1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠀꠞꠅ ꠇꠁꠟꠣ, 2 “ꠔꠥꠝꠤ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠀꠝꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ ꠔ ꠙꠣꠇ-ꠙꠛꠤꠔ꠆ꠞ, ꠄꠞꠟꠣꠉꠤ ꠔꠥꠝꠞꠣꠅ ꠙꠣꠇ-ꠙꠛꠤꠔ꠆ꠞ ꠅꠅ। 3 ꠔꠥꠝꠞꠣ ꠙꠞꠔꠦꠇꠦ ꠎꠣꠞꠎꠤꠞ ꠝꠣ-ꠛꠣꠚꠞꠦ ꠔꠣꠎꠤꠝ ꠇꠞꠤꠅ, ꠀꠞ ꠀꠝꠣꠞ ꠖꠦꠅꠀ ꠢꠇꠟ ꠎꠥꠝ꠆ꠝꠣꠛꠣꠞ ꠝꠣꠘꠤꠅ। ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ। 4 ꠔꠥꠝꠞꠣ ꠇꠥꠘꠥꠎꠣꠔꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠤꠅ ꠘꠣ, ꠙꠥꠎꠣ ꠇꠞꠣꠞ ꠘꠤꠅꠔꠦ ꠚꠞ꠆ꠝꠣꠔ ꠓꠣꠟꠤꠀ ꠡꠥꠘꠣ-ꠞꠥꠙꠣ, ꠙꠤꠔꠟ-ꠔꠣꠝꠣꠖꠤ ꠇꠥꠘꠥ ꠖꠦꠛ-ꠖꠦꠛꠤꠞ ꠝꠥꠞ꠆ꠔꠤꠅ ꠛꠣꠘꠣꠁꠅ ꠘꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।

5 “ꠔꠥꠝꠞꠣ ꠎꠦꠛꠟꠣ ꠘꠤꠎꠞ ꠈꠥꠡꠤꠄ ꠝꠣꠛꠥꠖꠞ ꠘꠣꠝꠦ ꠇꠥꠘꠥ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠖꠦꠅ, ꠅꠃ ꠡꠝꠄ ꠅꠟꠣ ꠜꠣꠛ ꠟꠁꠀ ꠖꠤꠅ, ꠎꠣꠔꠦ ꠝꠣꠛꠥꠖꠞ ꠖꠞꠛꠣꠞꠅ ꠁꠔꠣ ꠇꠛꠥꠟ ꠅꠄ। 6 ꠀꠞ ꠁꠔꠣꠞ ꠢꠇꠟ ꠉꠥꠡ꠆ꠔ ꠇꠥꠞꠛꠣꠘꠤꠞ ꠖꠤꠘ ꠛꠣ ꠛꠣꠖꠞ ꠖꠤꠘ ꠈꠣꠁꠟꠤꠔꠦ ꠅꠁꠛ। ꠔꠤꠘ ꠖꠤꠘꠞ ꠖꠤꠘ ꠇꠥꠘꠥ ꠉꠥꠡ꠆ꠔ ꠛꠣꠇꠤ ꠞꠁꠟꠦ, ꠁꠔꠣ ꠀꠉꠥꠁꠘꠖꠤ ꠎꠣꠟꠣꠁꠟꠤꠅ। 7 ꠔꠤꠘ ꠖꠤꠘꠞ ꠖꠤꠘ ꠔ ꠁ ꠉꠥꠡ꠆ꠔ ꠘꠣꠙꠣꠇ ꠛꠘꠤꠎꠣꠄ, ꠁꠔꠣ ꠈꠣꠁꠟꠦ ꠔꠥꠝꠞꠣꠞ ꠇꠥꠞꠛꠣꠘꠤ ꠇꠛꠥꠟ ꠅꠁꠔ ꠘꠣꠄ। 8 ꠁ ꠉꠥꠡ꠆ꠔ ꠇꠦꠃ ꠈꠣꠁꠟꠦ ꠢꠦ ꠘꠣꠚꠞꠝꠣꠘꠤꠞ ꠖꠣꠠꠅ ꠙꠠꠛ, ꠢꠦ ꠔ ꠝꠣꠛꠥꠖꠞ ꠘꠣꠝꠞ ꠙꠣꠇ-ꠙꠛꠤꠔ꠆ꠞ ꠎꠤꠘꠤꠡꠞꠦ ꠘꠣꠙꠣꠇ ꠛꠣꠘꠣꠁꠍꠦ। ꠔꠦ ꠔꠥꠝꠞꠣꠞ ꠡꠝꠣꠎ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠛꠣꠄ।

9 “ꠈꠦꠔꠞ ꠚꠡꠟ ꠇꠣꠐꠣꠞ ꠡꠝꠄ ꠔꠥꠝꠞꠣ ꠎꠝꠤꠘꠞ ꠀꠁꠟꠞ ꠇꠣꠘ꠆ꠖꠣꠞ ꠚꠡꠟ ꠍꠣꠚ ꠇꠞꠤꠀ ꠇꠣꠐꠤꠅ ꠘꠣ, ꠀꠞ ꠇꠣꠐꠣꠞ ꠛꠣꠖꠦ ꠎꠝꠤꠘꠅ ꠚꠣꠟꠣꠁꠟ ꠚꠡꠟ ꠟꠥꠞꠤꠀ ꠘꠤꠅ ꠘꠣ। 10 ꠀꠋꠉꠥꠞ ꠈꠦꠔꠞ ꠀꠋꠉꠥꠞ ꠙꠣꠠꠤꠛꠣꠞ ꠇꠣꠟꠅ, ꠔꠟꠦ ꠚꠣꠟꠣꠁꠟ ꠀꠋꠉꠥꠞ ꠔꠥꠛꠣꠁꠀ ꠔꠥꠟꠤꠅ ꠘꠣ, ꠀꠞ ꠢꠇꠟ ꠀꠋꠉꠥꠞ ꠍꠣꠚ ꠇꠞꠤ ꠙꠣꠠꠤꠀ ꠘꠤꠅ ꠘꠣ। ꠡꠝꠣꠎꠞ ꠉꠞꠤꠛ-ꠖꠥꠈꠤ ꠀꠞ ꠛꠤꠖꠦꠡꠤ ꠝꠥꠍꠣꠚꠤꠞꠞ ꠟꠣꠉꠤ ꠁꠔꠣ ꠇꠤꠍꠥ ꠕꠁꠀ ꠎꠣꠁꠅ। ꠀꠝꠤ ꠀꠟ꠆ꠟꠣꠃ ꠔ ꠔꠥꠝꠞꠣꠞ ꠝꠣꠛꠥꠖ।

11 “ꠌꠥꠞꠤ ꠇꠞꠤꠅ ꠘꠣ, ꠝꠤꠍꠣ ꠝꠣꠔꠤꠅ ꠘꠣ, ꠀꠞ ꠄꠇꠦ-ꠅꠁꠘ꠆ꠘꠦ ꠐꠉꠣ-ꠐꠉꠤ ꠇꠞꠤꠅ ꠘꠣ। 12 ꠔꠥꠝꠞꠣ ꠀꠝꠣꠞ ꠘꠣꠝ ꠟꠁꠀ ꠝꠤꠍꠣ ꠇꠍꠝ ꠈꠣꠁꠅ ꠘꠣ, ꠁꠟꠣ ꠇꠞꠟꠦ ꠔꠥꠝꠞꠣꠞ ꠀꠟ꠆ꠟꠣꠞ ꠘꠣꠝꠞꠦ ꠅꠙꠛꠤꠔ꠆ꠞ ꠇꠞꠣ ꠅꠄ। ꠀꠝꠤꠃ ꠔ ꠝꠣꠛꠥꠖ।

13 “ꠇꠥꠘꠥ ꠀꠞꠤ-ꠚꠞꠤꠞ ꠃꠙꠞꠦ ꠎꠥꠞ-ꠎꠥꠟꠥꠝ ꠇꠞꠤꠅ ꠘꠣ, ꠔꠣꠞꠣꠞ ꠇꠥꠘꠥ ꠎꠤꠘꠤꠡ ꠇꠣꠠꠤꠀ ꠘꠤꠅ ꠘꠣ। ꠞꠥꠎꠤ ꠇꠣꠝꠟꠣꠞ ꠛꠦꠔꠘ ꠅꠃ ꠖꠤꠘꠞ ꠝꠣꠎꠦꠃ ꠀꠖꠣꠄ ꠇꠞꠤꠅ, ꠛꠣꠖꠞ ꠖꠤꠘ ꠙꠞ꠆ꠎꠘ꠆ꠔ ꠔꠣꠞ ꠛꠦꠔꠘ ꠀꠐꠇꠣꠁ ꠕꠁꠅ ꠘꠣ। 14 ꠇꠥꠘꠥ ꠈꠣꠟꠥꠀꠞꠦ ꠛꠖ꠆ꠖꠥꠀ ꠖꠤꠅ ꠘꠣ, ꠇꠣꠘꠣ ꠛꠣ ꠀꠘ꠆ꠖꠣꠄ ꠃꠡ꠆ꠐꠣ ꠈꠣꠁꠛꠣꠞ ꠟꠣꠉꠤ ꠔꠣꠞ ꠙꠕꠞ ꠝꠣꠎꠦ ꠇꠥꠘ꠆ꠔꠣ ꠕꠁꠅ ꠘꠣ। ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞꠦ ꠁꠎ꠆ꠎꠔ-ꠔꠣꠎꠤꠝ ꠇꠞꠤꠅ, ꠀꠝꠤꠃ ꠔ ꠝꠣꠛꠥꠖ।

15 “ꠘꠣ-ꠢꠇ ꠛꠤꠌꠣꠞ ꠇꠞꠤꠅ ꠘꠣ, ꠛꠤꠌꠣꠞꠞ ꠝꠣꠎꠦ ꠉꠞꠤꠛ-ꠗꠘꠤ, ꠛꠣ ꠢꠥꠞꠥ-ꠛꠠꠞ ꠙꠇ꠆ꠇꠙꠣꠔꠤ ꠅꠁꠅ ꠘꠣ, ꠢꠇꠟꠞ ꠟꠣꠉꠤ ꠢꠇ ꠛꠤꠌꠣꠞ ꠇꠞꠤꠅ। 16 ꠝꠣꠘꠡꠞ ꠛꠖꠘꠣꠝ ꠉꠣꠁꠀ ꠉꠣꠁꠀ ꠊꠥꠞꠤꠅ ꠘꠣ, ꠇꠥꠘꠥ ꠝꠣꠘꠡꠞ ꠎꠣꠘꠞ ꠈꠦꠔꠤ ꠅꠄ, ꠁꠟꠣ ꠇꠥꠘꠥ ꠇꠣꠝ ꠇꠞꠤꠅ ꠘꠣ। ꠀꠝꠤꠃ ꠔ ꠝꠣꠛꠥꠖ।

17 “ꠀꠙꠘ ꠀꠞꠤ-ꠚꠞꠤꠞ ꠛꠣꠄ ꠁꠋꠡꠣ-ꠖꠥꠡꠝꠘꠤꠞ ꠜꠣꠛ ꠝꠘꠞ ꠝꠣꠎꠦ ꠉꠣꠕꠤꠀ ꠞꠣꠈꠤꠅ ꠘꠣ। ꠔꠣꠞ ꠅꠙꠞꠣꠗ ꠔꠣꠞꠦ ꠛꠥꠎꠣꠁ ꠖꠤꠅ, ꠔꠦꠃ ꠔꠣꠞ ꠉꠥꠘꠣꠞ ꠜꠣꠞ ꠔꠥꠝꠣꠞ ꠃꠙꠞꠦ ꠀꠁꠔ ꠘꠣꠄ। 18 ꠘꠤꠎꠞ ꠎꠣꠔꠤꠞ ꠝꠣꠘꠡꠞ ꠛꠖꠟꠣ ꠟꠁꠅ ꠘꠣ, ꠔꠣꠞꠣꠞ ꠛꠣꠄ ꠎꠤꠖ-ꠁꠋꠡꠣꠞ ꠜꠣꠛ ꠝꠘꠞ ꠝꠣꠎꠦ ꠉꠣꠕꠤꠀ ꠞꠣꠈꠤꠅ ꠘꠣ। ꠀꠞꠤ-ꠚꠞꠤꠞꠦ ꠔꠥꠝꠣꠞ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ। ꠀꠝꠤꠃ ꠔ ꠝꠣꠛꠥꠖ।

19 “ꠔꠥꠝꠞꠣ ꠀꠝꠣꠞ ꠘꠤꠅꠝ-ꠇꠣꠘꠥꠘ ꠝꠣꠘꠤꠀ ꠌꠟꠤꠅ। ꠄꠇ ꠎꠣꠔꠞ ꠙꠡꠥꠞ ꠟꠉꠦ ꠀꠞꠇ ꠎꠣꠔꠞ ꠙꠡꠥꠞꠦ ꠚꠣꠟ ꠈꠣꠛꠣꠁꠅ ꠘꠣ। ꠄꠇ ꠎꠝꠤꠘꠅ ꠖꠥꠁ ꠎꠣꠔꠞ ꠛꠤꠌ ꠈꠦꠔ ꠇꠞꠤꠅ ꠘꠣ, ꠀꠞ ꠖꠥꠁ ꠎꠣꠔꠞ ꠡꠥꠔꠣꠖꠤ ꠛꠣꠘꠣꠁꠟ ꠇꠣꠙꠠ ꠚꠤꠘ꠆ꠖꠤꠅ ꠘꠣ।

20 “ꠇꠥꠘꠥ ꠛꠣꠘ꠆ꠖꠤ ꠛꠦꠐꠤꠞ ꠛꠤꠀ ꠑꠤꠇ ꠇꠞꠣ ꠅꠁꠍꠦ, ꠅꠁꠟꠦ ꠔꠣꠁꠞ ꠝꠢꠞꠣꠘꠣꠞ ꠐꠦꠇꠣ ꠖꠦꠅꠀ ꠅꠁꠍꠦ ꠘꠣ, ꠛꠣ ꠝꠣꠟꠤꠇꠦ ꠎꠦꠉꠥꠞꠦ ꠀꠎꠣꠖ ꠇꠞꠤꠀ ꠖꠤꠍꠂꠘ ꠘꠣ, ꠁꠟꠣ ꠇꠥꠘꠥ ꠛꠣꠘ꠆ꠖꠤꠞ ꠟꠉꠦ ꠇꠦꠃ ꠡꠞꠤꠟꠤ ꠝꠤꠟꠣ-ꠝꠤꠡꠣ ꠇꠞꠟꠦ, ꠔꠦ ꠢꠦ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ। ꠁ ꠖꠥꠁꠅ ꠎꠘꠞꠦ ꠎꠣꠘꠦ ꠝꠣꠞꠤꠅ ꠘꠣ, ꠇꠣꠞꠘ ꠅꠃ ꠛꠣꠘ꠆ꠖꠤ ꠙꠥꠠꠤ ꠔ ꠀꠎꠣꠖ ꠅꠁꠍꠦ ꠘꠣ। 21 ꠅꠁꠟꠦ ꠅꠃ ꠛꠦꠐꠣꠄ ꠔꠣꠞ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ, ꠝꠣꠛꠥꠖꠞ ꠘꠣꠝꠦ ꠘꠤꠈꠥꠔ ꠄꠉꠥ ꠝꠦꠠꠣ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠍꠣꠝꠘꠦ ꠀꠎꠤꠞ ꠅꠁꠛ। 22 ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠀꠘꠣ ꠢꠃ ꠙꠡꠥꠞꠦ ꠇꠥꠞꠛꠣꠘꠤ ꠖꠤꠀ, ꠁꠝꠣꠝ ꠍꠣꠛꠦ ꠝꠣꠛꠥꠖꠞ ꠍꠣꠝꠘꠦ ꠔꠣꠞ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣꠞ ꠛꠣꠖꠦ, ꠢꠦ ꠅꠃ ꠉꠥꠘꠣꠞ ꠝꠣꠚꠤ ꠙꠣꠁꠛ।

23 “ꠔꠥꠝꠞꠣ ꠘꠤꠎꠞ ꠖꠦꠡꠅ ꠉꠤꠀ ꠢꠣꠞꠤ ꠇꠥꠘꠥ ꠚꠟꠞ ꠉꠣꠍ ꠟꠣꠉꠣꠁꠟꠦ, ꠔꠤꠘ ꠛꠍꠞ ꠙꠞ꠆ꠎꠘ꠆ꠔ ꠁ ꠉꠣꠍꠞ ꠚꠟ ꠔꠥꠝꠞꠣꠞ ꠟꠣꠉꠤ ꠢꠣꠞꠣꠝ। ꠅꠃ ꠔꠤꠘ ꠛꠍꠞꠞ ꠝꠣꠎꠦ ꠁ ꠉꠣꠍꠞ ꠚꠟ ꠈꠣꠅꠀ ꠘꠣꠎꠣꠁꠎ। 24 ꠌꠣꠁꠞ ꠘꠝ꠆ꠛꠞ ꠛꠍꠞꠅ ꠁ ꠉꠣꠍꠞ ꠢꠇꠟ ꠚꠟ ꠝꠣꠛꠥꠖꠞ ꠡꠥꠇꠥꠞ-ꠉꠥꠎꠣꠞꠤꠞ ꠘꠤꠅꠔꠦ ꠔꠣꠘ ꠘꠣꠝꠦ ꠖꠤꠟꠣꠁꠛꠣꠄ। 25 ꠙꠣꠌ ꠘꠝ꠆ꠛꠞ ꠛꠍꠞ ꠕꠣꠇꠤ ꠅꠃ ꠉꠣꠍꠞ ꠚꠟ ꠔꠥꠝꠞꠣꠞ ꠟꠣꠉꠤ ꠢꠣꠟꠣꠟ। ꠁꠔꠣ ꠝꠣꠘꠟꠦ ꠔꠥꠝꠞꠣꠞ ꠉꠣꠍꠅ ꠛꠃꠔ ꠚꠟ ꠀꠁꠛ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।

26 “ꠔꠥꠝꠞꠣ ꠟꠃ ꠡꠝꠦꠔ ꠇꠥꠘꠥ ꠉꠥꠡ꠆ꠔ ꠈꠣꠁꠅ ꠘꠣ। ꠇꠥꠘꠥ ꠎꠣꠔꠞ ꠎꠣꠖꠥ-ꠝꠘꠔ꠆ꠞ ꠛꠣ ꠉꠘꠣ-ꠛꠣꠍꠣ ꠢꠤꠇꠤꠅ ꠘꠣ, ꠀꠞ ꠛꠦꠛꠢꠣꠞꠅ ꠇꠞꠤꠅ ꠘꠣ। 27 ꠝꠣꠕꠣꠞ ꠖꠥꠁꠅ ꠉꠣꠟꠣꠞ ꠌꠥꠟ ꠍꠣꠐꠣ, ꠛꠣ ꠖꠣꠠꠤꠞ ꠀꠉꠣ ꠇꠣꠐꠤꠅ ꠘꠣ। 28 ꠝꠥꠞ꠆ꠖꠣꠞ ꠟꠣꠉꠤ ꠀꠢꠣꠎꠣꠞꠤ ꠇꠞꠣꠔ ꠉꠤꠀ ꠘꠤꠎꠞ ꠡꠞꠤꠟꠅ ꠎꠈꠝ ꠇꠞꠤꠅ ꠘꠣ। ꠉꠔꠞꠞ ꠝꠣꠎꠦ ꠇꠥꠘꠥꠎꠣꠔ ꠌꠣꠙ-ꠍꠛꠤ ꠀꠇꠤꠅ ꠘꠣ। ꠀꠝꠤꠃ ꠔ ꠝꠣꠛꠥꠖ।

29 “ꠐꠦꠇꠣ ꠞꠥꠎꠤꠞ ꠘꠤꠅꠔꠦ ꠘꠤꠎꠞ ꠙꠥꠠꠤꠞꠦ ꠍꠤꠟꠣꠘꠤ-ꠛꠖꠝꠣꠁꠡꠤꠔ ꠟꠣꠉꠣꠁꠅ ꠘꠣ। ꠀꠞꠘꠣꠄ ꠀꠡ꠆ꠔꠣ ꠖꠦꠡ ꠎꠤꠘꠣꠄ ꠜꠞꠤꠎꠤꠛ, ꠙꠥꠞꠣ ꠖꠦꠡꠅ ꠈꠛꠤꠍꠤ ꠛꠣꠠꠤꠛ। 30 ꠀꠝꠣꠞ ꠖꠦꠅꠀ ꠎꠥꠝ꠆ꠝꠣꠛꠣꠞꠦ ꠎꠤꠞꠣꠁꠅ, ꠀꠞ ꠀꠝꠣꠞ ꠇꠣꠛꠣ ꠊꠞꠞꠦ ꠁꠎ꠆ꠎꠔ ꠇꠞꠤꠅ। ꠀꠝꠤꠃ ꠔ ꠝꠣꠛꠥꠖ।

31 “ꠎꠤꠘ꠆ꠘꠣꠔ ꠛꠣ ꠙꠦꠞꠔ ꠡꠣꠗꠇ, ꠉꠘꠇ ꠛꠣ ꠎꠣꠖꠥ-ꠐꠥꠘꠣ ꠇꠞꠞꠣꠞ ꠉꠦꠍꠦ ꠎꠣꠁꠅ ꠘꠣ, ꠁꠔꠣꠞ ꠟꠉꠦ ꠝꠤꠡꠤꠅ ꠘꠣ। ꠀꠞꠘꠣꠄ ꠁꠔꠣꠄ ꠔꠥꠝꠞꠣꠞꠦ ꠘꠣꠙꠣꠇ ꠛꠣꠘꠣꠁꠟꠤꠛꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।

32 “ꠝꠥꠞꠛ꠆ꠛꠤ ꠝꠣꠘꠥꠡ ꠗꠣꠞꠅ ꠀꠁꠟꠦ ꠔꠥꠝꠞꠣ ꠃꠛꠣꠁꠀ ꠁꠎ꠆ꠎꠔ ꠖꠤꠅ। ꠔꠥꠝꠞꠣ ꠘꠤꠎꠞ ꠀꠟ꠆ꠟꠣꠞ ꠒꠞ-ꠈꠚꠦ ꠞꠁꠅ। ꠀꠝꠤꠃ ꠔ ꠝꠣꠛꠥꠖ।

33 “ꠔꠥꠝꠞꠣꠞ ꠖꠦꠡꠅ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠝꠣꠘꠡꠞ ꠃꠙꠞꠦ ꠎꠥꠟꠥꠝ ꠇꠞꠤꠅ ꠘꠣ। 34 ꠘꠤꠎꠞ ꠎꠣꠔꠤꠞ ꠟꠉꠦ ꠎꠦꠟꠣ ꠛꠦꠛꠢꠣꠞ ꠇꠞꠅ, ꠔꠣꠞꠣꠞ ꠟꠉꠦꠅ ꠅꠟꠣ ꠛꠦꠛꠢꠣꠞ ꠇꠞꠤꠅ, ꠔꠣꠞꠣꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ। ꠝꠘꠅ ꠞꠣꠈꠤꠅ, ꠔꠥꠝꠞꠣꠅ ꠝꠤꠡꠞ ꠖꠦꠡꠅ ꠜꠤꠘ-ꠖꠦꠡꠤ ꠢꠣꠟꠔꠦ ꠀꠍꠟꠣꠄ, ꠀꠞ ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।

35 “ꠔꠥꠝꠞꠣ ꠇꠥꠘꠥꠎꠣꠔ ꠝꠣꠙ-ꠎꠥꠇꠅ ꠀꠞ ꠙꠣꠟ꠆ꠟꠣꠞ ꠃꠎꠘꠅ ꠛꠦ-ꠁꠘꠍꠣꠚꠤ ꠇꠞꠤꠅ ꠘꠣ। 36 ꠔꠥꠝꠞꠣꠞ ꠙꠣꠟ꠆ꠟꠣ-ꠙꠣꠔ꠆ꠔꠞ, ꠢꠦꠞ-ꠚꠥꠞꠣ, ꠘꠟ-ꠖꠠꠤ, ꠝꠣꠙꠞ ꠢꠇꠟꠔꠣ ꠎꠣꠘꠥ ꠑꠤꠇ-ꠑꠣꠇ ꠕꠣꠇꠦ। ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ, ꠀꠞ ꠝꠤꠡꠞ ꠖꠦꠡ ꠕꠣꠇꠤ ꠀꠝꠤꠃ ꠔꠥꠝꠞꠣꠞꠦ ꠛꠣꠞ ꠇꠞꠤ ꠀꠘꠍꠤ। 37 ꠀꠝꠣꠞ ꠛꠣꠔꠣꠁꠟ ꠢꠇꠟ ꠘꠤꠅꠝ-ꠇꠣꠘꠥꠘ ꠀꠞ ꠙꠥꠞꠣꠙꠥꠞ ꠡꠞꠤꠅꠔ ꠔꠥꠝꠞꠣ ꠝꠣꠘꠤꠀ ꠌꠟꠤꠅ। ꠀꠝꠤꠃ ꠔ ꠝꠣꠛꠥꠖ।”