1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠀꠞꠅ ꠇꠁꠟꠣ, 2 “ꠢꠥꠘꠅ, ꠇꠥꠘꠥ ꠝꠣꠘꠡꠦ ꠎꠦꠛꠟꠣ ꠔꠣꠞ ꠀꠞꠤ-ꠚꠞꠤꠞ ꠟꠉꠦ ꠢꠣꠞꠣꠝꠤ ꠇꠞꠤꠀ ꠝꠣꠛꠥꠖꠞ ꠖꠞꠛꠣꠞꠅ ꠉꠥꠘꠣ ꠇꠞꠦ, ꠔꠣꠞ ꠉꠦꠍꠦ ꠕꠅꠀ ꠀꠝꠣꠘꠔ ꠛꠣ ꠛꠘ꠆ꠗꠇꠤ ꠎꠤꠘꠤꠡꠞ ꠈꠤꠀꠘꠔ ꠇꠞꠦ, ꠛꠣ ꠌꠥꠞꠤ ꠇꠞꠤ ꠇꠥꠘꠥ ꠝꠣꠟ ꠘꠦꠄ ꠛꠣ ꠐꠉꠣ-ꠐꠉꠤ ꠇꠞꠦ, ꠍꠟ-ꠌꠔꠥꠞꠤ ꠇꠞꠤꠀ ꠛꠦꠁꠝꠣꠘꠤ ꠝꠣꠔꠦ, 3 ꠔꠥꠛꠣꠁꠀ ꠙꠣꠅꠀ ꠝꠣꠟꠞ ꠛꠦꠙꠣꠞꠦ ꠛꠦꠁꠝꠣꠘꠤ ꠝꠣꠔꠦ ꠛꠣ ꠅꠔꠣ ꠢꠇ꠆ꠇꠟꠔꠣꠞ ꠛꠦꠙꠣꠞꠦ ꠇꠥꠘꠥ ꠝꠤꠍꠣ ꠇꠍꠝ ꠈꠣꠄ, ꠛꠣ ꠅꠃ ꠟꠣꠈꠣꠘ ꠀꠞꠅ ꠇꠥꠘꠥ ꠉꠥꠘꠣ ꠇꠞꠦ, 4 ꠔꠦ ꠅꠃ ꠘꠝꠥꠘꠣꠞ ꠉꠥꠘꠣ ꠇꠞꠤꠀ ꠅꠙꠞꠣꠗꠤ ꠛꠘꠣꠄ, ꠢꠦ ꠎꠦꠔꠣ ꠝꠣꠟ ꠀꠔ꠆ꠔꠡꠣꠔ ꠇꠞꠍꠦ, ꠛꠣ ꠍꠟ-ꠌꠔꠥꠞꠤ ꠇꠞꠤꠀ ꠘꠤꠍꠦ, ꠛꠣ ꠀꠝꠣꠘꠔꠞ ꠈꠤꠀꠘꠔ ꠇꠞꠍꠦ, ꠔꠥꠛꠣꠁ ꠙꠣꠅꠀ ꠝꠣꠟ ꠟꠥꠇꠣꠁꠍꠦ, 5 ꠛꠣ ꠎꠦꠇꠥꠘꠥ ꠝꠣꠟꠞ ꠛꠦꠙꠣꠞꠦ ꠝꠤꠍꠣ ꠇꠍꠝ ꠈꠣꠁꠍꠦ, ꠁꠔꠣ ꠢꠇꠟꠔꠣ ꠢꠦ ꠚꠤꠞꠔ ꠖꠤꠛ, ꠄꠞꠟꠉꠦ ꠎꠞꠤꠝꠣꠘꠣ ꠢꠤꠡꠣꠛꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠛ। ꠢꠦ ꠎꠦꠖꠤꠘ ꠔꠣꠞ ꠖꠥꠡ ꠡ꠆ꠛꠤꠇꠣꠞ ꠇꠞꠛ, ꠅꠃ ꠖꠤꠘ ꠝꠣꠟꠞ ꠝꠣꠟꠤꠇꠞꠦ ꠁꠔꠣ ꠚꠤꠞꠣꠁ ꠖꠤꠛ। 6 ꠀꠞ ꠘꠤꠎꠞ ꠖꠥꠡ-ꠇꠍꠥꠞꠤ ꠝꠣꠚꠤꠞ ꠘꠤꠅꠔꠦ ꠢꠦ ꠝꠣꠛꠥꠖꠞ ꠖꠞꠛꠣꠞꠅ ꠇꠥꠞꠛꠣꠘꠤ ꠟꠁꠀ ꠀꠎꠤꠞ ꠅꠁꠛ, ꠁꠝꠣꠝ ꠍꠣꠛꠞ ꠑꠤꠇ ꠇꠞꠣ ꠖꠣꠝꠞ ꠄꠉꠥ ꠘꠤꠈꠥꠔ ꠝꠦꠠꠣꠞ ꠙꠣꠑꠣ ꠟꠁꠀ ꠀꠁꠛ। 7 ꠁꠝꠣꠝꠦ ꠝꠣꠛꠥꠖꠞ ꠖꠞꠛꠣꠞꠅ ꠔꠣꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛꠣ। ꠢꠦ ꠅꠔꠣꠞ ꠝꠣꠎꠞ ꠎꠦꠇꠥꠘꠥ ꠉꠥꠘꠣ ꠇꠞꠟꠦ, ꠅꠃ ꠘꠝꠥꠘꠣꠄ ꠔꠣꠞ ꠉꠥꠘꠣꠞ ꠝꠣꠚꠤ ꠙꠣꠁꠛ।”

8 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 9 “ꠔꠥꠝꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠢꠤꠇꠣꠁ ꠖꠦꠅ, ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠝꠥꠍꠟꠣ ꠅꠁꠟ, ꠇꠥꠞꠛꠣꠘꠤꠞ ꠙꠡꠥ ꠚꠎꠞ ꠙꠞ꠆ꠎꠘ꠆ꠔ ꠢꠣꠞꠣ ꠞꠣꠁꠔ ꠇꠥꠞꠛꠣꠘꠤ ꠈꠣꠘꠣꠞ ꠀꠉꠥꠘꠤꠞ ꠃꠙꠞꠦ ꠞꠁꠛ, ꠀꠞ ꠀꠉꠥꠁꠘꠅ ꠎꠣꠟꠣꠁꠟ ꠞꠁꠛ। 10 ꠛꠤꠀꠘꠤ ꠛꠣꠟꠣ ꠁꠝꠣꠝ ꠍꠣꠛꠦ ꠡꠥꠔꠤ ꠇꠣꠙꠠꠖꠤ ꠛꠣꠘꠣꠁꠟ ꠢꠣꠚ-ꠙꠦꠘ꠆ꠐꠞ ꠟꠣꠈꠣꠘ ꠘꠤꠎꠞ ꠎꠣꠋꠉꠤꠀꠈꠣꠘ ꠀꠞ ꠔꠣꠘ ꠁꠝꠣꠝꠔꠤꠞ ꠛꠣꠇꠤ ꠢꠇꠟ ꠡꠥꠔꠤꠞ ꠟꠦꠛꠣꠍ ꠚꠤꠘ꠆ꠖꠤꠛꠣ। ꠚꠤꠘ꠆ꠖꠤꠀ ꠇꠥꠞꠛꠣꠘꠤꠞ ꠙꠡꠥ ꠎꠣꠟꠣꠘꠤꠞ ꠍꠣꠟꠤ ꠔꠥꠟꠤꠀ ꠘꠤꠀ ꠇꠥꠞꠛꠣꠘꠤ ꠈꠣꠘꠣꠞ ꠇꠣꠘ꠆ꠖꠣꠔ ꠕꠁꠛꠣ। 11 ꠛꠣꠖꠦ ꠔꠣꠁꠘ ꠅꠃ ꠟꠦꠛꠣꠍ ꠛꠖꠟꠣꠁꠀ, ꠖꠥꠍꠞꠣ ꠟꠦꠛꠣꠍ ꠚꠤꠘ꠆ꠖꠤꠀ, ꠅꠃ ꠍꠣꠟꠤꠞꠦ ꠇꠦꠝ꠆ꠙꠞ ꠛꠣꠞꠦ ꠇꠥꠘꠥ ꠙꠣꠇ-ꠍꠣꠚ ꠎꠣꠉꠣꠔ ꠘꠤꠀ ꠚꠣꠟꠣꠁꠛꠣ। 12 ꠅꠁꠟꠦ ꠇꠥꠞꠛꠣꠘꠤ ꠈꠣꠘꠣꠔ ꠀꠉꠥꠁꠘ ꠎꠣꠟꠣꠁꠟ ꠞꠁꠛ, ꠁꠔꠣ ꠘꠤꠜꠔ ꠘꠣ। ꠙꠞꠔꠦꠇ ꠖꠤꠘ ꠛꠤꠀꠘꠦ ꠁꠝꠣꠝꠦ ꠅꠃ ꠀꠉꠥꠘꠤꠞ ꠃꠙꠞꠦ ꠎꠣꠟꠣꠘꠤꠞ ꠖꠣꠞꠥ ꠖꠤꠛꠣ, ꠖꠤꠀ ꠖꠣꠞꠥꠞ ꠃꠙꠞꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠞꠦ ꠢꠣꠎꠣꠁꠛꠣ, ꠢꠣꠎꠣꠁꠀ ꠄꠞ ꠃꠙꠞꠦ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠌꠞ꠆ꠛꠤꠞꠦ ꠎꠣꠟꠣꠁꠛꠣ। 13 ꠢꠥꠡꠤꠀꠞ ꠞꠁꠅ, ꠇꠥꠞꠛꠣꠘꠤ ꠈꠣꠘꠣꠞ ꠀꠉꠥꠁꠘ ꠢꠣꠝꠦꠡꠣ ꠎꠟꠣꠔ ꠞꠁꠛ, ꠁꠔꠣ ꠇꠥꠘꠥ ꠡꠝꠄꠃ ꠘꠤꠜꠔ ꠘꠣ।

14 “ꠗꠣꠘ-ꠉꠝ ꠍꠖꠉꠣꠞ ꠘꠤꠅꠝ ꠅꠁꠟ, ꠢꠣꠞꠥꠘꠞ ꠙꠥꠀꠂꠘ ꠕꠣꠇꠤ ꠄꠇꠎꠘ ꠁꠝꠣꠝꠦ ꠅꠃ ꠍꠖꠉꠣꠞ ꠝꠄꠖꠣ ꠀꠞ ꠖꠞꠇꠣꠞꠤ ꠢꠇ꠆ꠇꠟꠔꠣ ꠟꠁꠀ ꠇꠥꠞꠛꠣꠘꠤ ꠈꠣꠘꠣꠞ ꠉꠦꠍꠦ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠅꠁꠛꠣ। 15 ꠀꠞ ꠁꠝꠣꠝꠦ ꠅꠈꠣꠘ ꠕꠣꠇꠤ ꠄꠇ ꠝꠥꠁꠐ ꠝꠄꠖꠣ, ꠇꠤꠍꠥ ꠔꠦꠟ ꠀꠞ ꠍꠖꠉꠣꠞ ꠢꠇꠟ ꠟꠥꠛꠣꠘ-ꠀꠉꠞ ꠘꠤꠀ ꠀꠡ꠆ꠔꠣ ꠍꠖꠉꠣꠞ ꠘꠤꠡꠣꠘꠣ ꠢꠤꠡꠣꠛꠦ ꠅꠃ ꠅꠋꠡꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠛꠣ। ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠔ ꠝꠣꠛꠥꠖ ꠈꠥꠡꠤ ꠅꠁꠘ। 16 ꠍꠖꠉꠣꠞ ꠝꠣꠟꠞ ꠛꠣꠖ-ꠛꠣꠇꠤ ꠅꠋꠡ ꠁꠝꠣꠝ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠈꠣꠁꠛꠣ। ꠔꠣꠞꠣ ꠁꠔꠣꠞ ꠝꠣꠎꠦ ꠇꠥꠘꠥ ꠈꠣꠝꠤꠞ ꠘꠣ ꠝꠤꠡꠣꠁꠀ ꠞꠥꠐꠤ ꠛꠣꠘꠣꠁꠛꠣ, ꠛꠣꠘꠣꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠃꠑꠣꠘꠅ ꠇꠥꠘꠥ ꠙꠣꠇ ꠎꠣꠉꠣꠔ ꠛꠁꠀ ꠈꠣꠁꠛꠣ। 17 ꠝꠘꠅ ꠞꠣꠈꠤꠅ, ꠇꠥꠘꠥ ꠈꠣꠝꠤꠞ ꠙꠥꠞꠣꠁꠀ ꠁꠔꠣꠞꠦ ꠍꠦꠇꠤꠅ ꠘꠣ। ꠀꠝꠣꠞ ꠘꠣꠝꠦ ꠖꠦꠅꠀ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠅꠃ ꠅꠋꠡ ꠀꠝꠤ ꠔꠣꠞꠣꠞꠦ ꠖꠤꠟꠣꠝ। ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠀꠞ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠈꠣꠘ ꠗꠣꠘ-ꠉꠝꠞ ꠍꠖꠉꠣꠞ ꠅꠃ ꠅꠋꠡꠅ ꠅꠁꠟ ꠈꠣꠍ ꠙꠛꠤꠔ꠆ꠞ। 18 ꠈꠣꠟꠤ ꠁꠝꠣꠝ ꠢꠣꠞꠥꠘꠞ ꠛꠋꠡꠞ ꠢꠇꠟ ꠛꠦꠐꠣ ꠝꠣꠘꠡꠦ ꠁꠔꠣ ꠈꠣꠁꠔꠣ ꠙꠣꠞꠛꠣ, ꠝꠣꠛꠥꠖꠞ ꠘꠣꠝꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠅꠃ ꠅꠋꠡ ꠔ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠔꠣꠞꠣꠃ ꠙꠣꠁꠛꠣ। ꠈꠥꠛ ꠈꠤꠀꠟ ꠞꠣꠈꠤꠅ, ꠎꠦꠍꠣꠔꠣꠄ ꠁꠔꠣꠞ ꠟꠉꠦ ꠟꠣꠉꠛ, ꠅꠔꠣꠅ ꠙꠣꠇ-ꠙꠛꠤꠔ꠆ꠞ ꠛꠘꠤꠎꠤꠛ, ꠝꠣꠘꠤ ꠁꠝꠣꠝ ꠅꠇꠟꠞ ꠛꠣꠁꠞꠣ ꠝꠣꠘꠡꠞ ꠟꠣꠉꠤ ꠢꠣꠞꠣꠝ।”

19 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠀꠞꠅ ꠇꠁꠟꠣ, 20 “ꠢꠣꠞꠥꠘꠦ ꠎꠦꠖꠤꠘ ꠁꠝꠣꠝꠔꠤꠞ ꠈꠦꠟꠣꠚꠔꠤ ꠡꠝꠎꠤꠀ ꠇꠣꠝꠅ ꠛꠅꠀꠁꠟ ꠅꠁꠛꠣ, ꠅꠃ ꠖꠤꠘ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠦ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠝ ꠝꠣꠚꠤꠇ ꠖꠥꠁ ꠡꠦꠞ ꠝꠄꠖꠣ ꠝꠣꠛꠥꠖꠞ ꠖꠞꠛꠣꠞꠅ ꠀꠘꠛꠣ। ꠁꠔꠣꠞ ꠅꠞ꠆ꠗꠦꠇ ꠛꠤꠀꠘꠦ ꠀꠞ ꠅꠞ꠆ꠗꠦꠇ ꠢꠣꠁꠘ꠆ꠎꠣ ꠛꠣꠟꠣ ꠖꠤꠛꠣ। 21 ꠔꠣꠞꠣ ꠔꠦꠟ ꠖꠤꠀ ꠈꠣꠁ ꠛꠣꠘꠣꠁꠀ ꠔꠣꠅꠀꠔ ꠍꠦꠇꠤꠀ ꠢꠣꠞꠟꠦ ꠁꠔꠣ ꠐꠥꠇꠞꠣ ꠐꠥꠇꠞꠣ ꠇꠞꠤꠀ ꠝꠣꠛꠥꠖꠞ ꠍꠣꠝꠘꠦ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠀꠎꠤꠞ ꠇꠞꠛꠣ, ꠁꠔꠣꠞ ꠗꠥꠝꠣꠞ ꠊꠦꠞꠣꠘꠦ ꠝꠣꠛꠥꠖ ꠈꠥꠡꠤ ꠅꠁꠘ। 22 ꠢꠣꠞꠥꠘꠞ ꠛꠣꠖꠦ ꠔꠣꠞ ꠎꠦ ꠙꠥꠀꠞꠦ ꠙꠞꠗꠣꠘ ꠁꠝꠣꠝ ꠢꠤꠡꠣꠛꠦ ꠈꠦꠟꠣꠚꠔꠤ ꠖꠦꠅꠀ ꠅꠁꠛ, ꠢꠦ-ꠅ ꠅꠃꠟꠣ ꠍꠖꠉꠣ ꠀꠖꠣꠄ ꠇꠞꠛ। ꠁꠔꠣ ꠔ ꠝꠣꠛꠥꠖꠞ ꠢꠞ-ꠢꠣꠝꠦꠡꠣꠇꠥꠞ ꠙꠣꠅꠘꠣ, ꠅꠃ ꠍꠖꠉꠣꠞ ꠙꠥꠞꠣ ꠅꠋꠡ ꠎꠣꠟꠣꠁꠟꠤꠔꠦ ꠅꠁꠛ। 23 ꠁꠝꠣꠝ ꠅꠇꠟꠞ ꠘꠤꠎꠞ ꠖꠦꠅꠀ ꠗꠣꠘ-ꠉꠝꠞ ꠍꠖꠉꠣꠞ ꠢꠇ꠆ꠇꠟꠔꠣ ꠎꠣꠟꠣꠁꠟꠤꠔꠦ ꠅꠁꠛ, ꠁꠔꠣ ꠈꠣꠅꠀꠞ ꠇꠥꠘꠥ ꠢꠥꠇꠥꠝ ꠘꠣꠄ।”

24 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 25 “ꠔꠥꠝꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠘꠤꠅꠝ ꠢꠤꠇꠣꠅ। ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠞꠦ ꠎꠦ ꠎꠣꠉꠣꠔ ꠎꠛ ꠇꠞꠂꠘ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠙꠡꠥꠞꠦꠅ ꠅꠘꠅ ꠎꠛ ꠇꠞꠛꠣ। ꠁ ꠇꠥꠞꠛꠣꠘꠤꠞ ꠉꠥꠡ꠆ꠔ ꠔ ꠈꠣꠍ ꠙꠛꠤꠔ꠆ꠞ। 26 ꠎꠦ ꠁꠝꠣꠝꠦ ꠅꠃ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ, ꠄꠁꠘ ꠅꠃ ꠉꠥꠡ꠆ꠔ ꠈꠣꠁꠛꠣ। ꠝꠤꠟꠘ-ꠔꠣꠝ꠆ꠛꠥꠞ ꠃꠑꠣꠘꠅ ꠙꠛꠤꠔ꠆ꠞ ꠎꠣꠉꠣꠔ ꠅꠃ ꠉꠥꠡ꠆ꠔ ꠈꠣꠁꠔꠦ ꠅꠁꠛ। 27 ꠎꠦꠔꠣ ꠎꠤꠘꠤꠡꠦ ꠅꠃ ꠉꠥꠡ꠆ꠔꠞꠦ ꠍꠁꠛ, ꠁꠔꠣ ꠙꠣꠇ-ꠙꠛꠤꠔ꠆ꠞ ꠅꠁꠎꠤꠛ। ꠇꠥꠘꠥ ꠇꠣꠙꠠꠞ ꠝꠣꠎꠦ ꠎꠥꠖꠤ ꠄꠞ ꠟꠃꠞ ꠍꠤꠐꠣ ꠟꠣꠉꠦ, ꠔꠦ ꠙꠣꠇ-ꠙꠛꠤꠔ꠆ꠞ ꠇꠥꠘꠥ ꠎꠣꠉꠣꠔ ꠁꠔꠣ ꠗꠁꠔꠦ ꠅꠁꠛ। 28 ꠀꠞ ꠝꠣꠐꠤꠞ ꠎꠦ ꠙꠣꠔꠤꠟꠅ ꠅꠃ ꠉꠥꠡ꠆ꠔ ꠞꠣꠘ꠆ꠖꠣ ꠅꠁꠛ, ꠁꠔꠣ ꠛꠣꠖꠦ ꠜꠣꠋꠉꠤꠟꠤꠛꠣꠄ। ꠅꠁꠟꠦ ꠙꠤꠔꠟꠞ ꠙꠣꠔꠤꠟꠅ ꠞꠣꠘ꠆ꠖꠤꠟꠦ ꠁꠐꠣ ꠝꠣꠘ꠆ꠎꠤꠀ ꠙꠣꠘꠤꠖꠤ ꠗꠁꠀ ꠙꠣꠇ-ꠍꠣꠚ ꠇꠞꠛꠣꠄ। 29 ꠁꠝꠣꠝ ꠛꠋꠡꠞ ꠎꠦꠇꠥꠘꠥ ꠛꠦꠐꠣꠁꠘ꠆ꠔꠦ ꠅꠃ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠁꠔꠣ ꠙꠣꠞꠛꠣ, ꠁꠔꠣ ꠔ ꠈꠣꠍ ꠙꠛꠤꠔ꠆ꠞ ꠉꠥꠡ꠆ꠔ। 30 ꠅꠁꠟꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠙꠡꠥꠞ ꠟꠃ ꠎꠥꠖꠤ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠘꠦꠅꠀ ꠅꠁꠎꠣꠄ, ꠔꠦ ꠁ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠅꠀ ꠘꠤꠡꠦꠗ, ꠁꠔꠣ ꠎꠣꠟꠣꠁꠟꠤꠔꠦ ꠅꠁꠛ।