1 ꠁꠃꠍꠥꠚꠦ ꠔꠣꠘ ꠇꠞ꠆ꠝꠌꠣꠞꠤ ꠅꠇꠟꠞ ꠍꠣꠝꠘꠦ ꠘꠤꠎꠞꠦ ꠀꠞ ꠑꠤꠇ ꠞꠣꠈꠔꠣ ꠙꠣꠞꠟꠣ ꠘꠣ, ꠔꠣꠁꠘ ꠌꠤꠟ꠆ꠟꠣꠁꠀ ꠇꠁꠟꠣ, “ꠀꠝꠣꠞ ꠉꠦꠍ ꠕꠘꠦ ꠢꠇ꠆ꠇꠟ ꠢꠞꠤ ꠎꠣꠅ!” ꠔꠦꠃ ꠜꠣꠁꠀꠁꠘ꠆ꠔꠞ ꠉꠦꠍꠦ ꠘꠤꠎꠞ ꠙꠞꠤꠌꠄ ꠖꠦꠅꠀꠞ ꠡꠝꠄ ꠔꠣꠘ ꠍꠣꠝꠘꠦ ꠀꠞ ꠇꠦꠃ ꠞꠁꠟ ꠘꠣ। 2 ꠔꠣꠁꠘ ꠌꠤꠟ꠆ꠟꠣꠁꠀ ꠇꠣꠘ꠆ꠖꠘ ꠡꠥꠞꠥ ꠇꠞꠟꠣ, ꠔꠦꠃ ꠝꠤꠡꠞꠤ ꠅꠇꠟꠦ ꠁꠔꠣ ꠢꠥꠘꠟꠣ ꠀꠞ ꠚꠦꠞꠣꠃꠘꠞ ꠛꠣꠠꠤꠞ ꠝꠣꠘꠡꠦꠅ ꠁ ꠈꠛꠞ ꠙꠣꠁꠟꠣ। 3 ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘ꠆ꠔꠞꠦ ꠇꠁꠟꠣ, “ꠀꠝꠤ ꠁꠃꠍꠥꠚ; ꠀꠝꠣꠞ ꠛꠣꠛꠣ ꠅꠈꠘꠅ ꠎꠤꠘ꠆ꠖꠣ ꠀꠍꠂꠘ ꠘꠤ?” ꠅꠃ ꠔꠣꠘ ꠜꠣꠁꠀꠁꠘ꠆ꠔꠦ ꠒꠞꠣꠁꠀ ꠎꠛꠣꠘ ꠛꠘ꠆ꠖ ꠅꠁꠉꠦꠟ, ꠝꠣꠔꠔꠣ ꠙꠣꠞꠟꠣ ꠘꠣ।

4 ꠔꠦꠃ ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘꠞꠦ ꠇꠁꠟꠣ, “ꠔꠥꠝꠞꠣ ꠀꠝꠣꠞ ꠇꠣꠍꠣꠔ ꠀꠅ।” ꠔꠣꠞꠣ ꠇꠣꠍꠣꠔ ꠀꠁꠟꠦ ꠔꠣꠁꠘ ꠇꠁꠟꠣ, “ꠀꠝꠤ ꠔꠥꠝꠞꠣꠞ ꠢꠃ ꠜꠣꠁ ꠁꠃꠍꠥꠚ, ꠝꠤꠡꠞꠅ ꠎꠣꠅꠞꠣ ꠛꠦꠙꠣꠞꠤ ꠅꠇꠟꠞ ꠉꠦꠍꠦ, ꠔꠥꠝꠞꠣ ꠎꠣꠞꠦ ꠛꠦꠌꠤꠟꠣꠁꠍꠟꠣꠄ। 5 ꠅꠁꠟꠦ ꠔꠥꠝꠞꠣ ꠀꠝꠣꠞꠦ ꠛꠦꠌꠤꠍꠟꠣꠄ ꠇꠞꠤ ꠅꠈꠘ ꠛꠦꠎꠣꠞ ꠅꠁꠅ ꠘꠣ, ꠛꠣ ꠘꠤꠎꠞ ꠃꠙꠞꠦ ꠘꠣꠞꠣꠎ ꠅꠁꠅ ꠘꠣ। ꠝꠣꠘꠡꠞ ꠎꠣꠘꠞ ꠢꠦꠚꠣꠎꠔꠞ ꠟꠣꠉꠤ, ꠀꠟ꠆ꠟꠣꠄꠃ ꠔꠥꠝꠞꠣꠞ ꠀꠉꠦ ꠀꠝꠣꠞꠦ ꠅꠘꠅ ꠙꠣꠑꠣꠁꠍꠂꠘ। 6 ꠀꠇꠣꠟ ꠌꠟꠦꠞ ꠅꠃ ꠖꠥꠁ ꠛꠞꠍ ꠗꠞꠤ, ꠔꠦ ꠀꠞꠅ ꠙꠣꠌ ꠛꠞꠍ ꠇꠥꠘꠥ ꠈꠦꠔ-ꠈꠣꠝꠣꠞ ꠛꠣ ꠚꠡꠟ ꠚꠟꠔ ꠘꠣꠄ। 7 ꠖꠥꠘꠤꠀꠁꠔ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠞꠦ ꠛꠣꠌꠣꠁꠀ ꠞꠣꠈꠣꠞ ꠟꠣꠉꠤ ꠀꠟ꠆ꠟꠣꠄꠃ ꠔꠣꠘ ꠇꠥꠖꠞꠔꠦ ꠔꠥꠝꠞꠣꠞ ꠀꠉꠦ ꠀꠝꠣꠞꠦ ꠙꠣꠑꠣꠁꠍꠂꠘ। 8 ꠔꠦꠃ ꠛꠥꠎꠣ ꠎꠣꠄ ꠎꠦꠘ, ꠔꠥꠝꠞꠣ ꠀꠝꠣꠞꠦ ꠁꠘꠅ ꠙꠣꠑꠣꠁꠍ ꠘꠣ, ꠀꠟ꠆ꠟꠣꠄꠃ ꠙꠣꠑꠣꠁꠍꠂꠘ। ꠔꠣꠁꠘ ꠀꠝꠣꠞꠦ ꠚꠦꠞꠣꠃꠘꠞ ꠛꠣꠚꠞ ꠢꠝꠣꠘꠤ ꠇꠞꠤꠀ ꠔꠣꠘ ꠙꠞꠤꠛꠣꠞꠞ ꠌꠣꠟꠇꠖꠣꠞ ꠛꠣꠘꠣꠁꠍꠂꠘ, ꠀꠞ ꠢꠣꠞꠣ ꠝꠤꠡꠞ ꠖꠦꠡ ꠡꠣꠡꠘꠞ ꠄꠈꠔꠤꠀꠞ ꠖꠤꠍꠂꠘ। 9 ꠅꠈꠘ ꠔꠥꠝꠞꠣ ꠎꠟꠖꠤ ꠇꠞꠤ ꠛꠣꠛꠣꠞ ꠉꠦꠍꠦ ꠉꠤꠀ ꠇꠅ, ꠔꠣꠘ ꠙꠥꠀ ꠁꠃꠍꠥꠚꠦ ꠇꠁꠍꠦ, ꠀꠟ꠆ꠟꠣꠄ ꠀꠝꠣꠞꠦ ꠢꠣꠞꠣ ꠝꠤꠡꠞ ꠖꠦꠡꠞ ꠌꠣꠟꠇꠖꠣꠞ ꠛꠣꠘꠣꠁꠍꠂꠘ, ꠔꠦ ꠔꠥꠝꠤ ꠀꠞ ꠖꠦꠞꠤ ꠘꠣ ꠇꠞꠤꠀ ꠀꠝꠣꠞ ꠉꠦꠍꠦ ꠀꠁꠅ। 10 ꠔꠥꠝꠤ, ꠔꠥꠝꠣꠞ ꠙꠥꠀ-ꠙꠥꠠꠤꠘ, ꠘꠣꠔꠤ-ꠙꠥꠔꠤ, ꠉꠞꠥ-ꠝꠦꠠꠣꠞ ꠙꠣꠟ ꠀꠞ ꠔꠥꠝꠣꠞ ꠎꠔꠔꠣ ꠀꠍꠦ, ꠢꠇ꠆ꠇꠟꠔꠣ ꠟꠁꠀ ꠀꠝꠣꠞ ꠉꠦꠍꠦ ꠉꠥꠡꠘ ꠄꠟꠣꠇꠣꠔ ꠞꠁꠛꠣꠄ। 11 ꠢꠘꠅ ꠀꠝꠤ ꠔꠥꠝꠣꠞꠦ ꠖꠦꠈꠣ-ꠢꠥꠘꠣ ꠇꠞꠝꠥ, ꠀꠇꠣꠟ ꠔ ꠀꠞꠅ ꠙꠣꠌ ꠛꠞꠍ ꠞꠁꠛ, ꠀꠞꠘꠣꠄ ꠔꠥꠝꠤꠔꠣꠁꠘ ꠢꠇꠟꠦ ꠁ ꠀꠇꠣꠟꠦ ꠛꠦꠢꠣꠟꠔ ꠅꠁꠎꠤꠔꠣꠄ ꠙꠣꠞ। 12 ꠀꠝꠣꠞ ꠀꠙꠘ ꠜꠣꠁ ꠛꠤꠘ-ꠁꠀꠝꠤꠘꠦ ꠀꠞ ꠔꠥꠝꠞꠣ ꠢꠇꠟꠦ ꠘꠤꠎꠞ ꠌꠃꠈꠦ ꠖꠦꠈꠞꠣꠄ ꠎꠦꠘ, ꠀꠝꠤ ꠘꠤꠎꠞ ꠝꠥꠈꠦ ꠔꠥꠝꠞꠣꠞ ꠟꠉꠦ ꠝꠣꠔꠞꠣꠝ। 13 ꠝꠤꠡꠞ ꠖꠦꠡꠅ ꠀꠝꠣꠞ ꠎꠦꠔꠣ ꠖꠣꠙꠐ, ꠝꠣꠘ-ꠁꠎ꠆ꠎꠔ ꠖꠦꠈꠞꠣꠄ, ꠔꠥꠝꠞꠣ ꠀꠝꠣꠞ ꠛꠣꠛꠣꠞꠦ ꠁꠔꠣ ꠇꠁꠛꠣꠄ, ꠀꠞ ꠔꠣꠘꠞꠦ ꠎꠟꠖꠤ ꠇꠞꠤ ꠅꠈꠣꠘꠅ ꠟꠁꠀ ꠀꠁꠛꠣꠄ।” 14 ꠢꠦꠡꠦ ꠁꠃꠍꠥꠚꠦ ꠔꠣꠘ ꠜꠣꠁ ꠛꠤꠘ-ꠁꠀꠝꠤꠘꠞ ꠉꠟꠣꠔ ꠀꠁꠘ꠆ꠎꠣ ꠇꠞꠤ ꠗꠞꠤꠀ ꠇꠣꠘ꠆ꠖꠘ ꠡꠥꠞꠥ ꠇꠞꠟꠣ ꠀꠞ ꠛꠤꠘ-ꠁꠀꠝꠤꠘꠦꠅ ꠉꠟꠣꠔ ꠗꠞꠤ ꠇꠣꠘ꠆ꠖꠣ-ꠇꠣꠐꠤ ꠇꠞꠟꠣ। 15 ꠛꠣꠖꠦ ꠁꠃꠍꠥꠚꠦ ꠔꠣꠘ ꠢꠇꠟ ꠜꠣꠁꠀꠁꠘꠞꠦ ꠢꠥꠋꠉꠣ ꠖꠤꠟꠣ ꠀꠞ ꠔꠣꠞꠣꠞ ꠉꠟꠣꠔ ꠗꠞꠤꠅ ꠇꠣꠘ꠆ꠖꠤꠟꠣ। ꠔꠦꠃ ꠜꠣꠁꠀꠁꠘ꠆ꠔꠦꠅ ꠔꠣꠘ ꠟꠉꠦ ꠝꠣꠔ-ꠇꠕꠣ ꠝꠣꠔꠟꠣ।

16 ꠁꠃꠍꠥꠚꠞ ꠜꠣꠁꠀꠁꠘ ꠀꠅꠀꠞ ꠈꠛꠞ ꠚꠦꠞꠣꠃꠘꠞ ꠛꠣꠠꠤꠔ ꠙꠃꠍꠤꠟꠦ, ꠚꠦꠞꠣꠃꠘ ꠀꠞ ꠔꠣꠘ ꠇꠞ꠆ꠝꠌꠣꠞꠤ ꠅꠇꠟ ꠈꠥꠡꠤ ꠅꠁꠟꠣ। 17 ꠚꠦꠞꠣꠃꠘꠦ ꠁꠃꠍꠥꠚꠞꠦ ꠇꠁꠟꠣ, “ꠔꠥꠝꠣꠞ ꠜꠣꠁꠀꠁꠘꠞꠦ ꠇꠅ ꠎꠦꠘ, ꠔꠥꠝꠞꠣ ꠉꠣꠗꠣꠞ ꠙꠤꠑꠤꠔ ꠗꠣꠘꠞ ꠛꠡ꠆ꠔꠣ ꠛꠣꠘ꠆ꠖꠤꠀ ꠇꠦꠘꠣꠘ ꠖꠦꠡꠅ ꠉꠤꠀ, 18 ꠛꠣꠛꠣꠞꠦ ꠀꠞ ꠔꠥꠝꠞꠣꠞ ꠙꠞꠤꠛꠣꠞꠞ ꠢꠇ꠆ꠇꠟꠞꠦ ꠟꠁꠀ ꠀꠝꠣꠞ ꠉꠦꠍꠦ ꠀꠁꠅ। ꠀꠝꠤ ꠔꠥꠝꠞꠣꠞꠦ ꠝꠤꠡꠞꠞ ꠜꠣꠟꠣ ꠜꠣꠟꠣ ꠌꠤꠎ ꠅꠇꠟ ꠖꠤꠝꠥ ꠀꠞ ꠔꠥꠝꠞꠣ ꠖꠦꠡꠞ ꠢꠇꠟ ꠕꠘꠦ ꠜꠣꠟꠣ ꠎꠣꠉꠣꠅ ꠙꠣꠁꠛꠣꠄ। 19 ꠀꠞ ꠔꠥꠝꠞꠣꠞꠦ ꠀꠝꠤ ꠢꠥꠇꠥꠝ ꠖꠤꠀꠞ, ꠔꠥꠝꠞꠣ ꠎꠣꠞꠎꠤꠞ ꠛꠃ, ꠙꠥꠀ-ꠙꠥꠠꠤꠘ꠆ꠔꠞ ꠟꠣꠉꠤ ꠝꠤꠡꠞ ꠖꠦꠡ ꠕꠣꠇꠤ ꠉꠣꠠꠤ ꠟꠁꠀ ꠉꠤꠀ, ꠔꠣꠞꠣꠞꠦ ꠀꠞ ꠛꠣꠛꠣꠞꠦ ꠟꠁꠀ ꠀꠁꠅ। 20 ꠀꠞ ꠢꠘꠅ ꠔꠥꠝꠞꠣꠞ ꠝꠣꠟ-ꠍꠣꠝꠣꠘꠣꠞ ꠟꠣꠉꠤ ꠝꠣꠄꠀ ꠖꠦꠈꠣꠁꠅ ꠘꠣ, ꠢꠣꠞꠣ ꠝꠤꠡꠞ ꠖꠦꠡꠞ ꠜꠣꠟꠣ ꠜꠣꠟꠣ ꠌꠤꠎ ꠅꠇꠟ ꠔ ꠔꠥꠝꠞꠣꠞꠃ।”

21 ꠁꠍꠞꠣꠁꠟꠞ ꠙꠥꠀꠂꠘ꠆ꠔꠦ ꠅꠃꠟꠣꠃ ꠇꠞꠟꠣ। ꠚꠦꠞꠣꠃꠘꠞ ꠢꠥꠇꠥꠝꠦ ꠁꠃꠍꠥꠚꠦ ꠔꠣꠞꠣꠞ ꠟꠣꠉꠤ ꠉꠣꠠꠤ ꠀꠞ ꠙꠕꠞ ꠈꠣꠘꠤꠞ ꠝꠍꠣ ꠖꠤꠟꠣ। 22 ꠔꠣꠁꠘ ꠄꠞꠣ ꠢꠇ꠆ꠇꠟꠞꠦ ꠄꠇ ꠡꠦꠐ ꠇꠞꠤꠀ ꠇꠣꠙꠠ ꠖꠤꠟꠣ, ꠅꠁꠟꠦ ꠛꠤꠘ-ꠁꠀꠝꠤꠘꠞꠦ ꠖꠤꠟꠣ ꠙꠣꠌ ꠡꠦꠐ ꠇꠣꠙꠠ ꠀꠞ ꠔꠤꠘ-ꠡ ꠞꠥꠙꠣꠞ ꠐꠦꠇꠣ। 23 ꠔꠣꠁꠘ ꠔꠣꠘ ꠛꠣꠚꠞ ꠟꠣꠉꠤ ꠖꠡꠉꠥ ꠉꠣꠗꠣꠞ ꠙꠤꠑꠤꠔ ꠇꠞꠤ ꠝꠤꠡꠞꠞ ꠜꠣꠟꠣ ꠜꠣꠟꠣ ꠌꠤꠎ ꠅꠇꠟ, ꠀꠞ ꠖꠡꠉꠥ ꠉꠣꠗꠤꠞ ꠙꠤꠑꠤꠔ ꠇꠞꠤ ꠈꠣꠘꠤꠞ ꠟꠣꠉꠤ ꠞꠥꠐꠤ ꠀꠞ ꠗꠣꠘ ꠛꠥꠏꠣꠁ ꠇꠞꠤ ꠙꠣꠑꠣꠁꠟꠣ। 24 ꠅꠃ ꠟꠣꠈꠣꠘ ꠔꠣꠘ ꠜꠣꠁꠀꠁꠘ꠆ꠔꠞꠦ ꠛꠤꠖꠣꠄ ꠖꠤꠟꠣ, ꠛꠤꠖꠣꠄ ꠛꠣꠟꠣ ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠔꠥꠝꠞꠣ ꠙꠕꠅ ꠟꠣꠉꠣ-ꠟꠣꠉꠤ ꠇꠞꠤꠅ ꠘꠣ।”

25 ꠛꠣꠖꠦ ꠔꠣꠞꠣ ꠝꠤꠡꠞ ꠕꠘꠦ ꠇꠦꠘꠣꠘ ꠖꠦꠡꠅ, ꠔꠣꠞꠣꠞ ꠛꠣꠚ ꠁꠀꠇꠥꠛꠞ ꠉꠦꠍꠦ ꠉꠤꠀ ꠇꠁꠟꠣ, 26 “ꠁꠃꠍꠥꠚ ꠅꠈꠘꠅ ꠎꠤꠘ꠆ꠖꠣ ꠀꠍꠦ। ꠢꠦ ꠔ ꠅꠈꠘ ꠀꠡ꠆ꠔꠣ ꠝꠤꠡꠞ ꠖꠦꠡꠞ ꠅꠞ꠆ꠔꠣꠇꠞ꠆ꠔꠣ।” ꠅꠁꠟꠦ ꠁꠔꠣ ꠢꠥꠘꠤꠀ ꠁꠀꠇꠥꠛꠞ ꠢꠥꠡ ꠃꠠꠤ ꠉꠦꠟ, ꠔꠣꠘ ꠛꠤꠡ꠆ꠛꠣꠡꠃ ꠅꠁꠟ ꠘꠣ। 27 ꠛꠣꠖꠦ ꠁꠃꠍꠥꠚꠦ ꠔꠣꠞꠣꠞꠦ ꠎꠦꠔꠣ ꠇꠁꠀ ꠖꠤꠍꠟꠣ ꠁꠔꠣ ꠢꠥꠘꠤꠀ, ꠀꠞ ꠔꠣꠘꠦ ꠘꠦꠅꠀꠞ ꠟꠣꠉꠤ ꠁꠃꠍꠥꠚꠞ ꠙꠣꠑꠣꠁꠟ ꠉꠣꠠꠤꠘ ꠖꠦꠈꠤꠀ, ꠔꠣꠞꠣꠞ ꠛꠣꠚ ꠁꠀꠇꠥꠛꠞ ꠢꠥꠡ ꠑꠤꠇ ꠅꠁꠟ। 28 ꠁꠍꠞꠣꠁꠟꠦ ꠇꠁꠟꠣ, “ꠀꠝꠣꠞ ꠙꠥꠀ ꠁꠃꠍꠥꠚ ꠎꠦꠘ ꠅꠈꠘꠅ ꠎꠤꠔꠣ ꠀꠍꠦ, ꠅꠐꠣꠃ ꠔ ꠛꠃꠔ, ꠝꠞꠣꠞ ꠀꠉꠦ ꠀꠝꠤ ꠉꠤꠀ ꠔꠣꠞꠦ ꠖꠦꠈꠣꠃ ꠟꠣꠉꠛ।”