1 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 2 “ꠔꠥꠝꠤ ꠞꠥꠙꠣꠞ ꠙꠣꠔ ꠙꠤꠐꠣꠁꠀ ꠖꠥꠁꠐꠣ ꠌꠥꠋꠉꠣ ꠛꠣꠘꠣꠅ। ꠛꠘꠤ ꠁꠍꠞꠣꠁꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠣꠞ ꠘꠤꠅꠔꠦ ꠒꠣꠇꠤꠛꠣꠞ ꠟꠣꠉꠤ ꠅꠃ ꠌꠥꠋꠉꠣ ꠛꠣꠎꠣꠁꠅ, ꠔꠣꠞꠣꠞ ꠘꠣꠘꠣꠘ ꠖꠟ ꠍꠚꠞꠅ ꠞꠅꠀꠘꠣ ꠅꠀꠞ ꠛꠣꠟꠣꠅ ꠔꠥꠝꠤ ꠅꠉꠥꠁꠘ ꠛꠣꠎꠣꠁꠅ। 3 ꠅꠃ ꠖꠥꠁꠅ ꠌꠥꠋꠉꠣ ꠎꠦꠛꠟꠣ ꠄꠇꠟꠉꠦ ꠛꠣꠎꠣꠘꠤ ꠅꠁꠛ, ꠅꠃ ꠡꠝꠄ ꠢꠇꠟ ꠛꠘꠤ ꠁꠍꠞꠣꠁꠟ ꠔꠥꠝꠣꠞ ꠍꠣꠝꠘꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠀꠁꠀ ꠖꠟꠣ ꠅꠁꠛꠣ। 4 ꠅꠁꠟꠦ ꠄꠇꠐꠣ ꠌꠥꠋꠉꠣ ꠛꠣꠎꠣꠘꠤ ꠅꠁꠟꠦ ꠈꠣꠟꠤ ꠛꠘꠤ ꠁꠍꠞꠣꠁꠟꠞ ꠘꠣꠘꠣꠘ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞ ꠅꠇꠟ ꠔꠥꠝꠣꠞ ꠍꠣꠝꠘꠦ ꠀꠁꠀ ꠖꠟꠣ ꠅꠁꠛꠣ। 5 ꠙꠄꠟꠣ ꠛꠣꠞ ꠌꠥꠋꠉꠣ ꠛꠣꠎꠣꠁꠟꠦ ꠝꠤꠟꠘ-ꠔꠣꠝ꠆ꠛꠥꠞ ꠙꠥꠛꠦꠖꠤ ꠎꠦꠞꠣ ꠔꠣꠝ꠆ꠛꠥ ꠐꠣꠋꠉꠣꠁꠍꠦ, ꠔꠣꠞꠣ ꠞꠅꠀꠘꠣ ꠖꠤꠛꠣ। 6 ꠖꠥꠍꠞꠣꠛꠣꠞ ꠛꠣꠎꠣꠁꠟꠦ ꠖꠃꠇꠘꠞ ꠉꠣꠟꠣꠞ ꠖꠟ ꠅꠇꠟ ꠞꠅꠀꠘꠣ ꠖꠤꠛꠣ। ꠁꠇꠐꠣ ꠔ ꠍꠚꠞꠅ ꠞꠅꠀꠘꠣ ꠖꠤꠛꠣꠞ ꠡꠋꠇꠦꠔ। 7 ꠔꠦ ꠢꠇꠟ ꠝꠣꠘꠡꠞꠦ ꠖꠟꠣ ꠇꠞꠣꠞ ꠟꠣꠉꠤ ꠔꠥꠝꠤ ꠖꠥꠁꠅ ꠌꠥꠋꠉꠣ ꠛꠣꠎꠣꠁꠅ, ꠅꠁꠟꠦ ꠄꠞ ꠡꠥꠞ ꠅꠁꠛ ꠀꠟꠣꠖꠣ ꠞꠇꠝꠞ। 8 ꠅꠃ ꠌꠥꠋꠉꠣ ꠛꠣꠎꠣꠁꠛꠣ ꠁꠝꠣꠝ ꠢꠣꠞꠥꠘꠞ ꠛꠋꠡꠞ ꠁꠝꠣꠝ ꠅꠇꠟꠦ। ꠁꠐꠣ ꠔꠥꠝꠞꠣꠞ ꠟꠣꠉꠤ ꠀꠞ ꠔꠥꠝꠞꠣꠞ ꠛꠋꠡꠗꠞꠞ ꠟꠣꠉꠤꠅ ꠌꠤꠞꠇꠣꠟꠤꠘ ꠘꠤꠅꠝ।

9 “ꠘꠤꠎꠞ ꠖꠦꠡꠅ ꠉꠤꠀ ꠢꠣꠞꠟꠦ ꠔꠥꠝꠞꠣ ꠎꠦꠛꠟꠣ ꠇꠥꠘꠥ ꠎꠥꠟꠥꠝꠛꠣꠎ ꠖꠥꠡꠝꠘꠞ ꠟꠉꠦ ꠟꠣꠠꠣꠁꠔ ꠛꠣꠞ ꠅꠁꠛꠣꠄ, ꠅꠃ ꠡꠝꠄ ꠖꠥꠁꠅ ꠌꠥꠋꠉꠣ ꠛꠣꠎꠣꠁꠀ ꠡꠋꠇꠦꠔ ꠖꠤꠛꠣꠄ। ꠔꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠛꠣꠄ ꠈꠤꠀꠟ ꠇꠞꠤꠀ ꠖꠥꠡꠝꠘꠞ ꠀꠔ ꠕꠣꠇꠤ ꠔꠥꠝꠞꠣꠞꠦ ꠛꠣꠌꠣꠁꠛꠣ। 10 ꠔꠥꠝꠞꠣꠞ ꠈꠥꠡꠤ-ꠛꠣꠡꠤꠞ ꠅꠘꠥꠡ꠆ꠐꠣꠘꠅ, ꠔꠥꠝꠞꠣꠞ ꠢꠇꠟ ꠁꠖꠅ, ꠌꠣꠘ꠆ꠖꠞ ꠙꠄꠟꠣ ꠖꠤꠘ ꠎꠦꠛꠟꠣ ꠎꠣꠟꠣꠁꠟ ꠇꠥꠞꠛꠣꠘꠤ ꠛꠣ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠖꠤꠛꠣꠄ, ꠅꠃ ꠡꠝꠄꠅ ꠌꠥꠋꠉꠣ ꠛꠣꠎꠣꠁꠅ। ꠅꠃ ꠀꠅꠀꠎ ꠢꠥꠘꠟꠦ ꠔꠥꠝꠞꠣꠞ ꠀꠟ꠆ꠟꠣꠄ ꠔꠥꠝꠞꠣꠞ ꠛꠣꠄ ꠌꠃꠈ ꠚꠤꠞꠣꠁꠛꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ।”

11 ꠛꠘꠤ ꠁꠍꠞꠣꠁꠟ ꠎꠣꠔꠤ ꠝꠤꠡꠞ ꠕꠣꠇꠤ ꠛꠣꠞꠘꠤꠞ ꠖꠥꠍꠞꠣ ꠛꠍꠞꠞ ꠖꠥꠍꠞꠣ ꠌꠣꠘ꠆ꠖꠞ ꠛꠤꠡ ꠔꠣꠞꠤꠈ ꠡꠣꠢꠣꠖꠔ ꠔꠣꠝ꠆ꠛꠥ ꠝꠣꠘꠤ ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠕꠣꠇꠤ ꠇꠥꠖꠞꠔꠤ ꠝꠦꠊꠞ ꠈꠥꠐꠤ ꠢꠞꠤꠉꠦꠟ। 12 ꠅꠃ ꠡꠝꠄ ꠛꠘꠤ ꠁꠍꠞꠣꠁꠟꠦ ꠍꠤꠘꠣꠁ ꠝꠞꠥꠜꠥꠝꠤ ꠕꠣꠇꠤ ꠞꠅꠀꠘꠣ ꠖꠤꠟꠣ। ꠢꠃ ꠝꠦꠊꠞ ꠈꠥꠐꠤ ꠚꠣꠞꠣꠘ ꠝꠞꠥꠜꠥꠝꠤꠔ ꠀꠁꠀ ꠕꠤꠞ ꠘꠣ ꠅꠀ ꠙꠞ꠆ꠎꠘ꠆ꠔ ꠔꠣꠞꠣ ꠌꠟꠣꠔꠃ ꠞꠁꠟꠣ। 13 ꠝꠥꠍꠣ ꠘꠛꠤꠞ ꠝꠣꠎꠖꠤ ꠝꠣꠛꠥꠖꠞ ꠢꠥꠇꠥꠝ ꠙꠣꠁꠀ, ꠔꠣꠞꠣ ꠙꠄꠟꠣ ꠛꠣꠞ ꠅꠃ ꠍꠚꠞꠅ ꠞꠅꠀꠘꠣ ꠅꠁꠟꠣ।

14 ꠙꠄꠟꠣꠃ ꠄꠢꠥꠖꠣꠞ ꠙꠔꠣꠇꠣꠞ ꠔꠤꠘꠅ ꠈꠣꠘ꠆ꠖꠣꠘꠞ ꠘꠣꠘꠣꠘ ꠚꠃꠎꠤ ꠖꠟꠦ ꠞꠅꠀꠘꠣ ꠖꠤꠟꠣ, ꠄꠞꠣꠞ ꠘꠦꠔꠣ ꠀꠍꠟꠣ ꠀꠝꠤꠘꠣꠖꠣꠛꠞ ꠙꠥꠀ ꠘꠣꠢꠤꠡ। 15 ꠄꠞꠣꠞ ꠝꠣꠎꠦ ꠁꠍꠣꠈꠞ ꠈꠣꠘ꠆ꠖꠣꠘꠞ ꠝꠣꠘꠡꠞ ꠖꠣꠄꠁꠔ꠆ꠔ ꠀꠍꠤꠟ ꠍꠥꠉꠣꠞꠞ ꠙꠥꠀ ꠘꠕꠘꠦꠟꠞ ꠃꠙꠞꠦ, 16 ꠀꠞ ꠍꠛꠥꠟꠘ ꠈꠣꠘ꠆ꠖꠣꠘꠞ ꠝꠣꠘꠡꠞ ꠖꠣꠄꠁꠔ꠆ꠔ ꠀꠍꠤꠟ ꠢꠦꠟꠘꠞ ꠙꠥꠀ ꠁꠟꠤꠀꠛꠞ ꠃꠙꠞꠦ। 17 ꠛꠣꠖꠦ ꠀꠟ꠆ꠟꠣꠞ ꠊꠞꠞ ꠢꠇꠟꠔꠣ ꠈꠥꠟꠣ ꠅꠁꠟ, ꠔꠦꠃ ꠎꠣꠞꠍꠥꠘꠤ ꠀꠞ ꠝꠣꠞꠣꠞꠤꠀ ꠅꠇꠟꠦ ꠅꠈꠣꠘꠞ ꠢꠇꠟꠔꠣ ꠛꠁꠀ ꠟꠁꠀ ꠞꠅꠀꠘꠣ ꠖꠤꠟꠣ।

18 ꠄꠞꠣꠞ ꠛꠣꠖꠦ ꠞꠥꠛꠦꠘꠞ ꠙꠔꠣꠇꠣꠞ ꠔꠤꠘꠅ ꠈꠣꠘ꠆ꠖꠣꠘꠞ ꠚꠃꠎꠤ ꠖꠟꠦ ꠞꠅꠀꠘꠣ ꠖꠤꠟꠣ, ꠄꠞꠣꠞ ꠡꠞ꠆ꠖꠣꠞ ꠅꠁꠟꠣ ꠡꠣꠖꠤꠃꠞꠞ ꠙꠥꠀ ꠀꠟꠤꠍꠥꠞ। 19 ꠄꠞꠣꠞ ꠝꠣꠎꠦ ꠡꠤꠝꠤꠅꠘ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ ꠡꠥꠞꠡꠣꠖꠣꠄꠅꠞ ꠙꠥꠀ ꠡꠣꠟꠥꠝꠤꠟꠞ ꠃꠙꠞꠦ, 20 ꠀꠞ ꠍꠣꠖꠥ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ, ꠖꠥꠄꠟꠞ ꠙꠥꠀ ꠁꠟꠤꠀꠍꠚꠞ ꠃꠙꠞꠦ। 21 ꠄꠞꠣꠞ ꠛꠣꠖꠦ ꠀꠟ꠆ꠟꠣꠞ ꠊꠞꠞ ꠙꠣꠇ-ꠙꠛꠤꠔ꠆ꠞ ꠝꠣꠟ-ꠍꠣꠝꠣꠘꠣ ꠟꠁꠀ ꠇꠣꠢꠣꠔꠤ ꠅꠇꠟꠦ ꠞꠅꠀꠘꠣ ꠖꠤꠟꠣ। ꠇꠣꠢꠣꠔꠤ ꠅꠇꠟ ꠎꠣꠉꠣꠔ ꠉꠤꠀ ꠙꠃꠍꠣꠞ ꠀꠉꠦꠃ ꠀꠟ꠆ꠟꠣꠞ ꠊꠞ ꠈꠣꠠꠣ ꠇꠞꠣꠞ ꠇꠕꠣ ꠀꠍꠤꠟ।

22 ꠄꠞꠛꠣꠖꠦ ꠀꠚꠞꠣꠁꠝ ꠙꠔꠣꠇꠣꠞ ꠔꠤꠘꠅ ꠚꠃꠎꠤ ꠖꠟꠞ ꠝꠣꠘꠡꠦ ꠞꠅꠀꠘꠣ ꠖꠤꠟꠣ, ꠄꠞꠣꠞ ꠡꠞ꠆ꠖꠣꠞ ꠅꠁꠟꠣ ꠀꠝꠤꠢꠥꠖꠞ ꠙꠥꠀ ꠀꠟꠤꠡꠣꠝꠣ। 23 ꠄꠞ ꠝꠣꠎꠦ ꠝꠣꠘꠡꠣ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ ꠚꠣꠔꠡꠥꠞꠞ ꠙꠥꠀ ꠉꠝꠟꠤꠄꠟꠞ ꠃꠙꠞꠦ। 24 ꠀꠞ ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ ꠎꠤꠖꠣꠃꠘꠤꠞ ꠙꠥꠀ ꠀꠛꠤꠖꠣꠘꠞ ꠃꠙꠞꠦ।

25 ꠢꠇꠟ ꠢꠦꠡꠦ ꠞꠅꠀꠘꠣ ꠅꠁꠟꠣ ꠖꠣꠘ ꠙꠔꠣꠇꠣꠞ ꠔꠤꠘꠅ ꠈꠣꠘ꠆ꠖꠣꠘꠞ ꠚꠃꠎꠤ ꠖꠟꠞ ꠝꠣꠘꠡꠦ, ꠔꠣꠞꠣꠞ ꠡꠞ꠆ꠖꠣꠞ ꠅꠁꠟꠣ ꠀꠝꠤꠡꠣꠖꠣꠞ ꠙꠥꠀ ꠀꠈꠤꠀꠎꠣꠞ। ꠄꠞꠣꠞ ꠍꠣꠝꠘꠞ ꠢꠇꠟ ꠚꠃꠎꠤ ꠖꠟꠞꠦ ꠙꠣꠞꠣ ꠖꠤꠀ ꠔꠣꠞꠣꠞ ꠈꠞꠦ ꠈꠞꠦ ꠞꠁꠟꠣ। 26 ꠄꠞ ꠝꠣꠎꠦ ꠀꠡꠤꠞ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ ꠃꠇꠞꠣꠘꠞ ꠙꠥꠀ ꠚꠎꠤꠄꠟꠞ ꠃꠙꠞꠦ, 27 ꠀꠞ ꠘꠙ꠆ꠔꠣꠟꠤ ꠈꠣꠘ꠆ꠖꠣꠘꠞ ꠖꠣꠄꠁꠔ꠆ꠔ ꠀꠍꠤꠟ ꠁꠘꠣꠘꠞ ꠙꠥꠀ ꠀꠢꠤꠞꠞ ꠃꠙꠞꠦ। 28 ꠅꠃ ꠟꠣꠈꠣꠘ ꠛꠘꠤ ꠁꠍꠞꠣꠁꠟꠞ ꠘꠣꠘꠣꠘ ꠚꠃꠎꠤ ꠖꠟ ꠄꠇꠦ ꠄꠇꠦ ꠞꠅꠀꠘꠣ ꠅꠁꠟꠣ।

29 ꠄꠞꠛꠣꠖꠦ ꠝꠥꠍꠣꠄ ꠝꠣꠖꠤꠀꠘ ꠖꠦꠡꠞ ꠔꠣꠘ ꠢꠃꠞ ꠡꠥꠀꠁꠛ ꠘꠛꠤꠞ ꠙꠥꠀ ꠢꠛꠛꠞꠦ ꠇꠁꠟꠣ, “ꠝꠣꠛꠥꠖꠦ ꠀꠝꠞꠣꠞꠦ ꠎꠦ ꠖꠦꠡ ꠖꠤꠛꠣꠞ ꠅꠀꠖꠣ ꠇꠞꠍꠂꠘ, ꠀꠝꠞꠣ ꠢꠃ ꠖꠦꠡꠅ ꠎꠣꠁꠞꠣꠝꠉꠤ। ꠔꠦ ꠔꠥꠝꠤꠅ ꠀꠝꠞꠣꠞ ꠟꠉꠦ ꠀꠅ। ꠝꠣꠛꠥꠖꠦ ꠔ ꠅꠀꠖꠣ ꠇꠞꠍꠂꠘ, ꠔꠣꠁꠘ ꠛꠘꠤ ꠁꠍꠞꠣꠁꠟꠞꠦ ꠛꠃꠔ ꠝꠦꠢꠦꠞꠛꠣꠘꠤ ꠇꠞꠛꠣ। ꠅꠈꠘ ꠔꠥꠝꠤ ꠀꠝꠞꠣꠞ ꠟꠉꠦ ꠀꠁꠟꠦ ꠀꠝꠞꠣ ꠔꠥꠝꠣꠞꠦ ꠈꠥꠛ ꠝꠣꠄꠀ-ꠖꠄꠀ ꠇꠞꠝꠥ।” 30 ꠢꠛꠛꠦ ꠎꠥꠀꠙ ꠖꠤꠟꠣ, “ꠘꠣ, ꠀꠝꠤ ꠎꠣꠁꠔꠣꠝ ꠘꠣꠄ। ꠀꠝꠤ ꠀꠝꠣꠞ ꠖꠦꠡꠅ ꠘꠤꠎꠞ ꠝꠣꠘꠡꠞ ꠉꠦꠍꠦ ꠚꠤꠞꠤꠀ ꠎꠣꠁꠝꠥꠉꠤ।” 31 ꠅꠁꠟꠦ ꠝꠥꠍꠣꠄ ꠇꠁꠟꠣ, “ꠘꠣ, ꠘꠣ, ꠔꠥꠝꠤ ꠀꠝꠞꠣꠞꠦ ꠚꠣꠟꠣꠁꠀ ꠎꠣꠁꠅ ꠘꠣ। ꠔꠥꠝꠤꠃ ꠀꠝꠞꠣꠞ ꠙꠕ ꠖꠦꠈꠣꠅꠞꠣ ꠎꠘ। ꠝꠞꠥꠜꠥꠝꠤꠞ ꠝꠣꠎꠦ ꠇꠥꠘ ꠎꠣꠉꠣꠔ ꠀꠝꠞꠣꠞ ꠔꠣꠝ꠆ꠛꠥ ꠉꠣꠠꠣ ꠃꠌꠤꠔ, ꠁꠔꠣ ꠔ ꠔꠥꠝꠣꠞ ꠎꠣꠘꠣ ꠀꠍꠦ, ꠄꠞꠟꠣꠉꠤ ꠔꠥꠝꠤꠃ ꠅꠁꠟꠣꠄ ꠀꠝꠞꠣꠞ ꠌꠃꠈ। 32 ꠢꠥꠘꠅ, ꠔꠥꠝꠤ ꠎꠥꠖꠤ ꠀꠝꠞꠣꠞ ꠟꠉꠦ ꠀꠅ, ꠔꠦ ꠝꠣꠛꠥꠖꠦ ꠀꠝꠞꠣꠞꠦ ꠎꠔ ꠝꠦꠢꠦꠞꠛꠣꠘꠤ ꠇꠞꠣꠞ ꠅꠀꠖꠣ ꠇꠞꠍꠂꠘ, ꠔꠥꠝꠣꠞꠦꠅ ꠅꠔꠣꠞ ꠛꠣꠐ ꠖꠤꠝꠥ।”

33 ꠅꠃ ꠟꠣꠈꠣꠘ ꠛꠘꠤ ꠁꠍꠞꠣꠁꠟꠦ ꠝꠣꠛꠥꠖꠞ ꠙꠣꠠ ꠕꠣꠇꠤ ꠞꠅꠀꠘꠣ ꠅꠁꠀ ꠔꠤꠘ ꠖꠤꠘꠞ ꠙꠕ ꠀꠉꠥꠀꠁ ꠉꠦꠟꠣ। ꠀꠞ ꠎꠤꠞꠣꠁꠛꠣꠞ ꠟꠣꠉꠤ ꠄꠇꠈꠣꠘ ꠎꠣꠉꠣ ꠔꠥꠇꠣꠁꠀ ꠛꠣꠞ ꠇꠞꠣꠞ ꠈꠤꠀꠟꠦ, ꠝꠣꠛꠥꠖꠞ ꠢꠃ ꠙꠛꠤꠔ꠆ꠞ ꠡꠣꠢꠣꠖꠔ ꠡꠘ꠆ꠖꠥꠇ ꠔꠤꠘ ꠖꠤꠘ ꠗꠞꠤ ꠔꠣꠞꠣꠞ ꠀꠉꠦ ꠀꠉꠦ ꠉꠦꠟ। 34 ꠇꠦꠝ꠆ꠙ ꠕꠣꠇꠤ ꠞꠅꠀꠘꠣ ꠅꠀꠞ ꠛꠣꠖꠦ, ꠖꠤꠘꠞ ꠛꠦꠟꠣ ꠝꠣꠛꠥꠖꠞ ꠉꠣꠁꠛꠤ ꠝꠦꠊꠞ ꠈꠥꠐꠤ ꠛꠘꠤ ꠁꠍꠞꠣꠁꠟꠞ ꠃꠙꠞꠦ ꠞꠁꠔ।

35 ꠅꠃ ꠡꠣꠢꠣꠖꠔ ꠡꠘ꠆ꠖꠥꠇ ꠞꠅꠀꠘꠣ ꠅꠁꠟꠦꠃ ꠝꠥꠍꠣꠄ ꠇꠁꠔꠣ, “ꠅ ꠝꠣꠛꠥꠖ, ꠌꠟꠃꠇ꠆ꠇꠣ। ꠔꠥꠝꠣꠞ ꠖꠥꠡꠝꠘ ꠅꠇꠟ ꠌꠣꠁꠞꠅꠛꠣꠄ ꠍꠤꠔ꠆ꠞꠤ ꠎꠣꠃꠇ, ꠔꠥꠝꠣꠞꠦ ꠎꠦꠔꠣꠄ ꠁꠋꠡꠣꠁꠘ, ꠁꠔꠣ ꠔꠥꠝꠣꠞ ꠍꠣꠝꠘ ꠕꠣꠇꠤ ꠜꠣꠉꠃꠇ।” 36 ꠀꠞ ꠎꠦꠛꠟꠣ ꠅꠃ ꠡꠘ꠆ꠖꠥꠇ ꠕꠣꠝꠤꠎꠤꠔ, ꠔꠣꠁꠘ ꠇꠁꠔꠣ, “ꠅ ꠝꠣꠛꠥꠖ, ꠟꠣꠈ ꠟꠣꠈ ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠔꠥꠝꠤ ꠚꠤꠞꠤꠀ ꠀꠅ।”