1 ꠢꠎꠞꠔ ꠝꠥꠍꠣꠄ ꠁꠕꠤꠅꠙꠤꠀ ꠖꠦꠡꠞ ꠄꠇꠎꠘ ꠛꠦꠐꠤꠞꠦ ꠛꠤꠀ ꠇꠞꠍꠟꠣ। ꠄꠘꠞꠦ ꠛꠤꠀ ꠇꠞꠣꠄ ꠝꠥꠍꠣꠞ ꠛꠁꠘ ꠝꠞꠤꠅꠝ ꠀꠞ ꠜꠣꠁ ꠢꠣꠞꠥꠘꠦ ꠝꠥꠍꠣꠞ ꠛꠤꠞꠥꠖ꠆ꠖꠦ ꠝꠣꠔ-ꠇꠕꠣ ꠝꠣꠔꠤꠟꠣ। 2 ꠔꠣꠞꠣ ꠇꠁꠟꠣ, “ꠝꠣꠛꠥꠖꠦ ꠈꠣꠟꠤ ꠝꠥꠍꠣꠞ ꠝꠣꠞꠚꠔꠦ ꠝꠣꠔꠂꠘ ꠘꠤ? ꠀꠝꠞꠣꠞ ꠃꠍꠤꠟ꠆ꠟꠣꠄꠅ ꠝꠣꠔꠂꠘ ꠘꠣ ꠘꠤ?” ꠁꠈꠣꠘ ꠝꠣꠛꠥꠖꠦ ꠢꠥꠘꠟꠣ। 3 ꠀꠍꠟꠦ ꠝꠥꠍꠣ ꠘꠛꠤ ꠔ ꠀꠍꠟꠣ ꠄꠇꠎꠘ ꠉꠞꠤꠝꠣ ꠍꠣꠠꠣ ꠝꠣꠘꠥꠡ। ꠎꠉꠔꠞ ꠝꠣꠎꠦ ꠁꠟꠣ ꠉꠞꠤꠝꠣ ꠍꠣꠠꠣ ꠀꠞ ꠇꠥꠘꠥ ꠝꠣꠘꠥꠡ ꠀꠍꠤꠟ ꠘꠣ।

4 ꠝꠥꠍꠣꠞ ꠛꠤꠞꠥꠖ꠆ꠖꠦ ꠢꠣꠞꠥꠘ ꠀꠞ ꠝꠞꠤꠅꠝꠞ ꠝꠣꠔ-ꠇꠕꠣ ꠢꠥꠘꠤꠀꠃ ꠝꠣꠛꠥꠖꠦ ꠝꠥꠍꠣ, ꠢꠣꠞꠥꠘ ꠀꠞ ꠝꠞꠤꠅꠝꠞꠦ ꠇꠁꠟꠣ, “ꠔꠥꠝꠞꠣ ꠔꠤꠘꠅꠎꠘ ꠛꠣꠞ ꠅꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠉꠦꠍꠦ ꠀꠅ।” ꠔꠦꠃ ꠄꠞꠣ ꠔꠤꠘꠅꠎꠘ ꠅꠘꠅ ꠀꠁꠟꠣ। 5 ꠅꠃ ꠡꠝꠄ ꠝꠣꠛꠥꠖꠦꠅ ꠇꠥꠖꠞꠔꠤ ꠝꠦꠊꠞ ꠌꠣꠈꠣꠔ ꠅꠁꠀ ꠟꠣꠝꠤꠀ ꠀꠁꠟꠣ, ꠀꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍ ꠕꠣꠇꠤ ꠢꠣꠞꠥꠘ ꠀꠞ ꠝꠞꠤꠅꠝꠞꠦ ꠒꠣꠇꠤꠟꠣ। ꠔꠣꠞꠣ ꠀꠉꠥꠀꠁꠀ ꠀꠁꠟꠦ 6 ꠝꠣꠛꠥꠖꠦ ꠇꠁꠟꠣ, “ꠔꠥꠝꠞꠣ ꠀꠝꠣꠞ ꠇꠕꠣ ꠢꠥꠘꠅ। ꠔꠥꠝꠞꠣꠞ ꠝꠣꠎꠦ ꠇꠥꠘꠥ ꠙꠤꠞ-ꠖꠞꠛꠦꠡ ꠕꠣꠇꠟꠦ, ꠀꠝꠤ ꠝꠣꠛꠥꠖꠦ ꠖꠞꠡꠘꠞ ꠝꠣꠎꠖꠤ ꠀꠝꠣꠞ ꠘꠤꠎꠞꠦ ꠔꠣꠞ ꠉꠦꠍꠦ ꠎꠣꠁꠞ ꠇꠞꠤ ꠀꠞ ꠈꠥꠀꠛꠦ ꠔꠣꠞ ꠟꠉꠦ ꠛꠣꠔꠌꠤꠔ ꠇꠞꠤ। 7 ꠅꠁꠟꠦ ꠀꠝꠣꠞ ꠉꠥꠟꠣꠝ ꠝꠥꠍꠣꠞ ꠟꠉꠦ ꠁꠟꠣ ꠇꠞꠤ ꠘꠣ। ꠢꠦ ꠀꠝꠣꠞ ꠀꠡ꠆ꠔꠣ ꠡꠋꠡꠣꠞꠞ ꠢꠇꠟ ꠕꠣꠇꠤ ꠛꠤꠡ꠆ꠛꠣꠡꠤ ꠎꠘ। 8 ꠀꠝꠤ ꠔꠣꠞ ꠟꠉꠦ ꠍꠣꠝꠘꠣ-ꠍꠣꠝꠘꠤ ꠅꠁꠀ ꠈꠥꠟꠣ-ꠈꠥꠟꠤ ꠛꠣꠔꠌꠤꠔ ꠇꠞꠤ, ꠇꠥꠘꠥꠔꠣ ꠛꠣꠔꠥꠘꠤ ꠞꠣꠈꠤ ꠘꠣ। ꠀꠝꠤ ꠝꠣꠛꠥꠖꠦ ꠎꠦ ꠍꠥꠞꠔꠦ ꠔꠣꠞꠦ ꠖꠤꠖꠣꠞ ꠖꠦꠁ, ꠢꠦ ꠀꠝꠣꠞꠦ ꠅꠟꠣ ꠖꠦꠈꠦ। ꠄꠞꠛꠣꠖꠦꠅ ꠔꠥꠝꠞꠣ ꠀꠝꠣꠞ ꠉꠥꠟꠣꠝ ꠝꠥꠍꠣꠞ ꠛꠤꠞꠥꠖ꠆ꠖꠦ ꠝꠣꠔꠤꠔꠦ ꠃꠛꠣꠁꠟꠣꠄ ꠘꠣ ꠘꠤ?”

9 ꠄꠞꠟꠣꠉꠤ ꠢꠣꠞꠥꠘ ꠀꠞ ꠝꠞꠤꠅꠝꠞ ꠃꠙꠞꠦ ꠝꠣꠛꠥꠖ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ, ꠅꠁꠀ ꠔꠣꠁꠘ ꠢꠞꠤꠀ ꠉꠦꠟꠣꠉꠤ। 10 ꠝꠦꠊꠞ ꠌꠣꠈꠣ ꠎꠦꠛꠟꠣ ꠝꠤꠟꠘ-ꠔꠣꠝ꠆ꠛꠥ ꠕꠣꠇꠤ ꠃꠙꠞꠦ ꠃꠑꠤꠉꠦꠟ, ꠅꠃ ꠡꠝꠄ ꠖꠦꠈꠣ ꠉꠦꠟ, ꠝꠞꠤꠅꠝꠞ ꠀꠡ꠆ꠔꠣ ꠉꠔꠞꠅ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠦ ꠖꠥꠗꠞ ꠟꠣꠈꠣꠘ ꠗꠟꠣ ꠅꠁꠉꠦꠍꠦ। ꠢꠣꠞꠥꠘꠦ ꠝꠞꠤꠅꠝꠞ ꠛꠣꠄ ꠌꠣꠁꠀ ꠅꠃ ꠢꠣꠟꠔ ꠖꠦꠈꠟꠣ। 11 ꠖꠦꠈꠤꠀ ꠔꠣꠁꠘ ꠝꠥꠍꠣꠞꠦ ꠇꠁꠟꠣ, “ꠅ ꠀꠝꠣꠞ ꠝꠣꠟꠤꠇ, ꠀꠝꠞꠣ ꠘꠣ ꠛꠥꠎꠤꠀ ꠎꠦ ꠉꠥꠘꠣ ꠇꠞꠤꠟꠤꠍꠤ, ꠁ ꠇꠍꠥꠞꠤ ꠈꠣꠘ ꠔꠥꠝꠤ ꠝꠘꠅ ꠞꠣꠈꠤꠅ ꠘꠣ। 12 ꠝꠣʼꠞ ꠙꠦꠐꠅ ꠕꠣꠇꠤ ꠎꠘꠝ ꠅꠀꠞ ꠛꠣꠟꠣ ꠎꠦ ꠢꠥꠞꠥꠔ꠆ꠔꠣꠞ ꠅꠞ꠆ꠗꠦꠇ ꠡꠞꠤꠟ ꠇ꠆ꠇꠄ ꠅꠁꠉꠦꠍꠦ, ꠔꠥꠝꠤ ꠝꠞꠤꠅꠝꠞꠦ ꠁꠟꠣ ꠛꠣꠘꠣꠁꠅ ꠘꠣ।” 13 ꠔꠦꠃ ꠝꠥꠍꠣꠄ ꠇꠣꠘ꠆ꠖꠤꠀ ꠝꠣꠛꠥꠖꠞ ꠖꠞꠛꠣꠞꠅ ꠀꠞꠎ ꠇꠞꠟꠣ, “ꠅ ꠀꠟ꠆ꠟꠣ, ꠔꠥꠝꠤ ꠀꠝꠣꠞ ꠛꠁꠘꠞ ꠛꠦꠝꠣꠞ ꠡꠤꠚꠣ ꠇꠞꠤ ꠖꠦꠅ।”

14 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠔꠣꠁꠞ ꠛꠣꠚꠦ ꠎꠥꠖꠤ ꠔꠣꠁꠞ ꠝꠥꠈꠅ ꠈꠣꠟꠤ ꠍꠦꠚ ꠚꠣꠟꠣꠁꠔꠣ, ꠔꠦ ꠡꠞꠝꠣꠁꠀ ꠔꠣꠁ ꠡꠣꠔ ꠖꠤꠘ ꠊꠞꠞ ꠛꠣꠞꠦ ꠞꠁꠟ ꠅꠘꠦ ꠘꠣ ꠘꠤ? ꠅꠟꠣ ꠡꠣꠔꠖꠤꠘ ꠔꠣꠁꠞꠦ ꠇꠦꠝ꠆ꠙꠞ ꠛꠣꠞꠦ ꠀꠟꠉ ꠞꠣꠈꠅ, ꠛꠣꠖꠦ ꠜꠤꠔꠞꠦ ꠀꠘꠛꠣꠄ ꠘꠦ।” 15 ꠄꠞꠟꠣꠉꠤ ꠝꠞꠤꠅꠝꠞꠦ ꠡꠣꠔ ꠖꠤꠘ ꠇꠦꠝ꠆ꠙꠞ ꠛꠣꠞꠦ ꠢꠞꠣꠁ ꠕꠁꠟꠣ। ꠄꠘꠞꠦ ꠜꠤꠔꠞꠦ ꠀꠘꠣꠞ ꠀꠉ ꠙꠞ꠆ꠎꠘ꠆ꠔ ꠝꠣꠘꠡꠞ ꠍꠚꠞꠅ ꠛꠣꠞꠘꠤ ꠛꠘ꠆ꠖ ꠞꠁꠟ। 16 ꠛꠣꠖꠦ ꠛꠘꠤ ꠁꠍꠞꠣꠁꠟ ꠅꠇꠟ ꠢꠣꠎꠤꠞꠥꠔ ꠍꠣꠠꠤꠀ ꠚꠣꠞꠣꠘ ꠝꠞꠥꠜꠥꠝꠤꠔ ꠉꠤꠀ ꠇꠦꠝ꠆ꠙ ꠉꠣꠠꠤꠟꠣ।