2
ꠝꠣꠍꠞ ꠙꠦꠐꠅ ꠢꠎꠞꠔ ꠁꠃꠘꠥꠍ (ꠀ꠩) ꠅꠞ ꠔꠃꠛꠣ
1 ꠁꠃꠘꠥꠍꠦ ꠝꠣꠍꠞ ꠙꠦꠐꠅ ꠕꠘꠦ ꠝꠣꠛꠥꠖ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ ꠇꠞꠟꠣ।
2 ꠝꠍꠤꠛꠔꠅ ꠙꠁꠠꠣ ꠝꠃꠟꠣ ꠒꠣꠇꠤꠟꠣꠝ ꠔꠞꠦ,
ꠞꠢꠝ ꠇꠞꠤꠀ ꠔꠥꠁ ꠎꠥꠀꠙ ꠖꠤꠟꠦ ꠝꠞꠦ।
ꠙꠣꠔꠣꠟꠞ ꠙꠦꠐꠅ ꠛꠁꠀ ꠀꠝꠤ ꠇꠣꠘ꠆ꠖꠤꠟꠣꠝ,
ꠇꠛꠥꠟ ꠇꠞꠤꠟꠣꠄ ꠀꠞꠎ ꠞꠢꠤꠝ ꠞꠢꠝꠣꠘ।
3 ꠖꠞꠤꠀꠞ ꠝꠥꠞꠅ ꠛꠘ꠆ꠖꠥ ꠝꠞꠦ ꠚꠣꠟꠣꠁꠟꠣꠄ,
ꠔꠥꠝꠣꠞ ꠙꠣꠘꠤꠞ ꠓꠦꠃꠄ ꠀꠝꠣꠄ ꠜꠣꠡꠣꠁ ꠟꠁꠀ ꠎꠣꠄ।
4 ꠝꠤꠟꠦ ꠘꠣ ꠖꠤꠖꠣꠞ ꠔꠥꠝꠣꠞ ꠘꠣꠁ ꠇꠣꠘ꠆ꠒꠣꠞꠤ,
ꠔꠣꠟ꠆ꠟꠣꠡꠤ ꠇꠞꠤꠀ ꠝꠥꠇꠣꠝ ꠎꠤꠇꠤꠞ ꠇꠞꠤ।
5 ꠓꠦꠃꠅꠞ ꠝꠣꠎꠦꠔꠦ ꠙꠠꠤ ꠎꠣꠘ ꠗꠠꠚꠠ ꠇꠞꠦ,
ꠖꠞꠤꠀꠞ ꠟꠔꠣ-ꠙꠣꠔꠣꠄ ꠙꠦꠌꠤꠟꠤꠟ ꠝꠞꠦ।
6 ꠙꠣꠔꠣꠟꠞ ꠔꠟꠦ ꠉꠤꠀ ꠝꠤꠟꠦꠞ ꠘꠣ ꠇꠤꠘꠣꠞ,
ꠈꠞꠦꠖꠤ ꠌꠣꠁꠀ ꠖꠦꠈꠤ ꠖꠥꠀꠞ ꠘꠣꠁ ꠀꠞ।
ꠛꠘ꠆ꠖꠤ ꠅꠁꠀ ꠇꠣꠘ꠆ꠖꠤ ꠀꠝꠤ ꠘꠤꠞꠣꠡ ꠛꠖꠘꠦ,
ꠀꠎꠣꠖ ꠇꠞꠤꠟꠣꠄ ꠝꠃꠟꠣ ꠉꠁꠘ ꠉꠣꠠꠣ ꠕꠘꠦ।
7 ꠎꠣꠘ ꠀꠝꠣꠞ ꠎꠣꠄ ꠎꠣꠄ ꠅꠁꠟ ꠎꠈꠘ,
ꠇꠣꠔꠞ ꠅꠁꠀ ꠉ ꠛꠘ꠆ꠖꠥ ꠇꠞꠤꠘꠥ ꠡꠞꠘ।
ꠜꠤꠇ꠆ꠇꠣ ꠝꠣꠋꠉꠤꠟꠣꠝ ꠇꠣꠋꠉꠣꠟ ꠖꠞꠛꠣꠞꠦ ꠔꠥꠝꠣꠞ,
ꠀꠞꠡꠅ ꠕꠣꠇꠤꠀ ꠖꠄꠀꠟ ꠖꠦꠈꠣꠁꠟꠣꠄ ꠖꠤꠖꠣꠞ।
8 ꠝꠥꠞ꠆ꠔꠤꠙꠥꠎꠣ ꠇꠞꠦ ꠎꠣꠞꠣ ꠘꠣ ꠙꠣꠁꠛ ꠞꠢꠝꠔ,
ꠄꠟꠣꠝꠤ ꠇꠞꠤꠀ ꠔꠣꠞꠣ ꠀꠞꠣꠁꠟ ꠇꠥꠖꠞꠔ।
9 ꠡꠥꠇꠥꠞ-ꠉꠥꠎꠣꠞ ꠇꠞꠅ ꠁꠃꠘꠥꠍ ꠝꠣꠛꠥꠖ ꠝꠦꠢꠦꠞꠛꠣꠘ,
ꠔꠥꠝꠣꠞ ꠖꠞꠛꠣꠞꠦ ꠀꠝꠤ ꠇꠞꠤꠝꠥ ꠇꠥꠞꠛꠣꠘ।
ꠟꠤꠟ꠆ꠟꠣ-ꠍꠖꠉꠣ ꠖꠣꠘ-ꠈꠄꠞꠣꠔ ꠡꠙꠤꠝꠥ ꠔꠞꠦ,
ꠘꠣꠎꠣꠔꠞ ꠝꠣꠟꠤꠇ ꠝꠃꠟꠣꠄ ꠛꠣꠌꠣꠅ ꠀꠝꠣꠞꠦ।
10 ꠛꠣꠖꠦ ꠝꠣꠛꠥꠖꠦ ꠢꠃ ꠝꠣꠍꠞꠦ ꠢꠥꠇꠥꠝ ꠖꠤꠟꠣ, ꠝꠣꠍꠦ ꠁꠃꠘꠥꠍꠞꠦ ꠘꠤꠀ ꠢꠥꠇꠘꠣ ꠎꠝꠤꠘꠞ ꠃꠙꠞꠦ ꠛꠣꠁꠔ ꠇꠞꠤ ꠚꠣꠟꠣꠁ ꠖꠤꠟ।