1 ꠇꠦꠘꠣꠘ ꠖꠦꠡꠞ ꠀꠇꠣꠟꠞ ꠖꠡꠣ ꠀꠞꠅ ꠛꠦꠢꠣꠟ ꠅꠁꠟ। 2 ꠀꠞ ꠝꠤꠡꠞ ꠖꠦꠡ ꠕꠘꠦ ꠎꠦꠔꠣ ꠗꠣꠘ ꠘꠤꠍꠟꠣ, ꠁꠔꠣ ꠚꠥꠠꠣꠁ ꠉꠦꠟꠦ ꠁꠍꠞꠣꠁꠟꠦ ꠇꠁꠟꠣ, “ꠔꠥꠝꠞꠣ ꠢꠤꠞꠛꠣꠞ ꠉꠤꠀ ꠀꠝꠞꠣꠞ ꠟꠣꠉꠤ ꠀꠞꠅ ꠇꠤꠍꠥ ꠈꠣꠘꠤ-ꠈꠥꠞꠣꠇꠤ ꠟꠁꠀ ꠀꠘꠅꠉꠤ।” 3 ꠔꠦꠃ ꠄꠢꠥꠖꠣꠄ ꠔꠣꠘꠞꠦ ꠇꠁꠟ, “ꠢꠃ ꠝꠣꠘꠡꠦ ꠀꠝꠞꠣꠞꠦ ꠈꠥꠛ ꠇꠠꠣ ꠜꠣꠡꠣꠄ ꠇꠁꠀ ꠖꠤꠍꠂꠘ, ‘ꠔꠥꠝꠞꠣꠞ ꠜꠣꠁ ꠔꠥꠝꠞꠣꠞ ꠟꠉꠦ ꠘꠣ ꠀꠁꠟꠦ ꠔꠥꠝꠞꠣ ꠀꠞ ꠀꠝꠣꠞ ꠍꠣꠝꠘꠦ ꠀꠁꠅ ꠘꠣ।’ 4 ꠅꠈꠘ ꠔꠥꠝꠤ ꠀꠝꠞꠣꠞ ꠜꠣꠁꠞꠦ ꠀꠝꠞꠣꠞ ꠟꠉꠦ ꠇꠞꠤ ꠖꠦꠅ, ꠔꠦꠃ ꠀꠝꠞꠣ ꠉꠤꠀ ꠔꠥꠝꠣꠞ ꠟꠣꠉꠤ ꠈꠣꠘꠤ ꠟꠁꠀ ꠀꠁꠝꠥ। 5 ꠀꠞ ꠔꠣꠞꠦ ꠟꠉꠦ ꠘꠣ ꠖꠤꠟꠦ ꠀꠝꠞꠣꠅ ꠎꠣꠁꠔꠣꠝ ꠘꠣꠄ। ꠢꠤ ꠝꠣꠘꠡꠦ ꠀꠝꠞꠣꠞꠦ ꠇꠁꠀ ꠖꠤꠍꠂꠘ, ‘ꠔꠥꠝꠞꠣꠞ ꠜꠣꠁꠞꠦ ꠟꠉꠦ ꠘꠣ ꠀꠘꠟꠦ, ꠔꠥꠝꠞꠣ ꠀꠞ ꠀꠝꠣꠞ ꠍꠣꠝꠘꠦ ꠀꠁꠅ ꠘꠣ।’ ” 6 ꠁꠍꠞꠣꠁꠟꠦ ꠇꠁꠟꠣ, “ꠔꠥꠝꠞꠣ ꠇꠦꠘꠦ ꠀꠝꠣꠞ ꠟꠉꠦ ꠅꠃꠟꠣ ꠚꠣꠔꠞꠣꠝꠤ ꠇꠞꠟꠣꠄ? ꠔꠥꠝꠞꠣꠞ ꠀꠞꠇ ꠜꠣꠁ ꠀꠍꠦ, ꠁꠔꠣ ꠔꠣꠘꠞꠦ ꠇꠦꠘꠦ ꠇꠁꠟꠣꠄ?” 7 ꠔꠣꠞꠣ ꠇꠁꠟꠣ, “ꠢꠤ ꠝꠣꠘꠡꠦ ꠀꠝꠞꠣꠞ ꠀꠞ ꠀꠝꠞꠣꠞ ꠙꠞꠤꠛꠣꠞꠞ ꠀꠉꠣ-ꠉꠥꠠꠤ ꠢꠇ꠆ꠇꠟꠔꠣ ꠎꠤꠇꠣꠁꠍꠂꠘ, ‘ꠔꠥꠝꠞꠣꠞ ꠛꠣꠚ ꠇꠤꠔꠣ ꠅꠈꠘꠅ ꠎꠤꠘ꠆ꠖꠣ ꠀꠍꠂꠘ ꠘꠤ? ꠔꠥꠝꠞꠣꠞ ꠀꠞ ꠇꠥꠘꠥ ꠜꠣꠁ ꠀꠍꠂꠘ ꠘꠤ?’ ꠀꠝꠞꠣ ꠈꠣꠟꠤ ꠔꠣꠘ ꠍꠅꠀꠟꠞ ꠎꠥꠀꠙ ꠖꠤꠍꠟꠣꠝ, ꠀꠝꠞꠣ ꠇꠥꠘꠥ ꠎꠣꠘꠔꠣꠝ ꠘꠤ, ꠔꠣꠁꠘ ꠇꠁꠛꠣ ꠔꠥꠝꠞꠣꠞ ꠜꠣꠁꠞꠦꠅ ꠟꠁꠀ ꠀꠁꠅ?” 8 ꠄꠢꠥꠖꠣꠄ ꠔꠣꠘ ꠛꠣꠚꠞꠦ ꠇꠁꠟꠣ, “ꠔꠣꠞꠦ ꠀꠝꠣꠞ ꠟꠉꠦ ꠇꠞꠤ ꠖꠤꠟꠣꠅ, ꠀꠝꠞꠣ ꠎꠟꠖꠤ ꠎꠟꠖꠤ ꠞꠅꠀꠘꠣ ꠅꠁꠎꠣꠁ, ꠔꠦꠃ ꠔꠥꠝꠤ, ꠀꠝꠞꠣ ꠀꠞ ꠀꠝꠞꠣꠞ ꠢꠥꠞꠥꠔ꠆ꠔꠣꠁꠘ ꠢꠇ꠆ꠇꠟꠃ ꠎꠣꠘꠦ ꠛꠣꠌꠝꠥ, ꠇꠦꠃ ꠝꠞꠔꠣꠝ ꠘꠣꠄ। 9 ꠀꠝꠤ ꠘꠤꠎꠦꠃ ꠔꠣꠞ ꠟꠣꠉꠤ ꠎꠣꠝꠤꠘ ꠞꠁꠟꠣꠝ, ꠔꠣꠞꠦ ꠀꠝꠣꠞ ꠉꠦꠍ ꠕꠘꠦ ꠡꠝꠎꠤꠀ ꠘꠤꠅ। ꠀꠝꠤ ꠔꠣꠞꠦ ꠔꠥꠝꠣꠞ ꠉꠦꠍꠦ ꠚꠤꠞꠣꠁꠀ ꠘꠣ ꠀꠘꠟꠦ, ꠔꠥꠝꠣꠞ ꠉꠦꠍꠦ ꠀꠎꠤꠞ ꠘꠣ ꠇꠞꠟꠦ, ꠢꠣꠞꠣ ꠎꠤꠘ꠆ꠖꠦꠉꠤ ꠜꠞꠣ ꠀꠝꠤ ꠔꠥꠝꠣꠞ ꠉꠦꠍꠦ ꠖꠣꠄꠁ ꠞꠁꠝꠥ। 10 ꠀꠞ ꠅꠔ ꠖꠦꠞꠤ ꠘꠣ ꠇꠞꠟꠦ, ꠀꠝꠞꠣ ꠅꠔꠖꠤꠘꠦ ꠖꠥꠁꠛꠣꠞ ꠊꠥꠞꠤꠀ ꠀꠁꠔꠣꠝ ꠙꠣꠞꠟꠣꠝ ꠅꠘꠦ।”

11 ꠅꠃ ꠔꠣꠞꠣꠞ ꠛꠣꠚ ꠁꠍꠞꠣꠁꠟꠦ ꠇꠁꠟꠣ, “ꠅꠃꠟꠣ ꠅꠁꠟꠦ ꠄꠇ ꠇꠣꠝ ꠇꠞꠅ, ꠔꠥꠝꠞꠣ ꠎꠣꠞꠎꠤꠞ ꠛꠦꠉꠞ ꠝꠣꠎꠦ ꠅꠘꠞ ꠜꠣꠟꠣ ꠜꠣꠟꠣ ꠝꠣꠟ, ꠀꠉꠞ, ꠝꠃ, ꠈꠥꠡꠛꠄ ꠝꠡꠟꠣ, ꠝꠦꠡꠇꠦ-ꠀꠝ꠆ꠛꠞ, ꠙꠦꠡ꠆ꠔꠣ ꠀꠞ ꠛꠣꠖꠣꠝ ꠜꠞꠤꠀ ꠢꠃ ꠝꠣꠘꠡꠞ ꠟꠣꠉꠤ ꠍꠣꠟꠣꠝꠤ ꠟꠁꠀ ꠎꠣꠅ। 12 ꠀꠞ ꠔꠥꠝꠞꠣꠞ ꠟꠉꠦ ꠇꠞꠤ ꠀꠉꠞ ꠒꠣꠛꠥꠟ ꠐꠦꠇꠣ ꠘꠦꠅ, ꠛꠡ꠆ꠔꠣꠞ ꠝꠥꠈꠅ ꠎꠦ ꠐꠦꠇꠣ ꠚꠤꠞꠔ ꠀꠁꠍꠦ, ꠔꠣ-ꠅ ꠢꠤꠞꠛꠣꠞ ꠟꠁꠀ ꠎꠣꠅ, ꠇꠤ ꠎꠣꠘꠤ ꠇꠥꠘꠥ ꠜꠥꠟ ꠅꠁꠉꠦꠍꠤꠟ। 13 ꠔꠥꠝꠞꠣꠞ ꠁ ꠜꠣꠁꠞꠦ ꠟꠉꠦ ꠟꠁꠀ, ꠎꠟꠖꠤ ꠇꠞꠤ ꠢꠃ ꠝꠣꠘꠡꠞ ꠉꠦꠍꠦ ꠎꠣꠅ। 14 ꠡꠞ꠆ꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣꠄ ꠔꠥꠝꠞꠣꠞ ꠟꠣꠉꠤ ꠢꠃ ꠝꠣꠘꠡꠞ ꠖꠤꠟꠅ ꠝꠦꠢꠦꠞꠛꠣꠘꠤ ꠙꠄꠖꠣ ꠇꠞꠃꠇ꠆ꠇꠣ, ꠎꠣꠔꠦ ꠔꠣꠁꠘ ꠔꠥꠝꠞꠣꠞ ꠢꠃ ꠜꠣꠁ ꠀꠞ ꠛꠤꠘ-ꠁꠀꠝꠤꠘꠞꠦ ꠔꠥꠝꠞꠣꠞ ꠀꠔꠅ ꠚꠤꠞꠔ ꠖꠦꠁꠘ। ꠀꠞ ꠀꠝꠣꠞ ꠙꠥꠀ ꠈꠥꠀꠘꠤ ꠉꠦꠟꠦ, ꠘꠣ ꠅꠄ ꠉꠦꠟꠃ।” 15 ꠔꠦꠃ ꠔꠣꠞꠣ ꠢꠃ ꠍꠣꠟꠣꠝꠤ, ꠒꠣꠛꠥꠟ ꠐꠦꠇꠣ ꠀꠞ ꠛꠤꠘ-ꠁꠀꠝꠤꠘꠞꠦ ꠟꠁꠀ ꠞꠅꠀꠘꠣ ꠅꠁꠀ, ꠝꠤꠡꠞ ꠖꠦꠡꠅ ꠙꠃꠍꠤꠀ ꠁꠃꠍꠥꠚꠞ ꠍꠣꠝꠘꠦ ꠀꠎꠤꠞ ꠅꠁꠟꠣ।

16 ꠔꠣꠞꠣꠞ ꠟꠉꠦ ꠛꠤꠘ-ꠁꠀꠝꠤꠘꠞꠦ ꠖꠦꠈꠤꠀ ꠁꠃꠍꠥꠚꠦ ꠔꠣꠘ ꠛꠣꠠꠤꠞ ꠈꠣꠖꠤꠝꠞꠦ ꠇꠁꠟꠣ, “ꠅꠃ ꠝꠣꠘꠥꠡ ꠅꠇꠟꠞꠦ ꠛꠣꠠꠤꠞ ꠜꠤꠔꠞꠦ ꠘꠦꠅ ꠀꠞ ꠈꠡꠤ ꠎꠛ ꠇꠞꠤꠀ ꠉꠥꠡ꠆ꠔ ꠞꠣꠘ꠆ꠖꠅ। ꠔꠣꠞꠣ ꠝꠣꠗꠣꠘꠦ ꠀꠝꠣꠞ ꠟꠉꠦ ꠈꠣꠁꠛꠣ।” 17 ꠁꠃꠍꠥꠚꠦ ꠎꠦꠟꠣ ꠇꠁꠟꠣ, ꠈꠣꠖꠤꠝꠦꠅ ꠑꠤꠇ ꠅꠃꠟꠣ ꠇꠞꠟ, ꠢꠦ ꠄꠞꠣꠞꠦ ꠛꠣꠠꠤꠞ ꠜꠤꠔꠞꠦ ꠟꠁꠀ ꠉꠦꠟ। 18 ꠀꠞ ꠢꠦ ꠄꠞꠣꠞꠦ ꠁꠃꠍꠥꠚꠞ ꠛꠣꠠꠤꠞ ꠜꠤꠔꠞꠦ ꠘꠦꠅꠀꠄ, ꠔꠣꠞꠣ ꠒꠞꠣꠁꠀ ꠝꠣꠔꠣ-ꠝꠣꠔꠤ ꠇꠞꠟꠣ, “ꠀꠉꠞ ꠚꠤꠞꠣ ꠎꠦ ꠐꠦꠇꠣ ꠀꠝꠞꠣꠞ ꠛꠡ꠆ꠔꠣꠔ ꠇꠞꠤ ꠚꠤꠞꠔ ꠉꠦꠍꠤꠟ, ꠅꠔꠣꠞ ꠟꠣꠉꠤꠃ ꠀꠝꠞꠣꠞꠦ ꠅꠘꠅ ꠘꠤꠞꠣ, ꠅꠈꠘ ꠀꠝꠞꠣꠞ ꠖꠥꠡ ꠖꠦꠈꠣꠁꠀ ꠝꠣꠁꠞ-ꠗꠁꠞ ꠇꠞꠤꠀ ꠀꠝꠞꠣꠞꠦ ꠉꠥꠟꠣꠝ ꠛꠣꠘꠣꠁꠛꠣ, ꠀꠞ ꠉꠣꠗꠣ ꠅꠇꠟꠅ ꠇꠣꠠꠤꠀ ꠘꠤꠛꠣ।” 19 ꠔꠦꠃ ꠁꠃꠍꠥꠚꠞ ꠛꠣꠠꠤꠞ ꠖꠞꠎꠣꠞ ꠍꠣꠝꠘꠦ ꠀꠁꠀ ꠔꠣꠞꠣ ꠛꠣꠠꠤꠞ ꠈꠣꠖꠤꠝꠞꠦ ꠇꠁꠟꠣ, 20 “ꠢꠥꠎꠥꠞ, ꠀꠝꠞꠣ ꠄꠞ ꠀꠉꠦꠅ ꠗꠣꠘ ꠟꠅꠀꠔ ꠀꠁꠍꠟꠣꠝ, 21 ꠢꠦꠡꠦ ꠚꠤꠞꠔ ꠎꠣꠅꠀꠞ ꠛꠣꠟꠣ, ꠖꠝ ꠟꠁꠛꠣꠞ ꠎꠣꠉꠣꠔ ꠙꠃꠍꠤꠀ, ꠛꠡ꠆ꠔꠣ ꠈꠥꠟꠔꠦꠃ ꠖꠦꠈꠤ, ꠀꠝꠞꠣꠞ ꠙꠥꠞꠣ ꠐꠦꠇꠣ-ꠙꠄꠡꠣ ꠎꠣꠞꠎꠤꠞ ꠛꠡ꠆ꠔꠣꠞ ꠝꠥꠈꠅ ꠞꠁꠍꠦ, ꠅꠈꠘ ꠅꠃ ꠐꠦꠇꠣ ꠚꠤꠞꠔ ꠀꠘꠍꠤ। 22 ꠀꠞ ꠗꠣꠘ ꠘꠦꠅꠀꠞ ꠟꠣꠉꠤ ꠀꠞꠅ ꠐꠦꠇꠣ ꠀꠘꠍꠤ, ꠅꠁꠟꠦ ꠢꠤ ꠐꠦꠇꠣ ꠀꠝꠞꠣꠞ ꠛꠡ꠆ꠔꠣꠞ ꠜꠤꠔꠞꠦ ꠇꠦ ꠕꠁꠍꠤꠟ ꠎꠣꠘꠤ ꠘꠣ।” 23 ꠅꠃ ꠈꠣꠖꠤꠝꠦ ꠇꠁꠟ, “ꠔꠥꠝꠞꠣꠞ ꠜꠣꠟꠣꠁ ꠅꠃꠇ, ꠒꠞꠣꠁꠅ ꠘꠣ। ꠔꠥꠝꠞꠣꠞ ꠀꠞ ꠔꠥꠝꠞꠣꠞ ꠛꠣꠚꠞ ꠀꠟ꠆ꠟꠣꠄ, ꠁ ꠉꠣꠁꠛꠤ ꠗꠘ ꠔꠥꠝꠞꠣꠞ ꠛꠡ꠆ꠔꠣꠞ ꠝꠣꠎꠦ ꠖꠤꠍꠂꠘ। ꠔꠥꠝꠞꠣꠞ ꠐꠦꠇꠣ ꠀꠝꠤ ꠙꠣꠁꠍꠤ।” ꠛꠣꠖꠦ ꠢꠦ ꠡꠤꠝꠤꠅꠘꠞꠦ ꠛꠣꠞ ꠇꠞꠤꠀ ꠔꠣꠞꠣꠞ ꠉꠦꠍꠦ ꠟꠁꠀ ꠀꠁꠟ। 24 ꠢꠦ ꠢꠇꠟꠞꠦ ꠁꠃꠍꠥꠚꠞ ꠛꠣꠠꠤꠞ ꠜꠤꠔꠞꠦ ꠘꠤꠀ ꠙꠣꠘꠤ ꠖꠤꠟ ꠔꠣꠞꠣ ꠙꠣꠅ ꠗꠥꠁꠟꠣ ꠀꠞ ꠢꠦ ꠔꠣꠞꠣꠞ ꠉꠣꠗꠣ ꠅꠇꠟꠞꠦꠅ ꠈꠣꠘꠤ ꠖꠤꠟ। 25 ꠁꠃꠍꠥꠚ ꠝꠣꠗꠣꠘꠦ ꠀꠁꠛꠣ ꠉꠔꠤꠇꠦ, ꠄꠞꠣ ꠔꠣꠞꠣꠞ ꠍꠣꠟꠣꠝꠤ ꠅꠇꠟ ꠎꠥꠁꠔ ꠇꠞꠟꠣ। ꠔꠣꠞꠣ ꠢꠥꠘꠍꠟꠣ ꠎꠦꠘ, ꠔꠣꠘ ꠟꠉꠦꠃ ꠔꠣꠞꠣꠞ ꠈꠣꠘꠣ-ꠖꠣꠘꠣ ꠅꠁꠛ।

26 ꠛꠣꠖꠦ ꠁꠃꠍꠥꠚ ꠛꠣꠠꠤꠔ ꠀꠁꠟꠦ, ꠔꠣꠞꠣꠞ ꠢꠃ ꠍꠣꠟꠣꠝꠤ ꠅꠇꠟ ꠊꠞꠞ ꠜꠤꠔꠞꠦ ꠘꠤꠀ ꠔꠣꠘꠞꠦ ꠖꠤꠟꠣ, ꠖꠤꠀ ꠢꠣꠞꠟꠦ ꠔꠣꠘꠞꠦ ꠍꠁꠎꠖꠣ ꠇꠞꠟꠣ। 27 ꠔꠣꠞꠣꠞ ꠜꠣꠟꠣ-ꠛꠥꠞꠣ ꠈꠛꠞ ꠢꠥꠘꠤꠀ ꠔꠣꠁꠘ ꠎꠤꠇꠣꠁꠟꠣ, “ꠔꠥꠝꠞꠣꠞ ꠎꠦ ꠝꠥꠞꠛ꠆ꠛꠤ ꠛꠣꠚꠞ ꠇꠕꠣ ꠇꠁꠍꠟꠣꠄ, ꠔꠣꠁꠘ ꠜꠣꠟꠣ ꠀꠍꠂꠘ ꠘꠤ? ꠔꠣꠁꠘ ꠎꠤꠘ꠆ꠖꠣ ꠀꠍꠂꠘ ꠘꠤ?” 28 ꠔꠣꠞꠣ ꠎꠥꠀꠙ ꠖꠤꠟꠣ, “ꠎꠤꠅꠄ, ꠀꠙꠘꠣꠞ ꠉꠥꠟꠣꠝ ꠀꠝꠞꠣꠞ ꠛꠣꠛꠣ ꠅꠈꠘꠅ ꠎꠤꠘ꠆ꠖꠣ ꠀꠍꠂꠘ ꠀꠞ ꠜꠣꠟꠣ ꠀꠍꠂꠘ।” ꠢꠦꠡꠦ ꠔꠣꠞꠣ ꠝꠣꠕꠣ ꠘꠥꠀꠁꠀ ꠔꠣꠘꠞꠦ ꠁꠎ꠆ꠎꠔ ꠇꠞꠟꠣ। 29 ꠁꠃꠍꠥꠚꠦ ꠌꠃꠈ ꠔꠥꠟꠤꠀ ꠔꠣꠘ ꠘꠤꠎꠞ ꠜꠣꠁ ꠛꠤꠘ-ꠁꠀꠝꠤꠘꠞꠦ ꠖꠦꠈꠤꠀ ꠇꠁꠟꠣ, “ꠅꠃꠘꠤ ꠔꠥꠝꠞꠣꠞ ꠢꠃ ꠢꠥꠞꠥ ꠜꠣꠁ, ꠎꠣꠞ ꠇꠕꠣ ꠀꠉꠦ ꠇꠁꠍꠟꠣꠄ?” ꠔꠣꠁꠘ ꠛꠤꠘ-ꠁꠀꠝꠤꠘꠞꠦ ꠇꠁꠟꠣ, “ꠀꠟ꠆ꠟꠣꠄ ꠔꠥꠝꠣꠞꠦ ꠞꠢꠝ ꠇꠞꠃꠇ꠆ꠇꠣ।” 30 ꠜꠣꠁꠞꠦ ꠖꠦꠈꠤꠀ ꠁꠃꠍꠥꠚꠞ ꠖꠤꠟ ꠇꠣꠘ꠆ꠖꠤꠔ ꠟꠣꠉꠟ। ꠔꠣꠁꠘ ꠎꠟꠖꠤ ꠇꠞꠤ ꠛꠣꠞ ꠅꠁꠀ, ꠘꠤꠎꠞ ꠇꠥꠑꠣꠔ ꠉꠤꠀ ꠇꠣꠘ꠆ꠖꠤꠟꠣ। 31 ꠛꠣꠖꠦ ꠌꠃꠈ-ꠝꠥꠈ ꠗꠁꠀ ꠛꠣꠞ ꠅꠁꠀ ꠀꠁꠟꠣ ꠀꠞ ꠘꠤꠎꠞꠦ ꠡꠣꠝꠟꠣꠁꠀ ꠈꠣꠘꠤ ꠛꠤꠟꠣꠁꠛꠣꠞ ꠢꠥꠇꠥꠝ ꠖꠤꠟꠣ। 32 ꠅꠃ ꠁꠃꠍꠥꠚꠞꠦ, ꠔꠣꠘ ꠜꠣꠁꠀꠁꠘꠞꠦ ꠀꠞ ꠔꠣꠘ ꠟꠉꠦ ꠈꠣꠘꠦꠀꠟꠣ ꠝꠤꠡꠞꠤ ꠅꠇꠟꠞꠦ ꠀꠟꠉ ꠀꠟꠉ ꠎꠣꠉꠣꠔ ꠈꠣꠘꠤ ꠖꠤꠟꠣ। ꠇꠣꠞꠘ ꠝꠤꠡꠞꠤꠘ꠆ꠔꠦ ꠁꠛꠞꠣꠘꠤ ꠅꠇꠟꠞ ꠟꠉꠦ ꠛꠁꠀ ꠈꠣꠘꠣ-ꠖꠣꠘꠣ ꠇꠞꠔ ꠘꠣ, ꠁꠔꠣ ꠔꠣꠞꠣ ꠊꠤꠘ ꠇꠞꠂꠘ। 33 ꠔꠣꠞꠣ ꠁꠃꠍꠥꠚꠞ ꠍꠣꠝꠘꠦ ꠔꠣꠘ ꠜꠣꠁꠀꠁꠘꠞꠦ ꠛꠠꠞꠦ ꠛꠠꠞ ꠎꠣꠉꠣꠔ, ꠢꠥꠞꠥꠞꠦ ꠢꠥꠞꠥꠞ ꠎꠣꠉꠣꠔ ꠛꠅꠀꠁꠟꠣ, ꠔꠦꠃ ꠔꠣꠞꠣ ꠔꠣꠁꠎ꠆ꠎꠥꠛ ꠅꠁꠀ ꠄꠇꠎꠘꠦ ꠀꠞꠇ ꠎꠘꠞ ꠛꠣꠄ ꠌꠣꠁ ꠞꠁꠟꠣ। 34 ꠀꠞ ꠁꠃꠍꠥꠚꠦ ꠘꠤꠎꠞ ꠕꠣꠟꠞ ꠈꠣꠘꠤ ꠕꠘꠦ ꠔꠣꠘ ꠜꠣꠁꠀꠁꠘꠞꠦ ꠖꠦꠅꠀꠁꠟꠣ, ꠅꠁꠟꠦ ꠛꠤꠘ-ꠁꠀꠝꠤꠘꠞꠦ ꠢꠇꠟ ꠕꠘꠦ ꠙꠣꠌ ꠉꠥꠘ ꠛꠦꠡꠤ ꠖꠦꠅꠀ ꠅꠁꠟ। ꠈꠣꠁꠀ ꠢꠣꠞꠟꠦ ꠔꠣꠞꠣ ꠈꠥꠡꠤ ꠅꠁꠀ ꠃꠑꠟꠣ।