1 ꠛꠘꠤ ꠁꠍꠞꠣꠁꠟ ꠎꠣꠔꠤ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞꠘꠤꠞ ꠖꠥꠍꠞꠣ ꠛꠍꠞꠞ ꠙꠄꠟꠣ ꠌꠣꠘ꠆ꠖꠅ, ꠍꠤꠘꠣꠁ ꠝꠞꠥꠜꠥꠝꠤꠔ ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠛꠣꠔꠣꠁꠟꠣ, 2 “ꠛꠘꠤ ꠁꠍꠞꠣꠁꠟꠦ ꠎꠣꠘꠥ ꠑꠤꠇ ꠡꠝꠄꠄ ꠀꠎꠣꠖꠤ ꠁꠖ ꠀꠖꠣꠄ ꠇꠞꠂꠘ। 3 ꠔꠣꠞꠣ ꠅꠃ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈ ꠢꠣꠁꠘ꠆ꠎꠣ ꠛꠣꠟꠣ ꠀꠝꠣꠞ ꠘꠤꠅꠝ-ꠇꠣꠘꠥꠘ ꠝꠣꠘꠤꠀ ꠁꠖ ꠀꠖꠣꠄ ꠇꠞꠔꠦ ꠅꠁꠛ।”

4 ꠝꠣꠛꠥꠖꠞ ꠢꠥꠇꠥꠝ ꠙꠣꠁꠀ ꠝꠥꠍꠣꠄ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ ꠀꠎꠣꠖꠤ ꠁꠖ ꠀꠖꠣꠄ ꠇꠞꠣꠞ ꠟꠣꠉꠤ। 5 ꠄꠞꠖꠣꠄ ꠔꠣꠞꠣ ꠙꠄꠟꠣ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈ ꠢꠣꠁꠘ꠆ꠎꠣ ꠛꠣꠟꠣ ꠍꠤꠘꠣꠁ ꠝꠞꠥꠜꠥꠝꠤꠔ ꠅꠃ ꠁꠖ ꠀꠖꠣꠄ ꠇꠞꠟꠣ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣꠈꠣꠘ ꠢꠥꠇꠥꠝ ꠖꠤꠍꠟꠣ, ꠔꠣꠞꠣ ꠑꠤꠇ ꠅꠟꠣꠈꠣꠘ ꠢꠇꠟꠔꠣ ꠇꠞꠟꠣ।

6 ꠅꠁꠟꠦ ꠔꠣꠞꠣꠞ ꠝꠣꠎꠦ ꠇꠄꠎꠘꠦ ꠝꠞꠣ ꠟꠣꠡꠞꠦ ꠍꠁꠀ ꠘꠣꠙꠣꠇ ꠅꠀꠄ, ꠅꠃ ꠖꠤꠘ ꠀꠎꠣꠖꠤ ꠁꠖ ꠇꠞꠔ ꠙꠣꠞꠟ ꠘꠣ। ꠄꠞꠟꠣꠉꠤ ꠅꠃ ꠖꠤꠘꠃ ꠔꠣꠞꠣ ꠝꠥꠍꠣ ꠀꠞ ꠢꠣꠞꠥꠘ ꠘꠛꠤꠞ ꠉꠦꠍꠦ ꠉꠤꠀ ꠀꠎꠤꠞ ꠅꠁꠟꠣ। 7 ꠔꠣꠞꠣ ꠝꠥꠍꠣꠞꠦ ꠎꠤꠇꠣꠁꠟꠣ, “ꠝꠞꠣ ꠟꠣꠡ ꠍꠅꠀꠄ ꠀꠝꠞꠣ ꠘꠣꠙꠣꠇ ꠅꠁꠍꠤ, ꠄꠞꠟꠣꠉꠤ ꠛꠘꠤ ꠁꠍꠞꠣꠁꠟꠞ ꠟꠉꠦ ꠑꠤꠇ ꠡꠝꠄ ꠝꠣꠛꠥꠖꠞ ꠘꠣꠝꠦ ꠇꠥꠞꠛꠣꠘꠤ ꠖꠤꠔꠣꠝ ꠙꠣꠞꠔꠣꠝ ꠘꠣ ꠇꠦꠘꠦ?” 8 ꠝꠥꠍꠣꠄ ꠎꠥꠀꠙ ꠖꠤꠟꠣ, “ꠔꠥꠝꠞꠣꠞ ꠛꠦꠙꠣꠞꠦ ꠝꠣꠛꠥꠖꠞ ꠢꠥꠇꠥꠝ ꠘꠣ ꠎꠣꠘꠣ ꠙꠞ꠆ꠎꠘ꠆ꠔ ꠔꠥꠝꠞꠣ ꠛꠣꠞ ꠌꠣꠅ।”

9 ꠅꠃ ꠡꠝꠄ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 10 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠣꠞꠣ ꠛꠣ ꠔꠣꠞꠣꠞ ꠛꠋꠡꠞ ꠇꠦꠃ ꠎꠥꠖꠤ ꠝꠞꠣ ꠟꠣꠡꠞꠦ ꠗꠞꠣ-ꠍꠥꠀꠞ ꠇꠣꠞꠘꠦ ꠘꠣꠙꠣꠇ ꠛꠘꠤꠎꠣꠄ, ꠛꠣ ꠝꠥꠍꠣꠚꠤꠞ ꠢꠣꠟꠔꠦ ꠟꠣꠝ꠆ꠛꠣ ꠍꠚꠞꠅ ꠕꠣꠇꠦ, ꠔꠦ ꠔꠣꠞꠣꠅ ꠝꠣꠛꠥꠖꠞ ꠘꠣꠝꠦ ꠀꠎꠣꠖꠤ ꠁꠖ ꠀꠖꠣꠄ ꠇꠞꠔꠣ ꠙꠣꠞꠛꠣ। 11 ꠖꠥꠍꠞꠣ ꠌꠣꠘ꠆ꠖꠞ ꠌꠃꠖ꠆ꠖ ꠔꠣꠞꠤꠈ ꠢꠣꠁꠘ꠆ꠎꠣ ꠛꠣꠟꠣ ꠔꠣꠞꠣ ꠅꠃ ꠁꠖ ꠇꠞꠛꠣ। ꠀꠎꠣꠖꠤ ꠁꠖꠞ ꠉꠥꠡ꠆ꠔꠞ ꠟꠉꠦ ꠈꠣꠝꠤꠞ ꠍꠣꠠꠣ ꠞꠥꠐꠤ ꠀꠞ ꠔꠤꠔ꠆ꠔꠣ ꠢꠣꠉ ꠙꠥꠞꠣꠁꠀ ꠈꠣꠁꠛꠣ। 12 ꠛꠤꠀꠘ ꠙꠞ꠆ꠎꠘ꠆ꠔ ꠇꠥꠘꠥꠎꠣꠔ ꠈꠣꠘꠤ ꠎꠝꠣ ꠞꠣꠈꠣ ꠘꠤꠡꠦꠗ, ꠇꠥꠞꠛꠣꠘꠤꠞ ꠉꠥꠡ꠆ꠔꠞ ꠎꠦꠇꠥꠘꠥ ꠀꠒ꠆ꠒꠤ ꠜꠣꠋꠉꠣ ꠘꠤꠡꠦꠗ। ꠀꠎꠣꠖꠤ ꠁꠖꠞ ꠅꠃ ꠢꠇꠟ ꠘꠤꠅꠝ-ꠇꠣꠘꠥꠘ ꠔꠣꠞꠣ ꠝꠣꠘꠔꠦ ꠅꠁꠛ। 13 ꠅꠁꠟꠦ ꠎꠦꠞꠣ ꠙꠣꠇ-ꠙꠣꠇꠤꠎꠣ ꠢꠣꠟꠔꠦ ꠀꠍꠦ, ꠀꠞ ꠎꠦꠞꠣ ꠍꠚꠞꠞ ꠝꠣꠎꠦ ꠘꠣꠄ, ꠁꠟꠣ ꠇꠥꠘꠥ ꠎꠘꠦ ꠎꠥꠖꠤ ꠀꠎꠣꠖꠤ ꠁꠖꠞ ꠇꠥꠞꠛꠣꠘꠤ ꠘꠣ ꠖꠦꠄ, ꠔꠦ ꠝꠣꠛꠥꠖꠞ ꠑꠤꠇ ꠇꠞꠣ ꠡꠝꠄꠄ ꠇꠥꠞꠛꠣꠘꠤ ꠘꠣ ꠖꠦꠅꠀꠄ, ꠔꠣꠞ ꠎꠣꠔꠤ ꠕꠣꠇꠤ ꠔꠣꠞ ꠘꠣꠝ ꠝꠤꠐꠣꠁꠟꠤꠛꠣꠄ। ꠔꠣꠞ ꠉꠥꠘꠣꠞ ꠡꠣꠎꠣ ꠢꠦ ꠙꠣꠁꠔꠦ ꠅꠁꠛ।

14 “ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠛꠡꠔ ꠇꠞꠞꠣ ꠛꠤꠖꠦꠡꠤ ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠣꠛꠥꠖꠞ ꠘꠣꠝꠦ ꠀꠎꠣꠖꠤ ꠁꠖ ꠀꠖꠣꠄ ꠇꠞꠔ ꠌꠣꠄ, ꠔꠦ ꠇꠞꠔ ꠙꠣꠞꠛ। ꠅꠁꠟꠦ ꠅꠃ ꠁꠖꠞ ꠘꠤꠅꠝ-ꠇꠣꠘꠥꠘ ꠝꠣꠘꠤꠀ ꠀꠖꠣꠄ ꠇꠞꠔꠦ ꠅꠁꠛ। ꠛꠘꠤ ꠁꠍꠞꠣꠁꠟ ꠛꠣ ꠜꠤꠘ-ꠖꠦꠡꠤ ꠢꠇꠟꠦꠃ ꠄꠇꠁ ꠘꠤꠅꠝ ꠝꠣꠘꠔꠦ ꠅꠁꠛ।”

15 ꠀꠟ꠆ꠟꠣꠞ ꠊꠞ ꠡꠣꠢꠣꠖꠔ ꠔꠣꠝ꠆ꠛꠥ ꠎꠦꠖꠤꠘ ꠈꠣꠠꠣ ꠇꠞꠣ ꠅꠁꠟ, ꠅꠃ ꠖꠤꠘ ꠇꠥꠖꠞꠔꠤ ꠝꠦꠊꠞ ꠈꠥꠐꠤ ꠀꠁꠀ ꠀꠡ꠆ꠔꠣ ꠊꠞꠞꠦ ꠉꠥꠞꠤꠟꠤꠟ। ꠢꠣꠁꠘ꠆ꠎꠣ ꠕꠣꠇꠤ ꠛꠤꠀꠘ ꠙꠞ꠆ꠎꠘ꠆ꠔ ꠢꠣꠞꠣ ꠞꠣꠁꠔ ꠁ ꠝꠦꠊꠞ ꠈꠥꠐꠤꠞꠦ ꠘꠥꠞꠞ ꠀꠉꠥꠘꠤꠞ ꠟꠣꠈꠣꠘ ꠖꠦꠈꠣ ꠉꠦꠟ। 16 ꠄꠞꠛꠣꠖ ꠕꠣꠇꠤ ꠅꠟꠣ ꠅꠁꠟ, ꠀꠟ꠆ꠟꠣꠞ ꠊꠞ ꠖꠤꠘꠞ ꠛꠣꠟꠣ ꠢꠣꠝꠦꠡꠣ ꠝꠦꠊꠞ ꠈꠥꠐꠤꠄ ꠉꠥꠞꠣ ꠞꠁꠔ, ꠀꠞ ꠞꠣꠁꠔꠞ ꠛꠣꠟꠣ ꠝꠘꠅ ꠅꠁꠔ ꠁꠔꠣ ꠘꠥꠞꠞ ꠀꠉꠥꠘꠤꠞ ꠈꠥꠐꠤ। 17 ꠀꠞ ꠙꠛꠤꠔ꠆ꠞ ꠔꠣꠝ꠆ꠛꠥꠞ ꠃꠙꠞꠦ ꠕꠣꠇꠤ ꠝꠦꠊꠞ ꠈꠥꠐꠤ ꠎꠦꠛꠟꠣ ꠢꠞꠔ, ꠅꠃ ꠡꠝꠄ ꠛꠘꠤ ꠁꠍꠞꠣꠁꠟ ꠅꠇꠟ ꠍꠚꠞꠅ ꠛꠣꠞ ꠅꠁꠔꠣ, ꠛꠣꠖꠦ ꠎꠦꠘꠅ ꠉꠤꠀ ꠅꠃ ꠈꠥꠐꠤ ꠕꠤꠞ ꠅꠁꠔ, ꠔꠣꠞꠣ ꠅꠈꠣꠘꠅꠃ ꠔꠣꠝ꠆ꠛꠥ ꠅꠇꠟ ꠉꠣꠠꠤꠔꠣ। 18 ꠝꠣꠛꠥꠖꠞ ꠢꠥꠇꠥꠝꠦ ꠔꠣꠞꠣ ꠍꠚꠞꠅ ꠛꠣꠞ ꠅꠁꠔꠣ ꠀꠞ ꠔꠣꠘ ꠢꠥꠇꠥꠝꠦꠃ ꠍꠚꠞ ꠛꠘ꠆ꠖ ꠇꠞꠤꠀ ꠔꠣꠝ꠆ꠛꠥ ꠉꠣꠠꠤꠔꠣ। ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠎꠔꠛꠁꠟ ꠝꠦꠊꠞ ꠈꠥꠐꠤ ꠞꠁꠔ, ꠔꠣꠞꠣ ꠅꠔꠛꠁꠟ ꠇꠦꠝ꠆ꠙꠞ ꠜꠤꠔꠞꠦ ꠞꠁꠔꠣ। 19 ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠝꠦꠊꠞ ꠈꠥꠐꠤ ꠛꠦꠡꠤ ꠖꠤꠘ ꠞꠁꠟꠦ, ꠝꠣꠛꠥꠖꠞ ꠢꠥꠇꠥꠝ ꠝꠣꠘꠤꠀ ꠔꠣꠞꠣ ꠇꠥꠘꠥ ꠍꠚꠞꠅ ꠛꠣꠞ ꠅꠁꠔꠣ ꠘꠣ। 20 ꠝꠣꠎꠦ ꠝꠣꠎꠦ ꠝꠦꠊꠞ ꠈꠥꠐꠤ ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠕꠥꠠꠣ ꠖꠤꠘ ꠞꠁꠔ। ꠛꠘꠤ ꠁꠍꠞꠣꠁꠟ ꠔ ꠝꠣꠛꠥꠖꠞ ꠢꠥꠇꠥꠝꠦ ꠇꠦꠝ꠆ꠙꠅ ꠞꠁꠔꠣ ꠀꠞ ꠔꠣꠘ ꠢꠥꠇꠥꠝꠦꠃ ꠢꠤꠞꠛꠣꠞ ꠍꠚꠞꠅ ꠛꠣꠞ ꠅꠁꠔꠣ। 21 ꠀꠞ ꠝꠣꠎꠦ ꠝꠣꠎꠦ ꠈꠣꠟꠤ ꠢꠣꠁꠘ꠆ꠎꠣ ꠕꠣꠇꠤ ꠛꠤꠀꠘ ꠙꠞ꠆ꠎꠘ꠆ꠔ ꠝꠦꠊꠞ ꠈꠥꠐꠤ ꠞꠁꠔ। ꠛꠤꠀꠘꠦ ꠝꠦꠊꠞ ꠈꠥꠐꠤ ꠢꠞꠤꠉꠦꠟꠦ ꠔꠣꠞꠣ ꠍꠚꠞꠅ ꠛꠣꠞ ꠅꠁꠔꠣ। ꠖꠤꠘꠅ ꠛꠣ ꠞꠣꠁꠔ ꠎꠦꠇꠥꠘꠥ ꠡꠝꠄ ꠝꠦꠊꠞ ꠈꠥꠐꠤ ꠢꠞꠣꠞ ꠟꠉꠦ ꠟꠉꠦꠃ ꠔꠣꠞꠣ ꠍꠚꠞꠅ ꠛꠣꠞ ꠅꠁꠔꠣ। 22 ꠎꠔꠖꠤꠘ ꠝꠦꠊꠞ ꠈꠥꠐꠤ ꠀꠟ꠆ꠟꠣꠞ ꠊꠞꠞ ꠃꠙꠞꠦ ꠞꠁꠔ, ꠅꠔꠖꠤꠘ ꠔꠣꠞꠣ ꠇꠦꠝ꠆ꠙꠅ ꠞꠁꠔꠣ, ꠍꠚꠞꠅ ꠛꠣꠞ ꠅꠁꠔꠣ ꠘꠣ। ꠁꠔꠣ ꠖꠥꠁ ꠖꠤꠘ ꠅꠃꠇ, ꠄꠇ ꠝꠣꠡ ꠛꠣ ꠄꠞ ꠛꠦꠡꠤ ꠅꠁꠟꠦꠅ ꠛꠣꠞ ꠅꠁꠔꠣ ꠘꠣ, ꠈꠣꠟꠤ ꠝꠦꠊꠞ ꠈꠥꠐꠤ ꠢꠞꠣꠞ ꠛꠣꠖꠦ ꠔꠣꠞꠣ ꠍꠚꠞꠅ ꠛꠣꠞ ꠅꠁꠔꠣ। 23 ꠝꠣꠛꠥꠖꠞ ꠢꠥꠇꠥꠝꠦ ꠔꠣꠞꠣ ꠇꠦꠝ꠆ꠙ ꠉꠣꠠꠤꠔꠣ ꠀꠞ ꠔꠣꠘ ꠢꠥꠇꠥꠝꠦꠃ ꠍꠚꠞꠅ ꠞꠅꠀꠘꠣ ꠅꠁꠔꠣ। ꠝꠥꠍꠣ ꠘꠛꠤꠞ ꠝꠣꠞꠚꠔꠦ ꠙꠣꠅꠀ ꠢꠥꠇꠥꠝ ꠝꠣꠚꠤꠇ, ꠔꠣꠞꠣ ꠝꠣꠛꠥꠖꠞ ꠅꠃ ꠘꠤꠅꠝ ꠝꠣꠘꠤꠀ ꠌꠟꠔꠣ।