1 “ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠝꠥꠍꠟꠣ ꠅꠁꠟ, ꠁ ꠇꠥꠞꠛꠣꠘꠤꠞ ꠉꠥꠡ꠆ꠔ ꠔ ꠈꠣꠍ ꠙꠛꠤꠔ꠆ꠞ। 2 ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠞꠦ ꠎꠦ ꠎꠣꠉꠣꠔ ꠎꠛ ꠇꠞꠣ ꠅꠄ, ꠅꠃ ꠇꠥꠞꠛꠣꠘꠤꠞ ꠙꠡꠥꠞꠦꠅ ꠅꠘꠅ ꠎꠛ ꠇꠞꠔꠦ ꠅꠁꠛ। ꠁꠔꠣꠞ ꠟꠃ ꠇꠥꠞꠛꠣꠘꠤ ꠈꠣꠘꠣꠞ ꠌꠣꠁꠞꠅ ꠉꠣꠟꠣꠛꠣꠄ ꠍꠤꠐꠣꠁ ꠖꠤꠔꠦ ꠅꠁꠛ। 3 ꠀꠞ ꠁꠔꠣꠞ ꠢꠇꠟ ꠌꠞ꠆ꠛꠤꠞꠦ ꠟꠁꠛ, ꠝꠣꠘꠤ ꠌꠞ꠆ꠛꠤ ꠀꠟꠣ ꠟꠦꠋꠉꠥꠠ, ꠙꠦꠐꠞ ꠜꠤꠔꠞꠞ ꠢꠇꠟꠔꠣꠞ ꠃꠙꠞꠞ ꠌꠞ꠆ꠛꠤ, 4 ꠄꠞ ꠟꠉꠦ ꠖꠥꠁꠅ ꠇꠤꠒꠘꠤ ꠀꠞ ꠅꠔꠣꠞ ꠃꠙꠞꠞ ꠌꠞ꠆ꠛꠤ, ꠀꠞ ꠇꠁꠟꠎꠣꠞ ꠟꠉꠞ ꠝꠣꠐꠤꠀ, ꠁ ꠢꠇꠟꠔꠣ ꠀꠟꠉꠣꠁꠛꠣ। 5 ꠀꠟꠉꠣꠁꠀ ꠁꠝꠣꠝꠦ ꠅꠃ ꠢꠇꠟꠔꠣ ꠘꠤꠀ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠢꠤꠡꠣꠛꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ, ꠁꠔꠣ ꠅꠁꠟ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ। 6 ꠇꠥꠞꠛꠣꠘꠤꠞ ꠉꠥꠡ꠆ꠔ ꠁꠝꠣꠝ ꠙꠞꠤꠛꠣꠞꠞ ꠎꠦꠇꠥꠘꠥ ꠛꠦꠐꠣ ꠝꠣꠘꠡꠦ ꠈꠣꠁꠔꠣ ꠙꠣꠞꠛꠣ। ꠁꠔꠣ ꠔ ꠈꠣꠍ ꠙꠛꠤꠔ꠆ꠞ ꠎꠤꠘꠤꠡ, ꠄꠞꠟꠣꠉꠤ ꠔꠣꠞꠣ ꠎꠦꠇꠥꠘꠥ ꠙꠣꠇ ꠎꠣꠉꠣꠔ ꠛꠁꠀ ꠈꠣꠁꠔꠦ ꠅꠁꠛ।

7 “ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠞ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠘꠤꠅꠝ-ꠇꠣꠘꠥꠘ ꠔ ꠄꠇꠁ ꠘꠝꠥꠘꠣꠞ। ꠎꠦ ꠁꠝꠣꠝ ꠍꠣꠛꠦ ꠅꠃ ꠇꠚꠞꠣꠞ ꠇꠥꠞꠛꠣꠘꠤꠞꠦ ꠀꠖꠣꠄ ꠇꠞꠛꠣ, ꠄꠁꠘ ꠅꠃ ꠉꠥꠡ꠆ꠔ ꠙꠣꠁꠛꠣ। 8 ꠀꠞ ꠎꠦ ꠁꠝꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ, ꠄꠁꠘ ꠅꠃ ꠇꠥꠞꠛꠣꠘꠤꠞ ꠙꠡꠥꠞ ꠌꠣꠝꠠꠣꠅ ꠘꠤꠔꠣ ꠙꠣꠞꠛꠣ। 9 ꠟꠥꠀꠠꠤꠔ, ꠔꠣꠅꠀꠔ ꠛꠣ ꠔꠥꠘ꠆ꠖꠥꠞꠤ ꠃꠘ꠆ꠖꠣꠟꠅ ꠢꠦꠖꠤꠀ ꠀꠘꠣ ꠗꠣꠘ-ꠉꠝꠞ ꠍꠖꠉꠣꠞ ꠞꠥꠐꠤ ꠈꠣꠟꠤ ꠢꠃ ꠁꠝꠣꠝꠦ ꠙꠣꠁꠛꠣ, ꠎꠦꠁꠘ ꠁ ꠍꠖꠉꠣ ꠀꠖꠣꠄ ꠇꠞꠍꠂꠘ। 10 ꠅꠁꠟꠦ ꠗꠣꠘ-ꠉꠝꠞ ꠛꠣꠖ-ꠛꠣꠇꠤ ꠢꠇꠟ ꠍꠖꠉꠣ, ꠁꠔꠣ ꠔꠦꠟ ꠝꠣꠈꠣꠁꠟ ꠛꠣ ꠢꠥꠇꠘꠣ ꠎꠦꠇꠥꠘꠥ ꠟꠣꠈꠣꠘ ꠅꠃꠇ, ꠁꠝꠣꠝ ꠢꠣꠞꠥꠘꠞ ꠢꠇꠟ ꠙꠥꠀꠂꠘ꠆ꠔꠦ ꠁꠔꠣꠞ ꠢꠝꠣꠘ ꠛꠣꠐ ꠙꠣꠁꠛꠣ।

11 “ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠘꠤꠅꠝ ꠅꠁꠟ, 12 ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠣꠛꠥꠖꠞ ꠡꠥꠇꠞꠤꠀ ꠀꠖꠣꠄ ꠇꠞꠣꠞ ꠈꠤꠀꠟꠦ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠖꠦꠄ, ꠔꠦ ꠅꠃ ꠇꠥꠞꠛꠣꠘꠤꠞ ꠙꠡꠥꠞ ꠟꠉꠦ ꠔꠦꠟ ꠝꠤꠡꠣꠁꠟ ꠘꠤꠞꠦꠇ ꠝꠄꠖꠣ ꠖꠤꠀ ꠈꠣꠝꠤꠞ ꠍꠣꠠꠣ ꠞꠥꠐꠤ ꠛꠣ ꠛꠣꠘꠣꠁꠟ ꠞꠥꠐꠤꠔ ꠔꠦꠟ ꠝꠣꠈꠣꠁꠀ ꠟꠁꠀ ꠀꠁꠛ, ꠛꠣ ꠔꠦꠟ ꠝꠤꠡꠣꠁꠟ ꠈꠣꠝꠤꠞ ꠍꠣꠠꠣ ꠘꠤꠞꠦꠇ ꠝꠄꠖꠣꠞ ꠙꠤꠑꠣ ꠛꠣꠘꠣꠁꠀ ꠀꠘꠔꠦ ꠅꠁꠛ। 13 ꠡꠥꠇꠞꠤꠀ ꠀꠖꠣꠄ ꠇꠞꠣꠞ ꠈꠤꠀꠟꠦ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠎꠤꠘꠤꠡꠞ ꠟꠉꠦ ꠈꠣꠝꠤꠞ ꠀꠟꠣ ꠕꠥꠠꠣ ꠞꠥꠐꠤꠅ ꠀꠘꠛ। 14 ꠝꠣꠛꠥꠖꠞ ꠘꠣꠝꠦ ꠖꠦꠅꠀꠞ ꠟꠣꠉꠤ ꠢꠦ ꠅꠃ ꠙꠞꠔꠦꠇ ꠎꠤꠘꠤꠡ ꠕꠣꠇꠤ ꠄꠇꠐꠣ ꠄꠇꠐꠣ ꠇꠞꠤ ꠀꠘꠛ। ꠎꠦ ꠁꠝꠣꠝꠦ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠙꠡꠥꠞ ꠟꠃ ꠍꠤꠐꠣꠁꠛꠣ, ꠄꠁꠘ ꠁꠔꠣ ꠙꠣꠁꠛꠣ। 15 ꠡꠥꠇꠥꠞꠣꠘꠣ ꠀꠖꠣꠄ ꠇꠞꠣꠞ ꠘꠤꠅꠔꠦ ꠖꠦꠅꠀ ꠅꠃ ꠇꠥꠞꠛꠣꠘꠤꠞ ꠉꠥꠡ꠆ꠔ ꠅꠃ ꠖꠤꠘꠃ ꠈꠣꠁꠟꠤꠔꠦ ꠅꠁꠛ। ꠁꠔꠣ ꠛꠣꠖꠞ ꠖꠤꠘ ꠛꠤꠀꠘꠇꠥꠞ ꠟꠣꠉꠤ ꠕꠅꠀ ꠎꠣꠁꠔ ꠘꠣꠄ।

16 “ꠅꠃ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠎꠥꠖꠤ ꠇꠥꠘꠥ ꠝꠣꠘ꠆ꠘꠔ ꠀꠖꠣꠄ ꠇꠞꠣꠞ ꠘꠤꠅꠔꠦ ꠖꠦꠅ, ꠛꠣ ꠄꠝꠘꠦ ꠈꠥꠡꠤ ꠅꠁꠀ ꠇꠥꠞꠛꠣꠘꠤ ꠖꠦꠅ, ꠔꠦ ꠁꠔꠣꠞ ꠉꠥꠡ꠆ꠔ ꠅꠃ ꠖꠤꠘꠃ ꠈꠣꠁꠅ, ꠀꠞ ꠇꠤꠍꠥ ꠛꠣꠇꠤ ꠞꠁꠟꠦ ꠛꠣꠖꠞ ꠖꠤꠘꠅ ꠈꠣꠁꠔꠣꠄ ꠙꠣꠞꠛꠣꠄ। 17 ꠅꠁꠟꠦ ꠖꠥꠁ ꠖꠤꠘ ꠛꠣꠖꠦ ꠁ ꠉꠥꠡ꠆ꠔ ꠞꠁꠟꠦ, ꠁꠔꠣ ꠎꠣꠟꠣꠁꠟꠤꠔꠦ ꠅꠁꠛ। 18 ꠔꠤꠘ ꠘꠝ꠆ꠛꠞ ꠖꠤꠘ ꠁ ꠉꠥꠡ꠆ꠔ ꠈꠣꠁꠟꠦ ꠇꠥꠞꠛꠣꠘꠤ ꠇꠛꠥꠟ ꠅꠁꠔ ꠘꠣꠄ। ꠇꠥꠞꠛꠣꠘꠤ ꠖꠦꠅꠞꠣꠞ ꠀꠝꠟ-ꠘꠣꠝꠣꠔ ꠁꠔꠣ ꠃꠐꠔ ꠘꠣꠄ, ꠅꠃ ꠉꠥꠡ꠆ꠔ ꠔ ꠘꠣꠙꠣꠇ ꠅꠁꠉꠦꠍꠦ, ꠇꠥꠘꠥ ꠝꠣꠘꠡꠦ ꠁꠔꠣ ꠈꠣꠁꠟꠦ ꠔꠣꠞꠦ ꠘꠣꠚꠞꠝꠣꠘ ꠢꠤꠡꠣꠛꠦ ꠉꠘꠣ ꠅꠁꠛ।

19 “ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠥꠡ꠆ꠔꠞ ꠝꠣꠎꠦ ꠘꠣꠙꠣꠇ ꠇꠥꠘꠥ ꠎꠤꠘꠤꠡ ꠟꠣꠉꠤꠉꠦꠟꠦ, ꠁ ꠉꠥꠡ꠆ꠔꠞ ꠁ ꠅꠋꠡ ꠀꠞ ꠈꠣꠅꠀ ꠎꠣꠁꠔ ꠘꠣꠄ, ꠁꠔꠣ ꠎꠣꠟꠣꠁꠟꠤꠛꠣ। ꠅꠁꠟꠦ ꠛꠣꠇꠤ ꠉꠥꠡ꠆ꠔ ꠈꠣꠅꠀ ꠎꠣꠁꠛ, ꠙꠣꠇ-ꠍꠣꠚ ꠢꠣꠟꠔꠦ ꠎꠦ ꠇꠥꠘꠥ ꠎꠘꠦ ꠁꠔꠣ ꠈꠣꠁꠔꠣ ꠙꠣꠞꠛꠣ। 20 ꠀꠞ ꠘꠣꠙꠣꠇ ꠢꠣꠟꠔꠦ ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠅꠃ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠁꠟꠣꠄ, ꠔꠦ ꠡꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠔꠦ ꠅꠁꠛ। 21 ꠇꠥꠘꠥ ꠝꠣꠘꠡꠦ ꠎꠥꠖꠤ ꠙꠡꠥꠞ ꠛꠣ ꠝꠣꠘꠡꠞ ꠇꠥꠘꠥ ꠘꠣꠙꠣꠇ ꠎꠤꠘꠤꠡ ꠍꠁꠀ ꠢꠣꠞꠤ ꠛꠣ ꠖꠥꠍꠞꠣ ꠘꠣꠙꠣꠇ ꠇꠥꠘ꠆ꠔꠣ ꠍꠁꠀ ꠢꠣꠞꠤ ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠥꠡ꠆ꠔ ꠈꠣꠁꠟꠣꠄ, ꠔꠦ ꠔꠣꠞ ꠘꠣꠝꠅ ꠡꠝꠣꠎ ꠕꠣꠇꠤ ꠝꠤꠐꠣꠁꠟꠤꠔꠦ ꠅꠁꠛ।”

22 ꠀꠞ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 23 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠔꠥꠝꠞꠣ ꠉꠞꠥ-ꠍꠣꠉꠟ ꠛꠣ ꠝꠦꠠꠣꠞ ꠇꠥꠘꠥꠎꠣꠔ ꠌꠞ꠆ꠛꠤ ꠈꠣꠁꠅ ꠘꠣ। 24 ꠇꠥꠘꠥ ꠝꠞꠣ ꠙꠡꠥꠞ ꠛꠣ ꠎꠋꠟꠤ ꠎꠣꠘꠥꠀꠞꠦ ꠝꠣꠞꠣ ꠙꠡꠥꠞ ꠌꠞ꠆ꠛꠤꠞꠦ ꠔꠥꠝꠞꠣ ꠅꠁꠘ꠆ꠘ ꠇꠥꠘꠥ ꠇꠣꠝꠅ ꠟꠣꠉꠣꠁꠔꠣꠄ ꠙꠣꠞꠛꠣꠄ, ꠅꠁꠟꠦ ꠈꠣꠁꠔꠣꠄ ꠙꠣꠞꠔꠣꠄ ꠘꠣꠄ। 25 ꠎꠔ ꠘꠝꠥꠘꠣꠞ ꠙꠡꠥ ꠖꠤꠀ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠣ ꠅꠄ, ꠁꠔꠣ ꠎꠣꠔꠞ ꠙꠡꠥꠞ ꠌꠞ꠆ꠛꠤ ꠎꠦꠉꠥꠄ ꠈꠣꠁꠛ, ꠔꠣꠞ ꠘꠣꠝꠞꠦ ꠡꠝꠣꠎ ꠕꠣꠇꠤ ꠝꠤꠐꠣꠁꠟꠤꠛꠣꠄ। 26 ꠔꠥꠝꠞꠣ ꠎꠦꠇꠥꠘꠥ ꠎꠣꠉꠣꠔ ꠛꠡꠔ ꠇꠞꠅ ꠘꠣ ꠇꠦꠘꠦ, ꠇꠥꠘꠥꠎꠣꠔ ꠙꠡꠥ ꠛꠣ ꠙꠣꠈꠤꠞ ꠟꠃ ꠈꠣꠅꠀ ꠎꠣꠁꠎ ꠘꠣꠄ। 27 ꠇꠥꠘꠥ ꠝꠣꠘꠡꠦ ꠎꠥꠖꠤ ꠟꠃ ꠈꠣꠄ, ꠔꠦ ꠡꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠔꠦ ꠅꠁꠛ।”

28 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 29 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠎꠦꠇꠥꠘꠥ ꠝꠣꠘꠡꠦ ꠇꠥꠘꠥ ꠙꠡꠥ ꠖꠤꠀ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠀꠖꠣꠄ ꠇꠞꠟꠦ, ꠇꠥꠞꠛꠣꠘꠤꠞ ꠉꠥꠡ꠆ꠔꠞ ꠄꠇꠐꠣ ꠅꠋꠡ ꠝꠣꠛꠥꠖꠞ ꠖꠞꠛꠣꠞꠅ ꠖꠤꠔꠦ ꠅꠁꠛ। 30 ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤꠞ ꠅꠃ ꠅꠋꠡ, ꠝꠣꠘꠤ ꠍꠤꠘꠣ ꠀꠞ ꠍꠤꠘꠣꠞ ꠃꠙꠞꠞ ꠌꠞ꠆ꠛꠤ ꠢꠦ ꠘꠤꠎꠞ ꠀꠔꠦ ꠀꠘꠤꠀ ꠁꠝꠣꠝ ꠍꠣꠛꠞꠦ ꠖꠤꠛ। ꠁꠝꠣꠝꠦ ꠁꠔꠣꠞꠦ ꠃꠌꠣ ꠇꠞꠤꠀ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠣꠁꠛꠣ। 31 ꠛꠣꠖꠦ ꠔꠣꠁꠘ ꠌꠞ꠆ꠛꠤꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ, ꠅꠁꠟꠦ ꠅꠃ ꠍꠤꠘꠣꠞ ꠉꠥꠡ꠆ꠔ ꠁꠝꠣꠝ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠦ ꠙꠣꠁꠛꠣ। 32 ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠙꠡꠥꠞ ꠒꠣꠁꠘꠞ ꠞꠣꠘꠞ ꠉꠥꠡ꠆ꠔ ꠁꠝꠣꠝ ꠍꠣꠛꠞꠦ ꠖꠤꠟꠣꠁꠛꠣꠄ। 33 ꠁꠝꠣꠝ ꠢꠣꠞꠥꠘꠞ ꠛꠋꠡꠞ ꠎꠦ ꠇꠦꠃ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠙꠡꠥꠞ ꠟꠃ ꠀꠞ ꠌꠞ꠆ꠛꠤꠞꠦ ꠇꠥꠞꠛꠣꠘꠤ ꠖꠤꠛꠣ, ꠔꠣꠘ ꠙꠣꠅꠘꠣ ꠢꠤꠡꠣꠛꠦ ꠅꠃ ꠞꠣꠘꠞ ꠉꠥꠡ꠆ꠔ ꠘꠤꠛꠣ। 34 ꠛꠘꠤ ꠁꠍꠞꠣꠁꠟꠞ ꠖꠦꠅꠀ ꠢꠇꠟ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠉꠥꠡ꠆ꠔ ꠕꠣꠇꠤ ꠖꠥꠟꠘꠣ ꠇꠥꠞꠛꠣꠘꠤꠞ ꠍꠤꠘꠣ ꠀꠞ ꠒꠣꠁꠘꠞ ꠞꠣꠘꠞ ꠉꠥꠡ꠆ꠔ ꠀꠝꠤ ꠁꠝꠣꠝ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠖꠤꠟꠣꠝ। ꠛꠘꠤ ꠁꠍꠞꠣꠁꠟꠞ ꠖꠦꠅꠀ ꠇꠥꠞꠛꠣꠘꠤꠞ ꠁ ꠅꠋꠡ ꠅꠁꠟ ꠔꠣꠞꠣꠞ ꠢꠣꠝꠦꠡꠣꠇꠥꠞ ꠙꠣꠅꠘꠣ ꠢꠇ।”

35 ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠎꠦꠖꠤꠘ ꠕꠣꠇꠤ ꠁꠝꠣꠝꠔꠤꠞ ꠇꠣꠝꠅ ꠛꠅꠀꠁꠟ ꠇꠞꠣ ꠅꠁꠍꠤꠟ, ꠢꠃ ꠖꠤꠘ ꠕꠣꠇꠤ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠢꠇꠟ ꠘꠝꠥꠘꠣꠞ ꠇꠥꠞꠛꠣꠘꠤꠞ ꠅꠃ ꠅꠋꠡꠞꠦ ꠔꠣꠞꠣꠞ ꠙꠣꠅꠘꠣ ꠢꠇ ꠢꠤꠡꠣꠛꠦ ꠗꠞꠣ ꠅꠁꠍꠦ। 36 ꠔꠣꠞꠣꠞꠦ ꠎꠦꠖꠤꠘ ꠈꠦꠟꠣꠚꠔꠤ ꠡꠝꠎꠣꠁꠀ ꠛꠅꠀꠁꠟ ꠇꠞꠣ ꠅꠁꠍꠦ, ꠢꠃ ꠖꠤꠘ ꠝꠣꠛꠥꠖꠦ ꠛꠘꠤ ꠁꠍꠞꠣꠁꠟꠞꠦ ꠢꠥꠇꠥꠝ ꠖꠤꠍꠟꠣ, ꠇꠥꠞꠛꠣꠘꠤꠞ ꠉꠥꠡ꠆ꠔꠞ ꠅꠃ ꠅꠋꠡ ꠢꠞ-ꠢꠣꠝꠦꠡꠣ ꠄꠞꠣꠞꠦ ꠖꠤꠛꠣꠞ ꠟꠣꠉꠤ।

37 ꠁꠔꠣ ꠅꠁꠟ ꠎꠣꠟꠣꠁꠟ ꠇꠥꠞꠛꠣꠘꠤ, ꠗꠣꠘ-ꠉꠝꠞ ꠍꠖꠉꠣ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ, ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ, ꠁꠝꠣꠝꠔꠤ ꠡꠝꠎꠤꠛꠣꠞ ꠍꠖꠉꠣ, ꠀꠞ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠘꠤꠅꠝ। 38 ꠍꠤꠘꠣꠁ ꠝꠞꠥꠜꠥꠝꠤꠔ ꠝꠣꠛꠥꠖꠦ ꠎꠦꠖꠤꠘ ꠛꠘꠤ ꠁꠍꠞꠣꠁꠟꠞꠦ ꠢꠥꠇꠥꠝ ꠖꠤꠍꠟꠣ ꠔꠣꠘ ꠘꠣꠝꠦ ꠇꠥꠞꠛꠣꠘꠤꠞ ꠎꠤꠘꠤꠡ ꠀꠘꠣꠞ ꠟꠣꠉꠤ, ꠢꠃ ꠖꠤꠘ ꠔꠣꠁꠘ ꠔꠥꠞ ꠙꠣꠠꠞ ꠃꠙꠞꠦ ꠝꠥꠍꠣ ꠘꠛꠤꠞꠦ ꠅꠃ ꠢꠇ꠆ꠇꠟ ꠘꠤꠅꠝ-ꠇꠣꠘꠥꠘ ꠎꠣꠘꠣꠁꠍꠟꠣ।