1 ꠛꠘꠤ ꠁꠍꠞꠣꠁꠟꠦ ꠘꠤꠎꠞ ꠖꠥꠈ-ꠇꠡ꠆ꠐꠞ ꠟꠣꠉꠤ ꠛꠦꠎꠣꠞ ꠅꠁꠀ ꠛꠇꠣ-ꠎꠇꠣ ꠇꠞꠟꠣ। ꠄꠞꠟꠣꠉꠤ ꠝꠣꠛꠥꠖꠦ ꠔꠣꠞꠣꠞ ꠁꠔꠣ ꠢꠥꠘꠤꠀ ꠉꠥꠍꠣ ꠅꠁꠉꠦꠟꠣ। ꠔꠣꠁꠘ ꠉꠎꠛꠤ ꠀꠉꠥꠁꠘ ꠙꠣꠑꠣꠁꠟꠣ ꠀꠞ ꠅꠃ ꠀꠉꠥꠁꠘ ꠔꠣꠞꠣꠞ ꠝꠣꠎꠦ ꠎꠟꠤꠟ, ꠄꠔꠦ ꠇꠦꠝ꠆ꠙꠞ ꠇꠤꠘꠣꠞꠣꠞ ꠇꠤꠍꠥ ꠅꠋꠡ ꠀꠉꠥꠁꠘꠦ ꠎꠟꠤꠉꠦꠟ। 2 ꠄꠞꠖꠣꠄ ꠔꠣꠞꠣ ꠝꠥꠍꠣ ꠘꠛꠤꠞ ꠉꠦꠍꠦ ꠉꠤꠀ ꠇꠣꠘ꠆ꠖꠣ-ꠇꠣꠐꠤ ꠟꠣꠉꠣꠁꠟꠣ, ꠔꠦꠃ ꠝꠥꠍꠣꠄ ꠝꠣꠛꠥꠖꠞ ꠖꠞꠛꠣꠞꠅ ꠖꠥꠀ ꠇꠞꠣꠄ ꠀꠉꠥꠁꠘ ꠘꠤꠜꠤ ꠉꠦꠟ। 3 ꠝꠣꠛꠥꠖꠞ ꠀꠉꠥꠁꠘ ꠔꠣꠞꠣꠞ ꠝꠣꠎꠦ ꠎꠟꠍꠤꠟ ꠇꠞꠤ, ꠅꠃ ꠎꠣꠉꠣꠞ ꠘꠣꠝ ꠅꠁꠉꠦꠟ ꠔꠣꠛꠦꠞꠣ।

4 ꠛꠘꠤ ꠁꠍꠞꠣꠁꠟꠞ ꠟꠉꠦ ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠎꠦꠔꠣ ꠝꠣꠘꠥꠡ ꠀꠍꠟꠣ, ꠔꠣꠞꠣ ꠖꠥꠍꠞꠣ ꠎꠣꠔꠞ ꠝꠎꠣꠞ ꠇꠥꠘꠥ ꠈꠣꠘꠤꠞ ꠟꠣꠉꠤ ꠙꠣꠉꠟ ꠛꠘꠤꠉꠦꠟꠣ, ꠀꠞ ꠄꠞꠣꠞ ꠖꠦꠈꠣ-ꠖꠦꠈꠤ ꠛꠘꠤ ꠁꠍꠞꠣꠁꠟꠦꠅ ꠢꠤꠞꠛꠣꠞ ꠇꠣꠘ꠆ꠖꠣ-ꠇꠣꠐꠤ ꠇꠞꠤ ꠇꠁꠟꠣ, “ꠁꠡ, ꠀꠝꠞꠣ ꠎꠥꠖꠤ ꠉꠥꠡ꠆ꠔ ꠈꠣꠁꠔꠣꠝ ꠙꠣꠞꠔꠣꠝ! 5 ꠝꠤꠡꠞꠅ ꠕꠣꠇꠔꠦ ꠔ ꠛꠤꠘꠣ ꠙꠄꠡꠣꠄ ꠝꠣꠉꠘꠣ ꠝꠣꠍ ꠈꠣꠁꠔꠣꠝ, ꠢꠘꠅ ꠔꠞꠝꠥꠎ, ꠙꠤꠀꠎ-ꠞꠡꠥꠘ, ꠇꠤꠞꠣ, ꠢꠣꠉ-ꠔꠞꠇꠣꠞꠤ ꠢꠇ꠆ꠇꠟꠔꠣ ꠈꠣꠁꠔꠣꠝ, ꠁꠔꠣ ꠅꠈꠘꠅ ꠝꠘꠅ ꠙꠠꠦꠞ। 6 ꠅꠁꠟꠦ ꠅꠈꠘ ꠀꠝꠞꠣꠞ ꠇꠁꠟꠎꠣ ꠢꠥꠇꠣꠁ ꠉꠦꠍꠦ। ꠁꠘꠅ ꠔ ꠈꠣꠟꠤ ꠝꠣꠘ꠆ꠘꠣ ꠍꠣꠠꠣ ꠈꠣꠅꠀꠞ ꠀꠞ ꠇꠥꠘ꠆ꠔꠣꠃ ꠘꠣꠁ।”

7 ꠅꠃ ꠝꠣꠘ꠆ꠘꠣ ꠖꠦꠈꠔꠦ ꠓꠥꠟꠣ ꠛꠣꠈꠞꠞ ꠟꠣꠈꠣꠘ, ꠄꠞ ꠞꠋ ꠅꠁꠟ ꠇꠤꠍꠝꠤꠍꠞ ꠟꠣꠈꠣꠘ। 8 ꠝꠣꠘꠡꠦ ꠌꠣꠁꠞꠅꠛꠣꠄ ꠕꠣꠇꠤ ꠝꠣꠘ꠆ꠘꠣ ꠔꠥꠇꠣꠁꠀ ꠀꠘꠤꠀ ꠊꠣꠁꠟ-ꠍꠤꠀꠖꠤ ꠇꠥꠐꠤꠀ ꠛꠣ ꠢꠤꠟ-ꠙꠣꠐꠣꠖꠤ ꠍꠦꠌꠤꠀ ꠉꠥꠠꠣ ꠇꠞꠔꠣ। ꠛꠣꠖꠦ ꠁꠔꠣ ꠙꠣꠔꠤꠟꠅ ꠃꠘꠣ ꠖꠤꠀ ꠛꠣ ꠙꠤꠑꠣ ꠛꠣꠘꠣꠁꠀ ꠈꠣꠁꠔꠣ। ꠁꠔꠣ ꠈꠣꠁꠔꠦ ꠔꠦꠟꠖꠤ ꠛꠣꠘꠣꠁꠟ ꠙꠤꠑꠣꠞ ꠟꠣꠈꠣꠘ ꠝꠎꠣ। 9 ꠞꠣꠁꠔꠞ ꠛꠣꠟꠣ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠀꠡꠦ-ꠙꠣꠡꠦ ꠈꠥꠀ ꠙꠠꠔ, ꠅꠃ ꠈꠥꠀꠞ ꠟꠉꠦ ꠅꠁꠀ ꠛꠦꠢꠦꠡ꠆ꠔꠤ ꠈꠣꠘꠤ ꠝꠣꠘ꠆ꠘꠣꠅ ꠙꠠꠔ।

10 ꠝꠥꠍꠣ ꠘꠛꠤꠞ ꠇꠣꠘꠅ ꠀꠁꠟ, ꠙꠞꠔꠦꠇ ꠊꠞꠞ ꠝꠣꠘꠡꠦ ꠎꠣꠞꠎꠤꠞ ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠃꠛꠣꠁꠀ ꠇꠣꠘ꠆ꠖꠤꠞꠣ। ꠄꠞꠖꠣꠄ ꠔꠣꠁꠘ ꠈꠥꠛ ꠛꠦꠎꠣꠞ ꠅꠁꠟꠣ, ꠀꠞ ꠝꠣꠛꠥꠖꠅ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ। 11 ꠔꠦꠃ ꠝꠥꠍꠣꠄ ꠝꠣꠛꠥꠖꠞꠦ ꠇꠁꠟꠣ, “ꠔꠥꠝꠤ ꠇꠦꠘꠦ ꠔꠥꠝꠣꠞ ꠁ ꠉꠥꠟꠣꠝꠞꠦ ꠁꠟꠣ ꠛꠤꠙꠖꠅ ꠚꠣꠟꠣꠁꠟꠣꠄ? ꠀꠝꠤ ꠇꠤꠔꠣ ꠖꠥꠡ ꠇꠞꠟꠣꠝ, ꠎꠦ ꠇꠣꠞꠘꠦ ꠅꠔꠣ ꠝꠣꠘꠡꠞ ꠜꠣꠞ ꠀꠝꠣꠞ ꠇꠣꠘ꠆ꠖꠅ ꠖꠤꠟꠣꠄ? 12 ꠀꠝꠤ ꠇꠥꠘꠥ ꠔꠣꠞꠣꠞꠦ ꠙꠦꠐꠅ ꠟꠁꠍꠤ ꠘꠤ, ꠛꠣ ꠔꠣꠞꠣ ꠀꠝꠣꠞ ꠙꠦꠐ ꠕꠣꠇꠤ ꠎꠘꠝꠤꠍꠦ ꠘꠤ? ꠔꠥꠝꠤ ꠔꠣꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠞ ꠉꠦꠍꠦ ꠎꠦ ꠖꠦꠡ ꠖꠤꠛꠣꠞ ꠅꠀꠖꠣ ꠇꠞꠍꠤꠟꠣꠄ, ꠔꠣꠞꠣꠞꠦ ꠢꠘꠅ ꠘꠤꠛꠣꠞ ꠟꠣꠉꠤ ꠀꠝꠣꠞꠦ ꠇꠦꠘꠦ ꠔꠣꠞꠣꠞ ꠙꠣꠟꠇ-ꠛꠣꠚꠞ ꠟꠣꠈꠣꠘ ꠛꠣꠘꠣꠁꠍ, ꠀꠞ ꠔꠣꠞꠣꠞꠦ ꠇꠥꠟꠅ ꠇꠞꠤ ꠘꠤꠛꠣꠞ ꠇꠕꠣ ꠇꠦꠘꠦ ꠇꠁꠞꠣꠄ? 13 ꠁꠔꠣ ꠝꠣꠘꠡꠞ ꠈꠣꠘꠤꠞ ꠟꠣꠉꠤ ꠀꠝꠤ ꠅꠈꠘ ꠉꠥꠡ꠆ꠔ ꠇꠥꠀꠁ ꠙꠣꠁꠔꠣꠝ? ꠔꠣꠞꠣ ꠀꠝꠣꠞ ꠉꠦꠍꠦ ꠈꠣꠟꠤ ꠉꠥꠡ꠆ꠔ ꠉꠥꠡ꠆ꠔ ꠇꠁꠀ ꠌꠤꠟ꠆ꠟꠣꠁꠞꠣ। 14 ꠔꠣꠞꠣꠞ ꠎꠤꠝ꠆ꠝꠣ ꠘꠦꠅꠀ ꠛꠠ ꠝꠡꠇꠤꠟ, ꠀꠝꠣꠞ ꠄꠇꠣꠞ ꠙꠇ꠆ꠇꠦ ꠁ ꠎꠤꠝ꠆ꠝꠣ ꠘꠦꠅꠀ ꠡꠝ꠆ꠛꠛ ꠘꠣꠄ। 15 ꠔꠥꠝꠤ ꠎꠥꠖꠤ ꠀꠝꠣꠞꠦ ꠁ ꠝꠥꠡꠇꠤꠟꠅ ꠚꠣꠟꠣꠅ, ꠔꠦ ꠔꠥꠝꠣꠞ ꠖꠥꠀꠁ ꠖꠤꠀ ꠇꠁꠀꠞ, ꠅꠈꠘꠃ ꠀꠝꠣꠞꠦ ꠎꠣꠘꠦ ꠝꠣꠞꠤꠟꠣꠅ। ꠀꠞ ꠇꠁꠞꠣꠝ, ꠀꠝꠤ ꠎꠥꠖꠤ ꠔꠥꠝꠣꠞ ꠞꠢꠝꠔꠞ ꠔꠟꠦ ꠕꠣꠇꠤ, ꠔꠦ ꠘꠤꠎꠞ ꠌꠃꠈꠦ ꠘꠤꠎꠞ ꠛꠦꠢꠣꠟ꠆ꠟꠔꠤ ꠖꠡꠣ ꠀꠝꠣꠞꠦ ꠖꠦꠈꠣꠁꠅ ꠘꠣ।”

16 ꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠔꠥꠝꠤ ꠎꠣꠞꠣꠞꠦ ꠝꠥꠞꠛ꠆ꠛꠤ ꠘꠦꠔꠣ ꠀꠞ ꠁꠎ꠆ꠎꠔꠤ ꠢꠤꠡꠣꠛꠦ ꠌꠤꠘꠅ, ꠄꠞꠣꠞ ꠝꠣꠎ ꠕꠣꠇꠤ ꠡꠔ꠆ꠔꠁꠞ ꠎꠘ ꠝꠥꠞꠛ꠆ꠛꠤ ꠘꠦꠔꠣꠞꠦ ꠟꠁꠀ ꠀꠝꠣꠞ ꠉꠦꠍꠦ ꠀꠅ। ꠔꠥꠝꠤ ꠔꠣꠞꠣꠞꠦ ꠇꠅ, ꠔꠣꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠉꠦꠍꠦ ꠀꠁꠀ ꠔꠥꠝꠣꠞ ꠟꠉꠦ ꠃꠛꠣꠁꠔꠣ। 17 ꠀꠝꠤ ꠢꠘꠅ ꠟꠣꠝꠤꠀ ꠀꠁꠀ ꠔꠥꠝꠣꠞ ꠟꠉꠦ ꠛꠣꠔꠌꠤꠔ ꠇꠞꠝꠥ। ꠔꠥꠝꠣꠞ ꠝꠣꠎꠦ ꠀꠟ꠆ꠟꠣꠞ ꠎꠦ ꠞꠥꠢꠥ ꠀꠍꠂꠘ, ꠅꠃ ꠞꠥꠢꠥ ꠀꠝꠤ ꠔꠣꠞꠣꠞ ꠃꠙꠞꠦꠅ ꠖꠣꠘ ꠇꠞꠝꠥ। ꠝꠣꠘꠡꠞ ꠎꠤꠝ꠆ꠝꠣꠖꠣꠞꠤ ꠛꠁꠀ ꠘꠤꠔꠦ ꠔꠣꠞꠣꠅ ꠔꠥꠝꠣꠞꠦ ꠡꠣꠁꠎ꠆ꠎ ꠇꠞꠛꠣ। ꠔꠦꠃ ꠔꠥꠝꠣꠞ ꠄꠇꠟꠣ ꠛꠅꠀ ꠟꠣꠉꠔ ꠘꠣꠄ। 18 ꠀꠞ ꠔꠥꠝꠤ ꠅꠔꠣ ꠝꠣꠘꠡꠞꠦ ꠎꠣꠘꠣꠁ ꠖꠦꠅ, ꠔꠣꠞꠣ ꠙꠣꠇ-ꠙꠛꠤꠔ꠆ꠞ ꠅꠁꠀ ꠇꠣꠁꠟꠇꠥꠞ ꠟꠣꠉꠤ ꠎꠥꠁꠔ ꠞꠁꠔꠣ, ꠇꠣꠁꠟꠃ ꠔꠣꠞꠣ ꠈꠣꠘꠤꠞ ꠉꠥꠡ꠆ꠔ ꠙꠣꠁꠛꠣ। ꠔꠣꠞꠣ ꠔ ꠉꠥꠡ꠆ꠔꠞ ꠟꠣꠉꠤ ꠝꠣꠛꠥꠖꠞ ꠖꠞꠛꠣꠞꠅ ꠇꠣꠘ꠆ꠖꠣ-ꠇꠣꠐꠤ ꠇꠞꠤꠀ ꠇꠁꠍꠤꠟ, ꠝꠤꠡꠞꠅ ꠕꠣꠇꠔꠦꠃ ꠔꠣꠞꠣ ꠀꠞꠣꠝꠦ ꠀꠍꠤꠟ। ꠔꠦ ꠇꠣꠁꠟ ꠝꠣꠛꠥꠖꠦ ꠔꠣꠞꠣꠞꠦ ꠉꠥꠡ꠆ꠔ ꠖꠤꠛꠣ ꠀꠞ ꠔꠣꠞꠣ ꠈꠣꠁꠛꠣ। 19 ꠁ ꠉꠥꠡ꠆ꠔ ꠈꠣꠟꠤ ꠄꠇꠖꠤꠘ-ꠖꠥꠁꠖꠤꠘ, ꠙꠣꠌꠖꠤꠘ-ꠖꠡꠖꠤꠘ, ꠛꠣ ꠛꠤꠡꠖꠤꠘ ꠘꠣꠄ, 20 ꠙꠥꠞꠣ ꠄꠇ ꠝꠣꠡ ꠜꠞꠤ ꠈꠣꠁꠛꠣ। ꠈꠣꠁꠔꠦ ꠈꠣꠁꠔꠦ ꠔꠣꠞꠣꠞ ꠘꠣꠇꠦꠖꠤ ꠛꠣꠞ ꠅꠁꠛ, ꠛꠣꠖꠦ ꠀꠞ ꠎꠣꠘꠦ ꠇꠥꠟꠣꠁꠔ ꠘꠣꠄ। ꠀꠝꠤ ꠁꠟꠣ ꠊꠐꠣꠁꠝꠥ, ꠇꠣꠞꠘ ꠔꠥꠝꠞꠣꠞ ꠟꠉꠦ ꠎꠦ ꠝꠣꠛꠥꠖ ꠛꠡꠔ ꠇꠞꠂꠘ, ꠅꠃ ꠝꠣꠛꠥꠖꠞꠦ ꠔꠥꠝꠞꠣ ꠝꠣꠘꠍ ꠘꠣ। ꠔꠣꠘ ꠍꠣꠝꠘꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠤꠀ ꠇꠁꠍ, ꠝꠤꠡꠞ ꠕꠣꠇꠤ ꠢꠞꠤꠀ ꠀꠅꠀ ꠛꠥꠟꠦ ꠔꠥꠝꠞꠣꠞ ꠟꠣꠉꠤ ꠑꠤꠇ ꠅꠁꠍꠦ ꠘꠣ।”

21 ꠁꠈꠣꠘ ꠢꠥꠘꠤꠀ ꠝꠥꠍꠣꠄ ꠇꠁꠟꠣ, “ꠈꠣꠟꠤ ꠎꠥꠖ꠆ꠖ ꠇꠞꠣꠞ ꠎꠥꠇꠣꠃ ꠔ ꠍꠄ ꠟꠣꠈ ꠝꠣꠘꠥꠡ ꠀꠝꠣꠞ ꠟꠉꠦ ꠀꠍꠂꠘ, ꠀꠞ ꠔꠥꠝꠤ ꠇꠁꠞꠣꠄ ꠙꠥꠞꠣ ꠄꠇ ꠝꠣꠡ ꠜꠞꠤ ꠔꠣꠞꠣꠞꠦ ꠉꠥꠡ꠆ꠔ ꠈꠣꠛꠣꠁꠛꠣꠄ। 22 ꠔꠦ ꠢꠇ꠆ꠇꠟ ꠉꠞꠥ-ꠝꠦꠠꠣ ꠎꠛ ꠇꠞꠟꠦꠅ ꠔ ꠅꠔ ꠝꠣꠘꠡꠞ ꠚꠥꠁꠔ ꠘꠣꠄ, ꠀꠞ ꠖꠞꠤꠀꠞ ꠢꠇꠟ ꠝꠣꠍ ꠝꠣꠞꠤꠀ ꠀꠘꠤꠟ꠆ꠟꠦꠅ ꠇꠥꠟꠣꠁꠔ ꠘꠣꠄ।”

23 ꠝꠣꠛꠥꠖꠦ ꠎꠥꠀꠙ ꠖꠤꠟꠣ, “ꠅ ꠝꠥꠍꠣ, ꠝꠣꠛꠥꠖꠞ ꠇꠥꠖꠞꠔꠤ ꠛꠟ ꠅꠔ ꠇꠝꠎꠥꠞ ꠘꠤ? ꠔꠦ ꠔꠥꠝꠤ ꠖꠦꠈꠛꠣꠄ, ꠀꠝꠤ ꠔꠥꠝꠣꠞꠦ ꠎꠦꠔꠣ ꠇꠁꠍꠤ, ꠁꠔꠣ ꠢꠣꠍꠣ, ꠘꠣ ꠝꠤꠍꠣ।”

24 ꠔꠦꠃ ꠝꠥꠍꠣ ꠛꠣꠞꠦ ꠉꠦꠟꠣ, ꠉꠤꠀ ꠅꠔꠣ ꠝꠣꠘꠡꠞꠦ ꠝꠣꠛꠥꠖꠞ ꠢꠥꠇꠥꠝ ꠎꠣꠘꠣꠁꠟꠣ। ꠀꠞ ꠛꠘꠤ ꠁꠍꠞꠣꠁꠟꠞ ꠡꠔ꠆ꠔꠁꠞ ꠎꠘ ꠝꠥꠞꠛ꠆ꠛꠤ ꠘꠦꠔꠣꠞꠦ ꠀꠘꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠌꠣꠁꠞꠅꠛꠣꠄ ꠈꠣꠠꠣ ꠇꠞꠣꠁꠟꠣ। 25 ꠅꠃ ꠡꠝꠄ ꠉꠣꠁꠛꠤ ꠝꠦꠊꠞ ꠌꠣꠈꠣꠔ ꠅꠁꠀ ꠝꠣꠛꠥꠖ ꠟꠣꠝꠤꠀ ꠀꠁꠟꠣ, ꠀꠁꠀ ꠝꠥꠍꠣ ꠘꠛꠤꠞ ꠟꠉꠦ ꠛꠣꠔꠌꠤꠔ ꠇꠞꠟꠣ। ꠝꠥꠍꠣꠞ ꠃꠙꠞꠦ ꠀꠟ꠆ꠟꠣꠁ ꠎꠦ ꠞꠥꠢꠥ ꠀꠍꠟꠣ, ꠝꠣꠛꠥꠖꠦ ꠅꠃ ꠡꠔ꠆ꠔꠁꠞ ꠎꠘ ꠘꠦꠔꠣꠞ ꠃꠙꠞꠦꠅ ꠅꠃ ꠞꠥꠢꠥꠞ ꠇꠤꠍꠥ ꠅꠋꠡ ꠖꠤꠟꠣ। ꠅꠃ ꠞꠥꠢꠥ ꠔꠣꠞꠣꠞꠦ ꠖꠣꠘ ꠇꠞꠣꠞ ꠛꠣꠖꠦ, ꠔꠣꠞꠣ ꠇꠤꠍꠥ ꠡꠝꠄ ꠍꠥꠚꠤ-ꠖꠞꠛꠦꠡꠞ ꠄꠡꠇꠤ ꠜꠣꠛ ꠖꠦꠈꠣꠁꠟꠣ, ꠅꠁꠟꠦ ꠛꠣꠖꠦ ꠀꠞ ꠁꠟꠣ ꠅꠁꠍꠦ ꠘꠣ।

26 ꠀꠞ ꠅꠃ ꠡꠔ꠆ꠔꠁꠞ ꠎꠘ ꠝꠥꠞꠛ꠆ꠛꠤ ꠘꠦꠔꠣꠞ ꠝꠣꠎꠞ ꠖꠥꠁꠎꠘ ꠝꠥꠞꠛ꠆ꠛꠤ ꠇꠦꠝ꠆ꠙꠞ ꠜꠤꠔꠞꠦ ꠞꠁꠉꠦꠟꠣ, ꠄꠞꠣꠞ ꠘꠣꠝ ꠁꠟꠖꠣꠖ ꠀꠞ ꠝꠤꠖꠣꠖ, ꠔꠣꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠉꠦꠍꠦ ꠉꠦꠍꠟꠣ ꠘꠣ। ꠔꠦꠛꠃ ꠀꠟ꠆ꠟꠣꠁ ꠅꠃ ꠞꠥꠢꠥ ꠔꠣꠞꠣꠅ ꠙꠣꠁꠟꠣ, ꠙꠣꠁꠀ ꠔꠣꠞꠣ ꠇꠦꠝ꠆ꠙꠞ ꠜꠤꠔꠞꠦ ꠞꠁꠀ ꠍꠥꠚꠤ-ꠖꠞꠛꠦꠡꠞ ꠄꠡꠇꠤ ꠜꠣꠛ ꠖꠦꠈꠣꠁꠟꠣ। 27 ꠁꠔꠣ ꠖꠦꠈꠤꠀ ꠄꠇ ꠎꠥꠀꠘ ꠛꠦꠐꠣꠄ ꠖꠃꠠꠣꠁꠀ ꠉꠤꠀ ꠝꠥꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠢꠥꠘꠍꠂꠘ ꠘꠤ? ꠁꠟꠖꠣꠖ ꠀꠞ ꠝꠤꠖꠣꠖ ꠘꠣꠝꠞ ꠖꠥꠁꠅ ꠝꠥꠞꠛ꠆ꠛꠤꠄ ꠇꠦꠝ꠆ꠙꠞ ꠜꠤꠔꠞꠦ ꠍꠥꠚꠤ-ꠖꠞꠛꠦꠡꠞ ꠄꠡꠇꠤ ꠜꠣꠛ ꠖꠦꠈꠣꠁꠞꠣ।”

28 ꠅꠃ ꠡꠝꠄ ꠘꠥꠘꠞ ꠙꠥꠀ ꠁꠃꠍꠣꠄ ꠝꠥꠍꠣꠞꠦ ꠇꠁꠟꠣ, “ꠅ ꠀꠝꠣꠞ ꠝꠣꠟꠤꠇ, ꠀꠙꠘꠦ ꠄꠞꠣꠞꠦ ꠘꠤꠡꠦꠗ ꠖꠦꠃꠇ꠆ꠇꠣ।” ꠅꠃ ꠁꠃꠍꠣ ꠎꠥꠀꠘꠇꠤꠞ ꠡꠥꠞꠥ ꠕꠣꠇꠤꠃ ꠝꠥꠍꠣ ꠘꠛꠤꠞ ꠈꠣꠍ ꠈꠣꠖꠤꠝ ꠀꠍꠟꠣ।

29 ꠝꠥꠍꠣꠄ ꠄꠘꠞꠦ ꠇꠁꠟꠣ, “ꠀꠝꠣꠞ ꠝꠣꠘ-ꠡꠝ꠆ꠝꠣꠘꠃ ꠔꠥꠝꠣꠞ ꠉꠦꠍꠦ ꠛꠠ ꠅꠁꠉꠦꠟ ꠘꠤ? ꠀꠝꠤ ꠌꠣꠁꠞꠣꠝ, ꠝꠣꠛꠥꠖꠞ ꠢꠇꠟ ꠛꠘ꠆ꠖꠣꠄꠃ ꠍꠥꠚꠤ-ꠖꠞꠛꠦꠡꠤ ꠙꠣꠃꠇ꠆ꠇꠣ, ꠀꠞ ꠝꠣꠛꠥꠖꠦ ꠀꠙꠘ ꠞꠥꠢꠥ ꠔꠣꠞꠣꠞꠦ ꠖꠣꠘ ꠇꠞꠃꠇ꠆ꠇꠣ।” 30 ꠄꠞꠛꠣꠖꠦ ꠝꠥꠍꠣ ꠀꠞ ꠛꠘꠤ ꠁꠍꠞꠣꠁꠟꠞ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟ ꠇꠦꠝ꠆ꠙꠅ ꠚꠤꠞꠤꠀ ꠉꠦꠟꠣꠉꠤ।

31 ꠛꠣꠖꠦ ꠝꠣꠛꠥꠖꠞ ꠢꠥꠇꠥꠝꠦ ꠛꠠ ꠄꠇ ꠔꠥꠚꠣꠘ ꠀꠁꠟ। ꠅꠃ ꠔꠥꠚꠣꠘꠦ ꠖꠞꠤꠀꠞ ꠙꠣꠞ ꠕꠣꠇꠤ ꠇꠥꠄꠟ ꠙꠣꠈꠤ ꠑꠦꠟꠤꠀ ꠀꠘꠤꠀ ꠇꠦꠝ꠆ꠙꠞ ꠌꠣꠁꠞꠅ ꠉꠣꠟꠣ ꠜꠞꠣꠁ ꠖꠤꠟ। ꠄꠇꠖꠤꠘꠞ ꠙꠕ ꠙꠞꠤꠝꠣꠘ ꠎꠣꠉꠣ ꠙꠣꠈꠤꠄ ꠜꠞꠤꠉꠦꠟ। ꠙꠣꠈꠤꠞ ꠙꠣꠟ ꠝꠣꠐꠤ ꠕꠣꠇꠤ ꠖꠥꠁ ꠀꠔ ꠃꠌꠣ ꠔꠥꠛ ꠅꠁꠀ, ꠉꠤꠍ ꠟꠣꠉꠤꠀ ꠙꠠꠤ ꠞꠁꠟ। 32 ꠔꠦꠃ ꠢꠃ ꠖꠤꠘ, ꠢꠃ ꠞꠣꠁꠔ, ꠀꠞ ꠛꠣꠖꠞ ꠀꠡ꠆ꠔꠣ ꠖꠤꠘ ꠝꠣꠘꠡꠦ ꠛꠣꠞꠦ ꠉꠤꠀ ꠇꠥꠄꠟ ꠙꠣꠈꠤꠘ ꠔꠥꠛꠣꠁꠀ ꠀꠘꠟꠣ। ꠔꠣꠞꠣ ꠙꠞꠔꠦꠇꠦ ꠇꠝꠙꠇ꠆ꠇꠦ ꠙꠁꠘ꠆ꠌꠣꠡ ꠝꠘ ꠇꠞꠤ ꠙꠣꠈꠤ ꠖꠟꠣ ꠇꠞꠟ। ꠙꠣꠈꠤꠘ ꠖꠟꠣ ꠇꠞꠤꠀ ꠇꠦꠝ꠆ꠙꠞ ꠌꠣꠁꠞꠅꠛꠣꠄ ꠔꠣꠞꠣ ꠛꠅꠀꠁꠀ ꠕꠁꠟꠣ। 33 ꠅꠁꠟꠦ ꠙꠣꠈꠤꠞ ꠉꠥꠡ꠆ꠔ ꠔꠣꠞꠣꠞ ꠝꠥꠈꠅ ꠢꠣꠞꠣꠘꠤꠞ ꠟꠉꠦ ꠟꠉꠦꠃ ꠝꠣꠛꠥꠖ ꠉꠥꠍꠣꠄ ꠀꠉꠥꠁꠘ ꠅꠁꠉꠦꠟꠣ। ꠉꠥꠍꠣ ꠇꠞꠤꠀ ꠔꠣꠁꠘ ꠛꠦꠎꠥꠁꠔꠣ ꠉꠎꠛꠤ ꠛꠦꠝꠣꠞ ꠓꠣꠟꠤꠟꠣ। 34 ꠄꠞꠟꠣꠉꠤ ꠁ ꠎꠣꠉꠣꠞ ꠘꠣꠝ ꠖꠦꠅꠀ ꠅꠁꠟ ꠇꠤꠛꠞꠥꠔ-ꠢꠥꠔꠣꠛꠣ, ꠝꠣꠘꠤ ꠟꠣꠟꠌꠤ ꠅꠇꠟꠞ ꠇꠄꠛꠞ, ꠇꠣꠞꠘ ꠅꠃ ꠟꠣꠟꠌꠤ ꠅꠇꠟꠞꠦ ꠝꠣꠘꠡꠦ ꠅꠘꠅ ꠇꠄꠛꠞ ꠖꠤꠍꠤꠟ।

35 ꠄꠞꠛꠣꠖꠦ ꠔꠣꠞꠣ ꠇꠤꠛꠞꠥꠔ-ꠢꠥꠔꠣꠛꠣ ꠍꠣꠠꠤꠀ ꠉꠦꠟꠣꠉꠤ, ꠉꠤꠀ ꠢꠣꠎꠤꠞꠥꠔ ꠘꠣꠝꠞ ꠎꠣꠉꠣꠔ ꠞꠁꠟꠣ।