1 ꠄꠞ ꠙꠥꠞꠣ ꠖꠥꠁ ꠛꠞꠍ ꠛꠣꠖꠦ ꠚꠦꠞꠣꠃꠘꠦ ꠈꠥꠀꠛꠦ ꠖꠦꠈꠟꠣ। ꠔꠣꠁꠘ ꠖꠦꠈꠟꠣ, ꠘꠤꠟ ꠘꠖꠞ ꠉꠦꠍꠦ ꠔꠣꠁꠘ ꠃꠛꠣꠁ ꠞꠁꠍꠂꠘ, 2 ꠀꠞ ꠘꠤꠟ ꠘꠖ ꠕꠘꠦ ꠡꠣꠔꠉꠥ ꠡꠥꠘ꠆ꠖꠞ ꠔꠞꠔꠣꠎꠣ ꠉꠞꠥ ꠃꠑꠤꠀ ꠀꠁꠀ ꠘꠟ ꠛꠘꠞ ꠝꠣꠎꠦ ꠀꠐꠤꠀ ꠈꠣꠁꠞꠣ। 3 ꠄꠞꠛꠣꠖꠦ ꠖꠦꠈꠂꠘ, ꠀꠞꠅ ꠡꠣꠔꠉꠥ ꠢꠣꠟꠣꠇ ꠀꠞ ꠈꠛꠤꠍꠞ ꠟꠣꠈꠣꠘ ꠉꠞꠥ ꠃꠑꠤꠀ ꠀꠁꠀ, ꠘꠤꠟ ꠘꠖꠞ ꠙꠣꠞꠞ ꠢꠃ ꠉꠞꠥꠁꠘ꠆ꠔꠞ ꠇꠣꠍꠣꠔ ꠃꠛꠣꠁꠟ। 4 ꠢꠦꠡꠦ ꠅꠃ ꠢꠣꠟꠣꠇ ꠀꠞ ꠈꠛꠤꠍꠞ ꠟꠣꠈꠣꠘ ꠉꠞꠥꠁꠘ꠆ꠔꠦ ꠢꠃ ꠡꠥꠘ꠆ꠖꠞ ꠀꠞ ꠔꠞꠔꠣꠎꠣ ꠡꠣꠔꠅ ꠉꠞꠥꠞꠦ ꠈꠣꠁꠟꠤꠟ, ꠔꠦꠃ ꠚꠦꠞꠣꠃꠘꠞ ꠊꠥꠝ ꠜꠣꠋꠉꠤ ꠉꠦꠟ। 5 ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠊꠥꠝꠣꠁꠟꠣ ꠀꠞ ꠖꠥꠀꠞꠣ ꠈꠥꠀꠛꠦ ꠖꠦꠈꠟꠣ, ꠄꠇ ꠉꠝꠞ ꠒꠦꠐꠣꠔ ꠡꠣꠔꠉꠥ ꠙꠥꠡ꠆ꠐ ꠀꠞ ꠔꠣꠎꠣ ꠍꠠꠣ ꠛꠣꠞ ꠅꠁꠍꠦ। 6 ꠢꠦꠡꠦ ꠛꠣꠞ ꠅꠁꠟ, ꠙꠥꠛꠣꠟꠤ ꠛꠣꠔꠣꠡꠞ ꠉꠞꠝꠦ ꠢꠥꠇꠘꠣ ꠡꠣꠔꠉꠥ ꠇꠝ ꠙꠥꠡ꠆ꠐ ꠍꠥꠍꠣꠀꠟꠣ ꠍꠠꠣ, 7 ꠀꠞ ꠅꠃ ꠇꠝ ꠙꠥꠡ꠆ꠐ ꠍꠠꠣꠄ ꠢꠃ ꠡꠣꠔꠅ ꠙꠥꠡ꠆ꠐ-ꠔꠣꠎꠣ ꠍꠠꠣꠞꠦ ꠉꠤꠟꠤꠟꠣꠁꠟ। ꠛꠣꠖꠦ ꠚꠦꠞꠣꠃꠘꠞ ꠊꠥꠝ ꠜꠣꠋꠉꠤ ꠉꠦꠟ, ꠔꠣꠁꠘ ꠛꠥꠎꠟꠣ ꠎꠦꠘ ꠁꠔꠣ ꠔ ꠈꠥꠀꠛ। 8 ꠛꠤꠀꠘꠦ ꠔꠣꠘ ꠝꠘ ꠅꠡ꠆ꠕꠤꠞ ꠅꠁꠉꠦꠟ, ꠔꠦꠃ ꠝꠤꠡꠞ ꠖꠦꠡꠞ ꠢꠇꠟ ꠎꠣꠖꠥꠉꠤꠞ ꠀꠞ ꠙꠘ꠆ꠒꠤꠔꠞꠦ ꠈꠛꠞꠤꠀꠖꠤ ꠀꠘꠣꠁꠀ, ꠔꠣꠘ ꠈꠥꠀꠛ ꠔꠣꠞꠣꠞꠦ ꠢꠥꠘꠣꠁꠟꠣ, ꠅꠁꠟꠦ ꠄꠞꠣꠞ ꠇꠦꠃ ꠄꠞ ꠔꠣꠛꠤꠞ ꠇꠁꠔ ꠙꠣꠞꠟ ꠘꠣ।

9 ꠢꠦꠡꠦ ꠚꠦꠞꠣꠃꠘꠞ ꠢꠃ ꠡꠞꠣꠛ ꠛꠤꠟꠣꠅꠞꠣꠄ ꠇꠁꠟ, “ꠢꠥꠎꠥꠞ, ꠀꠁꠎ ꠀꠝꠣꠞ ꠄꠇ ꠖꠥꠡ ꠝꠘꠅ ꠅꠁꠍꠦ। 10 ꠛꠃꠔ ꠖꠤꠘ ꠀꠉꠦ ꠢꠥꠎꠥꠞꠦ ꠘꠤꠎꠞ ꠖꠥꠁ ꠉꠥꠟꠣꠝꠞ ꠃꠙꠞꠦ ꠉꠥꠍꠣ ꠇꠞꠍꠟꠣ, ꠔꠣꠁꠘ ꠀꠝꠣꠞꠦ ꠀꠞ ꠞꠥꠐꠤ ꠛꠣꠘꠣꠅꠞꠣꠞꠦ ꠛꠠ ꠎꠦꠟꠣꠞ ꠍꠣꠛꠞ ꠛꠣꠠꠤꠞ ꠎꠦꠟꠅ ꠕꠁꠍꠟꠣ। 11 ꠀꠞ ꠄꠇ ꠞꠣꠁꠔꠦ ꠀꠝꠞꠣ ꠖꠥꠁꠅꠎꠘꠦ ꠀꠟꠉ ꠀꠟꠉ ꠈꠥꠀꠛ ꠖꠦꠈꠟꠣꠝ, ꠖꠥꠁꠅ ꠈꠥꠀꠛꠞ ꠖꠥꠁ ꠟꠣꠈꠣꠘ ꠔꠣꠛꠤꠞ ꠀꠍꠤꠟ। 12 ꠁ ꠡꠝꠄ ꠎꠦꠟꠣꠞ ꠍꠣꠛꠞ, ꠄꠇ ꠁꠛꠞꠣꠘꠤ ꠎꠥꠀꠘ ꠉꠥꠟꠣꠝꠅ ꠅꠘꠅ ꠀꠍꠤꠟ। ꠔꠣꠞꠦ ꠀꠝꠞꠣꠞ ꠈꠥꠀꠛꠞ ꠇꠕꠣ ꠢꠥꠘꠣꠁꠟꠣꠝ, ꠀꠞ ꠢꠦ ꠀꠝꠞꠣꠞ ꠈꠥꠀꠛꠞ ꠔꠣꠛꠤꠞ ꠇꠁꠀ ꠖꠤꠟ। 13 ꠢꠦ ꠀꠝꠞꠣꠞ ꠈꠥꠀꠛꠞ ꠔꠣꠛꠤꠞ ꠎꠦꠟꠣ ꠇꠁꠍꠤꠟ, ꠄꠇ꠆ꠇꠦꠞꠦ ꠅꠃ ꠟꠣꠈꠣꠘꠃ ꠚꠟꠤꠟ। ꠢꠥꠎꠥꠞꠦ ꠀꠝꠣꠞꠦ ꠢꠤꠞꠛꠣꠞ ꠔꠣꠘ ꠇꠣꠝꠅ ꠟꠣꠉꠣꠁꠟꠣ, ꠅꠁꠟꠦ ꠞꠥꠐꠤ ꠛꠣꠘꠣꠅꠞꠣꠞꠦ ꠉꠣꠍꠅ ꠟꠐꠇꠣꠁꠟꠣ।”

14 ꠅꠃ ꠚꠦꠞꠣꠃꠘꠦ ꠁꠃꠍꠥꠚꠞꠦ ꠀꠘꠣꠞ ꠟꠣꠉꠤ ꠝꠣꠘꠥꠡ ꠙꠣꠑꠣꠁꠟꠣ, ꠔꠣꠞꠣ ꠉꠤꠀ ꠎꠟꠖꠤ ꠇꠞꠤ ꠎꠦꠟꠈꠣꠘꠣ ꠕꠘꠦ ꠔꠣꠘꠞꠦ ꠛꠣꠞ ꠇꠞꠤ ꠀꠘꠟꠣ। ꠁꠃꠍꠥꠚꠦ ꠖꠣꠠꠤ-ꠝꠥꠍ ꠇꠣꠝꠣꠁꠀ, ꠇꠣꠙꠠ ꠛꠖꠟꠣꠁꠀ ꠚꠦꠞꠣꠃꠘꠞ ꠖꠞꠛꠣꠞꠅ ꠀꠎꠤꠞ ꠅꠁꠟꠣ। 15 ꠚꠦꠞꠣꠃꠘꠦ ꠔꠣꠘꠞꠦ ꠇꠁꠟꠣ, “ꠀꠝꠤ ꠄꠇꠈꠣꠘ ꠈꠥꠀꠛ ꠖꠦꠈꠍꠤ, ꠅꠁꠟꠦ ꠄꠞ ꠔꠣꠛꠤꠞ ꠇꠦꠃ ꠇꠁꠔ ꠙꠣꠞꠦꠞ ꠘꠣ। ꠔꠦ ꠀꠝꠤ ꠢꠥꠘꠟꠣꠝ ꠎꠦꠘ ꠔꠥꠝꠣꠞ ꠉꠦꠍꠦ ꠈꠥꠀꠛ ꠢꠥꠘꠣꠁꠟꠦ, ꠔꠥꠝꠤ ꠄꠞ ꠔꠣꠛꠤꠞ ꠇꠁꠔꠣꠄ ꠙꠣꠞ।” 16 ꠁꠃꠍꠥꠚꠦ ꠎꠥꠀꠙ ꠖꠤꠟꠣ, “ꠢꠤ ꠈꠦꠝꠔꠣ ꠔ ꠀꠝꠣꠞ ꠘꠣꠄ, ꠀꠟ꠆ꠟꠣ ꠙꠣꠇꠦ ꠝꠢꠣꠞꠣꠎꠞ ꠖꠤꠟꠞ ꠡꠣꠘ꠆ꠔꠤꠞ ꠎꠥꠀꠙ ꠛꠣꠔꠣꠁꠀ ꠖꠤꠛꠣ ꠘꠦ।” 17 ꠚꠦꠞꠣꠃꠘꠦ ꠁꠃꠍꠥꠚꠞꠦ ꠇꠁꠟꠣ, “ꠈꠥꠀꠛꠦ ꠖꠦꠈꠟꠣꠝ, ꠀꠝꠤ ꠘꠤꠟ ꠘꠖꠞ ꠙꠣꠞꠅ ꠃꠛꠣꠁ ꠞꠁꠍꠤ। 18 ꠀꠞ ꠖꠦꠈꠤ, ꠉꠣꠋꠉꠅ ꠕꠘꠦ ꠡꠣꠔꠉꠥ ꠡꠥꠘ꠆ꠖꠞ, ꠔꠞꠔꠣꠎꠣ ꠉꠞꠥ ꠃꠑꠤꠀ ꠀꠁꠀ ꠘꠟ ꠛꠘꠞ ꠝꠣꠎꠦ ꠀꠐꠤꠀ ꠈꠣꠁꠞꠣ। 19 ꠄꠞꠛꠣꠖꠦ ꠀꠞꠅ ꠡꠣꠔꠉꠥ ꠉꠞꠥ ꠃꠑꠤꠀ ꠀꠁꠟ। ꠁꠔꠣ ꠢꠣꠟꠣꠇ ꠀꠞ ꠈꠛꠤꠍꠞ ꠟꠣꠈꠣꠘ, ꠝꠤꠡꠞ ꠖꠦꠡꠞ ꠇꠥꠘꠥ ꠈꠣꠘꠅ ꠁꠟꠣꠈꠣꠘ ꠛꠦ-ꠍꠥꠞꠔ ꠉꠞꠥ ꠇꠥꠘꠥ ꠖꠤꠘꠅ ꠖꠦꠈꠍꠤ ꠘꠣ। 20 ꠛꠣꠖꠦ ꠅꠃ ꠢꠣꠟꠣꠇ ꠀꠞ ꠛꠦ-ꠍꠥꠞꠔ ꠉꠞꠥꠁꠘ꠆ꠔꠦ, ꠀꠉꠞ ꠢꠤ ꠡꠣꠔꠅ ꠔꠞꠔꠣꠎꠣ ꠉꠞꠥꠞꠦ ꠈꠣꠁꠟꠤꠟ। 21 ꠅꠁꠟꠦ ꠔꠣꠞꠣ ꠁꠔꠣꠞꠦ ꠉꠤꠟꠣꠞ ꠛꠣꠖꠦ, ꠈꠣꠁꠍꠦ ꠇꠞꠤ ꠛꠥꠎꠣꠅ ꠉꠦꠟ ꠘꠣ, ꠇꠣꠞꠘ ꠔꠣꠞꠣ ꠀꠉꠞ ꠟꠣꠈꠣꠘꠃ ꠢꠣꠟꠣꠇ ꠀꠞ ꠛꠦ-ꠍꠥꠞꠔ ꠞꠁꠟ। ꠢꠦꠡꠦ ꠀꠝꠣꠞ ꠊꠥꠝ ꠜꠣꠋꠉꠤ ꠉꠦꠟ। 22 ꠛꠣꠖꠦ ꠀꠝꠤ ꠢꠤꠞꠛꠣꠞ ꠖꠦꠈꠟꠣꠝ, ꠉꠝꠞ ꠄꠇ ꠒꠦꠐꠣꠞ ꠝꠣꠎꠦ ꠡꠣꠔꠉꠥ ꠛꠠ ꠀꠞ ꠙꠥꠡ꠆ꠐ ꠍꠠꠣ ꠛꠣꠞ ꠅꠁꠟ। 23 ꠙꠥꠛꠣꠟꠤ ꠢꠣꠅꠀꠞ ꠉꠞꠝꠦ ꠢꠥꠇꠘꠣ ꠡꠣꠔꠉꠥ ꠇꠝ ꠙꠥꠡ꠆ꠐ ꠍꠥꠍꠣꠀꠟꠣ ꠍꠠꠣꠅ ꠛꠣꠞ ꠅꠁꠟ। 24 ꠀꠞ ꠅꠃ ꠡꠣꠔꠅ ꠍꠠꠣꠄ, ꠢꠃ ꠔꠣꠎꠣ ꠡꠣꠔꠅ ꠍꠠꠣꠞꠦ ꠉꠤꠟꠤꠟꠤꠟ। ꠁ ꠈꠥꠀꠛ ꠀꠝꠤ ꠎꠣꠖꠥꠉꠤꠞ ꠅꠇꠟꠞꠦ ꠢꠥꠘꠣꠁꠍꠟꠣꠝ, ꠅꠁꠟꠦ ꠇꠦꠃ ꠄꠞ ꠝꠣꠘꠤ ꠇꠁꠔ ꠙꠣꠞꠍꠦ ꠘꠣ।”

25 ꠁꠃꠍꠥꠚꠦ ꠚꠦꠞꠣꠃꠘꠞꠦ ꠇꠁꠟꠣ, “ꠢꠥꠎꠥꠞ, ꠁ ꠖꠥꠁꠅ ꠈꠥꠀꠛꠃ ꠀꠖꠔꠦ ꠄꠇ। ꠀꠟ꠆ꠟꠣꠄ ꠎꠦꠔꠣ ꠇꠞꠔꠣ ꠌꠣꠁꠞꠣ, ꠁꠔꠣ ꠀꠙꠘꠣꠞꠦ ꠖꠦꠈꠣꠁꠍꠂꠘ। 26 ꠅꠃ ꠔꠞꠔꠣꠎꠣ ꠡꠣꠔꠅ ꠉꠞꠥꠞ ꠝꠣꠘꠤ ꠡꠣꠔ ꠛꠞꠍ, ꠀꠞ ꠙꠥꠡ꠆ꠐ ꠡꠣꠔꠅ ꠉꠝꠞ ꠍꠠꠣꠞ ꠝꠣꠘꠤꠅ ꠡꠣꠔ ꠛꠞꠍ। ꠖꠥꠁꠅ ꠈꠥꠀꠛꠃ ꠄꠇ। 27 ꠀꠞ ꠢꠦꠡꠦ ꠃꠑꠤꠀ ꠀꠅꠀ ꠡꠣꠔꠅ ꠢꠣꠟꠣꠇ ꠀꠞ ꠛꠦ-ꠍꠥꠞꠔ ꠉꠞꠥ, ꠀꠞ ꠙꠥꠛꠣꠟꠤ ꠢꠣꠅꠀꠞ ꠉꠞꠝꠦ ꠢꠥꠇꠘꠣ ꠡꠣꠔꠅ ꠉꠝꠞ ꠍꠠꠣ, ꠄꠞꠣꠞ ꠝꠣꠘꠤ ꠅꠁꠟ, ꠀꠇꠣꠟꠞ ꠡꠣꠔ ꠛꠞꠍ। 28 ꠔꠦ ꠀꠟ꠆ꠟꠣꠄ ꠎꠦꠔꠣ ꠇꠞꠔꠣ ꠌꠣꠁꠞꠣ, ꠁꠔꠣ ꠝꠢꠣꠞꠣꠎꠞꠦ ꠖꠦꠈꠣꠁꠍꠂꠘ। ꠅꠃ ꠇꠕꠣꠃ ꠀꠝꠤ ꠀꠙꠘꠣꠞꠦ ꠀꠉꠦ ꠇꠁꠍꠤ। 29 ꠢꠥꠘꠃꠇ꠆ꠇꠣ, ꠢꠣꠞꠣ ꠝꠤꠡꠞ ꠖꠦꠡꠅ ꠡꠣꠔ ꠛꠞꠍ ꠈꠥꠛ ꠛꠦꠡꠤ ꠚꠡꠟ ꠚꠟꠤꠛ। 30 ꠄꠞꠛꠣꠖꠦꠃ ꠀꠁꠛ ꠀꠇꠣꠟꠞ ꠡꠣꠔ ꠛꠞꠍ। ꠔꠦꠃ ꠀꠉꠞ ꠢꠤ ꠛꠦꠡꠤ ꠚꠡꠟꠞ ꠇꠕꠣ ꠝꠣꠘꠡꠦ ꠚꠣꠃꠞꠤꠟꠤꠛꠣ, ꠀꠞ ꠀꠇꠣꠟꠦ ꠖꠦꠡꠞꠦ ꠡꠦꠡ ꠇꠞꠤ ꠖꠤꠛ। 31 ꠅꠃ ꠀꠇꠣꠟꠞ ꠖꠞꠥꠘ, ꠀꠉꠞ ꠢꠤ ꠚꠡꠟꠞ ꠇꠕꠣ ꠝꠣꠘꠡꠞ ꠝꠘꠅ ꠞꠁꠔ ꠘꠣꠄ। ꠁ ꠀꠇꠣꠟ ꠅꠁꠛ ꠈꠥꠛ ꠛꠦꠎꠥꠁꠔꠣ ꠝꠍꠤꠛꠔꠞ। 32 ꠁ ꠈꠥꠀꠛ ꠀꠙꠘꠣꠞꠦ ꠖꠥꠁꠛꠣꠞ ꠖꠦꠈꠣꠘꠤꠞ ꠝꠣꠘꠤ ꠅꠁꠟ, ꠀꠟ꠆ꠟꠣꠄ ꠁ ꠖꠡꠣ ꠊꠐꠣꠁꠛꠣ, ꠄꠇ꠆ꠇꠦꠞꠦ ꠑꠤꠇ ꠇꠞꠤꠟꠣꠁꠍꠂꠘ, ꠁꠔꠣ ꠈꠥꠛ ꠎꠟꠖꠤ ꠇꠞꠤꠃ ꠊꠐꠤꠛ। 33 ꠅꠈꠘ ꠢꠥꠎꠥꠞꠦ ꠄꠇꠎꠘ ꠌꠔꠥꠞ-ꠛꠥꠎꠖꠣꠞ ꠙꠘ꠆ꠒꠤꠔ ꠝꠣꠘꠡꠞꠦ ꠔꠥꠇꠣꠁꠀ, ꠄꠘ ꠉꠦꠍꠦ ꠝꠤꠡꠞꠞꠦ ꠡꠙꠤ ꠖꠦꠃꠇ꠆ꠇꠣ। 34 ꠀꠞ ꠀꠙꠘꠦ ꠅꠃꠟꠣ ꠇꠞꠃꠇ꠆ꠇꠣ, ꠖꠦꠡꠅ ꠀꠙꠘꠣꠞ ꠇꠞ꠆ꠝꠌꠣꠞꠤ ꠟꠣꠉꠣꠁꠘ, ꠅꠃ ꠡꠣꠔ ꠛꠍꠞꠦ ꠎꠦꠛꠟꠣ ꠈꠥꠛ ꠛꠦꠡꠤ ꠚꠡꠟ ꠚꠟꠛ, ꠁ ꠡꠝꠄ ꠔꠣꠞꠣ ꠄꠞ ꠙꠣꠌ ꠛꠣꠐꠞ ꠄꠇ ꠛꠣꠐ ꠖꠟꠣ ꠇꠞꠛꠣ। 35 ꠔꠣꠞꠣ ꠅꠃ ꠡꠥꠖꠤꠘꠞ ꠛꠍꠞꠞ ꠗꠣꠘ ꠖꠟꠣ ꠇꠞꠤꠀ ꠢꠥꠎꠥꠞꠞ ꠖꠈꠟꠦ, ꠛꠣꠎꠣꠞꠦ ꠛꠣꠎꠣꠞꠦ ꠉꠥꠖꠣꠝꠅ ꠜꠞꠤꠀ ꠕꠃꠇ ꠀꠞ ꠢꠦꠚꠣꠎꠔ ꠇꠞꠃꠇ। 36 ꠡꠣꠔ ꠛꠞꠍ ꠗꠞꠤ ꠝꠤꠡꠞꠅ ꠎꠦ ꠀꠇꠣꠟ ꠅꠁꠛ, ꠢꠃ ꠀꠇꠣꠟꠞ ꠟꠣꠉꠤ ꠗꠣꠘ ꠎꠝꠣꠁꠀ ꠞꠣꠈꠛꠣ, ꠔꠦꠃ ꠀꠇꠣꠟꠦ ꠖꠦꠡꠞ ꠝꠣꠘꠥꠡ ꠝꠞꠔꠣ ꠘꠣꠄ।”

37 ꠁꠃꠍꠥꠚꠞ ꠁ ꠝꠣꠔ, ꠚꠦꠞꠣꠃꠘ ꠀꠞ ꠔꠣꠘ ꠖꠞꠛꠣꠞꠞ ꠢꠇꠟꠞ ꠉꠦꠍꠦ ꠈꠥꠛ ꠜꠣꠟꠣ ꠝꠘꠅ ꠅꠁꠟ। 38 ꠚꠦꠞꠣꠃꠘꠦ ꠔꠣꠘ ꠃꠎꠤꠞ-ꠘꠣꠎꠤꠞ ꠅꠇꠟꠞꠦ ꠇꠁꠟꠣ, “ꠁ ꠛꠦꠌꠣꠠꠣꠞ ꠟꠣꠈꠣꠘ ꠀꠟ꠆ꠟꠣꠞ ꠞꠥꠢꠀꠟꠣ ꠝꠣꠘꠥꠡ ꠀꠝꠤ ꠇꠥꠀꠁ ꠔꠥꠇꠣꠁꠀ ꠙꠣꠁꠝꠥ?” 39 ꠅꠃ ꠚꠦꠞꠣꠃꠘꠦ ꠁꠃꠍꠥꠚꠞꠦ ꠇꠁꠟꠣ, “ꠀꠟ꠆ꠟꠣꠄ ꠎꠦꠛꠟꠣ ꠔꠥꠝꠣꠞ ꠉꠦꠍꠦ ꠁꠔꠣ ꠢꠇ꠆ꠇꠟꠔꠣ ꠎꠣꠁꠞ ꠇꠞꠍꠂꠘ, ꠔꠦ ꠔꠥꠝꠣꠞ ꠟꠣꠈꠣꠘ ꠛꠥꠎꠖꠣꠞ ꠀꠞ ꠛꠤꠛꠦꠇꠝꠣꠘ ꠔ ꠀꠞ ꠇꠦꠃ ꠘꠣꠄ। 40 ꠅꠈꠘ ꠞꠣꠎꠛꠣꠠꠤꠞ ꠢꠇ꠆ꠇꠟꠔꠣ ꠔꠥꠝꠤꠃ ꠌꠣꠟꠣꠁꠛꠣꠄ। ꠀꠝꠣꠞ ꠢꠇꠟ ꠙ꠆ꠞꠎꠣ ꠔꠥꠝꠣꠞ ꠢꠥꠇꠥꠝꠦ ꠌꠟꠛꠣ। ꠈꠣꠟꠤ ꠛꠣꠖꠡꠣꠞ ꠔꠈ꠆ꠔꠅ, ꠀꠝꠤ ꠔꠥꠝꠣꠞ ꠃꠙꠞꠦ ꠕꠣꠇꠝꠥ।” 41 ꠔꠣꠁꠘ ꠁꠃꠍꠥꠚꠞꠦ ꠇꠁꠟꠣ, “ꠢꠥꠘꠅ, ꠀꠝꠤ ꠀꠡ꠆ꠔꠣ ꠝꠤꠡꠞ ꠖꠦꠡ ꠔꠥꠝꠣꠞ ꠀꠔꠅ ꠡꠙꠤ ꠖꠤꠟꠣꠝ।” 42 ꠀꠞ ꠚꠦꠞꠣꠃꠘꠦ ꠘꠤꠎꠞ ꠀꠋꠉꠥꠁꠟ ꠕꠣꠇꠤ ꠛꠣꠖꠡꠣꠁ ꠡꠤꠟꠞ ꠀꠋꠐꠤ ꠈꠥꠟꠤꠀ ꠁꠃꠍꠥꠚꠞ ꠀꠔꠅ ꠚꠤꠘ꠆ꠖꠣꠁꠟꠣ, ꠔꠣꠘ ꠉꠟꠣꠔ ꠡꠥꠘꠣꠞ ꠢꠣꠞ ꠖꠤꠟꠣ ꠀꠞ ꠖꠣꠝꠤ ꠇꠣꠙꠠꠞ ꠡꠣꠖꠣ ꠟꠦꠛꠣꠍꠅ ꠚꠤꠘ꠆ꠖꠣꠁꠟꠣ। 43 ꠛꠣꠖꠦ ꠔꠣꠁꠘ ꠁꠃꠍꠥꠚꠞꠦ ꠔꠣꠘ ꠞꠣꠁꠎ꠆ꠎꠞ ꠖꠥꠁ ꠘꠝ꠆ꠛꠞ ꠞꠕꠞ ꠝꠣꠎꠦ ꠔꠥꠟꠟꠣ ꠀꠞ ꠁꠃꠍꠥꠚꠞ ꠀꠉꠦ ꠀꠉꠦ ꠄꠟꠣꠘ ꠇꠞꠣ ꠅꠁꠟ, “ꠙꠞꠘꠣꠝ ꠇꠞꠅ! ꠙꠞꠘꠣꠝ ꠇꠞꠅ!” ꠅꠃ ꠟꠣꠈꠣꠘ ꠔꠣꠁꠘ ꠁꠃꠍꠥꠚꠞ ꠃꠙꠞꠦ ꠀꠡ꠆ꠔꠣ ꠝꠤꠡꠞ ꠖꠦꠡꠞ ꠜꠣꠞ ꠡꠝꠎꠣꠁ ꠖꠤꠟꠣ। 44 ꠚꠦꠞꠣꠃꠘꠦ ꠁꠃꠍꠥꠚꠞꠦ ꠇꠁꠟꠣ, “ꠀꠝꠤꠃ ꠚꠦꠞꠣꠃꠘ, ꠝꠤꠡꠞꠞ ꠛꠣꠖꠡꠣ! ꠅꠁꠟꠦ ꠔꠥꠝꠣꠞ ꠢꠥꠇꠥꠝ ꠍꠣꠠꠣ, ꠀꠡ꠆ꠔꠣ ꠝꠤꠡꠞ ꠖꠦꠡꠅ ꠇꠦꠃ ꠞꠥꠝꠣꠅ ꠟꠣꠠꠣꠁꠔ ꠙꠣꠞꠔ ꠘꠣꠄ।” 45 ꠚꠦꠞꠣꠃꠘꠦ ꠁꠃꠍꠥꠚꠞ ꠘꠄꠀ ꠘꠣꠝ ꠞꠣꠈꠟꠣ, ꠡꠣꠚꠘꠕ-ꠙꠣꠘꠦꠢ। ꠔꠣꠁꠘ ꠅꠃꠘ ꠝꠘ꠆ꠖꠤꠞꠞ ꠛꠣꠛꠘ-ꠑꠣꠇꠥꠞ ꠙꠥꠐꠤꠚꠦꠞꠣꠞ ꠙꠥꠠꠤ ꠀꠡꠘꠔꠞꠦ ꠁꠃꠍꠥꠚꠞ ꠟꠉꠦ ꠛꠤꠀ ꠖꠤꠟꠣ ꠀꠞ ꠁꠃꠍꠥꠚꠦ ꠀꠡ꠆ꠔꠣ ꠝꠤꠡꠞ ꠖꠦꠡꠅ ꠊꠥꠞꠣꠊꠥꠞꠤ ꠇꠞꠣꠔ ꠟꠣꠉꠟꠣ।

46 ꠁꠃꠍꠥꠚꠦ ꠔꠤꠡ ꠛꠞꠍ ꠛꠄꠅꠡꠅ, ꠝꠤꠡꠞꠞ ꠛꠣꠖꠡꠣ ꠚꠦꠞꠣꠃꠘꠞ ꠇꠣꠝꠅ ꠟꠣꠉꠟꠣ, ꠔꠣꠁꠘ ꠚꠦꠞꠣꠃꠘꠞ ꠖꠞꠛꠣꠞ ꠕꠘꠦ ꠛꠣꠞ ꠅꠁꠀ ꠖꠦꠡꠞ ꠢꠇꠟ ꠎꠣꠉꠣ ꠍꠚꠞ ꠇꠞꠟꠣ। 47 ꠀꠞ ꠛꠦꠡꠤ ꠚꠡꠟꠞ ꠅꠃ ꠡꠣꠔ ꠛꠍꠞꠦ ꠖꠦꠡꠅ ꠛꠃꠔ ꠚꠡꠟ ꠚꠟꠤꠟ। 48 ꠔꠦꠃ ꠁꠃꠍꠥꠚꠦ ꠁ ꠡꠥꠖꠤꠘꠞ ꠡꠣꠔ ꠛꠍꠞꠦ ꠝꠤꠡꠞꠞ ꠢꠇꠟ ꠗꠣꠘ, ꠛꠣꠎꠣꠞꠞ ꠉꠥꠖꠣꠝ ꠊꠞꠣꠁꠘ꠆ꠔꠅ ꠎꠝꠣ ꠇꠞꠣꠁꠀ ꠕꠁꠟꠣ। ꠔꠣꠁꠘ ꠢꠇ꠆ꠇꠟ ꠛꠣꠎꠣꠞꠞ ꠌꠣꠁꠞꠅ ꠉꠣꠟꠣꠞ ꠗꠣꠘ ꠅꠇꠟ, ꠢꠃ ꠛꠣꠎꠣꠞꠞ ꠉꠥꠖꠣꠝꠅ ꠎꠝꠣꠁꠟꠣ। 49 ꠔꠣꠁꠘ ꠖꠞꠤꠀꠞ ꠛꠣꠟꠥꠞ ꠟꠣꠈꠣꠘ ꠅꠃꠟꠣ ꠛꠦꠢꠤꠡꠣꠛ ꠗꠣꠘ ꠖꠟꠣ ꠇꠞꠟꠣ ꠎꠦꠘ, ꠁꠔꠣ ꠀꠞ ꠝꠣꠙꠤꠀ ꠚꠥꠠꠣꠁꠔꠣ ꠙꠣꠞꠟꠣ ꠘꠣ, ꠔꠦꠃ ꠝꠣꠙꠣ-ꠝꠣꠙꠤ ꠇꠞꠣ ꠛꠣꠖ ꠖꠤꠟꠣꠁꠟꠣ।

50 ꠀꠞ ꠀꠇꠣꠟꠞ ꠀꠉꠦ ꠅꠃꠘ ꠝꠘ꠆ꠖꠤꠞꠞ ꠛꠣꠛꠘ-ꠑꠣꠇꠥꠞ, ꠙꠥꠐꠤꠚꠦꠞꠣꠞ ꠙꠥꠠꠤ ꠀꠡꠘꠔꠞ ꠙꠦꠐꠅ ꠁꠃꠍꠥꠚꠞ ꠖꠥꠁ ꠙꠥꠀ ꠅꠁꠟꠣ। 51 ꠁꠃꠍꠥꠚꠦ ꠔꠣꠘ ꠛꠠ ꠙꠥꠀꠞ ꠘꠣꠝ ꠞꠣꠈꠟꠣ ꠝꠣꠘꠡꠣ [ꠝꠣꠘꠤ, ꠚꠣꠃꠞꠤꠟꠣꠅꠀ]। ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠄ ꠀꠝꠣꠞ ꠢꠇꠟ ꠔꠇꠟꠤꠚ ꠀꠞ ꠛꠣꠚꠞ ꠛꠣꠠꠤꠞ ꠢꠇ꠆ꠇꠟꠔꠣ, ꠀꠝꠣꠞ ꠖꠤꠟ ꠕꠘꠦ ꠚꠣꠃꠞꠣꠁꠟꠣ।” 52 ꠛꠣꠖꠦ ꠔꠣꠘ ꠖꠥꠍꠞꠣ ꠙꠥꠀꠞ ꠘꠣꠝ ꠞꠣꠈꠟꠣ ꠀꠚꠞꠣꠁꠝ [ꠝꠣꠘꠤ, ꠚꠟꠖꠣꠞ]। ꠔꠣꠁꠘ ꠇꠁꠟꠣ, “ꠀꠝꠤ ꠎꠦ ꠖꠦꠡꠅ ꠔꠇꠟꠤꠚ ꠙꠣꠁꠍꠤ, ꠢꠃ ꠖꠦꠡꠅꠃ ꠀꠟ꠆ꠟꠣꠄ ꠀꠝꠣꠞꠦ ꠚꠟꠖꠣꠞ ꠛꠣꠘꠣꠁꠟꠣ।”

53 ꠀꠞ ꠝꠤꠡꠞ ꠖꠦꠡꠞ ꠈꠥꠛ ꠛꠦꠡꠤ ꠚꠡꠟꠞ ꠢꠤ ꠡꠣꠔ ꠛꠞꠍ ꠙꠥꠞꠤꠉꠦꠟ। 54 ꠔꠦꠃ ꠁꠃꠍꠥꠚꠦ ꠎꠦꠟꠣ ꠇꠁꠍꠟꠣ, ꠅꠃꠟꠣ ꠀꠇꠣꠟꠞ ꠢꠃ ꠡꠣꠔ ꠛꠞꠍ ꠀꠁꠀ ꠀꠎꠤꠟ। ꠄꠞ ꠟꠉꠦ ꠇꠣꠘ꠆ꠖꠣ-ꠇꠣꠍꠣꠞ ꠢꠇꠟ ꠖꠦꠡꠅ-ꠅ ꠘꠤꠖꠣꠘ ꠖꠦꠈꠣ ꠖꠤꠟ ꠅꠁꠟꠦ ꠝꠤꠡꠞꠞ ꠇꠥꠘꠥ ꠎꠣꠉꠣꠔ ꠈꠣꠘꠤ-ꠈꠥꠞꠣꠇꠤꠞ ꠅꠜꠣꠛ ꠅꠁꠟ ꠘꠣ। 55 ꠢꠦꠡꠦ ꠀꠡ꠆ꠔꠣ ꠝꠤꠡꠞ ꠖꠦꠡꠅ ꠀꠇꠣꠟ ꠖꠦꠈꠣ ꠖꠤꠟꠦ, ꠙ꠆ꠞꠎꠣ ꠅꠇꠟꠦ ꠀꠁꠀ ꠚꠦꠞꠣꠃꠘꠞ ꠉꠦꠍꠦ ꠈꠣꠘꠤ ꠝꠣꠉꠤꠟꠣ, ꠔꠦꠃ ꠚꠦꠞꠣꠃꠘꠦ ꠇꠁꠟꠣ, “ꠔꠥꠝꠞꠣ ꠁꠃꠍꠥꠚꠞ ꠉꠦꠍꠦ ꠎꠣꠅ। ꠄꠁꠘ ꠎꠦꠟꠣ ꠇꠂꠘ, ꠑꠤꠇꠃ ꠅꠃꠟꠣ ꠇꠞꠅ।” 56 ꠁ ꠀꠇꠣꠟ ꠀꠡ꠆ꠔꠣ ꠖꠦꠡ ꠎꠥꠠꠤ ꠖꠦꠈꠣ ꠖꠤꠟ। ꠛꠣꠖꠦ ꠀꠞꠅ ꠛꠦꠎꠥꠁꠔꠣ ꠅꠀꠄ ꠁꠃꠍꠥꠚꠦ ꠢꠇꠟ ꠎꠣꠉꠣꠞ ꠉꠥꠖꠣꠝ ꠊꠞꠣꠁꠘ ꠈꠥꠟꠤꠀ, ꠝꠤꠡꠞꠤ ꠅꠇꠟꠞ ꠉꠦꠍꠦ ꠗꠣꠘ ꠛꠦꠌꠣꠔ ꠟꠣꠉꠟꠣ। 57 ꠀꠡ꠆ꠔꠣ ꠖꠥꠘꠤꠀꠁꠔ ꠘꠤꠖꠣꠘ ꠖꠦꠈꠣ ꠖꠤꠟ ꠀꠞ ꠢꠇꠟ ꠖꠦꠡꠞ ꠝꠣꠘꠡꠦ ꠗꠣꠘ ꠈꠞꠤꠖ ꠇꠞꠣꠞ ꠟꠣꠉꠤ ꠝꠤꠡꠞ ꠖꠦꠡꠅ ꠁꠃꠍꠥꠚꠞ ꠉꠦꠍꠦ ꠀꠁꠟꠣ।