1 ꠛꠣꠖꠦ ꠁꠃꠍꠥꠚꠦ ꠔꠣꠘ ꠛꠣꠠꠤꠞ ꠈꠣꠖꠤꠝꠞꠦ ꠅꠃ ꠟꠣꠈꠣꠘ ꠢꠥꠇꠥꠝ ꠖꠤꠟꠣ, “ꠁ ꠝꠣꠘꠥꠡ ꠅꠇꠟꠞ ꠛꠡ꠆ꠔꠣꠔ ꠎꠔ ꠗꠣꠘ ꠎꠣꠉꠣ ꠅꠄ, ꠜꠞꠤꠀ ꠖꠤꠟꠣꠅ ꠀꠞ ꠎꠣꠞꠎꠤꠞ ꠐꠦꠇꠣ ꠔꠣꠞ ꠛꠡ꠆ꠔꠣꠞ ꠝꠥꠈꠅ ꠕꠁꠅ। 2 ꠅꠁꠟꠦ ꠅꠃ ꠢꠥꠞꠥ ꠎꠘꠞ ꠛꠡ꠆ꠔꠣꠞ ꠝꠥꠈꠅ ꠔꠣꠞ ꠐꠦꠇꠣꠞ ꠟꠉꠦ ꠀꠝꠣꠞ ꠞꠥꠙꠣꠞ ꠛꠣꠐꠤꠅ ꠕꠁꠅ।” ꠁꠃꠍꠥꠚꠦ ꠔꠣꠞꠦ ꠎꠦꠟꠣ ꠇꠁꠟꠣ, ꠢꠦ ꠅꠃꠟꠣ ꠇꠞꠟ। 3 ꠛꠣꠖꠞ ꠖꠤꠘ ꠛꠤꠀꠘꠦꠃ ꠔꠣꠞꠣ ꠉꠣꠗꠣ ꠟꠁꠀ ꠛꠤꠖꠣꠄ ꠅꠁꠟꠣ। 4 ꠔꠣꠞꠣ ꠐꠣꠃꠘ ꠕꠣꠇꠤ ꠕꠥꠠꠣ ꠖꠥꠞꠁ ꠎꠣꠁꠔꠦꠃ ꠁꠃꠍꠥꠚꠦ ꠔꠣꠘ ꠛꠣꠠꠤꠞ ꠈꠣꠖꠤꠝꠞꠦ ꠇꠁꠟꠣ, “ꠎꠟꠖꠤ ꠇꠞꠤ ꠄꠞꠣꠞ ꠈꠞꠦ ꠖꠃꠠꠣꠁꠀ ꠉꠤꠀ, ꠄꠞꠣꠞ ꠟꠣꠉꠣꠟ ꠙꠣꠁꠀ ꠢꠣꠞꠟꠦ ꠇꠁꠛꠣꠄ, ꠔꠥꠝꠞꠣ ꠃꠙꠇꠣꠞꠞ ꠛꠖꠟꠣ ꠇꠦꠘꠦ ꠈꠦꠔꠤ ꠇꠞꠟꠣꠄ? ꠀꠝꠣꠞ ꠝꠥꠘꠤꠛꠞ ꠞꠥꠙꠣꠞ ꠛꠣꠐꠤ ꠇꠦꠘꠦ ꠌꠥꠞꠤ ꠇꠞꠟꠣꠄ? 5 ꠅꠃ ꠛꠣꠐꠤꠔ ꠇꠞꠤꠀ ꠔ ꠔꠣꠁꠘ ꠡꠞꠛꠔ-ꠙꠣꠘꠤ ꠈꠣꠁꠘ ꠀꠞ ꠔꠖꠛꠤꠞꠞ ꠇꠣꠝꠅ ꠇꠞꠂꠘ। ꠔꠥꠝꠞꠣ ꠁꠔꠣ ꠈꠥꠛ ꠅꠁꠘ꠆ꠘꠣꠄ ꠇꠞꠍ।”

6 ꠢꠤ ꠈꠣꠖꠤꠝꠦ ꠔꠣꠞꠣꠞ ꠈꠞꠦꠖꠤ ꠉꠤꠀ ꠟꠣꠉꠣꠟ ꠙꠣꠁꠀ ꠅꠃ ꠟꠣꠈꠣꠘ ꠇꠁꠟ। 7 ꠅꠁꠟꠦ ꠔꠣꠞꠣ ꠇꠁꠟꠣ, “ꠢꠥꠎꠥꠞ ꠁꠟꠣ ꠝꠣꠔ ꠇꠦꠘꠦ ꠝꠣꠔꠤꠞꠣ? ꠀꠙꠘꠣꠞ ꠉꠥꠟꠣꠝ ꠅꠇꠟꠦ ꠇꠥꠘꠥ ꠟꠣꠈꠣꠘꠃ ꠁꠔꠣ ꠇꠣꠝ ꠇꠞꠔ ꠘꠣꠄ। 8 ꠖꠦꠈꠃꠇ꠆ꠇꠣ, ꠀꠉꠞꠛꠣꠞ ꠀꠝꠞꠣꠞ ꠛꠡ꠆ꠔꠣꠞ ꠝꠥꠈꠅ ꠎꠦ ꠐꠦꠇꠣ ꠙꠣꠁꠍꠟꠣꠝ, ꠁꠔꠣ ꠀꠝꠞꠣ ꠇꠦꠘꠣꠘ ꠖꠦꠡ ꠕꠘꠦ ꠢꠤꠞꠛꠣꠞ ꠀꠙꠘꠣꠞ ꠉꠦꠍꠦ ꠚꠤꠞꠔ ꠀꠘꠍꠤ, ꠔꠦ ꠀꠝꠞꠣ ꠇꠥꠘꠥ ꠀꠙꠘꠣꠞ ꠝꠥꠘꠤꠛꠞ ꠛꠣꠠꠤ ꠕꠘꠦ ꠡꠥꠘꠣ-ꠞꠥꠙꠣ ꠌꠥꠞꠤ ꠇꠞꠝꠥ ꠘꠤ? 9 ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞ ꠝꠣꠎꠦ ꠎꠣꠞ ꠉꠦꠍꠦ ꠅꠃ ꠛꠣꠐꠤ ꠙꠣꠁꠛꠣ, ꠔꠣꠞꠦ ꠝꠣꠞꠤꠟꠣꠁꠛꠣ ꠀꠞ ꠀꠝꠞꠣꠅ ꠢꠥꠎꠥꠞꠞ ꠉꠥꠟꠣꠝ ꠅꠁꠎꠤꠝꠥ।” 10 ꠔꠦꠃ ꠈꠣꠖꠤꠝꠦ ꠇꠁꠟ, “ꠜꠣꠟꠣ ꠇꠕꠣ, ꠔꠦ ꠔꠥꠝꠞꠣ ꠎꠦꠟꠣ ꠇꠁꠟꠣꠄ, ꠅꠃꠟꠣꠃ ꠅꠃꠇ। ꠎꠣꠞ ꠉꠦꠍꠦ ꠅꠃ ꠛꠣꠐꠤ ꠝꠤꠟꠛ, ꠈꠣꠟꠤ ꠔꠣꠞꠦ ꠀꠝꠣꠞ ꠉꠥꠟꠣꠝ ꠛꠣꠘꠣꠁꠝꠥ ꠀꠞ ꠛꠣꠇꠤ ꠢꠇꠟ ꠈꠣꠟꠣꠍ ꠙꠣꠁꠛꠣꠄ।” 11 ꠅꠃ ꠔꠣꠞꠣ ꠎꠟꠖꠤ ꠇꠞꠤ ꠢꠇꠟꠞ ꠛꠡ꠆ꠔꠣ ꠝꠣꠐꠤꠔ ꠟꠣꠝꠣꠁꠀ ꠈꠥꠟꠟ। 12 ꠀꠞ ꠈꠣꠖꠤꠝꠦ ꠛꠠ ꠜꠣꠁ ꠕꠘꠦ ꠢꠥꠞꠥ ꠜꠣꠁ ꠔꠞꠤ ꠢꠇꠟꠞ ꠛꠡ꠆ꠔꠣ ꠔꠥꠇꠣꠁꠟꠦꠅ ꠢꠦꠡꠦ ꠛꠤꠘ-ꠁꠀꠝꠤꠘꠞ ꠛꠡ꠆ꠔꠣꠔ ꠢꠤ ꠛꠣꠐꠤ ꠝꠤꠟꠟ। 13 ꠔꠦꠃ ꠔꠣꠞꠣ ꠎꠣꠞꠎꠤꠞ ꠚꠤꠘ꠆ꠘꠞ ꠇꠣꠙꠠ ꠚꠣꠠꠤꠟ꠆ꠟꠣ, ꠛꠣꠖꠦ ꠢꠤꠞꠛꠣꠞ ꠉꠣꠗꠣꠞ ꠙꠤꠑꠤꠔ ꠉꠣꠁꠐ ꠛꠣꠘ꠆ꠖꠤꠀ ꠐꠣꠃꠘꠅ ꠀꠁꠟ।

14 ꠔꠦꠃ ꠄꠢꠥꠖꠣ ꠀꠞ ꠔꠣꠞ ꠜꠣꠁꠀꠁꠘ ꠁꠃꠍꠥꠚꠞ ꠛꠣꠠꠤꠔ ꠉꠦꠟꠣ, ꠁ ꠡꠝꠄ ꠔꠣꠁꠘ ꠢꠘꠅ ꠀꠍꠟꠣ। ꠔꠣꠞꠣ ꠔꠣꠘ ꠍꠣꠝꠘꠦ ꠉꠤꠀ ꠝꠣꠐꠤꠔ ꠙꠠꠟꠣ। 15 ꠁꠃꠍꠥꠚꠦ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠁꠔꠣ ꠇꠤꠔꠣ ꠇꠞꠟꠣꠄ? ꠀꠝꠤ ꠎꠦꠘ ꠢꠇꠟꠔꠣ ꠉꠘꠔꠣꠝ ꠙꠣꠞꠤ, ꠁꠔꠣ ꠔꠥꠝꠞꠣ ꠎꠣꠘ ꠘꠣ ꠘꠤ?” 16 ꠄꠢꠥꠖꠣꠄ ꠇꠁꠟ, “ꠢꠥꠎꠥꠞꠞ ꠉꠦꠍꠦ ꠀꠝꠞꠣ ꠇꠤꠔꠣ ꠇꠁꠝꠥ? ꠇꠤꠔꠣ ꠎꠥꠀꠙ ꠖꠤꠝꠥ? ꠀꠞ ꠇꠤꠟꠣ ꠀꠝꠞꠣꠞꠦ ꠛꠦ-ꠇꠍꠥꠞ ꠇꠁꠔꠣꠝ? ꠀꠟ꠆ꠟꠣꠄꠃ ꠔꠣꠘ ꠉꠥꠟꠣꠝ ꠅꠇꠟꠞ ꠖꠥꠡ ꠖꠦꠈꠣꠁ ꠖꠤꠍꠂꠘ, ꠔꠦ ꠎꠣꠞ ꠉꠦꠍꠦ ꠁ ꠛꠣꠐꠤ ꠝꠤꠟꠍꠦ, ꠢꠦ ꠀꠞ ꠀꠝꠞꠣ ꠢꠇꠟꠦꠃ ꠢꠥꠎꠥꠞꠞ ꠉꠥꠟꠣꠝ ꠅꠁꠟꠣꠝ।” 17 ꠅꠁꠟꠦ ꠁꠃꠍꠥꠚꠦ ꠇꠁꠟꠣ, “ꠘꠣ, ꠘꠣ, ꠀꠝꠤ ꠁ ꠇꠣꠝ ꠇꠥꠘꠥ ꠟꠣꠈꠣꠘꠃ ꠇꠞꠔꠣꠝ ꠘꠣꠄ। ꠎꠣꠞ ꠉꠦꠍꠦ ꠅꠃ ꠛꠣꠐꠤ ꠝꠤꠟꠍꠦ, ꠢꠦ-ꠃ ꠀꠝꠣꠞ ꠉꠥꠟꠣꠝ ꠅꠁꠛ, ꠛꠣꠇꠤ ꠡꠛ ꠍꠢꠤ-ꠍꠣꠟꠣꠝꠔꠦ ꠔꠥꠝꠞꠣꠞ ꠛꠣꠚꠞ ꠉꠦꠍꠦ ꠎꠣꠅꠉꠤ।”

18 ꠔꠦꠃ ꠄꠢꠥꠖꠣꠄ ꠁꠃꠍꠥꠚꠞ ꠇꠣꠍꠣꠔ ꠉꠤꠀ ꠇꠁꠟ, “ꠢꠥꠎꠥꠞ ꠀꠙꠘꠦ ꠔ ꠚꠦꠞꠣꠃꠘꠞ ꠢꠝꠣꠘ, ꠔꠦ ꠖꠄꠀ ꠇꠞꠤ ꠀꠙꠘꠣꠞ ꠉꠥꠟꠣꠝꠞꠦ ꠄꠇꠈꠣꠘ ꠝꠣꠔ ꠝꠣꠔꠣꠞ ꠡꠥꠎꠥꠉ ꠖꠦꠃꠇ꠆ꠇꠣ। ꠀꠙꠘꠣꠞ ꠉꠥꠟꠣꠝꠞ ꠃꠙꠞꠦ ꠉꠥꠍꠣ ꠅꠁꠘ ꠘꠣ ꠎꠦꠘ। 19 ꠢꠥꠎꠥꠞꠦ ꠀꠉꠦ ꠁ ꠉꠥꠟꠣꠝ ꠅꠇꠟꠞꠦ ꠎꠤꠇꠣꠁꠍꠟꠣ, ꠔꠥꠝꠞꠣꠞ ꠛꠣꠚ ꠛꠣ ꠇꠥꠘꠥ ꠜꠣꠁ ꠀꠍꠂꠘ ꠘꠤ। 20 ꠀꠝꠞꠣ ꠎꠥꠀꠙ ꠖꠤꠍꠟꠣꠝ, ꠀꠝꠞꠣꠞ ꠝꠥꠞꠛ꠆ꠛꠤ ꠛꠣꠛꠣ ꠎꠤꠘ꠆ꠖꠣ ꠀꠍꠂꠘ, ꠀꠞ ꠔꠣꠘ ꠢꠦꠡꠇꠣꠟꠤ ꠛꠄꠅꠡꠞ ꠄꠉꠥ ꠙꠥꠀ ꠀꠍꠦ। ꠔꠣꠞ ꠜꠣꠁ ꠝꠞꠤꠉꠦꠍꠦ, ꠀꠞ ꠢꠦ ꠄꠇ ꠝꠣʼꠞ ꠄꠇ ꠙꠥꠔ ꠉꠔꠤꠇꠦ ꠛꠣꠛꠣꠄ ꠔꠣꠞꠦ ꠈꠥꠛ ꠝꠣꠄꠀ ꠇꠞꠂꠘ। 21 ꠛꠣꠖꠦ ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞꠦ ꠇꠁꠍꠟꠣ, ꠔꠣꠞꠦ ꠀꠝꠣꠞ ꠉꠦꠍꠦ ꠟꠁꠀ ꠀꠁꠅ, ꠀꠝꠤ ꠔꠣꠞꠦ ꠘꠤꠎꠞ ꠌꠃꠈꠦ ꠖꠦꠈꠝꠥ। 22 ꠢꠤ ꠡꠝꠄ ꠀꠝꠞꠣ ꠢꠥꠎꠥꠞꠞꠦ ꠇꠁꠍꠟꠣꠝ, ꠛꠣꠛꠣꠞꠦ ꠕꠁꠀ ꠢꠦ ꠀꠁꠔ ꠙꠣꠞꠔ ꠘꠣꠄ ꠀꠞ ꠕꠁꠀ ꠀꠁꠟꠦꠅ ꠛꠣꠛꠣ ꠝꠣꠞꠣ ꠎꠣꠁꠛꠣ। 23 ꠅꠁꠟꠦ ꠀꠙꠘꠦ ꠁ ꠉꠥꠟꠣꠝ ꠅꠇꠟꠞꠦ ꠇꠁꠍꠟꠣ, ꠔꠥꠝꠞꠣꠞ ꠢꠥꠞꠥ ꠜꠣꠁꠞꠦ ꠟꠉꠦ ꠘꠣ ꠀꠘꠟꠦ, ꠔꠥꠝꠞꠣ ꠀꠞ ꠀꠝꠣꠞ ꠍꠣꠝꠘꠦ ꠀꠁꠅ ꠘꠣ। 24 ꠄꠞꠟꠣꠉꠤ ꠀꠝꠞꠣ ꠚꠤꠞꠤꠀ ꠉꠤꠀ ꠀꠙꠘꠣꠞ ꠉꠥꠟꠣꠝ, ꠀꠝꠞꠣꠞ ꠛꠣꠛꠣꠞꠦ ꠢꠥꠎꠥꠞꠞ ꠢꠇꠟ ꠇꠕꠣ ꠢꠥꠘꠣꠁꠍꠟꠣꠝ। 25 ꠛꠣꠖꠦ ꠛꠣꠛꠣꠄ ꠇꠁꠟꠣ, ꠔꠥꠝꠞꠣ ꠢꠤꠞꠛꠣꠞ ꠉꠤꠀ ꠀꠝꠞꠣꠞ ꠟꠣꠉꠤ ꠀꠞꠅ ꠕꠥꠠꠣ ꠗꠣꠘ ꠟꠁꠀ ꠀꠘꠅꠉꠤ। 26 ꠔꠦꠃ ꠀꠝꠞꠣ ꠇꠁꠟꠣꠝ, ꠀꠝꠞꠣꠞ ꠢꠥꠞꠥ ꠜꠣꠁꠞꠦ ꠟꠉꠦ ꠖꠤꠟꠦ ꠀꠝꠞꠣ ꠎꠣꠁꠝꠥ, ꠀꠞꠘꠣꠄ ꠀꠝꠞꠣ ꠉꠤꠀ ꠢꠤ ꠝꠣꠘꠡꠞ ꠍꠣꠝꠘꠦ ꠝꠥꠈ ꠖꠦꠈꠣꠁꠔꠣꠝ ꠘꠣꠄ। 27 ꠅꠃ ꠀꠙꠘꠣꠞ ꠉꠥꠟꠣꠝ, ꠀꠝꠞꠣꠞ ꠛꠣꠛꠣꠄ ꠇꠁꠟꠣ, ꠔꠥꠝꠞꠣ ꠔ ꠎꠣꠘ, ꠀꠝꠣꠞ ꠁ ꠛꠤꠛꠤꠞ ꠔꠞꠚꠣ ꠖꠥꠉꠥ ꠙꠥꠀ ꠀꠍꠤꠟ। 28 ꠄꠞꠣꠞ ꠄꠇꠎꠘ ꠀꠝꠣꠞ ꠌꠈꠥꠞ ꠍꠣꠝꠘ ꠕꠣꠇꠤ ꠛꠣꠞ ꠅꠁꠀ ꠉꠦꠟ, ꠀꠞ ꠔ ꠇꠥꠘꠥꠖꠤꠘ ꠔꠣꠞꠦ ꠖꠦꠈꠟꠣꠝ ꠘꠣ, ꠀꠝꠤ ꠛꠥꠎꠟꠣꠝ ꠎꠦꠘ, ꠘꠤꠌꠄ ꠇꠥꠘꠥ ꠎꠣꠘꠥꠀꠞꠦ ꠔꠣꠞꠦ ꠍꠤꠠꠤ-ꠛꠤꠠꠤꠟꠣꠁꠍꠦ। 29 ꠅꠈꠘ ꠔꠥꠝꠞꠣ ꠄꠞꠦꠅ ꠀꠝꠣꠞ ꠉꠦꠍ ꠕꠘꠦ ꠘꠤꠟꠦꠉꠤ ꠀꠞ ꠄꠞ ꠇꠥꠘꠥ ꠈꠦꠔꠤ ꠅꠁꠟꠦ, ꠔꠣꠞ ꠖꠥꠈꠦ ꠔꠥꠝꠞꠣ ꠀꠝꠣꠞꠦ ꠅꠃ ꠙꠣꠇꠘꠣ ꠌꠥꠟꠦ ꠇꠄꠛꠞꠅ ꠢꠣꠞꠣꠁꠛꠣꠄ। 30 ꠄꠞꠟꠣꠉꠤ ꠅꠈꠘ ꠎꠥꠖꠤ ꠀꠙꠘꠣꠞ ꠉꠥꠟꠣꠝ, ꠀꠝꠣꠞ ꠛꠣꠛꠣꠞ ꠉꠦꠍꠦ ꠀꠝꠤ ꠎꠣꠁ ꠀꠞ ꠔꠣꠘ ꠁ ꠙꠥꠀꠞꠦ ꠟꠉꠦ ꠘꠣ ꠖꠦꠈꠂꠘ, ꠔꠦ ꠄꠞ ꠎꠣꠘꠞ ꠟꠉꠦ ꠔꠣꠘ ꠎꠣꠘ ꠄꠇꠈꠣꠘꠅ ꠛꠣꠘ꠆ꠖꠣ ꠉꠔꠤꠇꠦ, 31 ꠔꠣꠞꠦ ꠘꠣ ꠖꠦꠈꠟꠦ, ꠔꠣꠁꠘ ꠘꠤꠌꠄ ꠝꠣꠞꠣ ꠎꠣꠁꠛꠣ। ꠀꠙꠘꠣꠞ ꠉꠥꠟꠣꠝ, ꠀꠝꠞꠣꠞ ꠝꠥꠞꠛ꠆ꠛꠤ ꠛꠣꠚ ꠛꠃꠔ ꠖꠥꠈꠦ ꠙꠣꠇꠘꠣ ꠌꠥꠟ ꠟꠁꠀ ꠇꠄꠛꠞꠅ ꠢꠣꠝꠣꠁꠛꠣ। 32 ꠀꠞ ꠀꠙꠘꠣꠞ ꠉꠥꠟꠣꠝ ꠀꠝꠤ, ꠀꠝꠣꠞ ꠛꠣꠛꠣꠞ ꠉꠦꠍꠦ ꠔꠣꠞ ꠟꠣꠉꠤ ꠎꠣꠝꠤꠘ ꠅꠁꠀ ꠇꠁꠍꠤ ꠎꠦꠘ, ꠔꠣꠞꠦ ꠚꠤꠞꠣꠁꠀ ꠀꠘꠔꠦ ꠘꠣ ꠙꠣꠞꠟꠦ, ꠢꠣꠞꠣ ꠎꠤꠘ꠆ꠖꠦꠉꠤ ꠜꠞꠣ ꠀꠝꠤ ꠔꠥꠝꠣꠞ ꠉꠦꠍꠦ ꠖꠣꠛꠤꠔ ꠞꠁꠝꠥ। 33 ꠔꠦ ꠢꠥꠎꠥꠞ ꠀꠝꠤ ꠝꠤꠘꠔꠤ ꠇꠞꠤꠀꠞ, ꠔꠣꠞ ꠛꠖꠟꠣ ꠀꠝꠤ ꠀꠙꠘꠣꠞ ꠉꠥꠟꠣꠝꠤ ꠇꠞꠝꠥ ꠀꠞ ꠔꠣꠞꠦ ꠀꠙꠘꠦ ꠄꠞꠣꠞ ꠟꠉꠦ ꠎꠣꠁꠛꠣꠞ ꠖꠤꠟꠣꠃꠇ꠆ꠇꠣ। 34 ꠄꠞꠦ ꠟꠉꠦ ꠘꠣ ꠘꠤꠀ ꠀꠝꠤ ꠇꠤꠟꠣ ꠛꠣꠛꠣꠞ ꠉꠦꠍꠦ ꠎꠣꠁꠝꠥ? ꠘꠣꠁꠟꠦ ꠛꠣꠛꠣꠞ ꠎꠣꠘꠞ ꠡꠞ꠆ꠛꠘꠣꠡ ꠀꠝꠣꠞ ꠘꠤꠎꠞ ꠌꠃꠈꠦ ꠖꠦꠈꠘ ꠟꠣꠉꠛ।”