1 ꠀꠞ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ। 3 ꠄꠞꠟꠣꠉꠤ ꠔꠥꠝꠞꠣ ꠀꠉꠦ ꠎꠦ ꠝꠤꠡꠞ ꠖꠦꠡꠅ ꠛꠡꠔ ꠇꠞꠔꠣꠄ, ꠢꠤꠘꠞ ꠝꠣꠘꠡꠦ ꠎꠦꠔꠣ ꠇꠞꠦ ꠔꠥꠝꠞꠣ ꠁꠔꠣ ꠇꠞꠤꠅ ꠘꠣ। ꠀꠞ ꠀꠝꠤ ꠔꠥꠝꠞꠣꠞꠦ ꠎꠦ ꠇꠦꠘꠣꠘ ꠖꠦꠡꠅ ꠘꠤꠞꠣꠝ, ꠢꠃ ꠖꠦꠡꠅ ꠉꠤꠀ ꠢꠣꠞꠟꠦ, ꠢꠘꠞ ꠝꠣꠘꠡꠦ ꠎꠦꠔꠣ ꠇꠞꠦ ꠁꠔꠣꠅ ꠔꠥꠝꠞꠣ ꠇꠞꠤꠅ ꠘꠣ। ꠔꠣꠞꠣ ꠎꠦꠟꠣ ꠌꠟꠦ, ꠔꠥꠝꠞꠣ ꠁꠟꠣ ꠌꠟꠤꠅ ꠘꠣ। 4 ꠛꠞꠋ ꠀꠝꠣꠞ ꠖꠦꠅꠀ ꠡꠞꠤꠅꠔ ꠝꠣꠚꠤꠇ ꠔꠥꠝꠞꠣꠞ ꠎꠤꠘ꠆ꠖꠦꠉꠤ ꠇꠣꠐꠣꠁꠛꠣꠄ। ꠈꠥꠛ ꠈꠤꠀꠟ ꠇꠞꠤꠀ ꠀꠝꠣꠞ ꠖꠦꠅꠀ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠛꠣꠄ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ। 5 ꠀꠝꠣꠞ ꠛꠣꠔꠣꠁꠟ ꠘꠤꠅꠝ-ꠇꠣꠘꠥꠘ ꠀꠞ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠔꠥꠝꠞꠣ ꠀꠝꠟ ꠇꠞꠛꠣꠄ, ꠎꠦ ꠎꠘꠦ ꠁꠔꠣ ꠀꠝꠟ ꠇꠞꠦ ꠢꠦ ꠄꠞ ꠃꠍꠤꠟ꠆ꠟꠣꠄ ꠔꠣꠞ ꠎꠣꠘ ꠛꠣꠌꠣꠁꠛ। ꠀꠝꠤꠃ ꠔ ꠝꠣꠛꠥꠖ।

6 “ꠀꠙꠘ ꠟꠃꠞ ꠈꠦꠡ-ꠇꠥꠐꠥꠝꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠛꠣ ꠛꠦꠁꠎ꠆ꠎꠔꠤ ꠇꠣꠝ ꠇꠞꠤꠅ ꠘꠣ। ꠀꠝꠤꠃ ꠔ ꠝꠣꠛꠥꠖ। 7 ꠔꠥꠝꠞꠣꠞ ꠝꠣꠎꠞ ꠇꠦꠃ ꠎꠣꠘꠥ ꠘꠤꠎꠞ ꠝꠣʼꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠤꠀ ꠔꠣꠞ ꠛꠣꠚꠞ ꠝꠣꠘ-ꠁꠎ꠆ꠎꠔ ꠘꠣ ꠟꠥꠐꠦ। ꠄꠁꠘ ꠔ ꠔꠣꠞ ꠝꠣ, ꠄꠘ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ। 8 ꠢꠣꠔꠘ ꠝꠣʼꠞ ꠟꠉꠦꠅ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠀꠞꠘꠣꠄ ꠛꠣꠚꠞ ꠛꠦꠁꠎ꠆ꠎꠔꠤ ꠅꠁꠛ। 9 ꠘꠤꠎꠞ ꠛꠁꠘ ꠛꠣ ꠢꠣꠔꠘ ꠛꠁꠘꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠣꠅ ꠢꠣꠞꠣꠝ, ꠀꠙꠘ ꠛꠣꠚꠞ ꠔꠞꠚꠣ ꠛꠁꠘ ꠛꠣ ꠝꠣʼꠞ ꠔꠞꠚꠣ ꠛꠁꠘ ꠅꠁꠟꠦꠅ ꠢꠣꠞꠣꠝ। ꠔꠣꠞꠣ ꠄꠇ ꠛꠣꠠꠤꠔ ꠎꠘꠝ ꠅꠃꠇ ꠛꠣ ꠀꠟꠣꠖꠣ ꠛꠣꠠꠤꠔ ꠎꠘꠝ ꠅꠁꠟꠦꠅ ꠢꠣꠞꠣꠝ। 10 ꠙꠥꠀ ꠛꠣ ꠙꠥꠠꠤꠞ ꠊꠞꠞ ꠘꠣꠔꠤꠘꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠁꠔꠣꠄ ꠔ ꠘꠤꠎꠞ ꠛꠦꠁꠎ꠆ꠎꠔꠤ ꠅꠄ। 11 ꠢꠣꠔꠘ ꠝꠣʼꠞ ꠊꠞꠞ ꠛꠁꠘꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠔꠣꠁ ꠔ ꠛꠁꠘ। 12 ꠀꠙꠘ ꠚꠥꠚꠥꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠄꠁꠘ ꠔ ꠛꠣꠚꠞ ꠟꠃꠞ ꠇꠥꠐꠥꠝ। 13 ꠀꠙꠘ ꠝꠁꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠄꠁꠘ ꠔ ꠝꠣʼꠞ ꠟꠃꠞ ꠇꠥꠐꠥꠝ। 14 ꠀꠙꠘ ꠌꠣꠌꠣꠞ ꠝꠣꠘ-ꠁꠎ꠆ꠎꠔ ꠟꠥꠐꠤꠀ ꠔꠣꠘ ꠛꠃꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠄꠁꠘ ꠔ ꠌꠣꠌꠤ। 15 ꠀꠙꠘ ꠙꠥꠀꠞ ꠛꠃꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠔꠣꠁ ꠔ ꠘꠤꠎꠞ ꠛꠃꠝꠣ। 16 ꠜꠣꠁꠞ ꠛꠃꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠀꠞꠘꠣꠄ ꠜꠣꠁꠞ ꠛꠦꠁꠎ꠆ꠎꠔꠤ ꠅꠁꠛ। 17 ꠇꠥꠘꠥ ꠛꠦꠐꠤ ꠝꠣꠘꠡꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣꠞ ꠛꠣꠖꠦ ꠔꠣꠁꠞ ꠙꠥꠠꠤꠞ ꠟꠉꠦ, ꠔꠣꠁꠞ ꠙꠥꠀ ꠛꠣ ꠙꠥꠠꠤꠞ ꠊꠞꠞ ꠘꠣꠔꠤꠘꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ, ꠄꠞꠣ ꠔ ꠔꠣꠁꠞ ꠟꠃꠞ ꠇꠥꠐꠥꠝ, ꠁꠔꠣ ꠛꠠ ꠈꠛꠤꠍꠤ ꠇꠣꠝ। 18 ꠀꠞ ꠛꠃ ꠎꠤꠔꠣ ꠕꠣꠇꠣ ꠢꠣꠟꠔꠦ ꠢꠣꠟꠤ ꠛꠣ ꠎꠦꠑꠣꠟꠤꠞꠦ ꠛꠤꠀ ꠇꠞꠤꠀ ꠢꠔꠤꠀꠟꠣ ꠇꠞꠣꠅ ꠢꠣꠞꠣꠝ।

19 “ꠢꠣꠄꠄꠎ ꠛꠣ ꠛꠦꠐꠤꠀꠞꠣ ꠝꠣꠡꠤꠇ ꠛꠦꠝꠣꠞ ꠕꠣꠇꠣ ꠢꠣꠟꠔꠦ ꠇꠥꠘꠥ ꠛꠦꠐꠤꠘ꠆ꠔꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠣ ꠢꠣꠞꠣꠝ। 20 ꠖꠥꠍꠞꠣ ꠇꠥꠘꠥ ꠛꠦꠐꠣꠞ ꠛꠃꠞ ꠟꠉꠦ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠤꠀ, ꠘꠤꠎꠞꠦ ꠘꠣꠙꠣꠇ ꠛꠣꠘꠣꠁꠅ ꠘꠣ।

21 “ꠔꠥꠝꠞꠣꠞ ꠝꠣꠎꠞ ꠇꠦꠃ ꠘꠤꠎꠞ ꠙꠥꠀ ꠛꠣ ꠙꠥꠠꠤꠞꠦ ꠀꠉꠥꠁꠘꠖꠤ ꠎꠣꠟꠣꠁꠀ, ꠝꠥꠟꠇ ꠖꠦꠛꠔꠣꠞ ꠘꠣꠝꠦ ꠛꠟꠤ ꠖꠤꠀ, ꠀꠙꠘ ꠀꠟ꠆ꠟꠣꠞ ꠙꠛꠤꠔ꠆ꠞ ꠘꠣꠝꠞꠦ ꠅꠡꠝ꠆ꠝꠣꠘ ꠇꠞꠤꠅ ꠘꠣ। ꠀꠝꠤꠃ ꠔ ꠝꠣꠛꠥꠖ।

22 “ꠛꠦꠐꠤꠘ꠆ꠔꠞ ꠟꠉꠦ ꠎꠦꠟꠣ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠂꠘ, ꠛꠦꠐꠣꠁꠘ꠆ꠔꠦ-ꠛꠦꠐꠣꠁꠘ꠆ꠔꠦ ꠅꠟꠣ ꠈꠛꠤꠍꠤ ꠙꠥꠋꠉꠣꠝꠤ ꠇꠞꠣ ꠢꠣꠞꠣꠝ। 23 ꠇꠥꠘꠥ ꠙꠡꠥꠞ ꠟꠉꠦ ꠈꠛꠤꠍꠤ ꠝꠤꠟꠣ-ꠝꠤꠡꠣ ꠇꠞꠤꠀ, ꠇꠥꠘꠥ ꠛꠦꠐꠣꠁꠘ ꠘꠣꠙꠣꠇ ꠛꠘꠤꠅ ꠘꠣ। ꠇꠥꠘꠥ ꠙꠡꠥꠞ ꠟꠉꠦ ꠇꠥꠘꠥ ꠛꠦꠐꠤꠘ꠆ꠔꠦꠅ ꠈꠛꠤꠍꠤ ꠝꠤꠟꠣ-ꠝꠤꠡꠣ ꠇꠞꠤꠅ ꠘꠣ। ꠁꠟꠣꠈꠣꠘ ꠈꠛꠤꠍꠤ ꠝꠤꠟꠣ-ꠝꠤꠡꠣ ꠔ ꠎꠉꠔꠞ ꠘꠤꠅꠝꠞ ꠃꠟꠐꠣ।

24 “ꠅꠃ ꠟꠣꠈꠣꠘ ꠇꠥꠘꠥ ꠈꠛꠤꠍꠤ ꠛꠦꠁꠎ꠆ꠎꠔꠤ ꠇꠣꠝ ꠇꠞꠤꠀ, ꠔꠥꠝꠞꠣꠞ ꠝꠣꠎꠞ ꠇꠦꠃ ꠎꠣꠘꠥ ꠘꠤꠎꠞꠦ ꠘꠣꠙꠣꠇ ꠘꠣ ꠛꠣꠘꠣꠄ। ꠝꠘꠅ ꠞꠣꠈꠤꠅ, ꠔꠥꠝꠞꠣꠞ ꠍꠣꠝꠘꠦ ꠕꠣꠇꠤ ꠎꠔ ꠎꠣꠔꠤ ꠅꠇꠟꠞꠦ ꠀꠝꠤ ꠈꠦꠖꠣꠁ ꠖꠤꠞꠣꠝ, ꠔꠣꠞꠣ ꠔ ꠅꠔꠣ ꠈꠛꠤꠍꠤ ꠇꠞꠤꠀ ꠘꠤꠎꠞꠦ ꠘꠣꠙꠣꠇ ꠇꠞꠍꠤꠟ। 25 ꠅꠔꠣꠞ ꠟꠣꠉꠤ ꠔꠣꠞꠣꠞ ꠖꠦꠡꠞ ꠝꠣꠐꠤ ꠘꠣꠙꠣꠇ ꠛꠘꠤꠉꠦꠍꠦ, ꠔꠣꠞꠣꠞ ꠘꠣꠚꠞꠝꠣꠘꠤꠞ ꠇꠣꠞꠘꠦ ꠀꠝꠤ ꠅꠃ ꠖꠦꠡꠞꠦ ꠡꠣꠎꠣ ꠖꠤꠞꠣꠝ, ꠅꠃ ꠖꠦꠡꠞ ꠝꠣꠐꠤꠄ ꠔꠣꠞ ꠙ꠆ꠞꠎꠣ ꠅꠇꠟꠞꠦ ꠛꠝꠤ ꠇꠞꠤ ꠚꠣꠟꠣꠁ ꠖꠦꠞ। 26 ꠅꠁꠟꠦ ꠔꠥꠝꠞꠣ ꠈꠣꠟꠤ ꠀꠝꠣꠞ ꠖꠦꠅꠀ ꠡꠞꠤꠅꠔ ꠀꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠤꠀ ꠌꠟꠤꠅ। ꠔꠥꠝꠞꠣꠞ ꠘꠤꠎꠞ ꠎꠣꠔꠤꠞ ꠛꠣ ꠔꠥꠝꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠇꠦꠃ ꠎꠣꠘꠥ ꠅꠟꠣ ꠈꠛꠤꠍꠤ ꠛꠦꠁꠎ꠆ꠎꠔꠤꠞ ꠇꠥꠘꠥꠎꠣꠔ ꠇꠣꠝ ꠘꠣ ꠇꠞꠦ। 27 ꠀꠉꠦ ꠕꠣꠇꠤ ꠎꠦꠔꠣ ꠎꠣꠔꠤ ꠅꠇꠟ ꠢꠃ ꠖꠦꠡꠅ ꠛꠡꠔ ꠇꠞꠦꠞ, ꠔꠣꠞꠣ ꠅꠃ ꠘꠝꠥꠘꠣꠞ ꠈꠛꠤꠍꠤ ꠛꠦꠁꠎ꠆ꠎꠔꠤ ꠇꠣꠝ ꠅꠇꠟ ꠇꠞꠣꠄ ꠢꠘꠞ ꠝꠣꠐꠤꠞꠦ ꠘꠣꠙꠣꠇ ꠛꠣꠘꠣꠁꠟꠤꠍꠦ। 28 ꠅꠈꠘ ꠔꠥꠝꠞꠣꠅ ꠢꠘꠅ ꠉꠤꠀ ꠎꠥꠖꠤ ꠢꠔꠣꠞ ꠟꠣꠈꠣꠘ ꠘꠣꠙꠣꠇꠤ ꠇꠣꠝ ꠇꠞꠅ, ꠔꠦ ꠔꠣꠞꠣꠞ ꠟꠣꠈꠣꠘ ꠔꠥꠝꠞꠣꠞꠦꠅ ꠢꠃ ꠖꠦꠡꠞ ꠝꠣꠐꠤꠄ ꠛꠝꠤ ꠇꠞꠤ ꠚꠣꠟꠣꠁꠛ।

29 “ꠁꠟꠣ ꠈꠛꠤꠍꠤ ꠇꠥꠘꠥ ꠇꠣꠝ ꠇꠦꠃ ꠇꠞꠟꠦ, ꠔꠥꠝꠞꠣꠞ ꠡꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠛꠣꠄ। 30 ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠔꠥꠝꠞꠣ ꠝꠣꠘꠤꠅ, ꠔꠥꠝꠞꠣ ꠢꠃ ꠖꠦꠡꠅ ꠉꠤꠀ ꠢꠣꠞꠤ ꠢꠘꠞ ꠙꠥꠞꠣꠘꠣ ꠛꠣꠡꠤꠘ꠆ꠖꠣ ꠅꠇꠟꠞ ꠌꠣꠟ-ꠌꠟꠘꠦ ꠌꠟꠤꠅ ꠘꠣ। ꠔꠣꠞꠣꠞ ꠈꠛꠤꠍꠤ ꠞꠤꠔꠤ-ꠞꠦꠅꠀꠎ ꠝꠣꠘꠤꠀ ꠔꠥꠝꠞꠣ ꠘꠣꠙꠣꠇ ꠅꠁꠅ ꠘꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।”