1 ꠁꠔꠣꠞ ꠛꠣꠖꠦ ꠝꠤꠡꠞꠞ ꠛꠣꠖꠡꠣꠞ ꠖꠞꠛꠣꠞꠞ ꠡꠞꠣꠛ ꠛꠤꠟꠣꠁ ꠖꠦꠅꠞꠣ ꠀꠞ ꠞꠥꠐꠤ ꠛꠣꠘꠣꠅꠞꠣ ꠁ ꠖꠥꠁꠅꠎꠘꠦ ꠛꠣꠖꠡꠣꠞ ꠉꠦꠍꠦ ꠇꠍꠥꠞ ꠇꠞꠟꠣ। 2 ꠔꠦꠃ ꠚꠦꠞꠣꠃꠘ ꠔꠣꠞꠣ ꠖꠥꠁꠅꠎꠘꠞ ꠃꠙꠞꠦ ꠉꠥꠍꠣ ꠅꠁꠟꠣ, 3 ꠔꠣꠁꠘ ꠄꠞꠣꠞꠦ ꠛꠘ꠆ꠖꠤ ꠇꠞꠤꠀ ꠔꠣꠘ ꠛꠠ ꠎꠟ꠆ꠟꠣꠖꠞ ꠛꠣꠠꠤꠞ ꠎꠦꠟꠅ ꠢꠣꠞꠣꠁꠟꠣ। ꠅꠃ ꠎꠦꠟꠅ ꠁꠃꠍꠥꠚꠅ ꠀꠍꠟꠣ। 4 ꠛꠠ ꠎꠟ꠆ꠟꠣꠖꠦ ꠁ ꠖꠥꠁꠅ ꠇꠄꠖꠤꠞ ꠜꠣꠞꠅ ꠁꠃꠍꠥꠚꠞ ꠀꠔꠅ ꠖꠤꠟꠣ, ꠀꠞ ꠁꠃꠍꠥꠚꠦ ꠔꠣꠞꠣꠞ ꠈꠦꠎꠝꠔ ꠇꠞꠔꠣ ꠟꠣꠉꠟꠣ। ꠅꠃꠟꠣ ꠄꠞꠣ ꠇꠤꠍꠥꠖꠤꠘ ꠎꠦꠟꠅ ꠞꠁꠟꠣ। 5 ꠛꠣꠖꠦ ꠝꠤꠡꠞꠞ ꠛꠣꠖꠡꠣꠞ ꠢꠃ ꠞꠥꠐꠤ ꠛꠣꠘꠣꠅꠞꠣ ꠀꠞ ꠡꠞꠣꠛ ꠛꠤꠟꠣꠅꠞꠣ ꠖꠥꠁꠅꠎꠘꠦ ꠄꠇ ꠞꠣꠁꠔꠦ ꠖꠥꠈꠣꠘ ꠈꠥꠀꠛ ꠖꠦꠈꠟꠣ, ꠔꠣꠞꠣꠞ ꠈꠥꠀꠛꠞ ꠝꠣꠘꠤꠅ ꠀꠍꠤꠟ ꠖꠥꠁ ꠟꠣꠈꠣꠘ। 6 ꠛꠤꠀꠘꠦ ꠁꠃꠍꠥꠚꠦ ꠔꠣꠞꠣꠞ ꠉꠦꠍꠦ ꠉꠤꠀ ꠖꠦꠈꠟꠣ, ꠔꠣꠞꠣ ꠈꠥꠛ ꠝꠘ-ꠝꠞꠣ ꠅꠁꠞꠁꠍꠂꠘ। 7 ꠁꠃꠍꠥꠚꠦ ꠔꠣꠞꠣꠞꠦ ꠎꠤꠇꠣꠁꠟꠣ, “ꠇꠤꠔꠣ ꠅꠁꠍꠦ, ꠀꠁꠎ ꠅꠔ ꠛꠦꠎꠣꠞ ꠇꠦꠘꠦ?” 8 ꠔꠣꠞꠣ ꠎꠥꠀꠙ ꠖꠤꠟꠣ, “ꠀꠝꠞꠣ ꠔ ꠈꠥꠀꠛ ꠖꠦꠈꠍꠤ, ꠅꠁꠟꠦ ꠄꠞ ꠔꠣꠛꠤꠞ ꠛꠥꠎꠣꠁ ꠖꠦꠅꠞꠣ ꠇꠦꠃ ꠘꠣꠄ।” ꠁꠃꠍꠥꠚꠦ ꠔꠣꠞꠣꠞꠦ ꠇꠁꠟꠣ, “ꠝꠣꠘꠤ ꠛꠥꠎꠣꠘꠤꠞ ꠈꠦꠝꠔꠣ ꠇꠤꠔꠣ ꠀꠟ꠆ꠟꠣꠄ ꠖꠦꠁꠘ ꠘꠣ ꠘꠤ? ꠖꠦꠈꠤ ꠌꠣꠁꠘ, ꠀꠝꠣꠞꠦ ꠢꠥꠘꠣꠃꠇ꠆ꠇꠣ।”

9 ꠅꠃ ꠢꠤ ꠡꠞꠣꠛ ꠛꠤꠟꠣꠅꠞꠣꠄ, ꠔꠣꠘ ꠡ꠆ꠛꠙꠘ ꠁꠃꠍꠥꠚꠞꠦ ꠢꠥꠘꠣꠁꠟꠣ। ꠢꠦ ꠇꠁꠟ, “ꠀꠝꠤ ꠖꠦꠈꠟꠣꠝ, ꠀꠝꠣꠞ ꠍꠣꠝꠘꠦ ꠄꠇ ꠀꠋꠉꠥꠞꠞ ꠉꠣꠍ। 10 ꠉꠣꠍꠞ ꠔꠤꠘꠉꠥ ꠒꠣꠟ ꠀꠍꠦ; ꠢꠃ ꠒꠣꠟꠅ ꠇꠥꠠꠤ ꠛꠣꠞꠘꠤꠞ ꠟꠉꠦ ꠟꠉꠦ ꠚꠥꠟ ꠗꠞꠟ, ꠀꠞ ꠍꠠꠣ ꠍꠠꠣ ꠀꠋꠉꠥꠞ ꠗꠞꠤ ꠙꠣꠇꠤ ꠉꠦꠟ। 11 ꠅꠃ ꠡꠝꠄ ꠚꠦꠞꠣꠃꠘꠞ ꠡꠞꠛꠔꠞ ꠙꠤꠀꠟꠣ ꠀꠝꠣꠞ ꠀꠔꠅ ꠀꠍꠤꠟ। ꠀꠝꠤ ꠢꠃ ꠀꠋꠉꠥꠞ ꠅꠇꠟ ꠌꠤꠙꠤꠀ ꠞꠡ ꠛꠣꠞ ꠇꠞꠤ ꠚꠦꠞꠣꠃꠘꠞ ꠀꠔꠅ ꠖꠤꠟꠣꠝ।” 12 ꠁꠃꠍꠥꠚꠦ ꠔꠣꠞꠦ ꠇꠁꠟꠣ, “ꠀꠙꠘꠣꠞ ꠡ꠆ꠛꠙꠘꠞ ꠝꠣꠘꠤ ꠅꠁꠟ, ꠔꠤꠘ ꠒꠣꠟ ꠝꠣꠘꠤ ꠔꠤꠘ ꠖꠤꠘ। 13 ꠅꠃ ꠔꠤꠘ ꠖꠤꠘꠞ ꠝꠣꠎꠦ ꠚꠦꠞꠣꠃꠘꠦ ꠀꠙꠘꠣꠞꠦ ꠛꠣꠞ ꠇꠞꠤꠀ ꠢꠤꠞꠛꠣꠞ ꠀꠉꠞ ꠇꠣꠝꠅ ꠟꠣꠉꠣꠁꠛꠣ। ꠀꠙꠘꠦ ꠢꠤꠞꠛꠣꠞ ꠀꠉꠞ ꠟꠣꠈꠣꠘ ꠚꠦꠞꠣꠃꠘꠞ ꠀꠔꠅ ꠙꠤꠀꠟꠣ ꠔꠥꠟꠤ ꠖꠤꠛꠣ। 14 ꠅꠁꠟꠦ ꠀꠙꠘꠣꠞꠦ ꠝꠤꠘꠔꠤ ꠇꠞꠤ ꠇꠁꠀꠞ, ꠀꠙꠘꠣꠞ ꠜꠣꠟꠣꠁ ꠅꠀꠞ ꠛꠣꠖꠦ ꠀꠝꠣꠞꠦ ꠝꠘꠅ ꠇꠞꠛꠣ ꠀꠞ ꠖꠄꠀ ꠇꠞꠤ ꠚꠦꠞꠣꠃꠘꠞ ꠉꠦꠍꠦ ꠀꠝꠣꠞ ꠇꠕꠣ ꠇꠁꠀ, ꠁ ꠎꠦꠟꠈꠣꠘꠣ ꠕꠘꠦ ꠀꠝꠣꠞꠦ ꠈꠣꠟꠣꠍ ꠇꠞꠣꠁꠛꠣ। 15 ꠁꠛꠞꠣꠘꠤ ꠅꠇꠟꠞ ꠖꠦꠡ ꠕꠘꠦ ꠀꠝꠣꠞꠦ ꠎꠥꠞ ꠇꠞꠤ ꠗꠞꠤꠀ ꠀꠘꠣ ꠅꠁꠍꠦ। ꠀꠞ ꠅꠘꠅ ꠀꠁꠀꠅ ꠀꠝꠤ ꠎꠦꠟ ꠈꠣꠐꠣꠞ ꠝꠔ ꠄꠝꠘ ꠇꠥꠘ꠆ꠔꠣ ꠇꠞꠍꠤ ꠘꠣ।”

16 ꠛꠣꠖꠦ ꠢꠤ ꠞꠥꠐꠤ ꠛꠣꠘꠣꠅꠞꠣꠄ ꠎꠦꠛꠟꠣ ꠖꠦꠈꠟ ꠎꠦꠘ, ꠡꠞꠣꠛ ꠛꠤꠟꠣꠅꠞꠣꠞ ꠈꠥꠀꠛꠞ ꠝꠣꠘꠤ ꠜꠣꠟꠣ ꠀꠍꠦ, ꠔꠦꠃ ꠢꠦ ꠁꠃꠍꠥꠚꠞꠦ ꠇꠁꠟ, “ꠀꠝꠤꠅ ꠈꠥꠀꠛꠦ ꠖꠦꠈꠍꠤ, ꠖꠦꠈꠟꠣꠝ ꠎꠦꠘ ꠀꠝꠣꠞ ꠝꠣꠕꠣꠔ ꠔꠤꠘ ꠐꠥꠇꠞꠤ ꠝꠄꠖꠣꠞ ꠞꠥꠐꠤ ꠟꠁꠍꠤ। 17 ꠀꠞ ꠃꠙꠞꠞ ꠐꠥꠇꠞꠤꠔ ꠀꠍꠤꠟ, ꠚꠦꠞꠣꠃꠘꠞ ꠟꠣꠉꠤ ꠛꠃꠔ ꠎꠣꠔꠞ ꠙꠤꠑꠣ; ꠔꠦꠃ ꠙꠣꠈꠤ ꠅꠇꠟꠦ ꠀꠁꠀ, ꠀꠝꠣꠞ ꠝꠣꠕꠣꠞ ꠃꠙꠞꠞ ꠐꠥꠇꠞꠤ ꠕꠣꠇꠤ ꠁꠔꠣ ꠈꠣꠁꠟꠤꠞꠣ।” 18 ꠁꠃꠍꠥꠚꠦ ꠎꠥꠀꠙ ꠖꠤꠟꠣ, “ꠁ ꠡ꠆ꠛꠙꠘꠞ ꠔꠣꠛꠤꠞ ꠅꠁꠟ, ꠔꠤꠘ ꠐꠥꠇꠞꠤ ꠝꠣꠘꠤ ꠔꠤꠘ ꠖꠤꠘ। 19 ꠅꠃ ꠔꠤꠘ ꠖꠤꠘꠞ ꠝꠣꠎꠦ, ꠚꠦꠞꠣꠃꠘꠦ ꠀꠙꠘꠣꠞ ꠗꠠ ꠕꠘꠦ ꠇꠟ꠆ꠟꠣ ꠀꠟꠉꠣꠁꠀ, ꠉꠣꠍꠞ ꠝꠣꠎꠦ ꠟꠐꠇꠣꠁꠛꠣ, ꠢꠦꠡꠦ ꠙꠣꠈꠤꠘ꠆ꠔꠦ ꠀꠁꠀ ꠀꠙꠘꠣꠞ ꠗꠠꠞ ꠉꠥꠡ꠆ꠔ ꠈꠣꠁꠛꠣ।”

20 ꠄꠞ ꠔꠤꠘ ꠖꠤꠘꠞ ꠖꠤꠘ ꠚꠦꠞꠣꠃꠘꠞ ꠎꠘꠝ ꠖꠤꠘ ꠀꠍꠤꠟ। ꠚꠦꠞꠣꠃꠘꠦ ꠔꠣꠘ ꠖꠞꠛꠣꠞꠞ ꠢꠇꠟ ꠝꠣꠘꠡꠞ ꠟꠣꠉꠤ, ꠈꠣꠘꠤ ꠔꠤꠀꠞ ꠇꠞꠣꠁꠟꠣ। ꠀꠞ ꠢꠃ ꠞꠥꠐꠤ ꠛꠣꠘꠣꠅꠞꠣ ꠀꠞ ꠡꠞꠣꠛ ꠛꠤꠟꠣꠅꠞꠣ ꠖꠥꠁꠅꠎꠘꠞꠦ ꠀꠘꠣꠁꠀ ꠔꠣꠘ ꠖꠞꠛꠣꠞꠞ ꠍꠣꠝꠘꠦ ꠀꠎꠤꠞ ꠇꠞꠟꠣ। 21 ꠔꠣꠁꠘ ꠡꠞꠣꠛ ꠛꠤꠟꠣꠅꠞꠣꠞꠦ ꠢꠤꠞꠛꠣꠞ ꠔꠣꠘ ꠇꠣꠝꠅ ꠟꠣꠉꠣꠁꠟꠣ, ꠢꠦ ꠚꠦꠞꠣꠃꠘꠞ ꠀꠔꠅ ꠢꠤꠞꠛꠣꠞ ꠙꠤꠀꠟꠣ ꠔꠥꠟꠤꠀ ꠖꠤꠟ। 22 ꠅꠁꠟꠦ ꠞꠥꠐꠤ ꠛꠣꠘꠣꠅꠞꠣꠞꠦ ꠉꠣꠍꠅ ꠟꠐꠇꠣꠁꠟꠣ। ꠁꠃꠍꠥꠚꠦ ꠎꠦꠟꠣ ꠇꠁꠍꠟꠣ, ꠄꠇ꠆ꠇꠦꠞꠦ ꠅꠃꠟꠣ ꠅꠁꠟ। 23 ꠔꠣ-ꠅ ꠁꠃꠍꠥꠚꠞ ꠇꠕꠣ ꠢꠤ ꠡꠞꠣꠛ ꠛꠤꠟꠣꠅꠞꠣꠞ ꠁꠀꠖ ꠞꠁꠟ ꠘꠣ, ꠢꠦ ꠚꠣꠃꠞꠤꠟꠤꠟ।