1 ꠝꠣꠔ꠆ꠔꠣꠞ ꠙꠥꠀ ꠁꠃꠘꠥꠍꠞ ꠉꠦꠍꠦ ꠝꠣꠛꠥꠖꠞ ꠅꠃ ꠅꠢꠤ ꠘꠣꠎꠤꠟ ꠅꠁꠟ, 2 “ꠔꠥꠝꠤ ꠞꠅꠀꠘꠣ ꠖꠦꠅ, ꠀꠞ ꠘꠤꠘꠜ ꠘꠣꠝꠞ ꠢꠃ ꠛꠠ ꠐꠣꠃꠘꠅ ꠎꠣꠅ, ꠉꠤꠀ ꠀꠝꠣꠞ ꠉꠎꠛꠞ ꠇꠕꠣ ꠎꠣꠘꠣꠅ। ꠔꠣꠞꠣꠞ ꠘꠣꠚꠞꠝꠣꠘꠤ ꠀꠝꠣꠞ ꠖꠞꠛꠣꠞꠅ ꠎꠣꠁꠞ ꠅꠁꠉꠦꠍꠦ।” 3 ꠅꠁꠟꠦ ꠁꠃꠘꠥꠍꠦ ꠝꠣꠛꠥꠖꠞ ꠢꠥꠇꠥꠝꠞ ꠛꠞꠈꠦꠟꠣꠚ ꠇꠞꠤꠀ ꠜꠣꠉꠤꠀ ꠡ꠆ꠙꠦꠘ ꠖꠦꠡꠅ ꠎꠣꠅꠀꠞ ꠟꠣꠉꠤ ꠞꠅꠀꠘꠣ ꠅꠁꠉꠦꠟꠣ। ꠔꠣꠁꠘ ꠎꠣꠚꠣ ꠘꠣꠝꠞ ꠎꠣꠎꠞ ꠊꠣꠐꠅ ꠉꠤꠀ ꠡ꠆ꠙꠦꠘ ꠖꠦꠡꠅ ꠎꠣꠅꠞꠣ ꠄꠇꠈꠣꠘ ꠎꠣꠎ ꠙꠣꠁꠀ, ꠎꠣꠎꠞ ꠜꠣꠠꠣ ꠀꠖꠣꠄ ꠇꠞꠤꠀ ꠜꠤꠔꠞꠦ ꠢꠣꠝꠣꠁꠀ ꠝꠣꠛꠥꠖꠞ ꠍꠣꠝꠘꠦ ꠕꠘꠦ ꠜꠣꠉꠤꠔꠣ ꠇꠞꠤ ꠘꠣꠁꠀꠂꠘ꠆ꠔꠞ ꠟꠉꠦ ꠅꠁꠀ ꠞꠅꠀꠘꠣ ꠖꠤꠟꠣꠁꠟꠣ।

4 ꠅꠁꠟꠦ ꠝꠣꠛꠥꠖꠦ ꠖꠞꠤꠀꠞ ꠝꠣꠎꠦ ꠄꠇ ꠛꠦꠎꠥꠁꠔꠣ ꠔꠥꠚꠣꠘ ꠍꠣꠠꠤꠟꠣ। ꠔꠥꠚꠣꠘꠞ ꠑꠦꠟꠣꠄ ꠎꠣꠎꠈꠣꠘ ꠜꠣꠋꠉꠤ ꠎꠣꠅꠀꠞ ꠖꠡꠣ ꠅꠁꠟ। 5 ꠘꠣꠁꠀꠂꠘ꠆ꠔꠦ ꠒꠞꠣꠁꠀ ꠎꠣꠞꠎꠤꠞ ꠖꠦꠛꠔꠣꠞ ꠉꠦꠍꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠣꠔ ꠟꠣꠉꠟꠣ। ꠀꠞ ꠎꠣꠎꠞ ꠜꠣꠞ ꠇꠝꠣꠘꠤꠞ ꠟꠣꠉꠤ ꠝꠣꠟ-ꠍꠣꠝꠣꠘꠣ ꠖꠞꠤꠀꠔ ꠚꠣꠟꠣꠁ ꠖꠤꠟ। ꠅꠁꠟꠦ ꠁꠃꠘꠥꠍ ꠎꠣꠎꠞ ꠔꠟꠞ ꠔꠣꠟꠣꠔ ꠟꠣꠝꠤꠀ ꠢꠥꠔꠤ ꠞꠁꠟꠣ, ꠢꠥꠔꠤꠀ ꠛꠦꠖꠥꠝ ꠊꠥꠝꠅ ꠙꠠꠟꠣ। 6 ꠅꠃ ꠡꠝꠄ ꠎꠣꠎꠞ ꠡꠣꠞꠋ ꠁꠃꠘꠥꠍꠞ ꠉꠦꠍꠦ ꠉꠤꠀ ꠇꠁꠟꠣ, “ꠅꠂ ꠝꠤꠀ! ꠔꠥꠝꠤ ꠇꠦꠝꠘꠦ ꠊꠥꠝꠣꠁꠞꠣꠄ? ꠇꠥꠘ꠆ꠔꠣ ꠢꠥꠘꠞꠣꠄ ꠘꠣꠄ ꠘꠤ? ꠃꠑꠅ, ꠔꠥꠝꠣꠞ ꠖꠦꠛꠔꠣꠞꠦ ꠒꠣꠇꠅ। ꠅꠁꠔ ꠙꠣꠞꠦ ꠔꠣꠁꠘ ꠀꠝꠞꠣꠞ ꠛꠣꠄ ꠈꠤꠀꠟ ꠇꠞꠛꠣ, ꠀꠝꠞꠣꠞ ꠎꠣꠘ ꠛꠤꠘꠣꠡ ꠅꠁꠔ ꠘꠣꠄ।”

7 ꠛꠣꠖꠦ ꠘꠣꠁꠀꠂꠘ꠆ꠔꠦ ꠄꠇꠦ-ꠅꠁꠘ꠆ꠘꠦ ꠇꠁꠟ, “ꠀꠅ ꠀꠝꠞꠣ ꠟꠐꠣꠞꠤ ꠝꠣꠞꠤꠀ ꠖꠦꠈꠤ, ꠇꠣꠞ ꠖꠥꠡꠦ ꠁ ꠝꠍꠤꠛꠔ ꠀꠁꠍꠦ।” ꠔꠦꠃ ꠔꠣꠞꠣ ꠟꠐꠣꠞꠤ ꠝꠣꠞꠟ ꠀꠞ ꠟꠐꠣꠞꠤꠞ ꠝꠣꠎꠦ ꠁꠃꠘꠥꠍꠞ ꠘꠣꠝ ꠃꠑꠟ। 8 ꠅꠃ ꠔꠣꠞꠣ ꠔꠣꠘꠞꠦ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠇꠣꠞ ꠖꠥꠡꠦ ꠀꠝꠞꠣꠞ ꠃꠙꠞꠦ ꠁ ꠝꠍꠤꠛꠔ ꠀꠁꠍꠦ? ꠔꠥꠝꠤ ꠇꠤꠔꠣ ꠇꠣꠝ ꠇꠞꠅ? ꠇꠥꠀꠁ ꠕꠣꠇꠤ ꠀꠁꠍ? ꠇꠥꠘ ꠖꠦꠡꠞ ꠝꠣꠘꠥꠡ? ꠔꠥꠝꠤ ꠇꠥꠘ ꠎꠣꠔꠞ ꠝꠣꠘꠥꠡ?” 9 ꠁꠃꠘꠥꠍꠦ ꠎꠥꠀꠙ ꠖꠤꠟꠣ, “ꠜꠣꠁꠀꠁꠘꠞꠦ, ꠀꠝꠤ ꠄꠇꠎꠘ ꠁꠛꠞꠣꠘꠤ, ꠁꠍꠞꠣꠁꠟ ꠎꠣꠔꠤꠞ ꠝꠣꠘꠥꠡ। ꠀꠝꠤ ꠛꠦꠢꠦꠡ꠆ꠔꠞ ꠝꠣꠟꠤꠇ ꠀꠟ꠆ꠟꠣ ꠝꠣꠛꠥꠖꠞ ꠄꠛꠣꠖꠔ ꠇꠞꠤ, ꠔꠣꠁꠘꠃ ꠖꠞꠤꠀ ꠀꠞ ꠎꠝꠤꠘ ꠙꠄꠖꠣ ꠇꠞꠍꠂꠘ।” 10 ꠔꠣꠁꠘ ꠀꠞꠅ ꠇꠁꠟꠣ, ꠝꠣꠛꠥꠖꠞ ꠍꠣꠝꠘꠦ ꠕꠘꠦ ꠜꠣꠉꠤꠛꠣꠞ ꠘꠤꠅꠔꠦ ꠔꠣꠁꠘ ꠀꠁꠀ ꠎꠣꠎꠅ ꠃꠑꠍꠂꠘ। ꠁꠈꠣꠘ ꠢꠥꠘꠤꠀ ꠔꠣꠞꠣ ꠈꠥꠛ ꠒꠞꠣꠁꠀ ꠇꠁꠟꠣ, “ꠢꠣꠄ, ꠢꠣꠄ! ꠔꠥꠝꠤ ꠁꠔꠣ ꠇꠥꠘ ꠎꠣꠔꠞ ꠇꠣꠝ ꠇꠞꠟꠣꠄ?”

11 ꠖꠞꠤꠀꠞ ꠔꠥꠚꠣꠘ ꠎꠦꠛꠟꠣ ꠀꠞꠅ ꠛꠦꠎꠥꠁꠔꠣ ꠜꠣꠛ ꠗꠞꠟ, ꠅꠃ ꠡꠝꠄ ꠔꠣꠞꠣ ꠔꠣꠘꠞꠦ ꠎꠤꠇꠣꠁꠟ, “ꠀꠝꠞꠣ ꠔꠥꠝꠣꠞꠦ ꠇꠤꠔꠣ ꠇꠞꠟꠦ ꠖꠞꠤꠀ ꠕꠤꠞ ꠅꠁꠛ?” 12 ꠁꠃꠘꠥꠍꠦ ꠎꠥꠀꠙ ꠖꠤꠟꠣ, “ꠀꠝꠣꠞꠦ ꠗꠞꠤꠀ ꠖꠞꠤꠀꠔ ꠚꠣꠟꠣꠁ ꠖꠦꠅ, ꠔꠦꠃ ꠖꠞꠤꠀ ꠡꠣꠘ꠆ꠔꠤ ꠅꠁꠎꠤꠛ। ꠀꠝꠤ ꠔ ꠎꠣꠘꠤ, ꠀꠝꠣꠞ ꠖꠥꠡꠦꠃ ꠀꠙꠘꠣꠁꠘ꠆ꠔꠞ ꠃꠙꠞꠦ ꠁ ꠉꠎꠛꠤ ꠔꠥꠚꠣꠘ ꠀꠁꠍꠦ।” 13 ꠅꠁꠟꠦ ꠘꠣꠁꠀꠂꠘ꠆ꠔꠦ ꠔꠣꠘꠦ ꠘꠣ ꠚꠣꠟꠣꠁꠀ ꠎꠣꠎꠈꠣꠘ ꠇꠤꠘꠣꠞꠅ ꠜꠤꠠꠣꠘꠤꠞ ꠟꠣꠉꠤ ꠎꠣꠘ-ꠙꠞꠣꠘ ꠡꠙꠤꠀ ꠖꠣꠠ ꠛꠣꠁꠟꠣ, ꠔꠥꠚꠣꠘꠞ ꠎꠥꠞ ꠈꠣꠟꠤ ꠛꠣꠠꠔꠦꠃ ꠞꠁꠟ, ꠄꠞꠖꠣꠄ ꠔꠣꠞꠣ ꠎꠣꠎꠈꠣꠘ ꠇꠤꠘꠣꠞꠅ ꠘꠤꠔꠣ ꠙꠣꠞꠟꠣ ꠘꠣ। 14 ꠔꠦꠃ ꠔꠣꠞꠣ ꠀꠟ꠆ꠟꠣꠞ ꠉꠦꠍꠦ ꠚꠞꠤꠀꠖ ꠇꠞꠟ, ꠇꠁꠟ “ꠅ ꠝꠣꠛꠥꠖ, ꠞꠢꠝ ꠇꠞꠅ, ꠅꠃ ꠝꠣꠘꠡꠞ ꠎꠣꠘꠞ ꠟꠣꠉꠤ ꠔꠥꠝꠤ ꠀꠝꠞꠣꠞꠦ ꠝꠣꠞꠤꠅ ꠘꠣ, ꠁ ꠘꠤ-ꠅꠙꠞꠣꠗꠤꠞ ꠎꠣꠘꠞ ꠇꠣꠞꠘꠦ ꠀꠝꠞꠣꠞꠦ ꠖꠣꠄꠁ ꠇꠞꠤꠅ ꠘꠣ। ꠅ ꠝꠣꠛꠥꠖ, ꠁꠔꠣ ꠢꠇꠟꠔꠣꠃ ꠔ ꠔꠥꠝꠣꠞ ꠝꠥꠘꠡꠣ।” 15 ꠛꠣꠖꠦ ꠔꠣꠞꠣ ꠁꠃꠘꠥꠍ ꠘꠛꠤꠞꠦ ꠗꠞꠤꠀ ꠖꠞꠤꠀꠔ ꠚꠣꠟꠣꠁ ꠖꠤꠟ, ꠀꠞ ꠖꠞꠤꠀꠞ ꠔꠥꠚꠣꠘꠞ ꠓꠦꠃ ꠖꠝ ꠟꠁꠟꠤꠟ। 16 ꠁ ꠢꠣꠟꠔ ꠖꠦꠈꠤꠀ ꠔꠣꠞꠣ ꠝꠣꠛꠥꠖꠞꠦ ꠈꠥꠛ ꠒꠞꠣꠁꠟꠣ। ꠔꠣꠞꠣ ꠝꠣꠛꠥꠖꠞ ꠘꠣꠝꠦ ꠙꠡꠥ-ꠇꠥꠞꠛꠣꠘꠤ ꠖꠤꠟꠣ ꠀꠞ ꠝꠣꠘ꠆ꠘꠔ ꠝꠣꠘꠟꠣ।

17 ꠝꠣꠛꠥꠖꠦ ꠈꠥꠛ ꠛꠠ ꠄꠇ ꠝꠣꠍꠞꠦ ꠎꠥꠉꠣꠁ ꠕꠁꠍꠟꠣ ꠁꠃꠘꠥꠍꠞꠦ ꠉꠤꠟꠤꠟꠤꠛꠣꠞ ꠟꠣꠉꠤ, ꠔꠣꠁꠘ ꠔꠤꠘ ꠖꠤꠘ, ꠔꠤꠘ ꠞꠣꠁꠔ ꠢꠃ ꠝꠣꠍꠞ ꠙꠦꠐꠅ ꠞꠁꠟꠣ।