠞꠟꠣ। 2 ꠛꠣꠖꠦ ꠞꠣꠁꠔꠞ ꠛꠣꠟꠣ ꠀꠟ꠆ꠟꠣꠄ ꠁꠍꠞꠣꠁꠟꠞꠦ ꠖꠤꠖꠣꠞ ꠖꠤꠀ ꠇꠁꠟꠣ, “ꠅ ꠁꠀꠇꠥꠛ, ꠁꠀꠇꠥꠛ!” ꠔꠣꠁꠘ ꠎꠥꠀꠙ ꠖꠤꠟꠣ, “ꠅꠃꠘꠥ ꠀꠝꠤ।” 3 ꠀꠟ꠆ꠟꠣꠄ ꠚꠞꠝꠣꠁꠟꠣ, “ꠀꠝꠤ ꠀꠟ꠆ꠟꠣ, ꠔꠥꠝꠣꠞ ꠛꠣꠚꠞ ꠝꠣꠛꠥꠖ। ꠔꠥꠝꠤ ꠝꠤꠡꠞꠅ ꠎꠣꠁꠔꠦ ꠒꠞꠣꠁꠅ ꠘꠣ, ꠢꠘꠅ ꠀꠝꠤ ꠔꠥꠝꠣꠞ ꠄꠇ ꠛꠤꠞꠣꠐ ꠎꠣꠔꠤ ꠙꠄꠖꠣ ꠇꠞꠝꠥ। 4 ꠀꠝꠤ ꠔꠥꠝꠣꠞ ꠟꠉꠦ ꠟꠉꠦ ꠝꠤꠡꠞꠅ ꠎꠣꠁꠝꠥ, ꠀꠞ ꠀꠝꠤꠃ ꠔꠥꠝꠣꠞꠦ ꠢꠤꠞꠛꠣꠞ ꠚꠤꠞꠣꠁꠀ ꠀꠘꠝꠥ ꠀꠞ ꠔꠥꠝꠣꠞ ꠙꠥꠀ ꠁꠃꠍꠥꠚꠦ ꠔꠥꠝꠣꠞ ꠌꠃꠈ ꠝꠥꠎꠣꠁꠀ ꠖꠤꠛ।”

5 ꠛꠣꠖꠦ ꠁꠀꠇꠥꠛꠦ ꠛꠦꠞ-ꠡꠦꠛꠣ ꠕꠣꠇꠤ ꠞꠅꠀꠘꠣ ꠅꠁꠟꠣ। ꠚꠦꠞꠣꠃꠘꠦ ꠔꠣꠞꠣꠞꠦ ꠘꠦꠅꠀꠞ ꠟꠣꠉꠤ ꠎꠦꠔꠣ ꠉꠣꠠꠤꠘ ꠖꠤꠍꠟꠣ, ꠁꠍꠞꠣꠁꠟꠞ ꠙꠥꠀꠂꠘ꠆ꠔꠦ ꠅꠔꠣꠔ ꠇꠞꠤ ꠔꠣꠞꠣꠞ ꠛꠣꠚꠞꠦ ꠀꠞ ꠔꠣꠞꠣꠞ ꠛꠃ, ꠙꠥꠀ-ꠙꠥꠠꠤꠘꠞꠦ ꠟꠁꠀ ꠉꠦꠟꠣ। 6 ꠢꠦꠡꠦ ꠁꠀꠇꠥꠛ, ꠔꠣꠘ ꠙꠥꠀꠂꠘ ꠀꠞ ꠔꠣꠘ ꠙꠥꠞꠣ ꠉꠥꠡ꠆ꠐꠤ, ꠙꠡꠥꠞ ꠙꠣꠟ ꠅꠇꠟ ꠀꠞ ꠇꠦꠘꠣꠘ ꠖꠦꠡꠅ ꠇꠣꠝꠣꠁ ꠇꠞꠣ ꠢꠇ꠆ꠇꠟ ꠗꠘ-ꠖꠃꠟꠔ ꠟꠁꠀ ꠝꠤꠡꠞꠅ ꠙꠃꠍꠟꠣ। 7 ꠅꠃ ꠟꠣꠈꠣꠘ ꠁꠀꠇꠥꠛꠦ ꠔꠣꠘ ꠙꠥꠀ-ꠙꠥꠠꠤꠘ, ꠘꠣꠔꠤ-ꠘꠣꠔꠤꠘ, ꠙꠥꠞꠣ ꠉꠥꠡ꠆ꠐꠤꠞ ꠢꠇ꠆ꠇꠟꠞꠦ ꠟꠁꠀ ꠝꠤꠡꠞꠅ ꠙꠣꠞ ꠅꠁꠉꠦꠟꠣ।

8 ꠛꠘꠤ ꠁꠍꠞꠣꠁꠟ, ꠝꠣꠘꠤ ꠁꠀꠇꠥꠛ ꠀꠞ ꠔꠣꠘ ꠀꠅꠟꠣꠖ ꠅꠇꠟ ꠎꠦꠞꠣ ꠝꠤꠡꠞꠅ ꠉꠦꠍꠟꠣ, ꠔꠣꠞꠣꠞ ꠈꠣꠘ꠆ꠖꠣꠘ-ꠘꠣꠝꠣ ꠅꠁꠟ: ꠁꠀꠇꠥꠛꠞ ꠛꠠ ꠙꠥꠀ ꠞꠥꠛꠦꠘ; 9 ꠀꠞ ꠞꠥꠛꠦꠘꠞ ꠙꠥꠀꠂꠘ: ꠢꠘꠥꠇ, ꠚꠣꠟꠥ, ꠢꠣꠍꠤꠞ ꠀꠞ ꠇꠞ꠆ꠝꠤ। 10 ꠡꠤꠝꠤꠅꠘꠞ ꠙꠥꠀꠂꠘ: ꠎꠤꠝꠥꠄꠟ, ꠎꠣꠝꠤꠘ, ꠅꠢꠖ, ꠎꠣꠈꠤꠘ, ꠡꠥꠢꠞ, ꠀꠞ ꠇꠦꠘꠣꠘꠤ ꠛꠃꠞ ꠔꠞꠚꠣ ꠡꠃꠟ। 11 ꠟꠦꠛꠤꠞ ꠙꠥꠀꠂꠘ: ꠎꠣꠞꠍꠥꠘ, ꠇꠣꠢꠣꠔ ꠀꠞ ꠝꠣꠞꠣꠞꠤ। 12 ꠄꠢꠥꠖꠣꠞ ꠙꠥꠀꠂꠘ: ꠄꠁꠞ, ꠅꠘꠘ, ꠡꠦꠟꠣ, ꠚꠤꠞꠥꠎ ꠀꠞ ꠎꠣꠞꠣꠢ। ꠅꠁꠟꠦ ꠅꠘꠘ ꠀꠞ ꠄꠁꠞ ꠇꠦꠘꠣꠘ ꠖꠦꠡꠅꠃ ꠝꠞꠤ ꠉꠦꠍꠟꠣ। ꠚꠤꠞꠥꠎꠞ ꠙꠥꠀꠂꠘ: ꠢꠣꠍꠤꠞ ꠀꠞ ꠢꠣꠝꠥꠟ। 13 ꠁꠍꠣꠈꠞꠞ ꠙꠥꠀꠂꠘ: ꠔꠟꠣ, ꠚꠅꠀ, ꠎꠣꠡꠥꠛ ꠀꠞ ꠡꠤꠝꠞꠘ। 14 ꠍꠛꠥꠟꠘꠞ ꠙꠥꠀꠂꠘ: ꠍꠦꠞꠦꠖ, ꠄꠟꠘ ꠀꠞ ꠎꠢꠟꠦꠟ। 15 ꠔꠣꠞꠣ ꠅꠁꠟꠣ ꠟꠦꠀꠞ ꠢꠥꠞꠥꠔ꠆ꠔꠣꠁꠘ, ꠙꠖ꠆ꠖꠘ-ꠁꠞꠣꠝꠅ ꠟꠦꠀꠞ ꠔꠞꠚꠣ ꠁꠀꠇꠥꠛꠞ ꠁ ꠢꠥꠞꠥꠔ꠆ꠔꠣꠁꠘ ꠀꠞ ꠔꠣꠘ ꠙꠥꠠꠤ ꠖꠤꠘꠣꠞ ꠎꠘꠝ ꠅꠁꠍꠤꠟ, ꠄꠞꠣ ꠢꠇ꠆ꠇꠟꠔꠣꠄ ꠔꠦꠔ꠆ꠞꠤꠡ ꠎꠘ।

16 ꠍꠣꠖꠥꠞ ꠙꠥꠀꠂꠘ ꠅꠁꠟꠣ: ꠍꠤꠚꠘ, ꠢꠉꠤ, ꠡꠥꠘꠤ, ꠁꠡꠛꠥꠘ, ꠄꠁꠞꠤ, ꠅꠞꠥꠖꠤ ꠀꠞ ꠅꠞꠦꠟꠤ। 17 ꠀꠡꠤꠞꠞ ꠙꠥꠀꠂꠘ: ꠁꠝꠘꠣ, ꠎꠤꠍꠛꠣ, ꠎꠤꠍꠛꠤ, ꠛꠞꠤꠀ ꠀꠞ ꠔꠣꠞꠣꠞ ꠛꠁꠘ ꠍꠦꠞꠣ। ꠛꠞꠤꠀꠞ ꠙꠥꠀꠂꠘ: ꠢꠦꠛꠞ ꠀꠞ ꠝꠟꠇꠤꠄꠟ। 18 ꠔꠣꠞꠣ ꠅꠁꠟꠣ ꠎꠤꠟꠙꠣꠞ ꠢꠥꠞꠥꠔ꠆ꠔꠣꠁꠘ, ꠟꠣꠛꠘꠦ ꠔꠣꠘ ꠙꠥꠠꠤ ꠟꠦꠀꠞ ꠟꠉꠦ ꠅꠃ ꠛꠣꠘ꠆ꠖꠤ ꠎꠤꠟꠙꠣꠞꠦ ꠖꠤꠍꠟꠣ, ꠄꠞꠣ ꠢꠇꠟꠃ ꠔꠣꠁꠞ ꠔꠞꠚꠣ ꠁꠀꠇꠥꠛꠞ ꠢꠥꠞꠥꠔ꠆ꠔꠣꠁꠘ, ꠅꠃ ꠡꠥꠟ꠆ꠟ ꠎꠘ।

19 ꠁꠀꠇꠥꠛꠞ ꠛꠤꠛꠤ ꠞꠣꠢꠦꠟꠣꠞ ꠙꠥꠀꠂꠘ ꠅꠁꠟꠣ: ꠁꠃꠍꠥꠚ ꠀꠞ ꠛꠤꠘ-ꠁꠀꠝꠤꠘ। 20 ꠁꠃꠍꠥꠚꠞ ꠙꠥꠀꠂꠘ ꠝꠣꠘꠡꠣ ꠀꠞ ꠀꠚꠞꠣꠁꠝ ꠝꠤꠡꠞ ꠖꠦꠡꠅ ꠎꠘꠝꠤꠍꠟꠣ। ꠄꠞꠣꠞ ꠝꠣ ꠅꠁꠟꠣ ꠅꠃꠘ ꠝꠘ꠆ꠖꠤꠞꠞ ꠛꠣꠛꠘ-ꠑꠣꠇꠥꠞ, ꠙꠥꠐꠤꠚꠦꠞꠣꠞ ꠙꠥꠠꠤ ꠀꠡꠘꠔ। 21 ꠛꠤꠘ-ꠁꠀꠝꠤꠘꠞ ꠙꠥꠀꠂꠘ: ꠛꠦꠟꠣ, ꠛꠦꠈꠞ, ꠅꠡꠛꠦꠟ, ꠉꠦꠞꠣ, ꠘꠣꠝꠣꠘ, ꠄꠢꠤ, ꠞꠥꠡ, ꠝꠥꠙ꠆ꠙꠤꠝ, ꠢꠥꠙ꠆ꠙꠤꠝ ꠀꠞ ꠅꠞ꠆ꠖ। 22 ꠔꠣꠞꠣ ꠅꠁꠟꠣ ꠞꠣꠢꠦꠟꠣꠞ ꠔꠞꠚꠣ ꠁꠀꠇꠥꠛꠞ ꠢꠥꠞꠥꠔ꠆ꠔꠣꠁꠘ, ꠅꠃ ꠌꠃꠖ꠆ꠖ ꠎꠘ।

23 ꠖꠣꠘꠞ ꠙꠥꠀ: ꠢꠥꠡꠤꠝ। 24 ꠘꠙ꠆ꠔꠣꠟꠤꠞ ꠙꠥꠀꠂꠘ: ꠎꠢꠡꠤꠄꠟ, ꠉꠥꠘꠤ, ꠁꠎꠦꠞ ꠀꠞ ꠡꠤꠟ꠆ꠟꠦꠝ। 25 ꠔꠣꠞꠣ ꠅꠁꠟꠣ ꠛꠤꠟꠢꠣꠞ ꠢꠥꠞꠥꠔ꠆ꠔꠣꠁꠘ, ꠟꠣꠛꠘꠦ ꠔꠣꠘ ꠙꠥꠠꠤ ꠞꠣꠢꠦꠟꠣꠞ ꠟꠉꠦ ꠅꠃ ꠛꠣꠘ꠆ꠖꠤ ꠛꠤꠟꠢꠣꠞꠦ ꠖꠤꠍꠟꠣ। ꠄꠞꠣ ꠢꠇꠟꠃ ꠔꠣꠁꠞ ꠔꠞꠚꠣ ꠁꠀꠇꠥꠛꠞ ꠢꠥꠞꠥꠔ꠆ꠔꠣꠁꠘ, ꠅꠃ ꠡꠣꠔ ꠎꠘ।

26 ꠁꠀꠇꠥꠛꠞ ꠘꠣꠘꠣꠘ ꠔꠞꠚꠣꠞ ꠎꠘꠝꠞ ꠎꠣꠞꠣ ꠝꠤꠡꠞꠅ ꠀꠁꠟꠣ, ꠔꠣꠘ ꠙꠥꠀꠂꠘ꠆ꠔꠞ ꠛꠃ ꠛꠣꠖ ꠖꠤꠀ ꠄꠞꠣ ꠢꠇꠟꠦ ꠝꠤꠟꠤꠀ ꠍꠄꠡꠐ꠆ꠐꠤ ꠎꠘ ꠀꠍꠟꠣ। 27 ꠝꠤꠡꠞ ꠖꠦꠡꠅ ꠁꠃꠍꠥꠚꠞ ꠖꠥꠁꠎꠘ ꠙꠥꠀ ꠎꠘꠝꠤꠍꠟꠣ। ꠄꠞꠣ ꠡꠢ ꠁꠀꠇꠥꠛꠞ ꠙꠞꠤꠛꠣꠞꠞ ꠎꠣꠞꠣ ꠝꠤꠡꠞꠅ ꠀꠁꠟꠣ, ꠔꠣꠞꠣ ꠝꠥꠐ ꠡꠔ꠆ꠔꠁꠞ ꠎꠘ।

28 ꠄꠞ ꠀꠉꠦ ꠁꠀꠇꠥꠛꠦ ꠄꠢꠥꠖꠣꠞꠦ ꠁꠃꠍꠥꠚꠞ ꠉꠦꠍꠦ ꠙꠣꠑꠣꠁꠟꠣ, ꠉꠥꠡꠘꠅ ꠎꠣꠅꠀꠞ ꠙꠕ ꠌꠤꠘꠣꠞ ꠟꠣꠉꠤ, ꠔꠦꠃ ꠔꠣꠞꠣ ꠢꠇ꠆ꠇꠟ ꠅꠘꠅ ꠉꠤꠀ ꠙꠃꠍꠟꠣ। 29 ꠀꠞ ꠁꠃꠍꠥꠚꠦꠅ ꠊꠥꠠꠣꠞ ꠉꠣꠠꠤ ꠢꠣꠎꠣꠁꠀ ꠔꠣꠘ ꠛꠣꠚ ꠁꠍꠞꠣꠁꠟꠞ ꠟꠉꠦ ꠉꠥꠡꠘꠅ ꠖꠦꠈꠣ ꠇꠞꠣꠔ ꠉꠦꠟꠣ, ꠀꠞ ꠔꠣꠘꠞꠦ ꠖꠦꠈꠤꠀꠃ ꠀꠁꠘ꠆ꠎꠣ ꠇꠞꠤ ꠉꠟꠣꠔ ꠗꠞꠤꠀ ꠛꠃꠔ ꠡꠝꠄ ꠇꠣꠘ꠆ꠖꠤꠟꠣ। 30 ꠔꠦꠃ ꠁꠍꠞꠣꠁꠟꠦ ꠁꠃꠍꠥꠚꠞꠦ ꠇꠁꠟꠣ, “ꠔꠥꠝꠤ ꠎꠦꠘ ꠎꠤꠘ꠆ꠖꠣ ꠀꠍ ꠞꠦ ꠙꠥꠔ, ꠁꠐꠣ ꠘꠤꠎꠞ ꠌꠃꠈꠦ ꠖꠦꠈꠟꠣꠝ। ꠅꠈꠘ ꠡꠣꠘ꠆ꠔꠤꠄꠃ ꠝꠞꠔꠣꠝ ꠙꠣꠞꠝꠥ।” 31 ꠅꠃ ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘ꠆ꠔꠞꠦ ꠀꠞ ꠔꠣꠘ ꠛꠣꠚꠞ ꠟꠉꠞ ꠢꠇꠟꠞꠦ ꠇꠁꠟꠣ, “ꠀꠝꠤ ꠉꠤꠀ ꠚꠦꠞꠣꠃꠘꠞꠦ ꠎꠣꠘꠣꠁꠝꠥ, ꠀꠝꠣꠞ ꠜꠣꠁꠀꠁꠘ ꠀꠞ ꠀꠝꠣꠞ ꠛꠣꠚꠞ ꠛꠣꠠꠤꠞ ꠢꠇꠟ, ꠇꠦꠘꠣꠘ ꠖꠦꠡ ꠕꠘꠦ ꠀꠝꠣꠞ ꠉꠦꠍꠦ ꠀꠁꠌ꠆ꠍꠂꠘ। 32 ꠔꠣꠞꠣꠞ ꠇꠣꠝ ꠅꠁꠟ ꠙꠡꠥ ꠙꠣꠟꠣ। ꠔꠣꠞꠣ ꠔ ꠍꠣꠉꠟ-ꠝꠦꠠꠣ ꠙꠣꠟꠂꠘ, ꠀꠞ ꠔꠣꠞꠣꠞ ꠙꠡꠥꠞ ꠙꠣꠟ ꠅꠇꠟ ꠀꠞ ꠢꠇ꠆ꠇꠟ ꠝꠣꠟ-ꠍꠣꠝꠣꠘꠣ ꠟꠁꠀ ꠀꠁꠌ꠆ꠍꠂꠘ। 33 ꠚꠦꠞꠣꠃꠘꠦ ꠎꠦꠛꠟꠣ ꠔꠥꠝꠞꠣꠞꠦ ꠎꠤꠇꠣꠁꠛꠣ, ꠀꠙꠘꠣꠞꠣ ꠇꠤꠔꠣ ꠇꠣꠝ ꠇꠞꠂꠘ? 34 ꠅꠃ ꠡꠝꠄ ꠔꠥꠝꠞꠣ ꠇꠁꠅ, ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠦ ꠀꠞ ꠔꠣꠞꠣꠞ ꠛꠣꠚ-ꠖꠣꠖꠣ ꠅꠇꠟꠦꠅ ꠢꠥꠞꠥꠝꠣꠘ ꠕꠘꠦꠃ ꠙꠡꠥ ꠙꠣꠟꠤꠀ ꠛꠣꠌꠂꠘ। ꠔꠦꠃ ꠔꠥꠝꠞꠣ ꠉꠥꠡꠘꠅ ꠞꠁꠔꠣꠄ ꠙꠣꠞꠛꠣꠄ। ꠇꠣꠞꠘ ꠙꠡꠥ ꠙꠣꠟꠞꠣ ꠝꠣꠘꠡꠞꠦ ꠝꠤꠡꠞꠤ ꠅꠇꠟꠦ ꠊꠤꠘ ꠇꠞꠂꠘ।”