1 ꠀꠞ ꠝꠣꠛꠥꠖꠦ ꠔꠥꠞ ꠙꠣꠠꠞ ꠃꠙꠞꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠀꠝꠤ ꠎꠦ ꠖꠦꠡꠈꠣꠘ ꠔꠥꠝꠞꠣꠞꠦ ꠖꠤꠀꠞ, ꠢꠃ ꠖꠦꠡꠅ ꠉꠤꠀ ꠢꠣꠞꠟꠦ ꠔꠥꠝꠞꠣ ꠈꠤꠀꠟ ꠞꠣꠈꠤꠅ, ꠢꠘꠞ ꠎꠝꠤ-ꠝꠣꠐꠤꠄ ꠎꠣꠘꠥ ꠝꠣꠛꠥꠖꠞ ꠘꠣꠝꠦ ꠀꠞꠣꠝ ꠇꠞꠣꠞ ꠡꠝꠄ ꠙꠣꠄ। 3 ꠔꠥꠝꠞꠣ ꠍꠄ ꠛꠍꠞ ꠎꠝꠤꠘꠅ ꠈꠦꠔ-ꠈꠣꠝꠣꠞ ꠇꠞꠤꠅ, ꠀꠋꠉꠥꠞ ꠉꠣꠍꠞ ꠒꠣꠟ ꠙꠣꠟꠣ ꠍꠣꠐꠤꠀ ꠚꠄ-ꠚꠡꠟ ꠛꠣꠠꠤꠔ ꠀꠘꠤꠅ। 4 ꠅꠁꠟꠦ ꠡꠣꠔ ꠘꠝ꠆ꠛꠞ ꠛꠍꠞ ꠎꠝꠤ-ꠎꠝꠣꠞꠦ ꠎꠤꠞꠣꠘꠤꠞ ꠡꠥꠎꠥꠉ ꠖꠤꠅ। ꠁꠐꠣ ꠅꠁꠟ ꠝꠣꠛꠥꠖꠞ ꠘꠤꠅꠔꠦ ꠀꠞꠣꠝꠞ ꠛꠍꠞ। ꠅꠃ ꠛꠍꠞ ꠔꠥꠝꠞꠣ ꠎꠝꠤꠘꠅ ꠈꠦꠔ ꠇꠞꠤꠅ ꠘꠣ, ꠀꠋꠉꠥꠞ ꠉꠣꠍꠞ ꠒꠣꠟ ꠙꠣꠟꠣ ꠍꠣꠐꠤꠅ ꠘꠣ। 5 ꠀꠞ ꠎꠝꠤꠘꠞ ꠝꠣꠎꠦ ꠄꠝꠘꠦꠃ ꠎꠦꠔꠣ ꠚꠟꠤꠛ, ꠁꠔꠣ ꠘꠤꠀ ꠔꠥꠝꠞꠣꠞ ꠃꠉꠣꠞꠅ ꠕꠁꠅ ꠘꠣ। ꠛꠤꠘꠣ ꠎꠔꠘꠦ ꠀꠋꠉꠥꠞ ꠉꠣꠍꠅ ꠎꠦꠔꠣ ꠚꠟ ꠗꠞꠛ, ꠁꠔꠣ ꠙꠣꠠꠤꠀ ꠘꠤꠀ ꠎꠝꠣꠁꠅ ꠘꠣ। ꠢꠇꠟ ꠎꠝꠤ-ꠎꠝꠣꠞꠦ ꠙꠥꠞꠣ ꠄꠇ ꠛꠍꠞ ꠎꠤꠞꠣꠘꠤꠞ ꠡꠝꠄ ꠖꠤꠅ। 6 ꠎꠤꠞꠣꠘꠤꠞ ꠛꠍꠞ ꠎꠝꠤꠘꠅ ꠄꠝꠘꠦ ꠎꠦꠔꠣ ꠚꠟꠤꠛ, ꠁꠔꠣ ꠔ ꠔꠥꠝꠞꠣ ꠘꠤꠎꠞ, ꠔꠥꠝꠞꠣꠞ ꠉꠥꠟꠣꠝ-ꠛꠣꠘ꠆ꠖꠤꠞ, ꠔꠥꠝꠞꠣꠞ ꠖꠦꠡꠞ ꠜꠤꠘ-ꠖꠦꠡꠤ ꠝꠥꠍꠣꠚꠤꠞ, ꠔꠥꠝꠞꠣꠞ ꠡꠝꠣꠎꠞ ꠝꠦꠘꠔꠤ ꠇꠣꠝꠟꠣ, ꠢꠇꠟ ꠎꠣꠔꠞ ꠝꠣꠘꠡꠞ, 7 ꠔꠥꠝꠞꠣꠞ ꠙꠣꠟꠣ ꠢꠦꠝꠣꠘ, ꠀꠞ ꠖꠦꠡꠞ ꠎꠋꠟꠤ ꠎꠣꠘꠥꠀꠞꠞ ꠈꠣꠘꠤ-ꠈꠥꠞꠣꠇ ꠅꠁꠛ। ꠅꠃ ꠛꠍꠞ ꠎꠝꠤꠘꠅ ꠄꠝꠘꠦ ꠎꠦꠔꠣ ꠚꠟꠤꠛ, ꠁꠔꠣ ꠔꠥꠝꠞꠣ ꠢꠇꠟꠦ ꠈꠣꠁꠅ।

8 “ꠀꠞ ꠢꠥꠘꠅ, ꠡꠣꠔ ꠛꠍꠞ ꠇꠞꠤ ꠇꠞꠤ ꠡꠣꠔꠈꠣꠘ ꠎꠤꠞꠣꠘꠤꠞ ꠛꠍꠞꠞꠦ ꠔꠥꠝꠞꠣ ꠉꠘꠤꠅ, ꠉꠘꠤꠟꠦ ꠡꠣꠔꠛꠣꠞ ꠡꠣꠔ ꠛꠍꠞꠦ ꠃꠘꠥꠙꠁꠘ꠆ꠌꠣꠡ ꠛꠍꠞ ꠅꠁꠛ। 9 ꠄꠞ ꠛꠣꠖꠞ ꠛꠍꠞ, ꠝꠣꠘꠤ ꠙꠁꠘ꠆ꠌꠣꠡ ꠘꠝ꠆ꠛꠞ ꠛꠍꠞ, ꠅꠃ ꠛꠍꠞꠞ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠖꠡ ꠘꠝ꠆ꠛꠞ ꠖꠤꠘ, ꠁꠔꠣ ꠔ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣꠞ ꠖꠤꠘ, ꠢꠃ ꠖꠤꠘ ꠔꠥꠝꠞꠣ ꠀꠡ꠆ꠔꠣ ꠖꠦꠡꠞ ꠢꠇꠟ ꠎꠣꠉꠣꠔ ꠡꠤꠋꠉꠣ ꠛꠣꠎꠣꠁꠅ। 10 ꠅꠃ ꠙꠁꠘ꠆ꠌꠣꠡ ꠘꠝ꠆ꠛꠞ ꠛꠍꠞꠞꠦ ꠔꠥꠝꠞꠣ ꠙꠣꠇ-ꠙꠛꠤꠔ꠆ꠞ ꠝꠣꠘꠤꠅ, ꠖꠦꠡꠞ ꠢꠇꠟ ꠝꠣꠘꠡꠞꠦ ꠀꠎꠣꠖꠤꠞ ꠇꠕꠣ ꠎꠣꠘꠣꠁꠅ। ꠁ ꠛꠍꠞ ꠅꠁꠟ ꠔꠥꠝꠞꠣꠞ ꠎꠝꠤ-ꠝꠤꠞꠣꠡ ꠚꠤꠞꠔ ꠙꠣꠅꠀꠞ ꠛꠍꠞ। ꠅꠃ ꠛꠍꠞ ꠔꠥꠝꠞꠣ ꠎꠣꠞꠎꠤꠞ ꠙꠞꠤꠛꠣꠞ ꠀꠞ ꠈꠣꠘ꠆ꠖꠣꠘꠞ ꠎꠝꠤ-ꠎꠝꠣꠞ ꠖꠈꠟꠖꠣꠞꠤ ꠚꠤꠞꠔ ꠙꠣꠁꠛꠣꠄ। 11 ꠙꠞꠔꠦꠇ ꠙꠁꠘ꠆ꠌꠣꠡ ꠘꠝ꠆ꠛꠞ ꠛꠍꠞ ꠅꠁꠛ, ꠔꠥꠝꠞꠣꠞ ꠖꠈꠟꠖꠣꠞꠤ ꠚꠤꠞꠔ ꠙꠣꠅꠀꠞ ꠛꠍꠞ। ꠅꠃ ꠛꠍꠞ ꠔꠥꠝꠞꠣ ꠎꠝꠤꠘꠅ ꠇꠥꠘꠥ ꠛꠤꠌꠤ ꠛꠣꠁꠘ ꠇꠞꠤꠅ ꠘꠣ, ꠎꠝꠤꠘꠅ ꠄꠝꠘꠦꠃ ꠎꠦꠔꠣ ꠎꠘꠝꠤꠛ ꠁꠔꠣ ꠔꠥꠝꠞꠣ ꠘꠤꠅ ꠘꠣ। ꠀꠞ ꠛꠤꠘꠣ ꠎꠔꠘꠦ ꠀꠋꠉꠥꠞ ꠉꠣꠍꠅ ꠎꠦꠔꠣ ꠚꠟ ꠗꠞꠛ, ꠁꠔꠣꠅ ꠔꠥꠝꠞꠣ ꠊꠞꠅ ꠀꠘꠤꠅ ꠘꠣ। 12 ꠅꠃ ꠛꠍꠞ ꠅꠁꠟ ꠚꠤꠞꠔ ꠙꠣꠁꠛꠣꠞ ꠛꠍꠞ। ꠔꠥꠝꠞꠣ ꠅꠃ ꠛꠍꠞꠞꠦ ꠙꠣꠇ-ꠙꠛꠤꠔ꠆ꠞ ꠢꠤꠡꠣꠛꠦ ꠝꠣꠘꠤꠅ। ꠎꠝꠤꠘꠅ ꠎꠦꠔꠣ ꠚꠡꠟ ꠙꠣꠁꠛꠣꠄ, ꠅꠔꠣꠃ ꠔꠥꠝꠞꠣ ꠈꠣꠁꠅ।

13 “ꠚꠤꠞꠔ ꠙꠣꠅꠀꠞ ꠛꠍꠞꠅ ꠔꠥꠝꠞꠣ ꠙꠞꠔꠦꠇꠦ ꠎꠣꠞꠎꠤꠞ ꠙꠞꠤꠛꠣꠞꠞ ꠎꠝꠤ-ꠝꠤꠞꠣꠡꠅ ꠚꠤꠞꠤꠀ ꠎꠣꠁꠅ। 14 ꠘꠤꠎꠞ ꠎꠝꠤ-ꠎꠝꠣ ꠈꠞꠤꠖ-ꠛꠤꠇꠤꠞ ꠡꠝꠄ ꠔꠥꠝꠞꠣ ꠀꠙꠘ ꠛꠣ ꠙꠞ ꠇꠦꠃꠞꠞ ꠃꠙꠞꠦ ꠎꠥꠞ-ꠎꠛꠞꠖꠡ꠆ꠔꠤ ꠇꠞꠤꠅ ꠘꠣ। 15 ꠎꠝꠤ ꠈꠞꠤꠖ ꠇꠞꠣꠞ ꠡꠝꠄ ꠈꠞꠤꠖ-ꠛꠤꠇꠤ ꠇꠞꠞꠣ ꠖꠥꠁꠅ ꠎꠘꠦ ꠈꠤꠀꠟ ꠞꠣꠈꠛꠣꠄ, ꠚꠤꠞꠔ ꠀꠅꠀꠞ ꠢꠃ ꠙꠁꠘ꠆ꠌꠣꠡ ꠛꠍꠞ ꠛꠣꠖꠦ ꠇꠔꠖꠤꠘ ꠉꠦꠍꠦꠉꠤ, ꠀꠞ ꠍꠣꠝꠘꠞ ꠙꠁꠘ꠆ꠌꠣꠡ ꠛꠍꠞ ꠙꠥꠞꠔꠦ ꠇꠔꠖꠤꠘ ꠛꠣꠇꠤ ꠀꠍꠦ, ꠅꠈꠣꠘ ꠢꠤꠡꠣꠛ ꠇꠞꠤꠀ ꠎꠝꠤꠘꠞ ꠖꠞꠖꠣꠝ ꠑꠤꠇ ꠇꠞꠛꠣꠄ। 16 ꠎꠥꠖꠤ ꠛꠦꠡꠤ ꠛꠍꠞ ꠚꠡꠟ ꠙꠣꠅꠀꠞ ꠡꠝꠄ ꠕꠣꠇꠦ ꠔꠦ ꠖꠣꠝꠅ ꠛꠦꠡꠤ ꠅꠁꠛ, ꠀꠞ ꠇꠝ ꠅꠁꠟꠦ ꠖꠣꠝꠅ ꠇꠝꠛ। ꠀꠍꠟꠦ ꠚꠡꠟ ꠙꠣꠅꠀꠞ ꠛꠍꠞꠞ ꠃꠙꠞꠦꠃ ꠈꠞꠤꠖ-ꠛꠤꠇꠤꠞ ꠖꠣꠝ ꠑꠤꠇ ꠅꠁꠛ। 17 ꠔꠥꠝꠞꠣ ꠘꠤꠎꠞ ꠡꠝꠣꠎꠞ ꠇꠦꠃꠞꠞ ꠃꠙꠞꠦ ꠎꠥꠞ-ꠎꠥꠟꠥꠝ ꠇꠞꠤꠅ ꠘꠣ। ꠙꠞꠔꠦꠇ ꠎꠘꠃ ꠀꠟ꠆ꠟꠣꠞ ꠒꠞ-ꠈꠚꠦ ꠌꠟꠤꠅ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।

18 “ꠔꠥꠝꠞꠣ ꠀꠝꠣꠞ ꠛꠣꠔꠣꠁꠟ ꠡꠞꠤꠅꠔ ꠀꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠢꠣꠝꠦꠡꠣ ꠝꠣꠘꠤꠅ। ꠔꠦꠃ ꠔꠥꠝꠞꠣꠞ ꠖꠦꠡ ꠅꠁꠛ ꠘꠤꠞꠣꠙꠖ ꠛꠡꠔ ꠈꠣꠘꠣ। 19 ꠀꠞ ꠔꠥꠝꠞꠣꠞ ꠈꠦꠔꠞ ꠎꠝꠤꠘ ꠕꠣꠇꠤ ꠡꠥꠟ꠆ꠟꠀꠘꠣ ꠚꠡꠟ ꠙꠣꠁꠛꠣꠄ, ꠙꠣꠁꠀ ꠙꠦꠐ ꠜꠞꠤ ꠈꠣꠁꠀ ꠖꠣꠁꠀ ꠢꠘꠅ ꠘꠤꠞꠣꠙꠖꠦ ꠛꠡꠔ ꠇꠞꠛꠣꠄ। 20 ꠔꠥꠝꠞꠣ ꠝꠘꠦ ꠝꠘꠦ ꠇꠁꠔꠣꠄ ꠙꠣꠞ, ꠡꠣꠔ ꠘꠝ꠆ꠛꠞ ꠛꠍꠞꠅ ꠎꠥꠖꠤ ꠇꠥꠘꠥ ꠈꠦꠔ ꠘꠣ ꠇꠞꠤ ꠀꠞ ꠚꠡꠟ ꠘꠣ ꠇꠣꠐꠤ, ꠔꠦ ꠀꠝꠞꠣ ꠈꠣꠁꠝꠥ ꠇꠤꠔꠣ? 21 ꠄꠞ ꠎꠥꠀꠙ ꠅꠁꠟ, ꠍꠄ ꠘꠝ꠆ꠛꠞ ꠛꠍꠞꠅ ꠀꠝꠤ ꠔꠥꠝꠞꠣꠞ ꠎꠝꠤꠘꠅ ꠅꠟꠣ ꠞꠢꠝ-ꠛꠞꠇꠔ ꠖꠤꠝꠥ, ꠎꠝꠤꠘꠅ ꠔꠤꠘ ꠛꠍꠞꠞ ꠢꠝꠣꠘ ꠚꠡꠟ ꠙꠣꠁꠀ ꠈꠣꠁꠀ-ꠚꠤꠘ꠆ꠖꠤꠀ ꠛꠣꠌꠛꠣꠄ। 22 ꠄꠞꠟꠣꠉꠤ ꠀꠐ ꠘꠝ꠆ꠛꠞ ꠛꠍꠞꠅ ꠈꠦꠔ ꠇꠞꠣꠞ ꠛꠤꠌ ꠛꠣꠁꠘ ꠖꠦꠅꠀꠞ ꠡꠝꠄꠅ ꠅꠃ ꠙꠥꠞꠣꠘꠣ ꠚꠡꠟ ꠈꠣꠁꠛꠣꠄ, ꠀꠞ ꠘꠄ ꠘꠝ꠆ꠛꠞ ꠛꠍꠞꠞ ꠚꠡꠟ ꠖꠣꠁꠛꠣꠞ ꠀꠉ ꠙꠞ꠆ꠎꠘ꠆ꠔ ꠅꠃ ꠚꠡꠟꠦꠃ ꠔꠥꠝꠞꠣꠞ ꠈꠣꠘꠤ-ꠈꠥꠞꠣꠇꠤ ꠌꠟꠛ।

23 “ꠝꠘꠅ ꠞꠣꠈꠤꠅ, ꠌꠤꠞꠇꠣꠟꠞ ꠟꠣꠉꠤ ꠇꠦꠃꠞꠞ ꠎꠝꠤ-ꠎꠝꠣ ꠈꠞꠤꠖ-ꠛꠤꠇꠤ ꠌꠟꠔ ꠘꠣꠄ। ꠀꠍꠟꠦ ꠢꠇꠟ ꠎꠝꠤꠘꠞ ꠝꠣꠟꠤꠇ ꠔ ꠀꠝꠤ ꠀꠟ꠆ꠟꠣ, ꠔꠥꠝꠞꠣ ꠀꠝꠣꠞ ꠍꠣꠝꠘꠦ ꠢꠘꠅ ꠈꠣꠟꠤ ꠜꠤꠘ-ꠖꠦꠡꠤ ꠝꠥꠍꠣꠚꠤꠞ। 24 ꠔꠥꠝꠞꠣ ꠙꠞꠔꠦꠇ ꠎꠘꠞ ꠈꠞꠤꠖꠣ ꠎꠝꠤ-ꠝꠤꠞꠣꠡ ꠛꠤꠇꠤꠖꠣꠞꠞꠦ ꠢꠤꠞꠛꠣꠞ ꠚꠤꠞꠔ ꠘꠤꠛꠣꠞ ꠡꠥꠎꠥꠉ ꠖꠤꠅ। 25 ꠔꠥꠝꠞꠣꠞ ꠎꠣꠔꠤꠞ ꠇꠥꠘꠥ ꠜꠣꠁ ꠅꠜꠣꠛꠅ ꠙꠠꠤꠀ ꠎꠥꠖꠤ ꠔꠣꠞ ꠙꠞꠤꠛꠣꠞꠞ ꠎꠝꠤꠘꠞ ꠇꠤꠍꠥ ꠅꠋꠡ ꠛꠦꠌꠤꠟꠣꠄ, ꠔꠦ ꠔꠣꠞ ꠢꠇꠟ ꠕꠣꠇꠤ ꠀꠙꠘ ꠎꠘꠦ ꠀꠁꠀ ꠅꠃ ꠛꠦꠌꠣ ꠎꠝꠤ ꠍꠣꠠꠣꠁꠀ ꠘꠤꠔꠦ ꠅꠁꠛ। 26 ꠇꠦꠃꠞꠞ ꠎꠥꠖꠤ ꠍꠣꠠꠣꠁꠀ ꠘꠤꠛꠣꠞ ꠝꠣꠘꠥꠡ ꠘꠣ ꠕꠣꠇꠦ, ꠔꠦ ꠢꠦ ꠘꠤꠎꠦ ꠗꠘ-ꠍꠣꠝꠣꠘꠣ ꠎꠝꠣꠁꠀ ꠢꠣꠞꠤ ꠘꠤꠎꠦꠃ ꠎꠥꠖꠤ ꠍꠣꠠꠣꠁꠀ ꠘꠤꠔ ꠌꠣꠄ, 27 ꠔꠦ ꠔꠣꠞ ꠛꠤꠇꠤꠞ ꠛꠍꠞ ꠕꠣꠇꠤ ꠍꠣꠠꠣꠘꠤ ꠙꠞ꠆ꠎꠘ꠆ꠔ ꠡꠝꠄ ꠢꠤꠡꠣꠛ ꠇꠞꠤꠀ, ꠝꠣꠟꠤꠇꠞ ꠙꠣꠅꠘꠣ ꠐꠦꠇꠣ ꠖꠤꠀ ꠔꠣꠞ ꠎꠝꠤ ꠚꠤꠞꠔ ꠘꠤꠛ। 28 ꠅꠁꠟꠦ ꠎꠝꠤ ꠚꠤꠞꠔ ꠘꠤꠛꠣꠞ ꠍꠣꠝꠣꠘꠣ ꠢꠦ ꠎꠝꠣꠁꠔꠦ ꠘꠣ ꠙꠣꠞꠟꠦ, ꠔꠣꠞ ꠛꠦꠌꠣ ꠎꠝꠤꠘ ꠚꠤꠞꠔ ꠙꠣꠅꠀꠞ ꠢꠃ ꠙꠁꠘ꠆ꠌꠣꠡ ꠛꠍꠞ ꠙꠥꠞꠣꠞ ꠀꠉ ꠙꠞ꠆ꠎꠘ꠆ꠔ ꠈꠞꠤꠖꠖꠣꠞꠦ ꠈꠣꠁꠛꠣ, ꠀꠞ ꠙꠁꠘ꠆ꠌꠣꠡ ꠛꠍꠞꠞ ꠇꠣꠟꠅ ꠔꠣꠞꠦ ꠚꠤꠞꠔ ꠖꠤꠛꠣ, ꠢꠦ ꠔꠣꠞ ꠎꠝꠤꠘ ꠄꠝꠘꠦꠃ ꠛꠤꠘꠣ ꠙꠄꠡꠣꠄ ꠚꠤꠞꠔ ꠙꠣꠁꠛ।

29 “ꠀꠞ ꠛꠣꠃꠘ꠆ꠒꠞꠤ ꠇꠞꠣ ꠘꠤꠞꠣꠙꠖ ꠐꠣꠃꠘꠞ ꠇꠥꠘꠥ ꠛꠣꠡꠣ-ꠛꠣꠠꠤ ꠎꠥꠖꠤ ꠇꠦꠃ ꠛꠦꠌꠤꠟꠣꠄ, ꠔꠦ ꠛꠦꠌꠣꠞ ꠛꠣꠖꠦ ꠙꠥꠞꠣ ꠄꠇ ꠛꠍꠞꠞ ꠝꠣꠎꠦ ꠢꠦ ꠅꠃ ꠛꠣꠠꠤ ꠚꠤꠞꠔ ꠘꠤꠔ ꠙꠣꠞꠛ। ꠙꠥꠞꠣ ꠄꠇ ꠛꠍꠞꠞ ꠝꠣꠎꠦ ꠢꠦ ꠚꠤꠞꠔ ꠘꠤꠛꠣꠞ ꠡꠥꠎꠥꠉ ꠙꠣꠁꠛ। 30 ꠄꠇ ꠛꠍꠞꠞ ꠝꠣꠎꠦ ꠁꠐꠣ ꠚꠤꠞꠔ ꠘꠣ ꠘꠤꠟꠦ, ꠌꠤꠞꠇꠣꠟꠞ ꠟꠣꠉꠤ ꠅꠃ ꠛꠣꠠꠤ ꠈꠞꠤꠖꠖꠣꠞ ꠀꠞ ꠔꠣꠞ ꠅꠀꠞꠤꠡꠞ ꠅꠁꠛ। ꠚꠤꠞꠔ ꠙꠣꠅꠀꠞ ꠛꠍꠞꠅ ꠁꠐꠣ ꠚꠤꠞꠔ ꠙꠣꠁꠔ ꠘꠣꠄ। 31 ꠅꠁꠟꠦ ꠎꠦꠔꠣ ꠉꠣꠃ-ꠉꠦꠞꠣꠝꠅ ꠇꠥꠘꠥ ꠛꠣꠃꠘ꠆ꠒꠞꠤ ꠘꠣꠄ, ꠅꠃ ꠎꠣꠉꠣꠞ ꠛꠣꠠꠤ-ꠊꠞꠞꠦ ꠈꠦꠔꠞ ꠎꠝꠤꠘꠞ ꠟꠣꠈꠣꠘ ꠝꠘꠅ ꠇꠞꠛꠣꠄ। ꠁꠔꠣ ꠍꠣꠠꠣꠁꠀ ꠀꠘꠣ ꠎꠣꠁꠛ, ꠀꠞ ꠚꠤꠞꠔ ꠙꠣꠅꠀꠞ ꠛꠍꠞꠅ ꠚꠤꠞꠔ ꠖꠤꠔꠦ ꠅꠁꠛꠃ।

32 “ꠈꠣꠟꠤ ꠟꠦꠛꠤ ꠈꠣꠘ꠆ꠖꠣꠘꠞ ꠐꠣꠃꠘꠞ ꠛꠣꠠꠤ-ꠊꠞ ꠅꠇꠟ ꠢꠣꠝꠦꠡꠣ ꠚꠤꠞꠔ ꠀꠘꠣ ꠎꠣꠁꠛ। 33 ꠔꠣꠞꠣꠞ ꠐꠣꠃꠘꠞ ꠇꠥꠘꠥ ꠛꠣꠠꠤ-ꠊꠞ ꠛꠦꠌꠤꠟꠦ, ꠚꠤꠞꠔ ꠙꠣꠅꠀꠞ ꠛꠍꠞꠅ ꠁꠐꠣ ꠚꠤꠞꠔ ꠙꠣꠁꠛꠣ। ꠔꠥꠝꠞꠣꠞ ꠔ ꠎꠣꠘꠣ ꠀꠍꠦ, ꠈꠣꠟꠤ ꠐꠣꠃꠘꠞ ꠛꠣꠠꠤ-ꠊꠞꠃ ꠅꠁꠟ ꠟꠦꠛꠤ ꠈꠣꠘ꠆ꠖꠣꠘꠞ ꠡꠝ꠆ꠙꠔ꠆ꠔꠤ, ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠔꠣꠞꠣ ꠅꠃ ꠡꠝ꠆ꠙꠔ꠆ꠔꠤꠃ ꠙꠣꠁꠍꠦ। 34 ꠅꠁꠟꠦ ꠔꠣꠞꠣꠞ ꠐꠣꠃꠘꠞ ꠗꠣꠞꠅ ꠙꠡꠥ ꠞꠣꠈꠣꠞ ꠛꠘ꠆ꠖꠞ ꠎꠣꠉꠣ ꠔꠣꠞꠣ ꠈꠞꠤꠖ-ꠛꠤꠇꠤ ꠇꠞꠔꠣ ꠙꠣꠞꠔꠣ ꠘꠣꠄ, ꠁꠔꠣ ꠔ ꠔꠣꠞꠣꠞ ꠌꠤꠞꠇꠣꠟꠤꠘ ꠡꠝ꠆ꠙꠔ꠆ꠔꠤ।

35 “ꠔꠥꠝꠞꠣꠞ ꠘꠤꠎꠞ ꠡꠝꠣꠎꠞ ꠇꠥꠘꠥ ꠜꠣꠁ ꠎꠥꠖꠤ ꠉꠞꠤꠛꠤ ꠢꠣꠟꠔꠞ ꠟꠣꠉꠤ ꠔꠣꠞ ꠘꠤꠎꠞ ꠈꠣꠅꠀ-ꠚꠤꠘ꠆ꠖꠣ ꠎꠥꠉꠣꠁꠔ ꠘꠣ ꠙꠣꠞꠦ, ꠔꠦ ꠜꠤꠘ-ꠖꠦꠡꠤ ꠝꠥꠍꠣꠚꠤꠞꠞ ꠟꠣꠈꠣꠘ ꠔꠣꠞꠦꠅ ꠡꠣꠁꠎ꠆ꠎ ꠇꠞꠤꠅ, ꠎꠣꠔꠦ ꠢꠦ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠔ ꠙꠣꠞꠦ। 36 ꠔꠥꠝꠞꠣ ꠔꠣꠞ ꠉꠦꠍ ꠕꠣꠇꠤ ꠇꠥꠘꠥ ꠘꠝꠥꠘꠣꠞ ꠡꠥꠖ ꠈꠣꠁꠅ ꠘꠣ। ꠛꠞꠋ ꠢꠦ ꠎꠣꠔꠦ ꠢꠣꠝꠦꠡꠣ ꠔꠥꠝꠞꠣꠞ ꠉꠦꠍꠦ ꠞꠁꠛꠣꠞ ꠡꠥꠎꠥꠉ ꠙꠣꠄ, ꠅꠃ ꠘꠤꠅꠔꠦ ꠔꠥꠝꠞꠣ ꠘꠤꠎꠞ ꠝꠣꠛꠥꠖ ꠀꠟ꠆ꠟꠣꠞ ꠒꠞ-ꠈꠚ ꠜꠤꠔꠞꠦ ꠞꠣꠈꠤꠅ। 37 ꠔꠥꠝꠞꠣ ꠡꠥꠖ ꠈꠣꠁꠛꠣꠞ ꠘꠤꠅꠔꠦ ꠔꠣꠞꠦ ꠐꠦꠇꠣ-ꠙꠄꠡꠣ ꠇꠞ꠆ꠎ ꠖꠤꠅ ꠘꠣ। ꠔꠣꠞ ꠉꠦꠍꠦ ꠈꠣꠘꠤ-ꠈꠥꠞꠣꠇꠤꠞ ꠝꠣꠟ ꠛꠦꠌꠟꠦ ꠁꠔꠣꠞ ꠟꠣꠜ ꠟꠁꠅ ꠘꠣ। 38 ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ। ꠀꠡ꠆ꠔꠣ ꠇꠦꠘꠣꠘ ꠖꠦꠡ ꠖꠣꠘ ꠇꠞꠣꠞ ꠈꠤꠀꠟꠦ, ꠀꠞ ꠔꠥꠝꠞꠣꠞ ꠀꠙꠘ ꠝꠣꠛꠥꠖ ꠅꠀꠞ ꠈꠤꠀꠟꠦ, ꠀꠝꠤꠃ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍꠤ।

39 “ꠛꠘꠤ ꠁꠍꠞꠣꠁꠟꠤ ꠡꠝꠣꠎꠞ ꠇꠥꠘꠥ ꠜꠣꠁ ꠎꠥꠖꠤ ꠉꠞꠤꠛꠤ ꠢꠣꠟꠔꠅ ꠙꠠꠤꠀ ꠘꠤꠎꠦ ꠘꠤꠎꠦ ꠔꠥꠝꠞꠣꠞ ꠇꠦꠃꠞꠞ ꠉꠦꠍꠦ ꠛꠤꠇꠤ ꠈꠣꠁꠟꠣꠄ, ꠔꠦ ꠔꠣꠞꠦ ꠈꠞꠤꠖꠣ ꠉꠥꠟꠣꠝꠞ ꠟꠣꠈꠣꠘ ꠈꠣꠐꠣꠁꠅ ꠘꠣ। 40 ꠔꠥꠝꠞꠣꠞ ꠝꠥꠍꠣꠚꠤꠞ ꠀꠞ ꠞꠥꠎꠤ ꠇꠣꠝꠟꠣꠞ ꠟꠉꠦ ꠎꠦꠟꠣ ꠛꠦꠛꠢꠣꠞ ꠇꠞꠅ, ꠔꠣꠞ ꠟꠉꠦꠅ ꠅꠟꠣ ꠇꠞꠤꠅ। ꠢꠦ ꠢꠃ ꠚꠤꠞꠔ ꠙꠣꠅꠀꠞ ꠛꠍꠞ ꠙꠞ꠆ꠎꠘ꠆ꠔ ꠔꠥꠝꠣꠞ ꠇꠣꠝ-ꠇꠣꠎ ꠇꠞꠛ। 41 ꠛꠣꠖꠦ ꠔꠣꠞꠦ ꠀꠞ ꠔꠣꠞ ꠙꠥꠀ-ꠙꠥꠠꠤꠞꠦ ꠀꠎꠣꠖ ꠇꠞꠤ ꠖꠤꠅ। ꠔꠦꠃ ꠢꠦ ꠔꠣꠞ ꠘꠤꠎꠞ ꠈꠣꠘ꠆ꠖꠣꠘꠞ ꠝꠄ-ꠝꠥꠞꠛ꠆ꠛꠤꠞ ꠎꠝꠤꠘꠅ ꠚꠤꠞꠔ ꠎꠣꠁꠛ। 42 ꠢꠥꠘꠅ, ꠛꠘꠤ ꠁꠍꠞꠣꠁꠟ ꠔ ꠈꠣꠟꠤ ꠀꠝꠣꠞ ꠉꠥꠟꠣꠝ। ꠀꠝꠤ ꠔꠣꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠀꠎꠣꠖ ꠇꠞꠤ ꠀꠘꠍꠤ, ꠄꠞꠟꠣꠉꠤ ꠖꠥꠍꠞꠣ ꠇꠦꠃꠞꠞ ꠉꠥꠟꠣꠝꠤꠞ ꠟꠣꠉꠤ ꠔꠣꠞꠣꠞꠦ ꠛꠦꠌꠣꠞ ꠄꠈꠔꠤꠀꠞ ꠘꠣꠁ। 43 ꠔꠥꠝꠞꠣ ꠘꠤꠎꠞ ꠝꠣꠛꠥꠖꠞ ꠒꠞ-ꠈꠚꠦ ꠌꠟꠤꠅ, ꠄꠇꠦ-ꠅꠁꠘ꠆ꠘꠦ ꠙꠣꠡꠣꠘ-ꠘꠤꠡ꠆ꠐꠥꠞ ꠛꠦꠛꠢꠣꠞ ꠇꠞꠤꠅ ꠘꠣ।

44 “ꠔꠥꠝꠞꠣꠞ ꠀꠞꠤ-ꠚꠞꠤ ꠎꠔ ꠎꠣꠔꠤ ꠀꠍꠂꠘ, ꠅꠔꠣꠞ ꠝꠣꠎ ꠕꠣꠇꠤ ꠔꠥꠝꠞꠣꠞ ꠉꠥꠟꠣꠝ-ꠛꠣꠘ꠆ꠖꠤ ꠘꠤꠔꠣꠄ ꠙꠣꠞꠛꠣꠄ। 45 ꠔꠥꠝꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ ꠎꠣꠔꠤꠞ ꠝꠣꠘꠥꠡ ꠕꠣꠇꠤ, ꠀꠞ ꠔꠣꠞꠣꠞ ꠎꠦꠔꠣ ꠀꠅꠟꠣꠖ ꠔꠥꠝꠞꠣꠞ ꠖꠦꠡꠅ ꠎꠘꠝꠤꠍꠂꠘ, ꠅꠔꠣꠞ ꠝꠣꠎ ꠕꠣꠇꠤꠅ ꠔꠥꠝꠞꠣ ꠘꠤꠎꠞ ꠟꠣꠉꠤ ꠉꠥꠟꠣꠝ-ꠛꠣꠘ꠆ꠖꠤ ꠘꠤꠔꠣꠄ ꠙꠣꠞꠛꠣꠄ। 46 ꠅꠃ ꠟꠣꠈꠣꠘ ꠉꠥꠟꠣꠝ-ꠛꠣꠘ꠆ꠖꠤꠞꠦ ꠘꠤꠎꠞ ꠍꠣꠝꠣꠘꠣ ꠢꠤꠡꠣꠛꠦ ꠔꠥꠝꠞꠣꠞ ꠙꠥꠀ-ꠙꠥꠠꠤꠘꠞꠦꠅ ꠖꠤꠀ ꠎꠣꠁꠔꠣꠄ ꠙꠣꠞꠛꠣꠄ। ꠁꠔꠣꠞꠦ ꠢꠣꠞꠣ ꠎꠤꠘ꠆ꠖꠦꠉꠤ ꠔꠥꠝꠞꠣꠞ ꠉꠥꠟꠣꠝꠤ ꠇꠞꠣꠁꠔꠣꠄ ꠙꠣꠞꠛꠣꠄ, ꠅꠁꠟꠦ ꠔꠥꠝꠞꠣꠞ ꠘꠤꠎꠞ ꠎꠣꠔꠤ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠙꠣꠡꠣꠘ ꠝꠣꠟꠤꠇꠣꠘꠣ ꠈꠣꠐꠣꠁꠅ ꠘꠣ।

47 “ꠔꠥꠝꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠇꠥꠘꠥ ꠝꠣꠘꠥꠡ ꠎꠥꠖꠤ ꠗꠘꠤ ꠛꠘꠤꠎꠣꠄ, ꠀꠞ ꠔꠥꠝꠞꠣꠞ ꠇꠥꠘꠥ ꠜꠣꠁ ꠎꠥꠖꠤ ꠅꠜꠣꠛꠅ ꠙꠠꠤꠀ ꠔꠣꠞ ꠉꠦꠍꠦ ꠛꠣ ꠔꠣꠞ ꠇꠥꠘꠥ ꠀꠅꠟꠣꠖꠞ ꠉꠦꠍꠦ ꠘꠤꠎꠞꠦ ꠛꠦꠌꠤꠟꠣꠄ, 48 ꠔꠦ ꠢꠦ ꠘꠤꠎꠞꠦ ꠀꠎꠣꠖ ꠇꠞꠣꠞ ꠡꠥꠎꠥꠉ ꠙꠣꠁꠛ। ꠔꠣꠞ ꠘꠤꠎꠞ ꠇꠥꠘꠥ ꠜꠣꠁꠄ ꠔꠣꠞꠦ ꠀꠎꠣꠖ ꠇꠞꠔ ꠙꠣꠞꠛ। 49 ꠔꠣꠞ ꠌꠣꠌꠣ ꠛꠣ ꠌꠣꠌꠣꠞ ꠊꠞꠞ ꠜꠣꠁꠄ, ꠛꠣ ꠔꠣꠞ ꠈꠣꠘ꠆ꠖꠣꠘꠞ ꠀꠙꠘ ꠎꠦꠇꠥꠘꠥ ꠎꠘꠦ ꠔꠣꠞꠦ ꠀꠎꠣꠖ ꠇꠞꠣꠁꠔꠣ ꠙꠣꠞꠛꠣ। ꠘꠤꠎꠞ ꠢꠣꠟꠔ ꠛꠖꠟꠣꠁꠟꠤꠔꠦ ꠙꠣꠞꠟꠦ, ꠢꠦ ꠘꠤꠎꠞꠦ ꠘꠤꠎꠦ ꠀꠎꠣꠖ ꠇꠞꠔ ꠙꠣꠞꠛ। 50 ꠎꠦ ꠛꠍꠞ ꠘꠤꠎꠞꠦ ꠛꠦꠌꠤꠍꠤꠟ ꠅꠃ ꠛꠍꠞ ꠕꠣꠇꠤ ꠢꠤꠡꠣꠛ ꠇꠞꠤꠀ ꠚꠤꠞꠔ ꠀꠅꠀꠞ ꠛꠍꠞ ꠙꠞ꠆ꠎꠘ꠆ꠔ ꠎꠔ ꠛꠍꠞ ꠛꠣꠇꠤ ꠕꠣꠇꠦ ꠅꠃ ꠡꠝꠄꠇꠥꠞ ꠇꠣꠝꠞ ꠛꠦꠔꠘꠞ ꠢꠤꠡꠣꠛ-ꠘꠤꠇꠣꠡ ꠝꠣꠚꠤꠇ ꠔꠣꠞ ꠀꠎꠣꠖꠤꠞ ꠖꠣꠝ ꠑꠤꠇ ꠇꠞꠣ ꠅꠁꠛ। 51 ꠚꠤꠞꠔ ꠙꠣꠅꠀꠞ ꠛꠍꠞ ꠎꠥꠖꠤ ꠛꠦꠡꠤ ꠖꠥꠞꠁ ꠅꠄ, ꠔꠦ ꠎꠦ ꠖꠣꠝꠦ ꠢꠦ ꠘꠤꠎꠞꠦ ꠛꠦꠌꠤꠍꠤꠟ, ꠅꠃ ꠖꠣꠝꠞ ꠛꠠ ꠄꠇ ꠅꠋꠡ ꠔꠣꠞ ꠀꠎꠣꠖꠤꠞ ꠛꠖꠟꠣ ꠢꠤꠡꠣꠛꠦ ꠖꠤꠔꠦ ꠅꠁꠛ। 52 ꠀꠞ ꠚꠤꠞꠔ ꠙꠣꠅꠀꠞ ꠛꠍꠞ ꠀꠁꠔꠦ ꠎꠥꠖꠤ ꠇꠝ ꠡꠝꠄ ꠛꠣꠇꠤ ꠞꠄ, ꠔꠦ ꠅꠃ ꠡꠝꠄ ꠢꠤꠡꠣꠛꠦ ꠐꠦꠇꠣ ꠖꠤꠀ ꠢꠦ ꠘꠤꠎꠞꠦ ꠀꠎꠣꠖ ꠇꠞꠔ ꠙꠣꠞꠛ। 53 ꠔꠣꠞꠦ ꠛꠍꠞ ꠌꠥꠇ꠆ꠔꠤ ꠇꠣꠝꠟꠣꠞ ꠟꠣꠈꠣꠘ ꠖꠦꠈꠤꠅ, ꠀꠞ ꠈꠤꠀꠟ ꠞꠣꠈꠤꠅ, ꠝꠣꠟꠤꠇꠦ ꠎꠣꠘꠥ ꠔꠣꠞ ꠟꠉꠦ ꠙꠣꠡꠣꠘ ꠛꠦꠛꠢꠣꠞ ꠘꠣ ꠇꠞꠦ। 54 ꠅꠟꠣ ꠇꠥꠘꠥ ꠟꠣꠈꠣꠘ ꠃꠙꠣꠄꠄ ꠎꠥꠖꠤ ꠢꠦ ꠀꠎꠣꠖ ꠅꠁꠔ ꠘꠣ ꠙꠣꠞꠦ, ꠔꠦ ꠔꠣꠞꠦ ꠀꠞ ꠔꠣꠞ ꠙꠥꠀ-ꠙꠥꠠꠤꠞꠦ ꠚꠤꠞꠔ ꠙꠣꠅꠀ ꠛꠍꠞꠞ ꠡꠝꠄ ꠄꠝꠘꠦꠃ ꠀꠎꠣꠖ ꠇꠞꠤ ꠖꠤꠟꠣꠁꠔꠦ ꠅꠁꠛ। 55 ꠝꠘꠅ ꠞꠣꠈꠤꠅ, ꠛꠘꠤ ꠁꠍꠞꠣꠁꠟ ꠔ ꠈꠣꠟꠤ ꠀꠝꠣꠞ ꠉꠥꠟꠣꠝ। ꠀꠝꠤ ꠔꠣꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠀꠎꠣꠖ ꠇꠞꠤ ꠀꠘꠍꠤ, ꠔꠣꠞꠣ ꠈꠣꠟꠤ ꠀꠝꠣꠞ। ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।