1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁ ꠖꠦꠅ, ꠀꠝꠤ ꠎꠦ ꠖꠦꠡꠈꠣꠘꠞꠦ ꠔꠥꠝꠞꠣꠞ ꠘꠤꠎꠞ ꠖꠦꠡ ꠢꠤꠡꠣꠛꠦ ꠖꠣꠘ ꠇꠞꠞꠣꠝ, ꠔꠥꠝꠞꠣ ꠎꠦꠛꠟꠣ ꠢꠃ ꠇꠦꠘꠣꠘ ꠖꠦꠡꠅ ꠎꠣꠁꠛꠣꠄ, 3 ꠉꠤꠀ ꠀꠝꠣꠞꠦ ꠈꠥꠡ ꠞꠣꠈꠣꠞ ꠘꠤꠅꠔꠦ ꠀꠉꠥꠘꠤꠔ ꠖꠦꠅꠀ ꠊꠦꠞꠣꠘ ꠀꠟꠣ ꠎꠦꠇꠥꠘꠥ ꠇꠥꠞꠛꠣꠘꠤ ꠢꠤꠡꠣꠛꠦ ꠔꠥꠝꠞꠣꠞ ꠙꠣꠟ ꠕꠣꠇꠤ ꠎꠦꠛꠟꠣ ꠉꠣꠁ-ꠉꠞꠥ ꠛꠣ ꠝꠦꠠꠣ-ꠍꠣꠉꠟ ꠀꠘꠤꠀ ꠀꠝꠣꠞ ꠘꠣꠝꠦ ꠖꠤꠛꠣꠞ ꠘꠤꠅꠔ ꠇꠞꠛꠣꠄ, ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤ, ꠇꠥꠘꠥ ꠝꠣꠘ꠆ꠘꠔ ꠙꠥꠞꠘꠞ ꠇꠥꠞꠛꠣꠘꠤ, ꠢꠇꠟ ꠘꠝꠥꠘꠣꠞ ꠘꠚꠟ ꠇꠥꠞꠛꠣꠘꠤ, ꠛꠣ ꠎꠦꠇꠥꠘꠥ ꠁꠖꠞ ꠇꠥꠞꠛꠣꠘꠤ ꠖꠤꠟꠦ, 4 ꠇꠥꠞꠛꠣꠘꠤꠞ ꠙꠞꠔꠦꠇ ꠙꠡꠥꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣꠅ ꠖꠤꠛꠣꠄ। ꠅꠃ ꠍꠖꠉꠣꠞ ꠟꠣꠉꠤ ꠖꠥꠁ ꠡꠦꠞ ꠝꠄꠖꠣꠞꠦ ꠄꠇ ꠡꠦꠞ ꠔꠦꠟꠖꠤ ꠝꠣꠈꠣꠁꠀ ꠈꠣꠁ ꠛꠣꠘꠣꠁꠀ ꠀꠘꠛꠣꠄ। 5 ꠅꠁꠟꠦ ꠇꠥꠞꠛꠣꠘꠤꠞ ꠙꠡꠥꠐꠣ ꠎꠥꠖꠤ ꠝꠦꠠꠣ-ꠛꠣꠁꠌ꠆ꠌꠣ ꠅꠄ, ꠔꠦ ꠁꠐꠣꠞ ꠟꠉꠦ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠢꠤꠡꠣꠛꠦ ꠀꠋꠉꠥꠞꠞ ꠄꠇ ꠡꠦꠞ ꠡꠞꠛꠔꠅ ꠖꠤꠛꠣꠄ। 6 ꠀꠞ ꠅꠃ ꠙꠡꠥ ꠎꠥꠖꠤ ꠝꠦꠠꠣ ꠅꠄ, ꠔꠦ ꠔꠣꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠡꠥꠀ ꠡꠦꠞ ꠔꠦꠟꠖꠤ ꠝꠣꠈꠣꠁꠀ ꠌꠣꠁꠞ ꠡꠦꠞ ꠝꠄꠖꠣ ꠖꠤꠛꠣꠄ। 7 ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠟꠣꠉꠤ ꠟꠣꠉꠛ ꠀꠋꠉꠥꠞꠞ ꠡꠥꠀ ꠡꠦꠞ ꠡꠞꠛꠔ। ꠁꠔꠣ ꠀꠘꠤꠀ ꠀꠝꠣꠞꠦ ꠈꠥꠡ ꠇꠞꠣꠞ ꠊꠦꠞꠣꠘ ꠀꠟꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠤꠔꠦ ꠅꠁꠛ। 8 ꠔꠥꠝꠞꠣ ꠎꠥꠖꠤ ꠎꠣꠟꠣꠁꠟ ꠇꠥꠞꠛꠣꠘꠤ, ꠝꠣꠘ꠆ꠘꠔ ꠙꠥꠞꠘꠞ ꠇꠥꠞꠛꠣꠘꠤ ꠛꠣ ꠍꠣꠟꠣꠝꠔꠤ ꠇꠥꠞꠛꠣꠘꠤꠞ ꠟꠣꠉꠤ ꠇꠥꠘꠥ ꠉꠞꠥ ꠟꠁꠀ ꠀꠅ, 9 ꠔꠦ ꠄꠞꠟꠉꠦ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠍꠄ ꠡꠦꠞ ꠝꠄꠖꠣꠞꠦ ꠖꠥꠁ ꠡꠦꠞ ꠔꠦꠟꠖꠤ ꠝꠣꠈꠣꠁꠀ ꠈꠣꠁ ꠀꠘꠔꠦ ꠅꠁꠛ। 10 ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣꠞ ꠟꠣꠉꠤ ꠀꠋꠉꠥꠞꠞ ꠖꠥꠁ ꠡꠦꠞ ꠡꠞꠛꠔꠅ ꠀꠘꠔꠦ ꠅꠁꠛ।

“ꠁꠔꠣ ꠅꠁꠟ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ, ꠁ ꠇꠥꠞꠛꠣꠘꠤꠞ ꠗꠥꠝꠣꠞ ꠊꠦꠞꠣꠘꠦ ꠀꠝꠤ ꠈꠥꠡꠤ ꠅꠁ। 11 ꠇꠥꠞꠛꠣꠘꠤꠞ ꠙꠞꠔꠦꠇ ꠉꠞꠥ, ꠝꠦꠠꠣ, ꠝꠦꠠꠣ-ꠛꠣꠁꠌ꠆ꠌꠣ ꠛꠣ ꠍꠣꠉꠟꠞꠦ ꠅꠃ ꠘꠤꠅꠝꠦ ꠇꠥꠞꠛꠣꠘꠤ ꠖꠤꠛꠣꠄ। 12 ꠔꠥꠝꠞꠣ ꠎꠔ ꠙꠞꠤꠝꠣꠘ ꠙꠡꠥꠃ ꠇꠥꠞꠛꠣꠘꠤ ꠖꠦꠅ ꠘꠣ ꠇꠦꠘꠦ, ꠙꠞꠔꠦꠇ ꠙꠡꠥꠞ ꠟꠉꠦ ꠅꠃ ꠘꠤꠅꠝꠦ ꠍꠖꠉꠣꠅ ꠖꠤꠛꠣꠄ।

13 “ꠢꠥꠘꠅ, ꠀꠝꠤ ꠝꠣꠛꠥꠖꠞꠦ ꠈꠥꠡ ꠇꠞꠣꠞ ꠘꠤꠅꠔꠦ, ꠎꠦꠇꠥꠘꠥ ꠊꠦꠞꠣꠘ ꠀꠟꠣ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠡꠝꠄ, ꠙꠞꠔꠦꠇ ꠛꠘꠤ ꠁꠍꠞꠣꠁꠟꠦ ꠅꠃ ꠘꠤꠅꠝꠦ ꠇꠥꠞꠛꠣꠘꠤ ꠖꠤꠛꠣꠄ। 14 ꠅꠁꠘ꠆ꠘ ꠎꠣꠔꠤꠞ ꠇꠥꠘꠥ ꠝꠥꠍꠣꠚꠤꠞ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠇꠥꠘꠥ ꠜꠤꠘ-ꠖꠦꠡꠤꠄ ꠎꠥꠖꠤ, ꠀꠝꠣꠞꠦ ꠈꠥꠡ ꠇꠞꠣꠞ ꠘꠤꠅꠔꠦ ꠀꠉꠥꠘꠤꠔ ꠖꠦꠅꠀ ꠊꠦꠞꠣꠘ ꠀꠟꠣ ꠇꠥꠞꠛꠣꠘꠤ ꠖꠤꠔ ꠌꠣꠄ, ꠔꠦ ꠢꠦ-ꠅ ꠔꠥꠝꠞꠣꠞ ꠟꠣꠈꠣꠘ ꠄꠇꠁ ꠘꠤꠅꠝ ꠝꠣꠘꠔꠦ ꠅꠁꠛ। 15 ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠅꠃ ꠘꠤꠅꠝ ꠎꠣꠞꠤ ꠞꠁꠛ। ꠔꠥꠝꠞꠣꠞ ꠡꠝꠣꠎꠞ ꠢꠇꠟꠞ ꠟꠣꠉꠤ ꠅꠃ ꠘꠤꠅꠝ ꠌꠣꠟꠥ ꠞꠁꠛ, ꠁꠔꠣ ꠔꠥꠝꠞꠣ ꠅꠅ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠅꠁꠟꠦꠅ, ꠢꠇꠟꠞ ꠟꠣꠉꠤꠃ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠅꠃ ꠄꠇꠁ ꠘꠤꠅꠝ ꠎꠣꠞꠤ ꠞꠁꠛ। ꠁ ꠛꠦꠙꠣꠞꠦ ꠀꠝꠤ ꠝꠣꠛꠥꠖꠞ ꠉꠦꠍꠦ ꠔꠥꠝꠞꠣ ꠎꠦꠟꠣ, ꠜꠤꠘ-ꠖꠦꠡꠤ ꠅꠇꠟꠅ ꠅꠃꠟꠣ, ꠢꠇꠟ ꠢꠝꠣꠘ। 16 ꠔꠥꠝꠞꠣꠞ ꠟꠣꠉꠤ ꠀꠞ ꠔꠥꠝꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠅꠇꠟꠞ ꠟꠣꠉꠤ ꠄꠇꠟꠣꠈꠣꠘ ꠢꠥꠇꠥꠝ-ꠀꠢꠇꠣꠝ ꠀꠞ ꠄꠇꠁ ꠡꠞꠤꠅꠔ ꠌꠣꠟꠥ ꠞꠁꠛ।”

17 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 18 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠅ, ꠀꠝꠤ ꠝꠣꠛꠥꠖꠦ ꠔꠥꠝꠞꠣꠞꠦ ꠎꠦ ꠖꠦꠡꠅ ꠘꠤꠀꠞ, ꠢꠘꠅ ꠉꠤꠀ ꠢꠣꠞꠟꠦ, 19 ꠔꠥꠝꠞꠣ ꠎꠦꠛꠟꠣ ꠢꠃ ꠖꠦꠡꠞ ꠚꠄ-ꠚꠡꠟ ꠈꠣꠁꠛꠣꠄ, ꠅꠃ ꠡꠝꠄ ꠔꠥꠝꠞꠣ ꠁꠔꠣꠞ ꠇꠤꠍꠥ ꠅꠋꠡ ꠀꠝꠣꠞ ꠖꠞꠛꠣꠞꠅ ꠍꠖꠉꠣ ꠢꠤꠡꠣꠛꠦ ꠖꠤꠛꠣꠄ। 20 ꠔꠥꠝꠞꠣꠞ ꠈꠦꠔꠞ ꠙꠄꠟꠣ ꠖꠣꠅꠀ ꠚꠡꠟꠞ ꠝꠄꠖꠣ ꠖꠤꠀ ꠄꠇꠈꠣꠘ ꠞꠥꠐꠤ ꠛꠣꠘꠣꠁꠀ ꠀꠝꠣꠞ ꠘꠣꠝꠦ ꠍꠖꠉꠣ ꠖꠤꠛꠣꠄ। ꠉꠤꠞꠡ꠆ꠔ-ꠛꠣꠠꠤꠞ ꠍꠖꠉꠣꠞ ꠟꠣꠈꠣꠘ ꠖꠤꠛꠣꠄ। 21 ꠙꠄꠟꠣ ꠖꠣꠅꠀ ꠚꠡꠟꠞ ꠅꠃ ꠍꠖꠉꠣ, ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠟꠤꠟ꠆ꠟꠣ-ꠍꠖꠉꠣ ꠢꠤꠡꠣꠛꠦ ꠔꠥꠝꠞꠣ ꠀꠝꠣꠞ ꠘꠣꠝꠦ ꠖꠤꠛꠣꠄ।

22 “ꠅ ꠝꠥꠍꠣ, ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠀꠝꠤ ꠝꠣꠛꠥꠖꠦ ꠔꠥꠝꠣꠞ ꠝꠣꠎꠖꠤ ꠎꠔ ꠢꠥꠇꠥꠝ-ꠀꠢꠇꠣꠝ ꠖꠤꠍꠤ, ꠔꠣꠞꠣ ꠎꠥꠖꠤ ꠘꠣ ꠎꠣꠘꠤꠀ ꠅꠔꠣ ꠇꠥꠘꠥ ꠄꠇꠐꠣ ꠢꠥꠇꠥꠝ ꠜꠣꠋꠉꠤꠟꠣꠄ, 23 ꠁꠔꠣ ꠢꠇꠟ ꠢꠥꠇꠥꠝ ꠔ ꠖꠦꠅꠀꠞ ꠡꠝꠄ ꠕꠣꠇꠤ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠎꠣꠞꠤ ꠞꠄ, 24 ꠔꠦ ꠁ ꠅꠎꠣꠘꠣ ꠛꠦꠙꠣꠞꠐꠣ ꠎꠣꠘꠣꠞ ꠛꠣꠖꠦꠃ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎꠦ ꠝꠤꠟꠤꠀ ꠇꠥꠞꠛꠣꠘꠤ ꠖꠤꠔꠦ ꠅꠁꠛ। ꠔꠣꠞꠣ ꠄꠇꠐꠣ ꠛꠤꠍꠣꠟ ꠖꠤꠀ ꠀꠝꠤ ꠝꠣꠛꠥꠖꠞꠦ ꠈꠥꠡ ꠇꠞꠣꠞ ꠘꠤꠅꠔꠦ ꠊꠦꠞꠣꠘ ꠀꠟꠣ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠛ, ꠄꠞꠟꠉꠦ ꠘꠤꠅꠝ ꠝꠣꠚꠤꠇ ꠗꠣꠘ-ꠉꠝꠞ ꠍꠖꠉꠣ ꠀꠞ ꠡꠞꠛꠔ-ꠙꠣꠘꠤꠞ ꠍꠖꠉꠣ ꠖꠤꠛ। ꠀꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ ꠄꠉꠥ ꠍꠣꠉꠟꠅ ꠇꠥꠞꠛꠣꠘꠤ ꠖꠤꠛ। 25 ꠁꠝꠣꠝ ꠍꠣꠛꠦ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎꠞ ꠅꠃ ꠅꠎꠣꠘꠣ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛꠣ, ꠔꠦꠃ ꠔꠣꠞꠣ ꠝꠣꠚꠤ ꠙꠣꠁꠛꠣ। ꠔꠣꠞꠣ ꠔ ꠁꠌ꠆ꠍꠣ ꠇꠞꠤꠀ ꠁ ꠘꠣꠚꠞꠝꠣꠘꠤ ꠇꠞꠍꠦ ꠘꠣ, ꠔꠣꠞꠣꠞ ꠜꠥꠟꠞ ꠟꠣꠉꠤ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠀꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠅ ꠀꠖꠣꠄ ꠇꠞꠍꠦ। 26 ꠔꠦꠃ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎ ꠀꠞ ꠔꠣꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠝꠣꠘꠡꠞꠦꠅ ꠝꠣꠚ ꠇꠞꠣ ꠅꠁꠛ, ꠎꠥꠖꠤꠅ ꠔꠣꠞꠣ ꠢꠇꠟꠦꠃ ꠁ ꠜꠥꠟ-ꠇꠍꠥꠞꠤ ꠇꠞꠍꠦ।

27 “ꠅꠁꠟꠦ ꠇꠦꠃ ꠎꠥꠖꠤ ꠈꠣꠟꠤ ꠄꠇꠟꠣ ꠜꠥꠟ ꠇꠞꠤꠀ ꠝꠘꠞ ꠅꠎꠣꠘ꠆ꠔꠦ ꠇꠥꠘꠥ ꠘꠣꠚꠞꠝꠣꠘꠤ ꠇꠞꠤꠟꠣꠄ, ꠔꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠢꠦ ꠄꠇ ꠛꠍꠞ ꠛꠄꠅꠡꠤ ꠄꠇꠐꠣ ꠍꠣꠉꠤ ꠟꠁꠀ ꠀꠎꠤꠞ ꠅꠁꠔꠦ ꠅꠁꠛ। 28 ꠀꠞ ꠎꠦ ꠎꠘꠦ ꠝꠘꠞ ꠅꠎꠣꠘ꠆ꠔꠦ ꠅꠃ ꠉꠥꠘꠣ ꠇꠞꠍꠦ, ꠁꠝꠣꠝ ꠍꠣꠛꠦ ꠝꠣꠛꠥꠖꠞ ꠖꠞꠛꠣꠞꠅ ꠔꠣꠞ ꠉꠥꠘꠣꠞ ꠇꠚꠞꠣꠞ ꠛꠦꠛꠡ꠆ꠔꠣ ꠇꠞꠛꠣ। ꠅꠃ ꠇꠥꠞꠛꠣꠘꠤ ꠇꠛꠥꠟ ꠅꠁꠟꠦ ꠢꠦ ꠝꠣꠚꠤ ꠙꠣꠁꠛ। 29 ꠜꠥꠟ ꠇꠞꠤꠀ ꠝꠘꠞ ꠅꠎꠣꠘ꠆ꠔꠦ ꠎꠦ ꠝꠣꠘꠡꠦ ꠘꠣꠚꠞꠝꠣꠘꠤ ꠇꠞꠤꠟꠣꠄ, ꠅꠃ ꠟꠣꠈꠣꠘ ꠙꠞꠔꠦꠇ ꠝꠣꠘꠡꠞ ꠟꠣꠉꠤ ꠁ ꠘꠤꠅꠝ ꠌꠣꠟꠥ ꠞꠁꠛ, ꠢꠦ ꠛꠘꠤ ꠁꠍꠞꠣꠁꠟ ꠅꠃꠇ, ꠛꠣ ꠜꠤꠘ-ꠖꠦꠡꠤ ꠅꠃꠇ, ꠄꠇꠁ ꠘꠤꠅꠝꠦ ꠌꠟꠛ।

30 “ꠅꠁꠟꠦ ꠛꠘꠤ ꠁꠍꠞꠣꠁꠟ ꠛꠣ ꠔꠣꠞꠣꠞ ꠝꠣꠎꠦ ꠛꠡꠔ ꠇꠞꠞꠣ ꠅꠁꠘ꠆ꠘ ꠇꠥꠘꠥ ꠎꠣꠔꠤꠞ ꠇꠦꠃ ꠎꠥꠖꠤ ꠁꠌ꠆ꠍꠣ ꠇꠞꠤꠀ ꠇꠥꠘꠥ ꠘꠣꠚꠞꠝꠣꠘꠤ ꠇꠞꠦ, ꠔꠦ ꠢꠦ ꠡ꠆ꠛꠄꠅꠋ ꠝꠣꠛꠥꠖꠞꠦ ꠛꠦꠁꠎ꠆ꠎꠔ ꠇꠞꠦ। ꠁꠟꠣ ꠘꠣꠚꠞꠝꠣꠘꠤꠞ ꠟꠣꠉꠤ ꠡꠝꠣꠎ ꠕꠣꠇꠤ ꠅꠉꠥꠞ ꠘꠣꠝ ꠝꠤꠐꠣꠁꠟꠤꠔꠦ ꠅꠁꠛ। 31 ꠝꠣꠛꠥꠖꠞ ꠢꠥꠇꠥꠝꠞꠦ ꠄꠟꠣꠝꠤ ꠇꠞꠣꠄ ꠀꠞ ꠘꠣꠚꠞꠝꠣꠘꠤ ꠇꠞꠣꠄ ꠅꠉꠥꠞ ꠘꠣꠝ ꠝꠤꠐꠣꠁꠟꠤꠔꠦ ꠅꠁꠛ, ꠔꠣꠞ ꠁ ꠉꠥꠘꠣꠞ ꠖꠣꠄ-ꠜꠣꠞ ꠔꠣꠞ ꠃꠙꠞꠦꠃ ꠛꠞ꠆ꠔꠣꠁꠛ।”

32 ꠛꠘꠤ ꠁꠍꠞꠣꠁꠟ ꠝꠞꠥꠜꠥꠝꠤꠔ ꠍꠚꠞꠞ ꠇꠣꠟꠅ ꠄꠇ ꠎꠥꠝ꠆ꠝꠣꠛꠣꠞꠦ ꠄꠇꠎꠘ ꠝꠣꠘꠡꠞꠦ ꠖꠣꠞꠥ ꠔꠥꠛꠣꠘꠤꠔ ꠖꠦꠈꠟꠣ। 33 ꠎꠥꠝ꠆ꠝꠣꠛꠣꠞꠦ ꠖꠣꠞꠥ ꠔꠥꠛꠣꠘꠤꠔ ꠖꠦꠈꠣꠄ ꠅꠃ ꠝꠣꠘꠡꠦ ꠔꠣꠞꠦ ꠗꠞꠤꠀ ꠝꠥꠍꠣ ꠘꠛꠤ, ꠁꠝꠣꠝ ꠢꠣꠞꠥꠘ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠟꠁꠀ ꠀꠁꠟꠣ। 34 ꠅꠃ ꠟꠣꠈꠣꠘ ꠝꠣꠘꠡꠞꠦ ꠇꠤꠔꠣ ꠇꠞꠔꠦ ꠅꠁꠛ, ꠁ ꠢꠥꠇꠥꠝ ꠔ ꠀꠟ꠆ꠟꠣꠄ ꠅꠈꠘꠅ ꠎꠣꠘꠣꠁꠍꠂꠘ ꠘꠣ, ꠄꠞꠟꠣꠉꠤ ꠄꠞꠦ ꠔꠣꠞꠣ ꠛꠘ꠆ꠖꠤ ꠇꠞꠤ ꠕꠁꠟ। 35 ꠅꠃ ꠡꠝꠄ ꠝꠣꠛꠥꠖꠦ ꠝꠥꠍꠣꠞꠦ ꠎꠣꠘꠣꠁꠟꠣ, “ꠅꠃ ꠝꠣꠘꠡꠞꠦ ꠎꠣꠘꠦ ꠝꠣꠞꠤꠟꠤꠔꠦ ꠅꠁꠛ। ꠔꠣꠞꠦ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠢꠇꠟ ꠛꠘꠤ ꠁꠍꠞꠣꠁꠟꠦ ꠙꠣꠔ꠆ꠔꠞꠖꠤ ꠁꠐꠣꠁꠀ ꠝꠣꠞꠤꠟꠤꠛꠣꠄ।” 36 ꠔꠦꠃ ꠝꠥꠍꠣꠞ ꠝꠣꠞꠚꠔꠦ ꠙꠣꠅꠀ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ, ꠛꠘꠤ ꠁꠍꠞꠣꠁꠟꠦ ꠔꠣꠞꠦ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟ꠆ꠟꠣ।

37 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 38 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠥꠝꠞꠣ ꠎꠣꠞꠎꠤꠞ ꠟꠦꠛꠣꠍꠞ ꠙꠣꠁꠠꠅ ꠎꠣꠎꠁꠞ ꠟꠣꠉꠣꠅ, ꠀꠞ ꠎꠣꠎꠁꠞꠞ ꠙꠞꠔꠦꠇ ꠉꠤꠐꠞꠦ ꠟꠤꠟꠥꠀ ꠡꠥꠔꠣꠖꠤ ꠙꠦꠌꠣꠁꠀ ꠝꠥꠟ ꠇꠣꠙꠠꠞ ꠟꠉꠦ ꠎꠥꠠꠣ ꠖꠤꠅ। ꠁ ꠢꠥꠇꠥꠝ ꠅꠀꠞꠤꠡꠞ ꠙꠞ ꠅꠀꠞꠤꠡ ꠗꠞꠤ ꠝꠣꠘꠛꠣꠄ। 39 ꠁ ꠎꠣꠎꠁꠞ ꠟꠣꠉꠣꠘꠤꠞ ꠇꠣꠞꠘ ꠅꠁꠟ, ꠅꠔꠣꠞ ꠛꠣꠄ ꠌꠣꠁꠟꠦ ꠔꠥꠝꠞꠣ ꠀꠝꠣꠞ ꠢꠇ꠆ꠇꠟ ꠢꠥꠇꠥꠝꠞ ꠇꠕꠣ ꠁꠀꠖ ꠇꠞꠤꠀ ꠅꠔꠣ ꠀꠝꠟ ꠇꠞꠛꠣꠄ। ꠔꠦꠃ ꠔꠥꠝꠞꠣ ꠀꠝꠣꠞ ꠟꠉꠦ ꠇꠥꠘꠥ ꠛꠦꠁꠝꠣꠘꠤ ꠇꠞꠔꠣꠄ ꠘꠣꠄ, ꠔꠥꠝꠞꠣꠞ ꠌꠃꠈꠞ ꠀꠞ ꠖꠤꠟꠞ ꠛꠖ ꠈꠣꠁꠡꠞ ꠀꠔꠅ ꠘꠤꠎꠞꠦ ꠡꠙꠤꠔꠣꠄ ꠘꠣꠄ। 40 ꠀꠝꠣꠞ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠣꠞ ꠇꠕꠣ ꠔꠥꠝꠞꠣꠞ ꠁꠀꠖ ꠞꠁꠛ, ꠔꠥꠝꠞꠣꠞ ꠀꠟ꠆ꠟꠣꠞ ꠘꠣꠝꠦ ꠔꠥꠝꠞꠣ ꠙꠣꠇ-ꠙꠞꠦꠎꠉꠣꠞ ꠛꠘ꠆ꠖꠣꠞ ꠢꠣꠟꠔꠦ ꠞꠁꠛꠣꠄ। 41 ꠀꠝꠤ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣ। ꠔꠥꠝꠞꠣꠞ ꠝꠣꠛꠥꠖ ꠅꠀꠞ ꠈꠤꠀꠟꠦ, ꠀꠝꠤ ꠔꠥꠝꠞꠣꠞꠦ ꠝꠤꠡꠞ ꠕꠣꠇꠤ ꠛꠣꠞ ꠇꠞꠤ ꠀꠘꠍꠤ। ꠀꠝꠤꠃ ꠀꠟ꠆ꠟꠣ, ꠔꠥꠝꠞꠣꠞ ꠝꠣꠛꠥꠖ।”