1 ꠄꠢꠥꠖꠣꠄ ꠔꠣꠞ ꠜꠣꠁꠀꠁꠘ꠆ꠔꠞꠦ ꠕꠁꠀ ꠅꠖꠥꠟ꠆ꠟꠝ ꠉꠣꠃꠞ ꠢꠤꠞꠣ ꠘꠣꠝꠞ ꠄꠇ ꠝꠣꠘꠡꠞ ꠟꠉꠦ ꠞꠅꠀꠔ ꠉꠦꠟ। 2 ꠢꠘꠅ ꠞꠁꠀ ꠡꠥꠀ ꠘꠣꠝꠞ ꠄꠇ ꠇꠦꠘꠣꠘꠤ ꠝꠣꠘꠡꠞ ꠙꠥꠠꠤꠞ ꠟꠉꠦ ꠖꠦꠈꠣ ꠅꠁꠟ, ꠖꠦꠈꠤꠀ ꠢꠦ ꠅꠃ ꠙꠥꠠꠤꠞꠦ ꠛꠤꠀ ꠇꠞꠟ। 3 ꠛꠤꠀꠞ ꠛꠣꠖꠦ ꠢꠃ ꠛꠦꠐꠤꠞ ꠊꠞꠅ ꠄꠇ ꠙꠥꠀ ꠅꠁꠟ, ꠄꠢꠥꠖꠣꠄ ꠔꠣꠞ ꠘꠣꠝ ꠞꠣꠈꠟ ꠄꠁꠞ। 4 ꠢꠤꠞꠛꠣꠞ ꠛꠦꠐꠤꠞ ꠊꠞꠅ ꠀꠞꠇ ꠙꠥꠀ ꠅꠁꠟꠦ, ꠝꠣʼꠄ ꠔꠣꠞ ꠘꠣꠝ ꠞꠣꠈꠟ ꠅꠘꠘ। 5 ꠢꠦꠡꠦ ꠅꠃ ꠛꠦꠐꠤꠞ ꠀꠞꠇ ꠙꠥꠀ ꠅꠁꠟꠦ, ꠔꠣꠞ ꠘꠣꠝ ꠞꠣꠈꠟ ꠡꠦꠟꠣ। ꠁ ꠡꠝꠄ ꠔꠣꠞꠣ ꠇꠡꠤꠛ ꠉꠣꠃꠔ ꠞꠁꠔꠣ। 6 ꠀꠞ ꠄꠢꠥꠖꠣꠄ ꠔꠣꠞ ꠛꠠ ꠙꠥꠀ ꠄꠁꠞꠞ ꠟꠉꠦ ꠔꠣꠝꠣꠞ ꠘꠣꠝꠞ ꠄꠇ ꠙꠥꠠꠤꠞꠦ ꠛꠤꠀ ꠖꠤꠟ। 7 ꠅꠁꠟꠦ ꠔꠣꠞ ꠁ ꠙꠥꠀ ꠝꠣꠛꠥꠖꠞ ꠘꠎꠞꠅ ꠈꠥꠛ ꠈꠛꠤꠍ ꠀꠍꠤꠟ ꠉꠔꠤꠇꠦ, ꠝꠣꠛꠥꠖꠦ ꠔꠣꠞꠦ ꠝꠣꠞꠤꠟꠣꠁꠟꠣ। 8 ꠅꠃ ꠄꠢꠥꠖꠣꠄ ꠅꠘꠘꠞꠦ ꠇꠁꠟ, “ꠔꠥꠝꠣꠞ ꠜꠣꠛꠤꠞꠦ ꠛꠤꠀ ꠇꠞꠤꠟꠣꠅ। ꠔꠣꠁꠞ ꠖꠦꠅꠞ ꠅꠀꠄ ꠔꠥꠝꠣꠞ ꠎꠦꠔꠣ ꠇꠞꠣ ꠎꠞꠥꠞ ꠀꠍꠦ, ꠁꠔꠣ ꠀꠖꠣꠄ ꠇꠞꠅ ꠀꠞ ꠘꠤꠎꠞ ꠜꠣꠁꠞ ꠅꠀꠞꠤꠡ ꠙꠄꠖꠣ ꠇꠞꠅ।” 9 ꠅꠘꠘꠦ ꠎꠣꠘꠔ, ꠁ ꠅꠀꠞꠤꠡ ꠔꠣꠞ ꠘꠤꠎꠞ ꠅꠁꠔ ꠘꠣꠄ, ꠀꠞ ꠔꠣꠞ ꠜꠣꠁꠞ ꠅꠀꠞꠤꠡ ꠞꠣꠈꠔꠦ ꠔꠣꠞ ꠈꠤꠀꠟ ꠀꠍꠤꠟ ꠘꠣ ꠉꠔꠤꠇꠦ, ꠔꠣꠁꠞ ꠟꠉꠦ ꠝꠤꠟꠣ-ꠝꠤꠡꠣꠞ ꠡꠝꠄ ꠔꠣꠞ ꠛꠤꠎ ꠛꠣꠁꠞꠦ ꠝꠣꠐꠤꠔ ꠚꠣꠟꠣꠁ ꠖꠤꠔ। 10 ꠝꠣꠛꠥꠖꠦ ꠔꠣꠞ ꠁ ꠇꠣꠝꠦ ꠘꠣꠞꠣꠎ ꠅꠁꠟꠣ, ꠔꠣꠁꠘ ꠄꠁꠞꠞꠦꠅ ꠝꠣꠞꠤꠟꠣꠁꠟꠣ। 11 ꠅꠃ ꠄꠢꠥꠖꠣꠄ ꠔꠣꠞ ꠙꠥꠀꠞ ꠛꠃ ꠔꠣꠝꠣꠞꠞꠦ ꠇꠁꠟ, “ꠀꠝꠣꠞ ꠙꠥꠀ ꠡꠦꠟꠣ ꠎꠔꠖꠤꠘ ꠛꠠ ꠘꠣ ꠅꠄ, ꠅꠔꠖꠤꠘ ꠔꠥꠝꠣꠞ ꠛꠣꠚꠞ ꠛꠣꠠꠤꠔ ꠉꠤꠀ ꠠꠣꠠꠤ ꠅꠁꠀꠃ ꠞꠅ।” ꠄꠢꠥꠖꠣꠄ ꠒꠞꠣꠁꠟ, ꠡꠦꠟꠣꠅ ꠔꠣꠞ ꠜꠣꠁꠀꠁꠘ꠆ꠔꠞ ꠟꠣꠈꠣꠘ ꠝꠞꠤꠎꠤꠛ। ꠀꠞ ꠔꠣꠝꠣꠞ ꠛꠣꠚꠞ ꠛꠣꠠꠤꠔ ꠉꠦꠟꠉꠤ।

12 ꠛꠣꠇ꠆ꠇꠣ ꠇꠄꠖꠤꠘ ꠛꠣꠖꠦ ꠄꠢꠥꠖꠣꠞ ꠛꠃ, ꠡꠥꠀꠞ ꠙꠥꠠꠤ ꠝꠞꠤꠉꠦꠟ, ꠔꠦꠃ ꠇꠣꠘ꠆ꠖꠣ-ꠇꠣꠐꠤ ꠇꠞꠣꠞ ꠛꠣꠖꠦ ꠄꠢꠥꠖꠣꠄ ꠡꠣꠘ꠆ꠔꠤ ꠅꠁꠀ ꠅꠖꠥꠟ꠆ꠟꠝ ꠉꠣꠃꠞ ꠔꠣꠞ ꠖꠥꠡ꠆ꠔ ꠢꠤꠞꠣꠞ ꠟꠉꠦ ꠔꠤꠝꠘꠣ ꠉꠣꠃꠔ, ꠔꠣꠞ ꠝꠦꠠꠣꠞ ꠙꠣꠟꠞ ꠞꠥꠝꠣ ꠇꠣꠐꠞꠣ ꠝꠣꠘꠡꠞ ꠉꠦꠍꠦ ꠞꠅꠀꠘꠣ ꠖꠤꠟ। 13 ꠀꠞ ꠔꠣꠝꠣꠞꠞꠦ ꠉꠤꠀ ꠇꠦꠃ ꠈꠛꠞ ꠖꠤꠟ “ꠔꠥꠝꠣꠞ ꠢꠃꠞꠦ ꠔꠣꠘ ꠝꠦꠠꠣꠞ ꠞꠥꠝꠣ ꠇꠣꠐꠣꠞ ꠟꠣꠉꠤ ꠔꠤꠝꠘꠣꠔ ꠎꠣꠁꠞꠣ।” 14 ꠔꠣꠝꠣꠞꠦ ꠖꠦꠈꠟ, ꠡꠦꠟꠣ ꠛꠠ ꠅꠁꠟꠦꠅ ꠢꠃꠞꠦ ꠡꠦꠟꠣꠞ ꠟꠉꠦ ꠔꠣꠁꠞ ꠛꠤꠀ ꠖꠤꠞꠣ ꠘꠣ, ꠅꠃ ꠔꠣꠁ ꠠꠣꠠꠤꠞ ꠇꠣꠙꠠ ꠛꠖꠟꠣꠁꠀ ꠢꠣꠎꠤ-ꠙꠣꠠꠤ ꠝꠥꠈꠅ ꠊꠥꠝꠐꠣ ꠖꠤꠀ, ꠀꠄꠘꠣꠁꠝꠞ ꠙꠕꠞ ꠝꠥꠈꠅ ꠉꠤꠀ ꠛꠁꠟ। ꠀꠄꠘꠣꠁꠝ ꠀꠍꠤꠟ ꠔꠤꠝꠘꠣꠔ ꠎꠣꠅꠀꠞ ꠙꠕꠅ। 15 ꠀꠞ ꠔꠣꠁ ꠝꠥꠈ ꠟꠥꠇꠣꠁꠀ ꠞꠣꠈꠣꠄ, ꠄꠢꠥꠖꠣꠄ ꠝꠘꠅ ꠇꠞꠟ ꠁꠉꠥ ꠍꠤꠟꠣꠘ ꠛꠦꠐꠤ। 16 ꠔꠦꠃ ꠄꠢꠥꠖꠣꠄ ꠙꠥꠀꠞ ꠛꠃꠞꠦ ꠘꠣ ꠌꠤꠘꠣꠄ, ꠙꠕꠞ ꠗꠣꠞꠅ ꠔꠣꠝꠣꠞꠞ ꠉꠦꠍꠦ ꠉꠤꠀ ꠇꠁꠟ, “ꠀꠅ, ꠔꠥꠝꠣꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠤ।” ꠔꠣꠝꠣꠞꠦ ꠇꠁꠟ, “ꠔꠦ ꠀꠝꠣꠞꠦ ꠇꠤꠔꠣ ꠖꠤꠛꠣꠄ?” 17 ꠢꠦ ꠇꠁꠟ, “ꠀꠝꠣꠞ ꠙꠣꠟ ꠕꠘꠦ ꠛꠇꠞꠤ ꠛꠣꠁꠌ꠆ꠌꠣ ꠄꠉꠥ ꠙꠣꠑꠣꠁ ꠖꠤꠝꠥ।” ꠔꠣꠝꠣꠞꠦ ꠇꠁꠟ, “ꠁꠐꠣ ꠙꠣꠑꠣꠘꠤꠞ ꠀꠉꠦ ꠀꠝꠣꠞ ꠉꠦꠍꠦ ꠇꠥꠘ꠆ꠔꠣ ꠎꠤꠝ꠆ꠝꠣ ꠕꠁꠀ ꠎꠣꠃꠇ꠆ꠇꠣ।” 18 ꠄꠢꠥꠖꠣꠄ ꠇꠁꠟ, “ꠇꠤꠔꠣ ꠕꠁꠔꠣꠝ?” ꠔꠣꠁ ꠇꠁꠟ, “ꠀꠙꠘꠣꠞ ꠅꠃ ꠚꠤꠔꠣꠀꠟꠣ ꠡꠤꠟ ꠀꠞ ꠀꠙꠘꠣꠞ ꠀꠔꠞ ꠟꠣꠑꠤ ꠕꠁꠀ ꠎꠣꠃꠇ꠆ꠇꠣ।” ꠔꠦꠃ ꠄꠢꠥꠖꠣꠄ ꠅꠉꠥꠁꠘ ꠎꠤꠝ꠆ꠝꠣ ꠕꠁꠀ ꠔꠣꠁꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠟ ꠀꠞ ꠔꠣꠝꠣꠞꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ। 19 ꠛꠣꠖꠦ ꠔꠣꠝꠣꠞ ꠃꠑꠤꠀ ꠉꠦꠟꠉꠤ ꠀꠞ ꠢꠤ ꠇꠣꠙꠠ ꠛꠖꠟꠣꠁꠀ ꠢꠤꠞꠛꠣꠞ ꠠꠣꠠꠤꠞ ꠇꠣꠙꠠ ꠚꠤꠘ꠆ꠖꠤꠟ।

20 ꠢꠦꠡꠦ ꠅꠃ ꠛꠦꠐꠤꠞ ꠉꠦꠍ ꠕꠣꠇꠤ ꠎꠤꠝ꠆ꠝꠣꠞ ꠝꠣꠟ ꠚꠤꠞꠔ ꠘꠤꠛꠣꠞ ꠟꠣꠉꠤ, ꠔꠣꠞ ꠅꠖꠥꠟ꠆ꠟꠝꠞ ꠖꠥꠡ꠆ꠔꠞꠦ ꠖꠤꠀ ꠍꠣꠉꠟꠞ ꠛꠣꠁꠌ꠆ꠌꠣ ꠄꠉꠥ ꠙꠣꠑꠣꠁꠟ। ꠢꠦ ꠀꠁꠀ ꠔꠣꠁꠞꠦ ꠔꠥꠇꠣꠁꠀ ꠙꠣꠁꠟ ꠘꠣ। 21 ꠅꠃ ꠢꠦ ꠢꠘꠞ ꠝꠣꠘꠡꠞꠦ ꠎꠤꠇꠣꠁꠟ, “ꠀꠄꠘꠣꠁꠝꠞ ꠙꠕꠞ ꠗꠣꠞꠅ ꠄꠇ ꠡꠦꠛꠇ ꠛꠦꠐꠤ ꠀꠍꠤꠟ, ꠅꠉꠥ ꠇꠁ?” ꠔꠣꠞꠣ ꠇꠁꠟꠣ, “ꠁꠘꠅ ꠔ ꠁꠟꠣ ꠇꠥꠘꠥ ꠛꠦꠐꠤ ꠘꠣꠄ।” 22 ꠔꠦꠃ ꠢꠦ ꠄꠢꠥꠖꠣꠞ ꠉꠦꠍꠦ ꠉꠤꠀ ꠇꠁꠟ, “ꠀꠝꠤ ꠉꠤꠀ ꠔꠣꠁꠞꠦ ꠔꠥꠇꠣꠁꠀ ꠙꠣꠁꠟꠣꠝ ꠘꠣ। ꠢꠘꠞ ꠝꠣꠘꠡꠦꠅ ꠇꠁꠟꠣ, ꠁꠘꠅ ꠔ ꠁꠟꠣ ꠇꠥꠘꠥ ꠛꠦꠐꠤ ꠀꠁꠍꠦ ꠘꠣ।” 23 ꠄꠢꠥꠖꠣꠄ ꠇꠁꠟ, “ꠔꠦ ꠁꠔꠣ ꠀꠞ ꠔꠣꠁꠞ ꠉꠦꠍꠦꠃ ꠕꠣꠇꠃꠇ। ꠘꠣꠁꠟꠦ ꠀꠝꠞꠣ ꠡꠞꠝꠤꠘ꠆ꠖꠣ ꠅꠁꠝꠥ। ꠍꠣꠉꠟꠞ ꠛꠣꠁꠌ꠆ꠌꠣ ꠔ ꠙꠣꠑꠣꠁꠟꠣꠝ, ꠔꠣ-ꠅ ꠔꠥꠝꠤ ꠄꠞꠦ ꠔꠥꠇꠣꠁꠀ ꠙꠣꠁꠟꠣꠄ ꠘꠣ।”

24 ꠅꠘꠥꠝꠣꠘ ꠔꠤꠘ ꠝꠣꠡ ꠛꠣꠖꠦ ꠄꠢꠥꠖꠣꠄ ꠢꠥꠘꠟ, ꠔꠣꠞ ꠙꠥꠀꠞ ꠛꠃ ꠔꠣꠝꠣꠞꠦ ꠎꠤꠘꠣ ꠇꠞꠍꠦ, ꠄꠞꠟꠣꠉꠤ ꠔꠣꠁꠞ ꠢꠥꠞꠥꠔ꠆ꠔꠣ ꠅꠁꠔꠣ। ꠅꠃ ꠄꠢꠥꠖꠣꠄ ꠇꠁꠟ, “ꠅꠉꠥꠞꠦ ꠛꠣꠞꠦ ꠘꠤꠀ ꠀꠉꠥꠁꠘꠖꠤ ꠎꠣꠟꠣꠁꠟꠣꠅ।” 25 ꠔꠣꠝꠣꠞꠞꠦ ꠎꠦꠛꠟꠣ ꠛꠣꠞꠦ ꠘꠤꠞꠣ, ꠅꠃ ꠡꠝꠄ ꠔꠣꠁꠞ ꠢꠃꠞꠞꠦ ꠈꠛꠞ ꠖꠤꠟ ꠎꠦꠘ, “ꠎꠣꠞ ꠢꠥꠞꠥꠔ꠆ꠔꠣ ꠀꠝꠣꠞ ꠙꠦꠐꠅ ꠀꠍꠦ, ꠅꠃ ꠝꠣꠟ-ꠍꠣꠝꠣꠘꠣ ꠅꠇꠟ ꠔꠣꠞ। ꠔꠦ ꠖꠦꠈꠃꠇ꠆ꠇꠣ, ꠅꠃ ꠚꠤꠔꠣꠀꠟꠣ ꠡꠤꠟ ꠀꠞ ꠟꠣꠑꠤꠉꠥ ꠇꠣꠞ ꠌꠤꠘꠂꠘ ꠘꠤ?” 26 ꠄꠢꠥꠖꠣꠄ ꠁꠔꠣ ꠖꠦꠈꠤꠀ ꠇꠁꠟ, “ꠔꠣꠁ ꠔ ꠀꠝꠣ ꠕꠣꠇꠤ ꠛꠃꠔ ꠛꠠ ꠙꠞꠦꠎꠉꠣꠞ। ꠀꠝꠣꠞ ꠙꠥꠀ ꠡꠦꠟꠣꠞ ꠟꠉꠦ ꠔꠣꠁꠞꠦ ꠛꠤꠀ ꠇꠞꠣꠁꠍꠤ ꠘꠣ।” ꠄꠞꠛꠣꠖꠦ ꠄꠢꠥꠖꠣꠄ ꠀꠞ ꠇꠥꠘꠥꠖꠤꠘꠅ ꠔꠣꠝꠣꠞꠞ ꠉꠦꠍꠦ ꠢꠥꠔꠤꠍꠦ ꠘꠣ।

27 ꠢꠥꠞꠥꠔ꠆ꠔꠣ ꠅꠁꠛꠣꠞ ꠛꠣꠟꠣ ꠖꠦꠈꠂꠘ, ꠔꠣꠝꠣꠞꠞ ꠙꠦꠐꠅ ꠎꠥꠠꠞ ꠢꠥꠞꠥꠔ꠆ꠔꠣ। 28 ꠙꠄꠟꠣ ꠄꠉꠥꠄ ꠔꠣꠞ ꠀꠔ ꠛꠣꠞ ꠇꠞꠟ ꠀꠞ ꠖꠣꠁ ꠛꠦꠐꠤꠄ ꠟꠣꠟ ꠡꠥꠔꠣ ꠄꠇꠍꠣ ꠔꠣꠞ ꠀꠔꠅ ꠛꠣꠘ꠆ꠖꠤꠀ ꠇꠁꠟ, “ꠁꠉꠥ ꠙꠄꠟꠣ ꠙꠄꠖꠣ ꠅꠁꠟ।” 29 ꠅꠁꠟꠦ ꠢꠦ ꠀꠔ ꠐꠣꠘ ꠖꠤꠀ ꠜꠤꠔꠞꠦ ꠘꠤꠟꠉꠤ, ꠔꠦꠃ ꠔꠣꠞ ꠜꠣꠁ ꠙꠄꠟꠣ ꠛꠣꠞ ꠅꠁꠟ ꠀꠞ ꠖꠣꠁ ꠛꠦꠐꠤꠄ ꠇꠁꠟ, “ꠔꠥꠝꠤ ꠇꠤꠟꠣ ꠚꠣꠇ ꠇꠞꠤꠀ ꠛꠣꠞ ꠅꠁꠟꠣꠄ?” ꠄꠞꠟꠣꠉꠤ ꠄꠞ ꠘꠣꠝ ꠅꠁꠟ ꠚꠤꠞꠥꠎ [ꠝꠣꠘꠤ, ꠚꠣꠇ ꠇꠞꠣ]। 30 ꠛꠣꠖꠦ ꠔꠣꠞ ꠜꠣꠁ ꠟꠣꠟ ꠡꠥꠔꠣ ꠀꠔꠅ ꠛꠣꠘ꠆ꠖꠣ ꠟꠁꠀ ꠛꠣꠞ ꠅꠁꠟ, ꠔꠣꠞ ꠘꠣꠝ ꠞꠣꠈꠟꠣ ꠎꠣꠞꠣꠢ।