1 ꠁꠀꠇꠥꠛꠦꠅ ꠢꠥꠘꠟꠣ ꠝꠤꠡꠞ ꠖꠦꠡꠅ ꠗꠣꠘ ꠀꠍꠦ, ꠅꠃ ꠔꠣꠘ ꠙꠥꠀꠂꠘ꠆ꠔꠞꠦ ꠇꠁꠟꠣ, “ꠔꠥꠝꠞꠣ ꠄꠉꠥꠄ ꠀꠞꠉꠥꠞ ꠝꠥꠈꠞ ꠛꠣꠄ ꠌꠣꠁ ꠞꠁꠍ ꠇꠦꠘꠦ? 2 ꠢꠥꠘꠅ, ꠀꠝꠤ ꠢꠥꠘꠍꠤ, ꠝꠤꠡꠞ ꠖꠦꠡꠅ ꠗꠣꠘ ꠀꠍꠦ, ꠔꠥꠝꠞꠣ ꠢꠘꠅ ꠉꠤꠀ ꠀꠝꠞꠣꠞ ꠟꠣꠉꠤ ꠇꠤꠍꠥ ꠗꠣꠘ ꠟꠁꠀ ꠀꠘꠅ, ꠔꠦꠃ ꠀꠝꠞꠣ ꠁ ꠝꠞꠘ ꠕꠣꠇꠤꠀ ꠎꠣꠘꠦ ꠛꠣꠌꠝꠥ।” 3 ꠅꠃ ꠁꠃꠍꠥꠚꠞ ꠖꠡꠅ ꠜꠣꠁꠄ ꠗꠣꠘ ꠟꠁꠀ ꠀꠘꠣꠞ ꠟꠣꠉꠤ ꠝꠤꠡꠞꠅ ꠉꠦꠟꠣ। 4 ꠅꠁꠟꠦ ꠁꠀꠇꠥꠛꠦ ꠁꠃꠍꠥꠚꠞ ꠀꠙꠘ ꠝꠣʼꠞ ꠙꠦꠐꠞ ꠜꠣꠁ ꠛꠤꠘ-ꠁꠀꠝꠤꠘꠞꠦ ꠔꠣꠞꠣꠞ ꠟꠉꠦ ꠎꠣꠁꠔꠦ ꠖꠤꠟꠣ ꠘꠣ, ꠔꠣꠁꠘ ꠇꠁꠟꠣ, ꠄꠞ ꠇꠥꠘꠥ ꠛꠤꠙꠖ ꠅꠁꠎꠤꠔ ꠙꠣꠞꠦ। 5 ꠗꠣꠘ ꠈꠞꠤꠖꠞ ꠟꠣꠉꠤ ꠇꠦꠘꠣꠘ ꠖꠦꠡ ꠕꠣꠇꠤ ꠎꠦꠞꠣ ꠝꠤꠡꠞꠅ ꠉꠦꠟ, ꠁꠍꠞꠣꠁꠟꠞ ꠙꠥꠀꠂꠘꠅ ꠔꠣꠞꠣꠞ ꠖꠟꠞ ꠟꠉꠅ ꠅꠁꠀ ꠉꠦꠟꠣ, ꠇꠣꠞꠘ ꠇꠦꠘꠣꠘ ꠖꠦꠡꠅ-ꠅ ꠀꠇꠣꠟ ꠀꠍꠤꠟ।

6 ꠁ ꠡꠝꠄ ꠁꠃꠍꠥꠚꠃ ꠀꠍꠟꠣ ꠝꠤꠡꠞ ꠖꠦꠡꠞ ꠢꠇ꠆ꠇꠟꠔꠣꠞ ꠝꠣꠟꠤꠇ। ꠖꠦꠡꠞ ꠢꠇꠟ ꠝꠣꠘꠡꠞ ꠉꠦꠍꠦ ꠔꠣꠁꠘꠃ ꠗꠣꠘ ꠛꠦꠌꠔꠣ। ꠔꠦꠃ ꠁꠃꠍꠥꠚꠞ ꠜꠣꠁꠀꠁꠘꠅ ꠔꠣꠘ ꠉꠦꠍꠦ ꠉꠤꠀ, ꠔꠣꠞꠣ ꠝꠣꠕꠣꠞꠦ ꠝꠣꠐꠤꠔ ꠟꠣꠉꠣꠁꠀ ꠔꠣꠘꠞꠦ ꠁꠎ꠆ꠎꠔ ꠇꠞꠟꠣ। 7 ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘ꠆ꠔꠞꠦ ꠖꠦꠈꠤꠀꠃ ꠌꠤꠘꠤꠟꠤꠟꠣ, ꠅꠁꠟꠦ ꠘꠣ ꠌꠤꠘꠣꠞ ꠜꠣꠘ ꠇꠞꠤꠀ, ꠔꠣꠁꠘ ꠈꠥꠛ ꠇꠠꠣ ꠉꠟꠣꠄ ꠔꠣꠞꠣꠞꠦ ꠎꠤꠇꠣꠁꠟꠣ, “ꠔꠥꠝꠞꠣ ꠇꠥꠀꠁ ꠕꠣꠇꠤ ꠀꠁꠍ?” ꠔꠣꠞꠣ ꠇꠁꠟꠣ, “ꠀꠝꠞꠣ ꠇꠦꠘꠣꠘ ꠖꠦꠡ ꠕꠘꠦ ꠀꠁꠍꠤ, ꠗꠣꠘ ꠘꠤꠛꠣꠞ ꠟꠣꠉꠤ।” 8 ꠁꠃꠍꠥꠚꠦ ꠔꠣꠘ ꠜꠣꠁꠀꠁꠘꠞꠦ ꠢꠣꠍꠣꠞꠞ ꠌꠤꠘꠟꠦꠅ, ꠜꠣꠁꠀꠁꠘ꠆ꠔꠦ ꠔꠣꠘꠞꠦ ꠌꠤꠘꠟꠣ ꠘꠣ। 9 ꠔꠣꠁꠘ ꠄꠞꠣꠞꠦ ꠟꠁꠀ ꠈꠥꠀꠛꠦ ꠎꠦꠔꠣ ꠖꠦꠈꠍꠟꠣ, ꠢꠃ ꠇꠕꠣ ꠔꠣꠘ ꠝꠘꠅ ꠅꠁꠟ। ꠅꠃ ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠔꠥꠝꠞꠣ ꠔ ꠉꠥꠁꠀ! ꠀꠝꠞꠣꠞ ꠖꠦꠡꠞ ꠚꠣꠇ-ꠚꠥꠇꠞ ꠅꠔꠣ ꠖꠦꠈꠣꠔ ꠀꠁꠍ।” 10 ꠔꠣꠞꠣ ꠇꠁꠟꠣ, “ꠎꠤ ꠘꠣ ꠢꠥꠎꠥꠞ, ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠦ ꠈꠣꠟꠤ ꠗꠣꠘ ꠟꠅꠀꠔ ꠀꠁꠍꠤ। 11 ꠀꠝꠞꠣ ꠔ ꠢꠇꠟ ꠄꠇ ꠛꠣꠚꠞ ꠀꠅꠟꠣꠖ ꠀꠞ ꠍꠣꠁꠌ꠆ꠌꠣ ꠝꠣꠘꠥꠡ; ꠀꠙꠘꠣꠞ ꠁ ꠉꠥꠟꠣꠝ ꠅꠇꠟ ꠇꠥꠘꠥ ꠉꠥꠁꠀ ꠘꠣꠄ।” 12 ꠁꠃꠍꠥꠚꠦ ꠢꠤꠞꠛꠣꠞ ꠔꠣꠞꠣꠞꠦ ꠇꠁꠟꠣ, “ꠘꠣ, ꠘꠣ, ꠔꠥꠝꠞꠣ ꠀꠝꠣꠞ ꠖꠦꠡꠞ ꠚꠣꠇ-ꠚꠥꠇꠞ ꠖꠦꠈꠣꠔ ꠀꠁꠍ।” 13 ꠔꠣꠞꠣ ꠇꠁꠟꠣ, “ꠀꠙꠘꠣꠞ ꠉꠥꠟꠣꠝ ꠅꠇꠟ, ꠢꠇꠟꠦ ꠝꠤꠟꠤꠀ ꠛꠣꠞꠅ ꠜꠣꠁ। ꠀꠝꠞꠣ ꠇꠦꠘꠣꠘ ꠖꠦꠡꠞ ꠄꠇ ꠛꠣꠚꠞ ꠀꠅꠟꠣꠖ। ꠀꠝꠞꠣꠞ ꠢꠥꠞꠥ ꠜꠣꠁ ꠅꠈꠘ ꠛꠣꠛꠣꠞ ꠉꠦꠍꠦ ꠞꠁꠍꠦ, ꠀꠞ ꠀꠞꠇ ꠜꠣꠁ ꠘꠣꠄ।” 14 ꠁꠃꠍꠥꠚꠦ ꠔꠣꠞꠣꠞꠦ ꠇꠁꠟꠣ, “ꠘꠣ, ꠘꠣ, ꠀꠝꠤ ꠑꠤꠇꠃ ꠇꠁꠍꠤ, ꠔꠥꠝꠞꠣ ꠉꠥꠁꠀꠃ! 15 ꠔꠦ ꠔꠥꠝꠞꠣꠞ ꠙꠞꠤꠇ꠆ꠇꠣ ꠅꠟꠣꠃ ꠅꠁꠎꠣꠃꠇ: ꠀꠝꠤ ꠚꠦꠞꠣꠃꠘꠞ ꠎꠣꠘꠞ ꠇꠍꠝ ꠇꠞꠤ ꠇꠁꠀꠞ, ꠔꠥꠝꠞꠣꠞ ꠢꠥꠞꠥ ꠜꠣꠁ ꠅꠘꠅ ꠘꠣ ꠀꠁꠟꠦ, ꠔꠥꠝꠞꠣꠅ ꠁꠘ ꠕꠘꠦ ꠍꠣꠠꠣ ꠙꠣꠁꠔꠣꠄ ꠘꠣꠄ। 16 ꠔꠥꠝꠞꠣꠞ ꠄꠇꠎꠘꠞꠦ ꠙꠣꠑꠣꠁꠀ, ꠔꠥꠝꠞꠣꠞ ꠢꠃ ꠜꠣꠁꠞꠦ ꠀꠘꠣꠅ ꠀꠞ ꠛꠣꠇꠤ ꠢꠇꠟꠦ ꠛꠘ꠆ꠖꠤ ꠞꠅ। ꠅꠃ ꠙꠞꠤꠇ꠆ꠇꠣꠄ ꠔꠥꠝꠞꠣꠞ ꠝꠣꠔꠞ ꠢꠣꠍꠣ-ꠝꠤꠍꠣ ꠛꠥꠎꠝꠥ। ꠔꠣꠞꠦ ꠘꠣ ꠀꠘꠟꠦ, ꠀꠝꠤ ꠚꠦꠞꠣꠃꠘꠞ ꠎꠣꠘꠞ ꠇꠍꠝ ꠇꠞꠤ ꠇꠁꠀꠞ, ꠔꠥꠝꠞꠣ ꠘꠤꠌꠄ ꠉꠥꠁꠀ!” 17 ꠀꠞ ꠁꠃꠍꠥꠚꠦ ꠔꠤꠘ ꠖꠤꠘ ꠔꠣꠞꠣꠞꠦ ꠀꠎꠔ ꠈꠣꠘꠣꠔ ꠛꠘ꠆ꠖꠤ ꠇꠞꠤ ꠕꠁꠟꠣ।

18 ꠢꠦꠡꠦ ꠔꠤꠘ ꠖꠤꠘꠞ ꠖꠤꠘ, ꠁꠃꠍꠥꠚꠦ ꠔꠣꠞꠣꠞꠦ ꠇꠁꠟꠣ, “ꠢꠥꠘꠅ, ꠀꠝꠤ ꠔ ꠀꠟ꠆ꠟꠣꠞꠦ ꠒꠞꠣꠁ, ꠔꠥꠝꠞꠣ ꠛꠣꠌꠔꠦ ꠌꠣꠁꠟꠦ, ꠀꠝꠤ ꠎꠦꠟꠣ ꠇꠁ, ꠅꠃꠟꠣ ꠇꠞꠅ। 19 ꠔꠥꠝꠞꠣ ꠢꠣꠍꠣꠞꠞ ꠍꠣꠁꠌ꠆ꠌꠣ ꠝꠣꠘꠥꠡ ꠅꠁꠟꠦ, ꠔꠥꠝꠞꠣꠞ ꠄꠇ ꠜꠣꠁ ꠀꠎꠔꠅ ꠕꠣꠇꠃꠇ ꠀꠞ ꠛꠣꠇꠤ ꠢꠇꠟꠦ ꠔꠥꠝꠞꠣꠞ ꠀꠇꠣꠟꠤ ꠙꠞꠤꠛꠣꠞꠞ ꠟꠣꠉꠤ ꠗꠣꠘ ꠟꠁꠀ ꠎꠣꠅꠉꠤ। 20 ꠔꠥꠝꠞꠣꠞ ꠝꠣꠔ ꠢꠣꠍꠣ ꠇꠤ ꠘꠣ ꠁꠐꠣ ꠛꠥꠎꠣꠞ ꠟꠣꠉꠤ, ꠔꠥꠝꠞꠣꠞ ꠢꠥꠞꠥ ꠜꠣꠁꠞꠦ ꠀꠝꠣꠞ ꠉꠦꠍꠦ ꠟꠁꠀ ꠀꠁꠅ। ꠔꠦꠃ ꠔꠥꠝꠞꠣ ꠝꠞꠔꠣꠄ ꠘꠣꠄ।” ꠅꠃ ꠔꠣꠞꠣꠅ ꠞꠣꠎꠤ ꠅꠁꠟꠣ। 21 ꠛꠣꠖꠦ ꠔꠣꠞꠣ ꠝꠣꠔꠣ-ꠝꠣꠔꠤ ꠇꠞꠟꠣ, “ꠢꠣꠍꠣꠃ ꠔ, ꠀꠝꠞꠣꠞ ꠢꠤ ꠜꠣꠁꠞ ꠟꠉꠦ ꠎꠦꠔꠣ ꠇꠞꠍꠤ ꠁꠔꠣ ꠅꠁꠘ꠆ꠘꠣꠄ। ꠢꠦ ꠀꠝꠞꠣꠞ ꠉꠦꠍꠦ ꠇꠣꠎ-ꠝꠤꠘꠔꠤ ꠇꠞꠟꠦꠅ, ꠀꠝꠞꠣ ꠔꠣꠞ ꠝꠣꠔꠅ ꠇꠣꠘ ꠖꠤꠍꠤ ꠘꠣ। ꠄꠞꠟꠣꠉꠤ ꠀꠝꠞꠣꠞ ꠃꠙꠞꠦ ꠁ ꠝꠍꠤꠛꠔ ꠀꠁꠍꠦ।” 22 ꠔꠦꠃ ꠞꠥꠛꠦꠘꠦ ꠔꠣꠞꠣꠞꠦ ꠇꠁꠟꠣ, “ꠀꠝꠤ ꠔ ꠔꠥꠝꠞꠣꠞꠦ ꠇꠁꠍꠟꠣꠝ, ꠔꠣꠞ ꠃꠙꠞꠦ ꠇꠥꠘꠥ ꠎꠥꠟꠥꠝ ꠇꠞꠤꠅ ꠘꠣ, ꠔꠥꠝꠞꠣ ꠢꠥꠘꠟꠣꠄ ꠘꠣ। ꠖꠦꠈꠅ, ꠅꠈꠘ ꠔꠣꠞ ꠟꠃꠞ ꠢꠤꠡꠣꠛ-ꠘꠤꠇꠣꠡ ꠖꠤꠔꠦ ꠅꠞ।” 23 ꠅꠁꠟꠦ ꠁꠃꠍꠥꠚꠦ ꠎꠦꠘ ꠔꠣꠞꠣꠞ ꠝꠣꠔ ꠛꠥꠎꠞꠣ, ꠁꠔꠣ ꠔꠣꠞꠣ ꠎꠣꠘꠟ ꠘꠣ। ꠇꠣꠞꠘ ꠔꠣꠁꠘ ꠝꠣꠔ ꠛꠥꠎꠣꠅꠞꠣ ꠄꠇꠎꠘꠞꠦ ꠝꠣꠎꠦ ꠞꠣꠈꠤꠀ, ꠔꠣꠞꠣꠞ ꠟꠉꠦ ꠝꠣꠔꠔꠣ। 24 ꠔꠦꠃ ꠁꠃꠍꠥꠚꠦ ꠔꠣꠞꠣꠞ ꠉꠦꠍ ꠕꠘꠦ ꠢꠞꠤꠀ ꠉꠤꠀ ꠇꠣꠘ꠆ꠖꠤꠔꠣ ꠟꠣꠉꠟꠣ। ꠛꠣꠖꠦ ꠢꠤꠞꠛꠣꠞ ꠀꠁꠀ ꠔꠣꠞꠣꠞ ꠟꠉꠦ ꠝꠣꠔꠤꠟꠣ ꠀꠞ ꠔꠣꠁꠘ ꠡꠤꠝꠤꠅꠘꠞꠦ ꠗꠞꠤꠀ ꠔꠣꠞꠣꠞ ꠍꠣꠝꠘꠦꠃ ꠛꠣꠘ꠆ꠖꠣꠁꠟ꠆ꠟꠣ। 25 ꠛꠣꠖꠦ ꠁꠃꠍꠥꠚꠦ ꠔꠣꠞꠣꠞ ꠛꠡ꠆ꠔꠣꠞ ꠝꠣꠎꠦ ꠗꠣꠘ ꠜꠞꠣꠁꠀ, ꠎꠣꠞꠎꠤꠞ ꠐꠦꠇꠣ ꠔꠣꠞ ꠛꠡ꠆ꠔꠣꠔ ꠚꠤꠞꠣꠁ ꠖꠤꠀ, ꠄꠞꠣꠞ ꠙꠕꠞ ꠈꠣꠘꠤꠞ ꠝꠍꠣ ꠖꠦꠅꠀꠞ ꠟꠣꠉꠤ ꠢꠥꠇꠥꠝ ꠖꠤꠟꠣ। ꠀꠞ ꠅꠃꠟꠣ ꠇꠞꠣ ꠅꠁꠟ।

26 ꠢꠦꠡꠦ ꠔꠣꠞꠣ ꠎꠣꠞꠎꠤꠞ ꠉꠣꠗꠣꠞ ꠙꠤꠑꠤꠔ ꠗꠣꠘꠞ ꠉꠣꠁꠐ ꠛꠣꠘ꠆ꠖꠤꠀ ꠞꠅꠀꠘꠣ ꠅꠁꠟꠣ। 27 ꠙꠕꠅ ꠎꠤꠞꠣꠘꠤꠞ ꠎꠣꠉꠣꠔ ꠉꠤꠀ ꠎꠦꠛꠟꠣ ꠄꠇꠎꠘꠦ ꠉꠣꠗꠣꠞꠦ ꠈꠣꠅꠀꠘꠤꠞ ꠟꠣꠉꠤ ꠛꠡ꠆ꠔꠣ ꠈꠥꠟꠟ, ꠀꠞ ꠖꠦꠈꠟ, ꠛꠡ꠆ꠔꠣꠞ ꠝꠥꠈꠅ ꠔꠣꠞ ꠐꠦꠇꠣꠞ ꠈꠥꠔꠤ। 28 ꠅꠃ ꠢꠦ ꠔꠣꠞ ꠜꠣꠁꠀꠁꠘꠞꠦ ꠇꠁꠟ, “ꠖꠦꠈꠅ, ꠖꠦꠈꠅ, ꠀꠝꠣꠞ ꠐꠦꠇꠣ ꠀꠝꠣꠞ ꠛꠡ꠆ꠔꠣꠔ ꠚꠤꠞꠔ ꠖꠦꠅꠀ ꠅꠁꠍꠦ।” ꠖꠦꠈꠤꠀꠃ ꠔꠣꠞꠣꠞ ꠎꠣꠘ ꠃꠠꠤ ꠉꠦꠟ ꠀꠞ ꠒꠞꠣꠁꠀ ꠇꠣꠙꠔꠦ ꠇꠣꠙꠔꠦ ꠇꠁꠟ, “ꠀꠟ꠆ꠟꠣꠄ ꠀꠝꠞꠣꠞꠦ ꠁꠔꠣ ꠇꠤꠔꠣ ꠇꠞꠟꠣ?”

29 ꠛꠣꠖꠦ ꠇꠦꠘꠣꠘ ꠖꠦꠡꠅ ꠉꠤꠀ ꠔꠣꠞꠣꠞ ꠛꠣꠚ ꠁꠀꠇꠥꠛꠞ ꠉꠦꠍꠦ ꠀꠎꠤꠞ ꠅꠁꠀ, ꠁꠔꠣ ꠢꠇꠟꠔꠣ ꠢꠥꠘꠣꠁꠀ ꠇꠁꠟꠣ, 30 “ꠢꠤ ꠖꠦꠡꠞ ꠝꠣꠟꠤꠇꠦ, ꠀꠝꠞꠣꠞꠦ ꠈꠥꠛ ꠇꠠꠣ ꠉꠟꠣꠄ ꠇꠁꠍꠂꠘ, ꠀꠝꠞꠣ ꠉꠥꠁꠀ ꠅꠁꠀ ꠢꠤ ꠖꠦꠡꠅ ꠉꠦꠍꠤ। 31 ꠀꠝꠞꠣ ꠇꠁꠍꠤ, ꠀꠝꠞꠣ ꠢꠇ ꠝꠣꠘꠥꠡ, ꠇꠥꠘꠥ ꠉꠥꠁꠀ ꠘꠣꠄ। 32 ꠀꠝꠞꠣ ꠛꠣꠞꠅꠎꠘ ꠜꠣꠁ, ꠄꠇ ꠛꠣꠚꠞ ꠛꠣꠞꠅ ꠙꠥꠀ, ꠅꠁꠟꠦ ꠀꠝꠞꠣꠞ ꠄꠇꠎꠘ ꠘꠣꠄ ꠀꠞ ꠢꠇꠟ ꠕꠘꠦ ꠢꠥꠞꠥ ꠜꠣꠁ ꠅꠈꠘ ꠇꠦꠘꠣꠘ ꠖꠦꠡꠅ ꠛꠣꠛꠣꠞ ꠉꠦꠍꠦ ꠞꠁꠍꠦ। 33 ꠅꠃ ꠢꠤ ꠝꠣꠘꠡꠦ, ꠎꠦꠁꠘ ꠢꠤ ꠖꠦꠡꠞ ꠝꠣꠟꠤꠇ, ꠔꠣꠁꠘ ꠀꠝꠞꠣꠞꠦ ꠇꠁꠟꠣ, ‘ꠀꠝꠤ ꠅꠃꠟꠣ ꠛꠥꠎꠝꠥ ꠎꠦꠘ, ꠔꠥꠝꠞꠣ ꠢꠇ ꠝꠣꠘꠥꠡ। ꠔꠥꠝꠞꠣꠞ ꠄꠇ ꠜꠣꠁꠞꠦ ꠀꠝꠣꠞ ꠉꠦꠍꠦ ꠕꠁꠀ, ꠔꠥꠝꠞꠣꠞ ꠀꠇꠣꠟꠤ ꠙꠞꠤꠛꠣꠞꠞ ꠟꠣꠉꠤ ꠗꠣꠘ ꠟꠁꠀ ꠎꠣꠅ। 34 ꠀꠞ ꠔꠥꠝꠞꠣꠞ ꠢꠥꠞꠥ ꠜꠣꠁꠞꠦ ꠀꠝꠣꠞ ꠉꠦꠍꠦ ꠟꠁꠀ ꠀꠁꠅ। ꠔꠦꠃ ꠀꠝꠤ ꠛꠥꠎꠝꠥ, ꠔꠥꠝꠞꠣ ꠢꠇ ꠝꠣꠘꠥꠡ, ꠇꠥꠘꠥ ꠉꠥꠁꠀ ꠘꠣꠄ। ꠛꠣꠖꠦ ꠀꠝꠤ ꠔꠥꠝꠞꠣꠞ ꠜꠣꠁꠞꠦ ꠚꠤꠞꠣꠁ ꠖꠤꠝꠥ ꠀꠞ ꠔꠥꠝꠞꠣ ꠁ ꠖꠦꠡꠅ ꠇꠣꠄ-ꠇꠣꠞꠛꠣꠞ ꠇꠞꠔꠣꠄ ꠙꠣꠞꠛꠣꠄ।’ ”

35 ꠛꠣꠖꠦ ꠔꠣꠞꠣ ꠛꠡ꠆ꠔꠣ ꠕꠘꠦ ꠗꠣꠘ ꠓꠣꠟꠔꠦꠃ ꠖꠦꠈꠂꠘ, ꠔꠣꠞꠣꠞ ꠢꠇꠟꠞ ꠐꠦꠇꠣꠞ ꠈꠥꠔꠤ ꠛꠡ꠆ꠔꠣꠞ ꠝꠣꠎꠦ ꠞꠁꠍꠦ। ꠁꠔꠣ ꠖꠦꠈꠤꠀ ꠔꠣꠞꠣꠞ ꠛꠣꠚꠦ ꠀꠞ ꠔꠣꠞꠣꠅ ꠒꠞꠣꠁꠉꠦꠟꠣ। 36 ꠔꠦꠃ ꠛꠣꠚꠦ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠀꠝꠣꠞꠦ ꠀꠅꠟꠣꠖ ꠍꠣꠠꠣ ꠛꠣꠘꠣꠁꠍ। ꠁꠃꠍꠥꠚ ꠘꠣꠄ, ꠡꠤꠝꠤꠅꠘꠅ ꠘꠣꠄ ꠀꠞ ꠅꠈꠘ ꠔꠥꠝꠞꠣ ꠢꠤꠞꠛꠣꠞ ꠛꠤꠘ-ꠁꠀꠝꠤꠘꠞꠦꠅ ꠘꠤꠔꠣꠄ ꠌꠣꠁꠞꠣꠄ। ꠁꠔꠣ ꠢꠇꠟꠔꠣꠃ ꠀꠝꠣꠞ ꠎꠥꠟꠥꠝ।” 37 ꠞꠥꠛꠦꠘꠦ ꠔꠣꠘ ꠛꠣꠚꠞꠦ ꠇꠁꠟꠣ, “ꠀꠝꠤ ꠛꠤꠘ-ꠁꠀꠝꠤꠘꠞꠦ ꠔꠥꠝꠣꠞ ꠉꠦꠍꠦ ꠚꠤꠞꠣꠁꠀ ꠀꠘꠔꠦ ꠘꠣ ꠙꠣꠞꠟꠦ, ꠔꠥꠝꠤ ꠀꠝꠣꠞ ꠖꠥꠁꠅ ꠙꠥꠀꠞꠦ ꠈꠥꠘ ꠇꠞꠤꠟꠤꠅ। ꠔꠣꠞꠦ ꠔꠥꠝꠤ ꠀꠝꠣꠞ ꠀꠔꠅ ꠍꠣꠠꠤ ꠖꠦꠅ, ꠀꠝꠤ ꠔꠣꠞꠦ ꠔꠥꠝꠣꠞ ꠉꠦꠍꠦ ꠚꠤꠞꠣꠁꠀ ꠀꠘꠝꠥ।” 38 ꠁꠀꠇꠥꠛꠦ ꠇꠁꠟꠣ, “ꠘꠣ, ꠀꠝꠣꠞ ꠁ ꠙꠥꠀ ꠔꠥꠝꠞꠣꠞ ꠟꠉꠦ ꠖꠤꠔꠣꠝ ꠘꠣꠄ। ꠔꠣꠞ ꠜꠣꠁ ꠝꠞꠤꠉꠦꠍꠦ, ꠀꠞ ꠅꠈꠘ ꠢꠦ ꠄꠇꠟꠣ ꠎꠤꠔꠣ ꠀꠍꠦ। ꠔꠥꠝꠞꠣꠞ ꠎꠣꠅꠀꠞ ꠙꠕꠅ ꠎꠥꠖꠤ ꠔꠣꠞ ꠇꠥꠘꠥ ꠛꠤꠙꠖ ꠅꠄ, ꠔꠦ ꠅꠃ ꠙꠣꠇꠘꠣ ꠌꠥꠟꠦ ꠛꠃꠔ ꠖꠥꠈ ꠖꠤꠀ ꠔꠥꠝꠞꠣ ꠀꠝꠣꠞꠦ ꠇꠄꠛꠞꠅ ꠢꠣꠞꠣꠁꠛꠣꠄ।”