1 ꠔꠥꠝꠞꠣꠞ ꠝꠣꠎꠦ ꠇꠥꠀꠁ ꠕꠘꠦ ꠝꠣꠁꠞ-ꠖꠞꠛꠣꠞ ꠀꠞ ꠇꠣꠁꠎ꠆ꠎꠣ ꠙꠄꠖꠣ ꠅꠄ? ꠔꠥꠝꠞꠣꠞ ꠡꠥꠈꠞ ꠈꠣꠁꠡꠦ ꠡꠞꠤꠟꠞ ꠎꠦ ꠞꠤꠙꠥꠄ ꠟꠣꠠꠣꠁ ꠇꠞꠦ, ꠅꠉꠥ ꠕꠣꠇꠤꠃ ꠀꠄ। 2 ꠎꠦꠔꠣ ꠔꠥꠝꠞꠣꠞ ꠘꠣꠄ, ꠅꠔꠣ ꠔꠥꠝꠞꠣ ꠝꠘꠦ ꠝꠘꠦ ꠌꠣꠅ, ꠄꠞꠟꠣꠉꠤ ꠔꠥꠝꠞꠣ ꠈꠥꠘ ꠇꠞ। ꠀꠞ ꠟꠣꠟꠌ ꠇꠞ ꠅꠁꠟꠦ ꠙꠣꠅ ꠘꠣ, ꠄꠞꠖꠣꠄ ꠔꠥꠝꠞꠣ ꠝꠣꠁꠞ-ꠖꠞꠛꠣꠞ ꠀꠞ ꠇꠣꠁꠎ꠆ꠎꠣ ꠇꠞ। ꠔꠥꠝꠞꠣ ꠔ ꠌꠣꠅ ꠘꠣ, ꠄꠞꠖꠣꠄ ꠙꠣꠅ ꠘꠣ। 3 ꠀꠞ ꠌꠣꠁꠟꠦꠅ ꠙꠣꠅ ꠘꠣ, ꠇꠣꠞꠘ ꠔꠥꠝꠞꠣ ꠔ ꠛꠖ ꠘꠤꠅꠔꠦ ꠌꠣꠅ, ꠎꠦꠟꠣ ꠔꠥꠝꠞꠣꠞ ꠝꠘꠞ ꠈꠣꠁꠡ ꠙꠥꠞꠣ ꠅꠄ।

4 ꠅ ꠛꠦꠁꠝꠣꠘ ꠅꠇꠟ, ꠔꠥꠝꠞꠣ ꠇꠤꠔꠣ ꠎꠣꠘ ꠘꠣ ꠘꠤ, ꠖꠥꠘꠤꠀꠞ ꠟꠉꠦ ꠖꠥꠡ꠆ꠔꠤꠞ ꠝꠣꠘꠤ ꠀꠟ꠆ꠟꠣꠞ ꠟꠉꠦ ꠖꠥꠡꠝꠘꠤ? ꠎꠦ ꠖꠥꠘꠤꠀꠞ ꠝꠣꠄꠀꠄ ꠛꠥꠠꠤ ꠎꠣꠄ, ꠢꠦ ꠀꠟ꠆ꠟꠣꠞ ꠖꠥꠡꠝꠘ ꠅꠁꠎꠣꠄ। 5 “ꠀꠝꠞꠣꠞ ꠜꠤꠔꠞꠦ ꠎꠦ ꠞꠥꠢꠥ ꠖꠦꠅꠀ ꠅꠁꠍꠦ, ꠁꠇꠐꠣꠄ ꠀꠝꠞꠣꠞꠦ ꠁꠋꠡꠣꠞ ꠛꠣꠄ ꠐꠣꠘꠦ।” ꠙꠣꠇ ꠇꠤꠔꠣꠛꠞ ꠅꠃ ꠔꠣꠟꠤꠝ ꠇꠥꠘꠥ ꠄꠝꠘꠦ ꠛꠣꠔꠣꠁꠟ ꠅꠁꠍꠦ ꠘꠤ? 6 ꠅꠁꠟꠦ ꠁꠔꠣ ꠕꠣꠇꠤ ꠀꠝꠞꠣꠞ ꠃꠙꠞꠦ ꠀꠟ꠆ꠟꠣꠞ ꠞꠢꠝꠔ ꠀꠞꠅ ꠛꠦꠡꠤ। ꠄꠞꠟꠣꠉꠤ ꠇꠤꠔꠣꠛꠞ ꠝꠣꠎꠦ ꠟꠦꠈꠣ ꠀꠍꠦ, “ꠛꠠꠣꠁ ꠇꠞꠞꠣꠞ ꠃꠙꠞꠦ ꠀꠟ꠆ꠟꠣꠄ ꠀꠔ ꠔꠥꠟꠂꠘ, ꠅꠁꠟꠦ ꠘꠞꠝ ꠝꠣꠘꠡꠞꠦ ꠞꠢꠝ ꠇꠞꠂꠘ।” 7 ꠉꠔꠤꠇꠦ ꠔꠥꠝꠞꠣ ꠀꠟ꠆ꠟꠣꠞ ꠎꠤꠝ꠆ꠝꠣꠄ ꠞꠁꠀ ꠡꠄꠔꠣꠘꠞ ꠝꠥꠇꠣꠛꠤꠟꠣ ꠇꠞꠅ, ꠔꠦꠃ ꠢꠦ ꠔꠥꠝꠞꠣꠞ ꠉꠦꠍ ꠕꠘꠦ ꠜꠣꠉꠤꠛ। 8 ꠀꠟ꠆ꠟꠣꠞ ꠛꠣꠄ ꠌꠣꠅ, ꠔꠦꠃ ꠔꠣꠁꠘꠅ ꠔꠥꠝꠞꠣꠞ ꠛꠣꠄ ꠌꠣꠁꠛꠣ। ꠅ ꠉꠥꠘꠣꠉꠣꠞ ꠅꠇꠟ, ꠔꠥꠝꠞꠣ ꠘꠤꠎꠞꠦ ꠙꠣꠇ-ꠍꠣꠚ ꠇꠞꠅ, ꠅ ꠖꠥ-ꠖꠤꠟꠣ ꠝꠣꠘꠥꠡ, ꠔꠥꠝꠞꠣꠞ ꠖꠤꠟ ꠈꠣꠐꠤ ꠇꠞꠅ। 9 ꠖꠥꠈꠦ ꠇꠣꠔꠞ ꠅꠁꠀ ꠀꠢꠣꠎꠣꠞꠤ ꠇꠞꠅ, ꠀꠡꠤꠞ ꠛꠖꠟꠣ ꠇꠣꠘ꠆ꠖꠅ, ꠈꠥꠡꠤꠞ ꠛꠖꠟꠣ ꠝꠣꠔ꠆ꠔꠝ ꠇꠞꠅ। 10 ꠝꠣꠛꠥꠖꠞ ꠖꠞꠛꠣꠞꠅ ꠘꠔ ꠅꠅ, ꠔꠦꠃ ꠔꠣꠁꠘ ꠔꠥꠝꠞꠣꠞꠦ ꠃꠌꠣ ꠇꠞꠛꠣ।

11 ꠅ ꠜꠣꠁ ꠅꠇꠟ, ꠔꠥꠝꠞꠣ ꠄꠇꠎꠘꠦ ꠀꠞꠇ ꠎꠘꠞ ꠉꠤꠛꠔ ꠉꠣꠁꠅ ꠘꠣ। ꠇꠦꠃ ꠎꠥꠖꠤ ꠜꠣꠁꠞ ꠛꠖꠘꠣꠝ ꠉꠣꠄ ꠛꠣ ꠔꠣꠞ ꠛꠤꠌꠣꠞ ꠇꠞꠦ, ꠄꠞ ꠝꠣꠘꠤ ꠢꠦ ꠡꠞꠤꠅꠔꠞ ꠛꠖꠘꠣꠝ ꠇꠞꠟ ꠀꠞ ꠡꠞꠤꠅꠔꠞ ꠛꠤꠌꠣꠞ ꠇꠞꠟ। ꠔꠥꠝꠤ ꠎꠥꠖꠤ ꠡꠞꠤꠅꠔꠞ ꠛꠤꠌꠣꠞ ꠇꠞ, ꠔꠦ ꠔ ꠡꠞꠤꠅꠔ ꠝꠣꠘꠞꠣꠄ ꠘꠣ, ꠃꠟꠐꠣ ꠔꠣꠞ ꠛꠤꠌꠣꠞ ꠇꠞꠣꠔ ꠈꠣꠠꠣ ꠅꠁꠍ। 12 ꠡꠞꠤꠅꠔ ꠀꠞ ꠛꠤꠌꠣꠞꠞ ꠈꠦꠝꠔꠣ ꠈꠣꠟꠤ ꠄꠇꠎꠘꠞ ꠀꠔꠅꠃ ꠀꠍꠦ। ꠔꠣꠁꠘꠃ ꠛꠣꠌꠣꠁꠘ, ꠔꠣꠁꠘꠃ ꠝꠣꠞꠂꠘ। ꠔꠦ ꠀꠞꠤ-ꠚꠞꠤꠞ ꠛꠤꠌꠣꠞ ꠇꠞꠞꠣ ꠔꠥꠝꠤ ꠀꠞꠇ ꠎꠘ ꠇꠦ?

13 ꠢꠥꠘꠅ, ꠔꠥꠝꠞꠣ ꠎꠣꠞꠣ ꠇꠅ, ꠀꠁꠎ ꠛꠣ ꠇꠣꠁꠟ ꠀꠝꠞꠣ ꠅꠝꠥꠇ ꠐꠣꠃꠘꠅ ꠎꠣꠁꠝꠥꠉꠤ, ꠉꠤꠀ ꠢꠘꠅ ꠄꠇ ꠛꠞꠍ ꠞꠁꠀ ꠇꠣꠄ-ꠇꠣꠞꠛꠣꠞ ꠇꠞꠤꠀ ꠟꠣꠜ ꠇꠞꠝꠥ। 14 ꠅꠁꠟꠦ ꠇꠣꠁꠟꠇꠥꠞ ꠈꠛꠞ ꠔ ꠔꠥꠝꠞꠣ ꠎꠣꠘ ꠘꠣ। ꠔꠥꠝꠞꠣꠞ ꠎꠤꠘ꠆ꠖꠦꠉꠤꠃ ꠛꠣ ꠇꠤꠔꠣ? ꠔꠥꠝꠞꠣꠞ ꠎꠤꠘ꠆ꠖꠦꠉꠤ ꠔ ꠇꠍꠥ ꠙꠣꠔꠣꠞ ꠙꠣꠘꠤ, ꠕꠥꠠꠣ ꠡꠝꠄ ꠕꠣꠇꠦ, ꠛꠣꠖꠦ ꠙꠠꠤꠎꠣꠄ। 15 ꠄꠞꠖꠣꠄ ꠁꠟꠣ ꠘꠣ ꠇꠁꠀ ꠅꠟꠣ ꠇꠅ, “ꠁꠘꠡꠣꠟ꠆ꠟꠣ, ꠀꠝꠞꠣ ꠢꠣꠄꠀꠔꠤ ꠙꠣꠁꠝꠥ, ꠀꠞ ꠅꠔꠣ-ꠢꠔꠣ ꠇꠞꠝꠥ।” 16 ꠅꠁꠟꠦ ꠔꠥꠝꠞꠣ ꠔ ꠛꠠꠣꠁ ꠇꠞꠤꠀ ꠚꠥꠐꠣꠘꠤ ꠖꠦꠈꠣꠁꠞꠣꠄ। ꠁꠟꠣꠈꠣꠘ ꠚꠥꠐꠣꠘꠤ ꠜꠣꠟꠣ ꠘꠣꠄ।

17 ꠇꠦꠃ ꠎꠥꠖꠤ ꠎꠣꠘꠤꠀꠅ ꠜꠣꠟꠣ ꠇꠣꠝ ꠘꠣ ꠇꠞꠦ, ꠔꠦ ꠢꠦ ꠉꠥꠘꠣꠞ ꠜꠣꠉꠤ ꠅꠁꠛ।