ꠙꠛꠤꠔ꠆ꠞ ꠔꠃꠞꠣꠔ ꠡꠞꠤꠚ ꠌꠃꠔꠣ ꠍꠤꠙꠣꠞꠣ
ꠡꠥꠝꠣꠞꠤ
ꠙꠞꠤꠌꠤꠔꠤ
ꠅꠃ ꠍꠤꠙꠣꠞꠣ ꠢꠎꠞꠔ ꠝꠥꠍꠣ (ꠀ꠩) ꠅꠞ ꠃꠙꠞꠦ ꠘꠣꠎꠤꠟ ꠅꠀ ꠙꠛꠤꠔ꠆ꠞ ꠔꠃꠞꠣꠔ ꠡꠞꠤꠚꠞ ꠌꠣꠁꠞ ꠘꠝ꠆ꠛꠞ ꠍꠤꠙꠣꠞꠣ। ꠄꠞ ꠘꠣꠝ ꠅꠁꠟ ꠡꠥꠝꠣꠞꠤ ꠍꠤꠙꠣꠞꠣ। ꠡꠥꠝꠣꠞꠤ ꠘꠣꠝꠞ ꠇꠣꠞꠘ ꠅꠁꠟ, ꠅꠃ ꠍꠤꠙꠣꠞꠣꠞ ꠡꠥꠞꠥꠔꠦ ꠛꠘꠤ ꠁꠍꠞꠣꠁꠟꠞ ꠙꠄꠟꠣ ꠀꠖꠝ ꠡꠥꠝꠣꠞꠤꠞ ꠛꠦꠙꠣꠞꠦ ꠟꠦꠈꠣ ꠀꠍꠦ। ꠀꠞ ꠢꠦꠡꠦ ꠀꠞꠇ ꠀꠖꠝ ꠡꠥꠝꠣꠞꠤ ꠅꠁꠍꠦ, ꠄꠞ ꠝꠣꠎꠦ ꠅꠘꠥꠝꠣꠘ ꠌꠣꠟ꠆ꠟꠤꠡ ꠛꠍꠞ ꠉꠥꠎꠞꠤ ꠉꠦꠍꠦ। ꠀꠞ ꠅꠃ ꠡꠝꠄ ꠛꠘꠤ ꠁꠍꠞꠣꠁꠟꠞ ꠘꠣꠚꠞꠝꠣꠘ ꠛꠦꠐꠣ-ꠛꠦꠐꠤꠘ ꠝꠞꠥꠜꠥꠝꠤꠔ ꠝꠞꠤ ꠉꠦꠍꠂꠘ, ꠅꠁꠟꠦ ꠔꠣꠞꠣꠞ ꠀꠅꠟꠣꠖ ꠅꠇꠟ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠇꠦꠘꠣꠘ ꠖꠦꠡꠅ ꠢꠣꠝꠣꠘꠤꠞ ꠟꠣꠉꠤ ꠛꠣꠌꠤꠀ ꠞꠁꠍꠂꠘ। ꠢꠃ ꠖꠥꠍꠞꠣ ꠀꠖꠝ ꠡꠥꠝꠣꠞꠤꠞ ꠡꠝꠄ ꠄꠞꠣꠞꠦ ꠉꠘꠣ ꠅꠁꠍꠦ।
ꠁꠛꠞꠣꠘꠤ ꠜꠣꠡꠣꠄ ꠁ ꠍꠤꠙꠣꠞꠣꠞ ꠘꠣꠝ ꠛꠦꠝꠤꠖꠛꠣꠞ, ꠝꠣꠘꠤ ꠝꠞꠥꠜꠥꠝꠤꠞ ꠝꠣꠎꠦ। ꠛꠘꠤ ꠁꠍꠞꠣꠁꠟ ꠅꠇꠟꠦ ꠅꠘꠥꠝꠣꠘ ꠌꠣꠟ꠆ꠟꠤꠡ ꠛꠍꠞ ꠗꠞꠤꠀ ꠝꠞꠥꠜꠥꠝꠤꠞ ꠘꠣꠘꠣꠘ ꠎꠣꠉꠣꠔ ꠎꠔ ꠍꠚꠞ ꠇꠞꠍꠂꠘ, ꠅꠃ ꠍꠚꠞꠞ ꠘꠣꠘꠣꠘ ꠊꠐꠘꠣ ꠀꠞ ꠁꠔꠤꠢꠣꠡ ꠁ ꠍꠤꠙꠣꠞꠣꠔ ꠀꠍꠦ। ꠎꠦꠝꠘ, ꠉꠥꠁꠀ ꠅꠇꠟꠞꠦ ꠇꠦꠘꠣꠘ ꠖꠦꠡꠅ ꠙꠣꠑꠣꠘꠤ, ꠇꠥꠞꠣꠢꠞ ꠘꠣꠚꠞꠝꠣꠘꠤ, ꠀꠟ꠆ꠟꠣꠞ ꠢꠥꠇꠥꠝꠦ ꠢꠎꠞꠔ ꠢꠣꠞꠥꠘ (ꠀ꠩) ꠅꠞ ꠟꠣꠑꠤꠔ ꠚꠥꠟ, ꠙꠤꠔꠟꠞ ꠢꠣꠚ, ꠉꠣꠗꠣꠞ ꠝꠥꠈꠅ ꠎꠛꠣꠘ ꠚꠥꠐꠣ, ꠀꠞꠅ ꠛꠃꠔ ꠊꠐꠘꠣ।
ꠄꠞꠝꠣꠎꠦ ꠀꠍꠦ:
(ꠇ) ꠔꠥꠞ ꠙꠣꠠꠞ ꠝꠣꠎꠦ ꠛꠘꠤ ꠁꠍꠞꠣꠁꠟꠞ ꠀꠈꠦꠞꠤ ꠖꠤꠘ ꠅꠇꠟ ১:১—১০:১০ ꠀꠄꠀꠔ
(ꠈ) ꠔꠥꠞ ꠙꠣꠠ ꠕꠣꠇꠤ ꠝꠥꠀꠛ ꠖꠦꠡꠅ ꠍꠚꠞ ১০:১১—২২:১ ꠀꠄꠀꠔ
(ꠉ) ꠝꠥꠀꠛ ꠖꠦꠡꠞ ꠜꠤꠔꠞꠦ ꠘꠣꠘꠣꠘ ꠊꠐꠘꠣ ২২:২—৩৬:১৩ ꠀꠄꠀꠔ
1
ꠙꠄꠟꠣ ꠛꠣꠞ ꠛꠘꠤ ꠁꠍꠞꠣꠁꠟꠞ ꠀꠖꠝ ꠡꠥꠝꠣꠞꠤ
1 ꠛꠘꠤ ꠁꠍꠞꠣꠁꠟ ꠎꠣꠔꠤ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠅꠁꠀ ꠀꠅꠀꠞ ꠖꠥꠁ ꠘꠝ꠆ꠛꠞ ꠛꠍꠞꠞ ꠡꠝꠄ, ꠖꠥꠁ ꠘꠝ꠆ꠛꠞ ꠌꠣꠘ꠆ꠖꠞ ꠙꠄꠟꠣ ꠖꠤꠘ, ꠝꠣꠛꠥꠖꠦ ꠍꠤꠘꠣꠁ ꠝꠞꠥꠜꠥꠝꠤꠔ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠢꠎꠞꠔ ꠝꠥꠍꠣꠞ ꠟꠉꠦ ꠛꠣꠔꠌꠤꠔ ꠇꠞꠟꠣ। ꠔꠣꠁꠘ ꠝꠥꠍꠣꠞꠦ ꠇꠁꠟꠣ, 2 “ꠅꠈꠘ ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠄꠇ ꠄꠇ ꠇꠞꠤ ꠢꠇꠟ ꠛꠦꠐꠣꠁꠘ꠆ꠔꠞ ꠘꠣꠝ ꠟꠦꠈꠅ। 3 ꠔꠥꠝꠤ ꠀꠞ ꠔꠥꠝꠣꠞ ꠜꠣꠁ ꠢꠣꠞꠥꠘꠦ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ ꠛꠄꠅꠡꠤ, ꠝꠣꠘꠤ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠚꠃꠎꠤ ꠖꠟ ꠝꠣꠚꠤꠇ ꠔꠣꠞꠣꠞꠦ ꠉꠘꠅ। 4 ꠙꠞꠔꠦꠇ ꠈꠣꠘ꠆ꠖꠣꠘꠞ ꠄꠇꠎꠘꠦ ꠔꠥꠝꠞꠣꠞꠦ ꠡꠣꠁꠎ꠆ꠎ ꠇꠞꠛꠣ, ꠄꠞꠣ ꠅꠁꠛꠣ ꠘꠤꠎꠞ ꠉꠥꠡ꠆ꠐꠤꠞ ꠙꠞꠗꠣꠘ ꠝꠥꠞꠛ꠆ꠛꠤ। 5 ꠎꠣꠞꠣ ꠡꠣꠁꠎ꠆ꠎ ꠇꠞꠛꠣ, ꠄꠞꠣꠞ ꠘꠣꠝ ꠅꠁꠟ,
ꠞꠥꠛꠦꠘ ꠈꠣꠘ꠆ꠖꠣꠘꠞ ꠡꠣꠖꠤꠃꠞꠞ ꠙꠥꠀ ꠀꠟꠤꠍꠥꠞ,
6 ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠡꠥꠞꠡꠣꠖꠣꠄꠅꠞ ꠙꠥꠀ ꠡꠣꠟꠥꠝꠤꠟ,
7 ꠄꠢꠥꠖꠣ ꠈꠣꠘ꠆ꠖꠣꠘꠞ ꠀꠝꠤꠘꠣꠖꠣꠛꠞ ꠙꠥꠀ ꠘꠣꠢꠤꠡ,
8 ꠁꠍꠣꠈꠞ ꠈꠣꠘ꠆ꠖꠣꠘꠞ ꠍꠥꠉꠣꠞꠞ ꠙꠥꠀ ꠘꠕꠘꠦꠟ,
9 ꠍꠛꠥꠟꠘ ꠈꠣꠘ꠆ꠖꠣꠘꠞ ꠢꠦꠟꠘꠞ ꠙꠥꠀ ꠁꠟꠤꠀꠛ,
10 ꠁꠃꠍꠥꠚꠞ ꠙꠥꠀꠂꠘ꠆ꠔꠞ ꠝꠣꠎ ꠕꠣꠇꠤ:
ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠀꠝꠤꠢꠥꠖꠞ ꠙꠥꠀ ꠀꠟꠤꠡꠣꠝꠣ,
ꠝꠣꠘꠡꠣ ꠈꠣꠘ꠆ꠖꠣꠘꠞ ꠚꠣꠔꠡꠥꠞꠞ ꠙꠥꠀ ꠉꠝꠟꠤꠄꠟ,
11 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠎꠤꠖꠣꠃꠘꠤꠞ ꠙꠥꠀ ꠀꠛꠤꠖꠣꠘ,
12 ꠖꠣꠘ ꠈꠣꠘ꠆ꠖꠣꠘꠞ ꠀꠝꠤꠡꠣꠖꠣꠞ ꠙꠥꠀ ꠀꠈꠤꠀꠎꠣꠞ,
13 ꠀꠡꠤꠞ ꠈꠣꠘ꠆ꠖꠣꠘꠞ ꠃꠇꠞꠣꠘꠞ ꠙꠥꠀ ꠚꠎꠤꠄꠟ,
14 ꠍꠣꠖꠥ ꠈꠣꠘ꠆ꠖꠣꠘꠞ ꠖꠥꠄꠟꠞ ꠙꠥꠀ ꠁꠟꠤꠀꠍꠚ,
15 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠁꠘꠣꠘꠞ ꠙꠥꠀ ꠀꠢꠤꠞ।”
16 ꠛꠘꠤ ꠁꠍꠞꠣꠁꠟꠞ ꠝꠣꠎ ꠕꠣꠇꠤ ꠅꠃ ꠛꠣꠞꠅ ꠎꠘꠞꠦ ꠙꠍꠘ꠆ꠖ ꠇꠞꠤ ꠘꠦꠅꠀ ꠅꠁꠟ। ꠄꠞꠣ ꠅꠁꠟꠣ ꠔꠣꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠙꠞꠤꠛꠣꠞꠞ ꠙꠞꠗꠣꠘ, ꠛꠘꠤ ꠁꠍꠞꠣꠁꠟꠞ ꠚꠃꠎꠤ ꠖꠟꠞ ꠡꠞ꠆ꠖꠣꠞ।
17 ꠝꠣꠛꠥꠖꠦ ꠎꠦꠞꠣꠞ ꠘꠣꠝ ꠇꠁꠍꠟꠣ, ꠝꠥꠍꠣ ꠀꠞ ꠢꠣꠞꠥꠘꠦ ꠅꠃ ꠡꠞ꠆ꠖꠣꠞ ꠅꠇꠟꠞꠦ ꠈꠛꠞꠖꠤ ꠀꠘꠣꠁꠟꠣ, 18 ꠀꠞ ꠅꠃ ꠛꠍꠞꠞ ꠖꠥꠍꠞꠣ ꠌꠣꠘ꠆ꠖꠞ ꠙꠄꠟꠣ ꠖꠤꠘ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠟꠣ। ꠔꠣꠞꠣ ꠎꠣꠞꠎꠤꠞ ꠉꠥꠡ꠆ꠐꠤ ꠀꠞ ꠙꠞꠤꠛꠣꠞ ꠝꠣꠚꠤꠇ ꠔꠣꠞꠣꠞ ꠘꠣꠝ ꠟꠦꠈꠣꠁꠟ। ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ ꠛꠄꠅꠡꠞ ꠛꠦꠐꠣꠁꠘ꠆ꠔꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 19 ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠍꠤꠘꠣꠁ ꠝꠞꠥꠜꠥꠝꠤꠔ ꠝꠥꠍꠣꠄ ꠄꠞꠣꠞꠦ ꠉꠘꠤꠟꠣ।
20 ꠁꠀꠇꠥꠛ ꠃꠞꠚꠦ ꠁꠍꠞꠣꠁꠟꠞ ꠛꠠ ꠙꠥꠀꠞ ꠘꠣꠝ ꠞꠥꠛꠦꠘ, ꠅꠃ ꠈꠣꠘ꠆ꠖꠣꠘ ꠕꠣꠇꠤ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 21 ꠞꠥꠛꠦꠘ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠍꠄꠌꠣꠟ꠆ꠟꠤꠡ ꠀꠎꠣꠞ ꠙꠣꠌ-ꠡ ꠎꠘ।
22 ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 23 ꠡꠤꠝꠤꠅꠘ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠃꠘꠥꠡꠣꠁꠐ ꠀꠎꠣꠞ ꠔꠤꠘ-ꠡ ꠎꠘ।
24 ꠍꠣꠖꠥ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 25 ꠍꠣꠖꠥ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠙꠄꠔꠣꠟ꠆ꠟꠤꠡ ꠀꠎꠣꠞ ꠍꠄ-ꠡ ꠙꠁꠘ꠆ꠌꠣꠡ ꠎꠘ।
26 ꠄꠢꠥꠖꠣ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 27 ꠄꠢꠥꠖꠣ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠌꠃꠀꠔ꠆ꠔꠁꠞ ꠀꠎꠣꠞ ꠍꠄ-ꠡ ꠎꠘ।
28 ꠁꠍꠣꠈꠞ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 29 ꠁꠍꠣꠈꠞ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠌꠃꠀꠘ꠆ꠘ ꠀꠎꠣꠞ ꠌꠣꠁꠞ-ꠡ ꠎꠘ।
30 ꠍꠛꠥꠟꠘ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 31 ꠍꠛꠥꠟꠘ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠡꠣꠔꠣꠘ꠆ꠘ ꠀꠎꠣꠞ ꠌꠣꠁꠞ-ꠡ ꠎꠘ।
32 ꠁꠃꠍꠥꠚꠞ ꠙꠥꠀ ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 33 ꠀꠚꠞꠣꠁꠝ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠌꠣꠟ꠆ꠟꠤꠡ ꠀꠎꠣꠞ ꠙꠣꠌ-ꠡ ꠎꠘ।
34 ꠀꠞ ꠔꠣꠘ ꠜꠣꠁ ꠝꠣꠘꠡꠣ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 35 ꠝꠣꠘꠡꠣ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠛꠔ꠆ꠔꠤꠡ ꠀꠎꠣꠞ ꠖꠥꠁ-ꠡ ꠎꠘ।
36 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 37 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠙꠣꠄꠔꠤꠡ ꠀꠎꠣꠞ ꠌꠣꠁꠞ-ꠡ ꠎꠘ।
38 ꠖꠣꠘ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 39 ꠖꠣꠘ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠛꠣꠡꠐ꠆ꠐꠤ ꠀꠎꠣꠞ ꠡꠣꠔ-ꠡ ꠎꠘ।
40 ꠀꠡꠤꠞ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 41 ꠀꠡꠤꠞ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠄꠇꠌꠣꠟ꠆ꠟꠤꠡ ꠀꠎꠣꠞ ꠙꠣꠌ-ꠡ ꠎꠘ।
42 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠄꠞ ꠛꠦꠡꠤ, ꠝꠣꠘꠤ ꠎꠣꠞꠣ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠀꠍꠤꠟ, ꠉꠥꠡ꠆ꠐꠤ ꠀꠞ ꠙꠞꠤꠛꠣꠞꠞ ꠙꠞꠤꠌꠄ ꠝꠣꠚꠤꠇ ꠄꠞꠣꠞ ꠘꠣꠝ ꠄꠇ ꠄꠇ ꠇꠞꠤ ꠟꠦꠈꠣ ꠅꠁꠟ। 43 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘ ꠕꠣꠇꠤ ꠙꠣꠅꠀ ꠉꠦꠟ ꠔꠦꠙ꠆ꠙꠣꠘ꠆ꠘ ꠀꠎꠣꠞ ꠌꠣꠁꠞ-ꠡ ꠎꠘ।
44 ꠢꠎꠞꠔ ꠝꠥꠍꠣ, ꠢꠣꠞꠥꠘ ꠀꠞ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠎꠘ ꠝꠥꠞꠛ꠆ꠛꠤ ꠘꠦꠔꠣꠄ ꠅꠃ ꠝꠣꠘꠡꠞꠦ ꠉꠘꠤꠟꠣ। ꠅꠃ ꠛꠣꠞꠅ ꠎꠘ ꠘꠦꠔꠣ ꠀꠍꠟꠣ ꠛꠣꠞꠅ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ। 45 ꠀꠡ꠆ꠔꠣ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠦꠞꠣꠞ ꠛꠄꠅꠡ ꠛꠤꠡ ꠛꠍꠞ ꠛꠣ ꠔꠣꠞ ꠛꠦꠡꠤ, ꠝꠣꠘꠤ ꠎꠥꠖ꠆ꠖꠔ ꠎꠣꠅꠀꠞ ꠎꠥꠇꠣ ꠛꠄꠅꠡ, ꠎꠣꠞꠎꠤꠞ ꠉꠥꠡ꠆ꠐꠤ ꠝꠣꠚꠤꠇ ꠔꠣꠞꠣꠞꠦ ꠉꠘꠣ ꠅꠁꠟ। 46 ꠉꠘꠤꠀ ꠢꠇ꠆ꠇꠟꠔꠣꠄ ꠍꠄ ꠟꠣꠈ ꠔꠤꠘ ꠀꠎꠣꠞ ꠙꠣꠌ-ꠡ ꠙꠁꠘ꠆ꠌꠣꠡ ꠎꠘ ꠙꠣꠅꠀ ꠉꠦꠟ।
47 ꠅꠁꠟꠦ ꠟꠦꠛꠤ ꠈꠣꠘ꠆ꠖꠣꠘꠞꠦ, ꠝꠣꠘꠤ ꠁꠝꠣꠝ ꠛꠋꠡꠞꠦ ꠄꠞꠣꠞ ꠟꠉꠦ ꠉꠘꠣ ꠅꠁꠟ ꠘꠣ। 48 ꠝꠣꠛꠥꠖꠦ ꠀꠉꠦꠃ ꠝꠥꠍꠣꠞꠦ ꠇꠁꠍꠟꠣ, 49 “ꠔꠥꠝꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠉꠘꠛꠣꠄ ꠘꠣ, ꠉꠘꠣꠞ ꠡꠝꠄ ꠛꠘꠤ ꠁꠍꠞꠣꠁꠟꠞ ꠅꠁꠘ꠆ꠘ ꠝꠣꠘꠡꠞ ꠟꠉꠦ ꠄꠞꠣꠞꠦ ꠢꠤꠡꠣꠛ ꠇꠞꠤꠅ ꠘꠣ। 50 ꠔꠥꠝꠤ ꠔꠣꠞꠣꠞꠦ ꠡꠣꠢꠣꠖꠔ ꠔꠣꠝ꠆ꠛꠥ, ꠝꠣꠘꠤ ꠀꠝꠣꠞ ꠊꠞꠞ ꠡꠣꠎ-ꠡꠞꠘ꠆ꠎꠣꠝ ꠀꠞ ꠢꠇꠟꠔꠣꠞ ꠖꠦꠈꠣ-ꠢꠥꠘꠣꠞ ꠜꠣꠞ ꠖꠤꠛꠣꠄ। ꠔꠣꠞꠣꠞ ꠇꠣꠝ ꠅꠁꠛ, ꠀꠝꠣꠞ ꠊꠞ ꠀꠞ ꠄꠞ ꠢꠇꠟ ꠡꠣꠎ-ꠡꠞꠘ꠆ꠎꠣꠝ ꠛꠁꠀ ꠘꠦꠅꠀ। ꠔꠣꠞꠣ ꠄꠞ ꠌꠣꠁꠞꠅ ꠉꠣꠟꠣꠛꠣꠄ ꠎꠣꠞꠎꠤꠞ ꠔꠣꠝ꠆ꠛꠥ ꠐꠣꠋꠉꠣꠁꠀ ꠞꠁꠛꠣ ꠀꠞ ꠀꠝꠣꠞ ꠊꠞꠞ ꠖꠦꠈꠣ-ꠢꠥꠘꠣ ꠇꠞꠛꠣ। 51 ꠀꠝꠣꠞ ꠊꠞꠞꠦ ꠄꠇ ꠎꠣꠉꠣ ꠕꠣꠇꠤ ꠀꠞꠇ ꠎꠣꠉꠣꠔ ꠘꠤꠔꠦ ꠅꠁꠟꠦ, ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ ꠁꠈꠣꠘ ꠈꠥꠟꠛꠣ, ꠛꠣꠖꠦ ꠀꠞꠇ ꠎꠣꠉꠣꠔ ꠉꠤꠀ ꠄꠇ ꠄꠇ ꠇꠞꠤ ꠎꠥꠠꠣ ꠟꠣꠉꠣꠁꠀ ꠢꠤꠞꠛꠣꠞ ꠛꠣꠘꠣꠁꠛꠣ। ꠈꠣꠟꠤ ꠟꠦꠛꠤ ꠈꠣꠘ꠆ꠖꠣꠘ ꠍꠣꠠꠣ ꠅꠁꠘ꠆ꠘ ꠇꠦꠃ ꠁꠔꠣꠞ ꠇꠣꠘ꠆ꠖꠣꠔ ꠉꠦꠟꠦ ꠔꠣꠞꠦ ꠎꠣꠘꠦ ꠝꠣꠞꠣ ꠅꠁꠛ। 52 ꠛꠣꠖ-ꠛꠣꠇꠤ ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞ ꠚꠃꠎꠤ ꠖꠟ ꠝꠣꠚꠤꠇ ꠎꠣꠞꠎꠤꠞ ꠔꠣꠝ꠆ꠛꠥ ꠐꠣꠋꠉꠣꠁꠛꠣ। ꠙꠞꠔꠦꠇꠦ ꠎꠣꠞꠎꠤꠞ ꠖꠟꠞ ꠡꠤꠝꠣꠘꠣꠞ ꠝꠣꠎꠦ, ꠖꠟꠞ ꠘꠤꠡꠣꠘꠣ ꠟꠣꠉꠣꠁꠟ ꠙꠔꠣꠇꠣꠞ ꠔꠟꠦ ꠞꠁꠔꠦ ꠅꠁꠛ। 53 ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠎꠣꠔꠦ ꠝꠣꠛꠥꠖꠞ ꠉꠎꠛ ꠘꠣ ꠟꠣꠝꠦ, ꠄꠞꠟꠣꠉꠤ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠡꠦ ꠀꠝꠣꠞ ꠡꠣꠢꠣꠖꠔ ꠔꠣꠝ꠆ꠛꠥꠞ ꠙꠣꠞꠣꠖꠣꠞꠤ ꠇꠞꠣꠞ ꠟꠣꠉꠤ ꠀꠝꠣꠞ ꠊꠞꠞ ꠌꠣꠁꠞꠅ ꠉꠣꠟꠣꠛꠣꠄ ꠔꠣꠞꠣꠞ ꠔꠣꠝ꠆ꠛꠥ ꠐꠣꠋꠉꠣꠁꠀ ꠞꠁꠛꠣ।”
54 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠛꠘꠤ ꠁꠍꠞꠣꠁꠟꠦ ꠑꠤꠇ ꠅꠟꠣꠃ ꠇꠞꠟꠣ।