13
ꠇꠦꠘꠣꠘ ꠖꠦꠡꠅ ꠉꠥꠁꠀ ꠙꠣꠑꠣꠘꠤ
1 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 2 “ꠛꠘꠤ ꠁꠍꠞꠣꠁꠟꠞꠦ ꠀꠝꠤ ꠎꠦ ꠇꠦꠘꠣꠘ ꠖꠦꠡ ꠖꠤꠔꠣꠝ ꠌꠣꠁꠞꠣꠝ, ꠅꠃ ꠖꠦꠡꠞ ꠢꠣꠟ-ꠢꠇꠤꠇꠔ ꠖꠦꠈꠤꠀ ꠀꠅꠀꠞ ꠟꠣꠉꠤ ꠔꠥꠝꠤ ꠛꠣꠞꠅ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠎꠘ ꠡꠞ꠆ꠖꠣꠞ ꠙꠣꠑꠣꠅ।”
3 ꠝꠣꠛꠥꠖꠞ ꠢꠥꠇꠥꠝ ꠙꠣꠁꠀ ꠝꠥꠍꠣꠄ ꠅꠟꠣꠃ ꠇꠞꠟꠣ। ꠔꠣꠁꠘ ꠚꠣꠞꠣꠘ ꠝꠞꠥꠜꠥꠝꠤ ꠕꠣꠇꠤ ꠎꠦꠞꠣꠞꠦ ꠙꠣꠑꠣꠁꠟꠣ, ꠄꠞꠣ ꠢꠇꠟꠃ ꠛꠘꠤ ꠁꠍꠞꠣꠁꠟꠞ ꠡꠞ꠆ꠖꠣꠞ। 4 ꠄꠞꠣ ꠅꠁꠟꠣ:
ꠞꠥꠛꠦꠘ ꠈꠣꠘ꠆ꠖꠣꠘꠞ ꠎꠣꠇꠥꠞꠞ ꠙꠥꠀ ꠡꠣꠝ꠆ꠝꠥꠀ,
5 ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠈꠥꠞꠤꠞ ꠙꠥꠀ ꠡꠚꠣꠔ,
6 ꠄꠢꠥꠖꠣ ꠈꠣꠘ꠆ꠖꠣꠘꠞ ꠎꠤꠚꠥꠘ꠆ꠘꠤꠞ ꠙꠥꠀ ꠇꠣꠟꠥꠔ,
7 ꠁꠍꠣꠈꠞ ꠈꠣꠘ꠆ꠖꠣꠘꠞ ꠁꠃꠍꠥꠚꠞ ꠙꠥꠀ ꠎꠤꠉꠣꠟ,
8 ꠀꠚꠞꠣꠁꠝ ꠈꠣꠘ꠆ꠖꠣꠘꠞ ꠘꠥꠘꠞ ꠙꠥꠀ ꠢꠥꠍꠤꠀ,
9 ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠞꠚꠥꠞ ꠙꠥꠀ ꠚꠟꠔꠤ,
10 ꠍꠛꠥꠟꠘ ꠈꠣꠘ꠆ꠖꠣꠘꠞ ꠍꠁꠖꠞ ꠙꠥꠀ ꠉꠖ꠆ꠖꠤꠄꠟ,
11 ꠁꠃꠍꠥꠚꠞ ꠙꠥꠀ ꠝꠣꠘꠡꠣ ꠈꠣꠘ꠆ꠖꠣꠘꠞ ꠍꠥꠡꠤꠞ ꠙꠥꠀ ꠉꠣꠖ꠆ꠖꠤ,
12 ꠖꠣꠘ ꠈꠣꠘ꠆ꠖꠣꠘꠞ ꠉꠝꠟ꠆ꠟꠤꠞ ꠙꠥꠀ ꠀꠝ꠆ꠝꠤꠄꠟ,
13 ꠀꠡꠤꠞ ꠈꠣꠘ꠆ꠖꠣꠘꠞ ꠝꠤꠇꠣꠁꠟꠞ ꠙꠥꠀ ꠍꠔꠥꠞ,
14 ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠛꠡꠤꠞꠞ ꠙꠥꠀ ꠘꠁꠛ,
15 ꠀꠞ ꠍꠣꠖꠥ ꠈꠣꠘ꠆ꠖꠣꠘꠞ ꠝꠣꠈꠤꠞ ꠙꠥꠀ ꠉꠥꠎꠄꠄꠟ।
16 ꠇꠦꠘꠣꠘ ꠖꠦꠡꠞ ꠢꠣꠟ-ꠢꠇꠤꠇꠔ ꠎꠣꠘꠤꠀ ꠀꠁꠛꠣꠞ ꠟꠣꠉꠤ ꠉꠥꠁꠀ ꠢꠤꠡꠣꠛꠦ ꠝꠥꠍꠣ ꠘꠛꠤꠄ ꠄꠞꠣꠞꠦ ꠙꠣꠑꠣꠁꠟꠣ। ꠔꠣꠁꠘ ꠘꠥꠘꠞ ꠙꠥꠀ ꠢꠥꠍꠤꠀꠞꠦ ꠁꠃꠍꠣ ꠇꠁꠀ ꠒꠣꠇꠤꠔꠣ।
17 ꠇꠦꠘꠣꠘ ꠖꠦꠡꠅ ꠙꠣꠑꠣꠘꠤꠞ ꠛꠣꠟꠣ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠘꠦꠉꠦꠜ ꠝꠞꠥꠜꠥꠝꠤꠞ ꠝꠣꠎꠦꠖꠤ ꠉꠤꠀ ꠙꠣꠠꠤꠀ ꠄꠟꠣꠇꠣꠔ ꠢꠣꠝꠣꠁꠛꠣꠄ। 18 ꠢꠣꠝꠣꠁꠀ ꠖꠦꠈꠛꠣꠄ, ꠅꠃ ꠖꠦꠡꠈꠣꠘ ꠇꠤꠟꠣ। ꠁ ꠖꠦꠡꠞ ꠛꠣꠡꠤꠘ꠆ꠖꠣ ꠝꠣꠘꠥꠡ ꠇꠝ ꠘꠣ ꠛꠦꠡꠤ, ꠔꠣꠞꠣ ꠇꠝꠎꠥꠞ ꠘꠣ ꠛꠟꠛꠣꠘ। 19 ꠔꠣꠞꠣꠞ ꠖꠦꠡꠈꠣꠘ ꠜꠣꠟꠣ ꠘꠣ ꠝꠘ꠆ꠖ? ꠖꠦꠡꠞ ꠐꠣꠃꠘ ꠅꠇꠟ ꠃꠌꠣ ꠛꠣꠃꠘ꠆ꠒꠞꠤ ꠅꠀꠟ ꠇꠞꠣ, ꠘꠣ ꠛꠣꠃꠘ꠆ꠒꠞꠤ ꠍꠣꠠꠣ? 20 ꠢꠤꠘꠞ ꠝꠣꠐꠤꠔ ꠞꠡ ꠀꠍꠦ ꠇꠤ ꠘꠣ, ꠉꠣꠍ-ꠙꠣꠟꠣ ꠀꠍꠦ ꠇꠤ ꠘꠣ? ꠀꠞ ꠀꠅꠀꠞ ꠡꠝꠄ ꠖꠦꠈꠤꠅ, ꠙꠣꠞꠟꠦ ꠢꠃ ꠖꠦꠡꠞ ꠇꠥꠘꠥ ꠚꠟ-ꠝꠥꠟ ꠟꠁꠀ ꠀꠁꠅ।” ꠅꠃ ꠡꠝꠄ ꠔ ꠀꠋꠉꠥꠞ ꠙꠣꠇꠣꠞ ꠡꠝꠄ ꠀꠁꠍꠦ।
21 ꠔꠦꠃ ꠔꠣꠞꠣ ꠎꠤꠘ ꠝꠞꠥꠜꠥꠝꠤ ꠕꠣꠇꠤ ꠡꠥꠞꠥ ꠇꠞꠤꠀ ꠢꠣꠝꠣꠔꠞ ꠛꠣꠄ ꠞꠣꠢꠛ ꠙꠞ꠆ꠎꠘ꠆ꠔ ꠉꠤꠀ ꠀꠡ꠆ꠔꠣ ꠖꠦꠡꠞ ꠢꠣꠟ-ꠢꠇꠤꠇꠔ ꠖꠦꠈꠤꠀ ꠀꠁꠟꠣ। 22 ꠎꠣꠅꠀꠞ ꠇꠣꠟꠅ ꠔꠣꠞꠣ ꠘꠦꠉꠦꠜ ꠝꠞꠥꠜꠥꠝꠤ ꠅꠁꠀ ꠢꠦꠛꠞꠘ ꠐꠣꠃꠘꠅ ꠉꠤꠀ ꠀꠎꠤꠟꠣ। ꠁ ꠢꠦꠛꠞꠘ ꠐꠣꠃꠘ ꠛꠣꠘꠣꠁꠟ ꠅꠁꠍꠤꠟ ꠝꠤꠡꠞ ꠖꠦꠡꠞ ꠍꠥꠀꠘ ꠐꠣꠃꠘ ꠛꠣꠘꠣꠘꠤꠞ ꠡꠣꠔ ꠛꠍꠞ ꠀꠉꠦ। ꠢꠤꠘꠅ ꠙꠄꠟꠥꠀꠘ ꠀꠘꠣꠇꠤ ꠈꠣꠘ꠆ꠖꠣꠘꠞ ꠔꠤꠘꠎꠘ ꠝꠣꠘꠥꠡ ꠀꠍꠤꠟ, ꠄꠞꠣꠞ ꠘꠣꠝ ꠅꠁꠟ ꠀꠢꠤꠝꠣꠘ, ꠡꠤꠍꠣꠁ, ꠀꠞ ꠔꠣꠟꠝꠣꠁ। 23 ꠛꠣꠖꠦ ꠅꠃ ꠉꠥꠁꠀ ꠅꠇꠟ ꠀꠡꠇꠥꠟ ꠘꠣꠝꠞ ꠙꠣꠠꠤꠀ ꠈꠣꠟꠞ ꠙꠣꠞꠅ ꠕꠣꠇꠤ ꠄꠇ ꠍꠠꠤ ꠀꠋꠉꠥꠞ ꠡꠥꠖ꠆ꠖꠣ ꠀꠡ꠆ꠔꠣ ꠄꠇ ꠟꠔ ꠇꠣꠐꠤꠀ ꠟꠁꠀ ꠀꠁꠟꠣ। ꠁ ꠀꠋꠉꠥꠞꠞ ꠍꠠꠤ ꠔꠣꠞꠣꠞ ꠖꠥꠁꠎꠘꠦ ꠜꠣꠋ ꠖꠤꠀ ꠛꠁꠀ ꠀꠘꠟꠣ। ꠟꠉꠦ ꠇꠤꠍꠥ ꠀꠘꠥꠀꠞ ꠀꠞ ꠒꠥꠝꠥꠞ ꠚꠟꠅ ꠀꠘꠟꠣ। 24 ꠛꠘꠤ ꠁꠍꠞꠣꠁꠟꠞ ꠡꠞ꠆ꠖꠣꠞ ꠅꠇꠟꠦ ꠢꠘ ꠕꠣꠇꠤ ꠅꠃ ꠀꠋꠉꠥꠞꠞ ꠍꠠꠤ ꠇꠣꠐꠣꠄ ꠅꠃ ꠎꠣꠉꠣꠞ ꠘꠣꠝ ꠅꠁꠉꠦꠟ, ꠀꠡꠇꠥꠟꠞ ꠈꠣꠟ, ꠝꠣꠘꠤ ꠍꠠꠤꠞ ꠈꠣꠟ। 25 ꠀꠡ꠆ꠔꠣ ꠇꠦꠘꠣꠘ ꠖꠦꠡꠞ ꠢꠣꠟ-ꠢꠇꠤꠇꠔ ꠖꠦꠈꠤꠀ ꠢꠣꠞꠤ, ꠌꠣꠟ꠆ꠟꠤꠡ ꠖꠤꠘ ꠛꠣꠖꠦ ꠔꠣꠞꠣ ꠢꠇꠟ ꠚꠤꠞꠤꠀ ꠀꠁꠟꠣ।
ꠇꠦꠘꠣꠘ ꠖꠦꠡꠞ ꠛꠦꠙꠣꠞꠦ ꠉꠥꠁꠀꠞ ꠞꠤꠙꠞ꠆ꠐ
26 ꠅꠃ ꠉꠥꠁꠀ ꠅꠇꠟ ꠚꠣꠞꠣꠘ ꠝꠞꠥꠜꠥꠝꠤꠞ ꠇꠣꠖꠦꠡ ꠘꠣꠝꠞ ꠎꠣꠉꠣꠔ ꠚꠤꠞꠤꠀ ꠀꠁꠟꠣ, ꠅꠘꠅ ꠝꠥꠍꠣ ꠘꠛꠤ, ꠁꠝꠣꠝ ꠢꠣꠞꠥꠘ ꠀꠞ ꠛꠘꠤ ꠁꠍꠞꠣꠁꠟ ꠅꠇꠟ ꠀꠍꠟꠣ। ꠄꠞꠣ ꠀꠁꠀ ꠢꠇꠟꠞꠦ ꠢꠘꠞ ꠈꠛꠞ-ꠀꠘ꠆ꠔꠞ ꠎꠣꠘꠣꠁꠟꠣ ꠀꠞ ꠢꠃ ꠖꠦꠡꠞ ꠚꠟ-ꠝꠥꠟ ꠖꠦꠈꠣꠁꠟꠣ। 27 ꠔꠣꠞꠣ ꠝꠥꠍꠣꠞꠦ ꠇꠁꠟꠣ, “ꠀꠙꠘꠦ ꠀꠝꠞꠣꠞꠦ ꠎꠦ ꠖꠦꠡꠅ ꠙꠣꠑꠣꠁꠍꠟꠣ, ꠀꠝꠞꠣ ꠢꠘꠅ ꠉꠤꠀ ꠖꠦꠈꠟꠣꠝ, ꠢꠤ ꠖꠦꠡꠈꠣꠘ ꠢꠣꠍꠣꠃ ꠖꠥꠗ ꠀꠞ ꠝꠃꠞ ꠜꠣꠘ꠆ꠒꠣꠞ ꠀꠟꠣ ꠖꠦꠡ। ꠅꠃ ꠖꠦꠈꠃꠇ꠆ꠇꠣ, ꠢꠃ ꠖꠦꠡꠞ ꠚꠟ। 28 ꠅꠁꠟꠦ ꠢꠤꠘꠞ ꠝꠣꠘꠥꠡ ꠈꠥꠛ ꠙꠄꠟꠥꠀꠘ ꠀꠞ ꠔꠣꠞꠣꠞ ꠐꠣꠃꠘꠅ ꠛꠠ ꠛꠠ ꠀꠞ ꠃꠌꠣ ꠛꠣꠃꠘ꠆ꠒꠞꠤ ꠇꠞꠣ। ꠀꠝꠞꠣ ꠀꠘꠣꠇꠤ ꠙꠄꠟꠥꠀꠘ ꠈꠣꠘ꠆ꠖꠣꠘꠞ ꠝꠣꠘꠡꠞꠦꠅ ꠢꠘꠅ ꠖꠦꠈꠍꠤ। 29 ꠀꠝꠣꠟꠦꠇꠤ ꠅꠇꠟ ꠛꠡꠔ ꠇꠞꠂꠘ ꠘꠦꠉꠦꠜ ꠝꠞꠥꠜꠥꠝꠤꠔ। ꠢꠤꠐ꠆ꠐꠤ, ꠎꠤꠛꠥꠎꠤ ꠀꠞ ꠀꠝꠥꠞꠤ ꠅꠇꠟ ꠙꠣꠠꠤ ꠄꠟꠣꠇꠣꠔ ꠞꠂꠘ। ꠀꠞ ꠇꠦꠘꠣꠘꠤ ꠅꠇꠟꠞ ꠇꠦꠃ ꠇꠦꠃ ꠖꠞꠤꠀꠞ ꠇꠣꠘ꠆ꠖꠣꠔ ꠀꠞ ꠇꠦꠃ ꠇꠦꠃ ꠎꠞ꠆ꠖꠣꠘ ꠉꠣꠋꠉꠞ ꠙꠣꠞꠅ ꠞꠂꠘ।”
30 ꠅꠃ ꠡꠝꠄ ꠝꠥꠍꠣꠞ ꠍꠣꠝꠘꠦ ꠎꠦꠔꠣ ꠝꠣꠘꠥꠡ ꠖꠟꠣ ꠀꠍꠟꠣ, ꠇꠣꠟꠥꠔꠦ ꠄꠞꠣꠞ ꠡꠥꠞꠉꠥꠟ ꠕꠣꠝꠣꠁꠀ ꠇꠁꠟꠣ, “ꠀꠝꠞꠣꠞ ꠟꠣꠉꠤ ꠎꠞꠥꠞ ꠅꠁꠟ ꠢꠘꠅ ꠉꠤꠀ ꠅꠃ ꠖꠦꠡ ꠖꠈꠟ ꠇꠞꠣ, ꠀꠞ ꠁꠔꠣ ꠀꠝꠞꠣ ꠙꠣꠞꠝꠥꠅ।” 31 ꠁꠈꠣꠘ ꠢꠥꠘꠤꠀ ꠔꠣꠘ ꠟꠉꠞ ꠉꠥꠁꠀ ꠅꠇꠟꠦ ꠇꠁꠟꠣ, “ꠘꠣ, ꠘꠣ, ꠁꠔꠣ ꠝꠣꠘꠡꠞ ꠟꠉꠦ ꠟꠣꠠꠣꠁ ꠇꠞꠣ ꠀꠝꠞꠣꠞ ꠟꠣꠉꠤ ꠅꠡꠝ꠆ꠛꠛ, ꠁꠔꠣ ꠀꠝꠞꠣ ꠕꠣꠇꠤ ꠛꠃꠔ ꠛꠟꠀꠟꠣ।” 32 ꠄꠞꠣ ꠢꠃ ꠖꠦꠡꠞ ꠛꠦꠙꠣꠞꠦ ꠝꠘꠉꠠꠣ ꠝꠤꠍꠣ ꠝꠣꠔꠤꠀ ꠇꠁꠟꠣ, “ꠀꠝꠞꠣ ꠎꠦ ꠖꠦꠡ ꠖꠦꠈꠣꠔ ꠉꠦꠍꠟꠣꠝ, ꠁ ꠖꠦꠡꠦ ꠔꠣꠞ ꠙ꠆ꠞꠎꠣ ꠅꠇꠟꠞꠦ ꠉꠤꠟꠤꠀ ꠈꠣꠁꠟꠣꠄ। ꠢꠤꠘꠞ ꠝꠣꠘꠥꠡ ꠈꠥꠛ ꠃꠌꠣ-ꠝꠥꠐꠣ ꠙꠄꠟꠥꠀꠘ। 33 ꠀꠝꠞꠣ ꠢꠤꠘꠅ ꠘꠦꠚꠤꠟꠤ ꠎꠣꠔꠞ ꠝꠣꠘꠡꠞꠦꠅ ꠖꠦꠈꠍꠤ, ꠁꠔꠣ ꠖꠦꠈꠔꠦ ꠖꠂꠔ꠆ꠔ-ꠖꠣꠘꠛꠞ ꠟꠣꠈꠣꠘ। ꠀꠝꠞꠣ ꠔ ꠔꠣꠞꠣꠞ ꠉꠦꠍꠦ ꠔꠥꠌ꠆ꠍ ꠙꠤꠙꠠꠣꠞ ꠟꠣꠈꠣꠘ, ꠔꠣꠞꠣꠅ ꠀꠝꠞꠣꠞꠦ ꠅꠟꠣ ꠙꠤꠙꠠꠣ ꠝꠘꠅ ꠇꠞꠍꠦ।” ꠎꠣꠘ ꠔ, ꠅꠈꠘꠇꠥꠞ ꠀꠘꠣꠇꠤ ꠎꠣꠔꠤ ꠅꠃ ꠘꠦꠚꠤꠟꠤ ꠅꠇꠟꠞ ꠛꠋꠡꠗꠞ।