1 ꠁꠀꠇꠥꠛ ꠇꠦꠘꠣꠘ ꠖꠦꠡꠅꠃ ꠞꠁꠟꠣ, ꠔꠣꠘ ꠛꠣꠚꠅ ꠢꠘꠅ ꠝꠥꠍꠣꠚꠤꠞ ꠅꠁꠀ ꠀꠍꠟꠣ। 2 ꠅꠃ ꠅꠁꠟ ꠁꠀꠇꠥꠛꠞ ꠈꠣꠘ꠆ꠖꠣꠘꠞ ꠛꠄꠀꠘ। ꠁꠃꠍꠥꠚꠦ ꠡꠔꠞ ꠛꠞꠍ ꠛꠄꠅꠡ ꠕꠘꠦ ꠔꠣꠘ ꠜꠣꠁꠀꠁꠘ꠆ꠔꠞ ꠟꠉꠦ ꠝꠦꠠꠣ-ꠍꠣꠉꠟ ꠞꠣꠈꠔꠣ। ꠔꠣꠁꠘ ꠢꠥꠞꠥꠝꠣꠘ ꠕꠘꠦꠃ ꠔꠣꠘ ꠢꠣꠔꠘ ꠝꠣ ꠛꠤꠟꠢꠣ ꠀꠞ ꠎꠤꠟꠙꠣꠞ ꠙꠥꠀꠂꠘ꠆ꠔꠞ ꠟꠉꠦ ꠞꠁꠔꠣ। ꠀꠞ ꠄꠞꠣꠞ ꠢꠇꠟ ꠛꠣꠖ ꠌꠣꠟ-ꠌꠟꠘꠞ ꠈꠛꠞ ꠛꠣꠚꠞꠦ ꠎꠣꠘꠣꠁꠔꠣ। 3 ꠁꠃꠍꠥꠚ, ꠁꠍꠞꠣꠁꠟꠞ ꠛꠥꠠꠣ ꠛꠄꠅꠡꠞ ꠙꠥꠀ ꠉꠔꠤꠇꠦ, ꠔꠣꠁꠘ ꠄꠞꠦ ꠢꠇꠟ ꠕꠘꠦ ꠛꠦꠡꠤ ꠝꠣꠄꠀ ꠇꠞꠔꠣ। ꠔꠣꠁꠘ ꠄꠞꠦ ꠄꠇ ꠈꠣꠘ꠆ꠖꠣꠘꠤ ꠎꠥꠛ꠆ꠛꠣ ꠛꠣꠘꠣꠁ ꠖꠤꠟꠣ। 4 ꠛꠣꠚꠦ ꠁꠃꠍꠥꠚꠞꠦ ꠢꠇꠟ ꠕꠘꠦ ꠛꠦꠡꠤ ꠝꠣꠄꠀ ꠇꠞꠂꠘ ꠖꠦꠈꠤꠀ, ꠜꠣꠁꠀꠁꠘ꠆ꠔꠦ ꠔꠣꠘꠞꠦ ꠊꠤꠘ꠆ꠘꠣꠁꠔꠣ। ꠔꠣꠞꠣ ꠄꠘ ꠟꠉꠦ ꠜꠣꠟꠣ ꠝꠘꠦ ꠝꠣꠔ-ꠇꠕꠣꠅ ꠝꠣꠔꠔꠣ ꠘꠣ।

5 ꠁꠃꠍꠥꠚꠦ ꠄꠇ ꠈꠥꠀꠛ ꠖꠦꠈꠤꠀ ꠔꠣꠘ ꠜꠣꠁꠀꠁꠘ꠆ꠔꠞꠦ ꠢꠥꠘꠣꠁꠟꠣ, ꠔꠦꠃ ꠔꠣꠞꠣ ꠀꠞꠅ ꠛꠦꠡꠤ ꠊꠤꠘ꠆ꠘꠣꠁꠟꠣ। 6 ꠔꠣꠁꠘ ꠇꠁꠟꠣ, “ꠀꠝꠤ ꠈꠥꠀꠛꠦ ꠇꠤꠔꠣ ꠖꠦꠈꠍꠤ ꠢꠥꠘꠅ: 7 ꠀꠝꠤ ꠖꠦꠈꠟꠣꠝ, ꠀꠝꠞꠣ ꠈꠦꠔꠞ ꠝꠣꠎꠦ ꠗꠣꠘꠞ ꠝꠥꠁꠐ ꠛꠣꠘ꠆ꠖꠤꠀꠞ ꠀꠞ ꠀꠝꠣꠞ ꠛꠣꠘ꠆ꠖꠣ ꠝꠥꠁꠐꠈꠣꠘ ꠃꠛꠣꠁꠉꠦꠟ, ꠔꠦꠃ ꠔꠥꠝꠞꠣꠞ ꠝꠥꠁꠐ ꠅꠇꠟꠦ ꠀꠝꠣꠞ ꠝꠥꠁꠐꠞꠦ ꠌꠣꠁꠞꠅꠛꠣꠄ ꠛꠦꠞꠤꠀ ꠍꠁꠎꠖꠣ ꠇꠞꠦꠞ।” 8 ꠅꠃ ꠔꠣꠘ ꠜꠣꠁꠀꠁꠘ꠆ꠔꠦ ꠇꠁꠟꠣ, “ꠔꠥꠁ ꠢꠣꠍꠣꠃ ꠀꠝꠞꠣꠞ ꠞꠣꠎꠣ ꠅꠁꠔꠦ ꠌꠣꠁꠞꠦ ꠘꠤ? ꠔꠥꠁ ꠞꠣꠎꠣ ꠅꠁꠀ ꠀꠝꠞꠣꠞ ꠃꠙꠞꠦ ꠛꠦꠐꠣꠉꠤꠞꠤ ꠇꠞꠔꠦ ꠘꠤ?” ꠔꠦꠃ ꠔꠣꠘ ꠈꠥꠀꠛ ꠀꠞ ꠔꠣꠘ ꠝꠣꠔꠞ ꠟꠣꠉꠤ ꠔꠣꠞꠣ ꠀꠞꠅ ꠛꠦꠡꠤ ꠊꠤꠘ꠆ꠘꠣꠁꠟꠣ।

9 ꠁꠃꠍꠥꠚꠦ ꠢꠤꠞꠛꠣꠞ ꠄꠇ ꠈꠥꠀꠛ ꠖꠦꠈꠤꠀ ꠔꠣꠘ ꠜꠣꠁꠀꠁꠘ꠆ꠔꠞꠦ ꠢꠥꠘꠣꠁꠟꠣ। ꠔꠣꠁꠘ ꠇꠁꠟꠣ, “ꠢꠥꠘꠅ, ꠀꠝꠤ ꠢꠤꠞꠛꠣꠞ ꠈꠥꠀꠛꠦ ꠖꠦꠈꠍꠤ, ꠌꠣꠘ-ꠡꠥꠞꠥꠎ ꠀꠞ ꠄꠉꠣꠞꠅꠐꠣ ꠔꠦꠞꠣꠄ ꠀꠝꠣꠞꠦ ꠍꠁꠎꠖꠣ ꠇꠞꠦꠞ।” 10 ꠔꠣꠁꠘ ꠁ ꠈꠥꠀꠛꠞ ꠇꠕꠣ ꠔꠣꠘ ꠛꠣꠚ ꠀꠞ ꠜꠣꠁꠀꠁꠘ꠆ꠔꠞ ꠉꠦꠍꠦ ꠇꠁꠀ ꠢꠣꠞꠟꠦ, ꠛꠣꠚꠦ ꠔꠣꠘꠞꠦ ꠗꠝꠇꠣꠁꠀ ꠇꠁꠟꠣ, “ꠔꠥꠁꠘ ꠁꠔꠣ ꠇꠥꠘ ꠎꠣꠔꠞ ꠈꠥꠀꠛ ꠖꠦꠈꠟꠦ, ꠞꠦ ꠙꠥꠔ? ꠔꠞ ꠝꠣ-ꠜꠣꠁꠀꠁꠘ ꠀꠞ ꠀꠝꠤꠅ ꠇꠤꠔꠣ ꠢꠣꠍꠣꠃ ꠔꠞꠦ ꠍꠁꠎꠖꠣ ꠇꠞꠔꠣꠝ ꠘꠤ?” 11 ꠀꠞ ꠁꠃꠍꠥꠚꠞꠦ ꠔꠣꠘ ꠜꠣꠁꠀꠁꠘ꠆ꠔꠦ ꠈꠥꠛ ꠁꠋꠡꠣꠁꠔꠣ। ꠅꠁꠟꠦ ꠛꠣꠚꠦ ꠁ ꠈꠥꠀꠛꠞ ꠇꠕꠣ ꠝꠘꠅ ꠞꠣꠈꠟꠣ।

12 ꠀꠞ ꠔꠣꠘ ꠜꠣꠁꠀꠁꠘ꠆ꠔꠦ ꠛꠣꠚꠞ ꠙꠡꠥꠞ ꠙꠣꠟ ꠟꠁꠀ ꠡꠤꠈꠤꠝꠅ ꠞꠣꠈꠣꠔ ꠉꠦꠟꠣ। 13 ꠔꠦꠃ ꠁꠍꠞꠣꠁꠟꠦ ꠁꠃꠍꠥꠚꠞꠦ ꠇꠁꠟꠣ, “ꠔꠞ ꠜꠣꠁꠀꠁꠘ꠆ꠔꠦ ꠙꠡꠥꠞ ꠙꠣꠟ ꠞꠣꠈꠣꠔ ꠡꠤꠈꠤꠝꠅ ꠉꠦꠍꠂꠘ, ꠔꠦ ꠀꠄ, ꠀꠝꠤ ꠔꠞꠦꠅ ꠢꠘꠅ ꠙꠣꠑꠣꠁ।” ꠔꠣꠁꠘ ꠇꠁꠟꠣ, “ꠀꠁꠌ꠆ꠍꠣ, ꠀꠝꠤ ꠎꠣꠁꠝꠥ।” 14 ꠁꠍꠞꠣꠁꠟꠦ ꠔꠣꠘꠦ ꠇꠁꠟꠣ, “ꠔꠥꠁ ꠉꠤꠀ ꠔꠞ ꠜꠣꠁꠀꠁꠘ ꠀꠞ ꠙꠡꠥꠞ ꠙꠣꠟꠞ ꠈꠛꠞ-ꠀꠘ꠆ꠔꠞ ꠢꠥꠘꠤꠀ ꠀꠁꠀ ꠀꠝꠣꠞꠦ ꠇꠁꠍ।” ꠔꠦꠃ ꠔꠣꠁꠘ ꠁꠃꠍꠥꠚꠞꠦ ꠢꠦꠛꠞꠘ ꠕꠘꠦ ꠡꠤꠈꠤꠝꠅ ꠙꠣꠑꠣꠁꠟꠣ। ꠀꠞ ꠁꠃꠍꠥꠚꠅ ꠉꠤꠀ ꠡꠤꠈꠤꠝꠅ ꠀꠎꠤꠞ ꠅꠁꠟꠣ।

15 ꠀꠁꠀ ꠢꠣꠞꠟꠦ ꠔꠣꠘꠞꠦ ꠈꠦꠔꠞ ꠝꠣꠎꠦ ꠊꠥꠞꠣ-ꠚꠤꠞꠣꠔ ꠖꠦꠈꠤꠀ ꠄꠇ ꠛꠦꠐꠣꠄ ꠎꠤꠇꠣꠁꠟꠣ, “ꠔꠥꠝꠤ ꠇꠤꠔꠣ ꠔꠥꠇꠣꠁꠞꠣꠄ ꠛꠣ?” 16 ꠁꠃꠍꠥꠚꠦ ꠇꠁꠟꠣ, “ꠀꠝꠤ ꠀꠝꠣꠞ ꠜꠣꠁꠀꠁꠘ꠆ꠔꠞꠦ ꠔꠥꠇꠣꠁꠀꠞ। ꠀꠙꠘꠦ ꠎꠣꠘꠂꠘ ꠘꠤ, ꠄꠞꠣ ꠙꠡꠥꠞ ꠙꠣꠟ ꠇꠥꠘ ꠎꠣꠉꠣꠔ ꠞꠣꠈꠞꠣ?” 17 ꠢꠤ ꠛꠦꠐꠣꠄ ꠇꠁꠟꠣ, “ꠔꠣꠞꠣ ꠁꠘ ꠕꠘꠦ ꠉꠦꠍꠂꠘꠉꠤ। ꠀꠝꠤ ꠢꠥꠘꠍꠤ ꠔꠣꠞꠣ ꠝꠣꠔꠤꠞꠣ, ꠀꠅ, ꠀꠝꠞꠣ ꠖꠥꠕꠘꠅ ꠎꠣꠁꠉꠤ।” ꠅꠃ ꠁꠃꠍꠥꠚꠦ ꠔꠥꠇꠣꠁ ꠔꠥꠇꠣꠁ ꠖꠥꠕꠘꠅ ꠉꠤꠀ ꠔꠣꠞꠣꠞꠦ ꠙꠣꠁꠟꠣ। 18 ꠜꠣꠁꠀꠁꠘ꠆ꠔꠦ ꠖꠥꠞꠁ ꠕꠘꠦ ꠔꠣꠘꠞꠦ ꠖꠦꠈꠟ, ꠀꠞ ꠔꠣꠞꠣꠞ ꠉꠦꠍꠦ ꠙꠃꠍꠣꠞ ꠀꠉꠦꠃ ꠔꠣꠞꠣ ꠄꠘꠦ ꠈꠥꠘ ꠇꠞꠣꠞ ꠝꠔꠟꠛ ꠇꠞꠟ। 19 ꠔꠣꠞꠣ ꠄꠇꠎꠘꠦ ꠀꠞꠇ ꠎꠘꠞꠦ ꠇꠁꠟ, “ꠅꠃ ꠖꠦꠈꠅ, ꠈꠥꠀꠛ ꠖꠦꠈꠞꠣ ꠍꠣꠛ ꠀꠁꠞꠣ। 20 ꠀꠅ, ꠅꠈꠘꠃ ꠀꠝꠞꠣ ꠄꠘꠦ ꠈꠔꠝ ꠇꠞꠤꠀ ꠅꠃ ꠉꠣꠔꠅ ꠚꠣꠟꠣꠁ ꠖꠦꠁ; ꠛꠣꠖꠦ ꠇꠁꠝꠥ, ꠇꠥꠘꠥ ꠎꠋꠟꠤ ꠎꠣꠘꠥꠀꠞꠦ ꠈꠣꠁꠟꠣꠁꠍꠦ, ꠢꠦꠡꠦ ꠖꠦꠈꠝꠥꠘꠦ, ꠔꠣꠞ ꠈꠥꠀꠛꠞ ꠖꠡꠣ ꠇꠤꠔꠣ ꠅꠄ?” 21 ꠅꠁꠟꠦ ꠞꠥꠛꠦꠘꠦ ꠁꠔꠣ ꠢꠥꠘꠤꠀ ꠔꠣꠞꠣꠞ ꠀꠔ ꠕꠣꠇꠤ ꠄꠘꠞꠦ ꠛꠣꠌꠣꠁꠛꠣꠞ ꠟꠣꠉꠤ ꠇꠁꠟꠣ, “ꠔꠣꠞꠦ ꠎꠣꠘꠦ ꠝꠣꠞꠤꠅ ꠘꠣ।” 22 ꠔꠣꠁꠘ ꠄꠞꠣꠞꠦ ꠙꠞꠣꠝꠤꠡ ꠖꠤꠟꠣ, “ꠈꠥꠘ-ꠈꠣꠞꠣꠙꠤ ꠇꠞꠣꠔ ꠎꠣꠁꠅ ꠘꠣ, ꠘꠤꠎꠞ ꠀꠔꠦ ꠘꠣ ꠝꠣꠞꠤꠀ ꠅꠉꠥꠞꠦ ꠄꠝꠘꠦꠃ ꠉꠣꠔꠞ ꠝꠣꠎꠦ ꠚꠣꠟꠣꠁ ꠖꠦꠅ।” ꠅꠃꠟꠣ ꠔꠣꠁꠘ ꠁꠃꠍꠥꠚꠞꠦ ꠔꠣꠞꠣꠞ ꠀꠔ ꠕꠘꠦ ꠛꠣꠌꠣꠁꠀ, ꠛꠣꠚꠞ ꠀꠔꠅ ꠙꠣꠑꠣꠘꠤꠞ ꠌꠦꠡ꠆ꠐꠣ ꠇꠞꠟꠣ। 23 ꠁꠃꠍꠥꠚ ꠔꠣꠘ ꠜꠣꠁꠀꠁꠘ꠆ꠔꠞ ꠉꠦꠍꠦ ꠀꠁꠔꠦꠃ ꠔꠣꠞꠣ, ꠔꠣꠘ ꠉꠔꠞ ꠕꠘꠦ ꠎꠥꠛ꠆ꠛꠣ ꠈꠥꠟꠤꠟꠣꠁꠟꠣ, ꠢꠃ ꠈꠣꠘ꠆ꠖꠣꠘꠤ ꠎꠥꠛ꠆ꠛꠣꠐꠣ ꠐꠣꠘꠤꠀ ꠈꠥꠟꠤꠟꠤꠟꠣ। 24 ꠀꠞ ꠔꠣꠘꠦ ꠗꠞꠤꠀ ꠉꠣꠔꠞ ꠝꠣꠎꠦ ꠚꠣꠟꠣꠁ ꠖꠤꠟꠣ। ꠁ ꠉꠣꠔ ꠢꠥꠇꠘꠣ ꠀꠍꠤꠟ, ꠇꠥꠘꠥ ꠙꠣꠘꠤ ꠀꠍꠤꠟ ꠘꠣ।

25 ꠢꠦꠡꠦ ꠔꠣꠞꠣ ꠈꠣꠅꠀꠔ ꠛꠁꠀ ꠌꠣꠁꠀ ꠖꠦꠈꠟꠣ, ꠉꠤꠟꠤꠅꠖ ꠕꠣꠇꠤ ꠁꠍꠝꠣꠁꠟꠤ ꠄꠇ ꠛꠦꠙꠣꠞꠤꠞ ꠖꠟ ꠁꠛꠣꠄ ꠀꠞ। ꠄꠞꠣ ꠃꠐꠞ ꠙꠤꠑꠤꠔ ꠇꠞꠤ ꠈꠥꠡꠛꠄ ꠝꠡꠟꠣ, ꠀꠉꠞ, ꠀꠞ ꠝꠦꠡꠇꠦ-ꠀꠝ꠆ꠛꠞ ꠟꠁꠀ ꠝꠤꠡꠞ ꠖꠦꠡꠅ ꠎꠣꠁꠔꠣ। 26 ꠅꠃ ꠄꠢꠥꠖꠣꠄ ꠔꠣꠞ ꠜꠣꠁꠀꠁꠘꠞꠦ ꠇꠁꠟ, “ꠗꠞꠅ, ꠜꠣꠁꠞꠦ ꠈꠥꠘ ꠇꠞꠤꠀ ꠀꠝꠞꠣ ꠟꠥꠇꠣꠁꠟꠤꠟꠣꠝ, ꠔꠦꠃ ꠀꠝꠞꠣꠞ ꠇꠤꠔꠣ ꠟꠣꠜ ꠅꠁꠛ? 27 ꠢꠦ ꠔ ꠀꠝꠞꠣꠞꠃ ꠜꠣꠁ, ꠀꠝꠞꠣꠞ ꠀꠙꠘ ꠟꠃ ꠀꠞ ꠉꠥꠡ꠆ꠔ। ꠔꠦ ꠔꠣꠞ ꠡꠞꠤꠟꠅ ꠀꠔ ꠘꠣ ꠖꠤꠀ ꠀꠅ, ꠁꠍꠝꠣꠁꠟꠤ ꠅꠇꠟꠞ ꠉꠦꠍꠦ ꠔꠣꠞꠦ ꠛꠦꠌꠤꠟꠣꠁ।” ꠅꠃ ꠜꠣꠁꠀꠁꠘꠅ ꠞꠣꠎꠤ ꠅꠁꠉꠦꠟꠣ। 28 ꠢꠃ ꠝꠣꠖꠤꠀꠘꠤ ꠛꠦꠙꠣꠞꠤ ꠅꠇꠟ ꠇꠣꠍꠣꠔ ꠀꠁꠔꠦꠃ, ꠜꠣꠁꠀꠁꠘ꠆ꠔꠦ ꠁꠃꠍꠥꠚꠞꠦ ꠉꠣꠔꠅ ꠕꠘꠦ ꠐꠣꠘꠤꠀ ꠔꠥꠟꠟꠣ ꠀꠞ ꠄꠇ ꠇꠥꠠꠤ ꠞꠥꠙꠣꠞ ꠐꠦꠇꠣꠞ ꠛꠖꠟꠣ, ꠁꠍꠝꠣꠁꠟꠤ ꠅꠇꠟꠞ ꠉꠦꠍꠦ ꠔꠣꠘꠦ ꠛꠦꠌꠤꠟꠣꠁꠟꠣ। ꠄꠞꠣ ꠁꠃꠍꠥꠚꠞꠦ ꠟꠁꠀ ꠝꠤꠡꠞꠅ ꠉꠦꠟꠣꠉꠤ।

29 ꠛꠣꠖꠦ ꠞꠥꠛꠦꠘꠦ ꠢꠃ ꠉꠣꠔꠞ ꠉꠦꠍꠦ ꠀꠁꠀ ꠁꠃꠍꠥꠚꠞꠦ ꠘꠣ ꠖꠦꠈꠤꠀ, ꠔꠣꠘ ꠉꠔꠞꠞ ꠇꠥꠞ꠆ꠔꠣ ꠚꠣꠞꠤꠟ꠆ꠟꠣ। 30 ꠜꠣꠁꠀꠁꠘ꠆ꠔꠞ ꠉꠦꠍꠦ ꠉꠤꠀ ꠇꠁꠟꠣ, “ꠙꠥꠀꠉꠥ ꠔ ꠁꠘꠅ ꠘꠣꠄ। ꠅꠈꠘ ꠀꠝꠤ ꠇꠤꠔꠣ ꠇꠞꠔꠣꠝ?” 31 ꠅꠃ ꠔꠣꠞꠣ ꠄꠇ ꠛꠇꠞꠤ ꠝꠣꠞꠤꠀ, ꠄꠞ ꠟꠃ ꠁꠃꠍꠥꠚꠞ ꠢꠃ ꠎꠥꠛ꠆ꠛꠣꠔ ꠟꠣꠉꠣꠁꠟꠣ। 32 ꠛꠣꠖꠦ ꠝꠣꠘꠥꠡꠖꠤ ꠅꠃ ꠎꠥꠛ꠆ꠛꠣ ꠔꠣꠞꠣꠞ ꠛꠣꠚꠞ ꠉꠦꠍꠦ ꠙꠣꠑꠣꠁꠀ ꠇꠁꠟꠣ, “ꠁꠐꠣ ꠀꠝꠞꠣ ꠙꠕꠅ ꠙꠣꠁꠍꠤ, ꠔꠦ ꠀꠙꠘꠦ ꠜꠣꠟꠣ ꠇꠞꠤꠀ ꠖꠦꠈꠃꠇ꠆ꠇꠣ, ꠁꠐꠣ ꠀꠙꠘꠣꠞ ꠙꠥꠀꠞ ꠎꠥꠛ꠆ꠛꠣ ꠘꠤ?” 33 ꠁꠀꠇꠥꠛꠦ ꠁ ꠎꠥꠛ꠆ꠛꠣ ꠌꠤꠘꠤꠀ ꠇꠁꠟꠣ, “ꠁꠐꠣ ꠔ ꠀꠝꠣꠞ ꠙꠥꠀꠞꠃ। ꠔꠣꠞꠦ ꠇꠥꠘꠥ ꠎꠋꠟꠤ ꠎꠣꠘꠥꠀꠞꠦ ꠈꠣꠁꠟꠤꠍꠦ, ꠔꠣꠞꠦ ꠘꠤꠌꠄ ꠍꠤꠠꠤ-ꠛꠤꠠꠤꠟꠣꠁꠍꠦ।” 34 ꠔꠣꠁꠘ ꠚꠤꠘ꠆ꠘꠞ ꠇꠣꠙꠠ ꠍꠤꠠꠤꠀ, ꠇꠝꠞꠅ ꠍꠟꠣꠞ ꠌꠐ ꠛꠣꠘ꠆ꠖꠤꠀ, ꠙꠥꠀꠞ ꠟꠣꠉꠤ ꠛꠃꠔ ꠖꠤꠘ ꠝꠣꠔ꠆ꠔꠝ ꠇꠞꠟꠣ। 35 ꠔꠣꠘ ꠢꠇꠟ ꠙꠥꠀ-ꠙꠥꠠꠤꠄ ꠔꠣꠘꠦ ꠛꠥꠎꠣꠁꠔꠣ ꠌꠣꠁꠟꠣ, ꠅꠁꠟꠦ ꠇꠥꠘꠥ ꠛꠥꠎꠦꠃ ꠔꠣꠘ ꠛꠥꠇ ꠑꠣꠘ꠆ꠒꠣ ꠅꠁꠟ ꠘꠣ। ꠔꠣꠁꠘ ꠇꠁꠟꠣ, “ꠀꠝꠤ ꠝꠣꠔ꠆ꠔꠝ ꠇꠞꠤ ꠇꠞꠤ ꠀꠝꠣꠞ ꠙꠥꠀꠞ ꠉꠦꠍꠦ ꠇꠄꠛꠞꠅ ꠢꠣꠝꠣꠁꠝꠥ।” ꠙꠥꠀꠞ ꠟꠣꠉꠤ ꠔꠣꠁꠘ ꠅꠃ ꠟꠣꠈꠣꠘ ꠇꠣꠘ꠆ꠖꠣ-ꠇꠣꠐꠤꠔ ꠞꠁꠟꠣ। 36 ꠄꠞ ꠝꠣꠎꠦ ꠝꠣꠖꠤꠀꠘꠤ ꠅꠇꠟꠦ ꠁꠃꠍꠥꠚꠞꠦ ꠝꠤꠡꠞꠅ ꠘꠤꠀ, ꠚꠦꠞꠣꠃꠘꠞ ꠇꠞ꠆ꠝꠌꠣꠞꠤ ꠀꠎꠤꠎꠞ*37:36 ꠝꠥꠟ ꠢꠤꠛ꠆ꠞꠥ ꠜꠣꠡꠣꠄ ꠅꠃ ꠀꠎꠤꠎꠞ ꠘꠣꠝ ꠙꠥꠐꠤꠚꠞ। ꠉꠦꠍꠦ ꠛꠦꠌꠤꠟꠣꠁꠟꠣ, ꠁ ꠇꠞ꠆ꠝꠌꠣꠞꠤ ꠀꠍꠟꠣ ꠔꠣꠘ ꠙꠞꠗꠣꠘ ꠉꠣꠒ।