1 ꠅ ꠗꠘꠤ ꠅꠇꠟ, ꠢꠥꠘꠅ, ꠔꠥꠝꠞꠣꠞ ꠃꠙꠞꠦ ꠎꠦ ꠝꠍꠤꠛꠔ ꠀꠞ, ꠁꠔꠣꠞ ꠟꠣꠉꠤ ꠔꠥꠝꠞꠣ ꠇꠣꠘ꠆ꠖꠅ ꠀꠞ ꠀꠢꠣꠎꠣꠞꠤ ꠇꠞꠅ। 2 ꠔꠥꠝꠞꠣꠞ ꠗꠘ-ꠡꠝ꠆ꠙꠖ ꠛꠤꠘꠣꠡ ꠅꠁꠉꠦꠍꠦ, ꠔꠥꠝꠞꠣꠞ ꠇꠣꠙꠠ-ꠌꠥꠙꠠ ꠃꠘ꠆ꠖꠥꠞꠦ ꠇꠣꠐꠤꠟꠤꠍꠦ। 3 ꠔꠥꠝꠞꠣꠞ ꠡꠥꠘꠣ-ꠞꠥꠙꠣꠔ ꠎꠋꠉꠣꠞꠦ ꠗꠞꠤꠟꠤꠍꠦ, ꠁ ꠎꠋꠉꠣꠞꠦ ꠔꠥꠝꠞꠣꠞ ꠛꠤꠙꠇ꠆ꠇꠦ ꠡꠣꠇ꠆ꠇꠤ ꠖꠤꠛ, ꠀꠞ ꠀꠉꠥꠘꠤꠞ ꠟꠣꠈꠣꠘ ꠔꠥꠝꠞꠣꠞ ꠉꠥꠡ꠆ꠔ ꠈꠣꠁꠛ। ꠁꠔꠣ ꠔ ꠇꠤꠀꠝꠔꠞ ꠟꠣꠉꠤ ꠔꠥꠝꠞꠣ ꠖꠟꠣ ꠇꠞꠤ ꠕꠁꠍ। 4 ꠢꠥꠘꠅ, ꠔꠥꠝꠞꠣꠞ ꠗꠣꠘ ꠖꠣꠅꠞꠣ ꠇꠣꠝꠟꠣꠞ ꠎꠦ ꠛꠦꠔꠘ ꠀꠐꠇꠣꠁꠍ, ꠅꠃ ꠛꠦꠔꠘꠦ ꠅꠈꠘ ꠌꠤꠟ꠆ꠟꠣꠁꠀ ꠀꠢꠣꠎꠣꠞꠤ ꠇꠞꠦꠞ। ꠁ ꠇꠣꠝꠟꠣꠁꠘ꠆ꠔꠞ ꠀꠢꠣꠎꠣꠞꠤ ꠀꠟ꠆ꠟꠣ ꠞꠣꠛ꠆ꠛꠥꠟ ꠀꠟꠣꠝꠤꠘꠞ ꠇꠣꠘꠅ ꠉꠤꠀ ꠀꠎꠤꠍꠦ। 5 ꠖꠥꠘꠤꠀꠞ ꠛꠥꠇꠥꠔ ꠛꠤꠟꠣꠡꠤꠔꠣ ꠀꠞ ꠞꠋ-ꠔꠣꠝꠡꠣꠞ ꠝꠣꠎꠦ ꠔꠥꠝꠞꠣ ꠖꠤꠘ ꠇꠣꠐꠣꠁꠍ, ꠖꠥꠎꠈꠞ ꠈꠥꠞꠣꠇ ꠛꠘꠣꠞ ꠟꠣꠉꠤ ꠘꠤꠎꠞꠦ ꠈꠥꠛ ꠚꠥꠟꠚꠥꠟꠣ ꠛꠣꠘꠣꠁꠍ। 6 ꠔꠥꠝꠞꠣ ꠘꠤ-ꠅꠙꠞꠣꠗꠤꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠤꠀ ꠈꠥꠘ ꠇꠞꠍ, ꠅꠁꠟꠦ ꠄꠞꠣ ꠇꠥꠘꠥ ꠙ꠆ꠞꠔꠤꠛꠣꠖ ꠇꠞꠍꠦ ꠘꠣ।

7 ꠉꠔꠤꠇꠦ ꠅ ꠀꠝꠣꠞ ꠝꠣꠄꠀꠞ ꠜꠣꠁ ꠅꠇꠟ, ꠀꠝꠞꠣꠞ ꠝꠣꠟꠤꠇꠦ ꠔꠡꠞꠤꠚ ꠀꠘꠣꠞ ꠀꠉ ꠙꠞ꠆ꠎꠘ꠆ꠔ ꠔꠥꠝꠞꠣ ꠇꠡ꠆ꠐ ꠇꠞꠤꠀ ꠕꠥꠠꠣ ꠍꠛꠞ ꠇꠞꠅ। ꠔꠥꠝꠞꠣ ꠔ ꠖꠦꠈꠍ, ꠉꠤꠞꠡ꠆ꠔꠦ ꠜꠣꠟꠣ ꠚꠡꠟ ꠙꠣꠅꠀꠞ ꠟꠣꠉꠤ ꠝꠦꠊꠞ ꠀꠡꠣꠄ ꠇꠤꠟꠣ ꠍꠛꠞ ꠇꠞꠤ ꠛꠁ ꠞꠄ। 8 ꠔꠥꠝꠞꠣꠅ ꠅꠟꠣ ꠍꠛꠞ ꠇꠞꠅ, ꠅꠡ꠆ꠕꠤꠞ ꠅꠁꠅ ꠘꠣ, ꠇꠣꠞꠘ ꠝꠣꠟꠤꠇꠦ ꠈꠥꠛ ꠎꠟꠖꠤꠃ ꠔꠡꠞꠤꠚ ꠀꠘꠞꠣ। 9 ꠅ ꠜꠣꠁ ꠅꠇꠟ, ꠔꠥꠝꠞꠣ ꠎꠣꠔꠦ ꠀꠟ꠆ꠟꠣꠞ ꠘꠎꠞꠅ ꠖꠥꠡꠤ ꠘꠣ ꠛꠘ, ꠄꠞꠟꠣꠉꠤ ꠔꠥꠝꠞꠣ ꠈꠣꠟꠤ ꠄꠇꠎꠘꠦ ꠀꠞꠇꠎꠘꠞ ꠈꠥꠔ ꠔꠥꠇꠣꠘꠤꠔ ꠞꠁꠅ ꠘꠣ। ꠢꠥꠘꠅ, ꠛꠤꠌꠣꠞ ꠇꠞꠣꠞ ꠟꠣꠉꠤ ꠔ ꠀꠟ꠆ꠟꠣ ꠙꠣꠇ ꠀꠝꠞꠣꠞ ꠍꠣꠝꠘꠦ ꠀꠁꠀ ꠃꠛꠣꠁ ꠞꠁꠍꠂꠘ।

10 ꠅ ꠝꠣꠄꠀꠞ ꠜꠣꠁ ꠅꠇꠟ, ꠎꠦ ꠘꠛꠤ-ꠞꠍꠥꠟ ꠅꠇꠟꠦ ꠝꠣꠛꠥꠖꠞ ꠘꠣꠝꠦ ꠔꠛꠟꠤꠉ ꠇꠞꠍꠟꠣ, ꠔꠣꠞꠣꠞ ꠇꠡ꠆ꠐ ꠀꠞ ꠍꠛꠞꠞ ꠇꠕꠣ ꠌꠤꠘ꠆ꠔꠣ ꠇꠞꠤ ꠖꠦꠈꠅ। 11 ꠔꠣꠞꠣ ꠔ ꠇꠡ꠆ꠐ ꠙꠣꠁꠀꠅ ꠕꠤꠞ ꠞꠁꠍꠂꠘ, ꠄꠞꠟꠣꠉꠤ ꠀꠝꠞꠣ ꠔꠣꠞꠣꠞ ꠉꠥꠘꠉꠣꠘ ꠉꠣꠁ। ꠔꠥꠝꠞꠣ ꠔ ꠀꠁꠃꠛ ꠘꠛꠤꠞ ꠍꠛꠞꠞ ꠇꠕꠣ ꠜꠣꠟꠣ ꠇꠞꠤ ꠎꠣꠘ, ꠀꠞ ꠄꠅꠈꠣꠘ ꠎꠣꠘ, ꠀꠟ꠆ꠟꠣꠄ ꠛꠣꠖꠦ ꠔꠣꠘꠞꠦ ꠇꠤꠟꠣ ꠞꠢꠝ ꠇꠞꠍꠟꠣ। ꠀꠟ꠆ꠟꠣ ꠔ ꠖꠄꠀ-ꠝꠣꠄꠀꠞ ꠡꠣꠉꠞ।

12 ꠅ ꠀꠝꠣꠞ ꠜꠣꠁ ꠅꠇꠟ, ꠀꠝꠣꠞ ꠀꠍꠟ ꠇꠕꠣ ꠅꠁꠟ, ꠔꠥꠝꠞꠣ ꠇꠥꠘꠥꠎꠣꠔ ꠇꠍꠝ ꠇꠞꠤꠅ ꠘꠣ। ꠀꠍꠝꠣꠘꠞ ꠘꠣꠝꠦꠅ ꠘꠣ, ꠎꠝꠤꠘꠞ ꠘꠣꠝꠦꠅ ꠘꠣ, ꠅꠟꠣ ꠇꠥꠘꠥ ꠘꠣꠝꠦꠃ ꠇꠍꠝ ꠇꠞꠤꠅ ꠘꠣ। ꠄꠞ ꠛꠖꠟꠣ ꠔꠥꠝꠞꠣꠞ ꠅꠄ ꠈꠣꠘ ꠅꠄ, ꠀꠞ ꠘꠣ ꠈꠣꠘ ꠘꠣ ꠅꠃꠇ, ꠎꠣꠔꠦ ꠔꠥꠝꠞꠣ ꠛꠤꠌꠣꠞꠞ ꠖꠣꠠꠅ ꠘꠣ ꠙꠠ।

13 ꠔꠥꠝꠞꠣꠞ ꠝꠣꠎꠦ ꠇꠦꠃ ꠝꠍꠤꠛꠔꠅ ꠕꠣꠇꠟꠦ ꠢꠦ ꠖꠥꠀ ꠇꠞꠃꠇ। ꠇꠦꠃ ꠡꠥꠈꠦ ꠕꠣꠇꠟꠦ ꠢꠣꠝꠖ-ꠇꠣꠅꠀꠟꠤ ꠉꠣꠃꠇ। 14 ꠇꠦꠃꠞꠞ ꠛꠦꠝꠣꠞ ꠅꠁꠟꠦ ꠢꠦ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠖꠣꠅꠔ ꠖꠦꠃꠇ, ꠔꠣꠞꠣ ꠀꠁꠀ ꠀꠟ꠆ꠟꠣꠞ ꠘꠣꠝ ꠟꠁꠀ ꠔꠣꠞ ꠝꠣꠕꠣꠔ ꠔꠦꠟ ꠖꠤꠀ ꠖꠥꠀ ꠇꠞꠃꠇ꠆ꠇꠣ। 15 ꠔꠦꠃ ꠁꠝꠣꠘꠞ ꠍꠣꠔꠦ ꠖꠥꠀ ꠇꠞꠣꠞ ꠈꠣꠔꠤꠞꠦ ꠀꠟ꠆ꠟꠣꠄ ꠁ ꠛꠦꠝꠣꠞꠤꠞꠦ ꠡꠤꠚꠣ ꠇꠞꠛꠣ। ꠢꠦ ꠎꠥꠖꠤ ꠉꠥꠘꠣꠅ ꠇꠞꠤꠀ ꠕꠣꠇꠦ, ꠔꠦ ꠔꠣꠞ ꠉꠥꠘꠣ ꠝꠣꠚ ꠇꠞꠣ ꠅꠁꠛ। 16 ꠄꠞꠟꠣꠉꠤ ꠔꠥꠝꠞꠣ ꠄꠇꠎꠘꠦ ꠀꠞꠇ ꠎꠘꠞ ꠉꠦꠍꠦ ꠎꠣꠞꠎꠤꠞ ꠉꠥꠘꠣ ꠡ꠆ꠛꠤꠇꠣꠞ ꠇꠞꠅ, ꠀꠞ ꠄꠇꠦ-ꠅꠁꠘ꠆ꠘꠞ ꠟꠣꠉꠤ ꠖꠥꠀ ꠇꠞꠅ, ꠎꠣꠔꠦ ꠜꠣꠟꠣ ꠅꠁꠔꠣꠄ ꠙꠣꠞ। ꠙꠞꠦꠎꠉꠣꠞ ꠅꠇꠟꠞ ꠝꠥꠘꠣꠎꠣꠔ ꠀꠌꠣꠘꠇ ꠛꠟꠀꠟꠣ। 17 ꠁꠟꠤꠀꠍ ꠘꠛꠤ ꠀꠝꠞꠣꠞ ꠟꠣꠈꠣꠘꠃ ꠞꠇ꠆ꠔꠄ-ꠝꠣꠋꠡꠄ ꠝꠣꠘꠥꠡ ꠀꠍꠟꠣ। ꠔꠣꠁꠘ ꠖꠤꠟꠦ-ꠎꠣꠘꠦ ꠖꠥꠀ ꠇꠞꠟꠣ ꠝꠦꠊ ꠘꠣ ꠅꠀꠞ ꠟꠣꠉꠤ, ꠢꠣꠍꠣꠃ ꠡꠣꠠꠦ ꠔꠤꠘ ꠛꠞꠍ ꠇꠥꠘꠥ ꠝꠦꠊ ꠅꠁꠟ ꠘꠣ। 18 ꠛꠣꠖꠦ ꠔꠣꠁꠘ ꠝꠦꠊꠞ ꠟꠣꠉꠤ ꠖꠥꠀ ꠇꠞꠟꠣ, ꠔꠦꠃ ꠝꠦꠊ ꠅꠁꠟ, ꠀꠞ ꠎꠝꠤꠘꠅ ꠚꠡꠟ ꠚꠟꠤꠟ।

19 ꠅ ꠀꠝꠣꠞ ꠜꠣꠁ ꠅꠇꠟ, ꠔꠥꠝꠞꠣꠞ ꠝꠣꠎꠦ ꠇꠦꠃ ꠎꠥꠖꠤ ꠛꠦ-ꠙꠕꠤ ꠅꠁꠎꠣꠄ, ꠀꠞ ꠇꠦꠃ ꠔꠣꠞꠦ ꠚꠤꠞꠣꠁꠀ ꠀꠘꠦ, 20 ꠔꠦ ꠎꠣꠘꠤꠅ, ꠎꠦ ꠝꠣꠘꠡꠦ ꠇꠥꠘꠥ ꠉꠥꠘꠣꠉꠣꠞꠞꠦ ꠛꠦ-ꠙꠕ ꠕꠘꠦ ꠚꠤꠞꠣꠁꠀ ꠀꠘꠦ, ꠢꠦ ꠅꠃ ꠉꠥꠘꠣꠉꠣꠞꠞ ꠎꠣꠘ ꠛꠣꠌꠣꠄ ꠀꠞ ꠔꠣꠞ ꠉꠥꠘꠣ ꠛꠦꠡꠤ ꠅꠁꠟꠦꠅ ꠝꠣꠚꠤ ꠙꠣꠄ॥