27
ꠝꠣꠘ꠆ꠘꠔ-ꠍꠖꠉꠣ ꠖꠤꠛꠣꠞ ꠘꠤꠅꠝ-ꠇꠣꠘꠥꠘ
1 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 2 “ꠔꠥꠝꠤ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠇꠦꠃ ꠎꠥꠖꠤ ꠇꠥꠘꠥ ꠝꠣꠘꠡꠞꠦ ꠀꠟ꠆ꠟꠣꠞ ꠘꠣꠝꠦ ꠖꠦꠅꠀꠞ ꠝꠣꠘ꠆ꠘꠔ ꠇꠞꠦ, ꠔꠦ ꠅꠃ ꠎꠘꠞ ꠛꠖꠟꠣ ꠅꠟꠣꠈꠣꠘ ꠢꠣꠖꠤꠀ ꠖꠤꠔꠦ ꠅꠁꠛ:
3 ꠛꠤꠡ ꠕꠣꠇꠤ ꠡꠣꠁꠐ ꠛꠍꠞ ꠛꠄꠅꠡꠤ ꠛꠦꠐꠣꠁꠘ꠆ꠔꠞ ꠟꠣꠉꠤ, ꠄꠛꠣꠖꠔ ꠈꠣꠘꠣꠞ ꠝꠣꠙꠦ ꠙꠁꠘ꠆ꠌꠣꠡ ꠔꠟꠣ ꠞꠥꠙꠣ ꠢꠣꠖꠤꠀ ꠖꠤꠔꠦ ꠅꠁꠛ,
4 ꠅꠃ ꠛꠄꠅꠡꠤ ꠛꠦꠐꠤꠘ꠆ꠔꠞ ꠟꠣꠉꠤ ꠔꠤꠡ ꠔꠟꠣ।
5 ꠙꠣꠌ ꠛꠍꠞ ꠕꠣꠇꠤ ꠛꠤꠡ ꠛꠍꠞ ꠛꠄꠅꠡꠤ ꠙꠥꠀꠂꠘ꠆ꠔꠞ ꠟꠣꠉꠤ ꠛꠤꠡ ꠔꠟꠣ ꠞꠥꠙꠣ,
ꠅꠃ ꠛꠄꠅꠡꠤ ꠙꠥꠠꠤꠘ꠆ꠔꠞ ꠟꠣꠉꠤ ꠖꠡ ꠔꠟꠣ।
6 ꠄꠇꠝꠣꠡ ꠕꠣꠇꠤ ꠙꠣꠌ ꠛꠍꠞ ꠛꠄꠅꠡꠤ ꠙꠥꠀꠂꠘ꠆ꠔꠞ ꠟꠣꠉꠤ ꠙꠣꠌ ꠔꠟꠣ ꠞꠥꠙꠣ,
ꠅꠃ ꠛꠄꠅꠡꠤ ꠙꠥꠠꠤꠘ꠆ꠔꠞ ꠟꠣꠉꠤ ꠔꠤꠘ ꠔꠟꠣ ꠞꠥꠙꠣ।
7 ꠡꠣꠁꠐ ꠛꠍꠞ ꠛꠣ ꠄꠞ ꠛꠦꠡꠤ ꠛꠄꠅꠡꠤ ꠛꠦꠐꠣꠁꠘ꠆ꠔꠞ ꠟꠣꠉꠤ ꠙꠘꠞ ꠔꠟꠣ,
ꠅꠃ ꠛꠄꠅꠡꠤ ꠛꠦꠐꠤꠘ꠆ꠔꠞ ꠟꠣꠉꠤ ꠖꠡ ꠔꠟꠣ ꠞꠥꠙꠣ ꠖꠤꠔꠦ ꠅꠁꠛ।
8 “ꠅꠁꠟꠦ ꠅꠃ ꠝꠣꠘ꠆ꠘꠔ ꠇꠞꠞꠣ ꠎꠘ ꠎꠥꠖꠤ ꠉꠞꠤꠛ ꠝꠣꠘꠥꠡ ꠅꠄ, ꠔꠣꠞ ꠝꠣꠘ꠆ꠘꠔꠞ ꠢꠣꠖꠤꠀ ꠖꠤꠛꠣꠞ ꠔꠣꠇ꠆ꠇꠔ ꠘꠣ ꠕꠣꠇꠦ, ꠔꠦ ꠔꠣꠞꠦ ꠟꠁꠀ ꠁꠝꠣꠝ ꠍꠣꠛꠞ ꠉꠦꠍꠦ ꠎꠣꠁꠛꠣꠄ, ꠉꠦꠟꠦ ꠁꠝꠣꠝ ꠍꠣꠛꠦ ꠔꠣꠞ ꠢꠣꠟꠔ ꠛꠥꠎꠤꠀ ꠢꠣꠖꠤꠀ ꠑꠤꠇ ꠇꠞꠛꠣ।
9 “ꠎꠥꠖꠤ ꠇꠛꠥꠟ ꠅꠀꠞ ꠎꠥꠇꠣ ꠇꠥꠘꠥ ꠙꠡꠥꠞꠦ ꠝꠣꠛꠥꠖꠞ ꠘꠣꠝꠦ ꠝꠣꠘ꠆ꠘꠔ ꠇꠞꠣ ꠅꠄ, ꠔꠦ ꠅꠃ ꠙꠡꠥꠞꠦ ꠝꠣꠛꠥꠖꠞ ꠍꠣꠝꠣꠘꠣ ꠢꠤꠡꠣꠛꠦ ꠙꠛꠤꠔ꠆ꠞ ꠇꠁꠀ ꠉꠁꠘ꠆ꠘ ꠇꠞꠤꠅ। 10 ꠅꠃ ꠙꠡꠥꠞ ꠛꠖꠟꠣ ꠖꠥꠍꠞꠣ ꠇꠥꠘꠥ ꠙꠡꠥ ꠖꠤꠟꠦ ꠇꠛꠥꠟ ꠅꠁꠔ ꠘꠣꠄ। ꠁꠐꠣ ꠜꠣꠟꠣ ꠅꠁꠟꠦ ꠄꠞ ꠛꠖꠟꠣ ꠛꠣꠖ ꠙꠡꠥ, ꠛꠣ ꠛꠣꠖ ꠅꠁꠟꠦ ꠄꠞ ꠛꠖꠟꠣ ꠜꠣꠟꠣ ꠇꠥꠘꠥ ꠙꠡꠥ ꠖꠤꠟꠦꠅ ꠇꠛꠥꠟ ꠅꠁꠔ ꠘꠣꠄ। ꠢꠦ ꠎꠥꠖꠤ ꠄꠇꠐꠣꠞ ꠛꠖꠟꠣ ꠀꠞꠇꠐꠣ ꠙꠡꠥꠞꠦ ꠖꠤꠟꠣꠄ, ꠔꠦ ꠅꠃ ꠖꠥꠁꠅꠐꠣꠞꠦ ꠙꠛꠤꠔ꠆ꠞ ꠢꠤꠡꠣꠛꠦ ꠉꠁꠘ꠆ꠘ ꠇꠞꠤꠅ। 11 ꠅꠁꠟꠦ ꠝꠣꠛꠥꠖꠞ ꠘꠣꠝꠦ ꠇꠛꠥꠟ ꠅꠀꠞ ꠎꠥꠇꠣ ꠘꠣꠄ, ꠁꠟꠣ ꠇꠥꠘꠥ ꠘꠣꠙꠣꠇ ꠎꠣꠔꠞ ꠙꠡꠥꠞꠦ ꠇꠦꠃ ꠎꠥꠖꠤ ꠝꠣꠘ꠆ꠘꠔ ꠢꠤꠡꠣꠛꠦ ꠝꠣꠘꠤꠟꠣꠄ, ꠔꠦ ꠅꠇꠐꠣꠞꠦ ꠟꠁꠀ ꠁꠝꠣꠝ ꠍꠣꠛꠞ ꠉꠦꠍꠦ ꠎꠣꠁꠅ, 12 ꠉꠦꠟꠦ ꠔꠣꠁꠘ ꠅꠇꠐꠣꠞ ꠢꠣꠟ-ꠢꠇꠤꠇꠔ ꠛꠥꠎꠤꠀ ꠢꠣꠞꠤ ꠎꠦ ꠖꠣꠝ ꠑꠤꠇ ꠇꠞꠛꠣ, ꠅꠃ ꠖꠣꠝꠃ ꠅꠁꠛ ꠁꠐꠣꠞ ꠡꠑꠤꠇ ꠖꠣꠝ। 13 ꠝꠣꠘ꠆ꠘꠔ ꠇꠞꠞꠣꠄ ꠁꠐꠣꠞꠦ ꠈꠣꠟꠣꠍ ꠇꠞꠣꠞ ꠈꠤꠀꠟ ꠅꠁꠟꠦ, ꠅꠃ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠖꠣꠝ ꠛꠦꠡꠤ ꠖꠤꠔꠦ ꠅꠁꠛ।
14 “ꠇꠦꠃ ꠎꠥꠖꠤ ꠔꠣꠞ ꠇꠥꠘꠥ ꠛꠣꠠꠤ-ꠊꠞꠞꠦ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ ꠍꠣꠝꠣꠘꠣ ꠢꠤꠡꠣꠛꠦ ꠝꠣꠘ꠆ꠘꠔ ꠇꠞꠤꠟꠣꠄ, ꠔꠦ ꠁꠝꠣꠝ ꠍꠣꠛꠦ ꠅꠃ ꠛꠣꠠꠤꠞ ꠢꠣꠟ-ꠢꠇꠤꠇꠔ ꠛꠥꠎꠤꠀ ꠎꠦ ꠖꠣꠝ ꠑꠤꠇ ꠇꠞꠛꠣ, ꠁꠐꠣꠃ ꠅꠁꠛ ꠄꠞ ꠡꠑꠤꠇ ꠖꠣꠝ। 15 ꠅꠈꠘ ꠅꠃ ꠛꠣꠠꠤꠞꠦ ꠢꠦ ꠈꠣꠟꠣꠍ ꠇꠞꠤꠀ ꠘꠤꠔ ꠌꠣꠁꠟꠦ, ꠅꠃ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠔꠦ ꠅꠁꠛ। ꠔꠦꠃ ꠛꠣꠠꠤ ꠈꠣꠘ ꠔꠣꠞ ꠅꠁꠛ।
16 “ꠇꠥꠘꠥ ꠝꠣꠘꠡꠦ ꠎꠥꠖꠤ ꠔꠣꠞ ꠘꠤꠎꠞ ꠎꠝꠤ-ꠝꠤꠞꠣꠡꠞ ꠇꠥꠘꠥ ꠄꠇ ꠅꠋꠡꠞꠦ ꠝꠣꠛꠥꠖꠞ ꠘꠣꠝꠦ ꠝꠣꠘ꠆ꠘꠔ ꠇꠞꠤꠀ ꠙꠣꠇ-ꠙꠛꠤꠔ꠆ꠞ ꠇꠁꠀ ꠀꠟꠉ ꠇꠞꠤꠟꠣꠄ, ꠔꠦ ꠅꠃ ꠎꠝꠤꠘꠅ ꠎꠦ ꠙꠞꠤꠝꠣꠘꠦ ꠈꠦꠔ ꠅꠄ, ꠅꠃ ꠚꠡꠟꠞ ꠙꠞꠤꠝꠣꠘ ꠛꠥꠎꠤꠀ ꠄꠞ ꠖꠣꠝ ꠑꠤꠇ ꠇꠞꠔꠦ ꠅꠁꠛ। ꠙꠞꠔꠦꠇ ꠙꠣꠌ ꠝꠘ ꠛꠣꠞ꠆ꠟꠤ ꠛꠤꠌꠞ ꠖꠣꠝ ꠢꠤꠡꠣꠛꠦ ꠀꠗꠣ ꠡꠦꠞ ꠞꠥꠙꠣ ꠗꠞꠛꠣꠄ। 17 ꠀꠞ ꠎꠝꠤ-ꠝꠤꠞꠣꠡ ꠚꠤꠞꠔ ꠙꠣꠅꠀꠞ ꠛꠍꠞ ꠎꠥꠖꠤ ꠢꠦ ꠔꠣꠞ ꠎꠝꠤꠘꠞꠦ ꠙꠣꠇ-ꠙꠛꠤꠔ꠆ꠞ ꠇꠁꠀ ꠝꠣꠘ꠆ꠘꠔ ꠇꠞꠦ, ꠔꠦ ꠅꠃ ꠘꠤꠅꠝ ꠝꠣꠚꠤꠇ ꠁꠝꠣꠝ ꠍꠣꠛꠦ ꠎꠦ ꠖꠣꠝ ꠑꠤꠇ ꠇꠞꠛꠣ, ꠁꠐꠣꠃ ꠅꠁꠛ ꠄꠞ ꠡꠑꠤꠇ ꠖꠣꠝ। 18 ꠅꠁꠟꠦ ꠚꠤꠞꠔ ꠙꠣꠅꠀꠞ ꠛꠍꠞꠞ ꠛꠣꠖꠦ ꠎꠥꠖꠤ ꠢꠦ ꠔꠣꠞ ꠝꠣꠘ꠆ꠘꠔ ꠇꠞꠦ, ꠔꠦ ꠛꠣꠖꠞ ꠚꠤꠞꠔ ꠙꠣꠅꠀꠞ ꠛꠍꠞ ꠙꠞ꠆ꠎꠘ꠆ꠔ ꠢꠤꠡꠣꠛ ꠇꠞꠤꠀ ꠎꠔ ꠛꠍꠞ ꠅꠄ, ꠅꠔ ꠛꠍꠞꠞ ꠚꠡꠟꠞ ꠢꠤꠡꠣꠛꠦ ꠁꠝꠣꠝ ꠍꠣꠛꠦ ꠄꠞ ꠖꠣꠝ ꠑꠤꠇ ꠇꠞꠛꠣ, ꠛꠍꠞ ꠢꠤꠡꠣꠛꠦ ꠎꠝꠤꠘꠞ ꠖꠣꠝ ꠇꠝꠛ। 19 ꠀꠞ ꠝꠣꠘ꠆ꠘꠔ ꠇꠞꠞꠣ ꠎꠘꠦ ꠎꠥꠖꠤ ꠔꠣꠞ ꠎꠝꠤꠘꠞꠦ ꠈꠣꠟꠣꠍ ꠇꠞꠤꠀ ꠘꠤꠔ ꠌꠣꠄ, ꠔꠦ ꠑꠤꠇ ꠇꠞꠣ ꠅꠃ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠔꠦ ꠅꠁꠛ, ꠔꠦꠃ ꠎꠝꠤ ꠈꠣꠘ ꠔꠣꠞ ꠅꠁꠛ। 20 ꠅꠁꠟꠦ ꠢꠦ ꠎꠥꠖꠤ ꠈꠣꠟꠣꠍ ꠇꠞꠤ ꠘꠣ ꠘꠦꠄ, ꠛꠣ ꠖꠥꠍꠞꠣ ꠎꠘꠞ ꠉꠦꠍꠦ ꠛꠦꠌꠤꠟꠣꠄ, ꠔꠦ ꠅꠃ ꠎꠝꠤꠘ ꠈꠣꠘ ꠀꠞ ꠈꠣꠟꠣꠍ ꠇꠞꠤꠀ ꠘꠤꠛꠣꠞ ꠙꠕ ꠘꠣꠁ। 21 ꠎꠝꠤ-ꠝꠤꠞꠣꠡ ꠚꠤꠞꠔ ꠙꠣꠁꠛꠣꠞ ꠛꠍꠞ ꠎꠦꠛꠟꠣ ꠎꠝꠤ ꠈꠣꠘ ꠄꠝꠘꠦꠃ ꠈꠣꠟꠣꠍ ꠅꠁꠎꠤꠛ, ꠅꠃ ꠡꠝꠄ ꠁ ꠎꠝꠤ ꠈꠣꠘ ꠝꠣꠛꠥꠖꠞ ꠘꠣꠝꠦ ꠌꠤꠞꠇꠣꠟꠤꠘ ꠍꠣꠚ-ꠇꠛꠣꠟꠣ ꠎꠝꠤꠘꠞ ꠟꠣꠈꠣꠘ ꠙꠣꠇ-ꠙꠛꠤꠔ꠆ꠞ ꠍꠣꠝꠣꠘꠣ ꠢꠤꠡꠣꠛꠦ ꠉꠁꠘ꠆ꠘ ꠅꠁꠛ। ꠁꠈꠣꠘ ꠅꠁꠎꠤꠛ ꠁꠝꠣꠝ ꠍꠣꠛꠞ ꠎꠝꠤ। 22 ꠘꠤꠎꠞ ꠛꠣꠚꠣꠁꠔꠤ ꠎꠝꠤ ꠘꠣꠄ ꠁꠟꠣ ꠇꠥꠘꠥ ꠈꠞꠤꠖꠣ ꠎꠝꠤꠘꠞꠦ ꠇꠦꠃ ꠎꠥꠖꠤ ꠝꠣꠘ꠆ꠘꠔ ꠝꠣꠘꠤꠀ ꠙꠣꠇ-ꠙꠛꠤꠔ꠆ꠞ ꠢꠤꠡꠣꠛꠦ ꠉꠁꠘ꠆ꠘ ꠇꠞꠣꠄ, 23 ꠔꠦ ꠁꠝꠣꠝ ꠍꠣꠛꠦ ꠚꠤꠞꠔ ꠙꠣꠅꠀꠞ ꠛꠍꠞ ꠙꠞ꠆ꠎꠘ꠆ꠔ ꠢꠤꠡꠣꠛ ꠇꠞꠤꠀ ꠁꠈꠣꠘꠞ ꠖꠣꠝ ꠑꠤꠇ ꠇꠞꠛꠣ, ꠀꠞ ꠢꠃ ꠖꠤꠘꠃ ꠅꠃ ꠎꠝꠤꠘꠞ ꠖꠣꠝꠞꠦ ꠢꠦ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ ꠍꠣꠝꠣꠘꠣ ꠢꠤꠡꠣꠛꠦ ꠖꠤꠟꠣꠁꠔꠦ ꠅꠁꠛ। 24 ꠀꠞ ꠎꠝꠤ ꠈꠣꠘ ꠢꠦ ꠎꠣꠞ ꠉꠦꠍ ꠕꠣꠇꠤ ꠟꠁꠍꠤꠟ, ꠎꠝꠤ-ꠝꠤꠞꠣꠡ ꠚꠤꠞꠔ ꠙꠣꠁꠛꠣꠞ ꠛꠍꠞ ꠁꠈꠣꠘ ꠢꠤꠞꠛꠣꠞ ꠢꠃ ꠝꠥꠟ ꠝꠣꠟꠤꠇꠞ ꠀꠔꠅ ꠎꠣꠁꠛ। 25 ꠢꠇꠟ ꠎꠤꠘꠤꠡꠞ ꠖꠣꠝ ꠑꠤꠇ ꠇꠞꠤꠅ, ꠄꠛꠣꠖꠔ ꠈꠣꠘꠣꠞ ꠝꠣꠙꠦ। ꠙꠞꠔꠦꠇ ꠛꠤꠡ ꠞꠔꠤꠄ ꠄꠇ ꠔꠟꠣ ꠉꠘꠤꠅ।
26 “ꠇꠥꠘꠥ ꠙꠡꠥꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣꠞꠦ ꠇꠦꠃ ꠝꠣꠛꠥꠖꠞ ꠘꠣꠝꠦ ꠟꠤꠟ꠆ꠟꠣ ꠖꠤꠛꠣꠞ ꠟꠣꠉꠤ ꠝꠣꠘ꠆ꠘꠔ ꠇꠞꠔ ꠙꠣꠞꠔ ꠘꠣꠄ, ꠁꠐꠣ ꠔ ꠄꠝꠘꠦꠃ ꠝꠣꠛꠥꠖꠞ। ꠁꠔꠣ ꠉꠞꠥ-ꠍꠣꠉꠟ, ꠝꠦꠠꠣ ꠎꠦꠔꠣꠞ ꠛꠣꠁꠌ꠆ꠌꠣꠃ ꠅꠃꠇ, ꠁꠐꠣ ꠝꠣꠛꠥꠖꠞ। 27 ꠎꠥꠖꠤ ꠁꠐꠣ ꠇꠥꠘꠥ ꠢꠣꠞꠣꠝ ꠙꠡꠥꠞ ꠙꠄꠟꠣ ꠝꠦꠖꠣ ꠛꠣꠁꠌ꠆ꠌꠣ ꠅꠄ, ꠔꠦ ꠁꠝꠣꠝ ꠍꠣꠛꠞ ꠑꠤꠇ ꠇꠞꠣ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠀ ꠁꠐꠣꠞꠦ ꠈꠣꠟꠣꠍ ꠇꠞꠤ ꠘꠤꠔ ꠙꠣꠞꠛ। ꠀꠞ ꠢꠦ ꠎꠥꠖꠤ ꠈꠣꠟꠣꠍ ꠇꠞꠤ ꠘꠣ ꠘꠦꠄ, ꠔꠦ ꠅꠃ ꠖꠣꠝꠦ ꠁꠐꠣꠞꠦ ꠛꠦꠌꠤꠟꠤꠔꠦ ꠅꠁꠛ।
28 “ꠅꠁꠟꠦ ꠇꠥꠘꠥ ꠝꠣꠘꠡꠦ ꠎꠥꠖꠤ ꠔꠣꠞ ꠘꠤꠎꠞ ꠇꠥꠘꠥ ꠍꠣꠝꠣꠘꠣ ꠝꠣꠛꠥꠖꠞ ꠘꠣꠝꠦ ꠌꠤꠞꠇꠣꠟꠤꠘ ꠍꠣꠚ-ꠇꠛꠣꠟꠣ ꠖꠟꠤꠟꠞ ꠟꠣꠈꠣꠘ ꠝꠣꠘ꠆ꠘꠔ ꠇꠞꠤꠟꠣꠄ, ꠔꠦ ꠅꠃ ꠝꠣꠘ꠆ꠘꠔ ꠇꠞꠣ ꠍꠣꠝꠣꠘꠣ ꠀꠞ ꠈꠣꠟꠣꠍ ꠇꠞꠤꠀ ꠚꠤꠞꠔ ꠘꠤꠔ ꠙꠣꠞꠔ ꠘꠣꠄ, ꠛꠣ ꠛꠦꠌꠔ-ꠅ ꠙꠣꠞꠔ ꠘꠣꠄ। ꠁꠔꠣ ꠎꠝꠤ-ꠎꠝꠣ ꠅꠃꠇ, ꠛꠣ ꠇꠥꠘꠥ ꠝꠣꠘꠥꠡ, ꠛꠣ ꠙꠡꠥ ꠅꠁꠟꠦꠅ, ꠁꠔꠣ ꠌꠤꠞꠇꠣꠟꠞ ꠟꠣꠉꠤ ꠝꠣꠛꠥꠖꠞ ꠘꠣꠝꠦ ꠈꠣꠍ ꠙꠛꠤꠔ꠆ꠞ ꠍꠣꠝꠣꠘꠣ ꠢꠤꠡꠣꠛꠦ ꠉꠁꠘ꠆ꠘ ꠅꠁꠛ। 29 ꠇꠥꠘꠥ ꠝꠣꠘꠡꠞꠦ ꠝꠣꠛꠥꠖꠞ ꠘꠣꠝꠦ ꠌꠤꠞꠇꠣꠟꠞ ꠟꠣꠉꠤ ꠅꠟꠣ ꠝꠣꠘ꠆ꠘꠔ ꠇꠞꠤꠀ ꠖꠤꠟꠣꠁꠟꠦ, ꠔꠣꠞꠦ ꠀꠞ ꠈꠣꠟꠣꠍ ꠇꠞꠤ ꠘꠦꠅꠀ ꠎꠣꠁꠔ ꠘꠣꠄ, ꠔꠣꠞꠦ ꠎꠣꠘꠦ ꠝꠣꠞꠤꠟꠤꠔꠦ ꠅꠁꠛ।
30 “ꠎꠝꠤꠘꠅ ꠕꠣꠇꠤ ꠎꠦꠔꠣ ꠚꠟ-ꠚꠡꠟ ꠝꠤꠟꠦ, ꠁꠔꠣꠞ ꠖꠡ ꠛꠣꠐꠞ ꠄꠇ ꠛꠣꠐ ꠔ ꠝꠣꠛꠥꠖꠞ। ꠁꠔꠣ ꠈꠦꠔꠞ ꠚꠡꠟ ꠅꠃꠇ ꠛꠣ ꠉꠣꠍꠞ ꠚꠟ ꠅꠃꠇ, ꠢꠇꠟꠔꠣꠃ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ। 31 ꠇꠦꠃ ꠎꠥꠖꠤ ꠔꠣꠞ ꠅꠃ ꠖꠡ ꠛꠣꠐꠞ ꠄꠇ ꠛꠣꠐ ꠈꠣꠟꠣꠍ ꠇꠞꠤꠀ ꠘꠤꠔ ꠌꠣꠄ, ꠔꠦ ꠄꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠛꠦꠡꠤ ꠖꠤꠔꠦ ꠅꠁꠛ। 32 ꠙꠞꠔꠦꠇ ꠙꠡꠥꠞ ꠙꠣꠟꠞ ꠖꠡ ꠛꠣꠐꠞ ꠄꠇ ꠛꠣꠐ ꠝꠣꠛꠥꠖꠞ, ꠝꠣꠘꠤ ꠙꠣꠟꠦ ꠙꠡꠥ ꠉꠘꠣꠞ ꠡꠝꠄ ꠙꠞꠔꠦꠇ ꠖꠡ ꠘꠝ꠆ꠛꠞ ꠙꠡꠥ ꠅꠉꠥ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ। 33 ꠅꠃ ꠖꠡ ꠘꠝ꠆ꠛꠞ ꠙꠡꠥ ꠅꠉꠥꠁꠘ ꠛꠣꠖ ꠛꠣ ꠜꠣꠟꠣ ꠁꠔꠣ ꠖꠦꠈꠣꠞ ꠇꠥꠘꠥ ꠎꠞꠥꠞ ꠘꠣꠄ, ꠛꠣ ꠁꠐꠣ ꠛꠖꠟꠣꠁꠀ ꠖꠤꠛꠣꠞ ꠡꠥꠎꠥꠉ ꠘꠣꠁ। ꠇꠦꠃ ꠎꠥꠖꠤ ꠁꠐꠣꠞ ꠛꠖꠟꠣ ꠖꠦꠄ, ꠔꠦ ꠅꠃ ꠖꠡ ꠘꠝ꠆ꠛꠞ ꠙꠡꠥ ꠀꠞ ꠛꠖꠟꠣ ꠙꠡꠥ ꠖꠥꠁꠅꠐꠣꠃ ꠝꠣꠛꠥꠖꠞ ꠘꠣꠝꠦ ꠙꠣꠇ-ꠙꠛꠤꠔ꠆ꠞ ꠅꠁꠎꠤꠛ, ꠁꠔꠣ ꠀꠞ ꠈꠣꠟꠣꠍ ꠇꠞꠤ ꠘꠦꠅꠀ ꠎꠣꠁꠔ ꠘꠣꠄ।”
34 ꠝꠣꠛꠥꠖꠦ ꠔꠥꠞ ꠙꠣꠠꠞ ꠃꠙꠞꠦ ꠝꠥꠍꠣ ꠘꠛꠤꠞ ꠉꠦꠍꠦ, ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠅꠃ ꠢꠥꠇꠥꠝ-ꠀꠢꠇꠣꠝ ꠅꠇꠟ ꠖꠣꠘ ꠇꠞꠍꠤꠟꠣ॥