1 ꠁꠈꠣꠘ ꠢꠥꠘꠤꠀ ꠢꠇꠟ ꠛꠘꠤ ꠁꠍꠞꠣꠁꠟꠦ ꠌꠤꠟ꠆ꠟꠣ-ꠌꠤꠟ꠆ꠟꠤ ꠟꠣꠉꠣꠁꠟ। ꠔꠣꠞꠣ ꠢꠣꠞꠣ ꠞꠣꠁꠔ ꠇꠣꠘ꠆ꠖꠣ-ꠇꠣꠐꠤ ꠇꠞꠟ। 2 ꠢꠎꠞꠔ ꠝꠥꠍꠣ ꠀꠞ ꠢꠣꠞꠥꠘꠞ ꠛꠤꠞꠥꠖ꠆ꠖꠦ ꠛꠃꠔ ꠇꠕꠣꠛꠣꠞ꠆ꠔꠣ ꠝꠣꠔꠤꠟ। ꠔꠣꠞꠣ ꠢꠇꠟꠦ ꠝꠤꠟꠤꠀ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟ, “ꠢꠣꠄꠞꠦ ꠢꠣꠄ! ꠀꠝꠞꠣ ꠇꠦꠘꠦ ꠢꠃ ꠝꠤꠡꠞ ꠖꠦꠡꠅ ꠛꠣ ꠝꠞꠥꠜꠥꠝꠤꠔ ꠝꠞꠟꠣꠝ ꠘꠣ? ꠢꠘꠅ ꠝꠞꠣꠃ ꠔ ꠜꠣꠟꠣ ꠀꠍꠤꠟ। 3 ꠝꠣꠛꠥꠖꠦ ꠇꠦꠘꠦ ꠀꠝꠞꠣꠞꠦ ꠎꠥꠖ꠆ꠖꠞ ꠝꠄꠖꠣꠘꠅ ꠝꠣꠞꠣꠞ ꠘꠤꠅꠔꠦ ꠅꠃ ꠖꠦꠡꠅ ꠘꠤꠞꠣ? ꠢꠘꠞ ꠖꠥꠡꠝꠘ ꠅꠇꠟꠦ ꠀꠝꠞꠣꠞ ꠛꠃ-ꠛꠣꠁꠌ꠆ꠌꠣꠁꠘꠞꠦ ꠇꠣꠠꠤꠀ ꠘꠤꠛꠣ। ꠄꠞ ꠕꠣꠇꠤ ꠝꠤꠡꠞꠅ ꠚꠤꠞꠤꠀ ꠎꠣꠅꠀꠃ ꠀꠝꠞꠣꠞ ꠟꠣꠉꠤ ꠜꠣꠟꠣ ꠘꠣꠄ ꠘꠤ?” 4 ꠔꠣꠞꠣ ꠄꠇꠦ-ꠅꠁꠘ꠆ꠘꠦ ꠇꠁꠟ, “ꠀꠅ, ꠀꠝꠞꠣ ꠄꠇꠎꠘ ꠘꠦꠔꠣ ꠛꠣꠘꠣꠁꠀ ꠢꠤꠞꠛꠣꠞ ꠝꠤꠡꠞꠅ ꠚꠤꠞꠤꠀ ꠎꠣꠁꠉꠤ।”

5 ꠁ ꠢꠣꠟꠔ ꠖꠦꠈꠤꠀ ꠝꠥꠍꠣ ꠀꠞ ꠢꠣꠞꠥꠘ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎꠞ ꠍꠣꠝꠘꠦ ꠝꠣꠐꠤꠔ ꠍꠁꠎꠖꠣꠔ ꠙꠠꠟꠣ। 6 ꠀꠞ ꠎꠦ ꠉꠥꠁꠀ ꠖꠟꠦ ꠅꠃ ꠖꠦꠡꠞ ꠢꠣꠟ-ꠢꠇꠤꠇꠔ ꠖꠦꠈꠤꠀ ꠀꠁꠍꠟꠣ, ꠔꠣꠞꠣꠞ ꠝꠣꠎ ꠕꠣꠇꠤ ꠘꠥꠘꠞ ꠙꠥꠀ ꠁꠃꠍꠣ ꠀꠞ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔꠦ ꠝꠘꠞ ꠖꠥꠈꠦ ꠘꠤꠎꠞ ꠉꠔꠞꠞ ꠇꠣꠙꠠ-ꠌꠥꠙꠠ ꠍꠤꠠꠤꠟ꠆ꠟꠣ, 7 ꠍꠤꠠꠤꠀ ꠛꠘꠤ ꠁꠍꠞꠣꠁꠟ ꠡꠝꠣꠎꠞ ꠢꠇ꠆ꠇꠟꠞꠦ ꠇꠁꠟꠣ, “ꠢꠥꠘꠅ, ꠀꠝꠞꠣ ꠎꠦ ꠖꠦꠡ ꠖꠦꠈꠣꠔ ꠉꠦꠍꠟꠣꠝ, ꠁ ꠖꠦꠡꠈꠣꠘ ꠈꠥꠛ ꠡꠥꠘ꠆ꠖꠞ। 8 ꠝꠣꠛꠥꠖ ꠎꠥꠖꠤ ꠀꠝꠞꠣꠞ ꠃꠙꠞꠦ ꠈꠥꠡ ꠀꠞ ꠞꠣꠎꠤ ꠕꠣꠇꠂꠘ, ꠔꠦ ꠀꠝꠞꠣꠞꠦ ꠢꠃ ꠖꠦꠡꠅ ꠘꠤꠀ ꠙꠣꠞ ꠇꠞꠛꠣ, ꠔꠣꠁꠘ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠅꠃ ꠖꠦꠡꠈꠣꠘ ꠀꠝꠞꠣꠞꠦ ꠖꠣꠘ ꠇꠞꠛꠣ। 9 ꠢꠥꠘꠅ, ꠔꠥꠝꠞꠣ ꠝꠣꠛꠥꠖꠞ ꠝꠞ꠆ꠎꠤꠞ ꠃꠟꠐꠣ ꠇꠣꠝ ꠇꠞꠤꠅ ꠘꠣ। ꠔꠥꠝꠞꠣ ꠢꠤ ꠖꠦꠡꠞ ꠝꠣꠘꠡꠞꠦ ꠒꠞꠣꠁꠅ ꠘꠣ, ꠔꠣꠞꠣꠞꠦ ꠉꠤꠟꠤꠀ ꠈꠣꠁꠔꠦꠅ ꠀꠝꠞꠣꠞ ꠖꠦꠞꠤ ꠅꠁꠔ ꠘꠣꠄ। ꠔꠥꠝꠞꠣ ꠁꠔꠣꠞꠦ ꠒꠞꠣꠁꠅ ꠘꠣ, ꠔꠣꠞꠣꠞ ꠝꠣꠕꠣꠞ ꠃꠙꠞꠞ ꠍꠣꠄꠀ ꠘꠣꠁ, ꠀꠝꠞꠣꠞ ꠟꠉꠦ ꠔ ꠝꠣꠛꠥꠖ ꠀꠍꠂꠘ।” 10 ꠅꠁꠟꠦ ꠔꠣꠞꠣ ꠢꠇꠟꠦꠃ ꠇꠁꠟꠣ ꠁꠃꠍꠣ ꠀꠞ ꠇꠣꠟꠥꠔꠞꠦ ꠙꠣꠔ꠆ꠔꠞ ꠝꠣꠞꠤꠀ ꠝꠣꠞꠤꠟꠔꠣ।

ꠅꠃ ꠡꠝꠄ ꠝꠤꠟꠘ-ꠔꠣꠝ꠆ꠛꠥ ꠕꠣꠇꠤ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎꠞ ꠍꠣꠝꠘꠦ ꠝꠣꠛꠥꠖꠞ ꠇꠥꠖꠞꠔꠤ ꠘꠥꠞ ꠎꠣꠁꠞ ꠅꠁꠟ। 11 ꠝꠣꠛꠥꠖꠦ ꠇꠁꠟꠣ, “ꠅ ꠝꠥꠍꠣ, ꠁꠔꠣꠄ ꠀꠝꠣꠞꠦ ꠀꠞ ꠇꠔꠖꠤꠘ ꠄꠟꠣꠝꠤ ꠇꠞꠛ? ꠔꠣꠞꠣꠞ ꠍꠣꠝꠘꠦ ꠅꠔ ꠇꠦꠞꠣꠝꠔꠤ ꠘꠤꠡꠣꠘꠣ ꠖꠦꠈꠣꠘꠤꠞ ꠛꠣꠖꠦꠅ, ꠔꠣꠞꠣ ꠀꠞ ꠇꠔꠖꠤꠘ ꠀꠝꠣꠞꠦ ꠄꠇꠤꠘ ꠇꠞꠔ ꠘꠣꠄ? 12 ꠔꠦ ꠢꠥꠘꠅ, ꠀꠝꠤ ꠔꠣꠞꠣꠞ ꠃꠙꠞꠦ ꠛꠠ ꠄꠇ ꠉꠎꠛ ꠓꠣꠟꠤꠝꠥ, ꠀꠝꠣꠞ ꠅꠀꠖꠣ ꠇꠞꠣ ꠢꠃ ꠖꠦꠡꠞ ꠝꠣꠟꠤꠇꠣꠘꠣ ꠇꠣꠠꠤꠀ ꠘꠤꠝꠥꠉꠤ। ꠛꠣꠖꠦ ꠀꠝꠤ ꠔꠥꠝꠣꠞ ꠝꠣꠎ ꠕꠣꠇꠤ ꠁꠔꠣ ꠕꠘꠦ ꠀꠞꠅ ꠛꠟꠛꠣꠘ, ꠀꠞꠅ ꠛꠠ ꠘꠄꠀ ꠄꠇ ꠎꠣꠔꠤ ꠙꠄꠖꠣ ꠇꠞꠝꠥ।”

13 ꠁꠈꠣꠘ ꠢꠥꠘꠤꠀ ꠝꠥꠍꠣꠄ ꠇꠁꠟꠣ, “ꠅ ꠝꠣꠛꠥꠖ, ꠔꠥꠝꠤ ꠎꠥꠖꠤ ꠁꠟꠣ ꠇꠞꠅ, ꠔꠦ ꠝꠤꠡꠞꠤ ꠅꠇꠟꠦ ꠁꠔꠣ ꠢꠥꠘꠛꠣ। ꠀꠞ ꠔꠥꠝꠤ ꠔ ꠝꠤꠡꠞ ꠕꠣꠇꠤ ꠁꠔꠣ ꠝꠣꠘꠡꠞꠦ ꠔꠥꠝꠣꠞ ꠘꠤꠎꠞ ꠇꠥꠖꠞꠔꠤꠄ ꠛꠣꠞ ꠇꠞꠤ ꠀꠘꠍ। 14 ꠅꠈꠘ ꠝꠤꠡꠞꠤ ꠅꠇꠟꠦ ꠁ ꠖꠦꠡꠞ ꠝꠣꠘꠡꠞꠦꠅ ꠁꠔꠣ ꠎꠣꠘꠣꠁ ꠖꠤꠛꠣ। ꠔꠦ ꠅ ꠝꠣꠛꠥꠖ, ꠁꠘꠞ ꠝꠣꠘꠡꠦ ꠔ ꠄꠝꠘꠦꠃ ꠎꠣꠘꠤꠟꠤꠍꠂꠘ ꠎꠦꠘ, ꠛꠘꠤ ꠁꠍꠞꠣꠁꠟꠞ ꠟꠉꠦ ꠟꠉꠦ ꠔꠥꠝꠤ ꠀꠍ, ꠔꠥꠝꠣꠞꠦ ꠈꠥꠛ ꠗꠣꠞꠅ ꠕꠣꠇꠤ ꠖꠦꠈꠣ ꠎꠣꠄ। ꠔꠣꠞꠣ ꠢꠥꠘꠍꠂꠘ, ꠔꠥꠝꠣꠞ ꠘꠥꠞꠞ ꠝꠦꠊꠞ ꠍꠣꠄꠀ ꠄꠞꠣꠞ ꠃꠙꠞꠦ ꠀꠍꠦ, ꠔꠥꠝꠤ ꠖꠤꠘꠞ ꠛꠣꠟꠣ ꠝꠦꠊꠞ ꠈꠥꠐꠤ ꠀꠞ ꠞꠣꠁꠔ ꠅꠁꠟꠦ ꠀꠉꠥꠁꠘꠞ ꠈꠥꠐꠤꠞ ꠍꠥꠞꠔꠦ ꠄꠞꠣꠞ ꠀꠉꠦ ꠀꠉꠦ ꠞꠅ। 15 ꠅꠈꠘ ꠔꠥꠝꠤ ꠎꠥꠖꠤ ꠄꠞꠣ ꠢꠇꠟꠞꠦ ꠄꠇꠟꠉꠦ ꠝꠣꠞꠤꠟꠣꠅ, ꠔꠦ ꠎꠔ ꠎꠣꠔꠤꠞ ꠝꠣꠘꠡꠦ ꠔꠥꠝꠣꠞ ꠁꠔꠣ ꠇꠥꠖꠞꠔꠤ ꠇꠣꠝꠞ ꠈꠛꠞ ꠢꠥꠘꠍꠦ, ꠔꠣꠞꠣ ꠇꠁꠛꠣ, 16 ꠝꠣꠛꠥꠖꠦ ꠛꠘꠤ ꠁꠍꠞꠣꠁꠟꠞꠦ ꠎꠦ ꠖꠦꠡ ꠖꠤꠛꠣꠞ ꠅꠀꠖꠣ ꠇꠞꠍꠟꠣ, ꠢꠤ ꠖꠦꠡꠅ ꠟꠁꠀ ꠎꠣꠅꠀꠞ ꠈꠦꠝꠔꠣ ꠔꠣꠘ ꠘꠣꠁ, ꠄꠞꠟꠣꠉꠤ ꠔꠣꠁꠘ ꠄꠞꠣꠞꠦ ꠝꠞꠥꠜꠥꠝꠤꠔ ꠘꠤꠀ ꠝꠣꠞꠤꠟꠤꠍꠂꠘ।

17 “ꠔꠦ, ꠅ ꠖꠤꠘ-ꠖꠥꠘꠤꠀꠞ ꠝꠣꠟꠤꠇ, ꠔꠥꠝꠤ ꠀꠉꠦ ꠎꠦꠟꠣ ꠇꠁꠍꠟꠣꠄ ꠅꠟꠣ ꠇꠥꠖꠞꠔꠤ ꠇꠣꠝ ꠎꠣꠁꠞ ꠇꠞꠅ। ꠔꠥꠝꠤ ꠘꠥ ꠇꠁꠍꠟꠣꠄ, 18 ꠝꠣꠛꠥꠖꠦ ꠉꠥꠍꠣ ꠇꠞꠂꠘ ꠗꠤꠞ ꠉꠔꠤꠄ, ꠔꠣꠘ ꠝꠣꠄꠀ-ꠝꠢꠛ꠆ꠛꠔꠞ ꠇꠥꠘꠥ ꠡꠤꠝꠣ ꠘꠣꠁ, ꠔꠣꠁꠘ ꠝꠣꠘꠡꠞ ꠅꠁꠘ꠆ꠘꠣꠄ ꠀꠞ ꠘꠣꠚꠞꠝꠣꠘꠤꠞ ꠝꠣꠚꠤ ꠖꠦꠁꠘ। ꠅꠁꠟꠦ ꠖꠥꠡꠤ ꠎꠘꠞꠦ ꠡꠣꠎꠣꠅ ꠖꠦꠁꠘ, ꠛꠣꠚ-ꠖꠣꠖꠣꠞ ꠘꠣꠚꠞꠝꠣꠘꠤꠞ ꠡꠣꠎꠣ ꠔꠣꠞ ꠘꠣꠔꠤ-ꠙꠥꠔꠤ ꠙꠞ꠆ꠎꠘ꠆ꠔ ꠛꠞ꠆ꠔꠣꠁꠘ। 19 ꠔꠦ ꠔꠥꠝꠣꠞ ꠖꠥꠀꠁ ꠖꠤꠀ ꠇꠁꠞꠣꠝ, ꠝꠤꠡꠞ ꠖꠦꠡ ꠍꠣꠠꠤꠀ ꠀꠅꠀ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠔꠥꠝꠤ ꠄꠞꠣꠞꠦ ꠎꠦꠟꠣ ꠝꠣꠚꠤ ꠖꠤꠞꠣꠄ, ꠔꠥꠝꠣꠞ ꠢꠃ ꠝꠣꠄꠀꠞ ꠈꠣꠔꠤꠞꠦ ꠔꠣꠞꠣꠞ ꠅꠈꠘꠇꠥꠞ ꠉꠥꠘꠣꠞꠦꠅ ꠅꠟꠣ ꠝꠣꠚ ꠇꠞꠤ ꠖꠤꠟꠣꠅ।”

20 ꠔꠦꠃ ꠝꠣꠛꠥꠖꠦ ꠇꠁꠟꠣ, “ꠀꠁꠌ꠆ꠍꠣ, ꠔꠥꠝꠣꠞ ꠇꠕꠣꠄ ꠀꠝꠤ ꠁꠔꠣꠞꠦ ꠝꠣꠚ ꠇꠞꠤ ꠖꠤꠟꠣꠝ। 21 ꠅꠁꠟꠦ ꠀꠝꠤ ꠎꠤꠘ꠆ꠖꠣ ꠀꠍꠤ ꠁꠈꠣꠘ ꠎꠦꠟꠣ ꠢꠣꠍꠣ, ꠀꠡ꠆ꠔꠣ ꠎꠉꠔꠅ ꠀꠝꠣꠞ ꠟꠤꠟꠣ-ꠈꠦꠟꠣꠄ ꠜꠞꠣ ꠁꠐꠣꠅ ꠎꠦꠟꠣ ꠢꠣꠍꠣ, ꠅꠃ ꠟꠣꠈꠣꠘ ꠀꠞꠇ ꠢꠣꠍꠣ ꠅꠁꠟ, 22-23 ꠁꠔꠣ ꠄꠇꠎꠘꠦꠅ ꠀꠝꠣꠞ ꠅꠀꠖꠣ ꠇꠞꠣ ꠢꠤ ꠖꠦꠡ ꠖꠦꠈꠣꠞ ꠡꠥꠎꠥꠉ ꠅꠁꠔ ꠘꠣꠄ, ꠎꠦ ꠖꠦꠡ ꠖꠤꠔꠣꠝ ꠇꠞꠤ ꠀꠝꠤ ꠔꠣꠞꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠅꠀꠖꠣ ꠇꠞꠍꠟꠣꠝ। ꠇꠣꠞꠘ ꠁꠔꠣꠄ ꠀꠝꠣꠞ ꠘꠥꠞꠞ ꠔꠎꠟ꠆ꠟꠤ ꠖꠦꠈꠍꠂꠘ, ꠔꠣꠞꠣ ꠝꠤꠡꠞꠅ ꠕꠣꠇꠔꠦ ꠀꠞ ꠅꠃ ꠝꠞꠥꠜꠥꠝꠤꠔ ꠀꠁꠀꠅ ꠀꠝꠣꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠣꠞ ꠛꠣꠖꠦꠅ ꠁꠔꠣꠄ ꠀꠝꠣꠞꠦ ꠝꠣꠘꠍꠂꠘ ꠘꠣ, ꠛꠞꠋ ꠖꠡ-ꠖꠡꠛꠣꠞ ꠔꠣꠞꠣ ꠀꠝꠣꠞꠦ ꠙꠞꠤꠇ꠆ꠇꠣ ꠇꠞꠍꠂꠘ। ꠔꠦ ꠔꠣꠞꠣ ꠎꠔꠎꠘꠦ ꠀꠝꠣꠞꠦ ꠄꠟꠣꠝꠤ ꠇꠞꠍꠦ, ꠁꠔꠣ ꠄꠇꠎꠘꠦꠅ ꠢꠤ ꠖꠦꠡ ꠖꠦꠈꠣꠞ ꠇꠙꠣꠟ ꠅꠁꠔ ꠘꠣꠄ। 24 ꠅꠁꠟꠦ ꠀꠝꠣꠞ ꠛꠘ꠆ꠖꠣ ꠇꠣꠟꠥꠔꠞ ꠖꠤꠟꠞ ꠜꠣꠛ ꠁꠟꠣ ꠘꠣꠄ, ꠢꠦ ꠀꠝꠣꠞ ꠢꠥꠇꠥꠝ ꠙꠥꠞꠣꠙꠥꠞ ꠝꠣꠘꠦ। ꠄꠞꠟꠣꠉꠤ ꠎꠦ ꠖꠦꠡ ꠖꠦꠈꠣꠔ ꠢꠦ ꠉꠦꠍꠤꠟ, ꠀꠝꠤ ꠔꠣꠞꠦ ꠢꠃ ꠖꠦꠡꠅ ꠘꠤꠝꠥ, ꠔꠣꠞ ꠀꠅꠟꠣꠖ ꠅꠇꠟ ꠢꠤ ꠖꠦꠡꠞ ꠝꠣꠟꠤꠇ ꠅꠁꠛꠣ। 25 ꠢꠥꠘꠅ, ꠢꠃ ꠖꠦꠡꠞ ꠙꠣꠠꠤꠀ ꠔꠟ ꠎꠣꠉꠣꠁꠘ꠆ꠔꠅ ꠅꠈꠘ ꠀꠝꠣꠟꠦꠇꠤ ꠀꠞ ꠇꠦꠘꠣꠘꠤ ꠅꠇꠟꠦ ꠛꠡꠔ ꠇꠞꠞꠣ। ꠔꠦ ꠍꠣꠝꠘꠞ ꠇꠣꠁꠟ ꠔꠥꠝꠞꠣ ꠙꠤꠍꠦꠖꠤ ꠉꠤꠀ ꠀꠇꠣꠛꠣ ꠡꠣꠉꠞꠞ ꠙꠣꠞꠦꠖꠤ ꠝꠞꠥꠜꠥꠝꠤꠞ ꠛꠣꠄ ꠞꠅꠀꠘꠣ ꠅꠁꠅ।”

26 ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, 27 “ꠅꠃ ꠘꠣꠚꠞꠝꠣꠘ ꠎꠣꠔꠤꠄ ꠀꠝꠣꠞ ꠛꠤꠞꠥꠖ꠆ꠖꠦ ꠀꠞ ꠇꠔꠖꠤꠘ ꠛꠦꠞ-ꠛꠦꠞꠤ ꠇꠞꠔ? ꠔꠣꠞꠣ ꠀꠝꠣꠞ ꠛꠤꠞꠥꠖ꠆ꠖꠦ ꠎꠦꠔꠣ ꠝꠣꠔ ꠝꠣꠔꠦꠞ, ꠁꠔꠣ ꠔ ꠀꠝꠤ ꠢꠥꠘꠍꠤ। 28 ꠅꠈꠘ ꠔꠥꠝꠞꠣ ꠉꠤꠀ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠀꠝꠤ ꠝꠣꠛꠥꠖꠦ ꠘꠤꠎꠞ ꠎꠤꠘ꠆ꠖꠦꠉꠤꠞ ꠇꠍꠝ ꠈꠣꠁꠀ ꠇꠁꠞꠣꠝ, ꠀꠝꠤ ꠔꠥꠝꠞꠣꠞ ꠝꠥꠈꠞ ꠎꠦꠔꠣ ꠝꠣꠔ-ꠇꠕꠣ ꠢꠥꠘꠍꠤ, ꠀꠝꠤꠅ ꠔꠥꠝꠞꠣꠞ ꠟꠉꠦ ꠑꠤꠇ ꠅꠟꠣꠃ ꠇꠞꠝꠥ। 29 ꠝꠣꠘꠥꠡ ꠉꠘꠤꠛꠣꠞ ꠡꠝꠄ ꠔꠥꠝꠞꠣꠞ ꠛꠤꠡ ꠛꠍꠞ ꠛꠣ ꠔꠣꠞ ꠛꠦꠡꠤ ꠛꠄꠅꠡꠞ ꠎꠦꠔꠣꠞꠦ ꠉꠘꠣ ꠅꠁꠍꠤꠟ, ꠝꠣꠘꠤ ꠎꠦꠔꠣꠄ ꠀꠝꠣꠞ ꠛꠤꠞꠥꠖ꠆ꠖꠦ ꠛꠦꠞ-ꠛꠦꠞꠤ ꠇꠞꠍꠦ, ꠁꠔꠣꠞ ꠟꠣꠡ ꠅꠃ ꠝꠞꠥꠜꠥꠝꠤꠞ ꠝꠣꠎꠦ ꠙꠠꠤ ꠞꠁꠛ। 30 ꠀꠝꠤ ꠔꠥꠝꠞꠣꠞꠦ ꠎꠦ ꠖꠦꠡ ꠖꠤꠔꠣꠝ ꠇꠞꠤ ꠅꠀꠖꠣ ꠇꠞꠍꠟꠣꠝ, ꠈꠣꠟꠤ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ ꠀꠞ ꠘꠥꠘꠞ ꠙꠥꠀ ꠁꠃꠍꠣ ꠍꠣꠠꠣ ꠀꠞ ꠇꠦꠃ ꠉꠤꠀ ꠢꠤ ꠖꠦꠡꠅ ꠢꠣꠝꠣꠘꠤꠞ ꠇꠙꠣꠟ ꠅꠁꠔ ꠘꠣꠄ। 31 ꠀꠞ ꠔꠥꠝꠞꠣꠞ ꠎꠦꠔꠣ ꠢꠥꠞꠥꠔ꠆ꠔꠣꠞꠦ ꠇꠣꠠꠤꠀ ꠘꠦꠅꠀ ꠅꠁꠛ ꠇꠁꠍꠟꠣꠄ, ꠀꠝꠤ ꠅꠃ ꠢꠥꠞꠥꠔ꠆ꠔꠣꠁꠘꠞꠦꠃ ꠢꠃ ꠖꠦꠡꠅ ꠙꠣꠞ ꠇꠞꠝꠥ, ꠔꠣꠞꠣꠃ ꠅꠁꠛꠣ ꠢꠤ ꠖꠦꠡꠞ ꠝꠣꠟꠤꠇ, ꠎꠦ ꠖꠦꠡꠞꠦ ꠔꠥꠝꠞꠣ ꠄꠟꠣꠝꠤ ꠇꠞꠍ। 32 ꠅꠁꠟꠦ ꠔꠥꠝꠞꠣꠞ ꠟꠣꠡ ꠅꠃ ꠝꠞꠥꠜꠥꠝꠤꠔ ꠙꠠꠤ ꠞꠁꠛ। 33 ꠅꠃ ꠝꠞꠥꠜꠥꠝꠤꠞ ꠙꠦꠐꠅ ꠔꠥꠝꠞꠣꠞ ꠄꠇ꠆ꠇꠦꠞꠦ ꠀꠈꠦꠞꠤ ꠎꠘ ꠘꠣ ꠝꠞꠣ ꠙꠞ꠆ꠎꠘ꠆ꠔ, ꠔꠥꠝꠞꠣꠞ ꠛꠦꠁꠝꠣꠘꠤꠞ ꠟꠣꠉꠤ ꠔꠥꠝꠞꠣꠞ ꠀꠅꠟꠣꠖ ꠅꠇꠟꠦ ꠌꠣꠟ꠆ꠟꠤꠡ ꠛꠍꠞ ꠅꠘꠅ ꠉꠞꠥ-ꠍꠣꠉꠟꠞ ꠞꠣꠈꠣꠟꠤ ꠇꠞꠛꠣ। 34 ꠇꠦꠘꠣꠘ ꠖꠦꠡꠞ ꠢꠣꠟ-ꠢꠇꠤꠇꠔ ꠖꠦꠈꠤꠀ ꠀꠁꠔꠦ ꠎꠦ ꠌꠣꠟ꠆ꠟꠤꠡ ꠖꠤꠘ ꠟꠣꠉꠍꠤꠟ, ꠄꠞ ꠄꠇ ꠖꠤꠘꠞ ꠛꠖꠟꠣ ꠄꠇ ꠛꠍꠞ, ꠅꠃꠟꠣ ꠝꠥꠐ ꠌꠣꠟ꠆ꠟꠤꠡ ꠛꠍꠞ ꠔꠥꠝꠞꠣꠞ ꠘꠣꠚꠞꠝꠣꠘꠤꠞ ꠟꠣꠉꠤ ꠇꠡ꠆ꠐ ꠇꠞꠛꠣꠄ। ꠔꠦꠃ ꠛꠥꠎꠛꠣꠄ, ꠀꠝꠤ ꠎꠦꠛꠟꠣ ꠇꠦꠃꠞꠞ ꠛꠤꠞꠥꠗꠤꠔꠣ ꠇꠞꠤ ꠄꠞ ꠖꠡꠣ ꠇꠤꠟꠣ ꠅꠄ। 35 ꠔꠦ ꠀꠝꠤ ꠝꠣꠛꠥꠖꠦ ꠇꠁꠞꠣꠝ, ꠅꠃ ꠘꠣꠚꠞꠝꠣꠘ ꠎꠣꠔꠤꠞ ꠎꠦꠔꠣ ꠝꠣꠘꠡꠦ ꠀꠝꠣꠞ ꠛꠤꠞꠥꠖ꠆ꠖꠦ ꠖꠟ ꠛꠣꠘ꠆ꠖꠤꠍꠦ, ꠁꠔꠣ ꠢꠇ꠆ꠇꠟꠐꠤ ꠅꠃ ꠝꠞꠥꠜꠥꠝꠤꠔ ꠝꠞꠛꠣ।”

36 ꠇꠦꠘꠣꠘ ꠖꠦꠡꠞ ꠢꠣꠟ-ꠢꠇꠤꠇꠔ ꠎꠣꠘꠣꠞ ꠟꠣꠉꠤ ꠝꠥꠍꠣꠄ ꠎꠦ ꠉꠥꠁꠀ ꠖꠟꠞꠦ ꠙꠣꠑꠣꠁꠍꠟꠣ, ꠄꠞꠣꠞ ꠝꠣꠎꠞ ꠎꠦꠉꠥꠁꠘ ꠚꠤꠞꠤꠀ ꠀꠁꠀ ꠛꠦꠁꠝꠣꠘꠤ ꠈꠛꠞ ꠞꠐꠣꠁꠀ, ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠖꠤꠀ ꠝꠥꠍꠣꠞ ꠛꠤꠞꠥꠖ꠆ꠖꠦ ꠛꠇꠣ-ꠎꠇꠣ ꠇꠞꠣꠁꠍꠤꠟ, 37 ꠝꠣꠘꠤ ꠎꠦꠞꠣ ꠢꠃ ꠖꠦꠡꠞ ꠛꠦꠙꠣꠞꠦ ꠀꠎꠦ-ꠛꠣꠎꠦ ꠝꠣꠔ ꠞꠐꠣꠁꠍꠤꠟ, ꠔꠣꠞꠣ ꠢꠇ꠆ꠇꠟꠃ ꠝꠢꠣ ꠉꠎꠛꠤ ꠛꠦꠝꠣꠞꠦ ꠝꠣꠛꠥꠖꠞ ꠍꠣꠝꠘꠦ ꠝꠞꠤꠉꠦꠟꠣ। 38 ꠅꠃ ꠉꠥꠁꠀ ꠖꠟꠞ ꠝꠣꠎ ꠕꠣꠇꠤ ꠈꠣꠟꠤ ꠘꠥꠘꠞ ꠙꠥꠀ ꠁꠃꠍꠣ ꠀꠞ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ ꠛꠣꠌꠤꠀ ꠞꠁꠟꠣ।

39 ꠢꠎꠞꠔ ꠝꠥꠍꠣꠄ ꠝꠣꠛꠥꠖꠞ ꠇꠕꠣ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ। ꠁꠔꠣ ꠢꠥꠘꠤꠀ ꠔꠣꠞꠣ ꠝꠘꠞ ꠖꠥꠈꠦ ꠇꠣꠔꠞ ꠅꠁꠉꠦꠟꠣ। 40 ꠛꠣꠖꠞ ꠖꠤꠘ ꠛꠤꠀꠘꠦ ꠔꠣꠞꠣ ꠢꠃ ꠙꠣꠠꠤ ꠄꠟꠣꠇꠣꠔ ꠎꠣꠅꠀꠞ ꠟꠣꠉꠤ ꠔꠤꠀꠞ ꠅꠁꠀ ꠇꠁꠟ, “ꠅꠃ ꠖꠦꠈꠅ, ꠀꠝꠞꠣ ꠎꠣꠁꠞꠣꠝꠉꠤ। ꠀꠝꠞꠣ ꠔ ꠉꠥꠘꠣ ꠇꠞꠤꠀ ꠢꠣꠞꠍꠤ, ꠔꠦ ꠅꠈꠘ ꠀꠝꠞꠣ ꠝꠣꠛꠥꠖꠞ ꠅꠀꠖꠣ ꠇꠞꠣ ꠖꠦꠡꠅꠃ ꠎꠣꠁꠔꠣꠝꠉꠤ।”

41 ꠅꠁꠟꠦ ꠝꠥꠍꠣꠄ ꠇꠁꠟꠣ, “ꠔꠥꠝꠞꠣ ꠝꠣꠛꠥꠖꠞ ꠢꠥꠇꠥꠝꠞ ꠃꠟꠐꠣ ꠎꠣꠁꠞꠣꠄ ꠇꠦꠘꠦ? ꠔꠥꠝꠞꠣꠞ ꠘꠤꠅꠔ ꠙꠥꠞꠣ ꠅꠁꠔ ꠘꠣꠄ। 42 ꠢꠥꠘꠅ, ꠔꠥꠝꠞꠣ ꠎꠣꠁꠅ ꠘꠣ, ꠇꠣꠞꠘ ꠝꠣꠛꠥꠖ ꠔꠥꠝꠞꠣꠞ ꠟꠉꠦ ꠘꠣꠄ। ꠖꠥꠡꠝꠘ ꠅꠇꠟꠞ ꠉꠦꠍꠦ ꠔꠥꠝꠞꠣ ꠀꠞꠤꠛꠣꠄ। 43 ꠢꠤꠘꠅ ꠉꠤꠀ ꠔꠥꠝꠞꠣ ꠀꠝꠣꠟꠦꠇꠤ ꠀꠞ ꠇꠦꠘꠣꠘꠤ ꠅꠇꠟꠞ ꠝꠥꠈꠣꠝꠥꠈꠤ ꠅꠁꠛꠣꠄ। ꠀꠞ ꠝꠣꠛꠥꠖꠞ ꠟꠉ ꠍꠣꠠꠤꠀ ꠉꠦꠍꠉꠤ ꠇꠞꠤ, ꠔꠣꠁꠘ ꠔꠥꠝꠞꠣꠞ ꠟꠉꠦ ꠞꠁꠔꠣ ꠘꠣꠄ। ꠄꠞꠟꠣꠉꠤ ꠔꠥꠝꠞꠣ ꠎꠥꠖ꠆ꠖꠞ ꠝꠥꠈꠅ ꠝꠞꠛꠣꠄ।”

44 ꠔꠦꠛꠃ ꠔꠣꠞꠣ ꠔꠣꠘ ꠇꠕꠣ ꠃꠟꠐꠣꠁꠀ ꠢꠃ ꠙꠣꠠꠤ ꠄꠟꠣꠇꠣ ꠛꠣꠄ ꠞꠅꠀꠘꠣ ꠖꠤꠟ। ꠅꠁꠟꠦ ꠝꠥꠍꠣ ꠔꠣꠞꠣꠞ ꠟꠉꠦ ꠉꠦꠟꠣ ꠘꠣ ꠀꠞ ꠝꠣꠛꠥꠖꠞ ꠙꠛꠤꠔ꠆ꠞ ꠡꠣꠢꠣꠖꠔ ꠡꠘ꠆ꠖꠥꠇꠅ ꠇꠦꠝ꠆ꠙꠞ ꠜꠤꠔꠞꠦ ꠞꠁꠉꠦꠟ। 45 ꠔꠣꠞꠣꠞꠦ ꠖꠦꠈꠤꠀꠃ ꠢꠃ ꠙꠣꠠꠤꠀ ꠄꠟꠣꠇꠣꠞ ꠀꠝꠣꠟꠦꠇꠤ ꠀꠞ ꠇꠦꠘꠣꠘꠤ ꠅꠇꠟ ꠟꠣꠝꠤꠀ ꠀꠁꠀ ꠢꠣꠝꠟꠣ ꠌꠣꠟꠣꠁꠟ, ꠀꠞ ꠢꠘꠞ ꠢꠞ꠆ꠝꠣ ꠐꠣꠃꠘ ꠙꠞ꠆ꠎꠘ꠆ꠔ ꠈꠦꠖꠣꠁꠀ ꠘꠤꠟ।