1 ꠁꠃꠍꠥꠚꠞꠦ ꠝꠤꠡꠞ ꠖꠦꠡꠅ ꠟꠁꠀ ꠎꠣꠅꠀꠞ ꠛꠣꠖꠦ, ꠁꠍꠝꠣꠁꠟꠤ ꠅꠇꠟꠞ ꠉꠦꠍ ꠕꠘꠦ, ꠀꠎꠤꠎ ꠘꠣꠝꠞ ꠚꠦꠞꠣꠃꠘꠞ ꠄꠇꠎꠘ ꠝꠤꠡꠞꠤ ꠇꠞ꠆ꠝꠌꠣꠞꠤꠄ, ꠁꠃꠍꠥꠚꠞꠦ ꠈꠞꠤꠖ ꠇꠞꠟꠣ। ꠀꠎꠤꠎ ꠅꠁꠟꠣ ꠚꠦꠞꠣꠃꠘꠞ ꠙꠞꠗꠣꠘ ꠉꠣꠒ। 2 ꠝꠣꠛꠥꠖꠦ ꠁꠃꠍꠥꠚꠞ ꠟꠉꠤ ꠅꠁꠟꠣ, ꠄꠞꠟꠣꠉꠤ ꠁꠃꠍꠥꠚ ꠢꠇꠟ ꠇꠣꠝꠅ ꠇꠣꠝꠤꠀꠛ ꠅꠁꠟꠣ। ꠔꠣꠁꠘ ꠢꠃ ꠝꠤꠡꠞꠤ ꠝꠥꠘꠤꠛꠞ ꠛꠣꠠꠤꠔ ꠇꠣꠝ ꠇꠞꠔꠣ। 3 ꠝꠣꠛꠥꠖ ꠔꠣꠘ ꠟꠉꠦ ꠟꠉꠦ ꠀꠍꠂꠘ ꠀꠞ ꠢꠇꠟ ꠇꠣꠝꠅ ꠔꠣꠘꠦ ꠇꠣꠝꠤꠀꠛ ꠇꠞꠞꠣ, ꠔꠣꠘ ꠝꠥꠘꠤꠛꠦꠅ ꠁꠔꠣ ꠛꠥꠎꠤꠟꠣꠁꠟꠣ। 4 ꠔꠦꠃ ꠝꠥꠘꠤꠛꠦ ꠁꠃꠍꠥꠚꠞꠦ ꠝꠣꠄꠀ ꠇꠞꠔꠣ ꠟꠣꠉꠟꠣ, ꠔꠣꠘꠦ ꠝꠥꠘꠤꠛꠞ ꠈꠣꠍ ꠈꠦꠎꠝꠔꠉꠣꠞ ꠛꠣꠘꠣꠁꠟꠣ ꠀꠞ ꠔꠣꠘ ꠛꠣꠠꠤꠞ ꠢꠇꠟꠔꠣ ꠖꠦꠈꠣ-ꠢꠥꠘꠣꠞ ꠜꠣꠞꠅ ꠁꠃꠍꠥꠚꠞ ꠉꠦꠍꠦ ꠡꠝꠎꠣꠁ ꠖꠤꠟꠣ। 5 ꠁꠃꠍꠥꠚꠞꠦ ꠔꠣꠘ ꠛꠣꠠꠤꠞ ꠀꠞ ꠢꠇꠟꠔꠣꠞ ꠜꠣꠞ ꠡꠙꠤ ꠖꠦꠅꠀꠞ ꠛꠣꠖꠦ ꠕꠘꠦ, ꠝꠣꠛꠥꠖꠦ ꠁꠃꠍꠥꠚꠞ ꠟꠣꠉꠤꠃ, ꠔꠣꠘ ꠝꠥꠘꠤꠛꠞ ꠢꠇꠟꠔꠣꠞ ꠝꠣꠎꠦ ꠛꠞꠇꠔ ꠘꠣꠎꠤꠟ ꠇꠞꠟꠣ। ꠀꠎꠤꠎꠞ ꠛꠣꠠꠤꠔ ꠀꠞ ꠈꠦꠔ-ꠈꠣꠝꠣꠞ, ꠢꠇꠟ ꠎꠣꠉꠣꠔ ꠝꠣꠛꠥꠖꠦ ꠛꠞꠇꠔ ꠘꠣꠎꠤꠟ ꠇꠞꠟꠣ। 6 ꠁꠔꠣ ꠖꠦꠈꠤꠀ ꠀꠎꠤꠎꠦ ꠔꠣꠘ ꠢꠇꠟꠔꠣꠞ ꠜꠣꠞ ꠁꠃꠍꠥꠚꠞ ꠃꠙꠞꠦ ꠡꠙꠤ ꠖꠤꠟꠣ, ꠔꠣꠘ ꠘꠤꠎꠞ ꠈꠣꠘꠣ-ꠖꠣꠘꠣ ꠍꠣꠠꠣ ꠀꠞ ꠇꠥꠘ꠆ꠔꠣꠞꠃ ꠈꠛꠞ ꠟꠁꠔꠣ ꠘꠣ।

ꠁꠃꠍꠥꠚꠞ ꠡꠞꠤꠟꠞ ꠉꠑꠘ ꠀꠞ ꠌꠦꠢꠣꠞꠣꠅ ꠡꠥꠘ꠆ꠖꠞ ꠀꠍꠤꠟ। 7 ꠁꠔꠣ ꠖꠦꠈꠤꠀ ꠔꠣꠘ ꠝꠥꠘꠤꠛꠞ ꠛꠃꠄ ꠔꠣꠘ ꠛꠣꠄ ꠟꠣꠟꠌ ꠇꠞꠟ। ꠔꠣꠁ ꠁꠃꠍꠥꠚꠞꠦ ꠇꠁꠟ, “ꠀꠝꠣꠞ ꠛꠤꠍꠘꠣꠔ ꠀꠅ।” 8 ꠅꠁꠟꠦ ꠁꠃꠍꠥꠚ ꠞꠣꠎꠤ ꠘꠣ ꠅꠁꠀ ꠝꠥꠘꠤꠛꠞ ꠛꠃꠞꠦ ꠇꠁꠟꠣ, “ꠖꠦꠈꠃꠇ꠆ꠇꠣ, ꠁ ꠛꠣꠠꠤꠔ ꠇꠤꠔꠣ ꠇꠤꠔꠣ ꠀꠍꠦ, ꠀꠝꠣꠞ ꠝꠥꠘꠤꠛꠦ ꠇꠥꠘ꠆ꠔꠣꠃ ꠈꠛꠞ ꠟꠂꠘ ꠘꠣ, ꠢꠇꠟꠔꠣꠞ ꠜꠣꠞ ꠀꠝꠣꠞ ꠃꠙꠞꠦ ꠡꠝꠎꠣꠁ ꠖꠤꠍꠂꠘ। 9 ꠁ ꠛꠣꠠꠤꠔ ꠀꠝꠣ ꠕꠘꠦ ꠛꠠ ꠀꠞ ꠇꠦꠃ ꠘꠣꠄ। ꠀꠙꠘꠦ ꠔ ꠔꠣꠘ ꠛꠤꠛꠤ, ꠄꠞꠟꠣꠉꠤ ꠀꠙꠘꠣꠞꠦ ꠍꠣꠠꠣ ꠀꠞ ꠢꠇꠟꠞꠦ ꠔꠣꠁꠘ ꠀꠝꠣꠞ ꠎꠤꠝ꠆ꠝꠣꠄ ꠞꠣꠈꠍꠂꠘ, ꠔꠦ ꠀꠝꠤ ꠇꠤꠟꠣ ꠅꠔ ꠛꠠ ꠄꠇ ꠎꠊꠁꠘ꠆ꠘ ꠇꠣꠝ ꠇꠞꠤꠀ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠉꠥꠘꠣ ꠇꠞꠔꠣꠝ?” 10 ꠔꠣꠁ ꠢꠣꠝꠦꠡꠣ ꠁꠃꠍꠥꠚꠞꠦ ꠅꠃꠟꠣ ꠝꠤꠘꠔ ꠇꠞꠟꠦꠅ ꠁꠃꠍꠥꠚꠦ ꠔꠣꠁꠞ ꠉꠦꠍꠦ ꠢꠥꠔꠔꠦ ꠛꠣ ꠇꠣꠍꠣꠔ ꠞꠁꠔꠦꠅ ꠞꠣꠎꠤ ꠅꠁꠟꠣ ꠘꠣ। 11 ꠢꠦꠡꠦ ꠄꠇꠖꠤꠘ ꠇꠥꠘꠥ ꠄꠇ ꠇꠣꠝꠞ ꠟꠣꠉꠤ ꠁꠃꠍꠥꠚ ꠊꠞꠞ ꠜꠤꠔꠞꠦ ꠢꠣꠝꠣꠁꠟꠣ, ꠅꠃ ꠡꠝꠄ ꠀꠞ ꠇꠦꠃ ꠢꠤꠘꠅ ꠀꠍꠤꠟ ꠘꠣ। 12 ꠔꠦꠃ ꠀꠎꠤꠎꠞ ꠛꠃꠄ ꠁꠃꠍꠥꠚꠞ ꠇꠣꠙꠠꠅ ꠗꠞꠤ ꠇꠁꠟ, “ꠀꠝꠣꠞ ꠛꠤꠍꠘꠣꠔ ꠀꠄ।” ꠅꠁꠟꠦ ꠁꠃꠍꠥꠚꠦ ꠔꠣꠘ ꠇꠣꠙꠠ ꠚꠣꠟꠣꠁꠀ ꠖꠃꠠꠤꠀ ꠉꠦꠟꠣꠉꠤ। 13 ꠁꠃꠍꠥꠚꠦ ꠔꠣꠁꠞ ꠀꠔꠅ ꠇꠣꠙꠠ ꠕꠁꠀ ꠖꠃꠠꠣꠁꠀ ꠉꠦꠟꠣꠉꠤ ꠇꠞꠤ, 14 ꠀꠎꠤꠎꠞ ꠛꠃꠄ ꠊꠞꠞ ꠝꠣꠘꠡꠞꠦ ꠒꠣꠇꠤꠀ ꠇꠁꠟ, “ꠢꠥꠘꠅ, ꠔꠣꠁꠘ ꠀꠝꠞꠣꠞ ꠟꠉꠦ ꠔꠣꠝꠡꠣ ꠇꠞꠣꠞ ꠟꠣꠉꠤ ꠁ ꠁꠛꠞꠣꠘꠤ ꠛꠦꠐꠣꠞꠦ ꠀꠘꠍꠂꠘ। ꠢꠦ ꠀꠝꠣꠞꠦ ꠛꠦꠁꠎ꠆ꠎꠔꠤ ꠇꠞꠣꠞ ꠝꠔꠟꠛꠦ ꠀꠝꠣꠞ ꠛꠤꠍꠘꠣꠔ ꠀꠁꠍꠤꠟ, ꠅꠃ ꠀꠝꠤ ꠌꠤꠟ꠆ꠟꠣꠁꠀ ꠃꠑꠍꠤ। 15 ꠀꠝꠣꠞ ꠌꠤꠟ꠆ꠟꠣꠘꠤ ꠢꠥꠘꠤꠀ ꠢꠦ ꠔꠣꠞ ꠚꠤꠘ꠆ꠘꠞ ꠇꠣꠙꠠ ꠀꠝꠣꠞ ꠉꠦꠍꠦ ꠕꠁꠀ ꠜꠣꠉꠤꠍꠦ।” 16 ꠁꠃꠍꠥꠚꠞ ꠝꠥꠘꠤꠛ ꠛꠣꠠꠤꠔ ꠘꠣ ꠀꠅꠀ ꠙꠞ꠆ꠎꠘ꠆ꠔ, ꠁ ꠇꠣꠙꠠ ꠔꠣꠁ ꠘꠤꠎꠞ ꠉꠦꠍꠦ ꠞꠣꠈꠟ। 17 ꠔꠣꠁꠘ ꠀꠁꠀ ꠢꠣꠞꠟꠦ ꠔꠣꠁ ꠘꠣꠟꠤꠡ ꠖꠤꠟ, “ꠔꠥꠝꠤ ꠎꠦ ꠁꠛꠞꠣꠘꠤ ꠉꠥꠟꠣꠝꠞꠦ ꠀꠝꠞꠣꠞ ꠉꠦꠍꠦ ꠀꠘꠍ, ꠢꠦ ꠀꠝꠣꠞꠦ ꠛꠦꠁꠎ꠆ꠎꠔꠤ ꠇꠞꠣꠞ ꠝꠔꠟꠛꠦ ꠀꠝꠣꠞ ꠊꠞꠅ ꠢꠣꠝꠣꠁꠍꠤꠟ। 18 ꠅꠁꠟꠦ ꠀꠝꠣꠞ ꠢꠣꠃꠇꠣ-ꠢꠣꠃꠇꠤ ꠀꠞ ꠌꠤꠟ꠆ꠟꠣꠘꠤꠄ ꠢꠦ ꠀꠝꠣꠞ ꠉꠦꠍꠦ ꠔꠣꠞ ꠇꠣꠙꠠ ꠚꠣꠟꠣꠁ ꠕꠁꠀ ꠜꠣꠉꠤꠍꠦ।”

19 ꠛꠃꠞ ꠝꠣꠔ ꠢꠥꠘꠤꠀ ꠁꠃꠍꠥꠚꠞ ꠝꠥꠘꠤꠛꠦ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ। ꠔꠣꠘ ꠛꠃꠄ ꠇꠁꠟ, “ꠔꠥꠝꠣꠞ ꠉꠥꠟꠣꠝꠦ ꠀꠝꠣꠞ ꠟꠉꠦ ꠅꠃ ꠟꠣꠈꠣꠘ ꠇꠣꠝ ꠇꠞꠍꠦ।” 20 ꠔꠦꠃ ꠀꠎꠤꠎꠦ ꠁꠃꠍꠥꠚꠞꠦ ꠘꠤꠀ ꠎꠦꠟ ꠈꠣꠘꠣꠔ ꠢꠣꠞꠣꠁꠟꠣ।

ꠝꠤꠡꠞꠞ ꠛꠣꠖꠡꠣꠞ ꠛꠘ꠆ꠖꠤ ꠅꠇꠟꠞꠦ ꠎꠦꠘꠅ ꠞꠣꠈꠂꠘ, ꠔꠣꠘꠦꠅ ꠢꠃ ꠎꠦꠟ ꠈꠣꠘꠣꠔ ꠕꠁꠟꠣ। 21 ꠅꠁꠟꠦ ꠁꠃꠍꠥꠚꠞ ꠃꠙꠞꠦ ꠝꠣꠛꠥꠖꠞ ꠍꠣꠄꠀ ꠀꠍꠤꠟ, ꠔꠣꠁꠘ ꠁꠃꠍꠥꠚꠞꠦ ꠛꠠ ꠎꠦꠟꠣꠞ ꠍꠣꠛꠞ ꠉꠦꠍꠦ ꠝꠣꠄꠀꠞ ꠝꠣꠘꠥꠡ ꠛꠣꠘꠣꠁꠟꠣ। 22 ꠛꠠ ꠎꠦꠟꠣꠞ ꠍꠣꠛꠦ ꠎꠦꠟ ꠈꠣꠘꠣꠞ ꠢꠇꠟ ꠛꠘ꠆ꠖꠤ ꠅꠇꠟꠞ ꠡꠞ꠆ꠖꠣꠞꠤ ꠁꠃꠍꠥꠚꠞ ꠃꠙꠞꠦ ꠍꠣꠠꠤ ꠖꠤꠟꠣ, ꠔꠦꠃ ꠢꠘꠞ ꠢꠇꠟ ꠇꠣꠝ-ꠇꠣꠎ ꠁꠃꠍꠥꠚꠞ ꠢꠥꠇꠥꠝꠦ ꠌꠟꠔ। 23 ꠀꠞ ꠛꠠ ꠎꠦꠟꠣꠞ ꠍꠣꠛꠦ ꠇꠥꠘ꠆ꠔꠣꠃ ꠖꠦꠈꠣ-ꠢꠥꠘꠣ ꠇꠞꠣ ꠟꠣꠉꠔ ꠘꠣ, ꠇꠣꠞꠘ ꠝꠣꠛꠥꠖ ꠁꠃꠍꠥꠚꠞ ꠟꠉꠦ ꠀꠍꠟꠣ, ꠄꠞꠟꠣꠉꠤ ꠁꠃꠍꠥꠚꠦ ꠎꠦꠔꠣꠔ ꠀꠔ ꠖꠤꠔꠣ, ꠝꠣꠛꠥꠖꠦ ꠁꠔꠣ ꠇꠣꠝꠤꠀꠛ ꠇꠞꠔꠣ।