1 ꠝꠣꠛꠥꠖꠦ ꠝꠥꠍꠣ ꠘꠛꠤꠞꠦ ꠇꠁꠟꠣ, 2 “ꠔꠥꠝꠤ ꠢꠣꠞꠥꠘꠞꠦ ꠇꠅ, ꠀꠝꠣꠞ ꠊꠞꠞ ꠌꠦꠞꠣꠉ ꠖꠣꠘꠤꠞ ꠝꠣꠎꠞ ꠡꠣꠔꠅꠐꠣ ꠌꠦꠞꠣꠉ ꠅꠃ ꠘꠝꠥꠘꠣꠄ ꠟꠣꠉꠣꠁꠔꠣ, ꠎꠣꠔꠦ ꠌꠦꠞꠣꠉꠞ ꠚꠞ ꠌꠦꠞꠣꠉ ꠖꠣꠘꠤꠞ ꠍꠣꠝꠘꠣ ꠛꠣꠄ ꠙꠠꠦ।”

3 ꠢꠣꠞꠥꠘꠦ ꠅꠟꠣꠃ ꠇꠞꠟꠣ। ꠝꠥꠍꠣꠞꠦ ꠛꠣꠔꠣꠁꠟ ꠝꠣꠛꠥꠖꠞ ꠢꠥꠇꠥꠝ ꠝꠣꠚꠤꠇ ꠔꠣꠁꠘ ꠢꠇꠟ ꠌꠦꠞꠣꠉ ꠅꠟꠣꠈꠣꠘ ꠛꠅꠀꠁꠟꠣ, ꠎꠣꠔꠦ ꠌꠦꠞꠣꠉꠞ ꠚꠞ ꠌꠦꠞꠣꠉ ꠖꠣꠘꠤꠞ ꠍꠣꠝꠘꠦꠖꠤ ꠙꠠꠦ। 4 ꠌꠦꠞꠣꠉ ꠖꠣꠘꠤꠞ ꠔꠟ ꠕꠣꠇꠤ ꠀꠉꠣꠞ ꠚꠥꠟ ꠙꠞ꠆ꠎꠘ꠆ꠔ ꠀꠡ꠆ꠔꠣꠐꠣ ꠈꠣꠐꠤ ꠡꠥꠘꠣ ꠙꠤꠐꠣꠁꠀ ꠛꠣꠘꠣꠁꠟ ꠅꠁꠟ। ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠘꠇꠡꠣ ꠖꠦꠈꠣꠁꠍꠟꠣ, ꠑꠤꠇ ꠅꠃ ꠟꠣꠈꠣꠘ ꠌꠦꠞꠣꠉ ꠖꠣꠘꠤ ꠛꠣꠘꠣꠁꠟ ꠅꠁꠟ।

5 ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 6 “ꠔꠥꠝꠤ ꠛꠘꠤ ꠁꠍꠞꠣꠁꠟꠞ ꠝꠣꠎ ꠕꠣꠇꠤ, ꠟꠦꠛꠤ ꠈꠣꠘ꠆ꠖꠣꠘꠞꠦ ꠀꠟꠉ ꠇꠞꠤꠀ ꠙꠣꠇ-ꠙꠣꠇꠤꠎꠣ ꠇꠞꠅ। 7 ꠁ ꠙꠣꠇ-ꠙꠣꠇꠤꠎꠣ ꠇꠞꠣꠞ ꠘꠤꠅꠝ ꠅꠁꠟ, ꠙꠄꠟꠣ ꠔꠣꠞꠣꠞ ꠃꠙꠞꠦ ꠙꠣꠇ-ꠙꠛꠤꠔ꠆ꠞ ꠅꠀꠞ ꠙꠣꠘꠤ ꠍꠤꠐꠣꠁꠀ ꠖꠤꠛꠣꠄ, ꠍꠤꠐꠣꠁꠀ ꠔꠣꠞꠣ ꠘꠤꠎꠦ ꠀꠡ꠆ꠔꠣ ꠡꠞꠤꠟꠞ ꠌꠥꠟ ꠇꠣꠝꠣꠁꠀ ꠇꠣꠙꠠ-ꠌꠥꠙꠠ ꠗꠁꠀ ꠙꠣꠇ-ꠍꠣꠚ ꠛꠘꠛꠣ। 8 ꠀꠞ ꠔꠣꠞꠣ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠛꠤꠍꠣꠟ ꠀꠘꠛꠣ, ꠛꠤꠍꠣꠟꠞ ꠟꠉꠦ ꠗꠣꠘ-ꠉꠝꠞ ꠍꠖꠉꠣꠞ ꠟꠣꠉꠤ ꠔꠦꠟ ꠝꠣꠈꠣꠁꠟ ꠝꠄꠖꠣ, ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤꠅ ꠀꠞꠇꠐꠣ ꠛꠤꠍꠣꠟ ꠀꠘꠣꠁꠅ। 9 ꠛꠣꠖꠦ ꠔꠥꠝꠤ ꠟꠦꠛꠤ ꠅꠇꠟꠞꠦ ꠟꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠍꠣꠝꠘꠦ ꠀꠁꠛꠣꠄ, ꠀꠁꠀ ꠢꠇ꠆ꠇꠟ ꠛꠘꠤ ꠁꠍꠞꠣꠁꠟꠞꠦ ꠢꠘꠅ ꠖꠟꠣ ꠇꠞꠛꠣꠄ। 10 ꠟꠦꠛꠤ ꠅꠇꠟꠞꠦ ꠔꠥꠝꠤ ꠝꠣꠛꠥꠖꠞ ꠖꠞꠛꠣꠞꠅ ꠀꠎꠤꠞ ꠇꠞꠛꠣꠄ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠦ ꠔꠣꠞꠣꠞꠦ ꠀꠔꠣꠁꠀ ꠡꠙꠤꠀ ꠖꠤꠛꠣ। 11 ꠁꠝꠣꠝ ꠢꠣꠞꠥꠘꠦ ꠢꠇꠟ ꠛꠘꠤ ꠁꠍꠞꠣꠁꠟꠞ ꠙꠇ꠆ꠇ ꠕꠣꠇꠤ, ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠟꠦꠛꠤ ꠅꠇꠟꠞꠦ ꠝꠣꠛꠥꠖꠞ ꠍꠣꠝꠘꠦ ꠛꠈꠡꠤꠀ ꠖꠤꠛꠣ, ꠔꠦꠃ ꠔꠣꠞꠣ ꠝꠣꠛꠥꠖꠞ ꠈꠦꠎꠝꠔꠅ ꠇꠣꠝ-ꠇꠣꠎ ꠇꠞꠔꠣ ꠙꠣꠞꠛꠣ। 12 ꠛꠣꠖꠦ ꠟꠦꠛꠤ ꠅꠇꠟꠦ ꠢꠃ ꠖꠥꠁꠅ ꠛꠤꠍꠣꠟꠞ ꠇꠟ꠆ꠟꠣꠞ ꠃꠙꠞꠦ ꠀꠔꠣꠁ ꠖꠤꠛꠣ, ꠖꠤꠟꠦ ꠔꠥꠝꠤ ꠄꠞ ꠄꠇꠐꠣ ꠖꠤꠀ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠞ ꠖꠥꠍꠞꠣꠐꠣ ꠖꠤꠀ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠅ। ꠅꠟꠣꠈꠣꠘ ꠟꠦꠛꠤ ꠅꠇꠟꠞ ꠘꠣꠙꠣꠇꠤꠞ ꠇꠚꠞꠣ ꠀꠖꠣꠄ ꠅꠁꠛ। 13 ꠔꠥꠝꠤ ꠟꠦꠛꠤ ꠅꠇꠟꠞꠦ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞ ꠍꠣꠝꠘꠦ ꠃꠛꠣ ꠇꠞꠣꠁꠀ, ꠝꠣꠛꠥꠖꠞ ꠘꠣꠝꠦ ꠔꠣꠞꠣꠞꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠡꠙꠤꠀ ꠖꠤꠛꠣꠄ। 14 ꠅꠃ ꠟꠣꠈꠣꠘ ꠔꠥꠝꠤ ꠅꠁꠘ꠆ꠘ ꠛꠘꠤ ꠁꠍꠞꠣꠁꠟ ꠕꠣꠇꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠀꠟꠉ ꠇꠞꠛꠣꠄ, ꠔꠦꠃ ꠔꠣꠞꠣ ꠈꠣꠟꠤ ꠀꠝꠣꠞ ꠅꠁꠛꠣ।

15 “ꠟꠦꠛꠤ ꠅꠇꠟꠞꠦ ꠙꠣꠇ-ꠙꠣꠇꠤꠎꠣ ꠇꠞꠤꠀ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠡꠙꠤꠀ ꠖꠤꠀ ꠢꠣꠞꠟꠦ, ꠔꠣꠞꠣ ꠝꠤꠟꠘ-ꠔꠣꠝ꠆ꠛꠥꠞ ꠈꠦꠎꠝꠔꠅ ꠀꠁꠛꠣ। 16 ꠛꠘꠤ ꠁꠍꠞꠣꠁꠟ ꠕꠣꠇꠤ ꠛꠣꠍꠤꠀ ꠀꠟꠉ ꠇꠞꠣ ꠁ ꠟꠦꠛꠤ ꠈꠣꠘ꠆ꠖꠣꠘ ꠈꠣꠟꠤ ꠀꠝꠣꠞ, ꠀꠞ ꠇꠦꠃꠞꠞ ꠘꠣꠄ। ꠙꠞꠔꠦꠇ ꠁꠍꠞꠣꠁꠟꠤ ꠛꠦꠐꠤꠘ꠆ꠔꠞ ꠙꠄꠟꠣ ꠙꠥꠀꠞ ꠛꠖꠟꠣ ꠀꠝꠤ ꠟꠦꠛꠤ ꠈꠣꠘ꠆ꠖꠣꠘꠞꠦ ꠀꠝꠣꠞ ꠘꠤꠎꠞ ꠛꠣꠘꠣꠁꠍꠤ। 17 ꠛꠘꠤ ꠁꠍꠞꠣꠁꠟꠞ ꠊꠞꠅ ꠎꠘꠝ ꠟꠅꠀ ꠢꠇꠟ ꠙꠄꠟꠣ ꠙꠥꠀꠂꠘ ꠀꠝꠣꠞ। ꠀꠝꠤ ꠝꠤꠡꠞꠤ ꠅꠇꠟꠞ ꠙꠄꠟꠣ ꠙꠥꠀꠂꠘ꠆ꠔꠞꠦ ꠝꠣꠞꠤꠟꠤꠛꠣꠞ ꠇꠣꠟꠅ, ꠛꠘꠤ ꠁꠍꠞꠣꠁꠟꠞ ꠙꠞꠔꠦꠇ ꠙꠄꠟꠣ ꠙꠥꠀꠞꠦ ꠀꠝꠣꠞ ꠟꠣꠉꠤ ꠙꠛꠤꠔ꠆ꠞ ꠇꠞꠤꠀ ꠞꠣꠈꠍꠤ, ꠁꠔꠣ ꠝꠣꠘꠡꠞ ꠙꠥꠔ ꠅꠃꠇ ꠛꠣ ꠙꠡꠥꠞ ꠛꠣꠁꠌ꠆ꠌꠣ ꠅꠃꠇ, ꠁꠔꠣ ꠔ ꠀꠝꠣꠞ। 18 ꠀꠞ ꠅꠈꠘ ꠀꠝꠤ ꠛꠘꠤ ꠁꠍꠞꠣꠁꠟꠞ ꠙꠄꠟꠣ ꠙꠥꠀꠂꠘ꠆ꠔꠞ ꠎꠣꠉꠣꠔ ꠈꠣꠟꠤ ꠟꠦꠛꠤ ꠅꠇꠟꠞꠦ ꠀꠝꠣꠞ ꠘꠤꠎꠞ ꠇꠁꠀ ꠇꠛꠥꠟ ꠇꠞꠍꠤ। 19 ꠅꠃ ꠟꠦꠛꠤ ꠅꠇꠟꠞꠦ ꠀꠝꠤ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠡꠝꠎꠣꠁꠍꠤ, ꠎꠣꠔꠦ ꠔꠣꠞꠣ ꠛꠘꠤ ꠁꠍꠞꠣꠁꠟꠞ ꠅꠁꠀ ꠝꠤꠟꠘ-ꠔꠣꠝ꠆ꠛꠥꠞ ꠈꠦꠎꠝꠔ ꠇꠞꠂꠘ, ꠔꠣꠞꠣꠞ ꠉꠥꠘꠣꠞ ꠇꠚꠞꠣꠞ ꠃꠍꠤꠟ꠆ꠟꠣ ꠇꠞꠂꠘ। ꠄꠞꠟꠣꠉꠤ ꠛꠘꠤ ꠁꠍꠞꠣꠁꠟꠞ ꠇꠦꠃ ꠀꠝꠣꠞ ꠊꠞꠞ ꠇꠣꠘ꠆ꠖꠣꠔ ꠀꠁꠟꠦꠅ ꠔꠣꠞ ꠃꠙꠞꠦ ꠇꠥꠘꠥ ꠉꠎꠛ ꠟꠣꠝꠔ ꠘꠣꠄ।”

20 ꠝꠣꠛꠥꠖꠦ ꠟꠦꠛꠤ ꠅꠇꠟꠞ ꠛꠦꠙꠣꠞꠦ ꠝꠥꠍꠣ ꠘꠛꠤꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠅꠃ ꠢꠥꠇꠥꠝ ꠝꠣꠚꠤꠇ ꠝꠥꠍꠣ, ꠢꠣꠞꠥꠘ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠦ ꠅꠟꠣ ꠇꠞꠟꠣ। 21 ꠟꠦꠛꠤ ꠅꠇꠟꠦ ꠘꠤꠎꠞꠦ ꠙꠣꠇ-ꠍꠣꠚ ꠇꠞꠤꠀ ꠢꠣꠞꠤ ꠔꠣꠞꠣꠞ ꠇꠣꠙꠠ-ꠌꠥꠙꠠꠅ ꠕꠁꠟꠣ। ꠛꠣꠖꠦ ꠢꠣꠞꠥꠘꠦ ꠔꠣꠞꠣꠞꠦ ꠝꠣꠛꠥꠖꠞ ꠘꠣꠝꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠡꠙꠤꠀ ꠖꠤꠟꠣ, ꠀꠞ ꠔꠣꠞꠣꠞꠦ ꠙꠣꠇ-ꠙꠣꠇꠤꠎꠣ ꠇꠞꠣꠞ ꠘꠤꠅꠔꠦ ꠔꠣꠞꠣꠞ ꠉꠥꠘꠣꠞ ꠇꠚꠞꠣꠞ ꠛꠦꠛꠡ꠆ꠔꠣ ꠇꠞꠟꠣ। 22 ꠄꠞꠛꠣꠖꠦ ꠟꠦꠛꠤ ꠅꠇꠟꠅ ꠢꠣꠞꠥꠘ ꠀꠞ ꠔꠣꠘ ꠙꠥꠀꠂꠘ꠆ꠔꠞ ꠎꠤꠝ꠆ꠝꠣꠄ ꠝꠤꠟꠘ-ꠔꠣꠝ꠆ꠛꠥꠞ ꠈꠣꠖꠤꠝꠖꠣꠞꠤꠔ ꠉꠦꠟꠣ। ꠉꠦꠟꠦ ꠝꠣꠛꠥꠖꠦ ꠝꠥꠍꠣꠞꠦ ꠟꠦꠛꠤ ꠅꠇꠟꠞ ꠛꠦꠙꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠑꠤꠇ ꠅꠃꠟꠣ ꠇꠞꠣ ꠅꠁꠟ।

23 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 24 “ꠟꠦꠛꠤ ꠅꠇꠟꠞ ꠛꠦꠙꠣꠞꠦ ꠅꠃ ꠘꠤꠅꠝ ꠌꠣꠟꠥ ꠅꠁꠛ, ꠔꠣꠞꠣꠞ ꠝꠣꠎꠦ ꠙꠌꠤꠡ ꠛꠍꠞ ꠛꠣ ꠔꠣꠞ ꠛꠦꠡꠤ ꠛꠄꠅꠡꠤ ꠝꠣꠘꠡꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝ-ꠇꠣꠎ ꠇꠞꠛꠣ, 25 ꠅꠁꠟꠦ ꠙꠁꠘ꠆ꠌꠣꠡ ꠛꠍꠞ ꠅꠁꠀ ꠢꠣꠞꠟꠦ ꠔꠣꠞꠣ ꠅꠛꠡꠞ ꠙꠣꠁꠟꠤꠛꠣ, ꠈꠦꠎꠝꠔ ꠇꠣꠝ ꠛꠣꠖ ꠖꠤꠟꠣꠁꠛꠣ। 26 ꠅꠃ ꠡꠝꠄ ꠔꠣꠞꠣ ꠘꠤꠎꠞ ꠀꠔꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠥꠘꠥ ꠇꠣꠝ ꠇꠞꠣ ꠘꠤꠡꠦꠗ, ꠅꠁꠟꠦ ꠔꠣꠞꠣꠞ ꠝꠘꠦ ꠌꠣꠁꠟꠦ ꠜꠣꠁꠀꠁꠘ꠆ꠔꠞꠦ ꠝꠤꠟꠘ-ꠔꠣꠝ꠆ꠛꠥꠞ ꠇꠣꠝꠅ ꠡꠣꠄ-ꠡꠣꠁꠎ꠆ꠎ ꠇꠞꠛꠣ। ꠅꠃ ꠘꠤꠅꠝꠦ ꠔꠥꠝꠤ ꠟꠦꠛꠤ ꠅꠇꠟꠞ ꠇꠣꠝ-ꠇꠣꠎ ꠑꠤꠇ ꠇꠞꠤ ꠖꠤꠛꠣꠄ।”