1 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠢꠥꠇꠥꠝ ꠖꠦꠅ, ꠌꠦꠞꠣꠉ ꠖꠣꠘꠤꠞ ꠌꠦꠞꠣꠉ ꠅꠇꠟ ꠢꠣꠝꠦꠡꠣ ꠎꠣꠟꠣꠁꠀ ꠞꠣꠈꠣꠞ ꠘꠤꠅꠔꠦ, ꠔꠣꠞꠣ ꠎꠄꠔꠥꠘ ꠍꠦꠌꠤꠀ ꠈꠣꠐꠤ ꠔꠦꠟ ꠛꠣꠘꠣꠁꠀ ꠔꠥꠝꠣꠞ ꠉꠦꠍꠦ ꠟꠁꠀ ꠀꠁꠔ। 3 ꠀꠞ ꠇꠣꠛꠣ ꠊꠞꠞ ꠜꠤꠔꠞꠦ ꠡꠣꠢꠣꠖꠔ ꠡꠘ꠆ꠖꠥꠇꠞ ꠙꠞ꠆ꠖꠣꠞ ꠛꠣꠞꠦ, ꠁꠝꠣꠝ ꠢꠣꠞꠥꠘꠦ ꠢꠣꠁꠘ꠆ꠎꠣ ꠕꠣꠇꠤ ꠚꠎꠞ ꠙꠞ꠆ꠎꠘ꠆ꠔ ꠌꠦꠞꠣꠉ ꠖꠣꠘꠤꠞ ꠌꠦꠞꠣꠉ ꠅꠇꠟ ꠎꠣꠟꠣꠁ ꠞꠣꠈꠛꠣ। ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠢꠞ-ꠢꠣꠝꠦꠡꠣ ꠁꠔꠣ ꠎꠣꠞꠤ ꠞꠁꠛ। 4 ꠝꠣꠛꠥꠖꠞ ꠍꠣꠝꠘꠦ ꠕꠅꠀ ꠅꠃ ꠈꠣꠐꠤ ꠡꠥꠘꠣꠞ ꠌꠦꠞꠣꠉ ꠖꠣꠘꠤꠞ ꠌꠦꠞꠣꠉ ꠅꠇꠟꠞꠦ ꠔꠣꠁꠘ ꠢꠣꠝꠦꠡꠣ ꠎꠣꠄ-ꠎꠔꠘ ꠇꠞꠛꠣ।

5 “ꠀꠞ ꠢꠥꠘꠅ, ꠝꠄꠖꠣ ꠖꠤꠀ ꠛꠣꠞꠅ ꠈꠣꠘ ꠞꠥꠐꠤ ꠛꠣꠘꠣꠁꠅ, ꠙꠞꠔꠦꠇ ꠞꠥꠐꠤ ꠅꠁꠛ ꠖꠥꠁ ꠡꠦꠞ ꠝꠄꠖꠣꠞ। 6 ꠛꠣꠘꠣꠁꠀ ꠅꠃ ꠞꠥꠐꠤꠞꠦ ꠝꠣꠛꠥꠖꠞ ꠍꠣꠝꠘꠞ ꠈꠣꠐꠤ ꠡꠥꠘꠣꠞ ꠐꠦꠛꠥꠟꠞ ꠃꠙꠞꠦ ꠍꠄꠈꠣꠘ ꠍꠄꠈꠣꠘ ꠇꠞꠤ ꠖꠥꠁ ꠟꠣꠁꠘꠦ ꠢꠣꠎꠣꠁ ꠕꠁꠅ। 7 ꠙꠞꠔꠦꠇ ꠟꠣꠁꠘꠞ ꠞꠥꠐꠤꠞ ꠗꠣꠞꠅ ꠈꠣꠐꠤ ꠟꠥꠛꠣꠘ-ꠀꠉꠞ ꠕꠁꠅ। ꠕꠁꠀ ꠘꠤꠡꠣꠘꠣ ꠢꠤꠡꠣꠛꠦ ꠞꠥꠐꠤꠞ ꠛꠖꠟꠣ ꠅꠃ ꠀꠉꠞꠖꠤ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ। 8 ꠙꠞꠔꠦꠇ ꠎꠥꠝ꠆ꠝꠣꠛꠣꠞꠦ ꠛꠘꠤ ꠁꠍꠞꠣꠁꠟꠞ ꠙꠇ꠆ꠇ ꠕꠣꠇꠤ ꠙꠛꠤꠔ꠆ꠞ ꠅꠃ ꠞꠥꠐꠤꠞꠦ ꠁꠝꠣꠝ ꠍꠣꠛꠦ ꠝꠣꠛꠥꠖꠞ ꠘꠎꠞꠞ ꠍꠣꠝꠘꠦ ꠢꠣꠎꠣꠁꠀ ꠕꠁꠛꠣ। ꠔꠣꠞꠣꠞ ꠅꠃ ꠞꠥꠐꠤ ꠖꠦꠅꠀ ꠔ ꠢꠞ-ꠢꠣꠝꠦꠡꠣ ꠌꠤꠞꠇꠣꠟ ꠎꠣꠞꠤ ꠞꠁꠛ। 9 ꠛꠣꠖꠦ ꠁꠝꠣꠝ ꠢꠣꠞꠥꠘ ꠀꠞ ꠔꠣꠘ ꠛꠋꠡꠗꠞꠦ ꠙꠛꠤꠔ꠆ꠞ ꠇꠣꠛꠣ ꠊꠞꠞ ꠡꠤꠝꠣꠘꠣꠞ ꠜꠤꠔꠞꠦ ꠅꠃ ꠞꠥꠐꠤ ꠈꠣꠁꠛꠣ, ꠁꠔꠣ ꠅꠁꠟ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤꠞ ꠎꠤꠘꠤꠡꠞ ꠝꠣꠎꠦ ꠄꠇ ꠈꠣꠍ ꠙꠛꠤꠔ꠆ꠞ ꠎꠤꠘꠤꠡ। ꠁꠔꠣ ꠔ ꠁꠝꠣꠝ ꠅꠇꠟꠞ ꠙꠣꠅꠘꠣ, ꠅꠃ ꠘꠤꠅꠝ ꠢꠞ-ꠢꠣꠝꠦꠡꠣ ꠎꠣꠞꠤ ꠞꠁꠛ।”

10 ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠅꠟꠣ ꠄꠇ ꠛꠦꠐꠣ ꠀꠍꠤꠟ, ꠎꠦꠉꠥꠞ ꠛꠣꠚ ꠅꠁꠟ ꠝꠤꠡꠞꠤ ꠀꠞ ꠝꠣ ꠛꠘꠤ ꠁꠍꠞꠣꠁꠟ ꠎꠣꠔꠤꠞ। ꠁ ꠛꠦꠐꠣꠄ ꠀꠞ ꠛꠘꠤ ꠁꠍꠞꠣꠁꠟꠞ ꠀꠞꠇ ꠛꠦꠐꠣꠄ ꠇꠦꠝ꠆ꠙꠞ ꠜꠤꠔꠞꠦ ꠝꠣꠞꠣ-ꠝꠣꠞꠤ ꠟꠣꠉꠟ। 11 ꠅꠃ ꠡꠝꠄ ꠛꠘꠤ ꠁꠍꠞꠣꠁꠟꠤ ꠛꠦꠐꠤꠞ ꠙꠥꠀꠄ ꠝꠣꠛꠥꠖꠞ ꠘꠣꠝꠦ ꠇꠥꠚꠥꠞꠤ ꠝꠣꠔ ꠝꠣꠔꠤꠀ ꠟꠣꠘ꠆ꠘꠔ ꠖꠤꠟ। ꠁꠔꠣ ꠢꠥꠘꠤꠀ ꠝꠣꠘꠡꠦ ꠔꠣꠞꠦ ꠝꠥꠍꠣ ꠘꠛꠤꠞ ꠉꠦꠍꠦ ꠟꠁꠀ ꠉꠦꠟꠣ। ꠅꠃ ꠛꠦꠐꠣꠞ ꠝꠣʼꠞ ꠘꠣꠝ ꠡꠣꠟꠥꠝꠤ, ꠔꠣꠁ ꠀꠍꠤꠟ ꠖꠣꠘ ꠈꠣꠘ꠆ꠖꠣꠘꠞ ꠖꠤꠛꠞꠤꠞ ꠙꠥꠠꠤ। 12 ꠀꠞ ꠝꠣꠘꠡꠦ ꠅꠃ ꠛꠦꠙꠣꠞꠦ ꠝꠣꠛꠥꠖꠞ ꠝꠞ꠆ꠎꠤ ꠢꠥꠘꠣꠞ ꠟꠣꠉꠤ ꠅꠃ ꠛꠦꠐꠣꠞꠦ ꠀꠐꠇꠣꠁꠀ ꠕꠁꠟꠣ।

13 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 14 “ꠀꠝꠣꠞ ꠘꠣꠝꠦ ꠟꠣꠘ꠆ꠘꠔ ꠖꠦꠅꠞꠣ ꠅꠃ ꠛꠦꠐꠣꠞꠦ ꠟꠁꠀ ꠇꠦꠝ꠆ꠙꠞ ꠛꠣꠞꠦ ꠎꠣꠅ। ꠉꠦꠟꠦ ꠎꠦꠔꠣ ꠝꠣꠘꠡꠦ ꠅꠃ ꠇꠥꠚꠥꠞꠤ ꠝꠣꠔ ꠢꠥꠘꠍꠦ, ꠔꠣꠞꠣ ꠢꠇꠟꠦ ꠅꠉꠥꠞ ꠝꠣꠕꠣ ꠀꠔꠣꠁ ꠖꠦꠃꠇ, ꠛꠣꠖꠦ ꠡꠝꠣꠎꠞ ꠢꠇꠟ ꠝꠣꠘꠡꠦ ꠙꠣꠔ꠆ꠔꠞ ꠝꠣꠞꠤꠀ ꠔꠣꠞꠦ ꠎꠣꠘꠦ ꠝꠣꠞꠃꠇ। 15 ꠀꠞ ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠎꠦ ꠝꠣꠘꠡꠦ ꠀꠟ꠆ꠟꠣꠞꠦ ꠟꠣꠘ꠆ꠘꠔ ꠖꠦꠄ, ꠔꠣꠞ ꠘꠣꠚꠞꠝꠣꠘꠤꠞ ꠟꠣꠉꠤ ꠢꠦ ꠘꠤꠎꠦꠃ ꠖꠣꠄꠁ। 16 ꠀꠞ ꠎꠦ ꠝꠣꠘꠡꠦ ꠝꠣꠛꠥꠖꠞ ꠘꠣꠝꠦ ꠇꠥꠚꠥꠞꠤ ꠝꠣꠔ ꠝꠣꠔꠤꠛ, ꠔꠣꠞꠦ ꠎꠣꠘꠦ ꠝꠣꠞꠤꠟꠤꠛꠣꠄ। ꠛꠘꠤ ꠁꠍꠞꠣꠁꠟꠞ ꠡꠝꠣꠎꠦ ꠔꠣꠞꠦ ꠙꠣꠔ꠆ꠔꠞ ꠝꠣꠞꠤꠀ ꠎꠣꠘꠦ ꠝꠣꠞꠛꠣ। ꠢꠦ ꠛꠘꠤ ꠁꠍꠞꠣꠁꠟꠤ ꠅꠃꠇ ꠛꠣ ꠔꠣꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ ꠎꠣꠔꠤꠞ ꠝꠣꠘꠥꠡ ꠅꠃꠇ, ꠀꠟ꠆ꠟꠣꠞ ꠘꠣꠝꠦ ꠎꠦꠉꠤꠄ ꠇꠥꠚꠥꠞꠤ ꠝꠣꠔ ꠝꠣꠔꠤꠛ, ꠔꠣꠞꠦ ꠘꠤꠌ꠆ꠌꠤꠔ ꠎꠣꠘꠦ ꠝꠣꠞꠛꠣꠄ।

17 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠖꠥꠍꠞꠣ ꠝꠣꠘꠡꠞꠦ ꠈꠥꠘ ꠇꠞꠤꠟꠣꠄ, ꠔꠦ ꠔꠥꠝꠞꠣ ꠔꠣꠞꠦꠅ ꠈꠥꠘ ꠇꠞꠛꠣꠄ। 18 ꠇꠥꠘꠥ ꠝꠣꠘꠡꠦ ꠎꠥꠖꠤ ꠖꠥꠍꠞꠣ ꠝꠣꠘꠡꠞ ꠇꠥꠘꠥ ꠙꠡꠥꠞꠦ ꠝꠣꠞꠤꠟꠣꠄ, ꠔꠦ ꠅꠉꠥꠞ ꠛꠖꠟꠣ ꠢꠦ ꠀꠞꠇ ꠙꠡꠥꠞ ꠖꠣꠝ ꠖꠤꠀ ꠈꠦꠔꠤ-ꠙꠥꠞꠘ ꠖꠤꠛ। ꠎꠣꠘꠞ ꠛꠖꠟꠣ ꠎꠣꠘ। 19 ꠇꠦꠃ ꠎꠥꠖꠤ ꠀꠞꠇ ꠎꠘꠞꠦ ꠝꠣꠞꠦ, ꠀꠞ ꠅꠃ ꠝꠣꠁꠞꠞ ꠟꠣꠉꠤ ꠡꠞꠤꠟꠞ ꠇꠥꠘꠥ ꠅꠋꠉꠞ ꠈꠦꠔꠤ ꠅꠄ, ꠔꠦ ꠢꠦ ꠎꠦꠟꠣ ꠈꠦꠔꠤ ꠇꠞꠍꠦ, ꠔꠣꠞ ꠅꠋꠉꠞꠦꠅ ꠅꠟꠣ ꠈꠦꠔꠤ ꠇꠞꠛꠣꠄ। 20 ꠀꠒ꠆ꠒꠤ ꠜꠣꠋꠉꠣꠞ ꠛꠖꠟꠣ ꠀꠒ꠆ꠒꠤ ꠜꠣꠋꠉꠤꠛꠣꠄ, ꠌꠃꠈꠞ ꠛꠖꠟꠣ ꠌꠃꠈ, ꠖꠣꠔꠞ ꠛꠖꠟꠣ ꠖꠣꠔ। ꠢꠃ ꠎꠘꠞ ꠎꠦ ꠅꠋꠉꠞꠦ ꠢꠦ ꠈꠦꠔꠤ ꠇꠞꠍꠦ, ꠔꠣꠞꠅ ꠅꠟꠣ ꠈꠦꠔꠤ ꠇꠞꠛꠣꠄ। 21 ꠇꠥꠘꠥ ꠙꠡꠥꠞꠦ ꠎꠣꠘꠦ ꠝꠣꠞꠟꠦ ꠄꠞ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ, ꠅꠁꠟꠦ ꠇꠥꠘꠥ ꠝꠣꠘꠥꠡꠞꠦ ꠈꠥꠘ ꠇꠞꠟꠦ ꠔꠣꠞꠦꠃ ꠎꠣꠘꠦ ꠝꠣꠞꠤꠟꠤꠛꠣꠄ। 22 ꠛꠘꠤ ꠁꠍꠞꠣꠁꠟ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ ꠎꠣꠔꠤꠞ ꠝꠣꠘꠡꠞ ꠟꠣꠉꠤ ꠅꠃ ꠄꠇꠁ ꠀꠁꠘ ꠎꠣꠞꠤ ꠞꠁꠛ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।”

23 ꠛꠣꠖꠦ ꠝꠥꠍꠣ ꠘꠛꠤꠄ ꠛꠘꠤ ꠁꠍꠞꠣꠁꠟꠞꠦ ꠁꠔꠣ ꠢꠇꠟꠔꠣ ꠎꠣꠘꠣꠁꠟꠣ। ꠔꠦꠃ ꠎꠦ ꠛꠦꠐꠣꠄ ꠢꠃ ꠇꠥꠚꠥꠞꠤ ꠝꠣꠔꠤꠍꠤꠟ, ꠝꠣꠘꠡꠦ ꠅꠉꠥꠞꠦ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠙꠣꠔ꠆ꠔꠞ ꠝꠣꠞꠤꠀ ꠎꠣꠘꠦ ꠝꠣꠞꠤꠟꠤꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠛꠘꠤ ꠁꠍꠞꠣꠁꠟꠦ ꠑꠤꠇ ꠅꠟꠣꠃ ꠇꠞꠟꠣ।